Прес

Владата нема никаков проблем студентите да присуствуваат на дебатата. Доколку Интеруниверзитетската конференција цени дека е потребно во рамките на нивната делегација која ќе учествува на денешната дебата да има студенти, тогаш ние немаме никаков проблем, изјави владиниот портпарол Александар Ѓорѓиев.

Одговарајќи на новинарско прашање за обвинувањата од професорскиот пленум дека на дебатата не било дозволено да присуствуваат и студенти, Ѓорѓиев рече дека никаде во понудата за форматот кој треба да биде присутен од страна на Интеруниверзитетската конференција не било ограничено дека не може да присуствуваат студенти.

- Напротив, ги охрабруваме луѓето од Интеруниверзитеската конференција и нејзиниот претседател да вклучат во рамките на делегацијата и претставници на студентите. Може да вклучат и студенти кои изразија поддршка на реформите, но и претставници на студентите кои изразија несогласување, нагласи Ѓорѓиев.

Оцени дека е добро што ќе се дебатира и ќе се разменуваат мислења меѓу засегнатите страни. Дебатата што се случува во јавноста, како што нагласи, не е од вчера.

- Оваа јавна дискусија трае веќе три месеци преку различни форми, организирање разни трибини, состаноци и изјави во медиуми. Ова е уште еден составен квалитативно надополнет дел на самата дебата каде на исто место ќе може да се дебатира за високото образoвание. Сите се повеќе од добрoдојдени да присуствуваат и заедно да ги согледаме сите аспекти на понудените реформи за кои ние сметаме дека се исправни и носат додадена вредност и за студентите и за професорите и за целокупното општество, потенцира Ѓорѓиев.

 Во 2014 година се завршени повеќе од 1.700 проекти што е 98 отсто реализираност од планираните. Најмаркантни за годината што завршува се отворањето на Археолошкиот музеј на Македонија, кој за два месеца има 10.000 посетители, и новата зграда на Велешкиот театар по 66 години театарска дејност во градот. 

- 2014 беше година на културата и на проекти за кои се чекаше со години. Тие ја унапредија културната клима во нашата држава, ја збогатија културната понуда за граѓаните и беа соодветен одговор на нивните потреби и барања, рече министерката Елизабета Канческа-Милевска на прес-конференција на која присуствуваа и директори на национални институции од културата. 

Соопшти дека 2014 беше и година на стимулативни мерки кои, рече таа, наишле на огромен интерес и поддршка од уметниците - откупени се 64 ликовни дела, нарачани се 42 дела од класичната музика, субвенционирани се 106  забавни и фолк-композиции и поддржан е превод на дела од 21 македонски автор на 15 странски јазици. Потсети дека стимулативните мерки се во согласност со Националната стратегија 2013-2017 од чии резултати е задоволна зашто се исчекор во развојот на културата. Активностите предвидени во стратегијата во 2014 биле исполнети 70 проценти. 

Задоволна е и од напредокоот на филмската дејност кој се должи на зголемувањето на средствата за продукција, даночните олеснувања односно правото на поврат на средства, овозможени со новиот Закон за филмска дејност. Секоја година излегуваат по два нови македонски филма, а идната година ќе има седум што е најголем број домашни филмски премиери во една година. 

Канческа-Милевска информираше и за доделените национални пензии и вработувањето на вкупно 129 уметници - кадар во театрите, МОБ Филхармонија и во ансамблот „Танец“. Рече дека за идната година се планираат 120 вработувања - стручен кадар во областа на заштита на културното наследство и конзервација, во музејска и во библиотечна дејност. 

Интензивно се работело и на истражување на археолошките локалитети. Во Скупи тие се завршени и идната година се планира почеток на реконструкција на гледалиштето и театарската зграда. Голем е бројот на проекти за заштита на културно наследство, меѓу кои се и тие за обнова на фасадите на стара архитектура и за реставрација на сакрални објекти, а со закон беше заштитено старото градско јадро на Кратово.

Во издавачката дејност се реализираа капиталните литературни проекти, во театарската дејност покрај премиерите и отворањето на Велешкиот театар, 2014 е значајна и за востановувањето на новиот „МНТ фест“ на кој годинава гостуваше и Шекспировиот театар Глоуб.

