Во рамки на посетата на Република Бугарија, во предвечерјето на Самитот ЕУ-Западен Балкан, министерот за економија Крешник Бектеши оствари работна средба со министерката за туризам на Република Бугарија Николина Ангелова. Министерот Бектеши го изрази задоволството од континуираниот пораст на бројот на бугарски туристи во Македонија, наведувајќи го податокот дека во 2017 годинаречиси 50 илјади посетители од Бугарија ја посетиле Македонија, при што се остварени околу 80 илјади ноќевања. Имено, според статистичките податоци што ги презентираше Бектеши, бројот на бугарските туристи што ја посетиле Република Македонија во 2017 година во однос на истиот период од претходната година се зголемил за 24%,  а исто толку и бројот на ноќевања во овој период, додека во интервалот јануари-март 2018 година Македонија ја посетиле околу 10 илјади бугарски гости, кои оствариле 14 илјади ноќевања во нашата земја, што претставува зголемување за 21%, односно 14% во однос на истиот период минатата година.

Министерката Ангелова, пак, изрази задовлство што во зимската сезона македонските туристи со задоволство ги избираат бугарските скијачки центри, што покажува дека туристите од двете земји имаат слични вкусови за содржините на туристичката понуда и наоѓаат за нив атрактивни тури во соседството, а потпишаниот Протокол за намери за соработка во областа на туризмот меѓу владите на Република Македонија и Република Бугарија минатата есен, веќе ги дава своите ефекти за јакнење на соработката во областа на туризмот, како сектор со висок потенцијал, за придонес кон севкупниот економски развој во двете земји.

Бектеши и Ангелова се согласија дека за привлекување на туристи од далечните пазари е неопходно создавање на регионална туристичка рута, а за таа цел веќе е формирана работна група од двете земји, која до оваа есен треба да изготви предлог на заедничка туристичка понуда, која би можела да опфати и други земји од регионот кај кои има интерес, со што на светскиот турист на мало растојание ќе му бидат понудени различни атрактивни содржини. Министерот Бектеши изрази подготвеност оваа иницијатива и официјално да ја сподели со другите колеги од регионот, а беше предложено наредниот период да се организираат средби на двете страни со претставници на локалната самоуправа од туристичките места, туроператорите, хотелиерите и нискобуџетните авиопревозници, со цел вклучување на туристичкиот сектор во дефинирање на заедничките активности за настап на далечни туристички пазари.

Министерката Ангелкова предложи да се разгледа и можноста за заедничко аплицирање за ИПА проекти за меѓугранична соработка, особено во делот на туризмот и инфраструктурата, со што ќе биде олеснет и пристапот за инвестиции во регионот, што е одличен начин за планско и здружено решавање на предизвиците што значат економски развој за двете земји. 

Министерот Бектеши истакна дека заложбите на македонската Влада се брза реализација на железничката линија кон Бугарија од македонска страна, но и потребата од забрзување на изградбата на патот Куманово-Крива Паланка, што покажува дека инфраструктурата, како основа за брз проток на туристи, претставува приоритет на владините политики. 
 

Претседателот на Владата на Република Македонија Зоран Заев, во придружба на Заменикот претседател во Владата на РМ задолжен за европски прашања Бујар Османи и Министерот за надворешни работи Никола Димитров, на Самитот на ЕУ за Западен Балкан, денеска оствари средба со Канцеларката на Сојузна Република Германија Ангела Меркел.

Премиерот Заев на средбата ја истакна исклучителната соработка и искрената поддршка на Сојузна Република Германија во сите политички процеси на современа Република Македонија.

Република Македонија со активности на прогресивните политички сили во земјата направи квантен скок и од „заробена држава“, се врати на патот на демократските процеси за реформи во земјата и за интензивирање на евро-атлантската агенда.

Премиерот Заев подвлече дека големата поддршка на граѓаните за аспирациите на земјата за членство во ЕУ и НАТО говори дека земјата нема друга алтернатива и дека тоа потврдува дека граѓаните на Република Македонија делат исти европски вредности и дека заслужуваат индивидуална проценка за напредокот врз основа на постигнатото.

