Во рамки на 65-тата седница која треба да започне во 12:00 часот, Владата на Република Македонија ќе разгледа повеќе точки од планот за работа, а кои се од интерес на граѓаните.

На предлог на АД за производство на електрична енергија, „Електрани на Македонија“, во државна сопственост, Скопје ќе биде разгледана информацијата за текот и активностите за проектите ХЕ Чебрен и ХЕ Галиште.

Министрите на денешната седница, на барање на Министерството за економија, ќе дебатираат за извештајот за извршени преговори со усогласен текст на договорот за соработка во областа на туризмот меѓу владата на Република Македонија и Советот на министри на Босна и Херцеговина.

На барање на Собранието на Република Македонија на дневен ред на 65-тата седница се 13 предлог – закони за изменување и дополнување. Дел од нив се: предлог- законот за измени и дополнување на законите за лекови и медицински помагала, за санитарни и здравствени инспекторати, за јавни набавки, за инспекциски надзор, за основање на Агенција за промоција и поддршка на туризмот во Република Македонија и.т.н

На денешната седница ќе бидат разгледани и две информации на предлог на Министерството за одбрана, односно информацијата за зголемување на придонесот на Република Македонија во мисијата на НАТО “Одлучна поддршка“ во Авганистан во периодот од август до ноември 2018 година и информацијата за учество на припадници на Армијата на Република Македонија на воена парада во Република Бугарија.

Пред министрите ќе се најдат и информација за прогрес на реализација на акцискиот план за пристапни рампи за лицата со инвалидност и информацијата предложена од министерството за информатичко општество и администрација за статусот на реализација на Националниот Акциски план за Отворено владино партнерство 2016-2018 година.

Како материјал за информирање на владината седница ќе бидат разгледани извештајот за тековниот статус на болниците во процесот на акредитација, за периодот јули - септември 2017 година, како и извештајот за реализација на Програмата за развој на туризмот на Република Македонија за 2017 година.

Изјава за медиумите на министерот за внатрешни работи Оливер Спасовски, 

Скопје, 23.04.2018 година

 

Министерството за внатрешни работи, врз основа на претходно спроведена јавна набавка согласно законските прописи, обезбеди вкупно 464 машки и 39 комплети женска цивилна облека за припадниците на овој Оддел. Единечната цена на машките комплети (палто и пантолони), и на женските комплети (едно палто, пантолони и здолниште) изнесува по 6.560 денари без вклучен ДДВ, односно севкупно 3.299.680 денари без ДДВ.

Целта на нашето работење е унапредување на стандардите на професионалното работење на сите вработени во министертството. Одделот за заштита на определени личности и објекти има свој специфичен делокруг на работни ангажмани и задачи и Министерството е должно да поведе сметка за сите аспекти од нивното работење. Пред нас како министерство престојат уште многу задачи за решавање, уште многу активности не само во поглед на техничко-материјалните услови за работа, туку и во поглед на стручното, организационото и системско унапредување на работата на Министерството. Имаме јасна визија и продолжуваме со нејзина реализација.

Заштитата на граѓаните ни е врвен приоритет, и во таа насока беа спроведени и засилени сообраќајни акциски контроли во текот на викендов на подрачјето на главниот град Министерството за внатрешни работи. Беа извршени вкупно 2.335 проверки на возила и возачи по однос на почитување на сообраќајните правила и прописи.

Притоа, кај 480 возачи констатирано е присуство на алкохол во крвта и тие се исклучени од сообраќај, а истовремено евидентирани се и 454 други сообраќајни прекршоци за што се издадени соодветни санкции.

Во тој контекст сакам да ве информирам дека Министерството за внатрешни работи дополнително, од сопствени буџетски средства, набави осумдесет нови дрегери за алкотестирање по единечна цена од 55 илјади денари без ДДВ, 30 радари за контрола на брзината на возење по единечна цена од 340.000 денари без ДДВ, како и 30 фотоапарати со надворешен блиц и додатна опрема за потребата на сообраќајните увидни екипи по единечна цена 59.355 денари без ДДВ.

Со набавката на оваа опрема полициските службеници ќе можат поефикасно и професионално да ја извршуваат својата задача и да ја гарантираме безбедноста на сите учесници во сообраќајот.

По повод одблежувањето на 22 април, Денот на Планетата Земја, Министерството за животна средина и просторно планирање, на иницијатива на здружението „Гоу Грин“, а во соработка со фондацијата „Поврзување на природни вредности и луѓе – Македонија“ (CNVP), спроведе акција за чистење на езерото Козјак, како дел од националната кампања за чистење на несоодветно депонираниот отпад – „Македонија без отпад 2018“.

