Министерката за образование и наука Мила Царовска денес учествуваше на панел сесија за состојбата на правата на припадниците на заедниците којашто беше дел од панел дискусија организирана од Агенцијата за остварување на правата на заедниците.
Царовска истакна дека секое дете во државата мора да има пристап до квалитетно образование кое е и основно човеково право и на тоа веќе се работи со подготовката на новата концепција.

“Токму ова концепција на образование се заснова на инклузивност, родова рамноправност и интеркултурност. Ова образование треба да ги учи граѓаните да живеат едни со други, а не едни покрај други, само затоа што имаат различни мајчини јазици. За да ја постигне таа цел, основното образование ќе вклучува активности и содржини кои промовираат почитување на културната различност и интеракција меѓу учениците што се припадници на различни етнички заедници. На овој начин ќе создадеме граѓани кои имаат високи општествени вредности, но и општество за сите”, рече Царовска.

Министерката истакна дека во рамките на двојазичните/тријазичните училишта се спроведуваат заеднички проекти и истражувања како дел од наставата по основните предмети и се реализираат заеднички часови по изборните предмети. Но со новата концепција ќе се воведе и рамномерен третман на сите застапени наставни јазици.

На панел сесијата со министерката учествуваа и првиот вицепремиер за политички систем и односи меѓу заедниците Артан Груби, универзитетската професорка Ана Чупеска, директорот на Агенцијата за остварување на правата на заедниците Еран Куртиш и други експерти.