Соопштенија за јавноста

Почитувани претставници на медиумите,

Дозволете и јас да го изразам моето задоволство од приемот овде во централата на НАТО Алијансата, од генералниот секретар на НАТО и неговиот тим. Сакам да изразам благодарност за поддршката која ја добиваме од НАТО, вклучително  и од локалната канцеларија на НАТО во Скопје. Во духот на идната блиска соработка упатив покана и до генералниот секретар да ја посети Македонија.

 Го поздравуваме членството на Црна Гора во НАТО, тоа е големо охрабрување за нас.  Се надеваме дека за брзо време ние ќе бидеме следната добра вест што ќе дојде од НАТО.

 Многу е важно регионот на Западен Балкан да биде безбеден и стабилен. Добри односи со соседите се од исклучителна важност. Посветени сме да ја подобриме соработката со нашите соседи и да оствариме посилна регионална соработка.

 Република Македонија е докажан партнер на НАТО. Даваме придонес во мисиите на ЕУ и НАТО од 2002 година. Во ИСАФ бевме четврта земја пер капита со нашиот придонес. И во иднина ќе бидеме на заедничка страна со НАТО. Насилниот екстремизам и радикализам се заеднички предизивици.  Ќе ги превземаме сите мерки за да ги надминеме.

 Би можеле да дадеме уште поголема поддршка ако сме членки на НАТО. Во Република Македонија постои силна политичка поддршка од сите партии и етнички групи, како и силна поддршка од јавноста за членство во НАТО. Воедно, ние сме посветени на зајакнување на воените и безбедносните капацитети, за да ги постигнеме стандардите на НАТО.

 Но се што сме направиле не е доволно за полноправно членство. Соочени сме со дополнителна и посебна пречка. Иако тоа не е фер, ние сме посветени на подобрување на односите со соседите, зајакнување на дијалогот и на мерките за градење доверба.

 Посакуваме членството во НАТО да биде и за нас реалност во догледно време. Посветени сме и на домашни реформи кои се усогласени со ЕУ. Посветени сме да ја подобриме демократијата и да ја зајакнеме социјална кохезија меѓу сите граѓани. Отворени сме за соработка за сите кои сакаат да придонесат кон нашата заедничка иднина – а тоа е Република Македонија како демократска држава да биде дел од Евро-Атлантското семејство.

 

Одговор на новинарско прашање

П: Г-дине премиер, постои некаква забуна во врска со хронологијата на вашиот план за отпочнување на преговорите за членство во НАТО? Дали ќе се обидете да влезете под друго име? Планирате ли тоа да биде Горна Македонија, БЈРМ? Дали може да ги отпочнете разговорите во овој правец за да можете да го доставите предлогот на референдум пред вашите граѓани? Дали може да ни појасните кој е начинот по кој ќе се движите понатаму?

Благодарам на прашањето, навистина сиве овие години на блокиран процес на интеграциите на Република Македонија во НАТО, не научи сите и испрати порака, се надевам до целиот регион, дека меѓу другото стоењето во место предизвикува и кризи во Република Македонија. Како што реков, ќе се обидеме на сите можни начини да ја придвижиме Македонија кон нејзиното полноправно членство во НАТО. Јас очекувам поддршка од граѓаните во Грција преку власта и преку опозицијата, во поглед на решавање на овој проблем. Постојат овде алтернативи, ние се надеваме дека и со привремената референца можеме да станеме членка на НАТО,  а притоа продолжуваат разговорите на Република Македонија со Грција за нашиот интегративен процес во ЕУ. Или како што покажа до сега и искуството од Црна Гора, барем со привремената референца да добиеме покана од НАТО во согласност со договорите со Грција, а додека тече ратификацијата во сите 29 членки на НАТО, секако добиваме некои 2 години дополнително да изнајдеме решение. Сите можни алтернативи за нас се на располагање, секако, зависи и тоа многу од нашиот јужен сосед. Но, ние ќе бидеме само причина повеќе за да се изнајдат позитивни решенија за стабилност на регионот, а секако тоа е највозможно ако меѓу другото и Македонија стане полноправна членка на НАТО Алијансата.

