Со положување свежо цвеќе на вечните почивалишта на претседателите Киро Глигоров и Борис Трајковски, на градските гробишта Бутел, и на споменикот на Ослободителите на Скопје, во дворот на Владата на Република Македонија, како и со посетата на спомен домот, родната куќа на родоначалникот на современиот македонски јазик Блаже Конески во Небрегово, прилепско, денеска отпочнаа владините програмски активности во рамките на одбележувањето на празникот „Ден на независноста на Република Македонија – 8 Септември“.

 

На Градските гробишта Бутел, на вечните почивалишта на претседателите на државата Киро Глигоров и Борис Трајковски, венци со свежо цвеќе положи и почит кон споменот на претседателите оддаде владина делегација што ја предводеше Претседателот на на Владата на Република Македонија Зоран Заев, во придружба на Заменик претседателот во Владата на РМ задолжен за европски прашања д-р Бујар Османи, и Зорица Апостолска, министеркa без ресор задолжена за странски инвестиции.

 

Владина делегација во состав Мила Царовска, министерка за труд и социјална политика, Рената Дескоска, министерка за правда, и Аднан Кахил, министер без ресор задолжена за странски инвестиции, положи свежо цвеќе на споменикот на Ослободителите на Скопје, во дворот на Владата на Република Македонија.

 

И на вечните почивалишта на претседателите Глигоров и Трајковски, како и на на споменикот на Ослободителите на Скопје, во дворот на Владата на Република Македонија, венци со свежо цвеќе положија и многубројни други делегации како на Претседателот на Република Македонија, на Собранието на РМ, на АРМ, на Сојузот на борците, на дипломатскиот кор, како и на општествени институции и организации и политички партии.

 

Делегација на Владата на Република Македонија составена од министерот за култура Асаф Адеми, министерот за транспорт и врски Горан Сугарески, и од заменик министерот за локална самоуправа Дејан Павлески, со посетата на спомен домот, родната куќа на Блаже Конески во Небрегово, прилепско, му оддаде почит на родоначалникот на современиот македонски јазик.

 

Централната свеченост по повод одбележувањето на Денот на независноста на Република Македонија продолжува вечерва со културно-забавна програма во дворот на владата, во рамките на на која свое обраќање ќе има и премиерот Зоран Заев.  

Република Македонија, денеска одбележува 27 години самостојност и независност, по успешно спроведениот Референдум што се одржа на 8 септември 1991 година, а на кој над 95 проценти од граѓаните се изјаснија за самостојна и суверена држава.

 

По 27 години независност, Република Македонија, останува посветена на сочувување на вредностите и продолжува гордо, во остварувањето на стратешките цели, да биде дел од Европската унија и НАТО, дел од европската заедница и држава рамноправна со најсилните земји на на светот, членки на НАТО.

Претседателот на Владата на Република Македонија, Зоран Заев, попладнево се сретна со Оливие Кадик, сенатор од Република Франција и претставник на француските државјани надвор од Франција, придружуван од амбасадорот на Република Франција во Република Македонија, Кристијан Тимоние.  

 

Ве поддржуваме на патот кон интеграциите, побрзајте е пораката што ја пренесе францускиот сенатор Кадик. Тој оцени дека претстојниот референдум во Македонија е премин кон продолжување напред.

 

Премиерот Заев рече дека очекува успешен референдум во Македонија.

 

-Верувам дека референдумот ќе успее, затоа што големо мнозинство од граѓаните во Македонија е за членство на нашата држава во НАТО и ЕУ. А сите граѓани сакаат и заслужуваат квалитетен живот во својата родна земја, што ќе го овозможат тие интеграции, рече премиерот Заев.

 

Тој се заблагодари за поддршката што Франција и ја дава на Македонија во интеграциските и демократските процеси и упати поздрав до претседателот на државата, Макрон.

 

-За нас поддршката од пријателите од меѓународната заедница е голема мотивација во нашата определба да продолжиме напред и да се интегрираме во сојузите на демократскиот свет, рече премиерот Заев.

