Соопштенија за јавноста

Како што веќе информиравме, во рамки на официјалната работа посета на Република Бугарија, претседателот на Владата на Република Македонија, Зоран Заев, одржа брифинг со новинарите.

Премиерот Заев истакна дека Република Македонија и Република Бугарија со средбите на највисоко ниво, со премиерот Бојко Борисов и со претставници на владино и државно ниво во Софија, двете земји отвораат „ново златно поглавје" во меѓусебната соработка.

„Споделувањето заеднички културни вредности е само придобивка, и соработката меѓу

Македонија и Бугарија ќе покаже како се унапредуваат добрососедски односи и се отвораат евро-атлантски перспективи и за Република Македонија, но и за регионот“, изјави на новинарскиот брифинг премиерот Заев, што помина со огромен медиумски интерес.

 

Претседателот на Владата на Република Македонија, Зоран Заев, придружуван од владината делегација во Софија, денеска се сретна со Теменушка Петкова, министерка за енергетика на Република Бугарија и претставници на Бугарската асоцијација за гас.

Енергетиката е една од важните области за соработка за којашто има интерес од владите на двете земји да ја развиваат.

На средбата е изразена подготвеност за заеднички проекти за што ќе бидат аплицирани пред ЕУ фондовите.

Во наредните седмици Македонија и Бугарија ќе договараат меморандум за развој на енергетиката.

На средбата, од посебно значење е посочена изградба на нов конектор помеѓу двата гасоводни системи.

Премиерот Заев, претходно, на брифингот со новинарите истакна дека Република Македонија и Република Бугарија со средбите на највисоко ниво, со премиерот Бојко Борисов и со претставници на владино и државно ниво во Софија, двете земји отвораат „ново златно поглавје" во меѓусебната соработка.

„Споделувањето заеднички културни вредности е само придобивка, и соработката меѓу Македонија и Бугарија ќе покаже како се унапредуваат добрососедски односи и се отвораат евро-атлантски перспективи и за Република Македонија, но и за регионот“, изјави на новинарскиот брифинг премиерот Заев, што помина со огромен медиумски интерес.

Премиерот Заев ја заокружи посетата на Бугарија со средба со претседателката на бугарската опозициска партија БСП, Корнелија Нинова, којашто исто така ги поддржа реформските процеси и евро-атлантските аспирации на Македонија.

Претседателот на Владата на Република Македонија, Зоран Заев, попладнево оствари средба со претседателот на Република Бугарија, Румен Радев.

Премиерот Заев прими честитки од бугарскиот претседател Радев за стапувањето на должност претседател на Владата на Република Македонија. Претседателот на Бугарија, Радев, во новата реформска Влада на Македонија гледа можности за продлабочување на соработката помеѓу Македонија и Бугарија, а изрази и поддршка на евро-интеграциските аспирации на Македонија.

„Владата на Македонија е цврсто определена низ потребните реформски процеси и развивањето на добрососедските односи да го осигура патот на Република Македонија кон стратешките цели, ЕУ и НАТО. Република Македонија и Република Бугарија споделуваат иста визија за регионот, интеграција во европските и евро-атлантските структури и среќен сум што постои свесност и одговорност од двете страни за постигнување напредок. Во таа насока очекувам поддршка од нашиот сосед Бугарија за европските перспективи на Македонија, по преземањето на претседателството на ЕУ, од страна на Република Бугарија во јануари 2018“, рече премиерот Заев.

Претседателот на Бугарија, Радев констатираше дека развојот и напредокот на Македонија е важен за балканскиот регион и за Европската унија, бидејки ги покажува позитивните ефекти од процесот на евроинтеграциите.

Бугарскиот претседател Радев, по премиерот Борисов, ја потврди поддршката  од Бугарија за членство на Република Македонија во ЕУ и НАТО.

Претседателот на Владата, Заев и претседателот на Република Бугарија, Радев се согласија дека преку искрена и реална взаемна почит и доверба и зрели политики на меѓусебна отвореност се отвора простор за соработка на политичко ниво, но и во други важни области за граѓаните на двете земји, што дополнително ќе ги зближи и развива добрососедските односи.

