Соопштенија

Претседателот на Владата на Република Македонија, Зоран Заев, во Трст се сретна со Борис Џонсон, министерот за надворешни работи на Обединетото Кралство, кој ја претставуваше британската премиерка, Тереза Меј на Самитот за Западен Балкан. 

Високиот британски дипломат Џонсон изрази јасна и голема поддршка на новата Влада во Македонија, во име на Велика Британија и премиерката Меј. 

Оценката што ја соопшти министерот за надворешни работи, Џонсон е дека Македонија е конечно на вистинскиот правец и најави дека Велика Британија ќе направи сè што може да ѝ помогне на нашата држава за влез во НАТО и во ЕУ. 

Британскиот министер Џонсон соопшти дека Британија останува партнер на Балканот и активен поддржувач на демократските процеси, како и дека пријателството со Македонија е клучно во реализацијата на оваа важна цел. 

Премиерот Заев изрази благодарност за огромната поддршка од Велика Британија за Македонија и рече дека новата Влада ќе ја оправда добиената доверба преку посветена работа на демократски развој на Македонија и на регионот.

„Владата дефинираше временска рамка за итните реформски приоритети важни на интеграциските процеси во НАТО и ЕУ и одговорно ќе спроведе квалитетни реформи, затоа што граѓаните на Македонија заслужуваат евро-атланстки перспективи“, рече премиерот Заев. 

Присуството на Самитот во Трст на премиерот Заев, придружуван од неколкумина владини министри донесе Договор за транспортната заедница, чијашто потписничка е и нашата држава и ќе значи олеснето поврзување на граѓаните на Македонија со регионот. 

Но, она по што е значаен Самитот во Трст се и бројните билатерални средби што ги оствари премиерот Заев на највисоко политичко ниво, со светски и регионални лидери, кои испратија многу конкретни, јасни и прецизни пораки на целосна поддршка на премиерот Заев и на новата реформска Влада во Македонија. 

Средбите на маргините на Самитот и самиот Самит покажаа дека во претседателот на Владата на Република Македонија, Зоран Заев и во новата Влада на Република Македонија се гледа како на мотор во регионалниот развој, во што се посочува клучот за евро-атлантските перспективи на Македонија и на Западен Балкан.

 
 
 

Претседателот на Владата на Република Македонија, Зоран Заев, во Трст имаше билатерална средба со канцеларката на Република Германија, Ангела Меркел.

Германската канцеларка Меркел изрази голема поддршка за новата Влада на Македонија, за одлучноста на Владата за суштински реформи и за определбата за интеграција на Република Македонија во ЕУ.

"Владата е одлучна да ги спроведе потребните реформи и да ја осигура евро-атлантската иднина на Македонија, а со тоа и квалитетен живот за граѓаните", рече премиерот Заев. 

Канцеларката Меркел најави поддршка од Република Германија во реформскиот и евро-атлантскиот интеграциски процес.

Изразена е заедничка определба да продолжи со уште поголем интензитет соработката помеѓу Република Македонија и Република Германија во области важни за граѓаните на двете земји.

 

Владата на Република Македонија на вчерашната седница донесе одлука за прогласување на кризна состојба во регионот на јужната и на северната државна граница поради зголемениот наплив на мигранти, со што согласно правните прописи се отвора можност за соодветен ангажман и на АРМ, информира денеска на прес-конференција портпаролот на МВР Иво Котевски.

Тој посочи дека меѓуинституционалното координативно тело секојдневно ја следи состојбата со илегалните мигранти кои имаат намера да влезат на територијата на Република Македонија од соседна Грција и изготвува соодветни анализи за одговор при сите евентуални сценарија.

Појасни дека заради зголемениот притисок на јужната граница и се поголемиот интензитет на транзит преку т.н. балкански мигрантски коридор, но и состојбата во глобални рамки, беше проценето дека е неопходна дополнителна зголемена и поефикасна контрола на граничниот појас каде што се регистрирани масовни илегални преминувања од грчка страна.

- Ангажманот на Армијата очекуваме да даде резултат во две насоки. Прво, да се зголеми безбедноста и спокојството на локалното население и второ, да се обезбеди посеопфатен пристап во третманот на лицата кои изразиле намера да бараат азил во Република Македонија согласно капацитетите и препораките на конвенциите чиишто потписник е токму Република Македонија и кои се трудиме доследно да ги почитуваме, рече Котевски.