Премиерот Заев истакна дека е убеден дека СР Германија ќе ја посвети својата поддршка за датум за преговори на претстојниот Самит на Европскиот Совет во јуни, и дека се надева дека на поддршката на Канцеларката Меркел во разговорите со останатите премиери на земјите членки на ЕУ. 

На средбата уште еднаш беше реафирмирана досегашната исклучително плодна соработка меѓу Република Македонија и СР Германија, која во изминатата година се потврди со вкупната трговска размена во висина од 3,6 милијарди евра.

Премиерот Заев на средбата со Канцеларката Меркел ја издвои како особено значајна за регионот иницијативата Берлински процес, од која произлегуваат голем број проекти за економско и останато поврзување на земјите од Западен Балкан, кои, истовремено, ги подигаат капацитетите на земјите од регионот во приближувањето на нивните стандарди до оние на ЕУ.
 
Премиерот Заев и Канцеларката Меркел разговараа и за можните последици доколку регионот и Република Македонија не ги добијат заслужените признанија и доколку се успорат процесите за интегрирање на земјите од Западен Балкан во ЕУ. Такво сценарио ќе ги закочи реформските процеси, ќе ги охрабри ретроградните политички сили и ќе отвори простор за инволвирање трети страни што може да предизвика нарушување на стабилноста.

За да се елиминираат овие можни закани, успешната приказна на Република Македонија треба да продолжи и оваа година со храбри одлуки што треба да дојдат од ЕУ и НАТО.
 

Претседателот на Владата на Република Македонија Зоран Заев, на Самитот на ЕУ за Западен Балкан денеска оствари средба со Премиерот на Кралството Холандија Марк Руте.

Во придружба на Заменик Претседателот на Владата на Република Македонија за европски прашања Бујар Османи и Министерот за надворешни работи Никола Димитров, премиерот Заев на средбата изрази големо задоволство од билатералните односи меѓу двете земји кои оваа година одбележуваат 25 години од воспоставувањето дипломатски односи.

Добрите односи меѓу Република Македонија и Кралството Холандија, констатираа двајцата премиери, е крунисано со исклучително позитивни искуства во сферата на политичката и културната соработка, посебно во туризмот, како и во економските врски меѓу двете земји.

Кралството Холандија е силен поддржувач на обновата на политичкиот систем и институциите после политичката криза во Република Македонија и останува со силна поддршка во креирањето на слободно функционално општество и пазарна економија.

Премиерот Заев го информираше својот колега, премиерот Руте, за актуелниот политички момент во Република Македонија, и истакна дека владата останува максимално посветена на континуитетот во реформите, кои после неусловената препорака за старт на преговори со ЕУ од страна на Европската Комисија, добија нова движечка сила во спроведувањето и во утврдувањето на приоритетите.

Претседателот на Владата на РМ Зоран Заев на средбата го запозна холандскиот премиер со последниот развој во разговорите со Република Грција за прашањето на името и информираше дека двете страни се целосно посветени на успешен исход во интерес на двете земји.

Максималните напори на двете страни во преговорите се од особено значење и заради фактот што Република Македонија нема алтернатива во аспирациите за членство во ЕУ и НАТО и взаемната поддршка во изнаоѓањето заеднички прифатливо решение ќе го поттикне процесот до неговата цел

На средбата е истакнато дека поддршката на земјите членки на ЕУ во решавањето на ова прашање, како и во охрабрувањето на реформските процеси соодветни на стандардите на ЕУ, е од исклучително значење за Република Македонија, но и за ЕУ заради интеграцијата на регионот и стабилноста на Западен Балкан.
 

Претседателот на Владата на Република Македонија Зоран Заев, како дел од неговите активности за време на Самитот на ЕУ за Западен Балкан во Софија, денеска се сретна со премиерот на Кралството Шведска Стефан Лофвен.

