Претседателот на Владата на Република Македонија, Зоран Заев денеска учествуваше на трибина во организација на Стопанската Комора на Македонија на која заедно со Претседателот на Стопанска Комора на Македонија, Бранко Азески разговараа за перспективите на македонската економија од полноправното членство на земјата во ЕУ и НАТО.

На самиот почеток на дебатата беше заеднички констатирано дека Република Македонија мора да ја фати брзата трака кон полноправно членство во НАТО и ЕУ како важен предуслов за економски развој на државата и подобар животен стандард за граѓаните.

„Крајно време е после 27 години независност да ја ставиме Македонија на една брза трака или брз мотор, со лидерството заедно со стопанството кон членство во ЕУ и НАТО што ќе придонесе нашата земја да биде прикладно место за живеење.“ порача Премиерот Заев.

Претседателот на Стопанска Комора на Македонија, Бранко Азески во разговорот со премиерот Заев порача дека бизнис заедницата застанува цврсто зад напредните процеси кои се очекува да резултираат со полноправно членство на земјата во ЕУ и НАТО што ќе резултира со забрзување на економските процеси на раст и развој.

Во однос на информацијата којашто ја сподели Претседателот на Стопанската Комора на Македонија, Бранко Азески дека со членството на земјата во НАТО ќе се отвори можност за пласман на македонските производи и услуги за потребите на НАТО Алијансата којашто добавува 32 милиони производи од 16 милиони добавувачи, премиерот Заев истакна:

„Една од придобивките не е само што НАТО ни ја гарантира безбедноста, мирот и стабилноста коишто се најважни предуслови за бизнисот. Има и една друга убава придобивка овде, имаме право како членка да партиципираме во набавките што НАТО ги прави. Тоа ни следува со членството. Јас лично разговарав со генералниот секретар, бројките се многу убави и тоа отвора трговска можност на многу домашни компании да влезат и да заработат и профитираат. Тоа се стотици милиони евра можности кои се отвораат за нашите компании“ истакна премиерот Заев и додаде дека ќе се отвори таа можност по завршувањето на скринингот и потпишувањето на протоколот од земјите членки за полноправно членство на нашата држава во НАТО алијансата.

Во тој правец Премиерот Заев соопшти дека најавата за членство во НАТО и ЕУ придонесе кон постигнување на позитивни економски резултати кои според владини проценки и анализи ќе бележат раст на БДП во вториот квартал помеѓу 2.5% и 4%.

„Индустриското производство во јули 2018 во споредба со јули 2017 изнесува 8.4%. Од јануари до јули 2018 во споредба со истиот период 2017 е вкупно 5.5% раст на индустриското производство. Сакам да знаете дека вака како што е поставена во контрола државата преку УЈП и инспекциите, меѓу 8 и 10% е зголемен приходот од даноците во државата во споредба со лани. Тоа е доказ дека живее економијата, дека е раздвижена и растат овие параметри. Извозот е зголемен 14.5%. Сите овие параметри во најава покажуваат раст.“ рече премиерот Заев.

На крајот од своето обраќање премиерот Заев порача дека за поголеми стапки на економски раст и стабилност на економијата потребно е земјата да стане полноправна членка на ЕУ и НАТО и за таа цел побара поддршка од претставниците на бизнис заедницата.

Претседателот на Владата на Република Македонија, Зоран Заев, денеска се сретна со Христијан Хелбах, специјален претставник за Југоисточна Европа на германското министерство за надворешни работи.

На состанокот е изразена силна поддршка од Федеративна Република Германија за успешноста на претстојниот референдум и на евро-атлантските интеграции на Република Македонија.

Констатирано е дека Република Македонија е позитивен пример во регионот како  се решаваат билатерални прашања. Стабилноста и членството на Македонија во НАТО и во ЕУ е важно, како за граѓаните на нашата држава, така и за целиот регион. Очекуваме добри вести за целиот регион и затоа е многу важно, процесот што води кон интеграциите на Македонија да успее, со покажана одговорност од сите политички субјекти во државата, констатирано е заеднички на средбата.

