Соопштенија за јавноста

Претседателот на Владата на Република Македонија, Зоран Заев денеска се сретна со амбасадорот на Кралството Холандија, Ваутер Пломп.

Амбасадорот Пломп достави честитка на премиерот Заев, од холандскиот премиер Марк Руте, за неговото стапување на должност претседател на Владата на Македонија и изрази големо задоволство од изборот на новата Влада и реформската посветеност на Владата.

„Владата работи активно на Итните реформски приоритети што ги отвораат евро-атлантските интеграции на Македонија, но коишто ќе придонесат и кон подигнување на квалитетот на живот на граѓаните и економски развој“, рече премиерот Заев.

Премиерот Заев најави инклузивни политики во државата, со активна вклученост на граѓанското општество и на опозицијата, како и подобрување на добрососедските односи, со што новата Влада покажува поинаков, одговорен начин на решавање на потребите и проблемите на граѓаните, низ почитување на европските демократски вредности.

„Очекуваме тоа да придонесе Република Македонија на есен да добие чиста препорака за почеток на преговори со ЕУ и отворање на вратите за членство во НАТО“, рече премиерот Заев.

Амбасадорот Пломп оцени дека постои видлив ентузијазам во државата од работата на новата Влада во првиот месец од формирањето и изрази уверување дека таквиот начин на работа ги отвора перспективите на Република Македонија и на нејзините граѓани.

Денеска почна судењето за процесот познат како „Поткуп“. Правно - формалното дејствие започна со барањето од моите адвокати за употребливоста на посебните истражни мерки од аспект заради тоа што се тие јавно објавени.

Согласно закон посебно истражна мерка којашто е јавно објавена не се употребува како доказ. Бевме на двоумица дали таа снимка да ја презентираме јавно во целовитоста, за да се дознае во суштина самиот предмет или да бараме нејзино изземање заради тоа што законот тоа го дава. Сепак одлучивме да ги користиме сите законски можности и Судот ќе донесе решение согласно барањето на адвокатите и буквално ние сме на двете страни. Како и да одлучи Судот, така и ќе ги користиме нашите права.

Јас лично како обвинето лице очекувам и сакам таа снимка да излезе во јавноста да се види целовитоста на дејствието коешто се случувало и да се види дека ниту имав намера, ниту се случил било каков поткуп. Но истовремено согласно правото и она што законот го овозможува недозволиво е да се заобиколи тој дел од законот, а вакви посебни истражни мерки коишто судот и претходно одлучувал да бидат изземени како докази во постапката и од таа можност заедно со мојот правен тим донесовме одлука, денеска да го побараме тоа законско право коешто ни следува. Секако штом судот ќе се изјасни веднаш продолжуваат следните дејствија кадешто очекувам правда.

 П1: Очекувате ли Обвинителството да истражи од каде излегоа овие снимки?

Две и пол години Обвинителството истражува од каде излегле овие снимки. Се знае по закон дека постои само една снимка, не може да постојат две, дека должен и за нејзино чување, управување и процесуирање понатаму е само јавниот обвинител и веднаш истата снимка се појавува на јутјуб. Не треба да се биде посебен експерт или посебен стручњак во оваа област да се знае дали е истата снимка или не е. Истата снимка е, таа е снимката што се појави. Проблемот е што два пати е делена, сечена директно.  За да се покаже комплетното дејствие требало ако се објавува барем цела да ја објави. Барем ако не друго, јавноста да ја знае целата вистина. Така да масакрирањето на самата снимка ја покажува целата грдосија на настан којшто сакаат да се прикаже во јавноста и тоа комплетно да се направи мое оцрнување, масакрирање и судење јавно за денеска да се изгуби дури и можноста на Јавното Обвинителство таквиот доказ да го употреби во постапката. Тие биле многу свесни дека објавувајќи ја оваа снимка го губат како доказ во постапката. Но сепак, заради јавниот масакр и политичко судење кое требало да се случи со Заев, тие се осудиле на ваков случај. Но јас сум само една страна од постапката. Судот е тој којшто ќе носи одлуки, мојата намера е целосно почитување на судот и судските решенија, како и судските одлуки. Се надевам дека брзо ќе се работи, ќе се донесат судски одлуки, за на крајот и јас како и сите граѓани, да ја дочекам правдата за мене.

