Владата на Република Македонија денеска ќе ја одржи редовната 67-ма седница со повеќе точки на дневниот ред од Програмата за работа на владата и од интерес на граѓаните.

На денешната седница Владата на РМ ќе се произнесе по Предлог-одлуката за давање согласност за давање под долготраен закуп на градежно земјиште-сопственост на РМ по пат на непосредна спогодба на Друштво за производство на електрична енергија „Актуел енерџи груп“ доо - Скопје, за изградба на мала хидроелектрична централа Конска и придружни објекти на река Конска, општина Гевгелија.

Министрите во Владата на РМ денеска ќе го разгледаат и Предлог-закон за изменување и дополнување на Законот за вршење на услуги брз трансфер на пари, на предлог на Министерството за финансии.

На предлог на Министерството за транспорт и врски, Владата на оваа, 67-ма седница, ќе ја разгледа и информацијата за продолжување на крајниот рок на достапност на средствата обезбедени од заем од Европска инвестициона банка за проектот „Водоснабдување и одведување на отпадни води“, како и извештајот за моменталната состојба на железничка делница Бељаковце - Крива Паланка, од железничкиот Коридор 8.

Министерството за животна средина и просторно планирање на денешната седница ќе ја презентира информацијата за потпишување на Рамковен договор помеѓу Фондот за природа Преспа-Охрид (ПОНТ) и Министерството за животна средина и просторно планирање.

На денешната владина седница ќе се разгледа и извештајот за спроведувањето на Програмата за оддржлив локален развој и децентрализација во Република Македонија 2015 - 2020, како и Годишниот извештај за 2017 година на Агенцијата за странски инвестиции и промоција на извозот на Република Македонија.

Министрите во Владата на РМ на денешната седница ќе се произнесат и по Информацијата за прогресот на реализација на Проектот „Откуп на дворно место 1 евро за 1 м2”.

На денешната владина седница Јавното претпријатие за државни патишта ќе информира за можноста за поврзување на ТИРЗ „Тетово“ со автопатот А2 (Е-65), а Агенцијата за вработување на Република Македонија ќе ја презентира Програмата за работа на Агенцијата за вработување на Република Македонија за 2018 година.

Предвидено е 67-та седница на Владата на Република Македонија да започне во 12 часот.

Заменик претседателот на Владата на Република Македонија задолжен за економски прашања, д-р Кочо Анѓушев денеска оствари работна посета во Тетово, каде што посети еден од производствените погони на компанијата Пофикс, којашто се занимава со производство на градежни материјали, а потоа учествуваше и на работен состанок на кој присуствуваа околу педесет претставници од компании членки на Стопанската комора на Северозападна Македонија.

Вицепремиерот Анѓушев истакна дека минатата седмица во Собранието на Република Македонија беше усвоен Законот за финансиска поддршка на инвестициите со кој се овозможува поддршка на македонските компании кои имаат реализирано инвестиции во 2017 година, а преку кој се поттикнуваат нови инвестиции на компаниите во 2018 и во годините кои следат.

 

 

„Македонската економија мора да биде извозно ориентирана, а компаниите да освојуваат нови пазари. Токму преку мерките од Законот за финансиска поддршка на инвестициите, се поддржуваат инвестициски проекти на компаниите за технолошки развој, како и инвестициите во едукација и обука на професионален, компетентен кадар, кој ќе биде добро платен. Преку имплементација на Законот и реализација на Програмата за поддршка на малите и средни претпријатија на Фондот за иновации и технолошки развој, ќе ја подигнеме конкурентноста на компаниите и ќе обезбедиме услови за побрз развој на македонската економија, раст на стапките на бруто домашниот производ и нови подобро платени работни места за македонските граѓани“, потенцираше вицепремиерот Анѓушев.

На состанокот кој се одржа во Бизнис центарот на Универзитетот за Југоисточна Европа, вицепремиерот детално ги презентираше мерките од Планот за економски раст, поделени во три столба. Притоа тој истакна дека Владата особен фокус при креирање на мерките посвети за поддршка на малите и средни претпријатија, кои може да ги користат мерките од трите столба на Планот, додека големите компании, нема да бидат во можност да ги користат мерките од третиот столб.

„Микро, малите и средни компании може да добијат 30% поврат од направените инвестиции, за нови машини или изградба на хали, како и за обука на вработените, а доколку инвестициите се реализирани за развој на нови иновативни производи, повратот на инвестицијата може да достигне до 70%. Веќе е објавен првиот јавен повик на Фондот за иновации и технолошки развој на кој компаниите може да аплицираат“, посочи вицепремиерот Анѓушев.

На состанокот со претставниците на компаниите кои работат во Полошкиот регион се разговараше и за предизвиците и проблемите со кои овие компании се соочуваат при работењето, како и можни решенија за нивно брзо надминување.

 

Министерот за економија Крешник Бектеши денеска учествуваше на дебатата „Економска интеграција на земјите од Западен Балкан и пристапот на земјите од Западен Балкан во Европската унија“, организирана од Институтот за политички и меѓународни студии - ИСПН, која се одржа во рамки на Европската недела.

Министерот Бектеши, објаснувајќи ги можните придобивки на Македонија по членството во ЕУ, рече дека во последните две децении означен е голем напредок во Западен Балкан и многу важни достигнувања, но регионот сѐ уште се соочува со неколку предизвици за приближување на животниот стандард до онаа на европските земји, нагласувајќи дека без директна финансиска поддршка од ЕУ, ова нема да се постигне според динамиката на која се надеваат земјите од Западен Балкан.

 

 

„На последниот самит во Трст, Западен Балкан обезбеди неколку регионални проекти за поврзување, изразувајќи потреба да обезбеди финансиска поддршка за подобра мрежа на патни, железнички, воздушни и енергетски врски. Создавањето на регионална економска зона за економска интеграција во Западен Балкан има за цел да ги поддржи нашите земји да привлечат повеќе инвестиции, да ги намалат трошоците за трговија и производство и да ги елиминираат бариерите за пристап на пазарот на национално ниво, врз основа на согласност со ЕУ ", рече Бектеши.