Премиерот Заев соопшти дека Република Македонија има интерес за отворање нови гранични премини, со што ќе се олеснат комуникациите меѓу луѓето. Посочени се можности во инфраструктурното поврзување, во областа на трговската размена, во областа на културата.

Претседателот на Владата на Македонија, Заев, по средбата со бугарскиот претседател Радев, беше во посета на Археолошкиот музеј на Бугарија. Претходно премиерите на владите на Македонија и Бугарија заеднички се поклонија пред споменикот на Цар Самуил во Софија, како уште еден доказ за меѓудржавното пријателство за кое што има волја и определба да се надградува од двете страни.

Посетата на премиерот Заев и владината делегација на Бугарија која што е во тек, поминува во пријателска атмосфера и со огромен медиумски интерес.

 

 

 

Моето чувство коешто го имам цело ова време наназад со изјавите на премиерот Борисов додека траеше кризата во Македонија ќе го споделам овде јавно пред граѓаните, преку вас медиумите. Сите изјави беа во функција на помош на Македонија со желба да се надмине кризата, да се воспостави дијалог заради тоа што Македонија има европска иднина, а има и пријатели коишто сакаат да и помогнат. Јас тоа го почитувам бескрајно и среќен сум заради тоа што Македонија има таков пријател со премиерот Борисов. Тој денеска е буквално среќен што може да испрати пораки како премиер на земја сосед што може да помогне на својот сосед. Такви земји како мојата можат само да бидат среќни што Бугарија е така поставена и што има такво раководство. Јас верувам дека тоа и ние ќе го оправдаме заради тоа што и нашето пријателство е искрено. Денеска не сме овде само да побараме помош оти ни треба помош. Нашата намера е искрена, ние сакаме да придонесеме во севкупниот амбиент на соработка помеѓу нашите две земји. Денеска оваа порака што ја испраќаме ќе биде силно охрабрување за граѓаните на мојата земја. Јас од овде сакам да испратам и порака до пријателска Грција, навистина ни треба поддршка и помош и од Грција. И таа е земја членка на Европската Унија како што е и членка на НАТО. Градејќи го добрососедството и меѓусебното пријателство, јас сум убеден дека и западните земји многу повеќе ќе не почитуваат отколку што е тоа сега, заради тоа што тие сакаат да видат дека ние си пружаме рака, си помагаме таму кадешто можеме. Во тоа име, очекувам овој позитивен дух којшто премиерот Борисов и неговата Влада, го испратија во функција на унапредување на односите помеѓу двете земји, навистина ќе го следи и Република Грција. Јас испраќам порака и овде до Бугарија и до Грција, Македонија денеска затвара едно поглавје на историја на национализам, на омраза, отвараме поглавје на европска заедничка иднина на сите, заради тоа што историјата може само да не зближи, а да не не разделува. А европската иднина којашто ја имаме пред нас, навистина е придобивка којашто треба да ја чувствуваат сите граѓани на целиот овој Балкан, овде, којшто е заеднички дом на сите нас коишто живееме. Затоа, немам предрасуди да си побарам поддршка и помош. На мојата земја и треба поддршка и помош. Бугарија денеска тоа го прави кон Македонија. Јас верувам дека и Грција тоа ќе го прави. Знам дека тоа ќе го направи и Албанија и Косово и Србија, но земјата којашто прва не призна денеска еве, го прави и првиот чекор кон нашите аспирации и амбиции навистина да ги убрзаме процесите кон интеграција во НАТО и во Европската Унија.

 П2: За двајцата премиери, има уште еден мал детал, рече г-динот Заев од договорот кој треба да се усогласи до 2-ри август. За што се работи, дали е проблем македонскиот јазик и дали договорот ќе биде потпишан на македонски и бугарски јазик или е нешто друго што сега би ни кажале? До г-динот Борисов, дали по потпишувањето на договорот, ќе бидат отстранети сите пречки и Македонија ќе ја има целосната бугарска поддршка за преговори со Европската Унија и влез во НАТО?