Канческа-Милевска ги наброи и реализираните проекти во музичко-сценската и ликовната дејност, како и во музејската област - нова поставка во Музејот на современата умертност, нов Музеј на прогонетите од егејскиот дел на Македонија, Музеј на ВМРО за Штип и Штипско 1893-1934 во Ново Село, новоотворената Златна одаја во Куќата на Робевци во Охрид, реконструктивни зафати во домови и центри за култура во повеќе општини, покривна конструкција на Античкиот тееатар, реконструкција и санација на Бигорскиот манастир.... 

Се осврна и на манифестациите и соработката со меѓународни организација, како УНЕСКО (кое годинава го прифати орото Копачката на листата на нематеријално културно наследство) и Европската унија и нејзината  нова програма за култура „Креативна Европа“ 2014-2020 во која е вклучена и  РМ. 

Годинава македонската култура имаше и меѓународна презентација  во неколку земји по повод 20 години дипломатски односи, меѓу кои Канческа-Милевска ги спомна Австрија, Чешка и Ватикан, како и учеството во Рига -  европската престолнина на културата во 2014.  

Буџетот во културата за 2015 е 3,6 милијарди денари, што е за 0,79 проценти повеќе од буџетот за оваа година. За програмските дејности за 2015 година се наменети 837 милиони 278 илјади денари. 

Министерството за култура денеска на својата веб-страница и во дневниот печат ги објави проектите кои се содржани во годишните програми на националните установи во културата за 2015 година и проектите поддржани на годишните конкурси по одделни области и активности од културата за 2015 година. 

Канческа-Милевска соопшти дека наредната година ќе се инвестира во тековните капитални проекти -  изградба на салата за Македонската филхармонија, изградба на театар и библиотека во Тетово, изградба на Струмичкиот и Турскиот  театар и реконструкција на Албанскиот театар, за Плаошник и за домот на културата во Кисела Вода. Ќе биде  поддржана и внатрешна реконструкција на Македонската опера и балет, Театарот за деца и младинци и Центарот за култура во Прилеп.

Вкупно 73.820 прегледи се реализирани во периодот од март до ноември, годинава, во рамки на проектот Рурален доктор чија цел е да овозможи континуитет во обезбедувањето примарна здравствена заштита на жителите од руралните средини, информираше денеска на прес-конференција министерот за здравство Никола Тодоров.

- Од вкупно реализираните прегледи во овој период, во скопскиот регион има најголем број, 7.316 прегледи. Во кумановскиот регион се реализирани 4.837, а во тетовскиот вкупно 4.303 прегледи. Со имплементирањето на проектот Рурален доктор, медицинските тимови обезбедуваат примарна здравствена заштита за вкупно 359.283 лица во рамки на отворените 309 пунктови за 538 населени места каде граѓаните се посетуваат преку патронажа, истакна Тодоров изразувајќи задоволство од успешноста на проектот.

Тимовите на Рурален доктор обезбедуваат основни здравствени услуги, како мерење притисок, ниво на холестерол во крвта, гликемија и аплицирање ампуларна терапија. Министерот Тодоров потсети дека во изминатите неколку месеци воведени се новини во здравствените услуги кои ги обезбедуваат руралните доктори.

- Едната новина во однос на здравствените услуги што ги обезбедуваат руралните доктори, е што овие доктори можат да издаваат рецепти, односно да препишуваат терапија, акутна и хронична, која пациентот треба да ја подигне во рок од два дена. Според податоците од Мој термин, досега руралните лекари препишале вкупно 25.589 рецепти. Најголем број од препишаните рецепти се за хронична терапија, односно за висок крвен притисок, кардиомиопатија и срцева слабост, како и антибиотици. Најчесто препишуван лек е еналаприл, кој е дел од хроничната терапија за хипертензија. За оваа дијагноза се издадени 6.621 рецепт, истакна Тодоров.

Во контекст на тоа додаде дека од следната недела почнуваат со отворање на рурални аптеки во населени места до 3.500 жители, додека во населени места до 1.000 жители, граѓаните ќе може да ја подигнат потребната терапија од подвижна аптека.

Другата новина што е воведена е тоа што тимовите во кој било пункт, односно во кое било населено место ќе може да земат крв за лабораториска анализа, а резултатите од анализата ќе се испраќаат по електронска пошта или пациентот ќе ги зема резултатите на наредниот термин.

За жителите од руралните средини, рече Тодоро, набавени се 50 ЕКГ апарати, со што ќе се прошири опсегот на здравствени услуги кои ги обезбедуваат руралните доктори.

