Соопштенија за јавноста

Претседателот на Владата на Република Македонија, Зоран Заев, придружуван од заменикот на претседателот на Владата, задолжен за економски прашања и за координација со економските ресори, Кочо Анѓушев, заменикот на претседателот на Владата и министер за внатрешни работи, Оливер Спасовски, министерката за труд и социјална политика, Мила Царовска и претставникот од Министерството за животна средина, Лирим Шабани, денеска се сретна со претставниците на Синдикатот на работници во комбинатот Југохром, Бајрам Амити и Светислав Спасовски, како и со генералната секретарка на СИЕР, Маре Анчева.

На средбата се разговараше за можноста за рестартирање на комбинатот Југохром, којшто не работи веќе 8 месеци, поради што 1.200 вработени се без егзистенција.

„Решение за проблемот има, ако постои волја од сите засегнати страни. Проблемот треба да се реши институционално. Ќе направиме се, преку активна посветеност, да помогнеме ова прашање да се реши“, рече претседателот Заев.

Претставниците на Синдикатот на работници на Југохром го изложија проблемот со којшто се соочени изминатите месеци, по престанокот на работа на комбинатот. Се пожалија на несериозен однос кон прашањето изминатите месеци, поради што цели семејства гладуваат, а некои од нив заминале од родните огништа. Амити, Спасовски и Анчева во име на работниците од Југохром изразија верба дека новата Влада ќе најде решение во интерес на сите страни и на граѓаните.

На средбата премиерот Заев и владините претставници соопштија дека Владата со сериозност пристапува кон секое прашање што се однесува на потребите на граѓаните.

„Овде станува збор за можноста за обезбедување плати за 1.200 луѓе. Но исто така интерес и на општеството е овој единствен индустриски капацитет во тетовскиот регион да работи. Со тоа ќе прави профит, ако работи добро, ќе има можност и за повисоки плати на вработените и за нови вработувања, а тоа ќе придонесе и кон развојот на економијата кон што сме силно определени. Но важно е, за здравјето и на работниците и на сите граѓани во регионот, да бидат задоволени и потребните еколошки стандарди. Како што ветивме, еден од првите чекори што ги правиме е нашата заложба да помогнеме во решавањето проблемот со работата на Југохром“ рече претседателот Заев.

На средбата разгледани се повеќе приоди за надминување на проблемот. Премиерот Заев најави дека по денешната средба со синдикалните преставници на вработените во Југохром, тој и претставниците на Владата ќе се сретнат и со менаџментот на фабриката, во врска со поставувањето на еколошките филтри, како и со еколошките здруженија. 

Претседателот на Владата на Република Македонија, Зоран Заев, испрати телеграма со сочувство за загубата на поранешниот германски канцелар Хелмут Кол до канцеларката на Сојузна Република Германија, Ангела Меркел и до граѓаните на Германија.

„Изразувам длабоко жалење и искрено сочувство за смртта на поранешниот германски канцелар Хелмут Кол, во име на граѓаните на Македонија, на Владата на Република Македонија и во мое име.

Граѓаните на Сојузна Република Германија загубија голем човек и политичар кој го препозна обединувањето како вредност и пат што води напред и успеа да ја обедини Германија и да обезбеди стабилна иднина на државата.

Она што го остави  овој голем европски државник зад себе е наследство на целиот свет. Тоа се мостовите на пријателства со државите и меѓу државите во светот, градени низ мирољубиви политики.

Како борец на помирувањето, поранешниот канцелар Хол се вгради во темелите на политичката и економската интеграција на Европа.

Подаде рака на Република Македонија при процесот на осамостојувањето на нашата држава, со што останува дел и од политичката меморија на Македонија и нејзините граѓани.

Визијата на нашиот пријател, Хелмуд Кол, за сојузништва меѓу земјите и неговата мудра упорност преку којашто ги надминуваше пречките што изгледаат непремостливи останува пример како низ зрелите политики се постигнува мир, стабилност, безбедност, соработка и просперитет, тоа што и денес им е потребно на државите и на светот“, напиша претседателот на Владата на Македонија, Заев во телеграмата до германската канцеларка Меркел.

 

Претседателот на Владата на Република Македонија, Зоран Заев, придружуван од министерот Роберт Поповски задолжен за комуникации, транспаретност и отчетност денеска се сретнаа со претставници на Здржението на новинари на Македонија и на Самостојниот синдикат на новинари и на медиумски работници.

