Активна дипломатија ги унапредува правата на малцинствата

Се унапредуваат правата на хрватите во Република Северна Македонија и правата на македонците во Република Хрватска. Сето ова е резултат на честите меѓувладини состаноци. Ова е заклучокот од средбата на 4-тата заедничка Меѓувладина мешовита комисија за спроведување на Договорот за заштита на македонското малцинство во Хрватска и хрватското малцинство во Северна Македонија, што се одржа денеска во Загреб, Хрватска. 

Делегацијата на Република Северна Македонија беше предводена од министерот без ресор задолжен за дијаспора, Едмонд Адеми. Адеми ги пофали напорите на Хрватска за поддршка на проектите на македонското малцинство. 

„Ние чекориме напред во областа на правата на малцинствата. Ние сме во постојана комуникација со хрватите во Северна Македонија. Има уште да се работи во овој правец. Денешните препораки ќе придонесат повеќе да напредуваме", рече министерот Едмонд Адеми. 

Делегацијата на хрватската влада ја предводи Звонко Милас, државен секретар на Централната канцеларија за хрватите надвор од Република Хрватска. Милас ги издвои континуираните напори на Владата на Република Северна Македонија во областа на правата на малцинствата, со акцент на хрватите, охрабрувајќи ги да се продолжи понатаму и во иднина. 

„Препораките од претходните средби резултираа со позитивни чекори. Честите средби покажуваат интерес од страна на Владата на Република Северна Македонија процесот да оди напред", истакна Милас. 

Состаноците на ММК излегуваат од Договорот на двете држави, потпишан во 2007 година, во Сплит. 

5-от состанок ќе се одржува во Скопје, во 2020 година.