 

На состанокот, амбасадорот Тимоние го поздрави начинот на којшто Македонија ги реши билатералните прашања со соседите, во интерес на стабилноста, безбедноста и перспективите на целиот регион и изрази надеж дека ваквата пракса ќе биде охрабрување за сите држави од регионот.

 

На средбата е изразена заедничка согласност за унапредување на економската соработка меѓу двете држави.

Претседателот на Владата на Република Македонија, Зоран Заев, заедно со министерот за здравство, д-р Венко Филипче денеска присуствуваше на отворањето на новиот оддел за трауматологија при Градската општа болница „8 Септември“.

 

Искажувајќи го своето задоволство од условите коишто ги нуди, Премиерот Заев посочи дека одделението располага со вкупно 22 болнички и 2 операциони сали во кои годишно ќе се изведуваат и до 2 илјади операции.

 

„Дел од работата на одделот ќе биде и постојана медицинска едукација на доктори специјалисти, како и доктори на специјализација од областа на ортопедија и трауматологија, од универзитетите од земјава, но и од странство.

 

Ова, почитувани, значи дека не само што се зголемуваат капацитетите на градската општа болница, туку бенефит ќе има и за целокупниот здравствен систем“, рече Премиерот Заев.

 

Новото одделение за трауматологија во ГОБ „8 Септември“ се отвори во пресрет на еден од најважните датуми во историјата на Република Македонија, Денот на независноста.

 

„Чувствувајќи го значењето и одговорноста кон 8 септември, вработените во оваа болница, но и граѓаните на Република Македонија ги уверувам дека сите заедно ќе креираме политики за натамошно унапредување на состојбата на здравствениот систем.

 

За остварување на оваа цел, секако имаме поддршка и од Европската Унија. Годишно ЕУ за Македонија издвојува 90 милиони евра односно 260.000 евра дневно.

 

Оваа финансиска помош со зачленување на земјата во големото семејство ќе порасне неколкукратно. И тогаш не само нови одделенија, ќе отвораме нови болници, тогаш ќе има повеќе средства во буџетите на болниците, повеќе пари за современи лекови, а производ од сето тоа ќе бидат уште позадоволни пациенти“, додаде Премиерот Заев.  

 

Министерот за здравство, д- р Венко Филипче, истакна дека новиот оддел за трауматологија е само дел од огромните инвестиции на Владата на Република Македонија во опрема, кадар и едукација на докторите. Министерот Филипче додаде дека според капацитетите на одделението, тоа може да се мери со современите европски здравствени установи.

 

„Овие историски моменти кога нашата земја фаќа чекор со евро  - интегративните процеси, имаме уверување од Европската Комисија дека ќе има посебен сектор за здравство, којшто ќе инвестира Европската Комисија од 2020-та или од 2021-вата година“, додаде министерот.

 

Директорот на „8 Септември“, во својата изјава за медиумите истакна дека градската општа болница ги следи последните трендови и дека проектите коишто се во тек, или коишто допрва ќе се реализираат, се исклучиво во насока на обезбедување на подобри услови за пациентите.

 

На свечениот собир во болницата по повод „8 Септември“, Премиерот Заев на вработените им го честиташе деветтиот патронен празник, како и денот на независноста, „8 Септември“.

Претседателот на Владата на Република Македонија, Зоран Заев денеска беше покровител на свеченост којашто се одржа во Свечената Сала во Македонската академија на науки и уметностите (МАНУ) по повод стогодишнина од крајот на Првата светска војна со отворање на изложба „Лицата на војната: Македонија и Македонците во Големата војна 1914-1918“ во организација на Државниот архив на Република Македонија.

По тој повод Директорот на Државниот архив на Република Македонија, Кирил Петров додели благодарници на најистакнатите архивски работници. Настанот беше збогатен со неколку културно уметнички точки на ученици од Државниот музичко-балетски училишен центар „Илија Николовски - Луј“.

Пред присутните гости се обратија Претседателот на Владата на Република Македонија, Зоран Заев, директорот на Државниот Архив на Република Македонија, Кирил Петров и Јасмина Дамјановска, авторка на изложбата.

Премиерот Заев во своето обраќање истакна:

Во 1918 г. Заврши големата војна која што ја промени историјата, која ја смени картата на Европа и ги допрe сите аспекти на животот на луѓето кои беа зафатени од војната.

