Соопштенија за јавноста

Претседателот на Владата на Република Македонија, Зоран Заев, денеска се сретна со амбасадорката на ОБСЕ, Нина Суомалаинен.

На средбата е поздравена определбата на премиерот Заев да предводи реформска Влада, којашто ќе работи во интерес на сите граѓани.

„Само низ посветен реформски процес можеме да ги оствариме стратешките интереси на Република Македонија, перспективите кон Европската унија и НАТО, и за таа цел имаме намера да дефинираме краткорочна и среднорочна агенда“, рече премиерот Заев.

Претседателот на Владата, Заев, нагласи дека новата Влада води конструктивни политики, бидејки само низ заеднички заложби, на политичко и општествено ниво, може да се забрза изградбата на демократски, професионални и независни институции, што ќе придонесат кон квалитетен живот на сите граѓани.

На состанокот е разговарано за можноста  Мисијата на ОБСЕ да помогне во реформските процеси во судството, медиумите, полицијата, меѓуетничките односи и неколку други области. 

Заеднички е констатирано дека формирањето нова реформска Влада отвора вистинска можност за напредок на Република Македонија.

 

Претседателот на Владата на Република Македонија, Зоран Заев, придружуван од вицепремиерите Бујар Османи и Радмила Шекеринска денеска се сретна со амбасадорите на земјите членки на Европската унија.

Од страна на сите амбасадори на Европската унија во Македонија, изразена е силна поддршка за определбата на премиерот Заев и на Владата кон реформска агенда што ќе ги отвори перспективите на Република Македонија кон Европа.

„Посветени сме на дефинирање краткорочна и среднорочна агенда за ургентните реформски приоритети. За тоа ќе разговарам и со еврокомесарот Хан во Брисел. Евро-атлантските интеграции се стратешка цел на Македонија  и интерес на граѓаните на Македонија е да добие демократски институции“, рече претседателот на Владата, Заев.

Како клучни области во коишто се потребни итни реформи заеднички се посочени судството, медиумите, обезбедување независни професионални институции, функционалност на Парламентот.

На средбата беа поздравени инклузивните политики на премиерот Заев и на новата Влада и беше пренесена порака на оптимизам од Брисел, дека Владата на Македонија ќе ја постави државата на европскиот пат. Како значајна, беше нагласена определбата на премиерот и на Владата, Република Македонија да биде европска земја.   

„Владата на Република Македонија и јас како премиер сме подготвени во интерес на потребите на сите граѓани на Македонија да соработуваме со опозицијата и со претседателот на државата. Исто така насочени сме кон соработка со цивилниот сектор и со сите други општествени чинители, затоа што само заедно можеме вистински да придонесеме кон развој на Македонија, а со тоа и да обезбедиме квалитетен живот за сите граѓани во државата“, рече премиерот Заев.  

На средбата со амбасадорите, претседателот на Владата на Република Македонија, во име на граѓаните на Македонија, изрази благодарност до земјите членки на ЕУ за помошта и поддршката на принципиелно и пријателско ниво што и ја даваат на државата, во развојот на демократските процеси. 

Претседателот на Владата на Република Македонија, Зоран Заев, денеска се сретна со амбасадорот на Кралството Норвешка за Македонија, Арни Бјорнстад.

Реформските приоритети што ќе ги отворат евро-атлантските интеграции на Македонија беа клучна тема на состанокот.

„Владата во својата работа се води од стратешките интереси на Република Македонија, а тоа се перспективите кон Европската унија и НАТО, што ќе осигураат квалитетен живот за сите граѓани на Македонија. Затоа, посветени сме на брзи, квалитетни и ефикасни реформи“, соопшти премиерот Заев.

Претседателот на Владата на Република Македонија, Заев, најави создавање услови за независни институции, како што се реформите во правосудството, обезбедување професионален здравствен и образовен систем, развој на економијата, што е од огромна важност за егзистенцијата на граѓаните, финализирање на Рамковниот договор.

На средбата беше истакнато искуството со Црна Гора како позитивен пример како е можно постигнување голем исчекор напред и прием во НАТО, низ принципот на активна дипломатија со Брисел што води кон ефикасно исполнување на преземените обврски и напредок.

„Политичката криза во Македонија заврши, демократските процеси ги почнавме и резултатите за напредокот на Македонија на домашен и меѓународен план зависат од волјата на политичарите. Како премиер и како Влада ја преземаме обврската да го водиме овој процес. Во таа насока е и мојата посета на Брисел. Исто така, целосно сме ориентирани кон инклузивен процес на соработка со опозицијата и со сите други општествени чинители, затоа што евро-атлатскиот процес е интерес на сите граѓани и на Република Македонија“, рече премиерот Заев.

Претседателот на Владата, Заев најави дека е во фаза комплетирањето на владиниот кабинет, преку избор на квалитетни кадри и за замениците министри во Владата и изрази задоволство за мотивираноста на министрите во Владата да работат фокусирано на решавање на потребите и проблемите на граѓаните како врвен приоритет на новата реформска Влада.

