Kryetari i Qeverisë së Republikës së Maqedonisë së Veriut, Dimitar Kovaçevski,ka zhvilluar takim tet-a-tet me shefin e Delegacionit të Bashkimit Evropian në vend, Dejvid Gir.

Në fokus të takimit ishte procesi i eurointegrimeve të Republikës së Maqedonisë së Veriut, si dhe zhvillimet dhe sfidat aktuale.

Në takim u theksua rëndësia e progresit të eurointegrimeve, e cila, siç u vlerësua, do të ndikojë pozitivisht në cilësinë e jetës së qytetarëve, si dhe në të gjitha sferat e shoqërisë.

Në këtë drejtim, u theksua se procesi i skriningut zhvillohet sipas dinamikës së paraparë dhe kalendarit që është vendosur bashkërisht mes Maqedonisë së Veriut dhe Bashkimit Evropian. Euroambasadori Gir konfirmoi mbështetjen e fuqishme për procesin e integrimit evropian të vendit.

Bashkërisht u konstatua se në kushtet e trazirave gjeopolitike, anëtarësimi i plotë i vendit në Bashkimin Evropian është i një rëndësie vendimtare.

Në të njëjtën kohë, Kryeministri Kovaçevski në takim theksoi se vazhdimi i rrugës evropiane është një mundësi historike që duhet shfrytëzuar tani.

Në takimin me ambasadorin evropian Gir, Kryeministri theksoi se anëtarësimi i plotë në BE deri në vitin 2030 është një synim ambicioz por i arritshëm, për të cilin kemi mbështetjen edhe të partnerëve tanë strategjikë.