 

Сто години подоцна, ги нема веќе непосредните сведоци на овие настани, но колективното сеќавање на овој светски вооружен судир, во кој Македонија е забележана како фронтовска линија и окупирана територија, сè уште е живо.

 

Во отсуство на своја држава, Македонците и другите жители на овие простори беа мобилизирани во армиските состави на Србија, Бугарија и Грција и активно учествуваа во Македонскиот (Солунскиот) фронт.

 

Од есента 1915 до септември 1918 г. на Македонскиот фронт се судираа речиси еден милион војници од десетина различни армии.

 

Оваа година одбележуваме стогодишнина од крајот на Големата војна, и се сеќаваме на храброста на оние кои се бореа, живееја и умреа, но и на страдањата на сите луѓе кои беа погодени од војната на каков било начин. Сеќавањето за нив е најголемата почит што можеме да им ја оддадеме.

 

Зошто треба да се сеќаваме? Зошто треба да застанеме и да размислиме за оние настани што се случија толку одамна?

Затоа што војната влијаеше на сечиј живот, пред сè на животот на обичниот човек. Војната ги откорна не само Македонците од нивните домови, туку и илјадниците војници кои војувале во Македонија, а никогаш не се вратиле во своите домови.

 

Изложбата „Лицата на војната: Македонија и Македонците во Големата војна 1914-1918“ не потсетува дека секој човечки живот е апсолутно важен.

 

Преку сеќавањето на големата војна ние не оддаваме почит само на македонските војници, без разлика на која страна се бореле. Оддаваме почит и на сите други војници, независно каква униформа носеле.

 

Нашата политика на сеќавањето е политика на заедничко чествување на сите жртви, затоа што сите жртви еднакво болат. А големата војна која заврши во 1918 година донесе многу жртви и страдања, но и многу научени лекции.

 

Една од тие лекции е дека не смееме да заборавиме ниту еден дел од нашето минато, колку и да е болно! Не се откажуваме од ниту еден дел од нашата историја, колку и да е трагична. За да не ни се повтори.

 

Денес, во ова модерно и демократско време, скапоцена и вредна ни е државата за која заеднички се изборивме во Втората светска војна.

 

Скапоцен ни е и мирот, по кој најмногу копнееле овдешните жители, како што сведочи и д-р Рудолф Арчибалд Рајс, чие срце по негова желба со години почиваше на планинскиот врв Кајмакчалан:

 

„По бројни и разновидни поделби, страдања и угнетување и дотогаш невидени прогони, Македонците имале единствена желба да им се дозволи да живеат во мир“, пишуваше д-р Рајс.

 

Токму тоа е и нашата политичка определба. Мирот и помирувањето. Да продолжиме да живееме во мир, со безбедна иднина, како полноправна членка на НАТО, во Европската Унија како политичка заедница која настана како резултат на политичкото помирување по втората Светска Војна.

Претседателот на Владата на Република Македонија Зоран Заев денеска го пречека сојузниот канцелар на Австрија Себастијан Курц, кој со владина делегација е во официјална посета на нашата земја.

 

По церемонијата со високи државнички и воени почести, премиерот Заев го запозна австрискиот канцелар Курц со членовите на делегацијата на Владата на Република Македонија, во чиј состав беа Заменик претседателката на Владата и министерка за одбрана Радмила Шекеринска, Заменик министерот во Владата задолжен за европски прашања Бујар Османи, министерот за надворешни работи Никола Димитров и државниот секретар на МНР, Виктор Димовски.

 

Двајцата премиери потоа се задржаа на тет-а-тет средба, по што следуваше пленарна сесија на двете делегации.

 

На крајот од официјалната работна посета во Владата на Република Македонија, премиерот Зоран Заев и австрискиот федерален канцелар Себастијан Курц одржаа заедничка прес конференција на која информираа за средбата и за детали од разговорите.

 

Премиерот Заев на почетокот изрази благодарност во свое, во име на Владата на РМ и во име на граѓаните за сесрдната и силна поддршка Австрија и на личната поддршка на канцеларот Курц за нашата земја.