Централниот пункт на акцијата за чистење на езерото беше лоциран во туристичката населба Близанско, а учество земаа Министерството за одбрана, Дирекцијата за заштита и спасување на РМ со своја опрема и луѓе, Центарот за управување со кризи, општината Македонски Брод со комуналното претпријатие, ЈП „Јасен“, Агенцијата за млади и спорт, ЕЛЕМ, Асоцијацијата на колективни постапувачи со отпад (кои го обезбедија приборот за чистење и освежувањето за учесниците), Црвен Крст од Македонија, бројни здруженија на граѓани, како и кајакарите од клубот „Кајак Револуција“, нуркачите од спелео – нуркачкиот клуб „Врело“ и планинарите од Федерацијата на планинарски спортови.

- Целта на оваа акција е не само да го исчистиме веќе расфрлениот отпад, туку и да пратиме порака до сите наши граѓани дека е време да го промениме несоодветното однесување во природа – изјави по тој повод заменик министерот за животна средина и просторно планирање Јани Макрадули, кој, заедно со сите присутни помогна во расчистувањето на несоодветно фрлените отпадоци на локацијата. Тој апелираше за сеопфатна акција и нагласи дека доколку сакаме да ставиме крај на пластиката како отпад, тоа да го направиме уште дома селектирајќи го отпадот во посебни контејнери. Според него потребна е едукација и развивање на свеста уште во градинките и училиштата.

Анела Ставревска Панајотова од фондацијата CNVP Македонија, за медиумите изјави дека многу радосна што во акцијата се вклучија толкав голем број институции, организации и граѓани, но во исто време е и тажна бидејќи поводот е несовесно однесување на луѓето, за кое според неа мора да се засили санкционирањето.

Кон акцијата се приклучи и словачкиот амбасадор Хенри Маркуш кој изјави дека Македонија е прекрасна земја, но денеска ја видел и другата страна од сликата и затоа се приклучил кон оваа акција за чистење на езерото.Тој апелираше до сите граѓани на Македонија да преземат мерки за почиста околина, бидејќи смета дека ситуацијата е ургентна.

Оваа година, одбележувањето на Денот на Планетата Земја се одвива под мотото „Да го запреме загадувањето од пластика“, а со масовната акција на чистење на езерото Козјак, Р. Македонија го даде својот придонес во глобалната мисија за заштита нашиот единствен дом.

Втората фаза од Националната кампања за чистење на отпадот на целата територија на Република Македонија ќе се спроведе на есен со која Р. Македонија ќе се вклучи во глобалната акција – Let’sdoit! WorldCleanup 2018. Акцијата е официјално поддржана од Европскиот Парламент и во неа учествуваат над стотина земји во светот.

Официјално отворен автопатот Демир Капија – Смоквица, новата автопатска делница, која е во рамки на коридорот 10, е дел од вкупните вложувања на Европската Унија во транспортната инфраструктура на земјата, кои во изминатите неколку години достигнаа речиси 325 милиони евра.

 

 

Новиот автопат од Демир Капија до Смоквица во должина од 28,2 километри обезбедува значително скратување на времето на патување, ја зголемува безбедноста за сите учесници во сообраќајот и создава услови за динамизирање на транспортот и трговијата, како и натамошен развој на целокупната економија.

Ова се клучните придобивки за земјата, нејзините граѓани и деловни субјекти од новиот автопат во чија изградба се вложени вкупно 227 милиони евра.

„Поврзувањето е основен чекор за изедначување на нашите регионални стандарди со оние на Европската Унија кон која не водат сите патишта. Овој автопат е еден од нив и во буквална смисла. Овој автопат поврзува, и води кон ЕУ! Оваа делница од автопатот „Пријателство“ во себе ја има вградено и приказната, искрената приказна, за поддршка и соработката, помеѓу Република Македонија и Европската Унија. Една од најјасните заложби на оваа Влада, е издигнувањето на Македонија како конструктивна точка која поврзува и сплотува во заедништво, оттаму, овој автопат е можеби една од најјаките симболики за тоа. Нашата темелна вредност и определба, да ги издигнеме капацитетите на нашата земја на ниво достојно за да биде членка на ЕУ, е силна мотивација за усогласување на нашата, национална патна инфраструктурна стратегија, со онаа на Европската унија“, истакна претседателот на Владата, Зоран Заев, заблагодарувајќи се на поддршката што Европската Унија ја обезбедува во развојот на инфраструктурата на земјата.

На настанот беше официјално отворен новиот автопат и беше означен стартот на „ЕУ за ТЕБЕ“ кампањата за инвестициите на Европската Унија во транспортната инфраструктура.

„Со отворањето на овие 28,2 км од автопатот Демир Капија – Смоквица го додадовме делот од Пан-Европскиот Коридор 10 кој недостасуваше во земјата. Овој автопат ќе го олесни движењето, ќе го поттикне економскиот развој и ќе обезбеди одржливо и побезбедно патување“, рече Генералниот Директор за Соседски политики и преговори за проширување во Европската Комисија, Кристијан Даниелсон, во своето обраќање.

