Шахпаска: Отворени две куќи за живеење со поддршка во Демир Капија, процесот на деинституционализација продолжува

„Навистина ми претставува голема чест и задоволство што денеска во Демир Капија, го воспоставуваме живеењето со поддршка односно отвораме две станбени единици, во кои што ќе бидат сместени довчерашни девет станари на Специјалниот Завод  Демир Капија“, рече министерката за труд и социјална политика Јагода Шахпаска на денешниот настан по повод отворањето на две куќи наменети за живеење со поддршка во Демир Капија, како дел од процесот на деинституционализација. На настанот присуствуваше и Никола Бертолини, шеф на одделот за соработка во Делегацијата на Европската Унија и  градоначалникот на Општина Демир Капија , Лазар Петров .

Министерката Шахпаска истакна дека  процесот на деинститутионализација продолжува до исполнување на целта , ниедно лице да не остане во установите за социјална заштита. Притоа, таа ја потенцираше посветеноста на  Владата и Министерството за труд и социјална политика на спроведувањето на Националната стратегија за деинституционализација 2018-2027 година.

Таа потенцираше дека негувателите и стручните лица кои ќе работат со корисниците ќе можат да применат индивидуален пристап, да изградат однос со секој од нив, да ги разберат нивните потреби, но и да ги идентификуваат и зајакнат јаките страни и потенцијалите на корисниците. Односно дека тие ќе работат во значително подобри услови и ќе можат да се посветат на својот професионален развој, со цел унапредување на  квалитетот на услугата.
„Со процесот на деинституционализација овозможивме да нема ниту едно дете под 18 години,сместено во резиденцијална установа. Од првичната бројка од  480 корисници во овие установи, стигнавме до бројка помала од  250 корисници. Со поддршка на Европската унија и  заедно со граѓанскиот сектор, градиме мостови на доверба во грижата за најранливите категории на граѓани,“ рече министерката.

За претставникот на Делегацијата на Европската Унија во Скопје, Никола Бертолини, „овој нов модел на независно живеење што го промовираме денеска е модел на најдобрите практики за адресирање на потребите на лицата со попреченост.

„Единиците за независно живеење се јасен пример кој покажува дека потребите на лицата со попреченост не се посебни и дека ним не им се потребни посебни третмани во институциите, нивната единствена потреба е да бидат третирани рамноправно. Нашите општества мора да научат да се борат против дискриминацијата и да ја гледаат различноста како позитивен елемент за признание и почит. ЕУ постојано и' помага на Владата за јакнење на капацитетите на институциите и на јавните политики, подобрување на пристапноста на институциите и вработувањето и обезбедува системска поддршка на процесот на деинституционализација, се' со цел лицата со попреченост да се вклучат во општеството“, порача шефот  на одделот за соработка во Делегацијата на Европската Унија.​

Министерката Шахпаска на крајот информираше дека специјалниот Завод  Демир Капија ќе прерасне во еден современ центар, давател на социјални услуги согласно светските и европските стандарди.