Прес

Пр. 1: Дали ќе одговорите на повикот на опозицијата да го декласифицирате договорот за добрососедски односи со Бугарија, и како ја коментирате изјавата на министерката за надворешни работи на Бугарија, Захариева?

Зоран Заев:  Договорот со Бугарија отвара сериозни перспективи за Македонија. Во самиот договор Македонија има големи придобивки. Договорот ќе биде склучен и конечен кога ќе го ратификува парламентот. Сè претходно е процедура којашто се спроведува согласно законите и позитивната политичка волја. Првиот дел на процедурата беше затворена седница на Комисијата за надворешни работи при парламентот, зашто така налага Виенската конвенција. Нешто што не е потпишано треба внатрешно, на затворена сесија, да се дискутира. Преминуваме во следна фаза на дискусија во Владата. Кога ќе се финализира договорот согласно сите сугестии што ги добиваме од експертската јавност, од парламентот, од владата, се надевам ќе дојде до склучување на договорот. Тоа зависи од двете страни, ние нашите позиции ги градиме. Но, дури и потписот на Заев е дел од процедурата која што тече. Договорот се носи од парламентот. Парламентот гласа. Ако е нешто на штета на Македонија, парламентот има одговорност директно пред граѓаните и да не се плашиме, тој парламент нема да гласа. Ако е нешто добро за Република Макеоднија парламентот ќе гласа. Сакам да знаете дека јас, како упатен политичар којшто и понатаму бара поддршка од граѓаните, нема да дозволам влакно да ѝ фали на Македонија во нејзините перспективи.

Договорот е севкупен бенефит за сите наши граѓани, затворање на едно поглавје што беше проблематично, во најава на една влада којашто сака да решава проблеми и да отвора перспективи за граѓаните. Јас сум радосен што седевме и власт и опозиција, и Македонци и Албанци и Турци и Роми, сите заедно дебатираме за нешто што е од национален интерес.

Тоа само по себе е придобивка и се надевам дека сите ќе го поддржиме договорот, гледајќи од аспектот дали чашата е полуполна или полупразна. Ај да почнеме да ја гледам чашата полуполна, и со млаку повеќе храброст и лидерство да ги водиме граѓаните, и парламентот и владата и сите заедно.

Од тој аспект ако ги гледаме работите, чувајќи ја нашата национална посебност, нашиот идентитет, нашето чувство дека сме ние различни од сите, со храбри чекори ќе ги отвориме перспективите на сегашните генерации и на тие што доаѓаат после нас.

Пр. 2: Дали ќе ги примите родителите на децата со посебни потреби од здружението „5 до 12“?

Мила Царовска: Иницијативата „5 до12“ е партнер на министерството за труд и социјална политика, а беше партнер и претходно кога ја креиравме програмата. Јас сум во секојдневна комуникација со нив и токму пред да дојдам во Штип бев да ги посетам нив во кампот. Поразговарав и со лидерите, но и со сите други кои беа присутни таму. Она коешто го разговаравме и коешто јас го дадов како изјава пред токму еден месец, е преточено во законски текст и тоа е фактичка состојба. Текстот е јавно објавен, доставен е и до нив, тие се членови на работната група. Многу е важно да знаете дека ние секој ден работиме за унапредување на правата на лицата со попреченост. Во моментов се гради центар за поддршка на дечиња со Даунов синдром. Во законот предвидуваме персонална асистенција, нешто што до сега во закон никогаш не било предвидено. Ние не можеме утре да имаме персонални асистенти ако немаме законски основ и ако немаме стандарди и протоколи во однос на персонална асистенција. Тука е мерката што им ја нудиме сега, а тоа е посебниот додаток да премине во додаток за туѓа нега, директно без да поднесуваат барања. Исто така и посебниот додаток го отстрануваме како бариера така што секоја година нема да мора да поднесуваат соодветна документација, сето тоа е олеснување на родителите. Дополнително со Министерството за здравство комуницираме за тоа конзилијарното мислење за туѓа нега се укине. Со тоа се штедат сретства на секое семејство, но исто така и шетањето од институција во институција. Навистина сметам дека многу направивме во овој месец, и тие се партнери, секој ден сме во комуникација, и навистина не гледам пречка и понатаму тоа да остане така. Да направиме најдобри промени во интерес на децата и лицата со попреченост.

Пр. 3: Министерке околу стратегијата за бегалци имаше критики овие денови. Дали е точно дека Македонија ќе прими 150 000 до 200 000 бегалци?

Мила Царовска:  Македонија се декларираше и останува на ставот дека е транзит земја за мигрантите коишто се движат по нивната рута. Многу е важно да знаете дека Македонија ја ратификувала конвенцијата за бегалци во 1994 година. Во 2007 и во 2010 година имавме промена на законот за здравствено осигурување и социјална заштита со што се регулираат правата на бегалците во Македонија и оние коишто се баратели на азил. Исто така во 2009 година е донесена првата национална стратегија за заштита на бегалците и нивните права што се однесуваат на домување интеграција, образование на бегалците. Значи, тоа е стратегијата 2009-2015 година.

Ова е само документ којшто ние, во духот на транспарентноста на новата влада го објавуваме на веб страната со цел граѓаните, здруженијата на граѓани, меѓународната заедница, да дадат придонес и да го коментираат за позитивни насоки. Овој документ мора да го има Македонија како сериозна држава која што ратификувала конвенции и има законски основи за донесување на оваа стратегија како продолжение на предходниот документ, да биде најдобро што може. Секако, значи, никакво вклучување и обезбедување на домување на 150 000 мигранти нема во овој момент и ве молам, ние целосно стоиме зад тој документ дека тоа е само стратешка позиција на Македонија во делот на мигрантите којшто мора да имаат обезбедено права согласно меѓународни документи.

