Ministri i Punëve të Jashtme, Bujar Osmani realizoi takim me delegacionion e Komisionit për Çështje Europiane të Kuvendit të Republikës së Çekisë, të kryesuar nga Kryetari i këtij Komisioni, Vladislav Vilimec, i cili ndodhet për vizitë pune në Maqedoninë e Veriut.

Në fokus të bisedimeve me senatorët çekë ishin perspektivat dhe sfidat e procesit të anëtarësimit në BE dhe mbështetja e qartë e Republikës Çeke në këtë rrugë.

“E vlerësoj angazhimin e Çekisë dhe thirrjet për forcimin e angazhimit të BE-së në vendet e Ballkanit Perëndimor, ndër të tjera, dhe përmes grupit joformal Miqtë e Ballkanit Perëndimor. Deklaratat e shumta publike në mbështetje të zyrtarëve çekë për integrimin tonë në BE para, gjatë dhe pas kryesimit çek të Këshillit të BE-së janë konfirmim i miqësisë dhe partneritetit tradicional ndërmjet Maqedonisë së Veriut dhe Çekisë”, theksoi Osmani.

Bashkëbiseduesit e konfirmuan bashkëpunimin e shkëlqyer ekonomik dhe mbështetjen e ndërsjellë në marrëdhëniet multilaterale. Në këtë kontekst, ata iu referuan përfundimit me sukses të kryesimit tonë me OSBE-në dhe e përgëzuan Ministrin Osmani si Kryesues i OSBE-së për suksesin e jashtëzakonshëm të arritur në Takimin e 30-të Ministror të OSBE-së, i cili u mbajt javën e kaluar në Shkup.

Osmani shkëmbeu mendime me senatorët çekë për çështjet aktuale politike dhe të sigurisë me të cilat ballafaqohet Ballkani Perëndimor dhe dinamikat rajonale.