„Отворената врата на нашата земја кон Европа ги донесе денеска нашите пријатели од деловната заедница на Финска на средба со македонските бизнисмени.  Уверен сум дека овој бизнис форум ќе резултира со нови бизнис партнерства започнување на нови форми и проширување на секторите на соработка, што ќе придонесе за зголемување на целокупната трговска размена меѓу двете земји, но и нови инвестиции од Финска, како резултат на стабилното бизнис опкружување за инвеститорите, макроекономската стабилност и еднаквите, транспарентни услови за домашните и странските инвеститори, врз основа на законски уредени критериуми, со кои секој инвеститор однапред знае каква поддршка може да очекува од државата“, изјави министерот за економија Крешник Бектеши на  бизнис форумот на тема: „Doing Business with Finland“, во организација на Стопанската комора на Македонија,  во соработка со Амбасадата на Република Финска во Република Србија и „Finnpartnership.

Според министерот Бектеши, има голем простор за подобрување на соработката, со оглед на фактот што  вкупната трговска размена меѓу двете земји е со релативно мал обем и во периодот 2015 – 2017 година се движи меѓу 9.1 и 16.8 милиони евра, додека кај инвестициите, во периодот од 1997-2017 година е регистриран прилив од Финска во износ од 1,4 милиони евра што претставува 0,03% во однос на вкупните СДИ во Република Македонија. Според Бектеши, радува порастот на фински туристи во Македонија, кој во ова полугодие изнесува 48% за разлика од истиот период лани односно 1.254 фински туристи оствариле 2.139 ноќевања и се очекува таа бројка да се зголемува по влезот на Република Македонија во НАТО.

„Со процесот на пристапување на Република Македонија кон ЕУ нашите две земји стануваат сѐ поблиски. Трговската соработка не е на највисоко ниво и се надевам дека денеска ќе изнајдеме нови начини и можности како да ја прошириме и зголемиме нашата билатерална соработка. Уверен сум дека како што ќе напредува пристапниот процес на Република Македонија кон ЕУ, сѐ повеќе ќе се зголемуваат нејзините економски со сите земјите членки на Унијата“, истакна Амбасадорот на Финска во Србија, задолжен и за Црна Гора и Македонија, Н.Е. Перти Иконен.

Финска е една од водечките земји во светот во многу индустрии и е позната по стабилно и просперитетно деловно опкружување, извозна ориентираност и успешни деловни релации како со нордиските земји, така и со единствениот пазар на Европа, а засега од Македонија најмногу увезува текстилни производи, но интересот се проширува и на индустријата за пластика и на машини.

Во име на домаќинот, добредојде на финските бизнисмени им посака Антони Пeшeв, претседавач на Собранието нa Стопанската комора на Македонија: „Средбата со финските бизнисмени е резултат на серијата меѓународни контакти кои треба да ја подобрат соработката со европските земји и убава можност да се запознаеме со потенцијалите за соработка со Финска, која се движи по нагорна линија, но не е сѐ уште структурирана и константна, а имаме продукти и можности да ја избалансираме трговската размена која изнесува околу 12 милиони евра“.

На форумот беше презентриана бизнис климата во Република Финска, како и можностите за соработка со фински компании коишто го познаваат македонскиот пазар и бараат деловни партнери во Македонија, а акцентот беше ставен на секторот за ИКТ, прехранбената и металната индустрија и животната средина.

Почесниот конзул на Република Финска во Македонија, Светозар Јаневски, пред присутните ја доближи Финска и нејзините особености: „Иако важи за мала земја, нејзината главна карактеристика е индивидуалниот пристап – како размислува поединец во група, како таа група размислува сама за себе, создавајќи посебна филозофија на живеење. Така, додека нивната  Влада се грижи за дипломатските и глобалните прашања, локалната самоуправа ги прави сите планови за своите граѓани, од аспект на наталитетот, образованието, екологијата, индустријата. Позитивниот пристап и промените придонесоа Финска да биде позиционирана на врвот во Европа“.