- Во текот на прегледите кои ги вршат руралните доктори, констатирани се чести примери на детектиран висок крвен притисок кој дотогаш не бил регулиран, или повисоко ниво на гликемија, што дотогаш не било контролирано. Тоа значи дека во таквите случаи луѓето не биле свесни за конкретната здравствена состојба, па по првичниот преглед, биле стручно посоветувани и им биле препорачани понатамошни прегледи и испитувања, рече Тодоров

Министерот информираше дека во рамките на проектот Рурален доктор, во текот на 2014 година, реализирани се 51 вработување, односно 27 доктори и 24 медицински сестри.

Деветнаесет награди со износ од 3.515.000 денари се доделени на вториот конкурсен рок за 2014 година за нарачка на дела од областа на класичната музика. На конкурсот за стимулација на творештвото од областа на класичната музика до Министерството биле поднесени 36 апликации за девет различни категории од кои само една не ги исполнила условите.

Министерката за култура Елизабета Канческа-Милевска денеска на прес-конференција на која ги соопшти резултатите од конкурсот, рече дека се доделени 10 први награди со износ од 2.830.000 денари, седум втори награди со износ од 555.000 денари и две трети награди со износ од 130.000 денари.

Посочи дека Комисијата задолжена за избор на оркестарски копозиции одлучи во таа категорија да биде доделена една прва награда со освоени 22 бодови за композицијата на авторот Вања Николовски, а Комисијата за должена за избор на композиции од категоријата за гудачки оркестар одлучи да бидат доделени една прва награда со освоени 33 бодови за композицијата на авторот Никола Крстевски и две втори награди: со освоени 29 бодови за композицијата на авторот Александар Пејовски и со освоени 29 бодови за композицијата на авторот Сони Петровски.

- Комисијата за должена за избор на композиции од категоријата за гудачки квартет одлучи во оваа категорија да бидат доделени прва награда со освоени 20 бодови за композицијата на авторот Маријана Јаневска, втора награда со освоени 17 бодови за композицијата на авторот Валентина Велковска Трајановска и трета награда со освоени 14 бодови за композијата на авторот Филип Иванов, рече Канческа-Милевска.

Таа потенцира дека Комисијата за избор на композиции од категоријата мешан хор утврди дека во оваа категорија ќе бидат доделени: прва награда со освоени 23 бодови за композицијата на авторот Јана Андреевска Димитровска, втора награда со освоени 20 бодови за композицијата на авторот Никола Крстевски и со освоени 20 бодови за композицијата на авторот Маријана Јаневска, како и трета награда со освоени 20 бодови за композицијата на авторот Тодор Трајчевски.

Нагласи дека Комисијата задолжена за избор на композиции од категоријата за вокално инструментални дела одлучи во таа категорија да биде доделена една прва награда со освоени 40 бодови за композицијата на авторот Панде Шахов, а Комисијата за избор на композиции од категоријата за дуо утврди дека во таа категорија ќе бидат доделени: прва награда со освоени 32 бодови за композицијата на Никола Димушевски, втора награда со освоени 29 бодови за композицијата на Ана Пандевска и трета награда со освоени 27 бодови за композицијата на авторот Илија Илиевски.

Комисијата за избор на композиции од категоријата камерна опера утврди дека ќе биде доделена прва награда со освоени 46 бодови за композицијата на авторот Горан Начевски, а Комисијата за избор на композиции од категоријата солист и гудачки оркестар утврди дека ќе бидат доделени две први награди со освоени 24 бодови за композицијата на авторот Михаило Трендафиловски и со освоени 24 бодови за композицијата на авторот Дамјан Темков, а Комисијата за избор на композиции од категоријата за солист и оркестар одлучи да биде доделена само една прва награда со освоени 34 бодови за композицијата на авторот Сони Петровски.

- Во однос на оваа стимулативна мерка на Министерството за култура во 2014 година на првиот конкурс (чии резултати без соопштени во јули кога беа доделени 23 награди) и на вториот конкурсен рок се поддржани вкупно 42 композиции на 27 автори кои се наградени со вкупен износ од 5.305.000 денари од буџетот на Република Македонија. Министерството и следната година ќе продолжи со реализација на оваа мерка и веќе во втората половина на јануари ќе биде објавен нов конкурсен рок за нарачка на нови дела од областа на класичната музика, додаде Канческа-Милевска.