Нагласи дека за постапување по одлуката на Владата ќе биде формиран главен штаб при Центарот за управување со кризи кој треба да го изготви акцискиот план и да ги реализира предвидените активности. 

- Свесни сме дека зголемената контрола на нашата јужна граница не претставува конечно решение на проблемот и затоа очекуваме дека наскоро ќе биде утврден единствен хуман одговор од страна на Европската унија кој ќе ги опфати сите земји кои се најзасегнати од мигрантската криза и солидарно ќе го сподели товарот на соочувањето со предизвикот, рече Котевски.

Посочи дека во изминатите 24 часа, издадени се потврди на 1.327 странски државјани, за искажана намера за поднесување на барање за признавање на право на азил во Република Македонија.

- Според државјанството на лицата на кои им се издадени потврди, најбројни се државјаните на Сирија - 1.004.Во овие два месеца, откако стапија во сила измените во Законот за азил, издадени се потврди на вкупно 41.414 странски државјани. Според државјанството на лицата на кои им се издадени потврди, најбројни се државјаните на Сирија - 33.461, потоа на Авганистан - 2.073, Ирак - 1.947, Пакистан - 1.198, како и од други земји каде што има оружен конфликт, истакна Котевски.

Од почнувањето на издавањето на потврдите до денеска, појасни, до Одделението за азил се поднесени 47 барања за признавање право на азил врз основа на претходно издадена потврда, при што 34 барања се од државјани на Сирија, од нив 10 за деца, потоа три барања од државјани од Пакистан и Авганистан, а од нив четири се деца кои го придружуваат родителот...

Одговарајќи на новинарско прашање, Koтевски рече мигрантите никогаш легално не влегувале во Република Македонија, ниту пак биле пуштани.

- Напротив МВР согласно капацитетите со кои располага ги преземаше сите неопходни мерки за да ја заштити нашата граница. За жал јужната граница која е надворешна граница на ЕУ воопшто не беше заштитувана од грчка страна односно не само што беа пропуштани, не беа запирани илегалните мигранти односно лицата илегално да ја минуваат границата. Напротив бевме сведоци во голем број случаи кога истите организирано беа транспортирани до границата, рече Котевски.

Со оваа одлука, нагласи тој, практично се засилува контролата на самата граница и во граничниот појас.

Одговарајќи на новинарско прашање рече дека дополнително ќе се утврдуваат трошоците, бидејќи досега МВР како една од институциите која имаше најмногу ингеренции околу контролата на границата се соочуваше со огромни месечни трошоци односно заради зголемениот ангажман на полициски службеници, возила итн.

- Нашите проценки говорат дека трошоците во изминатите неколку месеци заради дополнителниот ангажман изнесуваат околу 800.000 евра на месечно ниво. Тоа се дополнителни трошоци во однос на ангажманот кој го имаше само полицијата за обезбедување на јужната граница, посочи Котевски. 

Укажа дека похуман третман подразбира посоодветен третман на лицата кои се илегални мигранти и кои се во Република Македонија.

- Факт е дека Република Македонија не располага со неограничени капацитети и еден е третманот кој може да им се пружи на лица кога станува збор за 1.500, 2.000, 3.000 или 5.000 мигранти кои би влегле во ист ден, а друг е третманот кој би го добиле доколку илегално успеат да ја поминат границата 50, 100 или 500 илегални мигранти, рече Котевски.

Се очекува македонското МНР соодветно ќе ги извести соседните земји за преземените мерки.

- Ние имаме контакти со грчката полиција, за жал не секогаш на соодветно ниво. Имено, претходниот период се обидувавме во голем број наврати да оствариме соодветен контакт, да направиме соодветна координација во однос на обезбедување на државната граница и мерките кои треба би требале да ги преземаат полициските службеници од грчка страна, но за жал немаше соодветен одговор, додаде Котевски. 

Редовна прес-конференција на портпаролите на Владата на Република Македонија, Миле Бошњаковски и Муамет Хоџа, по 75. владина седница.