П2: Зошто сега, зошто не на почетокот на постапката не побаравте судот да се произнесе по ова прашање?

Сега дојде фазата, јас како обвинето лице и моите адвокати пред почетокот на уводните зборови, го имам тоа процесно право.

П3: Поднесовте и вие кривична до Иван Николов Сачавалиев дали имате информации до каде е постапаката и дали обвинителството постапува по неа?

Како што ми кажуваат адвокатите, тоа е процесуирано пред Специјалното јавно обвинителство. Поднесени се други пријави против обвинителот заради објавувањето и слично. Еве, чекаме резултат од таквите пријави.

Претседателот на Владата на Република Македонија, Зоран Заев, се сретна со претставници на Синдикатот на фабриката за шински возила Колска од Велес, со претседателот на Синдикатот, Слободан Димитровски и со двајца членови на претседателството, Влатко Митревски и Марјан Мицев.  

Премиерот Заев на средбата соопшти дека презема обврска уште денеска да почне решавањето на проблемот на вработените кои шест месеци немаат земено плата, а ќе се изнајде и трајно решение за статусот на фабриката Колска.

По насока на премиерот, проблемот финансиски ќе биде решен со што 125-те вработени во Колска, во најкус можен рок ќе можат да си ги земат одработените плати.  

Претставниците на Синдикатот се пожалија дека досега се соочувале со несериозен однос од страна на државата, поради што освен што е загрозена егзистенцијата на вработените, тие немаат ни здравствено осигурување. Поради ова, дел од нивните колеги се соочуваат со сериозни здравствени последици. Претставниците на Синдикатот на фабриката за шински возила Колска велат дека проблеми со платите имаат со години поради несигурниот работен статус и проблемите поврзани со опстанокот на фабриката. Тие посочуваат дека фабриката и е потребна на државата, но според нив, од необјасниви причини, не се користела, додека биле распишувани тендери со странски фирми за одржување на патнички и товарни вагони, тоа што е нивна дејност. Тие како решение предложија враќање на фабриката Колска во рамки на Ј.П. Македонски железници.

Премиерот Заев најави дека до крајот на неделата ќе одржи стручни консултации за трајно решавање на статусот на фабриката Колска и обезбедување на работниот однос на вработените во неа. 

Почитувани дами и господа, премиер задоволство ми е што сум во Скопје и што можеме да разговараме за реформи кои се поврзани со интеграцијата во Европската унија и како да продолжиме напред. Најпрво да се заблагодарам и да им честитам на сите граѓани кои го слават празникот. Навистина го ценам фактот што Владата работи на празник, следствено и Вам Ви благодарам што ја покривате посетата на ваков ден. По вашата посета во Брисел, тука сум и можам да го посведочам оптимизмот и новата поволна клима во земјата. После сите настани кои ги посведочив во оваа земја, драго ми е што можам да видам една нова динамика во спроведувањето на активности, насочени кон постигнување на подобар живот за сите граѓани. Мојата порака за сите денес е да се сконцентрирате и да се сконцентрираме на  задачите што претстојат. Сите одговорни актери, тука ги вклучувам и опозицијата и судството и сите релевантни институции кои треба да работат на создавање на модерно општество кое добро ќе функционира. Држава која ќе работи во интерес на сите граѓани без оглед на нивната припадност. Ова попладне ќе се сретнам и со партиските лидери на сите партии кои што се застапени во Собранието. Се надевам дека сите ќе одиграат позитивна, конструктивна улога и дека за разлика од минатото овој пат ќе имаме дебата која што ќе се води во рамките на институциите, односно во рамките на Собранието.

