Средба Ковачевски – Гир: Скрининг процесот оди добро, поддршка за следните чекори во евроинтеграциите

Претседателот на Владата на Република Северна Македонија, Димитар Ковачевски, се сретна со Дејвид Гир, шефот на Делегацијата на ЕУ во нашата држава.

На состанокот е оценето дека скрининг процесот со ЕУ се одвива добро и е изразена поддршка за следните чекори на патот на евроинтеграциите на Северна Македонија, со цел непречен тек на преговарачкиот процес.

Констатирано е дека напредокот на евроинтеграциите е од значење и за квалитетот на живот на граѓаните на нашата држава и за стабилноста на Европската Унија, поради што од клучно значење се сметаат фокусот, довербата и инклузивноста на сите страни, во овој процес.

Разговарано е и за важноста од натамошно унапредување на реформскиот процес, посебно во областа на правосудството и е заеднички изразено очекување за резултати базирани на професионални капацитети, принципи и интегритет.

На средбата е разговарано и за други актуелни прашања, посебно околу последиците од војната во Украина во глобални рамки и предизвиците во енергетската сфера со што се соочуваат Европа и светот и е изразена согласност за потребата од солидарен пристап при разгледувањето можни решенија.