Со системски промени во многу делови направени се вкупно околу 14 милиони евра заштеда без при тоа да се нанесе каква било штета на граѓаните и на здравствениот систем, нагласи во обраќањето премиерот Никола Груевски на конференцијата на Унијата на жени на ВМРО - ДПМНЕ денеска во Скопје.

Според него, има уште многу да се работи, но, подвлече, здравството е предизвик во секоја држава, дури и во најразвиените земји.

Тој истакна дека се силно фокусирани на реформите во здравството, а досега, рече, има огромен напредок и во набавката на опрема и во системските промени и во градбата и реконструкцијата на здравствените објекти.

- Досега изршивме намалување на цените на над 3 илјади лекови, некаде и до 80 проценти. Со паралелен увоз на лекови направивме заштеда од  5,8 милиони евра, со ставење ред и транспарентност во набавката на инсулинот уште 3,6 милиони евра, а третиот тендер што е во тек за набавка на лекови, кога повторно имаме паралелен увоз, очекуваме заштеда од 3 до 4 милиони евра, рече претседателот на Владата, додавајќи оти 30 милиони евра годишно граѓаните имаат заштеда од намалувањето на цената на овие лекови.

- Затоа го напаѓаат и Груевски, и Владата и Тодоров, затоа што се соочуваат со она што ВМРО - ДПМНЕ го прави, а тие можеле, а не го направиле, напротив го правеле спротивното, рече Груевски и праша каде оделе парите од толку скапи лекови во времето на СДСМ.