„Иако имаме амбициозна агенда, во воспоставувањето на обединета трговска политика за зајакнување на нашите трговски потенцијали и подобрување на трговските бројки, нашата трговска интеграција претставува чекор напред кон ЕУ, а не алтернатива за членство“, додаде Бектеши.

Владата на Република Македонија, рече министерот Бектеши, останува целосно посветена на натамошно зајакнување на регионалната соработка во Западен Балкан врз основа на принципите на регионална сопственост, одговорност, вклученост, солидарност и добрососедски односи, со цел да се зголеми конкурентноста и да се зголеми индустријата и бизнисот во регионот.

Во име на европското претседателство, заменик-амбасадорката на Бугарија, Даниела Будинова, рече дека националното мото на нејзината земја е "Обединети сме посилни" и ова мото треба да им служи на сите во регионот, иако Македонија постигна голем напредок за членството во ЕУ, таа уште еднаш ја потврди поддршката што Бугарија и ја дава на нашата земја.

Амбасадорката на Република Австрија, Ренате Коблер, земјата која го презема претседателството со ЕУ од јуни месец, разговараше за глобалната стратегија на Европската унија и за 18-месечниот план што го има Европската унија, за нови работни места и развој на конкурентноста.

 

Министерката без ресор задолжена за странски инвестиции, Зорица Апостолска заедно со директорот на Дирекцијата за технолошко индустриски развојни зони (ДТИРЗ), Александар Младеновски, денес во просториите на Стопанската комора на Македонија, во Скопје, пред повеќе италијански компании го претставија новиот пакет на мерки за поддршка на инвестициите на Владата на Република Македонија. На работната средба присуствуваа амбасадор на Република Италија во Република Македонија, Карло Ромео, претставници на италијанската трговска организација „ИТА“ и „Конфиндустрија – Македонија“.

„Со усвојувањето на Законот за финансиска поддршка на инвестициите во Собранието владините економски политики се унапредија во правец на поставување на цврста правна рамка, со која освен поддршка за инвестициите и конкурентноста на компаниите им се два и сигурност“, рече министерката Апостолска.

Нагласувајќи ја транспарентноста во односот кој Владата го има кон странските инвеститори, министерката Апостолска појасни дека со новото законско решение, преку јасно поставени и јавно достапни критериуми, на компаниите им се гарантира сигурност во пристапот до финансиската поддршка.

„Административните процедури нема да бидат обесхрабрувачки и демотивирачки за компаниите кои ќе одлучат да инвестираат и да ги искористат бенефициите кои како Влада ги нудиме“, рече Апостолска.

Осврнувајќи се на значењето на квалитетот на работната сила за севкупниот економски раст и развој на земјата, министерката Апостолска ги информираше претставниците на италијанските компании за владините образовни политики кои се насочени на креирање на високо квалификувана работна сила која може да ги задоволи потребите на бизнис заедницата.

Во своето обраќање италијанскиот амбасадор Карло Ромео истакна дека очекува денешната работна средба да даде позитивен и охрабрувачки импулс за зголемување на италијанските инвестициите, и тоа како од компаниите кои веќе работата во Македонија така и од компании од Италија кои досега немаат вложено капитал во земјава.

Амбасадорот Ромео посочи дека по двегодишната политичка криза италијански компании повторно изразуваат интерес за инвестирање во Македонија, притоа изразувајќи оптимизам дека владините мерки за поддршка на инвестициите ќе допринесат за понатамошно унапредување на трговската размена помеѓу двете земји и ќе создадат услови бројот од 130 италијански компании, кои веќе работата во Македонија, да се зголеми.

На работната средба директорот на ДТИРЗ, Александар Младеновски, во контекст на мерките од Планот за економски раст, пред италијанската бизнис заедница во Македонија ги претстави условите и поволностите кои се нудат во технолошко-индустриските развојни зони.

Министерот за здравство, д-р Венко Филипче го отвори состанокот на министрите за здравство на Југоисточна Европа, што се одржува денеска во хотелот Александар Палас во Скопје. Поздравни обраќања имаа и Питер Сендс, Извршен директор, како и Аида Куртовиќ, Претседателка на Одборот на Глобалниот Фонд за борба против ХИВ, маларија и туберкулоза.

На овој состанок, на кој учествуваат министри за здравство и високи државни претставници на земјите од Југоисточна Европа, членови на Управниот одбор и Секретаријатот на Глобалниот фонд за борба против ХИВ, туберкулоза (ТБ) и маларија, претставници на билатералните и мултилатерналните партнери, претставници од граѓанскиот сектор, како и клучни популации, засегнати од болестите, се отвори дебата за напредокот, предизвиците и можностите за постигнување одржливи одговори на ХИВ и ТБ во Југоисточна Европа.

 

 

„Во новата нацрт Национална стратегија за ХИВ за периодот 2017-2021 и нацрт Националната стратегија за туберкулоза 2018-2022 година се опфатени главните предизвици од транзицијата и завршувањето на финансирањето од Глобалниот фонд и преземањето на оваа обврска од страна на Министерството за здравство“, посочи министерот за здравство д-р Венко Филипче, во своето поздравно обраќање, потенцирајќи дека Министерството за здравство обезбедува континуирана и долгорочна имплементација на програмите за ХИВ и туберкулоза во Република Македонија, со цел одржување на ниската стапката на двете епидемии.

 

 

Претседавачот на одборот на Глобален Фонд, Аида Куртовиќ, истакна дека „регионалната соработка е есенцијална за одржување ниска преваленца на ХИВ, туберкулоза и маларија“, додека, оак, Извршниот директор на Глобалниот Фонд, Питер Сандс ја истакна потребата од соработка со граѓанските организации и цивилниот сектор во борбата против овие болести.