Во придружба на Заменик претседателот на Владата на РМ за европски прашања Бујар Османи и на Министерот за надворешни работи Никола Димитров, премиерот Заев го изрази задоволството од блиските политички односи и од взаемното разбирање меѓу двете земји, преточено и во Декларацијата за соработка меѓу Кралството Шведска и Република Македонија, како и со обновените договори за билатерална асистенција на Кралството Шведска за нашата земја.

Премиерот Заев го запозна премиерот на Кралството Шведска Стефан Лофвен со актуелниот политички момент во Република Македонија, и истакна дека Владата на РМ е мотивирана со силна политичка волја да ги спроведе докрај реформите за владеење на правото, за независни и функционални јавни институции во служба на граѓаните и во создавањето услови за слободни медиуми.

На средбата меѓу Претседателот на Владата на Република Македонија Заев и Премиерот на Кралството Шведска Лофвен е потенцирано дека исклучително позитивните чекори што Република Македонија ги практикува во односите со соседите, низ отворен дијалог, посветен на градење на мостови на доверба и на взаемно почитување, ќе дадат резултати и во тековните разговори по прашањето на името со Република Грција.

Двајцата соговорници се согласија дека после неусловената препорака за предпристапни преговори на Европската Комисија за Република Македонија, очекуваната одлука за датум за старт на преговорите со ЕУ, што треба да ја донесе Европскиот Совет во јуни, ќе биде новата движечка сила за имплементација и за приоретизирање на реформите во нашата земја.

Премиерот Заев истакна дека поддршката од Кралството Шведска Европскиот Совет на ЕУ, да утврди датум за преговори за Република Македонија ќе спречи стагнирање на реформите и на економските процеси, како и интензивирање на национализмот, и нестабилност во регионот.

На средбата меѓу премиерите Заев Лофвен, е истакнато дека Република Македонија направи сериозни позитивни придвижувања во целиот регион и дека е пример како една мала земја може да биде голема надеж за Западниот Балкан и за Европа.
 

Претседателот на Владата на Република Македонија, Зоран Заев, денеска учествува во работата на Самитот ЕУ за Западен Балкан, кој се одржува во Софија, Република Бугарија, која како Претседавач со Европскиот Совет во првата половина од оваа година, е домаќин на шефовите на држави или влади на земјите-членки на Европската унија и на нивните колеги од регионот на Западен Балкан.
 
Во официјалниот дел од програмата, премиерот Зоран Заев денеска беше пречекан од страна на премиерот на бугарската влада Бојко Борисов, по што учествуваше во сесијата на отворањето на Самитот на ЕУ за Западен Балкан, со кој претседава претседателот на Европскиот совет, Доналд Туск, во име на ЕУ заедно со претседателот на Европската комисија, Жан-Клод Јункер.
 
Претседателот на Владата на РМ Зоран Заев ќе учествува во работната пленарна сесија на тема „Поврзување“ (Connectivity), а за време на работниот ручек на шефовите на владите и на држави, со највисоките претставници на телата на Европската Унија, е планирано да има свое обраќање на тема „Заедничко справување со заканите“.
 
Во рамките на својата агенда Претседателот на Владата на Република Македонија Зоран Заев денеска е предвидено да оствари средба со Канцеларката на Сојузна Република Германија Ангела Меркел, како и со премиерот на Холандија Марк Руте, како и со премиерите на Австрија и Шведска Себастијан Курц и Стефан Лофвен.
 
Лидерите на земјите учеснички на Самитот на ЕУ за Западен Балкан се очекува да ја усвојат Софиската декларацијата за Западен Балкан на ЕУ, како и Софиската агенда на приоритети, која содржи конкретни проекти кои ќе бидат поддржани од ЕУ за да се исполнат зацртаните цели од декларацијата насочени кон зајакнување на владеењето на правото и демократските институции во земјите на Западен Балкан, борбата против организираниот криминал, доброто владеење и почитувањето на правата на малцинските заедници, како и на зајакнување на економските врски меѓу земјите од регионот, и на регионот со ЕУ. 
 

Претседателот на Владата на Република Македонија Зоран Заев и премиерот на Република Грција Алексис Ципрас одржаа заедничка средба за време на Самитот на ЕУ за Западен Балкан, што се одржува во Софија, Република Бугарија.