Зоран Заев: Дозволете само да дополнам. Во основа на тоа прашање, министерката е стручна и таа ја тера таа тема. Бегалците транзитираат низ Македонија. Но, кога транзитираат не можете да немате законска основа за да му помогнете на детенцето на кое што му треба помош, на мајката, на родителот, на таткото. Македонија потпишала меѓунаросни конвенции и мора да се држиме до нив во делот на хуманоста и солидарноста. Самиот факт дека бегалците транзитираат низ Македонија покажува дека е лага секоја шпекулација што вели дека Македонија донела декларација за да може да апсорбира бегалци. Бегалците транзитираат низ Македонија. 

Предмет на денешната прес конференција е Самитот во Трст кој е континуитет на Берлинскиот процес, првично инициран од страна на германската влада и канцеларката Ангела Меркел, како процес којшто треба да им овозможи и олесни на земјите од Западен Балкан полесно да пристапат кон Европската Унија и да ги водат процесите за пристапување на еден транспарентен и соодветен начин.

Она што можам да го кажам дека владината делегација предводена од премиерот, е исклучително задоволна од постигнатото на вчерашниот Самит и дека Македонија е најголемиот добитник од вчерашниот Самит. Тоа само го покажува фактот дека се препознаени реформските процеси на владата, дека е препознаен новиот дух на владата, која има за цел практично да ги имплементира сите процедури и сите потребни чекори за побрзо и полесно пристапување кон Европската унија, а со самото тоа и пристап до фондовите на Европската Унија, што е особено значајно за живеењето на граѓаните на Република Македонија.

Главната поента, иако слушавме различни бројки минатите денови, е дека од вкупниот грант кој што е доделен за шест земји од Западен Балкан, изнесува 194 милиони евра, Македонија доби 70 милиони евра. Што значи дека, од вкупните пари, 40 отсто се грант за Република Македонија, иако таа е само една од 6-те земји, иако по број на жители е една од помалите земји. Што значи дека, ако одиме по жител, Македонија е навстина победник во оваа фаза од поддршката на Берлинскиот процес и од Самитот во Трст на земјите од Западен Балкан.

Кога зборуваме за 70 милиони евра, мораме јасно и прецизно да кажеме дека тоа е грант, односно, неповратни пари, или директна помош на Европската Унија за граѓаните на Република Македонија.

Ние како Влада длабоко го почитуваме и го цениме тоа. Мораме да кажеме и дека ја чувствуваме како голема обврска оваа помош за да бидеме навистина реформски ориентирани. Не само поради потребите за пристапување кон Европската Унија, туку реформски ориентирани и за да го подобриме животот на секој граѓанин на нашата земја.

Сумата со која ќе бидат поддржани вкупниот број проекти што се номинирани на овој Самит, е над милијарда евра, како што кажа и комесарот Хан. Ние зборуваме само за 194 милиони евра издвоени како неповратен грант, од кои 70 милиони евра завршуваат во Македонија. Значи мораме да ги разделиме бројките, да биде пластично и јасно за сите граѓани во Македонија.

Значи проектите кои ние ги номиниравме, тие ќе бидат поддржани со многу поголеми по износи, но 70 милиони евра, се само грант, односно неповратни средства.

Овој грант е добиен за делот на пругата кон Бугарија, што е од исклучителна важност. Како Влада, а со тоа се согласува и Европската Унија, сметаме дека нашето поврзување со Коридорот 8, односно, врската помеѓу Македонија, Бугарија и Албанија е од огромно значење. Вие знаете дека по должината на коридорот 10 имаме доста развиена мрежа, но делницата исток-запад не е така развиена. Денес, ако сакате да тргнете и да стигнете до Софија или до Тирана, иако се тоа само делници од 200 – 250 километри, ви требаат повеќе од 4 часа, што е недозволиво.

Тоа мораме да го промениме. Прво за да го ослободиме движењето на граѓаните, да ослободиме движење на производи и друга стока за да може целото стопанство поефикасно да функционира и работи, и притоа да биде поврзано на две мориња. Како што знаете, тоа е еден исклучително значаен и стратешки коридор.

Практично преку поддршката на овој проект, Европската Унија, и ние како влада со тоа се согласуваме, сака да прати порака дека ние како земји на Балканот мора да бидеме подобро поврзани меѓу себе, повеќе да соработуваме, и тоа со сите наши соседи, преку развивањето на инфраструктурата која што треба да овозможи полесно да комуницираме, како луѓе и како стопанство.

Пругата од Бељаковце до Крива Паланка е поделена на три делници, а ние зборуваме сега за втората делница. Втората делница е во инвестиција од 152 милиони евра, а ние за тој проект добивме грант од 70 милиони евра, или 46% од вкупната градежна вредност на таа делница.

Многу е битно да кажеме дека сите овие средства последните неколку години беа замрзнати за Македонија. Македонија повеќе пати аплицираше предходните години за европски средства, но тие не беа доделени. Ценам дека и ова е резултат на препознавањето на новиот дух на Владата кој што е реформски ориентиран,  и овој чекор покажува дека тие сите средби со лидерите на ЕУ во овој месец и половина, не биле случајни.

Напротив, тие средби беа со цел да докажеме пред меѓународната заедница дека Макеоднија е просперитетна држава и коректен партнер за сите на Балканот и во Европа. Мислам дека тоа успеавме да го покажеме, во интерес на граѓаните на Република Македонија и на целокупното македонско општество.

Бенефитот од овие средства, и придобивките од сите инфраструктурни проекти, е од полза за народот на Република Македонија, и за сите нејзини граѓани.

Како што ветивме, оваа Влада нема да се занимава со трошење на буџетски и меѓународни пари на непродуктивни проекти и дека ќе се насочат исклучиво на инфраструктурни проекти, на капитални  инвестиции за да бидат двигател на економијата на Република Македонија, без мешање во оперативното работење на фирмите.

