Прес

Од денеска во наредните десет дена сите невработени лица ќе имаат можност да аплицираат за грант за самовработување преку отворање сопствен бизнис во висина од 4.000 евра.

Со оперативниот план за 2017 година со програмата за самовработување ќе бидат опфатени 1.050 невработени лица од евиденцијата на АВРМ, активни баратели на работа, во 1.000 новоотворени микро компании. Мерката се спроведува 11-та година по ред, а за годинава за неа се предвидени вкупно 283 милиони денари.

Програмата за самовработување вклучува обука за претприемништво, помош при развивање одржлив бизнис план и регистрирање дејност, неповратни грантови во форма на опрема и материјали и менторство за време на почнување на бизнисот.

- Оваа програма има за цел да го поттикне претприемништвото и да поддржи креирање почетни бизниси кои ќе обезбедат одржливи вработувања, не само за самите основачи, туку и за други лица кои ќе се вработат во овие почетни одржливи бизниси. Програмата поттикнува и создавање рамномерна дистрибуција на економските субјекти во земјава, истакна на денешната прес-конференција министерот за труд и социјална политика Ибрахим Ибрахими.

Потенцира дека ова е единаесетта по ред година во која се спроведува оваа програма и оти со неа се постигнува целта за зголемување на вработувањето, со оглед на тоа што, како што рече, 70 проценти од бизнисите успеваат да опстанат на пазарот и по неколку години, како и дека во дел од активните фирми има зголемување на бројот на вработени. Од 2007 до 2016 година, додаде Ибрахими, преку програмата основани се 8.730 фирми во кои се вработени 8.969 лица.

Директорот на Агенцијата за вработување на Република Македонија Влатко Поповски истакна дека годинава грантот изнесува 4.000 евра, што, како што нагласи, е зголемување за илјада евра во однос на изминатите години. На овој чекор, додаде Поповски, се одлучивме врз основ на направените анализи и консултациите со експертите и изготвувачите на бизнис-плановите.

Информира дека заинтересираните ќе можат да аплицираат за обука за пополнување на прашалниците и потоа да ги пополнат. Врз основа на тоа ќе добијат ваучер и еден експерт за изработка на бизнис план. Потоа бизнис планот ќе биде оценуван од експерти и доколку биде проценето дека е одржлив ќе добијат грант за отворање мал бизнис. 

Додаде дека ќе може да се аплицира и за дополнително работно место во компанијата за што, како што информира, ќе добиваат плус 92 илјади денари, а за тоа ќе се одлучува во октомври годинава.

Наведе дека деталните упатства и правилникот за можностите и условите за користење на мерката се јавно објавени и оти во неа е појаснето како се одвиваат процедурите од апликацијата до добивањето на средствата. 

Основното училиште „Кирил и Методиј“ во центарот на Скопје до мај-јуни годинава ќе добие училишна спортска сала. Во изградбата на училиштето, која почна на крајот на септември, вложени се 32 милиони денари од буџетот на Министерството за образование и наука.

По привремениот застој поради лошите временски услови, изградбата на објектот продолжи интензивно, а локацијата денеска ја посети и заменик-министерот за образование и наука Спиро Ристовски кој е задоволен од динамиката.

- Новата спортска сала интензивно се гради за потребите на најстарото училиште „Кирил и Методиј“, кое е основано пред 180 години. Станува збор за исклучително значајно училиште во центарот на градот, во кое долг период немаше речиси никаков објект за спортски активности. Се работи за капитален проект во вредност од 32 милиони денари. Очекуваме во мај, објективно јуни, оваа сала да биде предадена на училиштето, а од септември следната учебна година учениците ќе може своите часови по физичко воспитание да ги спроведуваат во модерен спортски објект, изјави Ристовски по увидот на градилиштето. 

Додаде дека ова училиште продолжува да биде во фокусот на МОН потсетувајќи дека во него (заедно со ОУ „Браќа Миладиновци“ во Аеродром) четврта учебна година се спроведува меѓународната ИБ-програма.