Владата на Република Македонија не отстапувајќи од принципите на транспарентност, отчетност, прави уште еден чекор и создава можност за вклучување на граѓанскиот сектор во мониторирање на процедурите за јавни набавки со цел истите да бидат целосно заштитени од можности за злоупотреби.

На денешната прес-конференција во Владата на Република Македонија, министерот без ресор, задолжен за комуникации, транспарентност и отчетност во Владата на Република Македонија, Роберт Поповски, министерот за здравство Венко Филипче, заедно со директорите на Службата за општи и заеднички работи (СОЗР) при Владата на РМ и Електрани на Македонија (ЕЛЕМ), Пеце Мирчески и Драган Миновски ги повикаа граѓанските организации да се вклучат во мониторингот на јавните набавки.

„Во оваа една година на оваа Влада, за разлика од огромната нетранспарентност и злоупотреби на претходната власт во оваа сфера, со концептот „Отворена Влада“ - се отворивме целосно кон граѓаните,  имаме политика на максимална транспарентност и отчетност, ги објавуваме сите документи на интернет за да се отстранат било какви  сомнежи како се спроведуваат постапкитеи процедурите“, подвлече министерот Поповски, кој истакна дека борбата против корупцијата е врвен приоритет на Владата, не само за напредокот во евроинтеграциите, туку и воопшто за унапредување на одговорното и демократско владеење  и подигнување на квалитетот на животот во земјата за сите граѓани. 

Министерот Поповски, истакна дека целта на Владата е процедурите за јавни набавки да бидат целосно заштитени од можностите од злоупотреби и со јавна контрола да се заштитат парите на граѓаните, објаснувајќи дека граѓанските организации ќе имаат можност да се вклучат  во процесот од самиот почеток  и во сите фази на одлучување и спроведување на постапката за јавна набавка до склучување на договорот со избраните понудувачи.

„Затоа денеска од овде, апелирам до сите граѓански организации во Република Македонија, да ја поддржат оваа наша заедничка акција. Да се вклучат, со нивните капацитети за да добиеме поуспешен и посеопфатен процес. Нема поважно нешто од правилното искористување на Буџетот и парите на граѓаните, доколку сакаме Македонија да се развива и да оди напред. Нашите вредни граѓани го заслужуваат тоа, и ништо помалку!“, рече Поповски додавајќи дека трите институции, Министерството за здравство, СОЗР и ЕЛЕМ, веќе имале контакти со граѓански организации.

Поповски посебно подвлече дека целта на Владата на РМ е овој процес да ги опфати и сите други институции, за кои граѓанскиот сектор кој има познавања и експертиза за оваа област ќе покаже интерес. 

Министерот за здравство, Венко Филипче истакна дека во насока на рационалност, ефикасност и транспарентност во спроведувањето на јавните набавки и ова Министерство ги отвора вратите на граѓанските и невладините организации за целосен увид во тендерските постапки. Тој информираше дека во следниот период ќе следува соработка со стручни лица од граѓанскиот сектор, кои ќе извршат анализа на ризиците од корупција во јавните набавки во Министерството. 

„Со увид на ризик-факторите при процесот на јавните набавки, ќе се намали и ризикот од судир на интереси. Целта е навремено согледување на ризиците и судирот на интереси во насока на спречување на непотизам и блиски релации со компании и пријатели“, подвлече министерот Филипче, додавајќи дека се прават анализи за промени во постапките, проценка на потребните количини на лекови за да се намали потребата од интервентен увоз, како и за начини на штедење на неколку милиони евра на граѓаните и создавање подобри услови за пациентите со систем на централна набавка на реагенси.

Директорот на ЕЛЕМ, Драган Миновски, посочи дека како најголема компанија во државна сопственост и еден од најзначајните столбови во економијата, фирмата е должна да биде отчетна и транспарентна во поглед на трошењето за потребите на компанијата и за производствениот процес на електрична енергија, што се поклопува со владините политики на  максимална отвореност за информации во врска со тендерските постапки и набавките кон невладините организации, медиумите, но и кон сите што би побарале увид по кој било основ.