 

„Вашата поддршка дојде во еден клучен, би рекол, историски период, кога Република Македонија за само една година направи квантен скок кон функционална демократија и независни институции во служба на граѓаните. Во еден таков период, Вие и вашата земја, Австрија, подадовте рака и помош каква што беше и несебичната помош на двата најголеми и најсилни сојузи во светот, НАТО и Европската Унија“, рече премиерот Заев.

 

Претседателот на Владата на РМ потсети дека Виена беше домаќин на повеќе средби под покровителството на Обединетите нации, кога во главниот град на Австрија се испишуваше историја и се скицираше договорот со Грција и решението за нашата иднина.

 

„Со постигнатиот договор во Преспа, се отворија вратите за нашето полноправно членство во НАТО и за почеток на преговори за членство во ЕУ. Австрија, како и сите земји членки на двата најголеми сојузи, сакаат да ја видат Македонија рамноправна, со право на глас во семејството на европските демократски држави“, рече премиерот Заев.

 

Тој додаде дека посетата на австрискиот канцелар Курц ни упатува порака дека Република Македонија се врати на вистинскиот пат, европски пат, и дека тоа го препознаваат и граѓаните на нашата земја, кои, како што рече премиерот Заев, е убеден дека масовно ќе излезат на референдумот и ќе го потврдат изборот за нашето членство во ЕУ и НАТО.

 

Претседателот на Владата на Република Македонија во своето обраќање пред медиумите потсети дека Австрија е една од најзначајните економски партнери, чии компании се најголемите инвеститори во земјата.

 

„Уверен сум дека политичката стабилност и безбедност, но и поради економскиот развој што се отвора за нашата држава со процесот за членство во  ЕУ и НАТО, ќе создадат услови за продлабочување на економската соработка, во интерес на граѓаните на двете држави“, порача премиерот Заев на заедничката прес конференција со австрискиот канцелар Курц.

 

Во своето обраќање пред медиумските претставници австрискиот канцелар Курц истакна дека неговата земја е искрен пријател на Република Македонија, и на целиот регион.

 

Тој додаде дека постојат традиционално добри врски меѓу Република Македонија и Австрија и заедничко минато, и нагласи дека особено е значајно што двете земји наскоро добиваат реална шанса за заедничка иднина како рамноправни земји членки на ЕУ.

 

Австрискиот канцелар Курц упати порака до граѓаните на нашата земја да излезат на референдумот и да го дадат својот глас според својот личен избор, но секогаш да имаат предвид дека Европската Унија нема да биде комплетна без сите земји членки на Западен Балкан.


Претседателот на Владата на Република Македонија Зоран Заев денеска го пречека сојузниот канцелар на Австрија Себастијан Курц, кој со владина делегација е во официјална посета на нашата земја.

 

На крајот од официјалната работна посета во Владата на Република Македонија, премиерот Зоран Заев и австрискиот канцелар Себастијан Курц одржаа заедничка прес конференција на која информираа за средбата и за детали од разговорите.

 

Скопјe,

7 септември 2018 година

 

Влада на Република Македонија

Генерален секретаријат на Владата на Република Македонија

Сектор за односи со јавноста

Бул. Илинден бр.2,

1000 Скопје,

Република Македонија

Тел.: +389 2 3123371;

факс: +389 2 3122375

e-mail: press@vlada.gov.mk

 

 

Во прилог на ова соопштение изјавата на Претседателот на Владата на Република Македонија ви ја пренесуваме во целост:

 

Дозволете ми на почетокот да му се обратам директно на нашиот ценет гостин: Почитуван федерален канцелар на Австрија, господине Курц, сакам да ви ја изразам мојата, и благодарноста на Владата и на граѓаните на Република Македонија, за вашата сесрдна и силна поддршка за нашата земја.

 

Воедно, ви честитам на претседавањето со Европската Унија. Целосно ги споделуваме Вашите заложби да градиме мостови на пријателство и соработка, но и да придонесеме за побезбедна Европа.

 

Вашата поддршка дојде во еден клучен, би рекол, историски период, кога Република Македонија, се ослободи од теретот на „заробена држава“ и на киднапирани демократски институции, и за само една година направи квантен скок кон функционална демократија и независни институции во служба на граѓаните.