 

 

Глобалниот Фонд и партнерите на оваа глобална иницијатива, годишно инвестираат околу 4 милијарди американски долари.

Министерот за здравство д-р Венко Филипче, информираше дека Владата на Република Македонија, на почетокот на септември 2017 година, донесе одлука за преземање на финансирањето на превентивните програми, имплементирани од граѓанските организации по завршување на грантот од Глобален Фонд.

„На предлог на Владата, Собранието на Република Македонија усвои буџет од 95 милиони денари (1,5 милиони евра) за програмата за превенција, третман, грижа и поддршка за ХИВ и 30 милиони денари (половина милион евра) за програмата за контрола на туберкулозата во Република Македонија. Исто така, на почетокот на годинава е објавен втор оглас за граѓанските организации, а договорите беа потпишани во февруари, со вкупно 15 организации, кои ги имплементираат превентивните активности кај клучните популации за ХИВ“, ги истакна министерот Филипче искуствата на Република Македонија во оваа сфера, и додаде дека државата одвои и соодветен буџет за продолжување на набавката на антиретровирусна терапија, и за имплементација на новите политики за програмите за превенција.

„Во партнерство со граѓанскиот сектор и претставниците на заедниците, во текот на оваа година работиме на изнаоѓање долготраен и одржлив механизам за финансирање на превентивните програми за ХИВ и туберкулоза. Со тоа ќе воспоставиме институционална рамка и ќе гарантираме финансиска одржливост во иднина, за да одговориме на предизвикот за одржување ниска стапка на ХИВ и на туберкулозата“, истакна во своето поздравно обраќање министерот Филипче, на денешниот министерски состанокот е во пресрет на 39. состанок на Бордот на Глобален фонд, што ќе се одржи на 9. и 10. Мај во Скопје.

Во Република Македонија Глобалниот Фонд е присутен од 2004 година. Во изминатиот период од 13 години (од ноември 2004 до декември 2017 година) во Република Македонија има инвестирано 33 милиони долари преку програмите за ХИВ и за туберкулоза.

 

Министерот Тевдовски најави дека во Буџетот има над 360 милиони денари предвидени за раст на платите во трудоинтензивните дејности. Во рамки на посетата на текстилна фабрика министерот ја истакна и важноста на растот на минималната плата за работниците во овие дејности.

Владата во изминатите месеци креира можности за подобрување на животниот стандард. Министерот спомена неколку податоци од претходните месеци во оваа насока.

Како резултат на покачувањето на минималната плата, над 90.000 вработени со полно работно време добија повисоки плати. Просечната плата во државава во јануари и февруари оваа година е за 4.6% повисока отколку во истиот период лани.

Според МФ, со ова е исправена неправдата кај секторите кои земаа пониска плата од минималната. Ефектите најдобро се гледаат токму во овие индустрии. Кај производството на текстил растот на плата во јануари и февруари изнесува 22%, кај облеката 15%, додека во кожарството растот е 17%.

Министерот Тевдовски додаде дека може, и треба да се направи повеќе за растот на платите. Со новата мерка за работник кој ќе добие покачување на платата во однос на 2017 година, Државата ќе покрие 30% од тој раст. Растот ќе се споредува со последното тримесечје на минатата година. Мерката ќе се однесува на работници кои имале просечна нето плата до 18.000 денари во последните три месеци на 2017 година.

Поддршката ќе се исплаќа откако фирмата ќе ја исплати платата на вработениот.

Проценките покажуваат дека околу 50.000 вработени, во околу 15.000 фирми, ги исполнуваат условите. Станува збор за помош за т.н. трудоинтензивни компании. Тоа се компании кај кои трошоците за вработени сочинуваат повеќе од 50% од вкупните трошоци.

Министерот ги повика на целосно искористување на средствата. Тоа ќе значи дека има раст на платите, а државата е тука да даде поддршка за тој раст.

Растот на платите позитивно ќе влијае на растот на продуктивноста на компаниите и на растот на животниот стандард на работниците.

Претседателот на Владата на Република Македонија, Зоран Заев денеска присуствуваше на свеченото одбележување на Денот на полицијата. Во своето обраќање тој истакна:

Дозволете ми на самиот почеток на припадниците на службите на Министерството за внатрешни работи - полициски службеници, началници и командири, посебните единици во Министерството за внатрешни работи, но и на сите граѓани на Република Македонија да им го честитам Денот на македонската полиција!

Денешниот ден е многу важен за нашата земја од неколку причини.

После сите премрежја и предизвици со кои се соочија службите во Министерството за внатрешни работи, денеска можам слободно да кажам дека успеавме да ја вратиме основната функција на оваа служба - да биде најцврстиот столб кој ја гарантира државноста, Јадро на сигурноста и безбедноста на Република Македонија и во исто време, ПОЛИЦИЈА – ПРИЈАТЕЛ И ЗАШТИТНИК НА ГРАЃАНИТЕ.

Заштитата на граѓаните извира од работата на Министерството за внатрешни работи.

Тоа е голема обврска, но и огромна чест што им е доверена на полициските службеници.

Да се биде заштитник и пријател на граѓаните во слободна Република Македонија е идеал што денеска го живееме, а за кој сонувале и се бореле многу генерации во историјата на Република Македонија.

Имаме обврска тој идеал да го негуваме и унапредуваме.

Заедно со граѓаните, ја вративме земјата на вистинскиот пат и новата зададена цел е полициските и безбедносните служби да ги достигнат западно – европските професионални стандарди.

Резултати веќе стигаат, а ќе стигнат уште повеќе и уште побрзо доколку сите општествени чинители, политичките сили и граѓаните гледаме напред кон иднината и преземеме обврска дека заедно ќе соработуваме во спроведување на законските решенија кои се дел од големата реформа на институциите и службите во нашата земја.