Во рамките на Самитот во Трст, беа остварени и други средби. Беше остварена средба со Светска банка. Тоа беше една многу плодотворна средба. Главните поенти од таа средба се дека Светска банка беше поприлично незадоволна од ситуацијата од последните две-три години. Во Македонија не е потпишан ниту еден договор со оваа институција, а договорите кои биле претходно потпишани, заглавиле во својата имплментација. Ние сега треба тие договори да ги одглавиме и да продолжиме да ги имплементираме.

Повторно станува збор за инфраструктура, повторно станува збор за коридорот 8, овојпат за автопатната мрежа.

Исто така, со Светска банка разговаравме за поддршка на буџетот која што ќе заврши кај македонските фирми. Со оваа мерка ќе обезбедиме средства за да ја реализираме нашата следна мерка во економската програма, а тоа е поддршка на македонската екомонија која што ќе биде извозно ориентирана и којашто ќе воведе нови технологии.

Тие беа расположени да дадат таква поддршка и најавија дека за две недели ќе дојдат во Македонија само за таа намена, за да работиме заеднички со нив и со нивната групација AFC, за да дојдеме до такви мерки и да дојдеме до такви сретства кои што ќе бидат директна поддршка за македонската економија.

Веќе бевме информирани дека во рамките на Самитот, премиерот се сретна со канцеларката на Германија, госпоѓата Ангела Меркел, британскиот министер за надворешни работи, господинот Борис Џонсон, премиерката на Србија госпоѓата Ана Брнабиќ, премиерот на Албанија, господинот Еди Рама, премиерот на Словенија, господинот Миро Церар.

Јас имав средба со претседателот на Европската енергетска заедница, со господинот Јанес Копач. Со него разговаравме за она што беше дилема во јавноста околу евтината тарифа за електрична енергија, и постигнавме договор со нив како ќе ја воведеме, истовремени исполнувајки ги сите стандарди кои што се барани од Европската унија.

Мислам дека оваа порака треба многу јасно да ја пратиме бидејќи имаше доста шпекулации во јавоста последните денови. Исто така, имав средба и со државниот секретар во министерството за економија и финансии на Франција, господинот Бенжамен Гриво.

Господинот Гриво дојде со претседателот Макрон специјално само за таа средба. Целта на таа средба беше да направиме поголема економска соработка со Франција. Франција е голема држава, голем пријател на Македонија, а ние имаме исклучително мала економска размена со оваа држава. Ќе се обидеме во рамките на нашите можности, таа економска соработка да ја зголемиме и прошириме. За таа цел се подготвува посета на највисока владина делегација на MEDEF во наредните неколку месеци. Тоа е најголемата асоцијација на работодавачи на Франција и таму се најголемите француски компании.

Ние, како Република Македонија сме мал пазар за француската економија, меѓутоа Франција е  голем пазар за нас. Мислиме дека имаме што да понудиме во сите сегменти на економијата.

Би ви пренел само неколку клучни пораки што беа вчера кажани од европските лидери.

Госпоѓата Меркел ја испрати пораката дека Европската Унија ќе помогне во дигитализацијата и развојот. Иднината е во перспективата на младите. Следниот чекор на Берлинскиот процес и на следниот Самит, кој ќе биде одржан во Лондон, ќе биде во насока на зголемување на конективноста, односно IT технологиите, и соработка во делот на дигитализацијата во регионот и програми за младите.

Во целиот регион младите имаат желба да си одат од нашите држави. Тоа не е добро и во рамките на овој процес ќе се обидеме да најдеме механизми и модели младите да сакаат да останат во нашата држава, и нашата држава да биде атрактивна за нив за живеење. Да го препознаат како свое место за идно живеење. Да го препознаат искрено, да го препознаат со лична желба.

Господинот Хан кажа дека Брисел ги сака државите од Западен Балкан во Европска Унија, сака да ги види како членки на Европска Унија. Значи тоа што беше тврд став на Европската Унија во однос на проширувањето, сега е прилично, променет, односно благонаклонет кон регионот, и дека практично ги прават сите мерки и подготовки да можеме да се приклучиме кон Европската Унија. Брисел сака државите од Западен Балкан да станат членки на Европската Унија, а една од главните причини е младите луѓе да се задржат во своите држави и да не ја напуштаат.

Госпоѓата Могерини порача дека Европската Унија и Западен Балкан се потребни едни на други. Исправени се пред заеднички предизвик, да ги реобноват, да ги реобединат континентите.

Макрон порача дека соработката меѓу младите и вмрежувањето е клучен приоритет. Сакам да додадам дека госпоѓата Меркел посебно ја потенцираше темата за корупцијата во регионот, и посебно порача дека мора да се работи на тоа поле, а ние се обврзавме дека, како влада, ќе имаме нула толеранција за корупцијата, и дека ќе ги спроведеме сите наши проекти со кои секој европски граѓанин, кој одделува пари од својот џеб и ги дава во Македонија, на најтранспарентен начин ќе знае каде завршиле неговите пари во нашата држава.

Нормално на истиот начин ќе се однесуваме и кон парите на македонските граѓани.

Ви благодарам.

Одговори на новинарски прашања на Заменик претседател на Влада за економски прашања д-р Кочо Анѓушев и Министерот за транспорт и врски Горан Сугарески на прес конференцијата после Самитот за Западен Балкан во Трст

 

П1: Може ли мало појаснување, рековте дека околу ефтината тарифа сте разговарале со Претседателот на Европската енергетска заедница, господинот Копач, па ако може мало појаснување затоа што голем број граѓани ги интересира тоа.