Ова е прва од серијата деловни средби на СКМ меѓу македонските и финските бизнисмени, која треба да придонесе за изнаоѓање на нови можности за продлабочување на соработката меѓу Република Македонија и Финска.

Дебатата околу нацрт-текстот на предлогот на Законот за спречување на корупцијата и судир на интереси продолжи на денешната трибина со политичките партии во организација на Платформата на граѓански организации за борба против корупцијата и Транспарентност Македонија - Скопје.

Министерката за правда Рената Дескоска кусо се осврна на Предлогот на Закон за спречување на корупцијата и судир на интереси. Таа при тоа додаде дека во изминатиов период во Министерството за правда пристигнале одредени коментари кои ќе го подобрат законскиот текст, оценувајќи дека во моментов е понуден задоволителен законски текст, кој секако ќе биде  дополнет и подобрен со добиените коментари и препораките од различни меѓународни извештаи. Министерката Дескоска, исто така,  информира дека во моментов во Македонија е техничката мисија на ГРЕКО која врши сондирање на законската рамка и одредени подзаконски акти коишто се однесуваат на оваа област.

Организаторот на дебата изрази жалење што јавноста нема да има можност да ги чуе мислењата и предлозите на претставниците на опозицијата поради тоа што тие не присуствуваа на истата. 
 

Срамни и неприфатливи се заканите и повиците полни со омраза кои доаѓаат од новинарот Цветин Чилиманов кој отворено наведува да биде нападната негова колешка.

И во оваа прилика потсетуваме на ставот на Владата на Република Македонија: Нула толеранција за било какви закани, уцени врз новинарите и медиумските работници и за било каков обид за загрозување на слободата на говорот и изразувањето.

Апелираме медиумите, новинарските асоцијации и другите институции во државата, а особено обвинителството и судовите, да постапуваат максимално брзо и професионално во случај на каков било обид за напад или закана против медиумските работници. 
 

Редовна прес-конференција на портпаролите на Владата на Република Македонија, Миле Бошњаковски и Муамет Хоџа по 91-вата седница.

 

Денес официјално започна со градба новиот дистрибутивен центар на Прилепска Пиварница во Идризово, инвестиција во висина од 3,5 милиони евра, во која се очекува да се вработат над 30 лица од различни профили и степен на образование.

Заменик претседателот на Владата задолжен за економски прашања, Кочо Анѓушев, потенцираше дека Прилепска Пиварница е добар пример на домашна компанија, која со квалитетно управување и правилно инвестирање во изминатите 10 години успеа да изгради препознатлив бренд, да се позиционира на пазарот и да ги удвои приходите на компанијата.

 

 

„Новата инвестиција на компанијата, овој дистрибутивен центар ќе има позитивно влијание и на градежништвото и понатаму на индустриското производство, што значи дека има директен импакт на бруто домашниот производ на Македонија. Владата ги поддржува градежните проекти кои се исплатливи, каков што е и овој приватен проект на Прилепска Пиварница, а особено важно е што оваа инвестиција е во функција и на индустријата, односно ќе биде во функција на зголеменото производство и пласман на компанијата. Една куќа се гради камен по камен и оваа инвестиција е уште еден камен во изградбата на економијата на државата“, нагласи Анѓушев.

Општина Гази Баба важи за една од најиндустриските општини во Македонија, а така ќе остане и понатаму, кажа градоначалникот Борис Георгиевски.

„Нашата мисија е да создадеме бизнис амбиент и подеднакви услови за домашните и странските компании, за да можат своите инвестиции да ги реализираат во општина Гази Баба. Ќе работиме на подобрување на сите услови за работа на сите компании, за да Гази Баба биде најразвиената индустриска општина во земјата“, подвлече Георгиевски.