Претседателот на Владата на Република Македонија, Зоран Заев, денеска се сретна со амбасадорката на Република Турција во Македонија, Еркал Кара.

На средбата заеднички е поздравено пријателството меѓу Македонија и Турција и е изразена определеност за унапредување на соработката врз демократски принципи, на економски план, како и во сите други области од интерес на граѓаните на двете држави.

„Примарна цел на Владата е да ги унапредува односите со сите држави, посебно со земјите пријатели на Република Македонија. Граѓаните на Македонија очекуваат европски перспективи и Владата што ја предводам е подготвена да ги земе предвид сите позитивни искуства на патот кон интеграциите“, рече премиерот Заев.

На средбата, претседателот на Владата на Македонија, Заев и турската амбасадорка Кара, зборуваа за можноста за надминување на постоечките административни бариери со кои се соочуваат инвеститорите во Македонија, како и за интересот на турски инвеститори за вложувања во Македонија. Исто така, од страна на турската амбасадорка е реафирмирана поддршката на Република Турција за интеграцијата на Република Македонија во НАТО Алијансата. 

 

Претседателот на Владата на Република Македонија, Зоран Заев, денеска се сретна со ракометарите на Вардар кои го освоија првото место во Лигата на шампиони, со раководството на клубот, како и со претседателот и претставници на Ракометната федерација на Македонија.

Премиерот Заев, од името на Владата им врачи Плакета за благодарност на ракометарите на Вардар.

 „Секоја чест! Во име на граѓаните на Македонија ви благодарам за радоста што ни ја овозможивте на сите нас. Вашиот успех е амбасадорска промоција на Македонија, не само во Европа, туку и во светот. Исто така вашиот успех е мотив Владата силно да го поддржи спортот“, рече во обраќањето до ракометарите премиерот Заев.

Тој најави можности за практично инвестирање во спортот, преку ваучери што ќе ги издава Министерството за финансии на спортските клубови, законска поддршка на спортот како професија, со што ќе се овозможи на пензиско и здравствено осигурување на спортистите и посветеност на новата Влада да го обезбеди заслуженото достоинство на спортот во Македонија.

На средбата беа отворени некои проблеми со кои се соочуваат спортските клубови, во делот на финансирањето и условите за работа и беше разговарано за начините на нивно решавање.

Ракометарите, сопственикот на ракометниот клуб Вардар, Сергеј Самсоненко, претседателот на Ракометната федерација на Македонија, Живко Мукаетов, ја поздравија определбата на премиерот Заев и на новата Влада за поддршка на спортот во Македонија.

Тие на претседателот на Владата, Зоран Заев, му подарија еден од шампионските златни медали добиени од Лигата на шампиони, како и дрес на Вардар на којшто е испишано неговото име.

На средбата е договорена натамошна соработка во духот на поддршка и развивање на ракометот и спортот во Република Македонија.

 

Подготвени сме на брзи и квалитетни реформи за европските перспективи на граѓаните и државата

Претседателот на Владата на Република Македонија, Зоран Заев, денеска се сретна со амбасадорот на Република Франција во Р.Македонија, Кристиан Тимоние.

На средбата се разговараше за приоритетите на новата Влада, како и отворањето на перспективите на Република Македонија кон Европската Унија и НАТО.

„Подготвени сме за брзо, квалитетно и ефикасно спроведување на клучните реформи што ќе обезбедат квалитетен живот за сите граѓани, а ќе ги осигураат и евро-атлантските интеграции на Македонија“, рече премиерот Заев.

Претседателот на Владата, Заев, изрази очекување дека посветеноста на Владата кон реформите ќе биде охрабрување за сите граѓани, за бизнис секторот во Македонија, за странските инвеститори, да вложуваат во Македонија со своите капацитети и со своето знаење, со што ќе придонесат кон развојот на економијата во Македонија.

На средбата беше поздравена поставеноста на Премиерот кон инклузивни политики и транспарентност, како европски демократски вредности.

„Стратешки определби на Република Македонија се Европската Унија и НАТО и јас како премиер и новата Влада сме подготвени да работиме посветено и темелно на европската агенда којашто ќе го отвори патот за развој Република Македонија“, рече премиерот Заев.

Претседателот на Владата, Зоран Заев, на средбата со францускиот амбасадор Кристиан Тимоние најави и развој на добрососедските односи со цел поттикнување на политиките на градење доверба и мостови и со тоа отворање перспективи за граѓаните и државите од целиот регион.

Претседателот на Владата на Република Македонија, Зоран Заев, испрати Честитка до премиерот на Република Црна Гора, Душко Марковиќ за приемот на Црна Гора во НАТО Алијансата.

„Во име на граѓаните и на Владата на Република Македонија им честитам на граѓаните и на Владата на Република Црна Гора за огромниот исчекор кон демократскиот свет, преку интеграцијата на вашата држава како 29. полноправна членка на НАТО Алијансата.

Примерот што го дава Црна Гора е порака дека ако има политичка волја и граѓанска свест за важноста на потребните реформски процеси, тогаш нивното исполнување се реализира со потребната динамика и тоа ги отвора перспективите и за луѓето и за државата.