 Денеска ова што го правиме е повредно од секој можен договор. Оваа порака на пријателство, ова гостопримство и поддршка којашто ја добиваме, ова взаемно констатирање за сите предрасуди коишто досега биле отворани, овој чин на заедничко поклонување пред споменикот од заедничката историја навистина вредат од било кој договор. Се работи, навистина за мали детали коишто повеќе стручно службите ќе ги затворат. Повеќе нема да има комисии за преговори, ќе преговараат двајцата министри со своите кабинети, министрите за надворешни работи за да може да го усогласат тоа што остана малку, за да можеме секако како една цел што си ја дадовме пред нас, на 2-ри август при возвратната посета на премиерот Борисов и неговиот кабинет во Македонија да го потпишеме договорот. Навистина се мали детали коишто верувам дека ќе бидат решени, знаејќи дека добро е пред есента да го имаме затворено и ова прашање. Јас сакам да им се заблагодарам на комисиите коишто досега работеа, остварија 11 средби и навистина помогнаа многу да ние денеска го направиме на овој разговор што го имавме претпоследниот чекор и останува уште последниот чекор којшто сум уверен и убеден, дека на 2-ри август ќе го направиме.

 П3: Г-дине Заев дали може да ни ги покажете лузните од тоа што се случи?

 Лузните остануваат за да бидат спомен и патоказ да не се повтори никаде тоа што се случи во Македонија и никогаш повторно ниту во нашата земја ниту било каде во светот. Јас сум православен христијанин, јас верувам во Господ и уште истата вечер, простив. Секако, законот мора да важи за сите и ако некој направил кривично дело тој треба да си одговара. Но лично во мојата душа не носам омраза ниту пак потреба за некоја освета. Јас од овде благодарение на вашето прашање испраќам порака за соработка со опозицијата. Ние знаеме дека ќе имаме успешен период пред нас ако имаме соработка со опозицијата. Убедени сме дека успехот треба да биде заеднички. Можеби јас ја имам честа и одговорноста да ја водам Владата во Македонија, но без опозицијата не можеме да успееме. Ни треба опозицијата заедно во државата, како што ни треба граѓанскиот сектор и целиот експертски капацитет којшто постои во Македонија и тоа не е доволно. Видовте, побаравме поддршка од Бугарија и ќе ја добиеме таа поддршка којашто може искуствено да ни помогне. Навистина има еден позитивен амбиент околу Македонија и од Брисел и од Вашингтон. Кога соседите, еве помагаат, верувам дека нашата земја конечно ќе исчекори чекор напред, за нас е тоа живот, за нас тоа значи европски фондови, за нас тоа значи стабилност, за нас тоа значи добри перспективи за нашите генерации коишто доаѓаат после нас. Во тоа име, веќе направивме чекори за прв пат од самостојна Македонија, во пет комисии од нашиот Парламент, опозицијата да има мнозинство. Тие ги раководат со повеќе од 20 претседатели од вкупно 21 комисија, а во пет комисии имаат и мнозинство. Ги повикавме да се вклучат, за навистина заедно да ги носиме одлуките коишто претстојат пред нас.

 
 

 

Дозволете да го изразам моето огромно задоволство за овој историски момент за мене и за мојата земја на оваа важна посета на пријателска Бугарија преку мојот драг пријател, премиерот на Бугарија, г-динот Бојко Борисов.

Ова за нас е прва билатерална посета, секако после посетата на Брисел и посета на првиот наш сосед, Бугарија која што е членка на НАТО и Европската Унија, со наши аспирации да побараме и добиеме поддршка и помош, како што си личи сосед спрема сосед. Јас сум денеска среќен заради тоа што нашиот прв сосед има огромна желба да и помогне на Република Македонија во своите аспирации кон итеграциите во НАТО и Европската Унија.

За нашата земја нема алтернатива освен полноправно членство на Република Македонија во НАТО и во Европската Унија. Денеска на билатералните состаноци коишто ги имавме, прво на средбата како премиери, а после тоа со нашите владини кабинети, навистина отворивме нови надежни перспективи за унапредување на досегашното големо пријателство помеѓу нашите две земји.