Претседателот на Владата, Заев, изрази голема верба дека граѓаните ќе донесат правилна одлука за својата иднина и за иднината на својата држава на 30-ти септември.

- Граѓаните се свесни дека претстојниот референдум е вратата кон подобра иднина, повисок животен стандард, осигурени граници на државата, еднаш засекогаш потврден македонски јазик и идентитет, а тоа го носат членството во ЕУ и НАТО. Очекувам свесност од сите политички субјекти во државата кои им мислат добро на граѓаните и на државата, да го поддржат процесот на евро-атлантски интеграции и да ја обезбедиме заеднички, нашата заедничка иднина, рече премиерот Заев.

Германскиот специјален пратеник, Хелбах посочи дека решението на спорот со името е предуслов за успешна евроатлантска интеграција на Македонија.  

 

На редовната 86-та седница, Владата го формираше Kомитетот за интеграција на Република Македонија во НАТО.

 

Со него ќе претседава претседателот на Владата на Република Македонија, Зоран Заев, а негови заменици се Радмила Шекеринска Јанковска, заменик претседател на Владата на Република Македонија и министер за одбрана, Бујар Османи, заменик претседател на Владата на Република Македонија задолжен за европски прашања и Никола Димитров, министер за надворешни работи.

 

Постојани членови на Комитетот се: Оливер Спасовски, заменик претседател на Владата на Република Македонија и министер за внатрешни работи, Рената Дескоска, министер за правда, Драган Тевдовски, министер за финансии, Дамјан Манчевски, министер за информатичко општество и администрација, Генерал - мајор Васко Ѓурчиновски, началник на генералштабот на Армијата на Република Македонија, Стојан Славески, директор на дирекција за безбедност на класифицирани информации, Стево Пендаровски, национален координатор за НАТО, Беким Максути, заменик министер за одбрана, Агим Нухиу, заменик министер за внатрешни работи, претставник од опозицијата (според номинација од најголемата опозициска партија).

 

Во работата на комитетот може да учествуваат и други членови на Владата и други релевантни чинители доколку се расправа за теми од нивната област.

 

Денеска министрите ја прифатија информацијата за воведување на заеднички контроли на надлежните органи на Република Македонија и на Република Албанија на патниот граничен премин Ќафасан – Кафтане, односно one-stop-shop.

Владата го задолжи министерство за финансии - царинска управа во рок од 15 дена преку Министерството за надворешни работи на Република Македонија да го информира Министерството за надворешни работи на Република Албанија за согласноста од потребата за склучување на Спогодба и за потребата од формирање на делегација за започнување на постапка за водење преговори за склучување на Спогодбата за воведување на заеднички гранични контроли на патниот граничен премин Ќафасан – Кафтане.

На предлог на министерството за здравство, на седницата, министрите ја прифатија предлог - програмата за изменување на програмата за превентивни мерки за спречување на туберкулозата кај населението во Република Македонија за 2018-та година. Измените се однесуваат на делот на финансирање, односно прераспределени се 4 милиони денари - средства обезбедени од основниот буџет и вкупните средства се дополнуваат со 1 милион денари - пари обезбедени од буџет од донации.

Согласно денешната одлука, по повод 8 септември – Денот на независноста на Република Македонија, Владата в сабота ќе организира прослава на платото пред зградата на Владата со пригодна културно – уметничка програма.

На 86-тата седница министрите ја прифатија и информацијата во врска со утврдување на потребата за изработка на нов Закон за стратешки инвестиции во Република Македонија.

Владата го задолжи Министерството за транспорт и врски во рок од 3 дена од добиените номинации да формира работна група за изработка на предлог Закон за стратешки инвестиции во Република Македонија. Во исто време, неколку министерства, кабинетите на Претседателот на Владата и на Заменик Претседател на Владата, во рок од 5 дена да номинираат лице за работната група за изработка на предлог Закон за стратешки инвестиции во Република Македонија.