Таа ги повика сите автори, композитори без оглед на која генерација и припаѓаат да се информираат и да учествуваат на конкурсот.

Сони Петровски, претседател на СОКОМ и композитор, рече дека неколкукратно е зголемен е фондот на нови музички дела и тоа им овозможува на институциите, фестивалите и ансамблите да го збогатат својот репертоар со македонски дела.

Според музикологот и член на неколку комисии, Марко Коловски истакна дека годинава веројатно ќе ја завршат со исклучително висок број создадени композиции од македонските автори.

- Оваа година вложениот креативен труд на авторите на класична музика е вреднуван сосема солидно, пристојно и достоинствено, додаде Коловски.

Еден од наградуваните автори Горан Начовски потенцира дека во врска со неговата композиција камерната опера не би сакал да открива детали, но оти со задоволство и нетрпение го очекува моментот кога ќе дојде да се подготвува во нивната национална установа Македонската опера и балет.

Наградениот автор Дамјан Темков рече дека ова е еден најмотивирачките периоди во македонското музичко класично творештво.

Надграден е Единствениот Национален Електронски Регистар на прописи, веб портал преку кој граѓаните, невладиниот сектор, синдикатите, стопанските комори, претставници на Владата... електронски се информираат за предлог-законите во фаза на подготовка и можат да дадат коментари и забелешки. 

- Министерството за информатичко општество и администрација го надгради системот со цел на засегнатите страни да им се даде корисна и практична алатка за нивно постојано учество во процесите на донесување на регулативата, рече денеска на прес-конференција ресорниот министер Иво Ивановски. 

Една од најголемите придобивки од новиот ЕНЕР, појасни Ивановски, е неговата интеграција со мултиплатформскиот систем за колаборација за е-седница, со што ќе се оневозможи доставување предлог закони за разгледување во владина постапка, доколку претходно текстот на предлог-законот не е објавен на ЕНЕР. Исклучок ќе бидат итни законски решенија на  барање на премиерот.

Според Ивановски, покрај новиот дизајн, на веб порталот се овозможува едноставна регистрација и упатства за користење, нова систематизација на прописите, согласно категоризацијата која се користи од Службениот весник на Република Македонија, системско конфигуриран период на автоматска објава на коментар, со што треба да се  овозможи поголема ажурност на навремено објавување коментари. Воведени се нови линкови и е поставен бројчаник со јасно прикажување на денот и часот на завршување на процесот на консултација, што, укажа Ивановски, ќе овозможи поголема сигурност кај јавните корисници во кој временски период ќе може да ги испратат своите коментари.

Една од најголемите придобивки од новиот ЕНЕР, појасни Ивановски, е неговата интеграција со мултиплатформскиот систем за колаборација за е-седница, со што ќе се оневозможи доставување предлог закони за разгледување во владина постапка, доколку претходно текстот на предлог-законот не е објавен на ЕНЕР.

Досега се регистрирани 27.000 посетители на веб порталот на ЕНЕР, кој е воспоставен во 2009 година, но, според Ивановски, не значи дека станува збор само за по една посета од поединечен посетител.

- Очекуваме со новиот систем  таа бројка да порасне драстично, но сепак тука најголем  фидбек имаме од стопанските комори кои учествуваат активно. Секој закон без разлика од која дејност е директно се испраќа до стопанските комори, тие ги разгледуваат и повторно ги враќаат. Процесот кој доаѓа од стопанската  комора се смета како еден иако во позадина може да работат 10, 100 или 1000 компании, појасни министерот Ивановски. 

И во случај кога граѓаните ќе бидат предлагачи на закон, МИОА, според него, ќе го постави предложениот  текст на веб порталот на ЕНЕР и ќе помогне да се направат обрасците за влијанието на регулативата. 

Ивановски апелира до институциите и физичките и правни лица да го користат ЕНЕР. Со тоа, укажа, ќе поттикнеме дискусии, предлози и содржини, кои квалитативно можат да влијаат врз донесувањето на законските решенија.

Фирмите во Македонија, кои што сакаат да реинвестираат, и понатаму ќе имаат можност  да не плаќаат данок на добивка. Тоа го имаме само ние и Естонија во Европа, што значи Репубика Македонија  и натаму е земја со најповолен даночен систем во тој дел.

Тоа го изјави денеска вицепремиерот и министер за финанси Зоран Ставрески, одговарајќи на новинарски прашања за повторната обврска за фирмите од јануари за плаќање данок на добивка којашто нема да се реинвестира. 