Анѓушев: Евтината тарифа на струјата е мерка што беше во предизборната програма на владеачката партија и воедно дел од програмата на оваа влада. Беше кажано дека ќе се воведе евтина тарифа во текот на дневните часови. Вие знаете дека евтината тарифа денеска е само во недела и во текот на ноќните часови. Таа ќе биде воведена и во текот на дневните часови во период од 2 часа, како и во сабота за која ќе важи истото како за секој друг работен ден. Односно евтината тарифа ќе се врати на истиот начин како што граѓаните на Република Македонија ја знаеа во претходните години наназад со децении.

 

П2: На последната владина седница беше донесена одлука за поништување на тендерот за гасификација на Македонија. Може ли да ни кажете детали околу тоа, кој дел ќе се менува конкретно?

Анѓушев: На таа владина седница, видовме и констатиравме дека долго време најавуваниот проект за регионална гасификација на Македонија, за кој се информираше дека ќе се појават многу компании како заинтересирани, беше констатирано дека добивме само една понуда. 

Владата донесе одлука да се формира комисија која што ќе ја отвори таа понуда, ќе видиме кој е понудувач. Но, се надевам дека сите вие ќе се согласите дека понуда од само една компанија сигурно не е доволна за да добиеме квалитетен понудувач и конкурентност, со кој ќе се постигне квалитетна цена за македонските граѓани. 

Од таа причина моја препорака, и препорака на економскиот тим на владата е, тој тендер да се преработи и преобјави, за да овозможиме поголема конкурентност и да можеме да обезбедиме подобри понуди и поголем бенефит за граѓаните на Република Македонија. 

Избор на тендер со само една понуда за мене е секогаш извор за можна корупција. Јас тоа нема да го поддржам никогаш, и ќе сакам поголема конкурентност на сите тендери.

 

П3: Рековте дека вториот дел од делницата (од пругата кон Бугарија) ќе не чини 132 милиони евра, а сте добиле 70 милиони евра грант. Кога точно ќе ги добиете парите и како ќе го покриете вториот дел од сумата?

Анѓушев: Целокупната должина на пругата е над 80 километри. Таа е поделена е на три делници. Градежните работи за втората делница, за која добивме грант, е проценета на 152.3 милиони евра. Останатите средства ќе бидат обезбедени од финансирање од меѓународните институции, како кредити за инфраструктура, на пример од ЕБРД или другите финансиски институции во светот.

Практично, ние, добивајќи поддршка за оваа делница, од економска гледна точка, ја правиме пофизибилна. Овој пат Европската Унија ни помага со грант. Значи со пари кои што ги платиле европските граѓани, и што не треба да ги враќаат македонските граѓаните.

Тоа го прави целиот проект поисплатлив, и како таков, тој е веќе пофизибилен за да биде дополнително поддржан со квалитетни кредити и нормално со издвојување на средства од нашиот буџет во делот на капиталните инвестиции. Конечно тоа што го раскажуваме како приказна 20 години, сега станува реалност - железничка пруга кон Бугарија. 

 

П4: Што ќе биде со третиот дел од пругата од  Крива Паланка до граница? Кога ќе се почне да се гради?

Анѓушев: Градењето на пругата не е работа што се прави преку ноќ. Ние треба да почнеме да градиме, за некој ден да изградиме. Штом сме презеле обврска да ги искористиме овие средства за втората делница, нормално не ни паѓа ни на крај памет дека третата делница ќе остане неизградена. Нормално и таа мора да се изгради во континутет после градењето на втората.

 

П5: Што значи конкретно потпишувањето на договорот за транспортно поврзување?

Сугарески: Вчера од страна на премиерите на петте државни, за жал петте, не шестте држави поканети на Самитот, беше парафиран договорот за транспортна заедница. Тоа е поврзување на сите држави од Западен Балкан со Европската Унија. Поврзување низ сите коридори коишто се низ Западен Балкан. За жал, Босна и Херцеговина, поради одредени проблеми коишто веројатно ги имаат, не го стави својот потпис на договорот. 

Во натамошниот период тој треба да биде имплементиран во фази. Нашето залагање на средбите со комесарката Булц, беше целосно елаборирано околу транспортот и безбедноста во сообраќајот. За сите детали наредните денови планирам прес конференција и подетално ќе ги објаснам придобивките од овој договор. Секако, и за резултатите од билатералните средби и состаноци коишто ги имавме со комесарот и министрите од Западен Балкан.

 

 

Почитувани граѓани, почитувани претставници на медиумите,

За нас, за Република Македонија, ова е навистина важен настан. Самитот во Трст, зборува за перспективите на целиот регион за Западен Балкан кон Европската Унија, но и, секако, за регионалното поврзување на целиот овој регион. Јас сум многу среќен заради тоа што сите овие состаноци кои што овде се одржуваат, оставаат сериозен впечаток дека има одлична европска перспектива Република Македонија и за регионот на Западен Балкан. Пораките што овде ги добиваме, а и што ние ги испраќаме, дека ќе го поддржиме целиот овој процес, ќе соработуваме за да може да напредува регионот, секако сам за себе, но и за перспективите кон Европската Унија.

Состаноците коишто овде се држат, не само што ќе ја зголемат комуникативноста, поврзувањето, транспортот, соработката, економијата, помеѓу сите овие земји, јас верувам дека ќе испратат дополнително силен сигнал кон европските институции, фокусот на Европа сè повеќе да биде насочен кон самиот регион, поддржувајќи го самиот регион, за навистина вредностите, севкупни економски, квалитативни на целиот овој регион, да се приближуваат кон вредностите коишто Западна Европа ги познава. Само на тој начин ќе се забрзаат сите процеси кон целосна интеграција на Република Македонија кон Европската Унија.

П1: Има нешто конкретно од договорот, затоа што Хан имаше изјава за Дојче Веле за Коридорот 8 и со колку пари ќе се затвори?

