Владата на Република Македонија во име на претседателот на Владата, Зоран Заев и Заменик на претседателот на Владата, Кочо Анѓушев, а сѐ со цел точно, транспарентно и целосно информирање на јавноста ви го испраќа следното соопштение во кое е вклучен демант кој се однесува на прилогот емитуван на ТВ Алфа на 11.10.2018 година насловен како „Заев: Вината на Анѓушев не е докажана“.

 

Д Е М А Н Т

 

Владата на Република Македонија категорично и целосно ја отфрла содржината на насловот и прилогот емитуван на ТВ Алфа на 11.10.2018 година како невистинит и тендециозен.  

Владата на Република Македонија укажува дека изјавата на претседателот на Владата на Република Македонија Зоран Заев е погрешно пренесена и врамена во сосема неточен контекст што значи дезинформирање на јавноста, со свесна намера да се наруши угледот на Владата на Република Македонија, премиерот Зоран Заев и на вицепремиерот задолжен за координација со економските ресори, проф. д-р Кочо Анѓушев. 

Прилогот е подготвен надвор од професионалните новинарски стандарди, а изјавата е во целост погрешно интерпретирана.

Претседателот на Владата на Република Македонија, Зоран Заев и Заменик на претседателот на Владата на Република Македонија, Кочо Анѓушев од ТВ Алфа бараат јавно и децидно извинување за објавениот прилог:

„ТВ Алфа им се извинува на премиерот Зоран Заев и вицепремиерот Кочо Анѓушев за пласираните лажни информации во прилогот насловен „Заев: Вината на Анѓушев не е докажана“. Изјавата на премиерот Заев е неточно и погрешно пренесена со што е објавена лажна вест со која се нанесува штета на угледот на премиерот Зоран Заев и на заменик претседателот на Владата, Кочо Анѓушев“.

Владата на Република Македонија бара јавно извинување за објавениот прилог во истиот термин и формат (вести) каде е емитуван прилогот. 

Објавата на овој демант ќе се смета за целосна вклучувајќи го и јавното извинување прочитано во целост и во форматот во кој е емитуван прилогот - во вестите на ТВ Алфа.

Во спротивно ќе бидат преземени сите правни механизми вклучувајќи и судска заштита во насока на зачувување на интегритетот на засегнатите страни. 

 

Претседателот на Владата на Република Македонија, Зоран Заев, придружуван од министерот за внатрешни работи, Оливер Спасовски, заменик претседателот на Владата на Република Македонија задолжен за европски прашања, Бујар Османи, министерот без ресор задолжен за комуникации, транспарентност и отчетност, Роберт Поповски и министерката без ресор задолжена за странски инвестиции, Зорица Апостолска, денеска присуствуваше на заедничката прослава на големиот државен празник 11 Октомври, во Куманово, во организација на општините Прилеп и Куманово.

На одбележувањето на празникот, кое се одржа на локацијата спомен-костурница  во Куманово премиерот Заев имаше свое обраќање во кое поздравувајќи ги присутните делегации и граѓаните на Куманово истакна:

 

 

Денеска го одбележуваме празникот Ден на народното востание - 11 октомври. Со акциите извршени тој ден во 1941 година, беше означен почетокот на востанието на македонскиот народ, и на сите други граѓани во Македонија, против фашистичкиот окупатор.

Сеќавањето и празнувањето на ваквите денови служи како потсетник на моментите од историјата во кои кога е најтешко, но и најпотребно, нашиот народ демонстрира неизмерна храброст и истрајност. 

Историјата и историчарите ги имаат фактите, но дозволете денес да ги споделам со вас, моите лични впечатоци за храбрите, слободољубиви државотворци

Тој ден тие луѓе направија избор. Историски избор, и потоа не само во Куманово и Прилеп, туку низ цела Македонија, се кренаа на крилјата на идејата, на мислата, на стремежот, Македонија да ја направат дом на слободата, победник над фашистичкото зло. 

Презедоа одговорност да станат дел од светскиот победнички сојуз на државите што се кренаа против фашистичката закана.

Може да биде наречена судбина, може да биде дури и сплет на историски и политички околности, но храбрите борци за слобода, во 1941 година, со својот избор и со организираните партизански единици на народното ослободително движење, го завршија делото наречено ДРЖАВА МАКЕДОНИЈА. 

Избраа дури и да ги положат и своите животи за да изградат од новата држава светилиште на слободата и да им ја даруваат на идните генерации како завет да ја чуваат и да ја унапредуваат.