Претседателот на управниот одбор на Прилепска Пиварница, Кирил Самарџиоски, рече дека природно се наметнала потреба за проширување на дистрибутивниот простор во близина на Скопје и компанијата донела одлука за новата инвестиција.

„Парцелата на која се гради е со површина од 11.000 квадратни метри, додека самиот дистрибутивен центар ќе биде со површина над 5.000 метри квадратни. Ни велеа дека за добивање на потребната документација е потребна една година, сепак ја добивме градежната дозвола за околу 2 месеци, за што сум благодарен на градоначалникот“, додаде Самарџиоски.
 

Заменикот на претседателот на Владата на Република Македонија задолжен за економски прашања, д-р Кочо Анѓушев, на вториот ден од „Самит 100 – Бизнис лидери од Југоисточна Европа“, учествуваше на панелот „Дали  регионот може да се натпреварува на глобалниот пазар“ каде што дебатираше со потпретседателот на Владата на Република Србија д-р Расим Љајиќ, а кој го модерираа претседателката на Самит 100 и член на управен одбор на Горење Груп, Станка Пејановиќ и потпретседателот на Самит 100 и генерален директор на Алкалоид, Живко Мукаетов.

Вицепремиерот Анѓушев истакна дека за економски и општествен прогрес, друга алтернатива за земјите од регионот, освен членство во Европската Унија, нема. Тој посочи дека помеѓу земјите членки на Европската Унија во минатото постоеле дури и поголеми разлики од оние кои ги имаат земјите од Западен Балкан и дека тие примери треба да бидат показател како да се надминат предизвиците и како да се делува за подобра и заедничка иднина.

„Владата на Република Македонија активно работи на надминување на разликите кои ги имаме со соседните држави, на решавање на проблемите кои ги имаме со децении и цели кон заедничка иднина. Сметам дека сме добар пример за градење пријателство. Во поглед на мобилноста и поврзаноста, добро е тоа што во сите земји се реализираат важни инфраструктурни проекти, но доколку со квалитетни автопатишта, во кои инвестираме милиони евра, заштедиме 10% од времето за патување, а притоа пак стоката стои на граници по 12 часа, реално не сме направиле ништо. Со години се водат политички дебати како да ја унапредиме регионалната соработка, а не се реализира договореното. Тоа е така заради заштита на локалните економски интереси, што е добро на кус рок, но не носи резултати на долг рок“, посочи вицепремиерот Анѓушев.

За да земјите од регионот го постигнат нивото на економски развој кој го имаат поранешните социјалистички држави од централна и источна Европа, како што се Чешка, Полска, Словачка и др. во наредните 20 години треба да се генерира раст на БДП помеѓу 5-7% годишно.
„Постојат четири генератори на растот на БДП: индустријата, градежништвото, трговијата и земјоделието кои се најистакнати во нашите земји. Градежништвото лесно се стимулира, сепак ако станува збор за проекти кои немаат физибилност, државата се задолжува за нив, краткорочно има ефект, а долгорочно проблем. Земјоделието и трговијата треба да се развиваат, но најважно е индустријата да се развива, токму на тоа се темели успехот на централно европските држави. За да индустријата пак се развива, потребно е да се поттикнуваат извозно ориентирани компании, каде што целиот свет е конкуренција. Компаниите да бидат поконкурентни, Владите мора да бидат ефикасни и од збор да се премине на дело. Регионот нема време за губење, мора да ги отфрлиме предрасудите и да го намалиме влијанието на политиката. Мора да научиме да соработуваме, нашите земји не смеат да бидат конкуренти, мора да бидеме партнери. Треба да видиме кои давачки може државите да ги намалат, за да стимулираме технолошки развој на нашите компании, инаку нема да имаат можност екстензивно да се развиваат“, подвлече вицепремиерот Анѓушев

Македонија која гарантира добар живот на своите граѓани, членка на ЕУ, каде географски припаѓа, отворена земја која има создадено добри односи со сите соседи, така ја гледам иднината на државата, нагласи Анѓушев.