Од формирањето на работната група, Министерството за транспорт и врски има рок од 60 дена до Владата да достави нацрт Закон за стратешки инвестиции во Република Македонија.

На денешната седница Владата на Република Македонија ја разгледа и ја усвои информацијата за потребата од подобрување на состојбата на општинската патна мрежа.

 

За таа цел, Владата го задолжи Министерството за финансии да отпочне постапка за задолжување кај Светска банка со заем во висина од 70 милиони евра, во зависност од можностите на Буџетот, а врз основа на стратегијата за партнерство.

Претседателот на Владата на Република Македонија, Зоран Заев, министерот за образование и наука, Арбер Адеми и градоначалникот на општина Бутел, Велимир Смилевски денеска присуствуваа на првиот училишен ден на првачињата во ОУ „Ацо Шопов“ во скопската населба Радишани во Општина Бутел.

Премиерот Заев и министерот Адеми во своите обраќања им порачаа на учениците успешен почеток на учебната година и успешни школски денови во сите наредни години, додека на наставниците им порачаа да ги охрабруваат нивните ученици да ги развиваат своите знаења преку љубопитството и фантазијата бидејќи љубопитството и прашањата на учениците се израз на нивната желба за знаење.

„Сакам да им честитам и на вашите наставници на уште еден прв училишен ден во нивната кариера. Знам дека и тие се многу радосни што добиваат шанса да воспитуваат и едуцираат уште една генерација умни глави. Сакам да ги замолам да не престанат да ги почитуваат вашето љубопитство и фантазија.

Љубопитството и прашањата на учениците се израз на нивната желба за знаење. Слушајте ги внимателно, и обидете се заеднички со нив да стигнете до одговорите. Радоста на стекнувањето знаење и одговори кога учениците сами стигаат до одговорите, со ваша стручна помош, е незаменлива.

И уште една порака за наставниците: Никогаш не ги игнорирајте индивидуалните посебности на децата. Во нив се кријат силни таленти на кои ви ќе бидете лично горди кога ќе ги откриете“ порача премиерот Заев.

Во своето обраќање министерот Адеми потенцираше дека: „Најголем предизвик денеска е за најмалите е првиот ден во училишните клупи. Овој ден тие започнуваат нова етапа во нивниот живот на личен и професионален план. Овој пат не се сами, тие се заедно со вас заедно со нас да градиме заедно европска држава, европско образование. Оваа учебна година ја започнуваме со многу новини, освен покачувањето на платата за 5% за сите вработени во основни и средни училишта, исто така оваа учебна година почнува со 22 коригирани учебници. Сите недостатоци кои се веќе констатирани во претходниот период ќе се исправат. Исто така учениците од прво до трето одделение, секоја година согласно законот за учебници ќе добиваат нови учебници по сите наставни предмети така што заедно јас сум сигурен дека можеме да постигнеме повеќе.“


Здраво дечиња, првачиња,

Почитувани родители и наставници,

Почитуван министер за образование Адеми,

Почитуван градоначалник на општина Бутел Велимир Смилевски,

Почитувана директорка на училиштето Лепосава Дохчева,

Верувајте ми, дека лично јас денеска се радувам што сум тука со вас, исто толку колку што се радувате и вие – децата коишто тргнуваат на првиот школски ден во оваа учебна година!

Радоста што излегува од вас се шири насекаде, од вашите домови, во вашето семејство, кај вашите родители, баби и дедовци, кај вашите братчиња и сестричиња...

Денеска сите вие децата и вашите родители ќе добиете стотици честитки, ќе ви се јавуваат и ќе ви честитаат и ќе ви посакуваат успешен прв училишен ден и успешни школски денови во сите наредни години.