Тема на состанокот беа потребните медиумски реформи.

Премиерот Заев информираше дека Владата е целосно определена да создаде услови за објективно и професионално работење на медиумите.

„Владата е подготвена во соработка со новинарските здруженија и организации да спроведе итни и квалитетни  медиумски реформи. Граѓаните имаат право да бидат навремено и точно информирани. Лошата состојба со медиумите во Македонија, констатирана во извештаите на сите домашни и меѓународни организации, оваа Влада ќе ја смени. Целта на новата Влада  е да го заштити достоинството на новинарите и медиумските работници, тие да работат без притисоци, слободно и професионално. За таа цел ќе ги земеме предвид приоритетите изложени од ЗНМ и ССНМ како неопходни во медиумската сфера“, рече премиерот Заев.

Исто така претседателот на Владата, Заев изрази подготвеност да се направат сите неопходни законски измени за гарантирање на слободата на говорот и за независноста на медиумите, за да се заштитат новинарите и медиумските работници од насилства. 

Двете новинарски организации соопштија конкретни решенија околу финансирањето на медиумите, реформата на јавниот сервис и за подобрувањето на работничките права во редакциите.

Премиерот Заев и министерот Поповски задолжен за комуникации, транспаретност и отчетност се обврзаа на отворени комуникации, целосна транспарентност и отчетност на Владата и на институциите.

Изразена е заедничка согласност за соработка на принципиелно ниво, со цел зајакнување и унапредување на професионалните стандарди, како и на концептот на саморегулација во медиумите.

 

 

Претседателот на Владата на Република Македонија, Зоран Заев, денеска се сретна со амбасадорката на Република Хрватска во Македонија, Данијела Баришиќ.

На средбата е заеднички поздравена добрата соработка помеѓу Република Македонија и Република Хрватска и е изразено уверување дека таа ќе се продлабочува во периодот што претстои.

Изразено е уверување дека по промените во Македонија се отворени евро-атлантските перспективи за државата.

„Владата работи мотивирано и со полн капацитет да ги стабилизира финансиски граѓаните и државата. Истовремено работиме на интензивна реформска агенда којашто ќе обезбеди демократски, независни институции и владеење на правото, како дел од потребните европски вредности и за граѓаните во Македонија и за интеграциските процеси на државата. Целта на Владата е реализација на стратешките цели на Република Македонија, членство во Европската унија и НАТО“, рече премиерот Заев.

Хрватската амбасадорка пренесе дека има позитивни оддеци во Брисел од реформската посветеност на новата демократска Влада.

Претседателот на Владата, Заев соопшти дека Владата е насочена кон продлабочување на добрососедските односи во регионот, како и со земјите членки на Европската унија и од демократскиот свет, со цел соработка во сите области што можат да придонесат кон подобрување на квалитетот на живот на граѓаните на Македонија.

Во таа насока амбасадорката Баришиќ најави можности за интензивирање на економската соработка меѓу Македонија и Хрватска, со оглед на изразениот интерес на хрватски бизнисмени. Хрватската амбасадорка ја потврди определбата на Република Хрватска за поддршка на Република Македонија во реализацијата на евро-атлантските цели.

Претседателот на Владата на Република Македонија, Зоран Заев, денеска се сретна со амбасадорот на Република Албанија во Македонија, Фатос Река.

На средбата се разговараше за евро-атланската иднина на регионот и за добрососедските односи.

„Министрите во новата Влада на Македонија работат заеднички и мотивирано на евро-атлантските интеграции на Република Македонија и на обезбедувањето квалитетен живот за сите граѓани. Како Влада насочени сме силно кон изградба на демократска Република Македонија, едно општество за сите граѓани, со отворени перспективи кон стратешките цели на државата, Европската унија и НАТО“, рече премиерот Заев.

На средбата, претседателот на Владата, Заев соопшти дека Владата веќе работи на интензивна реформска агенда за областите важни за евро-атлантските интеграциски процеси, како што се правната држава и независни институции што работат исклучиво во граѓански интерес.

Премиерот Заев соопшти дека Владата е силно насочена и кон економски развој на државата, преку голема државна поддршка на домашните мали и средни претпријатија, како и овозможување услови за реални и квалитетни странски инвестиции. Целта е отворање нови работни места за граѓаните и покачување на платите во државата.