 

 

Би сакал да го изразам моето искрено задоволство од денешниот состанок со мојот драг пријател, Комесарот Хан. Имавме многу конструктивна и отворена размена на мислења во однос на перспективите на Република Македонија во ЕУ.

Пред да зборувам за содржината на состанокот со комесарот, сакам да изразам големо задоволство за можноста денес да имам средби и со претседателoт Туск, и со потпретседателот на Европската комисија и Висок претставник, Федерика Могерини, ќе имам средба подоцна и со генералниот секретар на НАТО Столтенберг.

Се согласивме дека Македонија, како и останатиот дел од државите од Западен Балкан се партнери на ЕУ и дека сега ни треба поддршка повеќе од кога било, во смисла на сигнали и придвижување во однос на интеграциите во ЕУ.

Им благодарам за охрабрувачките пораки кои што денеска ги примивме токму од нив.

Ова е мојата прва официјална посета откако бев избран за Премиер на Владата на Република Македонија. Тоа ја покажува нашата јасна ориентација и посветеноста на мојата Влада за да го зајакнеме процесот на интеграциите во ЕУ. За нас членството во ЕУ нема алтернатива.

Членството во ЕУ е клучен стратешки приоритет на Република Македонија. Имаме за цел да ги отпочнеме преговорите за членство што е можно побрзо. Македонија е земја кандидат за членство од 2005 година и се уште ги нема започнато преговорите за членство. Верувам дека ќе се согласите со мене дека е крајно време овој процес да се придвижи нанапред.

Сосема ми е јасно дека поддршката која ја уживаме денес треба да биде оправдана со вистинските резултати кои што треба да ги постигнеме дома, кои примарно ќе бидат насочени кон зајакнување на судството, владеењето на правото и реформите во јавната администрација.

Затоа ми причинува особено задоволство што ја имав можноста да разговарам со Комесарот Хан за итните реформски мерки кои се потребни за да Комисијата може да ги тргне условите од препораката за започнување на преговори за членство. Ќе ги продолжиме нашите дискусии и блиски консултации токму во таа насока.

Со мене се и заменик претседателот на Владата за европски интеграции, г-дин. Бујар Османи, министерот за надворешни работи Никола Димитров, како и заменик Претседателот на Владата и министер за одбрана Радмила Шекеринска, бидејќи целата Влада ќе треба да направи напор, во отворен дијалог со опозицијата и граѓанското општество да направи исчекор напред. Мојот план е да подадеме рака и да обезбедиме широк инклузивен процес во општеството и поддршка за реформите.

Развој на добрососедските односи е друг важен дел од мојата програма. Ни требаат добри и силни односи, соработка со нашите соседи, кои ќе бидат базирани на заедничка почит. Заради тоа, мојата прва билатерална посета овој месец ќе биде во Софија, да се сретнам и дискутирам со премиерот Борисов за тоа како може да ја зајакнеме соработката и да изградиме мостови за взаемна поддршка.

Исто така, министерот за надворешни работи патува во Атина во среда со цел да отвори нови можности за поблиска политичка соработка.

За време на средбата со комесарот Хан разговаравме за Транспортната заедница и договорот кој што ќе биде потпишан на Самитот во Трст. Искажавме интерес да бидеме држава домаќин на седиштето на Секретаријатот на Транспортната заедница. Исто така даваме целосна поддршка на иницијативата за Регионална економска интеграција која на Берлинскиот процес ќе му даде дополнителна суштина.

На самиот крај, би сакал да кажам нешто за заедничките предизвици со коишто се соочуваме сите заеднички: миграцијата, борбата против тероризмот, радикализмот и насилниот екстремизам кои се многу важни заеднички предизвици кои подеднакво не загрижуваат сите нас. Токму затоа овие предизвици бараат заеднички и глобален пристап и ангажман за нивно решавање.