Јас ја поздравувам подготвеноста на Владата да работи заедно со опозицијата на прашања кои што се поврзани со интеграцијата на земјата во Европската унија. За ова прашање е потребен национален консензус и повторно ќе нагласам дека местото каде што треба да се води ова дебата и каде што треба да се постигне таквиот консензус се институциите, односно Собранието. Многу е значајно да се работи на реформската Агенда и да се исполнат Итните реформски приоритети и ве уверувам дека веќе од утре ќе почнат да пристигнуваат првите експерти кои ќе ви помагаат на тој пат и и во овие активности. Ќе пристигне и господинот Прибе со неговата група на експерти кои ќе ви помагаат.

Повеќе пати беше нагласена важноста на Итните реформски приоритети и важноста на преземање реформи, меѓутоа реформите не треба да се спроведат само за да се задоволат високи официјални лица од Европската унија, Европската Комисија. Потребно е реформите да се спроведат за да се подобрат условите за живот на граѓаните.

На крајот би сакал да ги пофалам позитивните чекори кои што ги направивте вие и вашиот министер за надворешни работи со вашите колеги од Бугарија и Грција. Од суштинска важност одново  да се воспостават добро соседските односи.

Повеќе пати сум бил во вашата земја, но прв пат присуствувам на седница на Влада и се надевам дека ќе има можност да присуствувам и на други седници на Владата затоа што ако сакаме да ја постигнеме нашата заедничка цел ќе мора заедно да работиме.

 

ПРАШАЊЕ БРОЈ 1: Дали очекувате надминување на спорот со Република Грција?

ЗОРАН ЗАЕВ:

Благодарам на прашањето. Навистина ова е еден така да кажам процес кој што  е исправен пред нас со сета своја сериозност и со сета своја суштина на  самиот проблем како што е проблемот кој што Република Грција го има со нашето Уставно име. Јас сум убеден во неколку работи сигурно, а тоа е градењето на пријателска атмосфера. Меѓусебното зголемување на доверба во сите области дека ќе создадат минимум услови да се разговара отворено за вакво суштествено прашање како што е проблемот со уставното име кое што Република Грција го има. Јас сум убеден дека постои решение за се. Искрено очекувам да бидат ослободени перспективите на Република Македонија секако и од Република Грција. Голем дел од работите зависат од нас, но овде ни треба поддршката и помошта и од самите соседи. Секако тоа зависи и од Република Грција дали ќе биде ослободен патот на Македонија кон Европската унија и НАТО, а тоа е преку станување на полноправна членка на НАТО или поточно добивање датум, покана од страна на НАТО за полноправно членство и во делот на Европската унија добивање датум за отпочнување на преговорите. Секако верувам дека постои решение да се одблокираат процесите, а при тоа интензивно да се фокусираме и да изнајдеме решение и на ваков сериозен проблем. Амбиентот мора да биде создаден и во двете земји за решавањето на проблемот. Јас ги разбирам нашите Јужни соседи, пријатели на Република Македонија на кои што не им е лесно во поглед на ова прашање, но не е лесно и кај нас во Република Македонија да изнајдеме брзо решение на овој проблем. Во тоа име искрено ја барам поддршката и помошта од граѓаните на Република Грција, од власта, опозицијата, Владата, Парламентот, од сите да конечно Македонија го направи исчекорот, а тоа е исчекорот кој што го чекаме од 2005 година во поглед на нашите интеграции во Европската унија и на исчекорот кој што го чекаме во поглед на НАТО во 2008 година заради тоа што за Македонија алтернатива нема, освен полноправно членство во Европската унија и НАТО.

ЈОХАНЕС ХАН:

Немам што да додадам во врска со прашањето за името. Во контекст на Европската Комисија, Европската унија, ова е прашање на кое што треба да работат двете земји. Како Комисија секако е од наш интерес да дојдеме до фаза во која што ќе можеме да дадеме позитивна препорака. Но ова е тесно поврзано со напредокот што ќе се постигне во спроведувањето на Итните реформски приоритети. Затоа сум денес тука, утре пристигнува Прибе, задутре доаѓаат претставници, мојот Генерален директорат да и помогнат на Владата во постигнувањето и исполнувањето на тие приоритети. Впрочем, да помогнат во исполнувањето, постигнувањето на нашата заедничка цел.