Според Ставрески, разговарано е со бизнис заедницата и постои согласност дека се исцрпени можностите за  пролонгирање на плаќањето на данокот по тој основ од кој поради кризата беа ослободени во изминатите пет години.  

- За данокот  на добивка, тоа е регулатива којашто беше во сила во време на криза и Македонија беше единствена земја, која што во тие пет години, од 2009 до  2014 година, имаше таква поволна мерка за стопанството. Ние разговаравме со бизнис заедницата и неодамна и порано и од нивна страна постои согласност  дека се исцрпени можностите за пролонгирање на таа мерка и оти во Република Македонија треба да почне да се оданочува добивката што нема да се реинвестира, изјави Ставрески, по потпишувањето договор за инвестиција на американски „Капкон“ во Македонија.

Министерството за труд и социјална политика денеска по повод Меѓународниот ден на волонтерството потпиша меморандум за соработка со Мировниот корпус Македонија.

Со Меморандумот се интензивира соработката со Мировниот корпус во делот на ангажирање волонтери со соодветно образование и искуство во работата со деца со попреченост во дневните центри, како и во организирањето на обуки за вработените и едукативни активности во градинките. 

Договорот го потпишаа министерот за труд и социјална политика Диме Спасов и директорката на Мировниот корпус во Македонија, Кејтлин Кори. 

- Со потпишувањето на овој меморандум и едните и другите ќе дадеме малку од себе, а ќе добиеме многу. Ќе добиеме непроценливо искуство кое може да се стекне само со заедничка работа, истакна министерот Спасов.

Спред него, волонтерите и волонтерството во секоја држава претставуваат огромен човечки потенцијал кој континуирано се мобилизира и кој поседува релевантно знаење и вештини корисни за заедницата.

- Тоа било и визијата на сенаторот кој воедно е и основач на Мировниот корпус Џон Кенеди во далечната 1961 година, кој им предложил на студентите да и служат на земјата, така што ќе живеат и ќе работат во други земји, залагајќи се за мирот и ќе разменуваат искуства, рече Спасов.

Директорката на Мировниот корпус Македонија најави зголемување на бројот на волонтери на годишно ниво.

- Нашите волонтери поминуваат две години работејќи со соработници, живеејќи во локални семејства-домаќини, и стануваат дел од локалната заедница. Повеќе од 500 волонтери имаат служено во Македонија и се очекува зголемување на бројот за 100 волонтери годишно, рече Кори.

Денешниот меморандум е продолжение на успешната соработка меѓу САД, Мировен Корпус како владина агенција и Владата на Република Македонија, кои во 1996 имаат склучено меѓудржавен договор.

Владата на последната седница донесе одлука за почнување постапка за изградба на когенеративна електрична централа за производство на струја и топлинска енергија, со цел снабдување на комплексот клиники „Мајка Тереза“ со електрична и топлинска енергија. Станува збор проект кој ќе се реализира во претстојниот период и кој се надоврзува на спроведената гасификација на комплексот клиники „Мајка Тереза“.

Ова денеска на прес-конференција го истакна министерот за здравство Никола Тодоров, кој рече дека со изградбата на постројката имаат направено проценка дека ќе се заштедат дополнителни 10 милиони денари годишно, кои, како и сите останати кои се остваруваат како резултат на заштеди, ќе бидат инвестирани во инфраструктура, нова опрема, односно за севкупно подобрување на функционирањето на здравствениот систем.

Со изградбата на когенеративната постројка, посочи министерот, комплексот клиники „Мајка Тереза“, ќе добие сопствен, независен извор на електрична и топлинска енергија, односно сами ќе си ја произведуваме електричната и топлинската енергија неопходна за функционирање на клиничкиот комплекс.

- Одлуката за почнување на постапката е донесена, се очекува да заврши во период од пет до шест месеци по што ќе почне изградбата на постојката која ќе биде сместена кај котларата. Когенеративната електрична централа ќе почне со работа во период од една година од сега. Неколку болници кои ги посетив во САД имаа токму ваков начин на користење електрична и топлинска енергија затоа што тој овозможува прво заштеда, е сопствен извор и е еколошки, рече Тодоров.

Појасни дека изградбата на когенераторската постројка ќе биде со воспоставување јавно-приватно партнерство, при што критериумот за доделување на договорот за ЈПП на приватен партнер ќе биде најниско понудена цена за топлинска енергија и електрична енергија испорачана од котлара/когенерација изразени во проценти од постојната цена.