Во изминатите неколку години Европската Унија вложи речиси325 милиони евра во транспортната инфраструктура на земјата. Со нив се изградени и обновени над 100 километри автопатска мрежа, 64 километри патишта во повеќе од 40 општини и 60 населени места, 16 километри железничка пруга и 11 железнички станици.

Како и останатите инфраструктурни проекти на ЕУ, така и новиот автопат е изграден според најсовремените градежни, технички и безбедносни стандарди. Долж трасата на автопатот изведени се над 8 милиони метри кубни високи насипи и длабоки ископи во теренот, како и 6 моста, близу 100 канали, 2 сообраќајни клучки и 2 двојни тунели со должина од над 1,2 километри. Покрај современото енергетски ефикасно осветлување, во тунелите се инсталирани и систем за вентилација, за детекција и гаснење на пожар, за резервно напојување со електрична енергија, како и SCADA систем за мониторинг и управување со сообраќајот.

„Од денеска добиваме нова, модерна и безбедна автопатска делница, прва од овој тип на Балканот. Автопатот ги содржи сите потребни карактеристики за сообраќајна безбедност што ни дава сигурност дека сообраќајот по оваа делница ќе се одвива побезбедно за сите учесници. Истиот е проектиран и изграден согласно нормите и стандардите на Европската Унија за заштита на животната средина, што дополнително влијае на намалување на емисијата штетни гасови“, истакна министерот за транспорт и врски, Горан Сугарески.

Продолжување на поддршката и инвестициите кои треба да обезбедат поефикасно инфраструктурно и енергетско поврзување на целиот регион е една од шесте приоритетни иницијативи во новата Стратегија на Европската Унија за поддршка на трансформацијата на Западен Балкан. Со неа се предвидуваат дополнителни инвестиции на ЕУ од над една милијарда евра во натамошниот развој и инфраструктурата на земјите од Западен Балкан.

 


 

Премиерот Заев на свеченото отворање на автопатот Демир Капија - Смоквица: Овој автопат поврзува, и води кон ЕУ

 

Премиерот Заев предводеше владина делегација на свеченото пуштање во употреба на автопатот Демир Капија Смоквица и во своето обраќање истакна:

Почитуван директоре на директоратот за проширување, DG Near Кристијан Даниелсон

Почитуван амбасадоре Жбогар,

Почитуван министер за транспорт и врски во Владата на Република Грција Христос Спирцис

Почитувани вицепремиери и министри во Владата на Република Македонија, претставници на локалната самоуправа и дипломатски кор,

Почитувани гости и пријатели,

Денеска во серијата значајни проекти впишуваме уште еден што во изминатиот период ги реализира нашата земја.

Денеска ја пуштаме во функција делницата Демир Капија – Смоквица од автопатот „Пријателство“, и го завршуваме инфраструктурниот потфат што како патека за граѓаните се испружи до границата со нашиот сосед и пријател – Република Грција.

Со оваа делница, и со завршните работи на рехабилитацијата на делот на автопатот од Неготино до Демир Капија, го затвораме целосно делот од Паневропскиот Коридор 10, кој минува низ нашата земја, со едно современо и безбедно автопатско решение.

Секако, нема да пропуштиме да споменеме дека овој проект го започна претходната влада, од огромна потреба на граѓаните. Ние тоа го препознаваме и го потенцираме.
Само ќе ја повторам нашата определба дека, без разлика на сите слабости и долгови што ги наследивме, Владата на Република Македонија даде збор дека ќе ги заврши сите започнати патни проекти во најбрзите можни рокови.

Нам денеска ни останува да го одбележиме крајот на сите градежни работи и во свечена атмосфера да им го предадеме на граѓаните на нашата земја и на граѓаните на Европа, делот од овој автопат кој им овозможува безбедно стигнување до сите дестинации на овој потег до границата со Република Грција и обратно.

Од тука, со поврзувањето со автопатните и другите инфраструктурни коридори во таа земја, да стигнат до своите бизнис дестинации, до своите пријатели, до местата за одмор. И обратно, граѓаните на Грција и граѓаните на светот да можат да циркулираат низ Македонија по модерни, современи и безбедни патишта.

Почитувани,

Минатата недела во Скопје го организиравме и успешно го реализиравме првиот „Дигитален Самит на Западен Балкан“. Сите гости, премиери, вицепремиери, министри, директори на најголемите телекоми, врвни експерти во дигиталната комуникација, го дадоа својот придонес за еден многу значаен процес во овој наш регион: Дигиталната трансформација и поврзувањето во регионот врз основа на е-економија, е-владини услуги, е-општество.

Процес за нови, подобри, поефикасни и поевтини услуги за граѓаните за нивните лични потреби, за потребите на поврзувањето на бизнис заедницата, за поврзувањето на нашите општествени заедници. Поврзувањето - како основен чекор за изедначување на нашите регионални стандарди со оние на Европската Унија кон која не водат сите патишта.