Миновски информираше дека со група невладини организации што ги следат јавните набавки имале состанок на кој е изразена подготвеност за максимална отвореност. Истовремено, тој оцени дека во процесот е потребно партнерство, доверливост и не изнесување на податоците на трети страни до крајот на постапката, со цел да не се наштети на конкурентноста во неа.

„Нашата основна цел е да имаме фер, чесен и конкурентен процес на јавни набавки, преку кој би обезбедиле што поквалитетна услуга или производи потребни за нашето функционирање и нашиот производствен процес, за што поповолна цена и услови“, потенцираше Миновски.

„Службата за општи и заеднички работи при Владата на Република Македонија е силно посветена да постави стандарди за отвореност, транспарентност и отчетност во нејзиното работење. Како во изминатата година, така и во иднина, сите јавни набавки кои ги прави службата ќе се реализираат со строго почитување на законските процедури, водени од начелата на транспарентност и отчетност. Со тоа ја елиминираме можноста за мито и корупција, како и за местење на тендери, што било одлика во некое претходно време, рече директорот на СОЗР Пеце Мирчевски.

Нагласувајќи дека во иднина во постапките нема да има практики на провизии и приоритетни добавувачи, Мирчевски рече:

„За да докажеме дека овие наши заложби се искрени, за прв пат ги отвораме вратите и ги покануваме граѓаните, преку граѓанските организации, да вршат мониторинг на сите јавни набавки кои ги спроведува Службата за општи и заеднички работи. Само така граѓаните ќе можат да се уверат дека работиме одговорно и посветено, штитејќи го јавниот интерес и парите на граѓаните“.

 

Претседателот на Владата на Република Македонија Зоран Заев вчера во М6-Едукативниот Центар во Скопје присуствуваше и имаше свое обраќање на одбележувањето на почетокот на проектот „Образование за вработување во Македонија (Е4Е@mk)“.

Проектот, кој има за цел да стимулира вработување во Македонија преку подобрување на стручните вештини е поддржан од Швајцарската Конфедерација и имплементиран од страна на „Хелветас Македонија“, Македонскиот центар за граѓанско образование и Стопанската комора на Македонија.

„Дозволете ми да изразам огромна благодарност на нашите големи пријатели од Амбасадата на Швајцарија за визионерството и добрата волја што ја покажуваат преку реализација на овој значаен проект. Станува збор за одвоени средства во износ од 12.5 милиони евра, со кои ќе се спроведува проектот во 10 годишен период со што ќе овозможи младите луѓе од Република Македонија полесно да се прилагодат на барањата на пазарот на трудот преку квалитетни програми за образование, тренинг и обука“, рече премиерот Заев на настанот на кој присуствуваа и се обратија и амбасадорката на Швајцарската Конфедерација во Република Македонија, Сибил Сутер Техада и министерот за образование и наука на Република Македонија, Арбер Адеми.

Пред присутните гости, претставници на меѓународни организации, образовни институции, компании и невладиниот сектор, премиерот Заев ја истакна важната улога на младите луѓе како градители на иднината и додаде дека политичарите, родителите, професорите, научниците, академиците и деловните луѓе имаат обврска со сите сили да се изборат и да им го отворат патот на успехот и напредокот.

Премиерот Заев посочи дека Амбасадата на Швајцарија покажува визионерство и добра волја преку реализација на овој значаен проекти, додавајќи дека се истакнува и поддршката за реализацијата на владиниот проект „Младинска гаранција“, кој ја има истата цел.

„Република Македонија е единствената земја во регионот, која не е членка на Европската Унија, а започнува со воведување на „Гаранција за млади“, како мерка за зголемување на вработливоста на младите луѓе. Младинската гаранција како пилот-проект веќе се спроведува во три општини, Струмица, Куманово и Гостивар и за овој краток временски период резултатите се одлични. За овој краток временски период 1.120 млади луѓе во овие три општини веќе се корисници на некоја од мерките којашто предвидува вработување, обука или пракса“, истакна премиерот Заев, додавајќи дека Владата на Република Македонија е подготвена, од следната година да ја спроведе „Младинската гаранција“ како мерка за вработување, обука, тренинг и пракса на младите на цела територија на Република Македонија.