  Нови објекти на основните училишта „Вера Јоциќ“ и „Крсте Петков Мирирков“ ќе бидат изградени во следниот период. Во рамки на ОУ „Вера Јоциќ“ ќе биде изградена и модерна спортска сала, а набрзо ќе почне и градбата на новата спортска сала во рамки на ОУ „Св.Кирил и Методиј“ во село Стајковци во општина Гази Баба.

Станува збор за крупни капитални проекти кои ќе бидат реализирани во следниот период во рамки на Гази Баба, а за кои денеска на средба во просториите на општината разговараа заменик-министерот за образование и наука, Спиро Ристовски и градоначалникот Тони Трајковски.

- Со градоначалникот и со останатите претставници на општината го разгледавме прогресот на проектите кои се поврзани со ресорот образование, а се однесуваат на подобрување на целокупната образовна инфраструктура на територијата на општина Гази Баба. Едно од најголемите барања на жителите на општина Гази Баба поточно на населбата Хиподром беше изградбата на нов училишен објект во ОУ „Вера Јоциќ“, кој е во дотрајана состојба. Станува збор за постар објект кој неколку пати е саниран. Како Влада и како Министерство преземавме обврска пред извесно време да ги започнеме сите активности, изјави Ристовски.

За конкретното училиште, посочи, распишан е јавен повик односно тендер, се очекува до 14 март да пристигнат понудите по однос на негова изградба, а потоа би следела нивна евалуација и изборот на компанија која ќе го гради.

Ристовски истакна дека очекува до почетокот на мај да почнат градежните активности за изградба на комплетно ново училиште за 600 ученици.

- Училиштето е проектирано да биде изградено на површина од повеќе од 2100 м2. Со оглед на проектираните вредности кои досега ги имаме реализирано, некаде меѓу 70 милиони денари и 80 милиони денари се очекува да биде оваа инвестиција. На целокупната територија на Гази Баба ќе следат уште три крупни проекти. Вториот, кој директно е поврзан со ОУ Вера Јоциќ е модерната спортска сала која ќе биде изградена во рамки на новото училиште. Но, прво треба да се заврши комплетната изградба на новиот училишен објект, па потоа спортската сала, потенцира Ристовски.

Тој го истакна и новиот училишен објект кој во следниот период ќе биде објавен, а станува збор за ОУ Крсте Петкови Мисирков, како и почнувањето со градба на новата спортска сала во рамки на ОУ „Св.Кирил и Методиј“ во село Стајковци во општина Гази Баба.

Додаде дека на тој начин само потврдуваат како Министерство и како Влада дека ги одржуваат нивните верувања во пресрет на интересите на граѓаните, а најави дека така ќе продолжат и во следниот период.

Градоначалникот Трајковски рече дека на средбата со Ристовски разговарале за инвестициите кои во следниот период следат на територија на општината Гази Баба. 

Се заблагодари на МОН и на Владата, затоа што, како што рече, неколкуте нивни најголеми барања досега што биле во делот на образованието, како што се изградба на ново ОУ „Вера Јоциќ“ и ново ОУ „Крсте Петков Мисирков“ и двете спортски сали биле приоритетни проекти за жителите во општина Гази Баба. 

- Верувам дека со завршување на тендерската постапка набрзо ќе започнеме да го градиме новото ОУ „Вера Јоциќ“. Паралелно со тоа разговаравме и со директорката наставно-образовниот процес да тече континуирано, значи дечињата да немаат прекин на настава или преселување во друг објект. Значи во рамките на постоечкото училиште имаме доволно простор. Каде што се наоѓа спортското игралиште ќе се гради новото училиште, а дечињата ќе си учат и образовниот процес ќе продолжи во постоечкиот објект додека се изгради новиот објект, рече Трајковски.

Посочи дека разговарале и за тековно инвестициските активности кои ги имаат заедно со МОН, заедно со директорите од основните училишта.