Еве вака, јас ќе оставам на до крајот на Самитот да бидат објавени точните цифри. Но, Македонија е голем добитник од овој Самит. Процесите што денеска треба да бидат објавени како резултат во делот на конкретна поддршка за изградба на инфраструктура, се многу значајни за идните економски, и пред сè за севкупните перспективи на поврзување на Република Македонија во регионот и во Европа.

Денеска за жал студентите во Студентскиот дом Гоце Делчев можеа да ги почувствуваат последиците од недомаќинското работење на ВМРО ДПМНЕ во претходната власт.

Долговите коишто беа оставени во сите свери, останаа и во доменот на образованието. За жал голем дел од средствата коишто требаа да бидат обезбедени за образованието, биле истрошени за непродуктивни трошоци, што практично направија големи обврски, заостанати долгови на студентските домови, на училиштата. При тоа се загрозува детскиот стандард, училишниот стандард и начинот на редовно одвивање на наставата во училишта. 

За жал, на претходната власт, на ВМРО ДПМНЕ, приоритет им беше градење на споменици, наместо инвестирање во студентски стандард и она што значи подобар живот на студентите.

Имаме денеска една немила сцена во студентскиот дом Гоце Делчев, кога заради големи долгови струјата беше исклучена. Но, по интревенцијата на Министерството за образование и на Владата, успеавме да воспоставиме контакти со компанијата којашто ја врати струјата и ја приклучи за да може студентскиот дом повторно да се одвиваат активностите, нормално.

 

П1: Кои ќе бидат денеска приоритетни точки на владината седница?

Приоритетните точки се врзани со она што значи почеток на Влада, распределба на ресорите и портфолијата на министрите без ресори, поставувањето на замениците претседатели на Владата, избор на генерален секретар, шеф на кабинет, воспоставување на постојните комисии и оние што се ад-хок комисии во Владата на Р.Македонија за да може да ги поставиме стартните контури на самата Влада. Тоа е во суштина, стартните насоки за сите министри коишто ќе бидат добиени од мене согласно програмските определби на Владата на Р.Македонија.

 П2: До кога ќе чекате господинот Зврлевски да поднесе оставка?

Денеска е првиот работен ден после мојот повик. Јас ги очекувам неговите реакции по основ на ова прашање. Навистина неколку пати кажав и пак ќе повторам, Реформите се приоритет на оваа Влада, реформите се нешто коешто граѓаните го очекуваат. Една од најзначајните реформи е реформата во правосудството и навистина знаејќи дека Владата предлага разрешување на Собранието, а тоа тоа го констатира и истовремено Владата дава предлог и за именување до Собранието коешто прави избор јас мислам дека на тој начин можеме да ги скратиме сите овие рокови. Еден од симболите за узурпирана правна држава е господинот Марко Зврлевски и затоа верувам дека треба ден поскоро да се заврши и тоа со оставката. Знам дека тој има и своја друга позиција таму во Обвинителството и што и да е, редот е да се даде шанса брзо да почнат реформите во правосудството

 П3: Кои ќе бидат економските реформи?

Постојат многу економски реформи. Една од темите на неформалниот дел од Владата ќе биде пакет од триесетина закони којшто го подготвувавме целиот овој период додека граѓаните очекуваа нова Влада се со конечна цел без некаков специфичен импакт заради тоа што имаме Буџет таков каков што е оставен, веднаш да почнеме со реализација и имплементација. Дел од овие мерки ќе имаат своја реализација со новиот Буџет, но дел ќе почнат веднаш да се реализираат. Да не ги повторувам мерките, радиодифузната такса, враќањето на евтината тарифа на струјата, социјалниот аспект преку Министерството за труд и социјална политика за најранливите категории на граѓани. кои буквално допираат до секој ресор, тоа значи до секое семејство во Р.Македонија.

 П4: Што ќе се случува со владината ограда и дали ќе го задржите мебелот од владината зграда?

Денеска јас ве повикувам да дојдете и да снимате пред да почне седницата на Владата, тоа е Влада на сите граѓани. Да ги видите сите детали, секако тоа е правено со народни пари. Одлуките ќе ги носиме соодветено, како што ќе ја согледуваме и чувствуваме потребата. Портите на Владата се отворени и тоа беше наједноставниот начин да го направиме уште пред почетокот на викендот и тоа веќе функционира. Мора согласно Законот за јавни набавки, да видиме што значи отстранување на портите или слично. Има убава креација меѓу граѓаните, од бетонските столбчиња може да се направат убави клупи за седење, металните огради да бидат добар покривач за самите клупи, но да видиме, архитетките и инженерите да дадат свој удел. Нашата намера е да ја отвориме Владата за сите. Верувам дека тоа е објект во кој граѓаните треба слободно да пристапат, слободно да комуницираат, слободно да бараат информации, слободно да даваат сугестии и да биде практично отворена. Да не биде само за ден кој е отворен за граѓаните и слично, туку да биде функционално тоа што значи Влада и конекција со граѓаните.

П5: Има ли потреба од ребаланс на Буџетот и кога би се случил ако има потреба?

Денеска, во првите извештаи, сите министри ќе реферираат во Владата, верувам дека и министерот Тевдовски ќе го направи тоа. Секако, јас сум информиран, но да ги почекаме овие согледувања кои што денеска тој треба да дојде подготвен. Мојот прв впечаток е дека некаде есента мора да следува ребаланс на Буџетот од проста причина поради политиките, владината програма и слично, но меѓу другото како што знаете, тоа зависи и од моменталната финансиска кондиција, ликвидност на Буџетот на Република Македонија.

П6: Кој ќе биде портпарол на Влада?

Уште немаме одлучено, разгледуваме со луѓе, размислуваме за експертски тимови во многу аспекти. Разгледуваме дури и ваши колеги новинари кои можат да имаат професионален ангажман. Јас апелирам ,оите тимови кои ќе разговараат и јас лично, да го сфатат ова како професионален ангажман, без какви било политички предрасуди. Сакаме да се поставиме комплетно отчетно, комплетно транспарентно и комплетно комуникациски поврзани со вас медиумите.

