Средба на премиерот Заев со известувачот за Северна Македонија во ЕП, Ќучук: Поддршка за европерспективите, билатералните односи да се решаваат посебно од европската рамка

Претседателот на Владата на Република Северна Македонија, Зоран Заев, се сретна со Илхан Ќучук, европратеник и известувач за Република Северна Македонија во Европскиот парламент.

На состанокот е изразена поддршка за европските перспективи на нашата држава. Констатирано е дека билатералните односи треба да се решаваат посебно меѓу државите и не треба да бидат дел од европската преговарачка рамка. Воедно е изразена заедничка согласност дека е потребно нашата држава да продолжи по реформскиот пат.

„Целосно сме фокусирани на реформите, со најголем фокус на правосудството, каде започна практичната имплементација на донесените законски решенија. За нас нема алтернатива за членството во Европската унија. Низ политиките на разбирање и дијалог ќе продолжиме да работиме, со цел придонес во добрососедските односи и не само затоа што тоа е важно за европскиот начин на однесување, туку и поради потребата од пријателските односи помеѓу соседските држави“, рече премиерот Заев.

На средбата е оценето дека европскиот наратив, во духот на пријателството, поттикнува конструктивност и води кон добри односи и помеѓу државите и народите во нив.