- Работиме на санација и реконструкција и на останатите училишта. Во текот на зимскиот распуст имавме активност во сите училишта и беа инвестирани околу шест милиони денари за нивна санација и реконструкција. Деновиве се распишаа тендерите и се избраа фирми за дополнителни реконструкции и санации на училиштата кои следат во следниот период. Планирана е вредност од околу 10 милиони денари кои во следниот период до крајот на учебната година треба да се инвестираат во основните училишта, истакна Трајковски.

Во овој дел од годината, потенцира, посебен акцент ставаме на енергетската ефикасност на училиштата. Нагласи дека како општина сакаат да влијаат на намалување на загадувањето на животната средина.

- Во неколку училишта планирана е замена на постоечките котелски постројки којшто се со нафта, со котли на пелети. Дел од котелската постројка во ОУ „Дане Крапчев“ се замени, сега тече постапката за избор на фирми кои ќе направат реконструкција и замена на котелските постројки во училиштето во Странчинци и во ОУ „25 Мај“, додаде Трајковски.

Министерот за труд и социјална политика, Ибрахим Ибрахими и градоначалникот на општина Ѓорче Петров, Сокол Митровски денеска ја посетија новата занимална (доградба) во објектот „Детелинка“ во општината Ѓорче Петров.

- Ова е еден нов дел од објектот кој пред извесно време беше пуштен за да видиме какви се условите за децата. Се што се гради е квалитетно и се повеќе ги подобруваме условите за престој на децата во предучилишно образование и воспитание. Работиме на зголемување на капацитетите во делот на предучилишното образование. Како Министерство во изминатиот период направивме огромен исчекор во делот на зголемување на капацитетите од нула до 6 години, од 9 проценти опфат на децата во 2006 година достигнавме до 26 проценти во 2016 година, изјави Ибрахими.

Посочи дека од нула до три години од 12 проценти опфатот на децата во 2016 година достигнал 40 проценти. Тука, нагласи, не застануваме, нашата интенција е и со проектот „140 градинки“ да се доближиме до оној европски просек од 90 проценти опфат на децата, но сепак за тоа треба време.

Министерот Ибрахими изрази надеж дека политичките услови ќе дозволат да го реализираат проектот „140 градинки“ за да покажат дека навистина се посветени во делот на подобрување на условите и зголемување на капацитетите во предучилишното образование во Република Македонија.

Градоначалникот на општина Ѓорче Петров, Сокол Митровски рече дека „Детелинка“ е само еден од објектите каде се згрижуваат 30 деца. Пред два месеци, потенцира, пуштивме една градинка во општината Ѓорче Петров каде се згрижија 150 деца во состав на училиштето „Ѓорче Петров“.

- Во втората половина на минатата година ја пуштивме градинката „Рипчиња“. За еден краток период од седум осум месеци капацитетите се зголемија за околу 250 деца, што е импозантна бројка. Таа бројка не ги задоволува потребите на граѓаните на општината Ѓорче Петров. Како што најави министерот во наредниот период општината ќе отпочне со изградба на други градинки посебно таму каде наталитетот е поголем, а тоа е во руралниот дел. Многу скоро ќе почнеме со изградба на градинка во реонот на селото Волково, истакна Митровски. 

Најавени се, посочи, две градинки во општината Ѓорче Петров, а со сопствени средства ќе изградиме уште две.

- Значи овие четири нови градинки ќе дадат придонес да се згрижат поголем број деца. Околу 650 деца чекаат да ги згрижиме, додаде Митровски. 

Дополнителни 10 милиони евра се обезбедени за малите и средните претпријатија (МСП) преку Платформата за развој на претпријатија и иновации во Западен Балкан, соопшти попладнево вицепремиерот Владимир Пешевски.