ПРАШАЊЕ БРОЈ 2: Како ги коментирате изјавите на пратеникот Дудуш?

ЗОРАН ЗАЕВ:

Прво, почит на високиот гостин кој што е во Македонија и би сакал да се придржуваме кон темата, но ќе дадам кратки одговори затоа што ви се важни. Коментарите на нашиот пратеник се апсолутно нешто за кое што ниту јас, а ниту Владата, ниту мнозинството се согласуваме. Се надевам ќе се извини и ќе ги повлече, заради тоа што тоа не е наш интерес. Граѓаните мора да бидат еднакви пред Закон и за граѓаните мора Законите да важат исто и сите да бидат исти пред институциите, заради кои што тие институции и постојат. Апсолутно само тоа е возможно за иднината на нашата заедничка Република Македонија.

Во поглед на прашањето за унапредување на Законот за употребата на јазиците е дел од приоритетите кои што се составен дел на оваа Агенда за која што е денеска дискутиравме. Дел на Охридскиот Рамковен договор, знаете дека е едно од важните прашања со кое што сакаме да ги затвориме тие поглавја е унапредувањето на Законот за употреба на јазиците. Согласно сите процедури и штом ќе биде се подготвено, јас сум поддржувач да ова прашање биде отворено на дебата и да се дискутира и да бидат донесени самите одлуки. Знаете дека нашите ставови по ова прашање се многу јасни. За нас јазикот е алатка да се разбереме и апсолутно немаме никакви предрасуди. Впрочем ја повикувам и сегашната опозиција со најави за позитивен однос кон граѓаните од Албанско етничко потекло да бидат навистина на висината на таа најава и конечно сите да донесеме заедничка консензуална одлука и по основ на ова прашање. Впрочем претходната Влада во два наврати направи унапредување на Законот за употреба на јазиците.

ПРАШАЊЕ БРОЈ 3: Не слушнавме до сега детали околу реформите кои што ќе ги спроведете во правосудството. Дали може да ни откриете нешто од вашите планови?

ЗОРАН ЗАЕВ:

Денеска презентиравме пред Комесарот Хан наш Акциски план. Тоа е една од претпоследните фази на кои што работиме. Секако следува состанокот со претседателот или шефот на експертската Комисија на Европската Комисија, а тоа е господинот Рајхан Прибе со кој ќе одржиме состаноци и други високи претставници овде. Целта ни е на 1 јули да го заокружиме овој Акциски план и најтранспарентен начин, на нај јавен начин,  јавно достапен начин да го објавиме тоа пред граѓаните. Секако сериозно внимание има на многу области за кои што се обративме и јас и Комесарот во нашите видувања. Една од тие сериозни области се реформите во правосудството.

 

Граѓаните на Македонија имаат право да ги поседуваат сите информации во врска со организацијата на големиот фудбалски натпревар, Супер купот на УЕФА. Уште еднаш потенцираме дека и покрај опструкциите и неодговорното однесување на Акционерското друштво за стопанисување со станбен и деловен простор за време на мандатот на претходната Влада, ќе ги вложиме сите напори за натпреварот да се одржи на “Телеком арената” во Скопје, a очите на светската спортска јавност да бидат вперени кон Македонија.

Иако фирмата Атриум реагира, Мукоски нема да може да го скрие Договорот за ангажирање за варосување на ѕидовите на Стадионот кој ги содржи сите детали за кои информиравме на денешната прес конференција. Со реакцијата на Мукоски само се потврдува нивната вклученост, но и одговорноста која надлежните ја имале за преземените обврски наспроти исплатената цена.

Атриум не може да се повикува на никаква итност во постапката, зашто забелешките на УЕФА до ФФМ прв пат стигнале уште во септември 2015 година, односно пред речиси две години.

Последните забелешки испратени од УЕФА до ФФМ на адреса на Владата се пристигнати и заверени во архивата на Владата на 22 јуни 2017, што е седум дена, а не седум минути после датумот на кој УЕФА изреагирала до ФФМ.