П7: Ќе имате ли средба со лидерот на ДУИ, Али Ахмети?

Јас би сакал уште денеска. Не сум организиран, после овој настан ќе вртам телефони, за да можеме да продолжиме во договарањето на другите аспекти на поставувањето на контурите на Владата, како што се замениците, директорските места во јавни претпријатија, агенции и слично и распределбата на она што значи експертска поставеност во вклученоста на владините органи.

Премиерот Зоран Заев денеска го осуди нападот врз поранешниот министер за здравство Никола Тодоров. 

- Јас го осудувам ваквиот начин. Недозволиво нешто дури и да се помисли, а не пак да се изврши таква работа. Драго ми е што поранешниот министер Никола Тодоров е безбеден и сигурен, заради тоа што ние сме луѓе, треба да си помагаме, не треба да си испраќаме никакви лоши пораки и, навистина, освен сериозна осуда и не дај боже да се повтори никому, ништо друго не би посакувале, рече Заев. 

Заев и неговиот владин кабинет и претседателот Ѓорги Иванов, кој утрово ги прими премиерот и новите министри, констатирале потреба за соработка.

- Јас знам дека ќе ми треба соработка со претседателот на државата. Истовремено, тој и неговиот кабинет знае дека ќе треба соработка со Владата, заради тоа што постоиме и ги извршуваме функциите во интерес на граѓаните и државата. Искрено се надевам на соработка, ќе направиме се оваа соработка да биде на највисоко можно ниво, заради тоа што од таквата соработка интерес имаат граѓаните, рече премиерот.

Одговарајќи на прашања за барањето оставка на јавниот обвинител Марко Зврлески, Заев рече дека со тоа за него почнале реформите во правосудството.

- Паралелно со реформите ќе работиме со комплетен приоритет на унапредување на економскиот квалитет на животот на граѓаните, рече тој. Како неговата прва работна задача го спомена укинувањето на екстерното тестирање на учениците.  

Премиерот кажа дека за време на средбата со поранешниот технички премиер Емил Димитриев бил информиран дека состојбата во Буџетот е стабилна односно дека, како што рече, не е нешто блескава ама не е ни драматична.

- Ова сериозно ме успокојува, малку заради тоа што знаете дека на крајот од денот од парите зависи се, парите се за граѓаните. Верувам дека успешно ќе менаџираме со финансиските средства на државата, рече Заев.

На прашањето дали ќе ја отстрани оградата околу Владата, Заев рече дека уште денеска ќе даде насока да се отворат портите.  

- Владата мора веднаш да биде отворена. Верувам дека постојат процедури, законски нормативи, ја негувам отвореноста на Владата, Владата мора да биде достапна за вас, новинарите, за граѓаните, смета тој. 

За тоа дали ќе се всели во резиденцијата на Водно, премиерот рече дека за време на викендот ќе ја отвори дебатата во семејството на таа тема.

-  Јас верувам дека 150 километри нема да бидат пречка да покажеме пред цела Македонија дека не само што може некој од внатрешноста да стане премиер, туку може и да функционира живеејќи во внатрешноста како премиер. Ми ветија, веројатно, ќе доаѓаат за време на викенд кога не се на училиште, овде. Нема да спијам повеќе во партијата. Имам намера да бидам и татко, и родител, и пријател и другар. Ние 24/7 нема да работиме - ќе бидеме и родители, ќе бидеме и пријатели, ќе бидеме обични луѓе зашто верувам дека како таков им требам и на граѓаните на Македонија, рече Заев по примопредавањето на должноста во Владата на РМ. 

Финализираа сите активности пред отпочнување на ЈЗУ Универзитетски Институт за позитронско емисиона томографија (ПЕТ Центар) со работа со пациенти. По тој повод денеска во посета на ПЕТ Центарот беа генералниот директор на Меѓународната агенција за атомска енергија, Јукија Амано и вицепремиерот и министер за здравство Никола Тодоров.

На прес-конференција во ПЕТ Центарот, Тодоров истакна дека ова е финална процедура согласно препораките од Меѓународната агенција за атомска енергија кои се предвидени пред започнувањето на ПЕТ Центарот со работа со пациенти, имајќи предвид, како што рече, дека станува збор за најсовремен, најсложен и единствен објект од ваков тип не само во Македонија, туку и во поширокиот регион.

- Објектот на ПЕТ Центарот го изградивме од темел и денес имаме комплетно нов објект изграден според воспоставените европски и светски стандарди, како во делот на молекуларната дијагностика, така и за производство на радиофармацевтици. Секоја фаза од процесот беше валидирана, одобрена и сертифицирана од Меѓународната агенција за атомска енергија и практично сега го заокружуваме процесот и ПЕТ Центарот е подготвен во претстојниот период да почне да работи со пациенти, потенцира Тодоров.

Во соработка со Меѓународната агенција за атомска енергија, посочи тој, овозможивме континуирана едукација на кадарот во ПЕТ Центарот од страна на врвни експерти од реномирани странски универзитети, како што се проф. Димитриј Соловјев од Кембриџ и проф. Ракеш Ганатра од Нотингем со кои денеска имаше работен состанок.

Нагласи дека целта е со оваа дијагностика да овозможат рано откривање на малигни и други тешки заболувања, имајќи предвид дека со оваа најсовремена опрема може да се детектира и една единствена малигна клетка во човечкиот организам.