 

Во еден таков период, Вие и вашата земја, Австрија, подадовте рака и помош каква што беше и несебичната помош на двата најголеми и најсилни сојузи во светот, НАТО и Европската Унија.

Австрија и светот ја препознаа промената. На Република Македонија ѝ се даде шанса како никогаш до сега.

 

Поддршката како прво дојде во процесот на изнаоѓање на решение за нашиот спор за името со Грција. Виена беше домаќин на повеќе средби под покровителството на Обединетите нации. Во главниот град на Австрија се испишуваше историја и се скицираше одговорот и решението за нашата иднина.

 

Со постигнатиот договор во Преспа, се отворија вратите за нашето полноправно членство во НАТО и за почеток на преговори за членство во ЕУ.

Австрија, како и сите земји членки на двата најголеми сојузи, сакаат да ја видат Македонија рамноправна, со право на глас во семејството на европските демократски држави.

 

Вашата поддршка да станеме дел од семејствата кои ни ја гарантираат нашата стабилна и сигурна иднина, се од непроценлива важност.

 

На таа поддршка  гледаме и како признание за нашата посветена работа.

 

Остануваме посветени и подготвени да останеме позитивен пример во регионот и светот тоа го цени.

 

Од огромен поттик за нас е што светот ја препозна Република Македонија како нова голема надеж за регионот и Европа. Освен како признание, ова го прифаќаме и како обврска и понатаму со иста енергија да го нудиме нашиот придонес за еден нов Балкан.

 

Вашата посета е силна порака и поттик за нас во пресрет на референдумот на кој граѓаните на нашата земја ќе ја изберат иднината. Ќе го дадат својот глас за одобрување на Договорот со Грција со кој ни се гарантира нашето место во Европската Унија и во НАТО.

 

Вашата посета ни ја упатува пораката дека Република Македонија се врати на вистинскиот пат, на европскиот пат. Презедовме лидерство, покажавме храброст, остваривме напредок во реформите и светот ја виде позитивната промена. Го препознаа обновеното чувство на оптимизам, отвореност, енергија, и надеж кои ги споделуваат нашите граѓани.

 

И ни порачаа: Ве чекаме во ЕУ и НАТО. И пристигнаа датумот за преговори во ЕУ и поканата за НАТО.

 

Сигурен сум дека зад одлуката на ЕУ да добиеме датум за преговори стои фокусот на австриското претседателство со ЕУ, кое јасно се определи да ги реализира евро-атлантските перспективи на Западен Балкан.

 

На крајот, дозволете ми да ја изразам и нашата голема благодарност и за фактот што Австрија ја вбројуаме во една од најзначајните економски партнери, чии компании се најголемите инвеститори во земјата.

 

Уверен сум дека политичката стабилност и безбедност, но и поради економскиот развој што се отвора за нашата држава со процесот за членство во  ЕУ и НАТО, ќе создадат услови за продлабочување на економската соработка, во интерес на граѓаните на двете држави.

Владата на Република Македонија упатува извинување до Република Австрија за ненамерниот протоколарен пропуст при посетата  на Сојузниот Канцелар Себастијан Курц во Република Македонија. 

Пропустот е направен од страна на службите за протокол на Владата на Република Македонија и на Министерството за надворешни работи, а до него дошло поради големата сличност во димензиите и колоритот на знамињата на Австрија и Латвија.

Доделувањето стипендии во 2017 година се одвиваше во законската постапка и врз основа на јасни, прецизни, правно уредени и пропишани критериуми и услови.

Секој кандидат кој ги исполнуваше условите за доделување стипендија за студирање на најдобро рангираните 100 универзитети беше стипендиран, без каква било дополнителна селекција или приоретизација.

Во конкурсот немаше ограничување на бројот на места, а во 2017 година имаше помалку кандидати од одобрените средства за стипендии.

Процедурата беше во согласност со критериумите, сите одлуки за стипендии беа донесени пред распишувањето на изборите, во законски дозволениот рок.

Формираните комисии одлучуваат во определени временски интервали, согласно доставените пријави за стипендирање. Заради почитување на законските рокови, сите одлуки се донесени пред распишување на изборите, со цел студентите да не ја испуштат учебната година која почнува или во септември или октомври, зависно од универзитетот.