Нејзината екселенција, Амбасадорката Техада во своето обраќање подвлече дека проектот „Образование за вработување во Македонија“ е амбициозен проект кој е посветен на остварување на фундаменталните цели на Владата, а тоа е намалување на невработеноста, односно крајната цел е што повеќе мажи и жени во Македонија да добијат работа, соодветна на нивните стручни вештини.

Овој проект, кој вчера накусо беше презентиран пред присутните, за министерот за образование Адеми е конкретен плод на соработката меѓу македонската Влада и институциите во земјата и Швајцарската Влада и нејзиното дипломатско претставништво во Скопје со цел подигнување на степенот на вработливоста, проблем кој Македонија се обидува да го намали од осамостојувањето.

Тој, додаде дека за развојот на стручното образование е важно стручните училишта да соработуваат со работодавачите со цел да се усогласат потребните вештини стекнати преку образованието со потребите на пазарот на трудот.

Претседателот на Владата на Република Македонија, Зоран Заев денеска се сретна со делегација на Парламентарното собрание на Советот на Европа за постмониторинг дијалог со Република Македонија, предводена од ко-известителите Лиза Кристоферсен и Валериу Гилечи.

На средбата се разговараше за актуелни политички прашања поврзани со реформските процеси во земјава, посебно во делот на судството, почитувањето на законите, демократијата и човековите права.

Претставниците на Парламентарното собрание на Советот на Европа даваат поддршка на евро-интеграциските процеси на Република Македонија и напредокот на државава.

Премиерот Заев посочи дека Република Македонија е на добар пат во реализацијата на своите стратешки цели, интеграциите во ЕУ и во НАТО и подобар живот на граѓаните на економски план.

Ги спроведуваме посветено потребните реформи во земјата низ инклузивни политики и водиме политики на добрососедство, што ги отворија перспективите на нашата држава. По договорот со Бугарија, постигнат е достоинствен договор и со Грција, со што го затвораме и последното прашање што стои на патот на Македонија во евро-атлантските аспирации. Граѓаните ќе го дадат последниот збор на референдум во врска со договорот со Грција, но очекувам општествена свест и сите да застанеме зад развојот на Македонија и да продолжиме уште поактивно да ја движиме државата напред, рече премиерот Заев. 

Претседателот на Владата Заев оцени дека добивањето датум за почеток на преговорите со ЕУ ќе биде мотив повеќе во енергичниот реформски пристап на Владата, којашто во овој процес ги вклучува активно и сите други општествени и политички чинители.

На состанокот, премиерот Заев и ко-известителите Кристоферсен и Гилечи од ПССЕ разговараа и за измените во Изборниот законик, како и за потребната зрелост од сите политички субјекти во државата, за носење одлуки во интерес на натамошните перспективи и стабилноста на Македонија.

Министерот без ресор, задолжен за комуникации, транспарентност и отчетност во Владата на Република Македонија, Роберт Поповски и министерот за информатичко општество и администрација, Дамјан Манчевски, денеска во Велес учествуваа на Форумот за јавни политики на тема „Справување со дезинформациите - комбиниран пристап на властите, граѓанското општество и медиумите за долгорочни решенија“, во организација на USAID, Владата на Република Македонија, Општина Велес и граѓански организации.

На Форумот со воведно излагање се обрати и Едвард Гонзалес - директор на канцеларијата на УСАИД за општ развој, а беа присутни и  пратеници и претставници на политичките партии, како и стручњаци од областа, претставници на новинарски, медиумски и граѓански организации.

 

 

Во обраќањето, министерот Поповски рече дека и покрај тоа што Велес во еден временски период стана синоним за ширење на лажни вести, токму денеска од овој град се испраќаат пораки дека Македонија тргнува во борбата против лажните вести.
Лажните вести, како што потенцираше Поповски, речиси секогаш носат пораки на национализам, поделба, раздор, конфликт и омраза.

„Видовме, не само деновиве туку и низ годините наназад, колку штетна може да биде пропагандата, дека тие лажни зборови честопати поттикнуваат вистинско и брутално насилство и агресивно однесување“, рече Поповски, додавајќи дека завчера, за време на насилните протести во Скопје но и во континуитет, како што рече, на социјалните мрежи се шират лажни и вознемирувачки вести вклучувајќи наводни жртви на полициска бруталност, за кои се користат стари фотографии од  личности од секаде по светот, лажни текстови и постови.