Почетните цени што ќе бидат предмет на негативно наддавање, нагласи министерот, треба да бидат: за топлинска енергија испорачана од котлара/когенерација минимум 5 отсто пониска од сегашната цена од 4,01 денари за киловат час (утврдена врз основа на сегашните трошоци за производство на топлинска енергија), а за електричната енергија произведена и испорачана од когенеративната постројка за 5 отсто пониска од постојната цена од 6,33 ден. за киловат час која се плаќа на ЕВН, т.е. од цената која важи во моментот на производство (освен ако не дојде до промена на цената од страна на Регулаторната комисија).

- Ова значи дека доколку дојде намалување на цената во тој случај ќе плаќаме цена за електрична енергија за најмалку пет отсто пониска од новата намалена цена. Во наредниот период од 15 години во клиничкиот комплекс „Мајка Тереза“ ќе плаќаме за електрична или топлинска енергија најмалку пет отсто пониска цена од цената која ќе биде на пазарот. После истекот на периодот од 15 години когенеративната постројка треба да биде и претходно целосно ремонтирана и да биде предадена во сопственост на државата. На овој начин ќе се обезбедат околу 98 отсто од годишните потреби за електрична енергија, а многу мал дел (околу 2 отсто) ќе се набавува на пазарот на електрична енергија, истакна Тодоров.

Одговарајќи на новинарско прашање рече дека изградбата ќе чини 1,9 милиони евра, а оперирањето годишно на постројката ќе чини околу 2,5 милиони евра, посочи Тодоров.

Тој потенцира дека од ноември 2013 година клиничкиот комплекс „Мајка Тереза“ се затоплува на гас, а досега за целиот период (декември 2013 – ноември 2014) се евидентирани вкупни заштеди над 40,4 милиони денари. За споредба, укажа, во периодот од декември 2012 година до ноември 2013 година за затоплување со мазут се потрошени 125 милиони денари, а за периодот од декември 2013 година до ноември годинава за затоплување на гас се потрошени над 85 милиони денари.

- За месец јануари 2013 година за затоплување со мазут се потрошени речиси 20 милиони денари (19.940.081 денари), а во јануари годинава по извршената гасификација се потрошени над 14 милиони денари, со што заштедата изнесува над 5,5 милиони денари. За месец март ситуацијата е слична, и заштедата изнесува околу 5,5 милиони денари. За ноември заштедата е најголема и изнесува над 6,7 милиони денари, додаде министерот Тодоров.

Владата ќе го унапредува системот за превенција од насилство особено сторено со оружје, кое е во посед и на приватни и на службени лица. Формирана е работна група која треба да ги даде решенијата, а Владата на наредната седница да излезе со конретни решенија. 

Ова го соопшти денеска портпаролот на Владата на Република Македонија Александар Ѓорѓиев, кој истакна дека целта е да се оди чекор понапред во превенирање на ситуации каде може да се изврши насилство со употреба на оружје кое што се поседува од страна на едно службено лице, а кое што му е доделено согласно закон и согласно овластувањата што ги има за вршење на своите професионални задачи.

- Формирана е посебна работна група од страна на Владата во која се вклучени претставници на Министерството за внатрешни работи, Министерството за одбрана, Министерството за труд и социјална политика, Министерството за земјоделство, шумарство и водостопанство и останати институции кои во рок не подолг од една недела треба да изготват информација и да ја известат Владата околу можностите за креирање нова законска регулатива во оние институции каде што таа не пости или, пак, унапредување и квалитативно засилување на постоечката законска регулатива, рече Ѓорѓиев.

Појасни дека ќе се предвидат определени ситуации што ќе значат превенција од сторување насилство, односно оние службени лица кои во извршувањето на своите службени задачи по сила на закон имаат допир со оружје во случај доколку евентуално би биле пријавени дека се сомничат за определено дело кое што во себе содржи елемент на насилство во соодветна процедура да биде утврдено, да биде ограничена можноста за нивен допир со оружјето кое што службено го поседуваат и кое што го употребуваат во вршење на своите службени задачи.