Во таа смисла, дозволете ми да ја подвлечам нашата посветеност да работиме заедно со ЕУ на соочување со овие предизвици бидејќи тие не запираат на ниту една граница ниту пак постои држава која е имуна на овие предизвици.

 

П1: Господине Заев, дали има Владата капацитет и конкретна реформска агенда да испорача резултати со цел Комисијата наесен да ја обнови препораката имајќи предвид дека голем дел од клучните реформски приоритети бараат и поддршка од опозицијата?

Благодарам на прашањето. Како што реков и во изјавата, тоа беше дел и од разговорите со Комесарот Хан. Имаме намера да ја придвижиме Македонија многу брзо кон целосна интеграција во Европската унија, секако соодветно на чекорите коишто претстојат, преку повик и вградување на опозицијата, граѓанското општество и сите други чинители коишто имаат свој капацитет и можат да помогнат во овој процес. Уште во процесот на формирањето на Владата ги испративме пораките на соработка, на инклузивност внатре. Како што знаете за прв пат од самостојноста на Македонија, предадовме мнозинство во комисиите во Парламентот, неколку на број да бидат токму водени од опозицијата заради тоа што ако имаме успех на овој пат, успехот ќе биде заеднички и на власта и на опозицијата, и на граѓанскиот сектор и на сите коишто ги повикуваме и еве овде од Брисел, да се вградат и да придонесат кон брзо чекорење кон добивање на датум за преговори и секако полноправно членство на Македонија во Европската Унија.

П2: Ќе се обидам да бидам конкретен, дали е технички изводливо за Европската Унија и политички прифатливо од ваша страна, да се поднесе апликација за членство и да се напредува под времената референца БЈРМ?

Јас знам дека секогаш ако се има пријателски однос, добар пристап може да се најде решение на се. Едно ми е јасно дека Македонија во периодот пред нас ќе се занимава повеќе со европската иднина отколку со европското минато, или минатото на нашите земји од самиот регион.  Истовремено, сум свесен дека Грција е наш голем пријател и тие можат, секако, да застанат на нашиот процес во интеграциите, буквално на секое подглавје, вкупно 35 пати, но во моментот, ако Македонија даде причина градејќи дополнително пријателство со своите соседи, вклучително и со Грција, можеме да очекуваме дека ќе се створи во најмала рака, поголем позитивен амбиент за разговарање и за ова чувствително прашање. Јас знам дека на мојата земја и треба поддршка од соседите, и треба поддршка и од Грција и заради тоа знам дека пријателите, граѓаните на Грција преку владејачката партија и преку опозицијата, ќе водат грижа да и помогнат на Македонија на својот пат кон интеграциите во Европската Унија и на својот пат кон интеграциите во НАТО.

 

Претседателот на Владата на Република Македонија, Зоран Заев, придружуван од вицепремиерката и министерка за одбрана Радмила Шекеринска, вицепремиерот за евроинтеграции Бујар Османи и министерот за надворешни работи Никола Димитров во Брисел се сретна со претседателот на Европскиот совет Доналд Туск.

Европските перспективи на Македонија беше клучна тема на разговорот.

„Новата Влада е подготвена да предводи силен и квалитетен реформски процес со цел обновување на препораката за преговори на Република Македонија со ЕУ, до крајот на оваа година. Но од голема важност е и поддршката од Европскиот совет за изнаоѓање решенија со коишто билатерални прашања нема да претставуваат долгорочна блокада на процесот на пристапување во ЕУ“, рече премиерот Заев.

Претседателот на Владата, Заев се заблагодари на претседателот на Европскиот совет, Туск, за позитивните сигнали од европските институции за поддршка на евроинтеграциските аспирации на Македонија.

„Ова е силен поттик за Владата, во соработка со Брисел, да ги испорача потребните реформи за деблокирање на препораката за преговори за членство во ЕУ. Се надеваме дека Советот во декември ќе ги прифати заклучоците што водат кон отворање преговори за пристапување на Македонија кон Европската унија. Амбициозни сме бидејќи е изгубено многу време во евроинтегрцискиот процес на Македонија“, рече премиерот Заев.