УЕФА Супер купот е сериозен, историски настан за спортската јавност во Македонија и светот и заради тоа ни една институција, организација или компанија не смеела и не смее да се однесува неодговорно и непрофесионално при ваква алармантна состојба.

 

Претседателот на Владата на Република Македонија, Зоран Заев, во чест на 24 јуни, Меѓународниот ден на балканските Египќани, упати Честитка до граѓаните на Република Македонија кои го празнуваат овој ден.

“Го честитам денешниот Ден на балканските Египќани, на сите граѓани во Македонија кои го празнуваат, во име на Владата на Република Македонија и во мое име.

Египќаните во Македонија се дел од богатата историска и културна традиција на Република Македонија, кои и денес активно придонесуваат во демократските процеси, достигнувањата и развојот на државата.

Почитувањето на етничкиот идентитет и правата на оваа заедница, пораката на што се темели одбележувањето на овој датум, е во согласност со стратешката определба на Владата на Македонија, да ја гради Република Македонија во современо, европско општество, со еднакви шанси за сите граѓани.

Повикувам да продолжиме уште помотивирано да ги развиваме меѓусебните односи и преку унапредувањето на човековите и демократските вредности, правдата, еднаквоста, слободата, одговорно - како чесни граѓани, заеднички да придонесеме кон квалитетен живот и сигурна евро-атланстка иднина на Република Македонија“, порачува премиерот Заев во Честитиката до граѓаните што го празнуваат Денот на балканските Египќани во Република Македонија.

 

 

Почитувани, 

Премиерот на Република Македонија, Зоран Заев, испрати честитка за инаугурацијата на новиот претседател на Република Србија, Александар Вучиќ. 

„Во име на Владата на Република Македонија, во мое лично име и во име на граѓаните на Република Македонија, Ви го честитам изборот и инаугурацијата за претседател на Република Србија.

Ви посакувам успешна работа на новата одговорна позиција и изразувам надеж за натамошно унапредување на соработката помеѓу двете држави. 

Македонија, во Република Србија отсекогаш имала традиционален пријател и сојузник во процесот на стабилизација и интеграција на Балканот, преку градење на добрососедски односи и взаемно почитување.

Интересите за интензивна соработка, почитувањето на демократските вредности, добрососедските односи и интеграцијата на регионот во Европската Унија се врвни интереси на граѓаните на двете држави и очекувам дека во таа насока ќе продолжиме да ја развиваме нашата соработка на повисоко ниво, во сите области кои се од интерес на граѓаните на Република Србија и Република Македонија“, се вели во честитката на премиерот Зоран Заев.

Тоа што денес е тема на прес конференцијата е нешто што ја засега цела македонска јавност, од причина што ваков настан можеби во догледна иднина никојпат нема ни да имаме во Република Македонија. Зборуваме од областа на спортот.

Знаете дека доаѓаат два можеби најреномирани фудбалски клубови во светот. Сме ја имале привилегијата да го добиеме организацискиот дел на настанот. Тоа што како информација и како забелешка е давано до Фудбалската федерација на Република Македонија и ПУИГ, односно Акционерското друштво за стопанисување со станбен и деловен простор на Република Македонија е дека во извештаите, почнувајќи од септември 2015 година, до последниот Извештај пратен на 15.6.2017 година е дека недостатоците се провејуваат низ сите нив. Ако периодот од речиси две години е недоволен да се извршат бараните реконструкции, бараните поправки итн., за да Република Македонија биде добар претставник и добар домаќин, тогаш не знам кој период е доволен некој да ви укажува дека нешто не е во ред со самата организација. Ваквите забелешки не се политички ставови, затоа не треба ниту да бидат политички коментирани, од причина што станува збор за технички работи, за видливи работи кои што вие како новинари можете да излезете на терен и да проверите: дали навистина се поставени клима уреди, дали навистина е изграден просторот каде што треба да бидат стационирани репортажните возила и ред други работи кои што во медиумите веќе се излезени како таскови, кои што ние мораме до 21-ви јули да ги завршиме, бидејќи на 23-ти доаѓа финалната контрола што ќе одлучи дали Супер купот ќе се одржи во Република Македонија или нема да се одржи.