Станува збор за кредити со максимален износ од 500 илјади евра кои компаниите може да ги подигнуваат по исклучително поволни услови, односно со обезбедување 30 до 60 отсто помала гаранција во однос на стандардните. Ќе се реализираат преку ПроКредит банка. Рочноста е 10 години, а каматната стапка е пониска за 0,25 отсто.

Како што напомена Пешевски, кредитите се наменети исклучиво за мали и средни претрпијатија, ќе овозможат нивен развој и отворање нови работни места. 

- Убеден сум дека голем број мали и средни претпријатија ќе го увидат бенефитот од овој инструмент, изразен преку прилив на потребните финансиски средства што би ги инвестирале во развој на технологии, поквалитетни производи и услуги и поголема конкурентност не само на локално, туку и на регионално и пошироко ниво, истакна вицепремиерот.

Според менаџерот на Европскиот инвестициски фонд Хуберт Котоњи, анализата на пазарот покажала дека токму МСП имаат најголема потреба од кредити, со фокус на бизнис и иновации.

- Овозможуваме портфолио кое предвидува покривање на загубите до 70 отсто кои евентуално би настанале кај МСП. Оваа гаранција е бесплатна. Практично, ние во голем дел го преземаме ризикот на малите и средните компании. Тоа им ја олеснува работата. Од нив нема да се бараат толку големи гаранции за земање на кредитот. Со ова очекуваме значително да придонесеме за нивниот раст и развој, напомена Котоњи.

Емилија Спировска од Управниот одбор на ПроКредит банка потенцира дека кредитите се особено поволни за развојно ориентираните фирми, со брз раст, што подразбира и отворање нови работни места. 

- Обезбедувањето кое се бара е 30 до 60 отсто помало од она во стандардните услови, но и каматната стапка ќе биде пониска за 0,25 процентни поени. Фокусирани сме на компании со најмногу 250 вработени. Максималниот износ на кредитите е 500 илјади евра, истакна Спировска, додсавајќи дека овој инструмент не е добар само за компаниите, туку и за македонската економија воопшто зашто средствата се користат за долгорочни инвестиции.

Договорот за користење на овој финансиски инструмент е потпишан пред околу три недели. Како што нагласија Пешевски и Спировска, компаниите покажаа голем интерес со оглед дека за десет компании се веќе во обработка околу два милиони евра. 

ЈП Македонски Шуми и HOLZ-Consulting s.r.o. Slovakia денеска потпишаа меморандум за соработка.

Станува збор за нова инвестиција во изградба на Фабрика за производство на дрвени пелети и брикети за извоз и мал дел за домашен пазар како и производство на печки и грејни тела на пелети.

Македонски шуми се обврзува да и обезбеди на компанијата услови за градење на фабрика, а планираната инвестиција е во висина од 10 милиони евра и 500 вработувања во прва фаза.

Во фабрика првично пелетите ќе се прават од земјоделски отпад и суровина.

-Оваа година започнуваме со процес на реформи во рамки на производството на Македонски шуми и ориентирање кон производство на пелети и брикети, односно користење на био маса во процесот на создавање на топлотна енергија. Со нас денеска се присутни претставниците од Словачка од фирмата HOLZ-Consulting која со потпишувањето на овој меморандум  изразува и волја и цврста желба за соработка во полето на произведување на пелети во Македоија, изјави при потпишувањето директорот на ЈП Македонски шуми, Жарко Караџовски.

Тој потенцираша дека со потпишување на овој договор Македонски шуми се обврзува да им обезбеди потребна суровина како и секоја потребна логистичка потреба во рамките на отпочнување на процес на изградба на фабриката која ќе произведува пелети.