Претседателот на Владата, Заев го посочи како важен ангажманот на ЕУ во регионот на Западен Балкан, во делот на споделувањето европски демократски вредности, како и за поширока безбедносна стабилност.

На средбата беше нагласена посветеноста на Владата на Македонија за регионална соработка и што ќе ги отвори и зацврсти европските перспективи на државите.

Претседателот на Европскиот совет Доналд Туск го поздрави формирањето на новата Влада во Македонија и оцени дека тоа е одлична можност за придвижување на евроатлантските аспирации на земјата. Претседателот на Советот, Туск, изрази очекување дека Република Македонија ќе го подобри својот углед преку посветена работа, меѓуетнички и меѓупартиски дијалог и добрососедски односи.

По средбата со Туск, премиерот Заев, придружуван од владината делегација има работен ручек  со комесарот за проширување на ЕУ, Јоханес Хан. Потоа следува средба со генералниот секретар на НАТО, Јенс Столтенберг. Претходно премиерот Заев имаше средба со високата претставничка на Европската унија за надворешна политика и безбедност, Федерика Могерини.  

Делегација на Владата на Република Македонија предводена од премиерот Зоран Заев, ја почна првата официјална посета на Брисел.

Остварена е средба со високата претставничка за надворешна и безбедносна политика на ЕУ и потпретседателка на ЕК, Федерика Могерини.

Премиерот Заев го придружуваат вицепремиерката и министерка за одбрана, Радмила Шекеринска, вицепремиерот за евроинтеграции Бујар Османи и министерот за надворешни работи Никола Димитров.

Претседателот на Владата, Заев, на средбата со високата претставничка на ЕУ, Могерини, нагласи дека првата официјална дипломатска посета што се реализира во Брисел, заедно со министрите задолжени за реализација на надворешно - политичките приоритети на Македонија, ја покажува одлучноста на Владата на Република Македонија за забрзување на евроинтегративниот процес.

„Во интерес на граѓаните на Македонија е иницијативата за нова динамика во евроинтегративниот процес. Нашата цел е до есен да обезбедиме доволен прогрес во клучните реформски области, со што ќе дадеме доволно аргументи на Европската комисија да презентира нов извештај пред земјите членки, со обновена препорака за отпочнување на преговорите за членство на Македонија во ЕУ“ рече премиерот Заев.

Претседателот на Владата, Заев, на средбата соопшти дека добрососедските односи и регионалната соработка, засновани на меѓусебно почитување, се силна определба на Владата. На средбата беше нагласено како важно отворањето на поглавјата 23 и 24 од претпристапните преоговори.

Високата претставничка за заедничка надворешна и безбедносна политика на ЕУ, Могерини, изрази цврста поддршка на реформските напори на новата Влада и најави дека Македонија има силен сојузник во ЕУ при спроведувањето на реформите. Пораката од високата претставничка од ЕУ, Могерини е дека ако реформите бидат спроведени, Европската унија е подготвена да возврати.

По средбата со високата преставничка за надворешна и безбедносна политика, Могерини, премиерот Зоран Заев, придружуван од владината делегација, ќе одржи средба со претседателот на Европскиот совет, Доналд Туск, со еврокомесарот за проширување на ЕУ, Јоханес Хан и со генералниот секретар на НАТО, Јенс Столтенберг.

Почитувани,

Делегација на Владата на Република Македонија, предводена од премиерот Зоран Заев, а во која се и вицепремиерката и министер за одбрана Радмила Шекеринска, вицепремиерот за евроинтеграции Бујар Османи и министерот за надворешни работи Никола Димитров, денеска е во прва официјална посета на Брисел, на средби со првите луѓе на ЕУ и НАТО.

Ве исвестуваме дека линкот за пренос од прес конференцијата  на претседателот на Владата на Република Македонија, Зоран Заев со еврокомесарот за добрососедска политика и преговори за проширување, Јоханес Хан, планирана за 14.30 часот, ќе можете да ја следите во живо на следниот линк:

http://ec.europa.eu/avservices/ebs/schedule.cfm?sitelang=en&page=3&insti...