Заради изборите беше поместено и одлучувањето за стипендиите за Шефилд кои ги доделува МОН во содејство со Претседателот на РМ.

Во случајот со стипендирањето на ќерката на Никола Димитров, не постои никакво отстапување од методологијата спроведена кај сите други кандидати, не постои  ниту нејзино привилигирање, ниту дискриминирање на било кој друг кандидат. Тоа може да се види и од списокот на кандидати и од списокот на лицата кои конкурирале. Јана Димитрова, како и сите други апликанти, за да ја добие стипендијата морала да ги исполни сите строги критериуми наведени во конкурсот и да обезбеди потврда дека е примена на еден универзитет од шангајската листа, во дадена област којашто се стипендира.

Секој студент којшто ги исполнува строгите критериуми за упис на најдобро рангираните 100 универзитети има право да добие стипендија и не смее да биде дискриминиран, а истото важи и за ќерка на сегашен функционер.

Во просториите на Владата на Република Македонија, денеска, во организација на Националниот комитет за спречување на насилен екстремизам и борба против тероризмот (НКСНЕБПТ) се одржа Втор донаторски состанок на кој присуствуваа претставници на амбасадите, меѓународните организации  и невладиниот сектор во земјата.

На состанокот, беа разгледани тековните активности на Националниот комитет и беше констатирано дека треба да се интензивираат средбите со цел  поуспешна координација на проектите во кои меѓународните партнери и граѓанските организации учествуваат, а кои подоцна се имплементираат во согласност со Акциските планови.

Во своето обраќање пред присутните, Националниот координатор Борче Петревски, кој беше придружуван од заменикот Џеладин Ајвази, изрази благодарност и признание за големата посветеност и поддршка од страна на меѓународните партнери граѓанските организации во Република Македонија, кои придонесуваат  во работењето на националното координативно тело и планираните активности.

„Целта на состанокот е да ги ажурираме и усогласиме  активностите  на меѓународните партнери и организациите од граѓанското општество со цел да се согледаат приоритетите за поефикасна соработка, поквалитетни резултати и долгорочен ефект од активностите во областа на превенцијата и спречувањето на насилниот екстремизам и борбата против тероризмот” рече Петревски.

Беше констатирано дека Владата на Република Македонија, со приоритетните цели кои се планирани за периодот 2019-2022 година, ја потврдува посветеноста на  превенцијата и сузбивањето на овие закани, со координирана акција  со стратешките партнери и нашите соседи во регионот.

Како приоритет, во идните активности беше нагласено и поактивното вклучување на НВО секторот во конкретни проекти, со цел усогласување и унапредување на механизмите за постигнување комплементарност.

Учесниците на Донаторскиот состанок ги презентираа  своите тековни и идни проекти,  а кои се однесуваат на спречување на радикализацијата и насилниот екстремизам, кои можат да водат кон тероризам, поздравувајќи ја иницијативата за интензивирање на соработката во иднина, со што како што оценија ќе се остварат стратешките приоритети и цели на локално, национално и регионално ниво.

Претседателот на Владата на Република Македонија Зоран Заев и Генералниот секретар на НАТО Јенс Столтенберг, денеска одржаа заедничка прес конфренција на која информираа за заедничките активности во рамките на официјалната посета на Генералниот Секрeтар на НАТО Столтенберг и на делегацијата на алијансата што го придружуваше.

 

Заедничката прес конференција се одржа веднаш после работниот ручек на кој премиерот Заев и Генералниот секретар на НАТО Столтенберг, во присуство делегациите на Владата на Република Македонија и на алијансата, разговараа за актуелни прашања за процесот за членство на нашата земја во НАТО.