Најважните работи што ќе ви се случат во животот, можат да се избројат со прстите од едната рака:

Еве да го поставам јас првото прашање на вашиот прв училиштен ден: Колку прсти има раката?

Така, е пет, браво. Ете, вашите наставници уште денеска можат да ви напишат една голема петка на сите дечиња заради тоа што дечињата ни се паметни.

Една од тие пет најважни работи во вашиот живот е вашиот прв училишен ден.

Овој ден денеска е посебен, ден што ќе го паметите целиот ваш живот. Верувајте ми!

Денеска ќе си разговарате со вашите родители, со бабите и дедовците, со постарите братчиња и сестрички, и сите ќе ви го кажат истото: Ова е ден за паметење.

Зашто од денеска натаму, многу од тие најважни работи во животот ќе ви се случуваат токму тука, во училиштето.

Тука ќе учите, тука ќе ги направите некои од пријателствата што ќе ви траат низ целиот живот.

Можеби првото другарче што сега е токму до вас, е токму тој пријател за цел живот.

Тоа е училиштето...

Училиштето е и место каде што ќе учите. Ќе стекнувате многу знаење. Знаењето е многу интересно. Работите што ќе ги научите тука, ќе ви помагаат на разни начини во вашиот живот.

Знаењето што ќе го примате и совладувате со вашите умни главички, во ова училиште, и во другите училишта подоцна, ќе ви помогнат да бидете лекари, градители на највисоки згради и на најубави мостови, ќе ви помогне да бидете најдобри сликари, балерини, новинари, глумци.

Тоа е училиштето, тоа е знаењето.

Вие сите сте многу паметни деца. Сите. И знам дека сте многу љубопитни и дека сакате да поставувате многу прашања.

Тоа е многу добро. И никогаш немојте да престанете да го правите тоа. Да поставувате прашања секаде околу вас.

И кога го спомнувам тоа, сакам да им честитам и на вашите наставници на уште еден прв училишен ден во нивната кариера. Знам дека и тие се многу радосни што добиваат шанса да воспитуваат и едуцираат уште една генерација на умни дечиња.

Сакам да ги замолам да не престанат да ги почитуваат вашето љубопитство и фантазија.

Љубопитството и прашањата на учениците се израз на нивната желба за знаење. Слушајте ги внимателно, и обидете се заеднички со нив да стигнете до одговорите.

Радоста на стекнувањето знаење и одговори кога учениците сами стигаат до одговорите, со ваша стручна помош, е незаменлива.

И уште една порака за наставниците: Никогаш не ги игнорирајте индивидуалните посебности на децата. Во нив се кријат силни таленти на кои ви ќе бидете лично горди кога ќе ги откриете.

Мили деца, почитувани и среќни родители почитувани наставници нека ви е честит првиот училишен ден.

Нека биде само прв од низата успешни кои ќе ви донесат радост во вашите семејства, во вашето училиште, во вашите кариери.

Претседателот на Владата на Република Македонија, Зоран Заев, денеска се сретна со Ендру Пејџ, директор за Западен Балкан во британското Министерство за надворешни работи, придружуван од Рејчел Галовеј, амбасадорка на Обединетото Кралство на Велика Британија и Северна Ирска во Република Македонија.

Регионот е во нов моментум, а таа позитивна клима во голем дел е благодарение на постигнувањата на Македонија. И следните чекори што мора да ги направи државава се прогрес во интеграциите. Ова е пораката што ја пренесе директорот од британското МНР за Западен Балкан, Пејџ.

На средбата е заеднички констатирано дека е потребно сите во државата да преземат одговорност за успешност на овој важен процес.

- Ние знаеме дека мора да бидеме одговорни и да преземаме чекори, бидејќи само така ќе ја осигуриме иднината на граѓаните, на економски и на безбедносен план. Убеден сум дека мнозинството граѓани ќе излезат на референдумот и ќе гласаат за Македонија во ЕУ и во НАТО. Она што е важно е и сите политички субјекти да ги остават личните и партиски интереси и да се определат за државните интереси, тоа значи да излезат и да се изјаснат на референдумот, рече премиерот Заев.

