Соопштенија за јавноста

Претседателот на Владата на Република Македонија, Зоран Заев, ја честита големата победа на ракометарите на Вардар над ракоментниот гигант Барселона, на вечерашниот полуфинален натпревар  во Лигата на шампиони што се одржа во Келн, Германија.

„Во име на граѓаните на Македонија изразувам голема благодарност до ракометарите на Вардар за огромниот успех.

Испишавте историја во ракометот и спортот во Македонија!

Сите ние сме горди на вашата тимска игра и спортскиот дух. Македонија е со вас! Среќно на утрешното финале“, е пораката на премиерот Заев до ракометарите на Вардар.

Почитувани сограѓани,

Ми претставува особено задоволство во мое лично име и во името на Владата на Република Македонија, да Ви го честитам 24 Мај – Денот на македонските и сесловенските просветители, Светите Браќа Кирил и Методиј. 

Историското наследство и делото кое зад себе го имаат оставено Светите Кирил и Методиј е едно од најзначајните богатства на нашата држава и македонскиот народ. Големината и богатството на еден народ, меѓудругото се состои и во неговиот капацитет да ги збогати и другите народи, односно целата цивилизација, а македонскиот народ ваквата големина ја покажал преку бројни историски личности, а несомнено едни од најзначајните се Светите Браќа Кирил и Методиј.

Како изумители на глаголицата и како промотори на словенската писменост во многу места во светот, Светите Кирил и Методиј се вградија во историското и духовно растење на многу народи во светот, а посебно ја задолжија Македонија од каде и потекнуваат и каде поминале голем дел од нивната просветителска мисија. Токму затоа со чествувањето на денешниот празник и искрената почит кон големите браќа Свети Кирил и Методиј, македонската држава задржува силна светлина кон просветителите кои толку конкретно одбележаа една цела епоха во историјата на христијанската цивилизација, а посебно во историјата на Македонија. Наша е гордоста и привилегијата да ги спомнуваме и да празнуваме во нивно име и во нивна чест.

Нивното дело да продолжи да ни биде инспирација за да продолжиме да создаваме дела и вредности кои ќе бидат од интерес за сите граѓани на нашата земја, кои ќе ги подобруваат економскиот стандард, условите во образованието, можностите во културата и ќе помогнат во унапредувањето на сите општествени сфери, и кои ќе придонесат за создавање на амбиент за личен професионален и приватен развој на секоја индивидуа преку стекнувањето на знаења и вештини кои ги прават луѓето вредносно поконкурентни во секоја област.

Нека е вечен нивниот спомен и нека ни е за многу години големиот државен празник Свети Кирил и Методиј!

Почитувана премиерке Меј,

Со згрозеност, вознемиреност и тага ја примив информацијата за ужасниот терористички чин кој се случи во Манчестер.

Во името на македонската Влада Ве молам примете ги изразите на длабоко сочувство и пренесете ги на семејствата на жртвите.

Мислите и молитвите на македонските граѓани се со граѓаните на Обединетото Кралство.

Република Македонија стои рамо до рамо со целата меѓународна заедница во борбата против тероризмот. Терористичките закани нема да го променат слободниот начин на живот и ќе бидат поразени со координиран, заеднички и бескомпромисен одговор.

                                                                  Емил ДИМИТРИЕВ

 

 

Н.Е. г-ѓа Тереза Меј

Премиер на Обединетото Кралство

на Велика Британија и Северна Ирска

 

Л о н д о н

Почитувани сограѓани и припадници на Влашката етничка заедница во Република Македонија,

Дозволете ми во името на Владата на Република Македонија и во свое лично име, да Ви упатам најискрени честитки по повод 23 Мај - Националниот ден на Власите и да Ви посакам многу здравје, успех и благосостојба во Вашите семејства.

Почитувањето на најбитните празници и идентитетски обележја на етничките заедници во нашата земја е една од најсуштинските традиции која беше негувана и силно поткрепена од Владата на Република Македонија во изминатите години. Таквата традиција на почитување мораме да ја развиваме како една од најзначајните симболи на нашето мултинационално општество и основно врзивно ткиво помеѓу граѓаните. Во тој дух, чест ми е да Ви го честитам Националниот ден на Власите кој уште од далечната 1905 година е симбол на самоидентификација на Влашката заедница.

Власите како во минатото, така и денес имаат значаен општествен и културен придонес за современата македонска држава и учествуваат во процесите на нејзиниот развој. Влашките идентитетски белези се значаен дел од македонскиот мултиетнички колорит и вредносно го збогатуваат македонското општество, а Република Македонија со гордост го прославува Националниот ден на Власите.