-Станува збор првично за пелети кои ќе се користат примарно од шумскиот и земјоделскиот отпад, а досега целиот тој отпат никаде не се користеше. Дополнително компанијата покрај тоа што ќе произведува пелети, ќе има и своја лична дистрибутивна мрежа каде што на корисниците на пелети ќе им бидат доставувани пелетите до дома, што е пракса во сите држави кои користат пелети како извор на енергенс, односно за загревање. Засега се селектирани две локации каде што е планирано производството на оваа фабрика и едно од најважните работи е таа да биде во близина на коридорот 10 и блиску до железница, тоа е важно бидејќи суровината треба да биде дистрибуирана од САД и Украина и ова производство се очекува да биде два пати поголемо од она што сега се произведува и би требало да има количини за да ги задоволи потребите на сите граѓани во Македонија, вели заменик министер за економија Христијан Делев.

Со ова изградба на фабриката Македонски шуми очекува да ја зголеми потрошувачката на продажба на пелети, а да ја намали продажбата на огревно дрво се со цел да се постигне двоен ефект, заштита на животната средина средина, а од друга страна да се обогати шумскиот фонт.

Три милиони евра ќе вложи Македонија во опрема за брзо детектирање и најавување на временските неприлики, соопшти денеска министерот за земјоделство, шумарство и водостопанство Михаил Цветков.

Проектот веќе се подготвува, а целта е да обезбеди капацитет за обработка на огромен број информации кои треба да дадат што поточна прогноза. 

- Таква опрема е неопходна за да можеме да собереме, а потоа и да обработиме, куп информации кои прецизно ќе ни кажат во кој правец се движат временските појави, што точно ќе се случува, што можеме да очекуваме и врз основа на тоа да преземеме соодветни мерки, изјави Цветков пред меѓународната конференција што ја организира УХМР.

Во тек е и набавка на ултра модерен компјутер кој, како што дополни дректорот на УХМР Оливер Ромевски, треба да пристигне во март годинава.

- Гледаме да ги направиме сите можни бај-пасови, а имаме план да се осовремениме во целост, почнувајќи од радари, за да бидеме конзистентни во се она што го даваме како информација, потенцира Ромевски.

Македонија ќе биде и дел од заедничкиот хидрометеоролошки софтвер на земјите во регионот. Овој т.н. Систем за рано предупредување и известување за повеќе опасни појави во ЈИЕ (SEE-MHEWS-A) е всушност платформа на која, како што напоменаа Цветков и Ромевски, метеоролозите ќе ги идентификуваат потенцијално опасните појави и нивното влијание, особено ако тие засегаат повеќе земји. 

- Земјите од регионот паралелно ќе ги следат временските појави за што побрзо и подобро детектирање, превенција и справување со непогодите. Притоа, ако хидрометеоролошкиот сервис на некоја држава нема можност да увиди одредени девијации во временските услови посебно во лето кога детектирањето е потешко, ќе се фузионираат информациите од други земји кои имаат пософистицирана опрема и кои можат да ја забележат потенцијалната појава, објасни Ромевски.

Системот, додаде, ќе обезбеди ефективни и тестирани алатки за прогнозирање опасни временски појави, како и евентуални можни влијанија преку единствена виртуелна платформа. 

- Проектот е во насока на натамошно развивање на капацитетите во метеоролошкото и хидролошкото прогнозирање, како и во издавањето предупредувања за екстремни случувања, а е од суштинска важност за националните хидрометеоролошки служби од ЈИЕ. Во однос на временските услови, Македонија е безначаен фактор, премногу е мала територијално, а процесите се одвиваат на многу широк простор. Затоа не можете да се базирате на еден сервис, мора да имате соработка, подвлече Ромевски.

Одговорајќи на новинарски прашања во врска со ланските поплави во Скопско и Тетовско, директорот на УХМР посочи дека тие биле предвидени и соодветно пријавени. И министерот Цветков се надоврза, истакнувајќи дека временските неприлики може да се предвидат, но не може да се предвиди нивниот обем.

- Катастрофалната поплава лани беше предвидена. Најава имаше на 3 август. Поплавите се предвидливи, но не и нивниот обем зашто се работи за временски услови. Да можел некој да каже, тогаш немало да има поплави ни во Германија, Австрија, Хрватска,... Можеме да помогнеме во предвидувањето на временските непогоди, но тие не може да не се случат, потенцира Ромевски, повикувајќи се на ставот на претседателот на Светската метеоролошка организација Иван Дачиќ.