Претседателот на Владата, Заев, посочи дека и анкетите покажуваат мнозинска поддршка од граѓаните кои ја гледаат Македонија во ЕУ и НАТО, затоа што знаат дека тоа се перспективите за младите и за државата.  

- Испративме пораки, како граѓани и како држава, во европски дух, дека можеме да градиме пријателства. Верувам и дека на референдумот ќе донесеме уште една правилна одлука за иднината на сегашните генерации, за нашите деца и за нашата држава, додаде премиерот Заев.

На средбата се разговараше и за други актуелни политички прашања во интерес на стабилноста, безбедноста и економскиот развој на целиот регион.

 
 

Скопјe,

3 септември 2018 година

 

Влада на Република Македонија

Генерален секретаријат на Владата на Република Македонија

Сектор за односи со јавноста

Бул. Илинден бр.2,

1000 Скопје,

Република Македонија

Тел.: +389 2 3123371;

факс: +389 2 3122375

e-mail: press@vlada.gov.mk

 

 

Генералниот секретар на Владата на Република Македонија Драги Рашковски, придружуван од државните секретари и претставници  на ресорните министерства на Република Македонија, денеска одржа работна средба со државните секретари и претставници на  министерствата од Република Бугарија, на која беше изразена подготвеност за интензивирање на соработката меѓу двете земји.

„Македонија е максимално посветена на одржување на континуитетот на реформите, по безусловната препорака за почеток на преговорите со ЕУ и поканата од НАТО, а Вашата помош и искуство, ни е посебно добредојдена“, рече Генералниот секретар Рашковски посакувајќи им добредојде на членовите на бугарската делегација.

Претставниците на делегацијата на Владата на Република Бугарија, истакнувајќи ја поддршката за македонско-бугарското пријателство и соработката на сите нивоа, изразија убеденост во позитивен исход од претстојниот Референдум, и заеднички беше констатирано дека тоа ќе го забрза исполнувањето на евроатлантските аспирации на Македонија како придонес за безбедносна стабилност на регионот, и како придонес во создавањето на позитивна клима за економски развој и просперитет на регионално ниво. 

Претседателот на Владата на Република Македонија, Зоран Заев и Претседателот на Република Србија, Александар Вучиќ денеска се сретнаа на граничниот премин Табановце Прешево и најавија почеток на имплементација на проектот за заедничко гранично управување One Stop Shop.

Премиерот Заев и претседателот Вучиќ во своите обраќања пред медиумуте истакнаа дека со реализацијата на овој проект се отвараат перспективите за зголемување на економската соработка  и трговска размена преку овозможување на побрз проток на луѓе, капитал и стоки помеѓу двете земји.

„Дозволете да го изразам моето задоволство што во присуство на Претседателот на Република Србија, Александар Вучиќ имаме можност да најавиме еден значаен проект за граѓаните на двете земји, но верувам и за граѓаните на целиот овој регион. Тоа е концептот на заеднички гранични контроли со едно застанување, или т.н One Stop Shop концепт. Македонија ја има честа да го отвори првиот на нашиот најпрометен граничен премин со Република Србија.“ порача премиерот Заев.

Премиерот Заев изрази благодарност до Светска Банка за поддршката што ја пружа во реализацијата на овој значаен проект за кој рече дека ќе овозможува на едно место, во исто време на заедничка локација преку едно застанување, граѓаните, превозните средства и стоките побрзо да поминуваат на граничниот премин Табановце Прешево. Премиерот Заев соопшти дека овој проект престатвува дел од заедничката економска агенда на земјите од Западен Балкан.

„Навистина ми е драго што Шенген механизмите ги воведуваме овде и ја носиме Европа овде на Балканот. Драго ми е што ова претставува само уште еден пример на големото пријателство помеѓу Македонија и Србија, кое секогаш е докажано. Денеска имаме прилика да го потврдиме тоа големо пријателство за коешто знам дека ќе расте во периодот што доаѓа.“ истакна Премиерот Заев.