 

Претседателот на Владата на Република Македонија Зоран Заев и членовите на владината делегација во која беа Заменик претседателката на владата и министерката за одбрана Радмила Шекеринска, заменик претседателот во владата задолжен за европски прашања Бујар Османи, заменик претседателот во владата и министер за внатрешни работи Оливер Спасовски, министерот за надворешни работи Никола Димитров, министерката за правда Рената Дескоска, министерот за финансии Драган Тевдовски, министерот за информатичко општество и администрација Дамјан Манчевски, Националниот координатор за НАТО Стево Пендаровски, како и други членови во министерствата во Владата на РМ, го запознаа Генералниот секретар на НАТО Столтенберг со текот на активностите што треба да го забрзаат процесот на нашето зачленување во алијансата како што се формирањето на Комитетот за интеграција во НАТО и Работниот комитет за интеграција во НАТО.

 

Во изјавата за медиумите на заедничката прес конференција, премиерот Заев се заблагодари за посетата и му оддаде признание на Генералниот секретар на НАТО Столтенберг за неговиот несебичен и посветен личен ангажман во промовирањето на партнерството и соработката меѓу НАТО и Република Македонија.

 

„Граѓаните на нашата земја засекогаш ќе запаметат дека поканата за НАТО, како историска одлука за иднината на нашата земја и на нашите граѓани, ја потпиша лично тој, нашиот пријател Јенс Столтенберг на 12 јули оваа година во Брисел. Со овој голем гест, НАТО го поттикна и го забрза процесот на интеграцијата на Република Македонија во НАТО, и со тоа го зајакна чувството за припадност на нашата земја кон најмоќната безбедносна организација во светот“, нагласи премиерот Заев.

 

Претседателот на Владата на РМ Заев додаде дека, дополнително, поканата влијаеше позитивно за внатрешната кохезија во нашето општество и ја промовираше Република Македонија како пример во Западен Балкан, придонесувајќи за регионалниот просперитет.

 

Премиерот Заев потенцираше дека процесот на планирање на завршницата од нашето пристапување кон полноправно членство во НАТО е веќе започнат, и дека силната поддршка што доаѓа од страна на НАТО е од големо значење за нас, за навремено и успешно завршување на реформскиот процес.

 

„Референдумот на 30 септември ќе биде уште еден важен предизвик. Ние сме на историски крстопат за нашата иднина. Убеден сум дека граѓаните ќе ја препознаат важноста на моментот за перспективите на нашата земја. Во таа насока, очекувам дека релевантните политички партии, особено опозицијата, ќе покажат единство и дека ќе се вклучат во процесите. Интеграцијата во ЕУ и НАТО се наши национални стратешки приоритети“, рече премиерот Заев, и додаде дека е убеден дека референдумот ќе биде успешен и дека потоа ќе можат да следуваат уставните измени.

 

„Очекувам процесот да го завршиме навреме, за да може Протоколот за пристапување во НАТО да биде потпишан на почетокот од 2019 година, и да можат земјите членки во НАТО да го започнат процесот на ратификација, за да го заземеме заслуженото место во НАТО, и целосно да го споделуваме товарот и одговорностите во Алијансата“, нагласи премиерот Заев, и додаде дека резултатите од анкетите на јавното мислење охрабруваат, и дека граѓаните на Република Македонија сакаат да се реши спорот за името и земјата да се придвижи кон ЕУ и НАТО. 75-80% го поддржуваат членството во ЕУ и НАТО.

 

Од своја страна Генералниот секретар на НАТО Столтенберг на заедничката прес конференција истакна дека портите на НАТО се отворени и дека одлуката на народот на Република Македонија на референдумот зависи дали земјата ќе зачекори во алијансата.

 

Генералниот секретар Столтенберг потенцираше дека граѓаните на Република Македонија треба да имаат предвид кога ќе го изберат својот одговор на референдумот дека одлучуваат земјата да стане земја членка на сојуз од 29 други земји кои ќе го гарантираат мирот и стабилноста на граѓаните, и да биде партнер на заедница од земји со повеќе од една милијарда жители.

 

„Ве чакаме во НАТО“, порача на македонски јазик Генералниот секретар Столтенберг на заедничката прес конференција со Претседателот на Владата на Република Македонија Зоран Заев.  

Ве информираме дека на денешната седница на Владата на Република Македонија, членовите на Владата го усвоија Предлог на законот за дополнување на Законот за реализација на инфраструктурни проекти за изградба на патна делница Миладиновци – Штип и патна делница Кичево – Охрид.