Според директорот на УХМР, се работи за многу брзи реакции и промени на временските услови кои може да се видат, но како ќе се развиваат кога ќе почнат е малку поспецифично да се одреди.

Цветков повтори дека за успешно справување со ризиците е неопходно инвестирање во современи и напредни технологии. - Навременото информирање за евентуални катастрофи, што може да се случат, не е важно само за земјоделците, туку и за сите граѓани, воопшто. Треба да ги предвидиме временските прилики, но не можеме да ги спречиме. Можеме да се повлечеме навреме или нешто друго да сториме, но катаклизмите не можеме да ги спречиме. Сепак е многу важно да ги имаме информациите што побрзо, истакна министерот.

Меѓународната конференција ќе се одржува три дена, до 9 февруари. Се организира во соработка со Светската метеоролошка организација и УСАИД како дел од проектот „Зајакнување на системот за рано предупредување на временски и хидролошки непогоди во регионот на Југоисточна Европа“. 

Присуствуваат експерти од преку 20 земји, меѓу кои британски, шведски, руски, кинески,.., како и претставници од Светската метеоролошка  организација и други европски организации од областа на метеорологијата и хидрологијата. 

Етапна реконструкција на студентскиот дом „Гоце Делчев“ во Скопје, целосно нов мебел за сите 10 државни студентски домови и набавка на перални и сушални во студентските домови. Ова се три капитални инвестиции кои ќе бидат реализирани годинава, најави на денешната прес-конференција заменик-министерот за образование и наука Спиро Ристовски. 

Тој потсети дека овие инвестиции ги најавиле во изминатиот период и додаде оти се дел од владините планови и активности за унапредување на студентскиот стандард. 

- Првата инвестиција се однесува на етапна реконструкција на најголемиот студентскиот дом во државата „Гоце Делчев“ во Скопје, објект во кој досега целосно го реконструиравме и опремивме во блокот Б, додека во блокот А целосно се завршени градежните активности. Досега се инвестирани 180 милиони евра во овие два блока, рече Ристовски.

Следната фаза, како што рече, предвидува реконструкција на блоковите В и Г, за што на интернет страницата на Бирото за јавни набавки веќе објавивме постапка за јавно прибирање понуди кое ќе трае заклучно со 15 февруари, по што ќе следи евалуација и избор на најповолниот понудувач. 

Заменик-министерот информира дека и за овие два блока е предвидено да бидат инвестирани околу 180 милони денари, односно 3 милиони евра. Со проектот комплетно ќе бидат променети вратите, прозорците, подовите, електричната и водоводна инсталација, системот за парно греење, ќе има молерисување на ѕидовите и нова опрема во сите соби. Целата реконструкција ќе заврши кон крајот на годината или на почетокот на следната.

Набавката на нов мебел за сите десет државни студентски домови, Ристовски соопшти дека ќе биде заокружена за три месеци отсега. 

- Очекуваме до крајот на април сите државни студентски домови да бидат опремени со нови кревети, душеци, маси, столчиња, бироа и плакари. Веќе е избрана компанија која достави најповолна понуда на тендерот, потпишавме договор за реализација и почнаа подготвителните активности, односно посети по студентските домови за земање мерки за изработка на мебел, рече Ристовски. Додаде дека ќе бидат инвестирани 100 милиони денари, а најпрво ќе бидат опремени домовите во главниот град поради најголемиот број на студенти и нивната фреквенцијата, а потоа останатите домови во Македонија.  

Третата инвестиција е набавката на перални и сушални за студентските домови, која ќе биде реализирана во првиот квартал на 2017 година. Инвестицијата е вредна 11 милиони денари и вклучува набавка на 50 професионални машини за перење и 50 професионални машини за сушење со капацитет до 10 килограми, кои ќе работат на систем на жетони. За нивната употреба се изготвува и посебен правилник. 