Во тој правец Премиерот Заев посочи дека постои волја од страна на двете земји да се отворат и нови гранични премини на кои веќе работат владите и најави дека следува потпишување на билатерални договори на заедничката владина седница помеѓу институциите на двете земји за да се започне со употреба на овој систем.

Во одговор на новинарско прашање премиерот Заев рече дека институциите на двете земји ќе негуваат целосна меѓусебна доверба во реализација на овој проект.

„Податоците од Светска Банка кажуваат дека на Балканскиот Полуостров се губи една милијарда долари годишно заради чекање на граничните премини. Транаспортните средства а посебно камионите, 80 проценти од своето време го поминуваат во чекање на границите, а само 20 проценти на автопатите. Сите овие податоци ни укажуваа дека треба брзо да делуваме и да им помогнеме да стопанствениците и трговската размена бидејќи тоа е нашата функција да бидеме од корист на граѓаните и стопанството.“ додаде премиерот Заев.

За актуелните преговори на релација Приштина Белград премиерот Заев рече дека на заеднички ручек ќе се информира од Претседателот Вучиќ за одредени текови и она што е преокупација на пријателска Република Србија.

„Македонија поддржува позитивно решение за Косово. Решение коешто ќе ја унапреди благосостојбата и на Србите и на Албанците и на сите други граѓани кои живеат на Косово. Решение коешто ќе ја гарантира и безбедноста, и мирот, и просперитетот и на Србија, и на Косово и на целиот овој наш регион. Значајно е сите лидери овде на регионот да бидат обединети околу заедничките цели, а тоа се траен мир, регионална соработка, економски развој и членство во Европската Унија.“ рече Премиерот Заев во одговор на новинарско прашање.

Претседателот на Владата на Република Македонија Зоран Заев и министерската за труд и социјана политика Мила Царовска, денеска во Радовиш ги отворија 23-те Пензионерски спортски игри. Игрите ги организира Сојузот на здруженијата на пензионерите на Македонија, а се под покровителство на Министерството за труд и социјална политика.

 

Во своето обраќање премиерот Заев ја поздрави енергијата што ја имаат пензионерите, и им порача дека грижата и заштитата остануваат врвен приоритет на Владата.

 

„Ги следиме европските пракси, гледаме како живеат пензионерите во земјите од Европска Унија, поспокојно и покомотно, и токму затоа секојдневно работиме, затоа и стратешките чекори кои ги преземаме водат токму кон Европската Унија. Тие чекори се за да го кренеме стандардот на достоинствено ниво какво што доликува на секој, кој чесно си ги изразботил своите продуктивни години, и треба да ги ужива пензионерските денови исправено и горделиво“, рече Заев.

 

Министерката Мила Царовска рече дека со организирање на различни настани од социјален, културен  и спортски карактер Сојузот на пензионери придонесува да се подобри нивниот статус.

 

Им порача дека Министерството посветено работи на обезбедување на подобри услови за достоинствен живот на овие граѓани кои со животното искуство што го имаат се многу значајна алка во општетсвото.

 

 „ Македонија е социјална држава која се грижи за граѓаните преку обезбедување на социјална сигурност и пристап до социјалните права. Врвна цел на оваа Влада е што повеќе да ги унапреди и подобри овие права со што ќе го подобри стандардот на пензионерите и ќе им обезбеди достоинствен и мирен живот. Затоа како што растат платите, растат и пензиите два пати годишно“, рече Царовска.

 

Настанот се организира традиционално веќе 23 години, по повод пензионерското организирање и на него учестувуваат над 500 пензионери од здруженијата на пензионери ширум земјата. На отворањето на игрите се обратија и Салтир Каровски, Претседател на ИО на СЗПМ  и претседателот на ЗП Радовиш и Конче, Јиордан Костадинов. Присутните ги поздравија и  градоначалниците на Радовиш и Конче Герасим Конзулов и Благој Илиев.