Денеска разговаравме за помошта и поддршката којашто Република Бугарија може да ја даде на нашата земја на процесот на интеграциите. Денеска разговаравме и ги доближивме нашите ставови во функција на потпишувањето на Договорот за добрососедство и соработка помеѓу нашите две земји. Остана еден мал детал и зедовме обврска на заедничко чествување на Илинден и Илинденското востание во Македонија, да го завршиме и потпишувањето на Договорот за добрососедство и билатерална соработка помеѓу нашите две земји кадешто на наша покана премиерот Борисов ќе ја посети Македонија и заедно по втор пат ќе се поклониме пред споменик од нашата заедничка историја. Првиот пат, секако ќе биде денеска кога ќе изразиме почит и поклон пред споменикот на Цар Самоил, овде во Софија. Договоривме соработка и на неколку други нивоа

Како еден прв чекор ќе биде нашите две земји, преку кабинетите на премиерите и лично ние, да разговараме со градоначалниците на Софија и на Скопје, да именуваме по една улица по имињата на поранешни претседатели на двете земји. Во Скопје на претседателот Жељу Желев, а во Софија на претседателот Борис Трајковски кое ќе биде само уште една потврда за големото пријателство помеѓу нашите две земји.

Денеска од Република Бугарија која навистина е на врвот на ранг листата во искористување на европските фондови, побаравме да ни помогне со своето искуство, да ни испрати експертиза и како на сосед буквално да ни помогне во подготвувањето и реализацијата на проекти поддржани од европските фондови. Македонија има отворено малку програми. Се надевам дека ќе отвориме уште повеќе заеднички програми, но искуството кое што го има Бугарија, навистина ќе биде драгоцено да биде пренесено во Македонија како помош на она што претставува наши перспективи. Не само интеграциите, туку и бенефитите кои што солидарноста во европското семејство ги нуди како можност и за земјите членки.

Ние имаме аспирации да отвориме преговори со Европската Унија. Ние имаме аспирации да станеме членка на НАТО. На тој пат, пријателска Бугарија ќе ни биде од огромна помош. Јас сум многу среќен поради оваа работа. Верувам дека нашите граѓани ќе бидат среќни, заради тоа што имаме ваков пријател. Затоа, ваквата посета денеска за нас претставува историски момент кој што уште еднаш потврди огромно пријателство и желба на пријателска Бугарија да помогне на Република Македонија.

Претседателот на Владата на Република Маедонија, Зоран Заев, попладнево се сретна со амбасадорката на Австралија за Македонија, Јулија Фини.

Амбасадорката Фини пренесе честитка до премиерот Заев од австралискиот премиер Малком Турнбул за стапувањето на должност претседател на Владата на Република Македонија.

На средбата заеднички се констатирани пријателските односи помеѓу Македонија и Австралија и изразена е согласност дека со политичка волја од двете страни има и потреба и простор за нивно унапредување.

Австралиската амбасадорка оцени дека крајот на политичката криза и определбата на новата Влада кон реформи го отвора патот на државата кон ЕУ и НАТО. Амбасадорката Фини соопшти дека Австралија ја поддржува Македонија во евро-атлантските интеграции.

Премиерот Заев изрази благодарност до големиот и важен пријател за Македонија како што е Австралија.

„Владата е насочена кон силна реформска агенда. Ќе ни биде потребна сета помош и поддршка и од Австралија којашто има искуство во демократските процеси. Подаваме рака и кон дијаспората од Македонија во Австралија да се вклучи во реформските процеси важни за Македонија“, рече претседателот на Владата, Заев.

Премиерот Заев истакна дека Владата води инклузивни политики со влучување на сите кои сакаат да придонесат во создавањето услови за квалитетен живот во Македонија.

Има согласност дека приоритет треба да имаат реформите што обезбедуваат владеење на правото и објективни медиуми коишто се носители на развојот на демократијата. Австралиската амбасадорка Фини вети помош и поддршка во овие сфери. Таа потенцираше дека е важно Македонија да се движи напред, како за граѓаните на нашата држава, така и за регионот.