Многу е важно Македонија да ги професионализира и деполитизира службите и да изградиме систем кој ќе ги осигура основните функции на полицијата независно од промената на политичките раководства на власт. Полицијата и Министерството за внатрешни работи никогаш повеќе не смеат да бидат злоупотребени во политички цели заради одржување на поединци на власт.

Граѓаните на Република Македонија никогаш повеќе нема да се плашат од оние коишто се повикани први да бидат во нивна заштита!

Човековите права и слободи никогаш повеќе не смеат да бидат прекршени од оние што треба да ги гарантираат и да ги чуваат!

Затоа денеска на овој голем ден кој го одбележуваме како Ден на македонската полиција, повикувам на обврска, дека секој ќе си ги преземе своите задачи и одговорности.

Денеска сакам посебно да им се обратам на полициските службеници.

Ве повикувам да продолжите да ја обавувате вашата одговорна работа согласно Законите и Уставот на Република Македонија.

Вие сте првоповиканите, првите кои сте изложени на ризик кога треба да се брани државата и безбедноста на граѓаните. И да знаете, вашата одговорност е препознаена и признаена, тоа граѓаните го ценат и почитуваат! Вашите заслуги имаат одлучувачка улога за сегашноста и иднината на многу генерации.

Од името на граѓаните на Република Македонија и од мое лично име сакам да ви го честитам денот и да ви изразам голема благодарност за вашата посветеност и пожртвуваност при вршењето на вашите должности и работни обврски!

Оваа прилика сакам да ја искористам и да им упатам неколку пораки на граѓаните на Република Македонија.

Почитувани граѓани,

Продолжете да соработувате со полицијата и нејзините службеници, уште посилно, затоа што тие се вашиот најголем пријател и заштитник на вашиот дом, на вашите деца, на вашето семејство.

Со сите капацитети и можности продолжуваме да работиме и да ја враќаме довербата на граѓаните во институциите. Институциите се ваш сервис и мора да работат во ваша служба.

Потребна е и вашата вклученост за постигнување на целите. Граѓанското учество, одговорноста и посветеноста се клучни, суштински.

Ве повикувам да ги почитувате законските одредби, да бидете внимателни и претпазливи учесници во сообраќајот, да пријавувате незаконски дејствија, да се борите да се почитуваат законите бидејќи тоа е начинот како да ја исполните вашата обврска да бидете одговорни граѓани на Република Македонија.

Почитувајќи ги законите ја почитуваме нашата држава.

На самиот крај, уште еднаш упатувам искрени честитки до сите полициски службеници и до сите граѓани на Република Македонија – Нека ни е честит Денот на македонската полиција и заедно да ја унапредуваме службата во сервис и заштитник - пријател на граѓаните!

Претседателот на Владата на Република Македонија, Зоран Заев, заедно со министерот за култура, Роберт Алаѓозовски, претставници на Владата, пратеници од Собранието на Република Македонија, локалната самоуправа во Валандово, денеска присуствуваше на свеченото отворање на 27. Меѓународен фестивал Пролетни веселби во чест на празникот Х'дерлез, во валандовското село Чалакли.

 

 

На настанот со меѓународно значење, со оглед дека по заедничка апликација на Република Македонија и Република Турција, во декември 2017. година, УНЕСКО го запиша во Репрезентативната листа за нематеријално културно наследство, присуствуваше ополномоштен претставник од УНЕСКО од Турција, претставници од амбасадата на Република Турција во Република Македонија, на културно-уметнички друштва на двете земји, гости, медиуми.

„Ете ова е нашата убава Република Македонија. Овде сум, во валандовско Чалакли и ќе речам: Да е Честит Х`дерлез, среќа и бериќет за сите. Да бев во скопско Шуто Оризари, ќе кажев: Да е честит Ѓурѓовден, и пак со истата желба, среќа и берикет за сите. Можам да кажам и: Нека е честит Денот на Свети Ѓоргија, што се чествува во многу семејства во Македонија. Што и да кажам, нема да згрешам. Еве го нашето едно општество – на дело“, рече премиерот Заев во воведното обраќање.

Претседателот на Владата, Заев, додаде дека „овој спој на различности, обичаи, старини, традиции, бои, вкусови во Македонија - е Европа во мало и ова, непроценливо културно – историско богатство, Република Македонија е подготвена да го сподели со Европската унија, кон каде што стремиме како граѓани и како држава".

„Ќе им додадеме вредност на Европската унија и на светот, знаат и тие. Затоа што Република Македонија докажа, како, ако се има желба да се сака, живее и работи заедно – може“, рече премиерот Заев.

Тој изрази благодарност до УНЕСКО што организацијата го препозна значењето на Хид Бах Шен фест, како што е називот на настанот и ја прифати мултинационалната апликација.

„За прв пат, оваа 2018 година, Х`дерлез во Чалакли, Република Македонија се организира под покровителство и на УНЕСКО.

Чалакли од валандовско, денеска е една од точките во светот на заеднички култури.

Ова заедничко организирање е порака за продлабочување на културната соработка меѓу Македонија и Турција на дело, рече премиерот Заев.

Претседателот на Владата, Заев додаде дека во високите приоритети на Владата е изградбата на општество еднакво за сите што вклучува и овозможување еднакви културни права за сите.

„Културата во Македонија е сплет на повеќе културни традиции и затоа се заложуваме за афирмација на интеркултурата. Во интеркултурното општество, учиме еден од друг, меѓусебно си влијаеме, стануваме подобри луѓе и граѓани, грижејќи се едни за други.

Уверен сум дека Хид Бах Шен фест и натаму ќе се развива и ќе биде охрабрувачки пример за останатите помали заедници и региони да блеснат со својата оригиналност.