- Постапката за избор на најповолен понудувач кој се јави на тендерот веќе е завршена и е склучен договор за реализација. Во меѓувреме домовите стратуваа со прилагодување на просториите и со интервенции во делот на водоводната и електричната мрежа заради приклучување на пералните и сушалните, рече Ристовски и додаде дека очекуваниот период за реализација на оваа инвестиција е 45 дена. 

Тој потенцира дека досега во унапредување на студентските и сместувачки капацитети инвестирале околу 350 милиони денари. Потсети дека донеле одлука за изградба на три целосно нови студентски домови, два од нив во Скопје, на местото на поранешниот Медицинар и еден во Тетово за потребите на тамошниот државен универзитет. Избрани се компании кои, како што рече, во најбрзо време ќе почнат со градежните активности по официјализирањето на дозволите за градба. За третиот студентски дом кој ќе биде лоциран во Скопје, се подготвува проектната програма. 

Одговарајќи на новинарско прашање за признавањето на дипломите меѓу Турција и Македонија, Ристовски рече дека на барање на Турција, договорот потпишан меѓу двете држави во 1997 година престанува да важи.

- Со барање да се инкорпорираат одредбите од Лисабонската декларација. Ние сме во комуникација со Република Турција по однос на нивната иницијатива, рече Ристовски. 

Нов апарат за магнетна резонанца ќе набави Здравствен дом Скопје. Апаратот ќе биде инсталиран во Поликлиниката Чаир.

Ова денеска на средба го договорија вицепремиерот и министер за здравство Никола Тодоров и менаџментот на Здравствен дом Скопје.

- Со набавката на апарат за магнетна резонанца сериозно ќе се подигне нивото на целиот Здравствен дом, имајќи предвид дека се набави и апарат за компјутерска томографија, кој е веќе ставен во функција. Со набавка на апарат за магнетна резонанца комплетно се заокружува високо ниво на дијагностика во Здравствен дом Скопје, изјави Тодоров. 

Со набавката на апарат за магнетна резонанца, посочи, ќе се овозможи доближување на оваа услуга до сите на кои тоа им е потребно, а особено имајќи предвид дека ќе стане збор за петти апарат за магнетна резонанца во градот Скопје или осми на ниво на Република Македонија.

Потенцира дека два апарати за магнетна резонанца има во Клиничкиот центар, еден во ГОБ „8 Септември“ и еден во Клиниката по хирушки болести „Св.Наум Охридски“.

- Процедурата ќе биде започната веднаш. Се очекува некаде до средината на оваа година да се заврши процедурата за набавка, потоа до крајот на годината или почетокот на наредната година да биде испорачан апаратот за магнетна резонанца, а потоа и да биде ставен во функција, рече Тодоров.

Здравствениот дом Скопје, нагласи, се повеќе станува чувар на портите и на терциерното здравство, но и на секундарното болничко здравство во Скопје. Посочи дека само минатата година се воведени нови седум методи за кои се дадени над 7.000 услуги. Според него, оваа бројка сериозно ќе се зголемува наредната година, имајќи предвид дека некои од тие методи се воведени на почетокот на годината, некои на средината, а некои на крајот на минатата година.

- Тоа значи дека овој број пациенти наместо да бидат упатени од Здравствен дом Скопје на друго повисоко ниво на здравствена заштита или во ГОБ „8 Септември“ или на Клиника таа услуга за тие нови методи ги добиле тука во Здравствениот дом Скопје, истакна Тодоров. 

Тој рече дека на средбата со менаџметот на Здравствен дом Скопје разговарале и за кадарот. Здравствен дом Скопје, потенцира Тодоров, сериозно го зајакнавме со нови специјализации, со нови вработувања, но и преземање специјалисти од приватно во јавно здравство.