- Најсовремената дијагностика во ПЕТ Центарот ќе овозможи прецизна дијагноза, како и прецизно следење дали е ефикасна терапијата кај пациентите со малигни заболувања. ПЕТ дијагностичките постапки ќе бидат достапни за граѓаните како дел од пакетите на услуги на ФЗОМ. Приватните пациенти и пациентите од странство ќе имаат исто така пристап до сите услуги и тоа не само до препарати кои се сега достапни комерцијално, туку и до оние кои се достапни само со центри кои имаат сопствено производство, рече Тодоров.

Додаде дека со производството на радиофармацевтици ќе се овозможи и извоз на радиоактивни изотопи во регионот, а воедно со најсовремената дијагностика во оваа установа, Република Македонија ќе се искачи на рангот на најразвиените здравствени системи во Европа.

Генералниот директор на Меѓународната агенција за атомска енергија, Јукија Амано истакна дека оваа импресивна институција ќе го зголеми квалитетот на здравствената заштита кај пациентите во Република Македонија не само во земјата, туку и во регионот.

- Борбата против канцерот е голема заложба на Меѓународната агенција за атомска енергија. Со сите сили се обидувам да придонесам и да помагам за подобрување на здравствената заштита на овие пациенти. Оваа институција покажа дека е способна да биде тренинг центар. Двомесечна обука се одржа за фармацевтите од африканските земји и беше целосно поддржана од страна на Меѓународната агенција за атомска енергија, додаде Амано и се заблагодари за успешноста на проектот.

Директорот на ЈЗУ Универзитетски Институт за позитронско емисиона томографија, Емилија Јаневиќ Ивановска најави дека од понеделник  здравствените услуги од ПЕТ Центарот ќе бидат во „МојТермин“.

Таа ги наброја активностите на  ЈЗУ Универзитетски Институт за позитронско емисиона томографија меѓу кои се: завршена инсталација, квалификација и валидација на опрема и реализирана пробна работа, завршена валидација на системите за вентилација - контролираната и класифицираната зона во објектот, завршена инсталација на ПЕТ/КТ камерата, направена валидација, калибрација, тестирање и реализирана половина од предвидената обука, добиена дозвола за работа со циклотрон и производство на ДРС за две години, обука на стручен кадар во Болоња, почнати здравствени специјализации на младите кадри...

Министерот за труд и социјална политика Ибрахим Ибрахими денеска ги посети пензионерите сместени во „Дебарски Бањи-Цапи“, кои ја користат владината мерка за бесплатна бањско-климатска рекреација.

- Во минатите седум години оваа услуга ја искористија над 37 илјади пензионери. Годинава, оваа поволност за бањски престој ќе ја искористат 5.500 пензионери, а 2.114 пензионери туристичкиот викенд. Тие изразија големо задоволство од вниманието и грижата за нив. Се надевам дека идната влада нема да ги заборави пензионерите и ќе продолжи со овој многу значаен проект за оваа категорија граѓани, но и во правец на поддршка на бањскиот туризам, изјави министерот Ибрахими.

Тој заедно со сопственикот на бањите Меџит Цапа ги посети пензионерите во бањскиот локалитет во Косоврасти, а потоа и оние во Бањиште, каде директно се запозна со условите за престој и услугите кои ги нудат бањите.

Според заменик извршниот директор на „Дебарски Бањи-Цапа“, кој е и претседател на Групацијата на бањи при Стопанската комора, Трим Ќемали, бањско-климатската рекреација е значајна не само за пензионерите, туку и за самите бањи, односно за развојот на бањскиот туризам.

- Во нашите два локалитета во изминатите години престојуваа повеќе од девет илјади пензионери. Дел од нив за првпат што е многу значајно за нив како личности, но и за нивното здравје. Но, во исто време и за нас бидејќи обезбедените средства од Владата се многу значајни затоа што ги насочуваме кон подобрување на условите во постојните и во изградбата на нови капацитети, истакна Ќемали.

Тој побара од новата влада да продолжи со имплементација на овој проект и со разгледување на можноста за зголемување на износот на средства коишто би им се исплаќаат на име престој на пензионер. 

Новиот објект на Македонската филхармонија со модерен изглед и архитектонски и акустични карактеристики според сите светски стандарди, ќе биде отворен в недела во 19 часот со ексклузивен концерт на Филхармонијата со која како солист ќе настапи нашиот светски етаблиран пијанист Симон Трпчески.

Македонската филхармонија, која е најстара институција од областа на музичко-сценската дејност во Република Македонија, новиот објект го добива по 73 години од постоењето.

Концертот ќе биде под диригентско водство на еден од најпрестижните и најбараните диригенти на сите времиња, маестро Владимир Ашкенази од Русија. Ќе бидат изведени дела од Трајко Прокопиев - суита бр. 2 од балетот „Лабин и Дојрана“, Сергеј Прокофјев - концерт за клавир и оркестар бр. 3 во C-dur, оп. 26 и од Петар Илич Чајковски - симфонија бр. 5 во e-moll оп. 64.

Министерката за култура Елизабета Канческа - Милевска денеска на прес-конференција рече дека многу се вложиле во овој објект и со голема љубов, со многу посветеност и труд во изминатите години како Министерство за култура и како тим кој работел на изградбата на објектот, дале се од себе да има ваков објект според сите светски стандарди со најврвна акустика.

- Во овие изминати денови присуствував на пробите и вчера кога беше присутен маестро Ашкенази и претходно кога диригираше Борјан Цанев заедно со оркестарот и навистина сум горда и воодушевена од самиот објект и од сето она што успеавме да го направиме со цел да го ставиме во функција објектот и во функција на Македонската филхармонија, истакна Канческа - Милевска.

Посочи дека е убедена оти изградиле еден прекрасен објект кој ќе даде можност пред се за подобрување на условите за работа на уметниците, за присуство на голем број светски имиња, диригенти, филхармонии...

Акшенази рече дека е задоволен и инспириран што е во уште една земја која е славјанска и има кирилично писмо и потенцира дека е импресиониран од концертната сала која има добра акустика.