„За подобра иднина не ни треба многу. Ни треба добра организација, особено на Владино ниво, да се смени менталниот склоп на администрацијата и на граѓаните, да бидеме поефикасни и поефективни. Стопанствениците се дел од успехот и тие треба да помогнат, да ги платат вработените за да живеат нормален живот и да работат на проекти кои сакаат да ги работат. Сакам да ја видам Македонија како стабилна земја, каде што луѓето не се оптеретуваат со историја и политика, како партнер на соседите. Сакам искрено да соработуваме за подобар регион, без скриени намери и што е најважно да преминеме од збор на реализација“, заврши Анѓушев.
 

На предлог на Министерството за внатрешни работи, Владата на Република Македонија на денешната седница ја разгледа и усвои Информацијата за потребата од формирање на Меѓуресорска работна група која ќе предложи модел на реформа на безбедносно - разузнавачкиот систем во Република Македонија со План за негово воспоставување. 

Со заклучок на денешната седница, Министерот за внатрешни работи во рок од 3 дена од добивањето на номинациите е задолжен да достави до Владата на Република Македонија Предлог одлука за формирање на Меѓуресоска работна група која ќе предложи Модел на реформа на безбедносно - разузнавачкиот систем во Република Македонија со План за негово воспоставување. 

Владата на Република Македонија ја разгледа и усвои Информацијата за имотот кој припаѓал на должникот Тутунски комбинат „Боро Петрушевски Папучар АД” од Куманово со цел да се испитаат можностите за рестартирање на комбинатот. 

Во таа насока Владата на РМ на денешната седница ги задолжи Управата за јавни приходи и Агенцијата за управување со одземен имот, во договор со доверителите и сопствениците на имотот, или на дел од него, да влезат во процес со кој ќе ги уредат меѓусебните односи во постапката со која треба да се создадат услови за продажба на вкупниот движен и недвижен имот на потенцијалните инвеститори.

На денешната 91 седница, Владата на Република Македонија ја разгледа и усвои Информацијата за Рамковна соработка (Country Partnership Framework) помеѓу Република Македонија и групацијата Светска банка за периодот 2019-2023 година и го прифати предлогот за Рамковната соработка, односно го прифати предлогот со проекти кои би се реализирале и финансирале со средства (грант и/или заем) од групацијата Светска банка во наведениот период.

Министрите во владата денеска ја разгледаа и усвоија Информацијата во врска со активностите кои ги презема Република Македонија за имплементација на Националната стратегија за одржлив развој и Имплементација на Целите за одржлив развој на Обединетите нации, и донесе одлука за изменување и дополнување на Одлука за формирање на Националниот совет за одржлив развој.

На својата денешна седница владата го прифати најновиот усогласен текст на Спогодба помеѓу Владата на Република Македонија и Владата на Соединетите Американски Држави за научна и технолошка соработка, и го определи д-р Арбер Адеми, министер за образование и наука во име на Владата на Република Македонија да ја потпише Спогодбата помеѓу Владата на Република Македонија и Владата на Соединетите Американски Држави за научна и технолошка соработка.

Владата на РМ за претседател на Организациониот одбор за претстојната прослава на државниот празник - 11 Октомври - Ден на народното востание ја именуваше Мила Царовска, министер за труд и социјална политика, а за членови м-р Горан Сугарески, министер за транспорт и врски, Асаф Адеми, министер за култура, Сухејл Фазлиу, министер за локална самоуправа, Драган Николиќ, државен секретар во Министерството за одбрана и м-р Роберт Алаѓозовски, национален координатор за развој на културата и меѓуресорска соработка.
 