Двајцата премиери разговараа за актуелниот момент во разговорите за проблемот што Република Грција го има со уставното име на Република Македонија, и за можностите да ги доближат разликите за решение прифатливо за двете страни.

Претседателот на Владата на Република Македонија Зоран Заев денеска, во придружба на Заменик претседателот на Владата на РМ за европски прашања Бујар Османи и на Министерот за надворешни работи Никола Димитров, непосредно пред почетокот на официјалниот работен ден на Самитот на ЕУ за Западен Балкан во Софија, се сретна со Премиерот на Република Естонија Јури Ратас, и со Премиерот на Кралството Белгија Шарл Мишел.

На средбата меѓу Премиерот Заев и Премиерот на Естонија Ратас беше изразено задоволство од односите меѓу двете земји, и подготвеност да се создадат услови за интензивирање на политичкиот дијалог на највисоко ниво за зајаканување на билатералните односи.

Премиерот Заев ги истакна искуствата на Естонија во однос на дигитализацијата на јавните услуги за граѓаните, и изрази надеж дека Естонија ќе помогне овие искуства да се применат и во дигитализацијата на работата на јавната администрација во Република Македонија.

На средбата со Премиерот на Кралството Белгија Шарл Мишел, двајцата соговорници заеднички констатираа дека лидерството и реформски определената Влада на Република Македонија, ја донесоа неусловената препорака на Европската Комисија за старт на преговорите со ЕУ, и со тоа е постигнат чекор повеќе на патот кон евро-атлантските интеграции.

Премиерот Заев го информираше неговиот белгиски колега дека реформите во Република Македонија продолжуваат со засилено темпо, и дека очекува тоа да биде препознаено од Европската Унија и од секоја земја членка и да се преточи во нова остварена одредница со утврдување на датум за почеток на преговорите кој се очекува како одлука на Советот на Европската Унија во јуни.

На двете средби, со естонскиот и со белгискиот премиер, Претседателот на Владата на Република Македонија Заев, ги запозна своите колеги со актуелниот политички миг во земјата и за текот на разговорите за прашањето со проблемот што Република Грција го има со уставното име на нашата земја.

Премиерот Заев побара поддршка од Естонија и Кралството Белгија во пресрет на јунскиот самит на Европскиот Совет на ЕУ, и истакна дека очекуваниот датум за преговори за Република Македонија ќе превенира стагнирање на реформите и на економските процеси, како и интензивирање на национализмот, и ќе го поттикне инволвирањето на трети страни во регионот.

Премиерите на Естонија Ратас и на Кралството Белгија Мишел, на двете одделни средби, изразија надеж дека во претстојниот период Република Македонија ќе добие конктретна поддршка за постигнатите остварувања на патот до членството во ЕУ и НАТО.

Делегација на Владата на Обединетото Кралство на Велика Британија и Северна Ирска, предводена од премиерката Тереза Меј, денеска ќе престојува во официјална посета на Република Македонија.

Церемонијата за добредојде на британската делегација, ќе се одвива на платото пред Владата на Република Македонија, по што е предвидена тет-а-тет средба меѓу премиерите Заев и Меј, како и билатерален состанок на македонската и британската владина делегација.

По средбите, претседателите на Владите на Република Македонија и на Обединетото Кралство на Велика Британија и Северна Ирска ќе одржат заедничка прес-конференција во
Владата на Република Македонија.

Во рамки на овој настан, во 14:30 часот е предвиден брифинг со сите претставници на медиумите и портпаролите на Владата на Република Македонија Миле Бошњаковски и Муамет Хоџа во Медиа Центарот на Владата на Република Македонија.

Претседателот на Владата на Република Македонија, Зоран Заев, вечерва имаше средба со Претседателот на Република Франција, Емануел Макрон, кој како и премиерот Заев, утре ќе учествува во официјалната програма на Самитот на ЕУ за Западен Балкан, што се одржува во Софија, Република Бугарија, земја претседавач на ЕУ за овој мандатен период.
 