Во информацијата што ја очекува Владата во период од една недела би требало да бидат разработени конкретно сите детали и модалитети во смисла кои законски акти би требало да бидат променети, надополнети, квалитативно засилени. Ќе се прецизира и кои подзаконски акти би требало да бидат разработени, да се предвиди соодветната постапка во определени ситуации како би дошло до ограничување на пристапот до оружје на едно службено лице кое би се сомничело за определено дело што вклучува елемент на насилство. Треба да бидат разработени и постапки во врска со оваа материја од страна на државната управа, на институциите или, пак, од страна на судската власт во смисла на предвидување на процедурата, на процесните дејствија со цел оневозможување допир со оружје од страна на едно службено лице за кое што постои сомнение дека е извршител, сторител, учесник во определено дело каде што има елемент на насилство.

Владата на Република Македонија на 25 овој месец организира Саем за вработување кој треба да овозможи да дојде до заедничка средба на рабодавaчите и лицата кои бараат работа можност за засновање работен однос. Досега се организирани саеми во четири градови, преку кои се вработени 160 лица.

- Саемот за вработување се состои од три содржински компоненти. Прво, тоа е можност да се оствари организирана средба на потенцијалните работници односно лицата кои активно бараат работа и работодавачите. Ќе бидат присутни голем број компании коишто на штандови ќе презентираат каков вид кадар им е потребен за вршење на нивната деловна активност, Од друга страна, сите лица кои активно бараат работа ќе може да остварат директен контакт и размена на информации и потребни податоци кои се од значење за креирање на работниот однос, ако можат уште веднаш да се договорат да засноваат работен однос или да создадат услови за продолжување на нивните контакти со цел во еден даден временски период да засноваат работен однос, рече на денешната прес-конференција портпаролот на Владата Александар Ѓорѓиев.

Во рамки на втората компонента која е дел од содржината на саемот ќе се организира форум со работодавачите на кој претставници на институциите ќе имаат средба со претставници на компаниите во регионот на Струмица и Струмичко за да ги чујат нивните идеи, визии, мислења и предлози во врска со креирањето на новиот Оперативен план за активни мерки за вработување кој треба да стартува во 2015 година, а на кој активно работат владините институции.

- Претставниците на компаниите можат да дадат предлози кои подоцна би можеле да бидат преточени во активни мерки и политика за вработување и финансиски би биле поддржани од страна на државата, а кои би воделе кон стимулација на вработувања на лица, информира Ѓорѓиев.

Третата компонента на саемот е организирање мотивациски обуки за лицата кои бараат работа. Обуките ќе ги организираат стручни лица. Оние кои бараат работа ќе можат да слушнат непосредни сведоштва, успешни примери на лица кои биле невработени, а искористиле оперативни мерки на Владата за засновање на работен однос, како и за проширување на бизнисот кој на таков начин бил креиран.

Своето учество на саемот досега го потврдиле педесеттина компании од овој регион од различен тип на дејност. Сите оние кои дополнително сакаат да го најават своето учество тоа може да го сторат преку интернет страницата на Агенцијата за вработување на Република Македонија, нејзините подрачни единици или централата во Скопје заклучно со утрешниот ден.

- Ги повикуваме лицата коишто се невработени и активно бараат работа, а се од овој регион, да дојдат на саемот, да ги увидат потребите кои ги имаат работодавците, да видат дали влегуваат во определена комбинација согласно кадарот кој им е потребен на компаниите, рече Ѓорѓиев.

На саемот може да присуствуваат и лица кои веќе се вработени, а кои ценат дека поседуваат одредени знаења, вештини и образование што може да придонесат тие да амбицираат за наоѓање друго работно место.

Саемот во Струмица ќе се одржи во Домот на културата од 11 до 14 часот.

Организирањето саеми за вработување започна пред околу 45 дена. Досега вакви саеми се организирани во Скопје, Неготино, Штип и Охрид. По организирањето на саемот во Струмица, Владата ќе организира саем и во Битола.

- Цениме дека досегашните саеми дадоа добри ефекти и позитивни резултати. Битно е да се истакне дека на ваков начин се остваруваат позитивни контакти меѓу работодавците и лицата кои бараат работа и дека доаѓа до основање на работни односи дали веднаш во рамки на траењето на саемот или понатаму со продолжување на комуникацијата во определен период, рече владиниот портпарол.

Досега, според податоците кои ги обработила Агенцијата за вработување, по одржаните саеми се вработени 160 лица. Се очекува, рече портпаролот Ѓорѓиев, со натамошната обработка на податоците овој број и натаму да расте.