Овој сигнал на отворени врати на НАТО Алијансата е силна мотивација за новата Влада на Република Македонија што ја предводам, да продолжи да работи според демократските вредности и владеењето на правото и вложувајќи во потребната модернизација на Армијата според НАТО стандардите, во најкус можен рок да ја обезбеди атлантската иднина и на Република Македонија.

НАТО е пред се сојуз на демократии и граѓаните на Македонија, како и граѓаните на Црна Гора и на целиот регион, имаат потреба да бидат дел од цивилизираниот свет што носи  стабилност и безбедност како во нашите држави, така и во светот“, напиша во Честитката за приемот на Црна Гора во НАТО, премиерот Заев до црногорскиот колега Марковиќ.

 

Претседателот на Владата на Република Македонија, Зоран Заев вечерва се сретна со претседателот на една од најголемите издавачки компании на Балканот, Адриа Медиа Груп, Александар Родиќ.

„Пред Македонија е голем предизвик како да се реформираат институциите и да се обезбеди подобар живот за сите граѓани. Владата на Република Македонија е одлучна да спроведе темелни реформи за демократизација на општеството, меѓу кои се и обезбедувањето услови за објективно и професионално новинарство“ рече премиерот Заев.

На средбата беше нагласена важноста на слободата на медиумите коишто известуваа непристрасно за политичките случувања во Македонија за време на политичката криза  како и потребата за целосно слободни медиуми, што е обврска за Република Македонија, нотирана во повеќе извештаи, на Европската Комисија, на експертската група предводена од Рајнхард Прибе и на други меѓународни организации и институции.

Воедно, претседателот на Владата, Зоран Заев, оддаде признание на Адриа Медиа Груп за придонесот во борбата за правото за слободно информирање, и во Македонија и во регионот.

Претседателот на Адриа Медиа Груп, Родиќ го запозна премиерот Заев дека слоган на компанијата е „секогаш на страна на граѓаните“ и дека за нивните вработени новинари информациите што ги пласираат во јавноста секогаш се базираат на фактите, аргументите и вистината.

Во разговорот, претседателот на Адриа Медиа Груп ги истакна идните планови на компанијата, којашто е една од најголемите на Балканот во издавачката индустрија. И покрај сериозните финансиски потешкотии со коишто се соочува медумската сфера и разните притисоци, стратегија на компанијата е и понатаму да се развива и се повеќе да го шири своето влијание во овој дел од Европа.

„Темел на секое демократско општество се слободата на говорот и слободата на медиумите. Владата на Република Македонија ќе обезбеди такви услови за работење на медиумите во земјата„ истакна премиерот Заев на крајот на средбата.

Претседателот на Владата на Република Македонија, Зоран Заев, ја честита историската победа што ја донесоа ракометарите на Вардар вечерва на Република Македонија.

 „Честитам на ракометарите на Вардар кои го донесоа ракометот на Македонија, повторно на врвот на Европа!

Во име на граѓаните на Македонија ви благодарам што сите нас `не направивте горди и среќни.

Игравте со срце на теренот!

Првото место што го освоивте вечерва на финалниот натпревар во Лигата на шампиони ќе биде врежано во меморијата на ракометот и на спортот во Македонија како пример за генерациите што доаѓаат, дека се е остварливо низ тимска работа, упорност и посветеност.

Имам силна верба дека ова е само почеток на успесите што ќе се множат, во ракометот, во спортот и во животот во Република Македонија“, порача премиерот Заев на ракометарите и на граѓаните по вечерашната победа на Вардар, во финалето во Келн, Германија.

Претседателот на Владата на Република Македонија, Зоран Заев упати Телеграма со сочувство до британската премиерка Тереза Меј и до граѓаните на Обединетото Кралство на Велика Британија и Северна Ирска, по синокешниот грозоморен напад во Лондон во којшто има загинати и повредени.

„Во име на граѓаните на Република Македонија, на Владата на Република Македонија и во мое лично име изразувам длабоко сочувство до семејствата на загинатите во ужасниот напад во Лондон, до Владата на Велика Британија и до граѓаните на Британија.

Најостро го осудуваме овој шокирачки кукавички напад врз невини жители на Лондон, на Лондонскиот мост и во околните ресторани, меѓу кои има и посетители на Лондон.

Секој акт на загрозување човечки животи, каде и да се случи е загрозување на слободата и спокојот на целото човештво.

Се солидаризираме со граѓаните на Велика Британија и цврсто и решително застануваме на страната на Британија.

Потребно е да се дејствува мудро и внимателно во интерес на мирот во Велика Британија и во светот. Уверени сме дека истрагата ќе ги расветли до крај мотивите за нападот и нарачателите и инволвираните ќе се соочат со правдата.

Република Македонија е подготвена да помогне и да дејствува обединето со демократскиот цивилизиран свет во справувањето со сите облици на насилство и тероризам.

Нашите мисли и молитви се со граѓаните на Велика Британија“, напиша премиерот Заев во Телеграмата до британската премиерка Меј.