Премиерот Заев нагласи дека со политиките на едно општество за сите на што ги темели политиките новава Влада, Македонија може да биде пример во регионални рамки и пошироко, како може да се надминат неизвесностите и да се овозможи достоинствен живот за сите граѓани. 

Почитувани,

Премиерот на Владата на Република Македонија, Зоран Заев, денеска се сретна со претседателот на Демократската партија на Албанците (ДПА), господинот Мендух Тачи.

Тргнувајќи од интересите на сите граѓани заеднички е потенцирано значењето на реформите и геостратешката потреба на Република Македонија да се приклучи како полноправна членка во НАТО алијансата и земјава да добие датум за почеток на преговори со ЕУ.

Претседателот на Владата на Република Македонија, Зоран Заев, ја покани ДПА да се вклучи во процесот на реформите со вградување на своите ставови во процесите коишто следуваат.

Премиерот Зоран Заев и претседателот на ДПА, Мендух Тачи, се согласија дека се што е интерес на граѓаните на Република Македонија заслужува поддршка од опозициската партија.

Во таа насока претседателот на ДПА, Мендух Тачи, најави дека партијата ќе биде конструктивна опозиција којашто ќе ги поддржува интересите на граѓаните и реформските процеси коишто значат придвиживање во евро-атланските интеграции, но во исто време ќе биде гласна во своите ставови и критики на политиките за коишто партијата ќе смета дека не се спроведуваат соодветно.

 

Претседателот на Владата на Република Македонија, Зоран Заев денеска се сретна со новата резидентна амбасадорка на Јапонија, Кеико Ханеда.

Амбасадорката Ханеда пренесе лични честитики од премиерот на Јапонија, Шинзо Абе, до премиерот Заев, за стапувањето на должност претседател на Владата на Република Македонија. Исто така, изразена е силна поддршка од Јапонија за определбата на Владата на Македонија кон демократските реформи, како и дека тоа  отвора големи перспективи за државата и граѓаните.

„Владата има за цел спроведување силна реформска агенда што ќе ги забрза интеграциите на Република Македонија во ЕУ и НАТО, но којашто е пред се, примарен интерес на граѓаните на Македонија, за обезбедување квалитетен живот за сите во државата“, рече премиерот Заев.

Јапонската амбасадорка Ханеда соопшти дека Јапонија ја поддржува Македонија во евро-атлантските аспирации.

Амбасадорката Ханеда додаде дека Јапонија, како пријател на Македонија и донатор, ќе продолжи да го помага развојот на Македонија во разни области, посебно во локалните средини.

На средбата е заклучено дека одлуката на Јапонија да отвори резидентна амбасада во Република Македонија е силен знак за позитивните односи меѓу двете земји. Изразена е согласност од двете страни, дека се создадени можности, соработката меѓу двете држави да се продлабочи, како во областите на економијата и трговијата, така и во образованието, туризмот и културата.

Постојат блиски врски меѓу Македонија и Јапонија и отворени можности тие да се развиваат во интерес за државите и на граѓаните на двете земји, констатирано е на денешната средба на премиерот Заев, со јапонската амбасадорка Ханеда.  

Претседателот на Владата на Република Македонија Зоран Заев предпладнето се сретна со амбасадорката на НР Кина во Македонија, Лин Лисјен.

Кинеската амбасадорка Лисјен му врачи писмо на премиерот Заев од премиерот на НР Кина Ли Кечијанг. Во новата Влада на Република Македонија, Кина гледа добар партнер и голем потенцијал за продлабочување на соработката помеѓу двете држави.

Кинеската амбасадорка Лисјен соопшти дека реформите што ги презема Владата на Македонија се во насока на политичка и економска стабилизација на државава, поради што Амбасадата на Кина ќе ги охрабри кинеските компании за влегување во економскиот пазар во Македонија.

