Нов современ здравствен објект по најнови стандарди ќе биде изграден на местото на постоечкиот Институт за белодробни заболувања во Козле.

Инвестицијата изнесува над осум милиони евра, а планирано е изградбата да заврши за 24 месеци. Новата болница ќе биде опремена со 100 кревети, собите двокреветни и во секоја од нив ќе има тоалет.

- Ова е голем дел за македонското здравство затоа што освен Клиниката за гинекологија, која е изградена како нов објект во независна Македонија, ова е втор објект кој се почнува во независна Македонија. Идејата за оваа болница е таа да не биде само институт за белодробни заболувања, туку полека да прерасне во детска болница на секундарно ниво имајќи предвид дека Скопје има над 700 - 800 илјади жители и има потреба од ваква установа, изјави министерот за здравство Никола Тодоров, кој заедно со премиерот Никола Груевски присуствуваше на почетокот на градежните работи.

Додека се гради новиот објект, амбулантскиот дел на Институтот ќе биде преместен во Тафталиџе во близина на Институтот, а за време на рушењето на објектот е договорено сите пациенти да бидат трансферирани во Детската клиника.

- Имаме изготвено план за трансфер на пациентите за време на целата градба со интенција обемот на работа воопшто да не биде намален и да се одговори на сите здравствени потреби на кои одговараше оваа реномирана институција, нагласи министерот за здравство.

Постоечкиот објект е изграден во 1965 година и бил замсилен како времен објект за употреба од 10 до 15 години.