Овој автопат е еден од нив и во буквална смисла. Овој автопат поврзува, и води кон ЕУ!

Оваа делница од автопатот „Пријателство“ во себе ја има вградено и приказната, искрената приказна, за поддршка и соработката меѓу Република Македонија и Европската Унија.

Една од најјасните заложби на оваа Влада, е издигнувањето на Македонија како конструктивна точка која поврзува и сплотува во заедништво, оттаму, овој автопат е можеби една од најјаките симболики за тоа.

Нашата темелна вредност и определба, да ги издигнеме капацитетите на нашата земја на ниво достојно за да биде членка на ЕУ, е силна мотивација за усогласување на нашата, националната инфраструктурна стратегија, со онаа на Европската унија.

Да ги затвориме празнините во транспортните мрежи и да ги отстраниме тесните грла кои сè уште го попречуваат нормалното функционирање на внатрешните и на меѓународните ефикасни економски политики.

Добро развиена и меѓусебно поврзана патна инфраструктура е клучен фактор за економски раст.

Почитувани гости и пријатели, присутни на овој значаен настан,

Сакам да гледам на овој настан, на пуштањето во сообраќај на оваа супер модерна европска автопатна делница, како на дел, или уште повеќе, како на поттик и за пролетната градежна офанзива што ја отпочнаа институциите на Владата на Република Македонија, Министерството за транспорт и врски и Јавното претпријатие за државни патишта со поддршка на економските и финансиските ресори. Како на домашните, така и на меѓународните.

За капиталните инвестиции за 2018 година, издвоивме 1,43 милијарди денари повеќе од износот утврден со ребалансот во 2017 година.

Средства што ги насочуваме на унапредување на инфраструктурата: патна, железничка и енергетска се многу важни.

Нема да дозволиме катастрофални импровизации.

Ја започнавме изградбата, реконструкцијата и рехабилитацијата на патната инфраструктура на автопати, експресни и регионални патни проекти во вкупна должина од 800 километри и со вредност од 270 милиони евра.

Продолжуваме со изградба на автопатите Миладиновци - Штип и Кичево - Охрид.

Ја интензивиравме изградбата на пругата кон Бугарија, на делницата Куманово- Бељаковце со обезбедени 70 милиони евра грант од ЕУ и со дополнителни 60 милиони евра од Оперативната програма 2014-2017 од ЕУ за изградба на пругата кон Бугарија, на делницата Крива Паланка-Деве Баир.

Влеговме во овие проекти со многу научени лекции, но денеска повикувам да се инспирираме од добрите практики и од позитивните искуства. Особено во делот на остварувањата на инженерите, на градежните работници.

Од нивните вредни раце произлезе овој автопат. Современо и безбедно автопатно решение според највисоките европски стандарди за транспорт, патна комуникација и безбедност. Автопатна делница која ќе биде референца, решение за инспирација и за новите патни проекти во земјата.

Нашата неотповиклива и силна заложба за подобрување на поврзаноста во земјата и во регионот, а со тоа и со Европа, ќе донесе значителни подобрувања и зголемување на севкупната економија, што ќе доведе до раст, создавање работни места и вистинско подобрување на животот за сите наши граѓани.

Како и за сите клучни проекти од интерес за граѓаните, Владата ќе ги носи одлуките за големите инвестиции во инфраструктурата транспарентно и низ консултации со граѓаните и релевантните експерти.

На крајот, дозволете ми да изразам благодарност до Европската Унија и до Делегацијата на Европската Унија во Скопје за огромниот придонес и поддршка во реализацијата на овој проект.

Остануваме посветени заеднички и понатаму да го градиме нашето пријателство низ политичката соработка, но и низ соработката на вакви значајни проекти од непосреден интерес за граѓаните на Република Македонија и на граѓаните на Европа.

Голема благодарност и признание и за сите што непосредно работеа на овој сериозен и сеопфатен градежен патен проект.

На сите граѓани што од денеска ќе патуваат низ оваа делница им посакувам безбеден пат до нивните дестинации.

Благодарам.

 


 

Министерот Сугарески на свеченото отворање на автопатот Демир Капија Смоквица: Овој автопат да биде правец за побрза интеграција во ЕУ

 

 

Почитуван г-дин Зоран Заев, Претседател на Владата на Република Македонија,

Почитуван г-дин Кристос Спиртцис,  Министер за инфраструктура и  транспорт на Грција ,

Почитуван г-дин Кристиан Даниелсон, Генерален директор за соседски политики и преговори за проширување во Европската комисија,

Почитуван Амбасадор на Европската Унија во Република Македонија,

Ваши Екселенции,

Почитувани претставници на Владата, Градоначалници,

Драги гости, дами и господа

Денеска означуваме завршување на многу значаен капитален инфраструктурен проект за Република Македонија, но истовремено денеска означуваме ново поглавје за Европска Македонија.