Од Чалакли ја испраќаме пораката до светот дека се остварливи заложбите на УНЕСКО за поедноставно решавање на секоjдневните животни предизвици, низ јакнење на интеркултурниот дијалог и унапредувањето на меѓународната соработка. Честит Х'дерлез! Hıdırellez Kutlu Olsun“, порача во обраќањето премиерот, Зоран Заев.

На Пролетните веселби во Чалакли што традиционално ја слават пролетта, а жителите си посакуваат богат род и благосостојба во семејствата се обрати и министерот за култура, Роберт Алаѓозовски.

„Оваа мултинационална апликација што ја поднесовме со Република Турција, како и другата успешна апликација за впишување на обичајот „Мартинки“ во листата на УНЕСКО на која работевме заедно со институциите на Бугарија, Романија и Молдавија, претставуваат вистински патоказ за правецот во кој треба да се развива регионалната соработка“, порача министерот Алаѓозовски.

Културата е поле преку кое најдобро се изразуваат верувањата, светогледите, потребите во општествениот живот и "културата на помалубројните заедници е големо богатство на Македонија, таа заслужува почит", дополни министерот Алаѓозовски.

Тој порача дека преку поддршката на Владата на Република Македонија и Министерството за култура на фестивалот во Чалакли, уште еднаш е истакната недвосмислена заложба на Владата за унапредување на правата на сите граѓани на Македонија, за изградба на едно општество, со еднакви права.

„Тоа го покажавме преку давање поддршка на различни манифестации на културата и уметноста на помалубројните заедници, како и преку нивното вклучување во сите важни стратешки процеси. Ве уверувам дека нашата посветеност за поддршка и одржливост на културата на помалубројните заедници ќе расте и дека активностите за унапредување на културата на нашите сограѓани од помалку бројните заедници ќе се интензивираат“, рече во обраќањето министерот Алаѓозовски.

Градоначалник на општина Валандово, каде се одржа настанот со меѓународно значење, Перо Костадинов, порача дека општината ќе продолжи да ги поддржува вековните традиции. "Ќе ги поддржуваме различностите, како низ овој настан, со тоа покажуваме дека како народи цивилизациски сме израснале", рече Костадинов.

На манифестацијата, претседател на фестивалот, Шенол Тахир појасни дека манифестацијата почнала пред 30 години, како Панаѓур, а денес е под заштита на УНЕСКО и порача тој да биде пример како ако нешто се сака, дека во тоа може да се опстои и да се постигне успех.

Ирфан Насраттиноглу почесен претседател на Фестивалот и почесен претседател на Фолклорно-истражувачко биро од Анкара се заблагодари што е прогласен и за почесен граѓанин на Валандово, како и среќен што се остварени неговите заложби, фестивалот да добие меѓународно значење.

Претседателот на организацијата МАТУСИТЕБ, Хусрев Емин посочи дека овој настан денеска во Чалакли е слика за мултикултурализмот во Република Македонија и му се заблагодари на премиерот Заев, како прв претседател на влада на Република Македонија, кој е присутен на фестивалот.

Ополномоштениот претставникот од УНЕСКО од Турција, Метин Екиџи, соопшти дека носи топли поздрави од секој град од Република Турција. „Значењето да се биде на оваа листа на УНЕСКО, значи даден збор пред светската јавност дека ќе го развиваме и чуваме ова заедничко добро“, порача претставникот на УНЕСКО, Екиџи.

На Пролетните веселби во чест на Х'дерлез во Чалакли, валандовско, настапија културно - уметнички друштва од Македонија и од Турција, како и други земји од регионот, имаше изложба на стари, традиционални јадења и фотографии, беа доделени плакети, а беше врачен и Сертификатот од УНЕСКО со којшто Пролетните веселби во Чалакли се признаени од оваа светска организација за заштита на културното наследство, во листата нематеријално културно наследство на човештвото.

 


 

Интегрално обраќање на Претседателот на Владата на Република Македонија, Зоран Заев за време на свеченото отворање на 27-от Меѓународен фестивал Пролетни веселби „Хид Бах Шен Фест“

 

 

Ете ова е нашата убава Република Македонија.
Овде сум, во Валандово во Чалакли и ќе речам: Да е Честит Х`дерлез, среќа и бериќет на сите.

Да бев во скопско Шуто Оризари, ќе кажев: Да е честит Ѓурѓовден, и пак со истата желба, среќа и берикет за сите.
Можам да кажам и: Нека е честит Денот на Свети Ѓоргија, што се чествува во многу семејства во Македонија.

Сите граѓани, од различни националности и вери, кој од овие благослови и да си го упати, ќе има исто значење: слава на пролетта, богат род, благосостојба во семејствата.

Затоа, што и да кажам, нема да згрешам. Еве го нашето едно општество – на дело.

Овој спој на различности, обичаи, старини, традиции, бои, вкусови во Македонија - е Европа во мало. Ова, непроценливо културно – историско богатство, Република Македонија е подготвена да го сподели со Европската Унија, кон каде што стремиме како граѓани и како држава.

Со ова наше културно богатство ќе им додадеме вредност на Европската Унија и на светот, знаат и тие. Затоа што Република Македонија докажа, како, ако се има желба да се сака, живее и работи заедно – може.

Изразувам благодарност до УНЕСКО што го препозна значењето на овие Пролетни веселби на Хид Бах Шен фест во Чалакали, во декември 2017 година, ја прифати мултинационалната апликација од Република Македонија и од Република Турција - и го запиша прославувањето на Х`дрелез во Репрезентативната листа на УНЕСКО за нематеријално културно наследство.

За прв пат, оваа 2018 година, Пролетните веселби за Х`дерлез во Чалакли, Република Македонија се организираат под покровителство и на УНЕСКО и за тоа сме многу среќни.

Чалакли од валандовско, денеска е една од точките во светот на заеднички култури.