 

Заменичката на претседателот на Владата и министерка за одбрана Радмила Шекеринска денеска учествуваше на Безбедносниот форум - Дубровник 2018, кој годинава се одржува на тема „Зајакнување на отпорноста на Медитеранот, Европа и Западниот Балкан“. Шекеринска имаше воведно обраќање на форумот, во кое истакна дека Македонија од изолирана и заробена држава, стана успешна приказна.

„Македонија се промени. Ги разрешивме отворените прашања со Бугарија и Грција, фокусирани сме на реформите, зајакнувањето на економијата и враќањето на демократијата во земјата. Веруваме во партнерства. И јас сум неизмерно горда што сега сме гледани како успешна приказна. Постојат кругови кои сакаат во пресрет на референдумот да ги дискредитираат нашите напори. Но, ние знаеме дека сме на вистинската страна на историјата“, рече Шекеринска.

Министерката рече дека напорната политичка работа на сегашната Влада вроди со резултат – поканети сме во НАТО. Ова е клучен период за нас и благодарни сме за  поддршката од членките на НАТО, присутни и на овој форум, додаде Шекеринска.

„Новата Влада од која сум дел започна храбра политика на меѓународен план, за надоместување на изгубеното време, водена од чувството дека постои момент кој треба да се искористи. Во релативно краток период покажавме дека и за комплицирани прашања, какви што беа нашите разлики со Грција, постојат решенија “, рече министерката Шекеринска.

Таа се осврна и на претстојниот референдум велејќи дека е демократски инструмент во функција на дефинирање на идните државни активности на меѓународен план.

Шекеринска рече дека напредокот на регионот зависи од решителноста со која се справува со противниците на прогресот кои користат лажни вести и дезинфомации. Но, никогаш порано, нагласи, регионот не бил толку блиску до надминување на застарени расправии, и многу е важно оваа поддршка за нашите напори да продолжи со зголемен интензитет.

„Македонија е географски европска држава, но наша задача е да ги донесеме европските правила и да ги зајакнеме европските вредности во општеството“, рече Шекеринска.

На форумот учествуваа четириесетина проминентни личности од политиката меѓу кои премиери, министри и заменици министри за надворешни работи од регионот, Европа и пошироко, како и претставници на повеќе меѓународни и тинк-тенк организации.

На маргините на форумот министерката имаше средби со високиот претставник на Стејт департментот Метју Палмер, со унгарскиот министер за надворешни работи и трговија Петер Сијарто и со амбасадорот на Канада во ЕУ, Даниел Костело.

Владата на денешната редовна седница донесе одлука за зголемување на платите на вработените во основно и во средно образование за 5%, почнувајќи од исплатата на септемвриската плата годинава.

 

За покачувањето на платите во основно образование, за четвртиот квартал од 2018-тата година, министерството за образование и наука ќе издвои 99 милиони денари, додека за покачувањето на платите во средно образование, вкупно 40 милиони денари.

 

За реализација на предвиденото покачување на платите министерството за образование и наука ќе потпише спогодби со Самостојниот синдикат за образование, наука и култура на Република Македонија. Со Спогодбите се утврдуваат најниската плата за најнискиот степен на сложеност на вработените во основните училишта која ќе изнесува 12.714 денари и најниската плата за најнискиот степен на сложеност на вработените во средните училишта која ќе изнесува 13.117 денари.

 

На 85-тата седница, на предлог на Министерството за земјоделство, шумарство и водостопанство, Владата ја прифати предлог - уредбата за изменување и дополнување на уредбата за поблиските критериуми за директни плаќања, корисниците на средствата, максималните износи и начинот на директните плаќања за 2018-та година.