- Како резултат на тоа се отворија многу нови специјалистички кабинети или се овозможи работење на специјалистичките кабинети и во втора смена со што сериозно се зголеми и бројот на услуги кои се даваат на специјалистичко ниво. Генерално можам да заклучам дека со набавката на нови и најсовремени апарати, со нови специјализации и вработувања се овозможи континуирано зголемување на бројот на услуги кои се даваат во Здравствениот дом Скопје, нагласи Тодоров.

Додаде дека за Здравствениот дом Скопје се планираат и уште неколку круцијални проекти кои, како што појасни, уште повеќе ќе го устоличат како еден од сериозните стожери во Скопје, но и на здравството во Македонија.

Тој им честиташе на менаџментот и на сите вработени во Здравствениот дом Скопје за успешната работа и континуираниот развој на оваа сериозно значајна здравствена институција во Република Македонија.

Директорката на Здравствениот дом Скопје, Татјана Баевска Вучковиќ рече дека апаратот за магнетна резонанца од медицински аспект претставува врв во дијагностиката кој дава најдобар приказ, визуелизација на дефинитивна и детална слика на внатрешни органи и меки ткива, неинвазивна, безболна метода, која употребува нејонизирачко зрачење и е предност во однос на сите други дијагностики во радиодијагностиката бидејќи, како што појасни, може неколку пати да се повторува снимањето и дава прецизна детекција на малигни заболувања и соодветен приказ на проширување на одредено малигно заболување.

Во однос на дијагностиката, посочи дека ги следат трендовите и сето она што може да се доближи на секундарно ниво посебно со отворање нови кабинети посебно во најдисталните поликлиники. Истакна дека во сите овие неколку години со доближување на здравствената услуга кон местото на живеење, влијаат и на квалитетот на живот на секој нивен корисник.

- Од 2012 година се отворени 26 специјалистички кабинети од кои само десет во Поликлиниката Драчево како најдистална поликлиника, а сето тоа овозможено со едукација, преземање на 34 специјалисти од ПЗУ во ЈЗУ. Го следиме трендот на доближивање на услугите и системска рационализација во сегментот на примарна, секундарна и терциерна здравствена заштита и во 2016 година имаме 2.200 пациенти помалку упатени на терциерно ниво во однос 2015 година. Сето тоа ја дава онаа слика на сериозно зајакнување на ресурсите и на капацитетите на институцијата, рече  Баевска Вучковиќ.

Појасни дека кабинетот за магнетна резонанца се планира да биде инсталиран во Поликлиниката Чаир, каде ќе опфаќа пет општини кои гравитираат околу оваа поликлиника, но и сите останати од градот ќе можат да ја добиваат оваа услуга.

- Само од овие пет општини од 200.000 до 250.000 граѓани ќе можат да ја добиваат оваа услуга на секундарно ниво, рече  Баевска Вучковиќ и додаде дека околу еден милион денари се планирани за адаптација на просторот во Поликлиниката Чаир, каде што порано имаше Центар за дијализа.

Како партија го овластивме претседателот Никола Груевски да ги води разговорите за состав на новата влада. Во моментот не сакам да прејудицирам било што околу преговорите кои се во тек. Рокот го знаеме и секако дека ќе мора да има одреден епилог, изјави денеска премиерот Емил Димитриев.

Одговарајќи на новинарски прашања по посетата на новоотворената градинка во општина Аеродром, премиерот Димитриев рече дека е логично победник со победник да ја составуваат новата влада.  

Димитриев очекува дека ќе се надмине кризата и оти по формирањето на новата влада ќе почне реализацијата на проектите коишто се од интерес за граѓаните.

- Како и сите граѓани, очекувам да ја надминеме кризата. На никого не му е во прилог тензична состојба во која институциите се во грч, а граѓаните во неизвесност. Очекувам сето тоа да се релаксира со формирањето на новата влада бидејќи постојат многу потреби коишто треба да бидат реализирани за граѓаните, а кои се дел од програмата со која победивме, истакна претседателот на Владата Емил Димитриев.