Со цел да се образложат сите детали за целисходноста на измените на Законот, вицепремиерот за економски прашања Кочо Анѓушев, министерот за транспорт и врски Горан Сугарески и директорот на ЈП за државни патишта Зоран Китанов, оддржаа средба со новинари. На средбата присуствуваа и професори од Градежен факултет кои учествуваа во надминување на настанатите состојби при процесот на изградба на автопатот Кичево-Охрид.

Вицепремиерот за економски прашања, Кочо Анѓушев, ја образложи потребата од донесување на предлог измени на Законот, се со цел да се забрза динамиката на изградба на автопатската делница Кичево – Охрид, како и потребата од ослободување на финансиските средства кои беа блокирани од заемот од ЕКСИМ банката.

Вицепремиерот Анѓушев потенцираше дека биле наследени огромни проблеми поврзани со непостоење на девет клучки во самиот проект, непостоење на алтернативни патишта, потоа огромен проблем со геомеханичките карактеристики на тунелот и проблеми со косините на трасата, за што се потребни дополнителни финансиски средства за доизградба на оваа автопатска делница.

Исто така тој информираше и дека финансиските средства што ЈП за државни патишта ги исплаќало кон Изведувачот по однос на градежни материјали биле многу повисоки во споредба со реалните пазарни цени.

Во овој период, тим од Владата на Република Македонија,  правеше анализи и водеше сериозни разговори како со Изведувачот на проектот, така и со релевантни консултанти се со цел да се надминат сите проблеми, да се интензивира изградбата на автопатската делница и во тој процес сметам дека овозможивме сериозни заштеди за државата,  потенцираше вицепремиерот за економски прашања, Кочо Ангушев.

“ Кога денес би требало да се потпишува таков договор, јас лично не би учествувал во таков договор, но морам да кажам дека Владата и сите ние бевме исправени пред една ситуација кога проектот веќе беше започнат. Државата имаше земено одредени обврски и овој проект мора да се продолжи. Денеска во Владата направивме анекс на тој договор што ќе го предложиме во Парламентот, каде што се надеваме дека пратениците ќе го поддржат и со тоа ќе се деблокира градењето на овој автопат во прва фаза  со сите дополнителните работи, многу поекономично и по цени далеку пониски од тие што претходно биле номинирани. Со домаќински пристап ќе заштедиме сериозни средства за државата, притоа проектот ќе биде имплементиран и нормално, на крајот државата нема да ја донесеме во ситуација на финансиски потешкотии.

Од друга страна секако, сакам да напоменам дека одглавување на градежните работи од овие капитални проекти, што беше макотрпен процес, ќе има значително влијание врз зголемувањето на БДП-то и во овој сегмент и со тоа потсетувам дека БДП ќе ги достигне бројките кои што беа очекувани и планирани од страна на владата”, изјави вицепремиерот за економски прашања Кочо Анѓушев.

Министерот за транспорт и врски Горан Сугарески изјави дека донесувањето на анекс на основниот договор е повеќе од потребен се со цел да се забрза изградбата на овој капитален проект, а од друга страна да се овозможат редовни исплати на подизведувачите на овој проект за извршените градежни работи.

“Денеска зборуваме за решение на проблемот. Во самиот предлог на Законот ослободуваме 205 милиони еаар по сите ставки. Ова е значајно за да може да се продолжи со изградбата, а од друга страна да се овозможи нормално плаќање кон домашните подизведувачи. Веќе за еден месец ќе имаме и нов анекс со кој точно ќе ги утврдиме дополнителните средства по сите ставки и една финална сума на средства потребни за доизградба на автопатот”, изјави министерот за транспорт и врски Горан Сугарески.

Директорот на ЈП за државни патишта, Зоран Китанов, најави дека со донесување на овие измени на законот, во наредните месеци ќе се забрза изградбата на автопатот, притоа ќе се изврши препроектирање на сите елемент како што се споредни и пристапни патишта, косини други елементи кои недостасуваат  во проектот.

Предлог на законот за дополнување на Законот за реализација на инфраструктурни проекти за изградба на патна делница Миладиновци – Штип и патна делница Кичево – Охрид, ќе се испрати на разгледување во Собранието на Република Македонија.