Не е добар коментарот од страна на некои организации и политички партии дека Владата сака да го стопира и дека не се грижи воопшто за одржувањето на ваквиот Супер куп. Ова ви е еден доказ од Дописот, УЕФА, на 15-ти јуни испратен до Фудбалската федерација на Република Македонија. На Фудбалската федерација на Република Македонија и се предочени сите работи кои што морала да ги направи, односно во организација со ПУИГ да ги направи за да може Супер купот да се одржи. Ваквиот допис во Владата на Република Македонија од страна на ФФМ стигнува на 22-ри јуни 2017 година. Значи, седум дена откако е стигнат ваквиот допис, му требаат да стигнат до Владата на Република Македонија за работи за кои што сметаме дека секој ден е многу битен. За сериозноста за тоа колку на Владата и е дојдено до одржување на самиот Супер куп, може да проверите со тоа дека Одлуката која што ја донесе Владата за утврдување на состојбата и преземање на конкретни активности е донесена истиот ден, односно 22-ри јуни. Значи, за разлика од тоа кога седум дена патува писмо од Фудбалска федерација до Владата на Република Македонија, Владата во истиот ден го става на дневен ред и веќе носи заклучоци со кои што го задолжува Генералниот секретаријат, под мое раководство, да ги преземе сите потребни активности за да се потрудиме, а верувам и се надевам дека ќе ве убедиме дека Супер купот ќе се одржи во Република Македонија и ќе најдеме начин како да ги исполниме сите услови.

За иронијата да биде уште поголема, од страна на Акционерското друштво за стопанисување со станбен и деловен простор на Република Македонија се побарани алокација на отприлика 120 милиони или околу 2 милиона евра за да може сите работи, како што велат тие, да бидат завршени. Во консултација со фирмите кои што работат на терен, денес и вчера имав интензивни состаноци. Тоа што тие од нас го бараат за да излезат во пресрет и навистина од некои од нив е доста коректно, се некои 18 милиони денари кои што ние би морале да им ги префрлиме на нив и тоа се пред се во набавка на опрема, како би можело да бидат завршени работите од нивна страна.

Ова ќе го добиете, ќе видиме дали е само јавен податок, Извод кој што го добивме од сметката на ПУИГ, каде што можете да видите, да видиме, дека станува збор за сума од 64 милиони денари кои што ПУИГ ги има на сметка. Покрај тоа, тие бараат дополнителни средства, иако имаат можност да најдат такви средства да ги пренаменат, ако е навистина желбата за одржување на Супер купот, а не е некоја друга, да ги пренаменат за исполнување на обврските.

Оттука, се прашуваме што правела ФФМ сите овие седум дена, зошто не го праќала и дали навистина има искрени намери сето ова да се одржи или едноставно ги прави работите да изгледаат покомплицирани, за после тоа да се докажуваме чија била вината. Загубата ќе биде на цела Република Македонија, на хотелиерите, на угостителските објекти, на репутацијата на земјата итн., нема да биде само на Владата на Република Македонија.

Затоа, едно принципиелно прашање до ФФМ. Колку карти имаат добиено како донација од страна на УЕФА? Бидејќи имаме информација дека УЕФА веќе им има обезбедено гратис карти, и вие како новинари, а и ние ќе се обратиме писмено, да прашате каде планираат и на кого планираат таквите карти да ги доделат како гратиси.

Друга работа која што е симптоматична во сета оваа работа е дека за варосување или како што ние велиме кречење, од тоа што добивме како информација, на просториите кои што се помошни и кои што водат до ВИП влезовите на Стадионот, ПУИГ веќе има склучено договор со извесна фирма АТРИУМ од Вевчани, случајно или намерно сопственост на братот на пратеникот Крсте Мукоски и тоа варосување е по 10 евра од м2. Тоа до нас стигна како информација, ќе го провериме, меѓутоа еве и задача за новинарите кои што мораат да бидат дел од вистината која што се случува во Република Македонија, како таква информација да ја проверите.

