Владата нема да ги зголеми даноците. Засега смета дека ќе нема потреба од нов ребаланс на Буџетот. Во  кризата што постои во Европа и има длабоки  последици и врз македонската економија најважно е Буџетот да ја помогне ликвидноста на стопанството.

Тоа го изјави денеска вицепремиерот и министер за финансии Зоран Ставрески, одговарајќи на новинарски прашања по потпишувањето на Договорoт за заем со ЕБОР за изградба на железницата кон Бугарија.

Според него,  Владата ќе направи се што може за поддршка на реалниот сектор, а Буџетот, како што рече, е  позициониран со сите средства што се на располагање на државата да се помогне да се одржи ликвидноста на економијата, за последиците врз реалниот сектор да бидат помали.

Вицепремиерот повтори дека Владата и покрај кризата останува на ставот да не ги зголемува даноците за да нема дополнителен товар за стопанството и граѓаните. 

- Македонската Влада како  и сите во Европа во овие кризни  времиња се соочува со искушенија  за обезбедување доволно средства во Буџетот, но, како што е познато, се решивме Буџетот и фискалната политика да ги водиме без да предизвикаме дополнителен товар  врз стопанството и граѓаните, односно да ја водиме фискалната политика  и во овие тешки времиња без зголемување на даноците и она што го направија речиси сите земји во ЕУ, нагласи Ставрески.
 
Сметаме, додаде, дека е најдобро ако може да издржиме  да нема зголемување на даноците бидејќи и така стопанството  и граѓаните се соочуваат со сериозни предизвици и ќе направиме се што можеме да нема зголемување на даноците.

Прашан дали Владата ќе излезе со нови антикризни мерки за помош  на стопанството министерот за финансии истакна дека борбата со економската криза е постојана и оти нема запирање и можност да се  прекине со барањето нови мерки и активности  во таа насока.

-  Буџетот за оваа година е усвоен и претставува еден од клучните инструменти за поддршка  на стопанството преку високиот износ на капитални инвестиции.  Верувам дека почнувањето на неколку крупни проекти како што е реконструкцијата и изградбата на пругата кон Бугарија, изградбата на патниот правец Демир Капија – Смоквица  од Коридорот 10 што ќе почне во септември, и некои други слични проекти, треба да помогнат македонската економија  односно релевантните сектори да се извлечат од криза, рече вицепремиерот и министер за финансии Зоран Ставрески.