Ова заедничко организирање на Меѓународниот фестивал на Пролетните веселби во Чалакли е порака за продлабочување на културната соработка меѓу Република Македонија и Република Турција – исто така, потврдено на дело. Ова е доказ за нашето големо пријателство.

Затоа, почитувани граѓани, почитувани учесници и гости на оваа манифестација којашто ја слави пролетта, претседател на фестивалот, Шенол Тахир, Ирфан Насраттиноглу почесен претседател на Фестивалот и почесен претседател на Фолклорно-истражувачко биро од Анкара, претседател на организацијата МАТУСИТЕБ, Хусрев Емин, претставник од УНЕСКО од Турција, Метин Екиџи, министер во Владата на Република Македонија за култура, Роберт Алаѓозовски, пратеници од Парламентот, почитувани претседатели на политичките партии, почитуван член од Уставниот суд на Република Македонија, почитувани претставници од амбасадата на Република Турција во Република Македонија, градоначалник на општина Валандово, Перо Костадинов, претставници на културно - уметничките друштва, претставници на медиумите,

Ми претставува голема чест и задоволство, во името на сите граѓани на Република Македонија и на Владата на Република Македонија, да ве поздравам и да изразам желба за успешно продолжување на оваа прекрасна традиција, за овој крај, за нашите сограѓани, за пријателството меѓу Македонија и Турција, а од декември 2017 и за Европа и светот.

Честитам од срце на сите кои се ангажираа манифестацијата да влезе под закрила на УНЕСКО. Очекуваме, овој успех да го афирмира овој регион и значајно да придонесе во севкупниот негов развој.

Владата на Република Македонија, како држава членка на УНЕСКО, секогаш обрнува големо внимание на соработката со Организацијата и активно ги промовира и ги имплементира нејзините активности и иницијативи во областа на културата, образованието, науката, комуникациите, информациите, програмите за млади и за граѓанското општество, човековите права, како на национално, така и на регионално и меѓународно ниво.

Во високите приоритети на Владата е изградбата на општество еднакво за сите. А тоа подразбира дека и во културата се раководиме од визијата за демократско општество, базирано на рамноправни принципи за сите граѓани подеднакво.

Денеска уште еднаш покажуваме на дело дека сме одлучни и во овозможувањето еднакви културни права за сите и негување на слободата и разноликоста на творештвото на културните идентитети.

Културата во Македонија е сплет на повеќе културни традиции и затоа се заложуваме за афирмација на интеркултурата. Во интеркултурното општество, учиме еден од друг, меѓусебно си влијаеме, стануваме подобри луѓе и граѓани, грижејќи се едни за други.

Уверен сум дека Хид Бах Шен фест и натаму ќе се развива и ќе биде охрабрувачки пример за останатите помали заедници и региони да блеснат со својата оригиналност.

Од Чалакли ја испраќаме пораката до светот дека се остварливи заложбите на УНЕСКО за поедноставно решавање на секоjдневните животни предизвици, низ јакнење на интеркултурниот дијалог и унапредувањето на меѓународната соработка.

Ви благодарам и посакувам успешна реализација на овогодинешниот фестивал.

Честит Хдрелез! Hıdırellez Kutlu Olsun!

 


 

Интегрално обраќање на министерот за култура, Роберт Алаѓозовски, за време на свеченото отворање на 27-миот Меѓународен фестивал Пролетни веселби „Хид Бах Шен Фест“

 

 

Почитуван г. Зоран Заев, претседател на Владата на Република Македонија, почитувани пратеници во Собранието на Република Македонија, почитувани колеги министри и членови во Владата на Република Македонија, почитуван градоначалник на Општина Валандово, Перо Костадинов, почитувани екселенции, почитувани претставници на граѓанскиот сектор и медиумите, драги учесници и гости,

Големо е задоволството да се присуствува на овој уникатен фестивал, особено откако успеавме прославувањето на „Х’дерлез“ да го впишеме во Репрезентативната листа на УНЕСКО за нематеријално културно наследство на човештвото. Оваа мултинационална апликација што ја поднесовме со Република Турција, како и другата успешна апликација за впишување на обичајот „Мартинки“ во листата на УНЕСКО на која работевме заедно со институциите на Бугарија, Романија и Молдавија, претставуваат вистински патоказ за правецот во кој треба да се развива регионалната соработка.

Воедно, би сакал да истакнам дека преку поддршката на Владата на Република Македонија и Министерството за култура за овој фестивал, уште еднаш сакаме да ја демонстрираме нашата недвосмислена заложба за унапредување на правата на сите граѓани на Македонија, за изградба на едно општество, со еднакви права, за сите нас.

Културата е инструмент, поле преку кое најдобро се артикулира и се восприема различноста. Преку нејзината универзалност, сите ние, без оглед на припадноста, ги изразуваме нашите особености, верувања, сништа. Културата на помалку бројните заедници е големо богатство на Македонија, таа заслужува почит и внимание.

Не само поради бројните истакнати уметници и културни работници, со чии вредни дела Македонија се гордее, се промовира и позиционира на светската културна мапа. Таа ризница е важна за сите нас и служи како постојан потсетник и инспирација.

Ако ги согледаме состојбите и активностите за унапредување на културата на помалку бројните заедници, можеме да речеме дека како држава сме направиле многу, но нема дилеми дека можеме да направиме многу повеќе, особено во делот на практично функционирање.

Како пример, би ја истакнал Управата за афирмирање и унапредување на културата, чијшто директор Менфи Илијаз е со нас, кој што направи еден развоен план како оваа управа подолго да функционира и ние тоа ќе го направиме.

Во изминатите месеци, Владата на Република Македонија и Министерството за култура ја демонстрираа и во практика заложбата за едно општество за сите. Тоа го покажавме преку давање поддршка на различни манифестации на културата и уметноста на помалку бројните заедници, како и преку нивното вклучување во сите важни стратешки процеси.

