Во манастирот „Св. Јован“ во кумановско Ржановце денеска беше отворена етнолошка изложба на која се претставени автентични примероци од македонската традиција и обичаи, кои ги собирал Злате Давитковски во текот на 40 години.

Музејската поставка е мал дел од неговата збирка од 2.100 вредни етнолошки предмети, меѓу кои најстарите датираат од крајот на 19 век. Презентирани се народни носии од сите краишта на Македонија и од регионот, традиционални керамички, порцелански и стаклени садови, музички инструменти  и многу други вредни експонати од македонското културно наследство.

Изложбата ја отвори министерката за култура Елизабета Канческа-Милевска која истакна дека примероците најсликовито ја раскажуваат етничката и културната историја на Македонија.

- Истовремено, тие се и доказ за  врвната умешност на македонскиот занаетчија кој секогаш, спојувајќи ги практичноста и естетиката, создавал уметничко дело. Верувам дека оваа нова поставка ќе биде  провокација за сите посетители на ова место, кои и досега со голем интерес го посетуваа село Ржановце, за да се запознаат со вредното богатство што го поседува Давитковски, рече Канческа-Милевска.

Според вредноста и бројноста на етнолошките предмети и според оценката на етнолозите, етнографската збирка на Давитковски е меѓу најголемите приватни збирки на народни носии и други изработки од текстил во Македонија.

Министертсвото за култура издвои средства за поддршка на проекти од национален интерес за валоризација и за конзервација на предемтите од поставката, а се вклучија и Заводот за запштита на спомениците на културата  и Музејот Куманово, како и стручни лица етнолози, етномузиколози и професори.

Кумановскиот музеј изготви и елаборат за валоризација на оваа збрика кој е доставен до Управата за заштита на културното наследство. Таа  треба да донесе одлука за прогласување за културно наследство од особено значење, со што збирката на Давитковски ќе биде законски заштитена.

Колекционерот ги собирал примероците со големо трпение. - Во текот на годините  собрав над 800 народни носии, 500 килими, над 1.000 експонати. Благодарен сум и на министерката за вреднувањето на поставката која е значајна за сите нас, рече Давитковски.