Од тогаш наваму, во текот на сите изминати 77 години, ова беше нашиот завет. Овој завет не смееме да го прекршиме.

Почитувани сограѓани, борци и соборци, вљубеници во слободата,

Може да се каже дека раѓањето на македонската држава е резултат и на личната одлука на секој на секој учесник и учесничка во Народно ослободителната војна. Секој од нив одделно препознаа дека е време за избор. Време да се биде дел од историјата што ќе се памети, што ќе биде инспирација и ќе се слави.

Таа генерација наши претходници ја грабна таа историска шанса за да го остварат вековниот сон - своја држава, држава на македонскиот народ – Република Македонија, и сите граѓани кои што живеат во неа.

Борците на НОБ, им ја дарија новата држава на идните генерации да ја чуваат, да ја негуваат и да ја развиваат, а на светот, во светската културна ризница, му ги подарија без временските скапоцености на нашата културна историја и традиција.

Почитувани граѓани на Република Македонија,
Празнувањето на значајните датуми и празници од нашата историја, не треба да бидат само формалност и протокол. 
Празниците се добри моменти кога секоја генерација што ги слави и прославува треба да се запраша: 

Како да направиме чекор повеќе во освојувањето на слободата за сите наши граѓани? Како да го зачуваме она што го наследивме и како од Македонија да направиме подобра држава, поубаво место за живеење? 
Секоја генерација е должна да ги проширува видиците. Секој граѓанин на нашата држава. И да реагира тогаш кога некој го блокира, го оневозможува развојот.

Оваа должност и одговорност најмногу им припаѓа на политичките лидери, на народните пратеници.
Затоа мораме да продолжиме, одлучно и храбро во остварувањето на нашата стратешка цел во оваа фаза од нашата историја – побогато општество и повеќе можности за сите, членството во НАТО, а потоа и членството во Европската Унија.

Ова е време кога нашата генерација е исправена пред избор што ќе ја одреди иднината на државата и на генерациите што доаѓаат. 

Сега е време на нашите деца, и на идните генерации, да им дадеме доволно причини да си го видат своето сопствено место во домот Република Македонија.

Нашата мисија денес е борба за економски развој и борба за секое ново-отворено работно место. Нашата борба денес е да овозможиме европски можности за вложувања во здравството, во образованието и инвестирањето во квалитетни и повисоки стандарди во македонското образование.

Нашиот повик денес е да обезбедиме посигурна, безбедна и просперитетна иднина за нашите млади.

Нашиот приоритет денес се инвестициите во инфраструктурата, во изградбата на патишта, железници, како и помошта за македонскиот земјоделец чија работа и труд заслужува вреднување и почит.

Нашата мисија денеска е исполнување на нашите стратешки цели кои ја овозможуваат реализацијата на овие приоритети. 
Сега е време да им докажеме на последните скептици дека Република Македонија е новата ѕвезда во европското соѕвездие.

Дека го заслужуваме тоа место.

На 11 октомври 1941 година, кога поривот за државност повика на акција - патриотите презедоа акција.

Вистински патриот го почитува минатото на својата земја, но многу поважен е неговиот поглед кон иднината.

11 октомври 2018 година е дел од востанието на нашата генерација.

Ова е востание на гласот. Тој глас со којшто ќе ја осигуриме иднината на слободна, независна, европска, просперитетна Македонија. 

Тој граѓански глас ги повика институциите да ја овозможат европската и атлантската иднина на сегашните и идните генерации во нашата Македонија. 

Сега е редот на гласот на народните избраници во Собранието, кои се исправени пред историската улога за иднината на Македонија за сите нас.    

Пред 77 години борците од НОВ отпочнаа борба за иднината, а нашата генерација денес ја има таа чест да се избори за европската иднина на Република Македонија!

Денес изборот за членство во ЕУ и НАТО го одредува нашиот патриотизам. Идните генерации ќе го слават само ако им дадеме повеќе причини за тоа. Како што нам, причини за славје ни даде генерацијата на партизаните од антифашистичката и народноослободителната борба.

Нека ни е честит и вековит 11 октомври, Денот на народното востание.
 

Владина делегација предводена од Заменик на Претседателот на Владата на Република Македонија и министерка за одбрана, Радмила Шекеринска, а во чиј состав беа и министрите за надворешни работи и за правда, Никола Димитров и Рената Дескоска, со положување свежо цвеќе пред споменикот на Ослободителите на Скопје, им оддадоа почит на загинатите борци во НОВ 1941-1945 година, зеде учество во одбележувањето на 11 Октомври - Денот на народното востание.