Од денеска добиваме, нова, модерна и безбедна автопатска делница, прва од овој тип на Балканот.

Овој автопат од Демир Капија до Смоквица кој е во должина од 28 километри, технички беше најтешката делница за изградба од патниот Коридор 10 во Македонија, која поминува низ Демиркаписката клисура и тешко достапниот планински терен по неа.

Од тие причини ова автопатско решение претставува најсовремен тип на градба која е изградена по сите светски и европски стандарди.

Автопатот располага со по три сообраќајни ленти од двете страни, два тунели со должина над 1 километар и истите претставуваат најдолги патни тунели во Република Македонија.

Во однос на тунелите, она што сакам да потенцирам е Контролниот центар во Неготино од каде се врши 24 – часовен мониторинг за целиот сообраќај што се одвива во тунелите. Овој контролен центар претставува најсовремено решение за управување со кризни ситуации од каде се обезбедува управување на сообраќајот во тунелите во реално време.

Составен дел од овој автопат се и шест мостови, од кои пет мостови се градени со конзолен тип на градба, што исто така претставува новина во градежништвото во Македонија.

Дозволете ми да нагласам дека овој автопат е проектиран и изграден согласно нормите и стандардите на Европската Унија за заштита на животната средина, што дополнително влијае на намалување на емисијата на штетни гасови.

Истиот ги содржи сите потребни карактеристики за безбедност што ни дава сигурност дека сообраќајот по оваа делница ќе се одвива побезбедно за сите учесници.

Вредноста за изградба на автопатот изнесува околу 218 милиони евра за изградба и 10 милиони евра за надзор.

Средствата се обезбедени преку грант од Европската Унија во висина од 70 милиони евра и заеми од Европската банка за обнова и развој и Европската Инвестициона Банка. 

Во оваа прилика би сакал да се заблагодарам на нашите пријатели од Европската Унија, но исто така и другите меѓународни финансиски институции за поддршката што ни ја овозможуваат за реализација на инфраструктурните проекти во нашата држава.

Република Македонија е на добар пат да влезе во Европското семејство на развиени и просперитетни земји. Би посакал овој автопат да биде вистинскиот правец за побрза интеграција меѓу најдобрите.

Почитувани Пријатели,

Тоа што во овој момент е најважно е дека граѓаните на Република Македонија добија модерен автопат граден по сите стандарди.

Не сакаме да се навраќаме на ситуациите што ги наследивме од претходната Влада во однос на изградбата, бидејќи тоа што за нив беше невозможно, ние за само неколку месеци успеавме да го надминеме и да овозможиме овој автопат да биде пуштен во употреба.

Уверени сме дека најголема корист од овој нов автопат ќе имаат граѓаните на Република Македонија, но и сите други странски државјани кои транзитираат низ земјата и ќе ја користат оваа делница.

Во оваа прилика сакам да истакнам дека влеговме во силен инвестициски циклус во изградба и реконструкција на целокупната патна инфраструктура во државата.

Тоа што е важно за нас како држава е да имаме брз, безбеден и модерен Коридор 10, кој најдолг рок на земјата ќе и донесе економски раст и подигнување на нивото на квалитетот на транспортните услуги.  Од друга страна ќе се овозможи побрза интеграција во регионот, а земјата ќе ја направи клучен транзитен центар на Балканот.

Во таа насока сакам да дополнам дека:

  • автопатот од Куманово до Миладиновци е реконструиран во двата правци, 
  • потоа се рехабилитираше оштетената возна лента на делницата Велес – Градско,
  • за два до три месеци ќе завршиме со реконструкција на автопатската делница Неготино - Демир Капија.
  • рехабилитацијата на делниците  Смоквица – Гевгелија и од Гевгелија до граничниот премин Богородица е завршена.

Што значи дека за неколку месеци Република Македонија ќе има комплетно рехабилитиран, модерен и безбеден Коридор 10.

На крајот би сакал да им се заблагодарам на сите институции, приватни компании, домашни и странски, поединци и сите останати кои досега директно или индиректно биле вклучени во изградбата на автопатот и посакувам да имаме и други вакви модерни и безбедни автопати во Република Македонија.

Ви благодарам на вниманието.

Се известуваат сите даночни обврзници (физички / правни лица) и сметководители на подрачјето на Скопје и неговата околина дека од 1-ви Мај 2018 година услугите на УЈП - Регионална дирекција Скопје ќе бидат достапни само доколку странката претходно закажала средба преку Инфо центарот на УЈП или преку интернет.