Воедно Ве известуваме дека во живо преку интернет страницата на НАТО ќе се емитува и прес конференцијата на премиерот Зоран Заев и генералниот секретар на НАТО, Јан Столтенберг. Прес конференцијата е предвидена за во 16.15 часот. Во живо, прес  конференцијата ќе може да се следи на следниот линк:

 http://www.nato.int

За информации од владината делегација следете и на Twitter (@VladaMK) како и на Facebook (https://www.facebook.com/VladaMK)

За сите информации ќе бидете навремено информирани преку редовни соопштенија од Секторот за односи со јавноста на Владата на РМ.

За прв пат висока државна делегација од Република Македонија во еден ден ќе има средби со сите високи претставници на ЕУ и НАТО.

Претседателот на Владата на РМ Зоран Заев на првата официјална посета во Брисел, каде е придружуван од вицепремиерката и министер за одбрана Радмила Шекеринска, вицепремиерот за евроинтеграции Бујар Османи и министерот за надворешни работи Никола Димитров, ќе има средби со претседателот на Европскиот Совет Доналд Туск, со високата претставничка за заедничка надворешна и безбедносна политика на ЕУ и потпретседател на ЕК, Федерика Могерини, комесарот за европска соседска политика и преговори за проширување Јоханес Хан, како и со генералниот секретар на НАТО, Јенс Столтенберг.

Целта на посетата е Владата да ја потврди својата целосна посветеност на интеграците во ЕУ и НАТО, како стратешка цел на земјата и да ги  презентира реформските приоритети во агендата на Владата за враќање на Република Македонија на патот на евроатланските интеграции.

Премиерот Зоран Заев утре во Брисел ќе се сретне со високи претставици на ЕУ и НАТО, во прва официјална посета по преземањето на должноста, чија цел е Владата да ја потврди својата целосна посветеност на интеграците во ЕУ и НАТО, како стратешка цел на земјата и да ги  презентира реформските приоритети во агендата на Владата за враќање на земјава на патот на евроатлансите интеграции.

Премиерот Зоран Заев, кој е придружуван од вицепремиерката и министер за одбрана Радмила Шекеринска, вицепремиерот за евроинтеграции Бујар Османи и министерот за надворешни работи Никола Димитров, во седиштето на Европската Комисија и на Европскиот Совет во Брисел ќе се сретне со претседателот на Европскиот Совет Донал Туск, со високата претставничка за заедничка надворешна и безбедносна политика на ЕУ и потпретседател на ЕК, Федерика Могерини, и со комесарот за европска соседска политика и преговори за проширување Јоханес Хан.

Владината делегација ќе има средба и со генералниот секретар на НАТО, Јенс Столтенберг.

“Како премиер длабоко ги ценам пораките за поддршка на новата Влада кои деновиве ги добив од челниците на ЕУ и НАТО. Сите без исклучок гледаат голема надеж во мојот Кабинет и во новата влада да ја врати земјата на европскиот пат. Тоа за нас е дополнителен мотив веднаш да се зафатиме со реформските процеси што сме ги ветиле пред граѓаните и пред нашите пријатели во Брисел да претставиме конкретна реформска агенда, која ќе ги деблокира процесите за напредок кон членство во ЕУ со обновување на препораката за почеток на преговори која поради политичката криза е замрзната веќе две години. Владата е силно посветена со конкретен план за реформи во соработка со институциите на ЕУ да работи и на изнаоѓање решенија за отворање на поглавјата 23 и 24, како суштински не само во процесот на преговори за пристапување, туку и за реформите на домашен план, коишто треба да го вратат владеењето на правото и довербата на граѓаните во институциите“ – порачува премиерот Зоран Заев.

Итните реформски приоритети, веќе посочени од ЕУ, се во фокусот и на НАТО. На средбата со генералниот секретар на НАТО, Јенс Столтенберг, владината делегација ќе ја презентира решеноста за унапредување на добрососедските односи врз основа на взаемно почитување, определбата да се продолжи со придонесот во мисиите на Алијансата, како и заложбите да се обезбедат сите потребни предуслови за натамошно осовременување на Армијата на РМ согласно стандардите на НАТО.