Амбасадорот Река, му врачи писмо на премиерот Заев од албанскиот премиер Еди Рама, во кое што тој му го честита изборот за претседател на Владата на Република Македонија. Амбасадор Река ја нагласи поддршката од Република Албанија за членство на Република Македонија во НАТО.

На состанокот, заеднички е констатирано дека добрососедските односи и регионалниот развој отвораат перспективи за сите држави и за граѓаните на сите земји.

 

Почитувани граѓани, почитувани мои сограѓани од Струмица почитуван амбасадор на САД, Џес Бејли, почитуван потпретседател на операциите на фабриката Адиент, Владимир Теплик, почитувани присутни, претставници на медиумите, почитувани пратеници, советници, градоначалници, мои сограѓани. многу ми е драго што еве денеска сме овде во еден убав свечен момент.

Како Влада, силно посветена на евро-атлантските интеграции, широко ги отвораме перспективите на Република Македонија, за квалитетен живот на граѓаните на нашата земја.

Отворањето на американската фабрика Адиент, којашто почна да се гради пред доаѓањето на новата Влада, овде во технолошко индустриската развојна зона во Струмица. Проектот го почна претходната Влада, како градоначалник тогаш дадов поддршка на овој проект и го поздравив. Еве, денеска ја имам честа да присуствувам на неговото свечено отворање, да го поздравам да ја понудам целосната поддршка моја и на новата Влада во нејзината перспектива која што проектира овде за струмичкиот регион и за нашата Македонија. Оваа странска, американска инвестиција отвора работни места и поради тоа е од огромно значење на граѓаните на нашата земја. Инвеститорот ќе остварува приход и профит. Граѓани на Македонија ќе бидат вработени. А државата ќе наплаќа данок. Сето тоа е добро и корисно за сите и тука сум да испратам порака дека ние, како сериозна и одговорна Влада го поддржуваме овој значаен проект.

И сакам да ве уверам дека ќе одиме чекори понатаму во работата во интерес на граѓаните. Ќе работиме да обезбедиме услови, оваа компанија, позната за регионот, којашто се решила да инвестира тука, да остане и да се развива во нашата држава и да отвори и нови работни места, покрај најавените.

Инвестициите и се потребни на Македонија и поради тоа ќе посветиме големо внимание на развивањето поволна деловна клима во државата. Во тоа име, ги поздравувам сите државни службеници кои работеа досега и продолжуваат да работат на привлекување странски инвестиции како и овозможување на поволна клима, секако рамноправно и на домашните инвеститори.

Струмица е првата општина во Југоисточна Европа којашто доби Меѓународен сертификат за поволно деловно опкружување пред 5 години, како еден од најважните фактори за бизнис секторот и привлекување на инвеститори. Општината има најдобри практики за транспарентно работење. Затоа и невработеноста во овој дел од Македонија е на ниско ниво. Затоа и интересот за инвестирање овде е голем.

Но уверен сум, од одлучноста и ентузијазмот со којшто работи новата Влада, дека доаѓаат и добри времиња за сите граѓани на Македонија.

Уверен сум дека ќе успееме да го свртиме вниманието кон нашата држава како сигурна правна држава, достојна за реални и квалитетни странски инвестиции.

Преку реформскиот процес зад којшто застанавме цврсто како Влада, ќе ги отвориме евро-атлантските интеграции на Македонија. Насочени сме да овозможиме доследна примена на законските и правните регулативи, со еднакви шанси за сите и со политики на нула корупција.  

И ова ќе има двоен ефект.

Исполнувањето на условите за ЕУ и НАТО, ќе ја постави Македонија меѓу државите стабилни за инвестирање. Тоа ќе биде охрабрување за странските инвеститори, вистински, квалитетни, модерни, развиени компании како оваа, да вложуваат во Македонија.

Но ќе биде охрабрување и за домашните фирми.

Најавивме дека Владата ќе насочи голема државна помош и кон домашните фирми.

Таа конкуренција на економскиот пазар помеѓу фирмите, ќе стимулира квалитет во работењето, ќе поттикнува конструктивна конкуренција во обезбедувањето подобри услови за работа во Македонија, поголема грижа за работниците, повисоки плати.

На овој начин ќе обезбедиме поволна деловна клима во целата држава.