Тоа во кое што ќе ве увериме е, а и ќе видите дека на Владата на Република Македонија навистина и е дојдено да ја промовира државата во најдобро светло и затоа покрај сите, за жал, сопки кои што се прават, и тоа внатрешно, од страна на некои структури кои што не сакаат оваа манифестација да се одржи, мислејќи дека ова го правиме само за промовирање на Владата, ќе им докажеме дека Република Македонија и покрај сите сопки и покрај сите внатрешни непријатности кои што некои ги прават, дека Супер купот сепак ќе го одржиме во Република Македонија.

          

      

 

 

 Претседателот на Владата на Република Македонија, Зоран Заев, за големиот празник Рамазан Бајрам упати Честитка до поглаварот на Исламската верска заедница, Реис ул улема Хаџи Сулејман ефенди Реџепи и до граѓаните кои го чествуваат празникот.

„Го честитам големиот празник Рамазан Бајрам на Вас, на членовите на Исламската верска заедница и на ситеграѓани што го чествуваат празникот, во име на Владата на Република Македонија и во мое име.

Светите празници, како што е Рамазан Бајрам носат голема духовната сила којашто ја зајакнува вербата на луѓето во доброто, вистината, правдата и поттикнува желба за меѓусебна почит, разбирање, солидарност.

Ова се вредностите што водат кон спокоен и среќен живот. А човекот може да биде вистински спокоен и среќен, ако живее во општество на спокојни и среќни луѓе.

Затоа почитувани сограѓани, да продолжиме заедно по патот што го избравме, здружено и единствени. Почнавме даградиме едно заеднично општество за сите граѓани, со еднакви шанси за секој и знам дека заедно ќе успееме да обезбедиме квалитетен живот за сите нас.

Бидете чесни и одговорни граѓани кон себе, кон своето семејство и кон државата. Нашата заедничка иднина е во економски напредна и просперитетна Македонија, во неа заедно вложуваме и заедно ќе успееме.

Честит Рамазан Бајрам почитувани сограѓани!“, напиша премиерот Заев во Четитиката за празникот.

Претседателот на Владата на Република Македонија, Зоран Заев, денеска се сретна со амбасадорот на Украина, Ростислав Палагусинец.

Амбасадорот Палагусинец, во име на украинскиот премиер Владимир Гројсман, му врачи на премиерот Заев писмо со честитка за преземањето на должноста претседател на Владата на Македонија. Поздравена е демократската разврска на политичката криза и тоа што Република Македонија доби нова реформска Влада којашто отвора перспективи за државата.

„Главна преокупација на Владата се неопходните реформи за евро-атлантските интеграции што ги отвора новата Влада, како и за подобрување на квалитетот на живот на граѓаните“, рече премиерот Заев.

Претседателот на Владата, Заев, соопшти дека новата Влада е насочена кон остварување на стратешките цели на Македонија, ЕУ и НАТО, но и кон економски развој на државата.

Во таа насока амбасадорот Палагусинец пренесе интерес од украински компании за инвестирање во Македонија, по политичката стабилизација и демократските промени. Договорено е Република Македонија да го примени искуството на високопрофесионални експерти од Украина, од областа на индустријата и градежништвото. Разгледана е можноста тоа да се направи при реализацијата на гасификацијата на Република Македонија.

Премиерот Заев изрази отвореност за соработка со сегашните и идните инвеститори од Украина заинтересирани за вложувања во нашата држава. Тој додаде дека унапредувањето на условите за функционирање на фирмите, како странски, така и домашни е фокус на Владата, за да отвори можност за нови работни места и повисоки плати за граѓаните на Македонија.  

На средбата е разговарано и за отворените можности за продлабочување на соработката помеѓу двете држави и во други области, како што се укинување на квотите за земјоделските производи, зголемување на општата трговска размена, целосно укинување на визите меѓу државите и интензивирање на соработката во делот на образованието.