Претседателот на Владата на Република Македонија, Зоран Заев, попладнево се сретна со амбасадорот на Република  Словенија во Македонија, Милан Јазбец.

На средбата е изразена силна поддршка за новата реформска Влада предводена од премиерот Заев, како можност за најсериозен исчекор досега на Македонија во евроатлантските интеграции.

„Владата презема обврска и ќе ги спроведе потребните реформи што треба да донесат добра иднина на граѓаните и на Република Македонија“, рече премиерот Заев.

На состанокот посебно е нагласена потребата за реформи во правосудството што треба да обезбеди функционирање на правната држава.

Претседателот на Владата, Заев најави интеграција на сите сили во општеството за реализација на важните реформи. Исто така премиерот Заев ја потврди определеноста на Владата за добрососедски односи, со цел продлабочување на соработката во регионот, во интерес на граѓаните и државите.

На состанокот се разговараше и за интензивирање на економската соработка помеѓу Македонија и Словенија, како и за можноста за нови словенечки проекти во Македонија, во областа на економијата.

Словенечкиот амбасадор Јазбец соопшти дека Република Словенија останува силен поддржувач на интеграциите на Македонија во ЕУ и НАТО и дека на новата реформска Влада се гледа како на сериозен партнер во односите, како меѓу Македонија и Словенија, така и меѓу Македонија и ЕУ. Премиерот Заев изрази благодарност од име на граѓаните на Република Македонија за помошта, заложбите и големиот пријател што го има Македонија во Република Словенија, во сите важни демократски процеси и во евроатлантските интеграции. 

Претседателот на Владата на Република Македонија, Зоран Заев денеска се сретна со амбасадорот на Република Италија во Македонија, Карло Ромео.

Клучни теми на состанокот беа евро-атланската иднина на Република Македонија и унапредувањето на соработката помеѓу Македонија и Италија.

„Посветени сме силно на реформите, затоа што тоа е патот на Македонија кон ЕУ и НАТО и кон квалитетен живот за граѓаните на Македонија“, рече премиерот Заев.

Претседателот на Владата на Македонија најави конструктивни политики со сите политички субјекти и институции во државата, како и интегрирање на експертската јавност во реформскиот процес важен за перспективите на државата.

Констатирано е дека една од важните реформи за граѓаните и за Македонија е обезбедување услови за независно правосудство. Премиерот Заев најави дека новата Влада ќе води политики на градење и почитување независни институции што ќе работат за доброто на сите граѓани. 

„Ветивме дека Македонија ќе биде правна држава и дека правдата ќе биде достапна на сите. Ова е од интерес на сите граѓани и се надевам на широка свест и поддршка“ рече премиерот Заев.

На средбата е изразена подготвеност за продлабочување на соработката помеѓу Македонија и Италија, посебно во образованието и на економски план. Разговарано е за италијански инвестиции во Македонија, како и за искуствата што може да ги примени Македонија од Италија во делот на развојот на малите и средни претпријатија.

Италијанскиот амбасадор Ромео рече дека Република Италија останува голем пријател на Македонија и поддржувач на евроинтеграциите, за што премиерот Заев изрази благодарност во име на граѓаните на Република  Македонија

Канцеларката на Сојузна Република Германија, Ангела Меркел денеска упати честитка до претседателот на Владата на Република Македонија, Зоран Заев по повод неговиот избор за премиер и формирањето на новата Влада.

„Срдечно Ви честитам за Вашиот избор за премиер. Сојузната влада решително ја поддржува целта на понатамошното приближување на Вашата земја до Европската Унија и НАТО. Сојузна Република Германија со задоволство ќе Ве поддржи во Вашите заложби“, се вели во честитката.

„Се радувам што лично ќе се запознаеме на следната Конференција за Западен Балкан на 12 јули во Трст“, додава канцеларката Меркел во честитката упатена до премиерот Заев.