Услугата „Закажи средба“ овозможува секоја странка да закаже термин за средба со даночен агент во УЈП - Регионална дирекција Скопје во време кое нему му одговара, според расположливите термини, а со цел консултација од даночната сфера, и тоа: добивање на општи информации за рокови, начини за пријавување и плаќање даноци; отворање на бизнис и регистрација на даночен обврзник; консултации за издадени даночни документи; утврдување на даноци; постапки за наплата на долгови; правни прашања и консултација за други специфични прашања.

Закажувањето на термин за средба во УЈП – Регионална дирекција Скопје може да се врши преку Инфо центарот на УЈП 0800 33 000 или 02/3253 200 или он-лајн преку веб страницата на Контакт центарот kontaktcentar.ujp.gov.mk која овозможува пристап до услугата „Закажи средба“.
Странката, односно даночниот обврзник или сметководителот што закажал средба во УЈП – Регионална дирекција Скопје, а не е во можност да присуствува на закажаниот термин, потребно е средбата да ја откаже или да ја презакаже за друг достапен термин преку Инфо центарот или он-лајн.

Услугата „Закажи средб@” од 1-ви Мај 2018 година е задолжителна за сите странки кои ќе ги користат даночните услуги во УЈП - Регионалната дирекција Скопје, а странката која нема претходно да „Закаже средба“, нема да биде во можност навреме да ги користи услугите на УЈП-Регионалната Дирекција Скопје.

Воведувањето на систем за управување со странки „Закажи средба“ во УЈП - Регионалната Дирекција Скопје е со цел подобрување на даночните услуги, намалување на времето на чекање, намалување на метежите на даночните шалтери, навремена услуга и точен одговор за даночните обврзници.

Управата за јавни приходи – Регионална Дирекција Скопје е отворена за непосредна комуникација и соработка со своите даночни обврзници и истите ги очекува на претходно закажаната средба.

Јавен оглас за номинација на член во Национално координативно тело за имплементација на Конвенцијата на Обединетите нации за правата на лицата со попреченост во Република Македонија

Институција која огласува: 
Влада на Република Македонија
Рок на пријавување: 
30.04.2018

Врз основа на член 36 став (3) од Законот за Влада на Република Македонија („Службен весник на Република Македонија“ број 59/00, 12/03, 55/05, 37/06, 115/07, 19/08, 82/08, 10/10, 51/11, 139/14, 196/15 и 142/16), а во согласност со Одлуката за формирање на Национално координативно тело за имплементација на Конвенцијата на Обединетите нации за правата на лицата со попреченост во Република Македонија бр. 44-3759/1 од 17.4.2018, објавена во „Службен весник на Република Македонија“ бр. 69/2018, на ден 19.4.2018 година, Владата на Република Македонија го објавува следниот

 

ЈАВЕН ОГЛАС БРОЈ – 2/2018

за номинација на член во Национално координативно тело за имплементација  на Конвенцијата на Обединетите нации за правата на лицата со попреченост во Република Македонија

 

Владата на Република Македонија, заради спроведување на Конвенцијата на Обединетите нации за правата на лицата со попреченост во Република Македонија и потребата од формирање на Национално координативно тело за имплементација на Конвенцијата на Обединетите нации за правата на лицата со попреченост во Република Македонија, објавува оглас за следнава позиција:

 

1. Член во Националното координативно тело за имплементација на Конвенцијата на Обединетите нации за правата на лицата со попреченост во Република Македонија -  1 член

 

Лицата кои сакаат да аплицираат за оваа позиција, треба да ги исполнуваат следните критериуми:

  • Да бидат дел од тимот на организација која ги застапува интересите на лицата со попреченост;
  • Организацијата да е регистрирана во регистарот на граѓански здруженија од областа на социјалната заштита  при  Министерството за труд и социјална политика;
  • Организацијата да има минимум пет (5) години искуство во спроведување проекти за подобрување на условите за живот на лицата со попреченост и нивна целосна инклузија во општеството;
  • Организацијата да претставува поголема група на лица со попреченост;
  • Организацијата да има реализирано проекти на национално и локално ниво;
  • Организацијата да има искуство за застапување и лобирање за унапредување на правата на лицата со попреченост, согласно Конвенцијата на ООН;
  • Искуство во работни тела на темата, ќе се смета за предност;
  • Членување на организацијата во мрежи и меѓународни организации, ќе се смета за предност.

 

Со пријавата заинтересираните кандидати задолжително треба да ја достават следната документација:

  • Кратка биографија – СV со задолжително наведен телефон за контакт и адреса;
  • Писмо за мотивација за учество на здружението во Координативното тело;
  • Доказ за упис во регистрите при Централниот регистар на Република Македонија;
  • Доказ дека здружението е регистрирано во Регистарот на граѓански здруженија од областа на социјалната заштита  при  Министерството за труд и социјална политика;
  • Статут на организацијата;
  • Извештаи од реализирани поголеми национални и локални проекти, со акцент на застапување и лобирање за унапредување на правата на лицата со попреченост;
  • Извештаи/докази за членување во мрежи и меѓународни организации.