Честитајќи Ви го денешниот празник, дозволете ми да го изразам своето уверување дека со заеднички напори ќе продолжиме да работиме во интерес на Република Македонија, во интерес на подобар живот на нашите граѓани и напредок во секоја област од значење за државата. Испраќајќи Ви најискрени честитки, Ви посакувам добро празнично расположение, многу радост и бериќет во Вашите семејства.

Нека Ви е честит и за многу години 23 Мај - Националниот ден на Власите!

Со почит,

 

Емил Димитриев

Претседател на Владата на Република Македонија

Почитувани,

Македонија вчера преживеа драматичен, непријатен, тежок и непосакуван ден.

За жал, бевме сведоци на насилство кое не му одговара никому, и од кое сите ние како граѓани сме засрамени, пред се заради имиџот и интересот на Република Македонија.

Го осудувам насилството од секој облик, физичкото насилство од злонамерни поединци врз пратениците, насилството кое го доживеаа и граѓаните, и насилството врз процедурите, Деловникот, законот и Уставот.

Би сакал на повредните да им посакам што побрзо опоравување, и сакам да апелирам на враќање на состојбата во нормала.

Го осудувам изведувањето на химна на странска држава во македонското Собрание.

Како премиер не се согласувам со неделовничкиот начин за незаконски обид за избор на претседател на Собранието, и ускратувањеато на правото на говор на пратениците, и овие две работи претставуваат грубо нарушување на принципот на владеење на правото.

Ваквиот незаконски обид за избор на претседател на Собранието треба да биде поука за сите дека во иднина не треба да се превземаат останати неделовнички, незаконски и изнасилени чекори во Собранието бидејќи може да создадат огромни ризици и расцеп во граѓанското ткиво. Се надевам дека сите ќе се однесуваат одговорно во иднина.

Не се согласувам и со обидот на министерот за внатрешни работи Арбен Нухиу да персонализира некаква наводна одговорност во директорот на бирото за јавна безбедност Митко Чавков и во полициските професионалци и припадниците на полицијата, кои ја имаат мојата доверба и почит како премиер. Истовремено сум возменирен и жалам заради некои информации за прекумерна употреба на сила врз некои граѓани од страна на некои полицајци иако бев информиран дека тактичкото постапување на полицијата било согласно стандардите.

Би истакнал дека институциите функционираат и ќе функционираат. Уставот и законите мора да се почитуваат. Демократијата е можна само преку почитување на процедурите и суштината на законите.

Апелирам за смиреност и разумност кај сите политички партии. Партиите и политичките лидери треба да се фокусираат кон деескалација, стабилизација и фокусираност кон заедничките цели кои ги имаме како држава и како нација.

Ги повикувам граѓаните на смиреност и зачувување на квалитетни меѓуетнички и меѓупартиски односи.

Поделбите не водат кон добро, сега е потребно повеќе од порано да покaжеме заедништво и обединување околу најдобриот интерес за Република Македонија.

Честитка од претседателот на Владата на Република Македонија, Емил Димитриев до граѓаните на Република Македонија со христијанска вероисповед, Македонската Православна Црква – Охридска Архиепископија, Католичката црква и Евангелистичко - методистичката црква

Почитувани граѓани,

Со особена радост и задоволство, на овој голем ден, сакам во свое лично име и во име на Владата на Република Македонија, на сите верници со христијанска вероисповед да Ви го честитам најголемиот христијански празник - Велигден.

Велигден е од исклучителна важност за христијанството, затоа што ова е денот кој им дава надеж на сите верници дека постои пример и водилка во нивните животи, дека сечие тежнеење кон подобро и богоугодно однесување не е бесцелно, туку посакувано и ценето од нашиот Бог. Велигден е еден од најзначајните симболи на нашата вера, симбол на воскресението, симбол на победата над смртта, на победата на доброто врз злото, и на победата на доброто човеково поведение. Преку воскреснувањето Исус докажал дека е Синот Божји и дека целото негово учење е вистинито. Воскресението пред кое се поклонуваме на Велигден постојано и постојано не потсетува дека има надеж и за човековата душа, дека Бог е со нас и во добро и во лошо, и дека секогаш треба да ги следиме вредностите.

Во овие убави празнични денови да се помолиме и заблагодариме на таквото соединение со Бога. Да се поклониме на неговата милост и да продолжиме да ги следиме неговите пораки. Во спокој да ги исполниме црковните храмови и со радост да ја примиме убавата вест од црковните камбани. Да го прославиме заедно Христовото воскресение и да се помолиме Бог да биде со нас и во иднина. Да се помолиме за здравје и среќа во нашите домови, љубов и бериќет во нашите семејства, мир и спокој во нашата земја. Да се помолиме и да работиме за развој на нашата Татковина, подобар стандард за граѓаните и повеќе можности за успех за секој еден поединец. 