Говорејќи за поставеноста на Владата за справување со овие предизвици на дигиталното дезинформирање, Поповски го истакна повикот на Владата на конструктивна атмосфера и отворена дебата со граѓаните, без страв, заплашување и притисоци да градат сопствени ставови за секое отворено прашање, посебно акцентирајќи го претстојниот референдум за Договорот со Република Грција. 

„Постојано дејствуваме против манипулациите и веруваме дека проактивното објавување на информации, отчетноста и транспарентноста придонесуваат за намалување на лажните вести и пропагандата“, нагласи министерот Поповски, кој повика и на постојана гласност во критиките од граѓаните, политичките или граѓански здруженија и медиумите, со цел да бидат слушнати и да влијаат на креирањето на владините политики, и подвлече дека владата ќе продолжи со активна и двонасочна комуникација со граѓаните на интернет и социјалните мрежи, за, како што подвлече, брзо пресретнување и спречување на лажните вести.

 

 

„Тоа што изминатите неколку дена може да се прочита по социјалните мрежи и интернет порталите во Македонија, е уште една потврда за тоа колку проблемот со лажните вести е сериозен и треба посветено да работиме за справување со овој предизвик. Лажните вести во овој случај имаат за цел намерно извртување и манипулирање. На овој начин се поттикнуваат емоциите кај граѓаните и се манипулираат да верува во тоа што сака да го продаде страната која е нарачател на овие содржини и лажни вести“, истакна министерот за информатичко општество и администрација, Дамјан Манчевски во своето излагање на панел дискусија на Форумот.

Манчевски потенцираше дека тоа што Владата може да го направи во моментов е, преку редовно информирање и целосна транспарентност во работењето, како што рече тој,  „да се спротивставиме на дезинформациите кои поединци сакаат да ги наметнат во јавноста“. 

Според него, овој тип на работење, Владата го темели на три основни столбови: демократизација на медиумскиот амбиент, активна транспарентност и зголемен пристап до информации.

„Во овој правец се и предлог измените во Законот за АВМУ. Измените во законот за АВМУ, гарантираат услови за професионализација на медиумските тела. Овозможуваат слободно и независно работење на медиумите во државата. Најважно од се, даваат шанса политичарите да ги тргнат рацете од медиумите. Владата цврсто стои зад овие заложби за демократизација на медиумскиот сектор и професионализација на регулаторните тела и во овој дел нема да има отстапки. Силната регулација на медиумите во основа не може да донесе голем бенефит, бидејќи многу лесно може да прерасне во цензура. Клучот е во новинарска фела, да се саморегулира и се држи до етичките и морални стандарди. Владите и сите политички субјекти мораат да се држат до овие стандарди“, нагласи министерот Манчевски. 

На денешниот форум, пред присутните гости и јавноста се обрати и градоначалникот на Велес, Аце Коцевски, кој пред сѐ, искажа жалење дека и покрај значајното место кое Велес го зазема во културната и просветната историја и традиција на Република Македонија, сепак остана најзапаметен како град-фабрика за лажни вести, што според него е резултат на долгогодишниот економски колапс и големата невработеност во градот. 

„Фактичката ситуација на терен ми потврди дека како локална самоуправа, имаме голем предизвик да се избориме не само со малигната популација на лажните вести, особено кај помладата популација, туку и со поддршка на државата да воспоставиме функционален систем на превенција, за да не се повтори оваа лоша слика која ја виде светот“, рече во своето обраќање градоначалникот Коцевски.

Градоначалникот информираше дека Општината ќе соработува со младите преку отворање на младински креативен центар, каде ќе можат да развиваат вештини од претприемништвото, иновации, европски проекти, уметност и култура, а не со ширење лажни вести, а со тоа и да придонесат за градење на имиџот на Велес.

Едвард Гонзалес - директорот на канцеларијата на УСАИД за општ развој, пред присутните на денешниот Форум, рече дека денешниот настан е важен и навремен, имајќи ја предвид актуелната тема за дезинформирање, феномен кој , како што истакна тој, рапидно еволуира и има локален но исто толку и локален импакт. 