 

Потребната документација да се достави до архивата на Канцеларијата на претседателот на Владата на Република Македонија или по пошта на следнава адреса:

 

Канцеларија на претседателот на Владата на Република Македонија

бул. „Илинден“ бр. 2, 1000 Скопје

(со назнака „за членство во Националното координативно тело за имплементација на Конвенцијата на Обединетите нации за правата на лицата со попреченост во Република Македонија“)

 

Рокот за доставување на потребната документација е пет (5) работни дена сметано од денот на објавување на огласот во дневниот печат, односно заклучно со 30.4.2018 година до 16:30 часот.

Ненавремената и некомплетната пријава и документација нема да биде разгледувана.

Пропратни документи: 
Дали е огласот завршен?: 

На 57-мата седница на Владата на Република Македонија одржана на 06.03.2018 година, беше усвоена Националната стратегија за спречување на насилен екстремизам (2018-2022) и Националната стратегија за борба против тероризам (2018-2022) заедно со Акциските планови.

Стратешките документи се достапни на подолу наведените линкови:

 

·         Национална стратегија на Република Македонија за борба против тероризам на македонски јазик - ПРЕЗЕМИ

·         Национална стратегија на Република Македонија за борба против тероризам на албански јазик - ПРЕЗЕМИ

·         Национална стратегија на Република Македонија за спречување на насилен екстремизам на македонски јазик - ПРЕЗЕМИ

·         Национална стратегија на Република Македонија за спречување на насилен екстремизам на албански јазик - ПРЕЗЕМИ

 

Националните стратешки документи беа изработени од Националниот комитет за спречување на насилен екстремизам и борба против тероризам кој е раководен од Национален координатор за спречување на насилен екстремизам и борба против тероризам, заменик Национален координатор за спречување на насилен екстремизам, заменик Национален координатор за борба против тероризам, а во комитетот партиципираат 22 членови и 22 заменици членови кои се постојано вработени во 21 Министерство и институции на Република Македонија.

За време на изготвувањето на Националните стратешки документи беа вклучени сите членови на Националниот комитет, експерти посветени на спречувањето на насилниот екстремизам и борбата против тероризмот, како и претставници од граѓанското општество кои учествуваа на јавни консултации организирани во Скопје и Тетово.

Потребата за изготвување на нови Национални стратешки документи е заради потребата да се пренесат активностите во спречувањето на насилниот екстремизам и радикализацијата на полето на превенцијата и да се примени сеопфатен општествен и институционален пристап при справувањето со овие безбедносни феномени.

Под мотото заштити, спречи, вакцинирај, денеска по 13, пат ја одбележуваме Европската недела на имунизација. Со овој настан сакаме да ја подигнеме свеста кај сите засегнати страни за бенефитите од имунизацијата и потребата од редовна вакцинација кај децата согласно Календарот за имунизација.

 

 

Вакцините го штитат детето од тешки заразни заболувања, а со тоа се создава колективен имунитет и заштита од епидемии на целата заедница.

Во таа насока, еден од главните приоритети на Министерството за здравство за оваа година е комплетно осовременување на Календарот за имунизација, со воведување нови вакцини, кои заштитуваат од стрептокока и од рота вируси, кои се причинители на тешки заболувања проследени со компликации кои најчесто се јавуваат кај малите деца до 5 годишна возраст. Новиот календар е комплетно усогласен со препораките на СЗО, во областа на имунизацијата.

Вакцинацијата е клучен приоритет и придобивка за јавното здравје. Активностите ќе продолжат и понатаму не само во рамки на одбележување на Европската недела на имунизација. Со континуирана промоција и едукација ќе бидат опфатени здравствени работници и родители, со цел и во иднина да се зголемува опфатот со сите вакцини и да не дозволиме долгогодишната традиција на успешна вакцинација да ја нарушиме, а со тоа да не дозволиме појава на заразни болести и епидемии во државата.

 

 

Имунизацијата е еден од приоритетите на Министерството за здравство, бидејќи е значајна здравствена, социјална и економска придобивка. Националното координативно тело за вакцинација е одговорно за целокупниот процес за вакцинација во земјава. Продолжуваме заеднички да работиме за да обезбедиме квалитетни вакцини, по нов осовремен календар, a со правилна регионална и епидемиолошка динамика на нарачување и без облигативни количини, ќе овозможиме релокација и правилно искористување на средствата од веќе предвидени во програмите за имунизација.

 

 

 

Во рамките на одбележувањето на „Светската недела на креативноста и иновациите“, денес на Машнскиот факултет се одржа трибина на која се обратија Заменик претседателот на Владата задолжен за економски прашања д-р Кочо Анѓушев, заменик министерот за образование и наука д-р Арбр Адеми и директорот на Фондот за иновации и технолошки развој Јован Деспотовски.