Во искрена и пријателска атмосфера, премиерот Заев и претседателот Макрон разговараа за актуелни политички теми од интерес на Европската Унија, регионот и Република Македонија, како и за билатералните односи на нашата земја со Република Франција.
 
Премиерот Заев на средбата истакна дека Република Македонија и Западен Балкан се менуваат и демонстрираат европски манири.
 
Претседателот на Владата на РМ го информираше Претседателот Макрон дека Република Македонија продолжува со интензивните и сериозни реформи во правосудството, јавната администрација и во сферата на медиумите и дека сите реформски проекти се спроведуваат во дијалог со опозицијата.
 
„Моите сограѓани имаат европска иднина и ние, Балканот и ЕУ се бориме за иста Европа. Ве уверуваме дека Република Македонија е успешна приказна на Балканот и заслужува вреднување соодветно на постигнатите резултати. Ги поддржуваме вашите заложби за покохезивна, функционална и поодржлива ЕУ. Лидерството на Франција е мотивација и пример и за Македонија и за регионот“, истакна премиерот Заев на средбата со Претседателот на Република Франција Макрон.
 
Претседателот на Република Франција Емануел Макрон на средбата истакна дека Франција со внимание ги следи политичките процеси во регионот и во Република Македонија и посочи дека Македонија и Грција преземаат историска улога со посветеноста во решавањето на прашањето за името, и дека решавањето на овој спор е позитивно и сериозно наследство за Македонија.
 
Претседателот Макрон изрази честитки за реформите што ги презема Република Македонија и дека Франција ќе ја поддржи Македонија во позитивната динамика на спроведувањето на промените во земјата и во забрзување на прогресот на земјата.
 
Премиерот Заев и Претседателот Макрон се согласија дека е неопходно Западен Балкан да ги зајакнува врските со ЕУ за да се одржи европската перспектива на регионот.
 

Заменик претседателот на Владата задолжен за економски прашања д-р Кочо Анѓушев, реализираше работна посета и средба со менаџментот на компанијата Џонсон Мети, која работи во технолошко индустриската развојна зона Бунарџик.

На средбата вицепремиерот Анѓушев нагласи дека Владата работи на одржување на добри односи со странските компании кои работат во Македонија, како и дека интензивно работи на привлекување на нови реномирани компании, со што се докажува позитивната намера кон странските инвеститори.

„Мерките од Планот за економски раст се многу поттикнувачки за инвеститорите. Преку овие мерки стимулираме нови инвестиции, за побрз технолошки развој и зголемена конкурентност на компаниите, повисоки плати за вработените како и подобрување на соработката помеѓу странските и домашните компании. Многу важно е дека ги стимулираме и домашните компании технолошки да се развиваат, да создаваат производи со повисоки стандарди и подобар квалитет, за на тој начин да ја зголемат својата конкурентност и да стануваат потенцијални добавувачи на странските компании“, потенцираше вицепремиерот.

Менаџментот на Џонсон Мети ги презентираше резултатите кои оваа компанија ги има постигнато изминатите години. Тие посочија дека во 2017 година во нивната фабрика во која работат над 920 лица, се произведени околу 12 милиони катализатори, а вкупниот остварен извоз е околу 1,5 милијарди евра, при што посочија дека очекуваат резултатите во 2018 година да покажат дополнителен раст. Дополнително менаџерскиот тим на Џонсон Мети, нагласи дека се посветува особено внимание на развој на вработените и имплементација на највисоките деловни стандарди во работењето.

„Растот и развојот на компаниите е успех за Република Македонија. Токму успешните компании се во фокусот на Владата и мерките за поддршка се фокусирани кон нив. Со директна финансиска поддршка од Владата, односно преку имплементација на Законот за финансиска поддршка на инвестициите, кој од денес и официјално стапува на сила, ги поттикнуваме компаниите да реализираат нови инвестиции, да отвораат нови подобро платени работни места, технолошки да се развиваат и да стануваат поконкурентни на меѓународни пазари во насока на повисоки стапки на економски раст и благосостојба на македонските граѓани“, потенцираше вицепремиерот Анѓушев.