Во рамките на неколкудневната посета на Соединетите американски држави, министерот за надворешни работи на Република Македонија Никола Попоски денеска во Њујорк имаше средба со Хенри Кисинџер, поранешен државен секретар на САД и добитник на Нобеловата награда за мир.

Министерот Попоски и Кисинџер, како што соопшти Министерството за надворешни работи, во отворен разговор размениле мислења за стратешките определби и предизвиците во регионот на Југоисточна Европа. Министерот Попоски го запознал соговорникот и со актуелностите во процесот на зачленување на Република Македонија во НАТО и во ЕУ.

Кисинџер на средбата го истакнал своето убедување дека интеграциите на регионот во НАТО и ЕУ се клучна одредница за обезбедување мир, стабилност и просперитет во Европа. Во разговорите, соговорниците го споделиле ставот за потребата од континуирана поддршка на балканските земји во правец на нивно што побрзо зачленување во Евро-атлантското семејство.

Во текот на денот министерот Попоски одржал предавање на Универзитетот Колумбија во Њујорк, пред претставници на академската заедница и студенти на Универзитетот,  на тема „Евро-атлантската интеграција: кон безбедност и просперитет на Западниот Балкан“.

Во своето обраќање министерот Попоски говорел за перспективите во Евро-атлантската интеграција на регионот, со посебен акцент на напредокот на Република Македонија во овој процес, како и очекувањата за добивање заслужена покана за членство во НАТО и започнување на пристапните преговори со Европската Унија.