 

Со уредбата, се обезбедува дополнителна субвенција од 1 денар за килограм предадено грозје за сортите вранец и смедеревка. Оваа мерка ќе придонесе и за зголемување на рентабилноста на производството на овие две најзастапени сорти.

 

Владата денеска го усвои концептот за Национална структура за водење на процесот за зачленување на Република Македонија во НАТО.

 

Владата ги задолжи министрите за одбрана, за надворешни и за внатрешни работи, за правда, за финансии, за информатичко општество и администрација, како и директорот на дирекцијата за безбедност на класифицирани информации, во рок од еден ден да определат претставник или претставници од нивните институции кои ќе земат учество во работата на работниот комитет за интеграција во НАТО.

 

Исто така, Владата го задолжи Националниот координатор за НАТО да одржи состанок на работниот комитет за интеграција на Република Македонија во НАТО во рок од седум дена.

 

Согласно одлуката за утврдување на бројот на стипендистите и висината на стипендиите за ученици запишани во средните училишта во Република Македонија за учебната 2018/2019, 100 талентирани ученици и 80 талентирани ученици – спортисти ќе добиваат стипендија во висина од 2. 970 денари. 100 учениците со посебни потреби и 50 ученици - деца без родители ќе добијат стипендија од 2.750 денар, а 400-тини ученици ќе добијат стипендија за социјална поддршка од 2.200 денари. Стипендии се предвидени и за учениците – роми.

 

Владата исто така, донесе одлука за доделување на 50 стипендии на странски државјани од интерес на Република Македонија, односно за студенти со македонско потекло кои живеат во државите на Балканскиот полуостров.

 

Стипендии ќе добијат студентите кои ќе се запишат како редовни студенти на државните универзитети: „Св. Кирил и Методиј“ - Скопје, „Св. Климент Охридски“ - Битола, „Гоце Делчев“ - Штип, Универзитетот за информатички науки и технологии „Св. Апостол Павле“ - Охрид, „Мајка Тереза“ - Скопје и Универзитетот во Тетово во студиската 2018/2019 година.

 

На денешната седница министрите го прифатија правилникот за барања за безбедност и квалитет на водата за пиење. Целта на овој правилник е обезбедување на безбедна и чиста вода заради заштита на здравјето на луѓето од несаканите ефекти од контаминација на водата за пиење.

 

Препознавајќи ја потребата од зајакнување на економската соработка помеѓу Република Македонија и Босна и Херцеговина, при тоа зачувувајќи ги принципите на еднаквост, взаемна корист и недискриминација, Владата го прифати предлогот на министерството за економија за поведување постапка за водење преговори за склучување на Договорот за економска соработка меѓу двете земји.

 

Целта на договорот е да ја поттикне и да ја унапреди економската соработка во области од заеднички интерес на Република Македонија и на Босна и Херцеговина, а со тоа да се одржи економскиот развој на двете земји, како и да се подобри економската ефикасност и благосостојба на потрошувачите.

 

На 85-тата седница Владата го разгледа и го прифати годишниот извештај за преземените активности и постигнатиот напредок за воспоставување еднакви можности на жените и мажите во Република Македонија за 2017-та година. Дел од препораките кои произлегуваат од истиот за 2019-тата година се да се обезбедат:

  • Достапни и квалитетни услуги во поглед на сексуалното и репродуктивно здравје;
  • Продолжување и финализирање на процесот на грижа за децата и пренесување на товарот од жените кон општеството преку зголемување на капацитетите и обезбедување на различни форми на згрижување на децата; 
  • Воведување на мерки за балансирање на работата и семејството; 
  • Зголемување на стапката на учество на жените на пазарот на труд и воведување на специјални мерки за економско јакнење на жените и руралните жени;

 

Владата на денешната седница ги именуваше Сали Ајдини за директот на Државниот комунален инспекторат, Рухан Иљази за директор на Дирекцијата за радијациона безбедност, како и Сами Рушиди, за заменик – директор на дирекцијата за странски инвестиции.