Нашата цел е, почитувани граѓани, и инвеститори - актуелни и потенцијални, како држава да обезбедиме вистински развој на бизнис секторот, затоа што само тоа е патот кон посакуваниот и потребниот економски развој на Република Македонија.

Ако фирмите и компаниите добро работат, тогаш ќе има и повисоки плати за работниците и нови работни места за граѓаните. Ќе има и економска стабилност и напредок во државата.

Македонија има природни потенцијали, има вредни работници, има и квалификувана работна сила.  

Тоа што е потребно е политичка добра волја. Добра волја да се работи за доброто на сите граѓани на Република Македонија.

 

Оттука сакам да ја испратам пораката. Ќе се грижиме за секој работник. Ќе се грижиме за секоја фирма, претпријатие, компанија.

Нема да има привилегии.

Во правна и праведна држава, новата Влада на Република Македонија ќе го реализира ветеното општество на отворени можности: на граѓаните за своите егзистенции, на фирмите за нивниот развој, на перспективите за Република Македонија што ќе значат перспективи за секој кој живее и работи во нашата држава.

На крајот, посакувам топло добредојде на инвеститорот Адиент, и нека оваа инвестиција во мојата Струмица биде охрабрување дека Владата на Република Македонија подава рака на секој, бидејќи сакаме, а и можеме и знаеме како да ја донесеме Македонија меѓу развиените држави во регионот, а потоа секако и пошироко, какви што се нашите сериозни стратешки определби и цели.

Благодарам за можноста денеска да се обратам и нека е со среќа од мое име и од име на Владата на Република Македонија.


 

 
 
 
 
 

Претседателот на  Владата на Република Македонија, Зоран Заев, утрото се сретна со амбасадорот на државата Израел во Република Македонија Дан Орјан.

Израелскиот амбасадор Орјан на премиерот Заев му врачи честитка од име на израелскиот премиер Бенјамин Нетанјаху, за неговиот избор за претседател на Владата на Република Македонија.

На средбата е изразена поддршка на промените во Македонија, во коишто се гледа можност за стабилност во државата и економски перспективи.

Амбасадорот на Израел Орјан  најави интерес на израелски компании за инвестирање во Македонија, кои чекале на политичка стабилизација на Република Македонија. Земјоделството, енергетиката се некои од областите за кои има потенцијални  инвеститори.

„Ќе ја продолжиме и ќе ја засилиме добрата соработка со Израел, на сите полиња, што може да придонесе до квалитетен живот на граѓаните на Македонија. Новата Влада е силно ориентирана кон економски развој на државата, а инвестициите се важни за отворањето нови работни места. За таа цел, Владата посветено работи на обезбедувањето услови за работа на компаниите со што се отвораат можности и за достоинствена егзистенција за работниците и граѓаните на Македонија“, рече премиерот Заев.

На средбата е поздравена добрата соработка помеѓу двете држави. Амбасадорот на Израел се заблагодари за грижата на државата за еврејската заедница во Република  Македонија. Договорено е продлабочување  на односите помеѓу двете земји и преку средби и посети на високо владино и државно ниво.

Претседателот на Владата на Република Македонија, Зоран Заев, попладнево се сретна со Мариа Ноел Ваеза, директорка на Програмата за жените на ОН, оддел на ОН за родова еднаквост и зајакнување на жените и Доминика Стојаноска, шефица на Канцеларијата на ОН во Скопје.

На состанокот се разговараше за унапредувањето на улогата на жените во општеството, како и за значајноста на прашањето за обезбедување родова еднаквост.

Поздравена е насоченоста на премиерот Заев и на новата Влада кон имплементација на родовата еднаквост во генералните политики.

Премиерот Заев ја нагласи решителноста на Владата, во Република Македонија достоинствено да се третираат и почитуваат родовите политики.

„Доказ за тоа се бројните мерки во Програмата на Владата, со што обезбедуваме еднакви можности за жените и за мажите во општеството, преку еднаков пристап до платена и пристојна работа, како и зајакнување на институционалната грижа во семејствата со цел еднаква распределба на домашните обврски меѓу жените и мажите.