Вицепремиерот Анѓушев потенцираше дека иновативноста е можна во сите сфери во општетството, а праксата покажува дека техничките науки се најпогодни за развивање на креативноста и иновациите.

„Од вкупниот развој 95% доаѓа од конвенционален пристап, со воведување на производ, кој постепено се моделира, унапредува и осовременува. Со тој развој се напредува полека и постепено и е многу важен. Останатите 5 % од вкупниот развој доаѓаат од неконвенционален, несекојдневен пристап и тие ги носат големите промени во начинот на живееење. Тесла, Џобс и Цукенберг го сменија светот со својата креативност, излегувајќи од секојдневните текови“, посочи вицепремиерот Анѓушев.

Тој ги повика студентите да се охрабрат и да ги реализираат своите идеи и соништа.

„Државата треба да обезбеди услови за младите луѓе да се охрабрат да ги реализираат своите идеи. Преку Фондот за иновации обезбедуваме финансиски средства и ресурси за развој на иновативни проекти, преку образовниот систем ќе ја поттикнуваме иновативноста, но Вие, студентите треба да ги реализирате Вашите соништа. Бидете храбри и релизирајте ги вашите идеи, охрабрете се да направите нешто ново и поразлично, можеби на почеток нема да биде препознаено, но треба да бидете посветени и напорно да работите за да постигнете успех“, нагласи Анѓушев.

Заменикот министер за образование Арбр Адеми посочи дека креативните луѓе се оние кои наѓаат решенија за проблемите, комуницираат на нестандардни и нови начини и така создаваат нови трајни вредности.

„Целта на современиот образовниот систем е да ги подготви учениците и студентите за животот по завршување на образовниот процес. Во процесот на реформирање на образовниот систем обрнуваме внимание да се подигне креативноста и иновативноста на сите учесници во овој процес. Затоа во основното образование го воведовме предметот Иновации, а во средното образование предметот Иновации и претприемништво. Во наредниот период ќе дојде до растеретување на наставата за учениците и наставниците. Ќе се намали административната работа на наставниците, а ќе го подигнеме и нивниот дигнитет да испорачуваат подобри и поквалитетни резултати“, нагласи Адеми.

Директорот на Фондот за иновации и технолошки развој Јован Деспотовски нагласи дека денес, за разлика од претходно, во Македонија се создадени услови за поттикнување на кретивноста и иновациите кај младите луѓе.

„Заедно со министерството за образование работиме на проект со кој ќе сакаме да воведеме нов начин на предавања за учениците. Воведовме проект – Предизвик за млади истражувачи, кој предизвика голем интерес и покажа дека младите луѓе сакаат да ја раазвиваат својата креативност. Добивме 100 проекти во многу кус рок на јавниот повик. Преку мерките од Планот за економски раст обезбедивме над 10 милиони евра буџетска поддршка за старт ап, малите и средни претпријатија, нешто што за прв пат се случува. Сепак главно е да ја развиваме менталната матрица кај младите луѓе, креацијата почнува кога се поттикнуваат младите луѓе да го критикуваат она што општетството го дефинира како апсолутна вистина“, изјави Деспотовски.

Светскиот ден на креативноста и иновативноста започна да се одбележува од 2001 година, а во одбележувањето учествуваат преку 30 земји во светот. На денешната трибина се обратија и ректорот на универзитетот Св. Кирил и Методиј, проф. д-р Никола Јанкуловски, холандскиот амбасадор Н.Е. Вотер Пломп и деканот на машинскиот факултет проф. д-р Дарко Данев.

 

Под покровителство на Претседателот на Владата на Република Македонија, Зоран Заев, а во организација на Македонската асоцијација на земјоделски задруги, денеска во Струмица се одржа Петтата Регионална конференција на земјоделските задруги која се организираше под мотото „Да изградиме кооперативно општество“.

„Задругарството е еден од клучните сегменти на политиките за развој на земјоделскиот сектор, на кој Владата предводена од премиерот Зоран Заев, преку министерството за земјоделство, шумарство и водостопанство, посветено работи. Повеќе од јасно е дека здружувањето на земјоделците во задруги треба да биде иднината и на македонското земјоделство“, истакна на конференцијата советничката за земјоделство во Кабинетот на Претседателот на Владата на Република Македонија, Ленче Николовска.

На конференцијата беше потенцирано дека Министерството за земјоделство во својата програма за рурален развој има ставка со која се поддржуваат земјоделските задруги, и дека во соработка со Македонската асоцијација на земјоделски задруги, активно се работи на усовршување на моделот на земјоделското здружување и на поддршката за овие иницијативи.

На регионалната конференција на земјоделските задруги во Струмица присуствуваа претставници на Задружни сојузи од Србија, Војводина, Босна и Херцеговина, Хрватска, Словенија и Полска.