Трпчески истакна дека е почестен што е поканет да настапи на отворањето на новата концертна сала и што ќе има можност повторно да соработува со маестро Ашкенази.

- Овој човек е навистина реткост заради тоа што има исклучително добро срце и широка душа и освен талентот тоа значи многу. Тимската работа со маестрото вроди со плод и заедно со залагањето на посебно инспирираните музичари на Македонската филхармонија ќе придонесат за убав впечаток кај публиката. Програмата е прекрасно конципирана и можат да се покажат најразличните квалитети на сите инволвирани уметници во неа, додаде Трпчески.

Директорката на Македонската филхармонија, Маја Чанаќевиќ рече дека се воодушевени од начинот на работата на Ашкенази и од неговата величина.

Новиот објект на Македонската филхармонија се протега на површина од 12.400 метри квадратни. Располага со две сали, голема сала со капацитет 1.000 места и мала, повеќенаменска сала со капацитет од 310 места од кои 168 се фиксни седишта, 110 се телескопски и 32 се мобилни седишта.

Големата сала располага со најсовремени сценско технолошки системи што објектот го позиционираат во врвот на објектите од овој тип. Материјалите кои се употребени во големата сала и архитектонската пластика овозможуваат врвна акустика. Во составот на големата сала е содржано и студио со режија, опремено со комплетна, современа аудио и видео техника која ќе се користи за продукција и снимање на музичките настани. Во објектот се обезбедени сите предуслови за подготовка на програмата на институцијата, изградени се посебни простории за вежбање на солистите и индивидуалните групи, како и придружни и административни простории, сите функционално поврзани на три нивоа..

Објектот поседува и кафетерија, музичка продавница и паркиралиште за вработените. Во целиот процес на градбата на објектот се испочитувани сите програмски цели и барања на вработените во Филхармонијата.

Набавена е и комплетно нова опрема за музичарите, столчиња во зависност од типот на инструментот, стативи и држачи за инструментите, посебни шкафови за одлагање и чување на инструментите, држачи за партитурите и светлосни тела за нив. 

Првите договори за користење средства од ИПАРД 2 програмата во вкупна вредност од 10 милиони евра ресорното Министерство најавува дека ќе бидат потпишани до крајот на јуни или почетокот на јули годинава и да бидат искористени 100 проценти.

Со  првиот повик за ИПАРД 2, објавен денеска, земјоделците до 23 јуни годинава можат да апицираат за инвестиции во материјални средства на земјоделски стопанства, за преработка и маркетинг на земјоделски и рибни производи и за диверзификација на фарми и развој на бизнис.

- Со реализацијата на ИПАРД 2  која се однесува за периодот 2014 до 2020 година се доцни две години, но како надлежни  институции ги преземавме сите чекори  предвидените 60 милиони евра да ги искористиме 100 проценти.  Со оглед дека недоволно се искористија средствата од ИПАРД 1 програмата подготвени сме ИПАРД 2 програмата да ја искористиме 100 проценти. Предвидените пет милиони евра за 2014 и пет милиони евра за 2015 година треба да ги искористиме до крајот на 2018 година, рече на прес-конференција министерот за земјоделство, шумарство и водостопанство Михаил Цветков.

Со оваа програма, потенцира, земјоделците ќе добијат поврат на 60 проценти од инвестицијата.

За успешна реализација на планираните средства е формиран стручен тим од 80 агро и бизнис инжинери кои пред земјоделските стопанства веќе ги претставиле условите и можностите за аплицирање, а  треба да им помогнат и при подготовка на апликациите. Изготвени се, посочи Цветков, и типски проекти во сите сектори кои земјоделците ќе ги добијат бесплатно. - Воведовме и гарантен фонд преку кој се обезбедени 26 милиони долари, а со кои ќе се гарантира 50 проценти од хипотеката.  За секој проект до 500.000 евра  и ако каматата е до 8 проценти ќе ја финансираме со 50 проценти преку Програмата  за рурален развој, рече Цветков.

Како што информира директорот на Агенцијата за поттикнување на развојот на земјоделството Игор Златков, од 68 милиони евра  со ИПАРД 2 програмата,  38 милиони евра се за материјални  инвестици во земјоделски стопанства и земјоделски и рибни  производи, а останатите за диверзификација на рурални средини. - Со првиот повик од ИПАРД 2 програмата се на располагање 12 милиони евра за инвестици во земјоделски  стопанства, 11 милиони евра во земјоделски рибни  производи, а три милиони евра во диверзиификација на рурални средини.  За разлика од порани,  сега во тек на аплицирањето со помош на вработените  на МЗШВ и советници од Агенцијата за кратко време апликантот ќе има информација што треба да дополни во документацијата и дали ќе му биде одобрена. Се надеваме на 100 процентна реализација, а овие пари нема да бидат доволни судејќи според апетитите на земјоделските стопанства кои сакаат да аплицираат за сите три мерки, рече Златков.

Одговарајќи на новинарски прашања кога може да се очекува исплата на заостанатите субвенции за земјоделците, Цветков повтори дека застојот е поради колизијата на законите за избори и за земјоделство и рурален развој, и оти на средба во Министерството за финансии ќе се бара решение на проблемот.

- Се договоривме Платежната агенција до 31 мај  да ги изготви решенијата за исплаќање субвенции до 2016 и да се достават во треозорот  за исплата. За 2015 година веќе се доставени и со отстранување на законските пречки земјоделците ќе ги добијат субвенциите, рече Цветков, посочувајќи дека за исплата остануваат над 50 милиони евра.

Прашан дали поради техничкото функционирање на Владата ќе има законска пречка за исплатата на штетите од ниските температури за овошните и лозовите насади, за што се на терен комисии за проценка, Цветков информира дека владина комисија денеска  треба да изготви и утре на владина седница да предложи соодветно правно решение.