Јас кога учев во петто одделение во Валандово имав четири пријатели од турската националност од Валандовско. Сега колку што знам, сите се иселени во Турција. Идејата за поддршка на овој фестивал и идејата за развивање на едно општество за сите е токму следните генерации да не доживеат нивните другарчиња од овие села да се иселуваат во Турција, туку да останат тука. А со заедничка соработка со Република Турција да го развиваме и идентитетот и еднаквоста и различноста.

Ви благодарам.

 

Денеска, на пристаништето во Охрид припадниците на Единицата за специјални задачи, Езерската полиција и Хеликоптерската единица, во склоп на одбележувањето на 7 Мај - Денот на македонската полиција ѝ презентираа на јавноста дел од своите професионални можности, ефикасно справувајќи се со едно сложено вежбовно сценарио во водите на Охридското езеро. Во присуство на голем број граѓани припадниците на МВР изведоа тактичко-показна вежба со напад на пловен објект заради совладување и лишување од слобода на опасни лица.

 

 

„Денеска имавме огромна чест овде во Охрид да изведеме една тактичко показна вежба во која ги покажаа своите капацитети Единицата за специјални задачи, Хеликоптерската единица и Езерската полиција и навистина беше прекрасно чувството да се видат сите можности на македонските полицајци, пред сѐ на специјалните единици и со тоа да покажеме дека сме подготвени да одговриме на било каков предизвик рече министерот Спасовски, кој им се заблагодари на сите граѓани кои присуствуваа на вежбата.

Во склоп на одбележувањето на Денот на полицијата, утре на градскиот стадион во Штип припадниците на МВР ќе ги презентираат своите можности преку низа показни вежби. Министерството за внатрешни работи ги поканува граѓаните да дојдат на градскиот стадион во Штип и да се уверат во подготвеноста на македонската полиција. 

Претседателот на Владата на Република Македонија, Зоран Заев, придружуван од министерот за земјоделство, шумарство и водостопанство, Љупчо Николовски, заменикот министерот за животна средина и просторно планирање, Јани Mакрадули и советникот на премиерот за животна средина Драган Јованов, денеска се придружија на градоначалникот и граѓаните на Дојран во акцијата за уредување на општината.

Во акцијата учествуваа и повеќе граѓани на Дојран, а се придружија министерот за култура, Роберт Алаѓозовски и советничката, Цветанка Ласкова.

Оваа акција е инцијатива на ЗЕЛС која се спроведува во повеќе општини во земјава.

Во изјава за медиумите премиерот Заев рече:

 

 

„Почитувани присутни, почитувани медиуми, граѓани на убавиот Дојран,

Чест и задоволство ми е, денеска, од Дојран, еден од бисерите на македонската автентичност, да покажеме дека здружените граѓански акции придонесуваат за покревање на духот на заедништвото и за поубава Македонија.

Денеска, се придружуваме на градоначалникот и граѓаните на Дојран, заедно во акцијата која е иницијатива на ЗЕЛС за уредување и чистење на локалните и животните средини во општините ширум Македонија.

Дојран заслужува вакво внимание, посветеност од локалната самоуправа, од заедницата, но и од мене како премиер, заради населението кое живее тука, но и заради илјадниците туристи кои доаѓаат за одмор и релаксација во оваа прекрасна македонска општина.

Туристичките центри, каков што е Дојран, се лицето на Македонија пред туристите. Односот на државата кон локалните средини, но и односот на заедницата кон својата средина, во голема мера влијаат врз тоа какви искуства ќе запаметат туристите од Дојран и од другите туристички центри

Убавата, чистата и уредена средина го дава пријатното чувство кое ќе ги поттикне да се вратат повторно, а со таков континуитет во целосното разубавување, Дојран уште повеќе ќе блеска во својот познат сјај.

Граѓаните многу јасно и гласно ни дадоа до знаење дека нема да прават компромиси кога е во прашање здравјето и животната средина.

Тоа за нас беше доволен сигнал за тие приоритети да ни се меѓу најбитните во креирањето политики за подобрување на животот на сите во Република Македонија.

Затоа сме денес заедно тука, затоа што веруваме во вредноста на граѓанскиот ангажман, не само во политиката, туку и во секојдневниот живот. Навидум малите нешта како оваа акција денес, нѐ зближуваат како луѓе и нѐ прават единствени во грижата за локалната заедница. Овие се тие европски манири за кои зборуваме, ова значи да се донесе Европа тука, дома, во Македонија.

Ги повикувам сите општини, сите локални самоуправи, почесто да организираат вакви конкретни акции кои значат директна помош за подобар живот на граѓаните. Ги охрабрувам сите граѓани да се ангажираат во акции на заедниците. Ајде сите заедно да се вложиме за нашата убава Македонија.

Благодарам“.

 


Одговори на премиерот Заев на новинарските прашања поставени во Дојран:

 

 

П1: За долгот што го има општина Дојран кон ЕУ, дали Владата размислува како овој проблем да се реши, бидејќи од тоа зависат и останатите проекти?

Премиерот Заев: Овде е водена постапка во изборот на фирмата изведувач, но конечното решение на ЕУ е дека парите мора да се вратат. Секако тоа е последица на претходната власт и нејзиното владеење. Но јас не навлегувам во тоа, го гледам од аспект како да го решиме проблемот. Креативноста на градоначалникот и министерството за локална самоуправа е тука и веќе изнајдоа начини како да го предложат на Влада, директно владата да интервенира и да го реши овој проблем. Затоа што девет милиони денари или 150 000 евра, може и нешто повеќе, се огромни пари за општина Дојран.

Проектот е реализиран, но суштината е што Дојран не може да ги врати овие пари. Тука државата ќе интервенира. Тоа е важно за да може Дојран да продолжи да добива проекти од ЕУ, затоа што веќе има аплицирано на повеќе вакви проекти.