Собирањето, анализата и споделувањето на миграциските податоци се многу важни за реалното и објективно согледување на миграциските трендови и состојби и само заеднички имаме шанса да дојдеме до оптимални решенија што ќе не направат сите нас поефикасни во справувањето со мигрантските кризи и сите нивни предизвици, рече министерот за внатрешни работи Оливер Спасовски во своето обраќање на денешната средба на земјите членки на Прашкиот процес, што се одржува во Скопје. 

 

-Во текот на 2015 и 2016 година минавме еден тежок период кој на проверка ги стави сите наши капацитети за справување со глобалните предизвици од ваков тип, притоа соочувајќи не и со одредени слабости кои како држави мораме да ги елиминираме. Притоа, меѓу другото, констатиравме дека таквите состојби не можат ниту да бидат изолирани, ниту пак ограничени на одреден простор или држава, туку тие треба да се решаваат само со заеднички интегрален пристап, со вложување на потребните капацитети, но пред се со исклучително тесна и отворена меѓусебна соработка- рече министерот Спасовски.  

Во такви услови сите ние дојдовме до заклучокот дека, меѓу другото, од суштинско значење е постоењето на систем, концепт со кој што точно, валидно ќе се има увид во сите аспекти на миграциското движење. 

-Без благовремена размена на податоци и информации, без постојана комуникација во насока на систематизирање, проценка, апдејтирање на тие информации не можеме да имаме максимална ефикасност во справувањето со миграцијата. Особено не од размерите што ги имавме пред две-три години. Сфативме дека на една граница се заштитуваат и сите други граници, независно колку сме блиску или далеку едни од други. Безбедносните импликации не може да се превенираат без хомоген систем од мерки и активности, без постојани средби и размени на идеи, искуства, еспертиза, или без квалитетни, навремени и исцрпни податоци. Во годините зад нас извлековме квалитетни поуки, и преку низата идеи и иницијативи, направивме многу во насока на подигање на институционалните капацитети за успешно справување со миграцијата- рече Спасовски. 

 

Меѓу повеќето точки на дневен ред од програмата за работа на Владата и од интерес за граѓаните, на денешната седница на предлог на Секретаријатот за европски прашања - Секторот за координација на европски фондови и друга странска помош, ќе биде разгледана информацијата за статусот на имплементација на тековните Твининг проекти на ЕУ како инструмент за јакнење на институционална надградба.

Влада на РМ денеска ќе ја разгледа и ќе донесе соодветни заклучоци во врска со информацијата за активностите кои ги превзема Република Македонија за имплементација на Националната стратегија за одржлив развој и Имплементација на Целите за одржлив развој на Обединетите Нации.

Министерството за економија пред останатите членови на владата денеска ќе ја презентира и Информацијата со предлог за поведување на постапка за формирање на работна група за имплементација на Договор за соработка во областа на туризмот меѓу Владата на Република Македонија и Владата на Република Црна Гора, како и информацијата за одржување на Втората седница на Мешовитата комисија по Меморандумот за економска соработка меѓу министерствата за економија на Република Македонија и Словачката Република.

На денешната, 91 седница, на деневен ред на Владата на РМ е и Предлог-програмата за изменување и дополнување на Програмата за остварување развој на дејноста во студенскиот стандард за 2018 година, како и информацијата за прогрес на активностите во процесот на изработка на Стратегијата за паметна специјализација за истражување и иновации за период јануари-јуни 2018 година, како предлог на Министерство за образование и наука.

Истото министерство за денешната седница ја предложи и точката Информација за потпишување на Спогодба помеѓу Владата на Република Македонија и Владата на Соединетите Американски Држави за научна и технолошка соработка, со текст на Спогодба.

Владата на РМ на оваа седница ќе ја разгледа и информацијата за реализација на проектите: „Бесплатен викенд за млади лица до 27 години за превоз во железнички сообраќај“, „50% попуст за ученици и студенти“, „Бесплатен четврток за студенти во железнички патнички сообраќај“, „Средношколска среда“ и Бесплатен викенд за стари лица во железнички патнички сообраќај“, за 2018 година.

