Takim i Kryeministrit Zaev me ambasadorin e ri grek Kunduros: Miqësia mes shteteve promovon stabilitet në rajon, mbështetje nga Greqia në integrimet evropiane

Kryetari i Qeverisë së Republikës së Maqedonisë së Veriut, Zoran Zaev, u takua me Rusos Kunduros, ambasadori i ri i Republikës Helene në vend.

Në takim u përcoll mesazhi nga Athina për vazhdimin e miqësisë mes të dyja vendeve, përmes avancimit të bashkëpunimit në sferat e rëndësishme për qytetarët e të dyja shteteve, që vlerësohet se veçmë është në fazën e realizimit.

Bashkërisht u konstatua se Maqedonia e Veriut dhe Greqia, përmes miqësisë, promovojnë stabilitet në gjithë Ballkanin Perëndimor.

U shpreh mbështetje nga Greqia për vendin tonë për progres edhe në integrimet evropiane, pas arritjes së anëtarësimit në NATO, si dhe për ndihmë teknike në proceset e rëndësishme për perspektivat evropiane.

Në takim veçanërisht u bisedua për intensifikimin e bashkëpunimit ekonomik, ku, si edhe në energjetikë, vërehen rezultate të dukshme.

“Përmes ekonomisë, qytetarët e të dyja shteteve fillojnë të ndjejnë benefite të drejtpërdrejta nga Marrëveshja e Prespës, si hap historik dhe përcaktim i rëndësishëm i të dyja shteteve për ndërtimin e marrëdhënieve të mira fqinjësore, bashkëpunim inkluziv dhe konstruktiv”, tha Kryeministri Zaev.

Në takim u shpreh edhe rëndësia e bashkëpunimit në sferën e shëndetësisë, bujqësisë, arsimit, kulturës, mbrojtjes sociale.

Kryeministri Zaev, dërgoi ftesë përmes ambasadorit Kunduros, deri te Kryeministri grek Kirijakos Micotakis, për vizitë në Republikën e Maqedonisë së Veriut.