Заедно на европските пари се надеваме и на соработката со Грција, во делот на испуштањето на водата од езерото, за да може да има проточност, за да може да се врати и квалитетот на водата, којшто сега во мај е добар, но треба да биде добар и во секој дел од годината.

Владата со општина Дојран ги разгледува можностите за донесување на генералните урбанистички планови, што е многу важно поради развојот на Дојран. Потоа давањето на конзерваторските услови и согласностите од министерството за земјоделие за пренамена на земјиштето. Јас верувам дека брзо ќе заврши јавната дебата во Дојран и планот ќе биде донесен. Јавното државно претпријатие отпочна со проектните документации. Оваа година во програмата е влезено проектирањето на обиколницата на Дојран за полесно да се стига до граничниот премин. Тоа е еден голем проект за Македонија, а се наоѓа овде во Дојран, клучен е и за целиот овој регион.

Истовремено она што е многу важно верувам дека Дојран ќе биде една од доминантните општини којашто ќе биде подржана во рамките на проектот за туристички развој, за којшто под водство на потпретседателот на Владата, Анѓушев, во скоро време ќе се се одлучува преку комисии. Верувам дека Дојран, Охрид, Струга, Преспа се општините покрај езерата во Македонија, нашите бисери, коишто треба да бидат сериозно подржани, па после тоа секако и другите општини во Македонија.

Така што, филтер станицата и нејзиното завршување, поради заштитата на езерото е преокупацијата на градоначалникот и советниците, но и на мене и на Макрадули и на Љупчо и на Драган и на сите кои што сме тука, поради тоа што имаме споделени надлежности. Но и да немаме споделени надлежности, редот е да си помогнеме, затоа што Дојран е нашето природно богатство коешто треба да го чуваме и да му се радуваме.

 

П2: До каде е реконструкцијата на Владата?

Премиерот Заев: Реконструкцијата на Владата е дојдена во фаза на размислување помеѓу понудите на партиите со кои што разговаравме. Викендот, најверојатно ќе се искористи за размислување после разговорите со сите партии, а и кај нас во СДСМ и во коалицијата исто така.

Ако кажеме да, мислам дека ќе бидеме веќе готови со одлуката за Влада, мислам на министри и заменици, а после тоа ќе почнеме да разговараме за директори, заменици-директори и слично. Затоа што на процесот гледаме како на процес на превземање одговорност. Тоа значи, соодветни кадри, соодветни луѓе, но и соодветни капацитети.

Очекувањата на граѓаните се со право високи, и ние тие очекувања треба да ги исполниме.

 

П3: Дали ќе го поддржите предлогот на Претседателот за гувернер на НБРМ? Тој вели дека Ве информирал за Богов за нов гувернер, дали ќе го поддржите и вие истиот?

Премиерот Заев: Јас имав состанок со Претседателот кон крајот на март, каде што Претседателот ми кажа со кого разговара, со кого имал намера да разговара. Знаат граѓаните дека предлагач на гувернерот е Претседателот, а парламентарното мнозинство го бира.
Тогаш заклучивме дека прво треба тој да разговара со актуелниот гувернер Богов дали ќе прифати. Ако прифати Богов и претседателот одлучи да го предложи, би ми соопштил мене за да разговарам со парламентарното мнозинство.

Јас за одлуката слушнав од Собранието и од медиумите. Значи немавме втор разговор, за после неговата одлука да направиме една фаза на подготовка, разговори со парламентарното мнозинство. Како за предлозите за Уставен суд, така се случи и со предлогот за гувернер на НБРМ, се информиравме од медиумите.

Јас одржав координација со парламентарната група и таа не го прифаќа кандидатот Богов за нов гувернер. И побарав веднаш средба со претседателот Иванов. Се надевам дека брзо ќе се видиме за да можеме да усогласиме став затоа што до крајот на мај треба да се избере гувернер.

Ова е сериозна институција, јас верувам дека по пат на кохабитацијата и дијалогот којшто го имаме ќе изнајдеме решение. Правото е апсолутно на Претседателот да предложи, но правото е и на парламентарното мнозинство да избере гувернер.

Оваа институција мора да ја држиме професионална. Разговараме за експертски решенија, не за партиски решенија, кои што и понатаму би ја чувале монетарната политика стабилна, затоа што и нас како Влада тоа ни е од голема важност за да можеме да ги креираме другите економски политики.

 

П4: Заврши уште една рунда преговори на министрите за надворешни работи меѓу Македонија и Грција. Велат дека има напредок, тоа е нивната оценка, но какво е вашето размислување, кој е вашиот став, според информациите од министерот за надворешни работи?

Премиерот Заев: Вчера разговарав со министерот Димитров, и направен е напредок во креативноста на изнаоѓање на решенијата, за она коешто за нас е важно да може да помине, вклучувајќи го достоинството и идентитетот, но и за грчката страна исто така можност да помине достоинството и идентитетот. Секако тоа се само идеи на маса за кои што продолжуваме да размислуваме. Димитров ги пренесе кај мене, веројатно министерот Коѕијас ќе ги пренесе кај премиерот Ципрас, за да можеме понатаму веќе да ги договориме следните средби.

Знам дека кон крајот на идната седмица најверојатно пак ќе има некоја средба, ќе видиме како ќе се одвиваат работите. Целта е, кога веќе сме дојдени на крајот, кога има критики, ајде да ги добиеме и позитивните поени со можното решение.

Јас сум убеден дека поради креативноста и посветеноста на двете стани во процесот на преговорите, можеме конечно да здивнеме со еден проблем помалку, којшто е еден од покрупните во Македонија, којшто ќе ги отвори портите на НАТО и ЕУ.

Притоа важно е да не бидеме обесчестени и понижени, како впрочем и грчката страна. Убеден сум дека кога веќе стигнавме до овде, двете страни имаат искрена вистинска намера за решение.