 

Заменик претседателот на Владата на Република Македонија задолжен за економски прашања, Кочо Анѓушев учествува на седмиот по ред „Самит 100 – Бизнис лидери во Југоисточна Европа“, кој се одржува во Белград, а на кој учествуваат политички и бизнис лидери од регионот.

Во попладневните часови на Самитот, вицепремиерот беше дел од панелот „Кои резултати ќе направат вистинска разлика за регионот“ на кој се водеше дискусија помеѓу бизнисот и политиката.

Вицепремиерот истакна дека политиките на македонската Влада за градење на добрсоседски односи, како и цврстата заложба за интеграциите во ЕУ и НАТО даваат добри резултати, кои се рефлектираат преку се поголем интерес и број на странски инвестиции во земјата.

 

 

„Само во последната година инвестициски проекти започнаа 16 странски компании, што е значителна бројка за мала земја како Република Македонија. Тоа е резултат на економските политики кои ги водиме, но не само на нив. Се разбира дека за странските компании се важни поволностите кои им ги нуди една земја, но сепак тие се дури на трето-четврто место. Многу поважно им е владеењето на правото и стабилноста, а се поголем фокус се става и на расположливата квалитетна работна сила. Сето тоа е во фокус на Владата, во интерес на стопанството, граѓаните и економијата генерално“, потенцираше Анѓушев.

За да компаниите бидат поконкурентни на глобалните пазари, земјите од регионот мора да бидат насочени кон ЕУ интеграциите, подвлече Анѓушев и појасни дека мора да се ослободат од историските стеги кои во моментов ги имаат.

„Мора да бидеме рамноправни со земјите од ЕУ за да бидеме поконкурентни, и затоа треба да бидеме фокусирани кон ЕУ интеграциите. Доколку компании од ЕУ добиваат субвенции во своите земји од 50-70% за технолошки развој, нашите компании не можат да ги следат и затоа мора да станеме членки на ЕУ. На Балканот се продуцира повеќе историја отколку што може да се козумира, сите ние треба тоа да го забораваме, да се отвориме повеќе и да бараме повеќе области каде може да соработуваме“, нагласи Анѓушев.

Во поглед на енергетската соработка, Анѓушев рече дека секоја земја мора максимално да ги користи сопствените капацитети во однос за зголемување на енергетската независност и притоа да ги користи достапните ресурси, независно дали тоа е јаглен, вода, ветер или сонце.

„Нешто што сигурно можеме да направиме да ја подобриме соработката во енергетиката, а во моментов не го правиме, е да создадеме еден заеднички енергетски пазар. Денес имаме подобра енергетска инфраструктура, помал конзум на електрична енергија, ако се спореди со времето во поранешна Југославија, а имаме заугушување на прекуграничните капацитети, кои верувам дека се повеќе од административна, отколку од техничка природа. Да се ослободиме од административните спреги и да формираме заеднички пазар, кој ќе ја подигне конкурентноста“, подвлече Анѓушев.

Вицепремиерот појасни дека задачата на секоја од државите е да реализираат капитални проекти, кои не може да ги реализира бизнис секторот, како автопати и железници, како и да работат на намалување на административните процедури за подобрување на бизнис климата.

„Мора да соработуваме повеќе, заеднички да настапуваме на пазарот, доколку заеднички делуваме и работиме, ќе бидеме поуспешни и поатрактивни за Европската Унија“, заврши Анѓушев.

На панелот на кој зборуваше вицепремиерот учествуваа и Бранимир Гвозденовиќ, потпретседателот на Собранието во Црна Гора, Александар Антиќ, министер за енергетика во Владата на Србија, Мирко Шаровиќ, министерот за надворешна трговија и економски односи во БиХ, како и претставници на Горење, Атлас груп, Сименс и Атлантик група.