„Владата е отворена за соработка со кинески компании што сакаат да инвестираат во Македонија и подготвени сме да ги обезбедиме сите потребни услови за тоа. Целта на Владата е да обезбеди нови работни места за граѓаните, повисоки плати, достоинствен животен стандард, а тоа може да се постигне само преку посветена работа на развој на економијата“, рече премиерот Заев.

На средбата договорено е да се интензивира економската соработка меѓу двете држави, преку нови проекти во рамки на Програмата на Кина, 16 плус 1 за земјите од Централна и Источна Европа, веднаш по решавањето на проблемите во изградбата на двата автопата Миладиновци – Штип и Кичево – Охрид, во чијашто изградба учествува Кина.

Премиерот Заед соопшти дека веќе ги има првичните информации за повеќемесечниот застој на изградбата на автопатите, којшто е предизвикан од грешки во проектирањето, поради ненавремено решавање на имотно правни односи на првиот автопат и изместување на трасата на вториот. За таа цел премиерот Заев најави средба во најскоро време со кинескиот изведувач и со другите вклучени страни во проектите, со цел изнаоѓање брзо решение.

Претседателот на Владата Заев најави и конкретни иницијативи и од страна на Владата на Македонија за проширување на економската соработка на НР Кина.

Премиерот Заев информираше дека веќе се остварени контакти со кинески компании за соработка во областите на енергетиката и градежништвото а најави и проширување на соработката во земјоделството.

Кинеската амбасадорка Лисјен ја поздрави определбата на Владата на Македонија за подобрување на квалитетот на живот на сите граѓани. Амбасадорката Лисјен соопшти дека НР Кина ја поддржува Македонија во евроинтеграциите.

Премиерот Заев соопшти дека Република Македонија дава целосна поддршка на единствена НР Кина.

На средбата е заеднички поздравено традиционалното пријателство меѓу Македонија и Кина и е договорено унапредување на соработката меѓу двете земји во сите сфери од интерес на граѓаните на двете земји.

Претседателот на Владата на Република Македонија, Зоран Заев, придружуван од министерот за надворешни работи Никола Димитров и пратеникот Мухамед Зекири, попладнево се сретна со Мевљут Чавушоглу, министер за надворешни работи на Република Турција, придружуван од пратениците Хусејин Бурге и Шабан Дишли, како и од амбасадорката на Турција во Македонија, Тулин Еркал Кара.

На средбата е изразена заедничка определеност за продлабочување на традиционалните пријателски односи помеѓу Република Македонија и Република Турција.

Турскиот министер Чавушоглу во име на премиерот на Република Турција, Бинали Јилдирим, му честиташе на премиерот Заев за стапувањето на должност претседател на Владата на Република Македонија и најави целосна поддршка на работата на Владата. Исто така, министер Чавушоглу изрази уверување дека новата реформска Влада го отвора патот на Македонија кон ЕУ и НАТО и пренесе поддршка на Македонија од Турција за членството во НАТО, но и за евроаспирациите на земјава.

„Владата на Македонија е силно посветена на реформите важни за евро-атланстките интеграции на државата, но тие истовремено ќе придонесат и за развој на економијата и правната држава, како и за квалитетен живот на сите граѓани“, рече премиерот Заев.

Тој посочи дека Владата работи на создавање поволна деловна клима, за да овозможи функционирање на домашните претпријатија, но и странски инвестиции, со што Владата планира да создаде услови за нови работни места, повисоки плати и достоинствен животен стандард за граѓаните.

Во таа насока, министер Чавушоглу соопшти дека постои интерес кај турски инвеститори за вложувања во Македонија, посебно по реформите што ги презема Владата за политичка и економска стабилизација.

На средбата на премиерот Заев со турскиот министер Чавушоглу изразен е заеднички интерес за соработка како на полето на економијата, инвестициите, трговијата, така и во образованието, културата, спортот и во сите други области значајни за граѓаните на двете земји.  

На состанокот се поздравени инклузивните политики на Владата за градење на Република Македонија како едно општество за сите граѓани, независно од етничката и политичката припадност, со што Македонија станува пример за соживот во регионални рамки и пошироко во Европа и светот.