„Граѓаните треба да развијат практика на следење на вести од различни извори и да бидат критични кон информациите кои ги конзумираат. Од друга страна, Владата треба да ја почитува улогата на независните медиуми, да промовира транспарентност и отчетност во владеењето, како и да овозможи здрава средина која овозможува овој сектор да си ја одигра својата улога“, рече Гонзалес, посебно нагласувајќи ја идејата дека сега, повеќе од било кога порано, Владата, бизнис секторот, медиумите, граѓанските организации и граѓаните треба да работат заедно во решавање на  растечкиот проблем кој го претставуваат лажните вести, како би се осигурале напорите на државата да продолжи да се движи напред кон својата европска интеграција. 
 

Претседателот на Владата на Република Македонија денеска се сретна со делегација на Канцеларијата за услуги на проекти на Обединетите нации (УНОПС) предводена од заменичката на Генералниот секретар на ОН и извршна директорка на УНОПС Грете Фаремо.

На средбата, обете страни изразија огромно задоволство од потпишувањето на Договорот за решавање на македонско-грчкиот спор за името и за стратегиско партнерство, оценувајќи го како корисен не само за двете земји, туку и за регионот.

Директорката на УНОПС, г-ѓата Фаремо истакнувајќи оти е горда што се среќава со македонскиот премиер во историски денови, ја пренесе силната поддршка од Организацијата на обединетите нации (ООН) и Канцеларијата за проектни услуги на Обединетите нации (УНОПС) на патот на Македонија за евроатлантските аспирации.

Фаремо подвлече дека особено е задоволна што со Министерството за надворешни работи на Република Македонија, размениле писма за отворање на проектна Канцеларија на УНОПС во Скопје, што ќе значи зголемување на соработката во обезбедувањето услуги во одржливата инфраструктура, одржливите набавки и одржливото управување со проекти, кои опфаќаат изградба на училишта, патишта, мостови и болници,  како и набавка на стоки и услуги и обука на локален персонал.

На средбата, премиерот Заев ја истакна улогата на УНОПС како важен партнер за развојот на Македонија, кој во остварувањето на својата мисија поддржува проекти во инфраструктурата, набавките, финансискиот менаџмент и човечките ресурси.

Тој ја подвлече исклучителната важност на УНОПС во размената на најдобрите практики за реформите кои Македонија веќе ги презеде за обезбедување на почеток на преговорите со Европската унија.

Премиерот Заев и претставничката на УНОПС се согласија дека од исклучителна важност е реализацијата на Владиниот проект на воведување на Гаранција за млади, како мерка за зголемување на вработеноста на младите луѓе, посебно во руралните средини, каде веќе се остваруваат инфраструктурни проекти кои ќе го подобрат стандардот на младите, но и ќе ги направат конкурентни на пазарот на трудот.

Заменик Претседателот на Владата на Република Македонија, задолжен за европски прашања, Бујар Османи, во рамките на работната посета на Приштина, оствари средба со Претседателот на Косовo - Хашим Тачи.

На средбата беа отворени темите за напредокот во соработката меѓу двете земји, особено прекуграничната соработка, за европските перспективи на Западниот Балкан, во евроинтегративните процеси, како и очекувањата од претстојните самити на Европската Унија.

„Датум за преговори за Република Македонија, претставува пресвртна точка за нашите европски интеграции, но и важна одредница за европските перспективи на целиот Западен Балкан“, изјави Османи, изразувајќи притоа задоволство што целиот регион забележително се движи во европски правец и постои кредибилна перспектива за напредок за секоја од земјите.

„Затворивме исклучително комплексен и тежок спор меѓу Македонија и Грција, што претставува меѓудржавен дипломатски успех кој верувам ќе се наметне како начин на затворање на отворените прашања меѓу соседите во целиот регион“, истакна Османи, додавајќи дека заедно со успешното имплементирање на Договорот за добрососедство со Бугарија, на дело ја демонстрира сериозноста и зрелоста на Македонија и нејзините соседи.

Во текот на работната посета, Вицепремиерот Османи ќе оствари средба и со Потпретседателот на Владата на Косово, Енвер Хоџај, каде фокус на разговорите ќе биде соработката меѓу двете влади.