На средбата е нагласена потребата од учество на жените во мировни процеси, за што ОН веќе работат на Акционен план, со цел поголема вклученост на жените во одбрамбените процеси. Премиерот Заев соопшти дека Владата на Република Македонија веќе има министерка жена, на раководна позиција во Одбраната и дека во план е вклучување на жени и на други значајни општествени позиции. 

Високата претставничка од ОН, Ваеза, изрази поддршка на евро-атлантските аспирации на Република Македонија и оцени дека гледаат добар партнер во Владата на Македонија, за продлабочување на натамошната соработка со нашата држава. 

Претседателот на Владата, Заев се заблагодари на бројните проекти на развојната мрежа на ОН, УНДП, во Македонија, што придонесува кон подобрување на квалитетот на живот на граѓаните на Македонија во различни значајни области.

Претседателот на Владата на Република Македонија, Зоран Заев, денеска се сретна со амбасадорот на Обединетото Кралство на Велика Британија и Северна Ирска во Македонија, Чарлс Едмунд Гарет.

На средбата е поздравена определбата на премерот Заев и на новата Влада кон реформските процеси што треба да отворат перспективи за граѓаните и за државата, како и конструктивните и инклузивни политики, и неговиот искрен пристап да ја спои позитивната енергија во општеството кон општо добро.

Амбасадорот Гарет, во име на британската премиерка Тереза Меј  му врачи и честитка на премиерот Заев, за неговото стапување на должност претседател на Владата на Република Македонија, со јасно изразена надеж дека новата Влада отвора пат за напредок на Република Македонија.

„После долгогодишна политичка криза, новата Влада има важна можност да ги имплементира многу потребните реформи“, стои во честитката.

Британската премиерка Меј ја охабрува посветеноста на Владата за зајакнување на влаедеењето на правото, спроведување на потребните судски реформи и градењето независни институции.

„Сите овие работи се важни за стабилноста на Македонија и напредокот на евро-атланскиот пат на Република Македонија“, стои меѓу другото во честитиката од премиерката Меј до премиерот Заев. 

„Владата и јас како премиер сме силно посветени за видливо придвижување на реформскиот процес, што, како што е констатирано и со нашите партнери во Брисел, ги отвора евро-атлантските перспективи на Македонија“, рече премиерот Заев. 

Претседателот на Владата, Заев, соопшти дека ги очекува првите резултати од реформите во септември, за кога изрази надеж дека ќе биде почната и втората фаза сериозни реформи потребни за квалитетот на живот за граѓаните и интеграциските процеси.

На средбата, премиерот Заев рече дека Владата е определена, во интерес на сите граѓани, да ги вклучи во реформските процеси граѓанскиот сектор, опозицијата, како и сите кои сакаат и можат да помогнат. Исто така премиерот Заев соопшти дека новата Влада е насочена да гради заедничка европска иднина со соседите, во интерес на стабилноста на регионот и негов развој.

Британскиот амбасадор Гарет, на средбата со премиерот Заев соопшти дека Велика Британија  останува голем пријател на Македонија на патот на демократските и интеграциските процеси,  во интерес на граѓаните на Македонија, како и одблиску заинтересирана за стабилноста, безбедноста и просперитетот на целиот регион.

Претседателот на Владата на Република Македонија, Зоран Заев, попладнево се сретна со Олег Шчербак, амбасадор на Руската Федерација во Република Македонија.

На средбата се разговараше за приритетите на новата Влада во Македонија како и можностите за соработка помеѓу Република Македонија и Руската Федерација на демократска основа и во областите значајни за граѓаните за двете земји.

„Приоритет за Република Македонија е членство во Европската унија и во НАТО. За таа цел насочени сме кон брз и квалитетен реформски процес“, рече премиерот Заев.

Претседателот на Владата, Заев нагласи дека Република Македонија е определена да ги јакне односите со државите пријатели на Македонија, во духот на демократските вредности и подобрување на квалитетот на живот на граѓаните.

Заеднички е констатирано дека постојат услови да се унапреди економската соработка меѓу двете држави.

„Развојот на соработката во областа на економијата, трговијата, културата, образованието може да донесе добро за граѓаните на двете земји“ рече премиерот Заев.

Амбасадорот Шчербак му врачи на премиерот Заев честитка од премиерот Дмитриј Медведев, за неговото именување за претседател на новата Влада на Македонија. Премиерот Заев врачи на рускиот амбасадор Шчербак честитка за 12 јуни – националниот ден на Руската Федерација.