Нека Бог ја зацврсти нашата заедница, нека ни помогне да преземаме мудри чекори и да ги надминеме сите предизвици со кои како држава се соочуваме. Нека Бог не поткрепи и ни донесе нови радости, напредок и само напредок во Република Македонија.

Нека е за многу години Велигден !

ХРИСТОС ВОСКРЕСНА ! 

Со почит,

 

Емил ДИМИТРИЕВ

Претседател на Владата на Република Македонија

До: г-ѓа Берта Романо – Николиќ,

Претседател на Еврејската заедница во Република Македонија                        

                                                                   

Почитувана г-ѓа Романо – Николиќ,

Со особена чест и задоволство, во името на Владата на Република Македонија и во свое лично име, Вам и на граѓаните од Еврејската заедница во Република Македонија, Ви упатувам искрени честитки по повод големиот празник ПЕСАХ.

Деновите на празнување на овој празник се денови во кои секое еврејско семејство го празнува и слави поклонението, но и непокорноста и желбата за слобода на еврејскиот народ. Вредностите кои ги славите во овие денови претставуваат силни универзални вредности бидејќи силната верба, желбата за слобода, љубовта кон својот народ и почитувањето на другите народи се вредности кои ги движеле народите и во историјата, но и во сегашноста.

Истовремено, прославувањето на овој голем празник тука во Република Македонија претставува и симбол на почитта и искреното пријателство помеѓу нашите два народи и признание за придонесот што Еврејската заедница во Република Македонија го има во продлабочувањето и унапредувањето на односите помеѓу Република Македонија и Израел. 

Високо ценејќи го Вашиот придонес во развојот на Република Македонија искрено Ви го честитам празникот ПЕСАХ и Ви посакувам убави празнични денови, исполнети со мир, семејна радост и душевен спокој.

 

Со почит,

 

Емил ДИМИТРИЕВ,

Претседател на Владата на Република Македонија

Почитувани припадници на ромската етничка заедница,

Дозволете ми, во свое лично име и во име на Владата на Република Македонија, да Ви го честитам 8 Април – Меѓународниот ден на Ромите.  

Годинешната прослава е единаесеттата прослава на националниот празник на Ромите во Република Македонија, што јасно говори за континуитетот и почитта која Република Македонија ја негува кон Вашата заедница. Тоа јасно се изразува преку одбележувањето на овој празник, но и преку редица на други мерки и владини проекти во многу области кои се од значење за подигнување на квалитетот на животот во ромските средини. Годината која е зад нас претставува година во која продолжи владината посветеност во делот на образованието, културата, поддршката на ромските невладини организации и центри за медијација, поддршката за вработување и почнување сопствен бизнис, поддршка за подигнување на свеста за грижа за сопственото здравје, за правата и можностите во делот на социјалната политика, правото, културата и уште многу други полиња од значење за Ромите. Убеден сум дека таквата поддршка ќе продолжи и во иднина како неизоставен дел од грижата на Република Македонија и како продолжение на концептот на почитување на сите заедници во државата и одржување на стабилно и одржливо мултиетничко општество.

Честитајќи Ви го празникот, Ви посакувам убави празнични денови, многу радост и песна во Вашите домови, многу здравје и љубов во Вашите семејства и уште долги години да го прославуваме 8 Април – Меѓународниот ден на Ромите!

 

Со почит,

 

Емил ДИМИТРИЕВ

Почитуванa Екселенцијо,

Веста за грозоморниот терористички акт кој се случи во Санкт Петерсбург длабоко ме вознемири и растажи.

Во името на македонската Влада и граѓаните на Република Македонија, Ве молам примете ги изразите на најдлабоко сочувство и пренесете ги до семејствата на жртвите и до руските граѓани.

Терористичките закани не смеат и нема да го променат слободниот начин на живот без страв.

Република Македонија ќе продолжи да биде партнер на целата меѓународна заедница во борбата против тероризмот во која е потребен заеднички, координиран и одлучен одговор.

 

                                                                   Емил Димитриев

Почитувана Екселенцијо,

Со огорченост, вознемиреност и тага ја примив информацијата за грозоморниот терористички чин во Лондон.

Од името на македонските граѓани и македонската Влада Ве молам примете ги изразите на длабоко сочувство и пренесете ги на семејствата на жртвите.

Терористичките закани не смеат и нема да го променат слободниот начин на живот и вредностите во кои верува демократскиот свет.

Република Македонија стои заедно со целокупната светска заедница во борбата против терористичките закани кои ќе бидат победени со соработка и координирани и заеднички активности.

 

 

                                                                  Емил ДИМИТРИЕВ

 

 

Н.Е. г-ѓа Тереза Меј

Премиер на Обединетото Кралство

на Велика Британија и Северна Ирска

 

Л о н д о н