Пред споменикот на борците кои паднаа во битката за ослободување на Скопје, исто така се поклонија и делегации на Сојузот на борците, на Собранието на РМ, претставници од кабинетот на Претседателот на Република Македонија, делегација на АРМ, како и претставници на дипломатскиот кор во земјата, локалните заедници и здруженија на граѓани.

Честитајќи им го Денот на македонското востание - 11 Октомври, Заменик на Претседателот на Владата на Република Македонија и министерка за одбрана, Радмила Шекеринска, истакна дека денешниот ден ја симболизира нашата исконска желба за слобода и правда, за држава која ќе стои зад тие вредности и за иднина која ќе ни ги гарантира.

 

 

Министерката Шекеринска посочи дека пред 77 години кога нашата земја, регионот, но и цела Европа ги доживувале своите најтешки денови и биле осудени на насилство, окупација, жртви и безнадежност, биле втемелени македонските национални интереси и стратешката ориентација на нацијата. А за тоа, како што рече Шекеринска, се заслужни сите кои го дале животот, но и живите сведоци на борбата за слобода.

„Тие херои и денес не потсетуваат: слободата не е подарок туку привилегија. Бремето на секој вистински лидер на оваа земја и на сите други земји е да ја чува и негува, да не бега од проблемите, туку да ги решава, да не мисли за себе, туку за својата земја и да ја однесе барем чекор понапред од таму каде што ја наследил“, додаде Шекеринска.

Одговорот на современите предизвици како што истакна министерката Шекеринска, е стратешката определба утврдена уште од независноста на Република Македонија, а тоа е Македонија  членка на НАТО и на ЕУ, изградена врз темелите на демократијата, слободата и еднаквоста.

„Остануваме Македонки и Македонци, кои својот македонски јазик ќе успеат да го направат официјален јазик на Европската унија. Нашите граѓани заслужуваат признаен, потврден идентитет и посилна меѓународна позиција. Како што заслужуваат и европска, правна, праведна држава пред која секој граѓанин ќе биде еднаков, држава која ќе создава можности за своите деца и млади. Токму затоа, сега е моментот сите пратеници да го потврдат патот на Македонија во НАТО и ЕУ. Сега сите членови на Собранието на РМ, сите пратеници, без разлика на која партија ѝ припаѓаат, имаат историска должност и обврска да ги преведат своите зборови во дела и да го обезбедат патот на Македонија кон стабилност, безбедност и економски просперитет“, заклучи министерката Шекеринска.

 

На 11 октомври 1941-вата година, како што истакна претседателот на Главниот одбор на Сојузот на борци и учесник во НОВ, Никола Стојановски, започна единственото победоносно востание на нашиот народ, а по 4 годишната борба стигнавме до првата слободна македонска асномска, држава, која што е темел на денешната самостојна и суверена Република Македонија.

 

 

„Денешното поставување на темелните вредности на нашата народна ослободителна борба во која се втемелени животите над 24 илјади борци и на вредностите и придонесите на асномска Македонија не се само повикување на траен пиетет кон тие вредности, туку пред се потреба на нова храброст, на нова смелост за изградба на сврзните ткива на нашиот народ што во овие кризни состојби ќе го поведат по светлите патишта на слободата, единството, смелоста и придонесот на секого за отворање на нови перспективи на развојот на државата врз високите европски и светски вредности со наш влог и иднина во обединетиот европски соживот. Тоа е пресудна задача за сите нас за сегашните и идните генерации. Потреба да се надминат претходните темелници на државата, за да ни бидат рамни сегашните и идните“, рече меѓу другото д-р Никола Стојановски.

 

Денот на македонското востание денеска се одбележа и во Прилеп. На чествувањето на празникот на Народното востание - 11 Октомври, учествуваше владина делегација, предводена од вицепремиерот за економски прашања д-р Кочо Анѓушев, а во чиј состав беа и министерот за транспорт и врски Горан Сугарески и заменик министерот за економија Кире Наумов.

 

 

Владината делегација положи свежо цвеќе пред спомениците на првиот претседател на Президиумот на АСНОМ, Методија Андонов Ченто, на народниот херој Кузман Јосифоски Питу, како и во Паркот на Револуцијата, пред споменикот „Могила на непобедените", а притоа се поклонија пред „Алејата на народните херои" и на споменикот „Жена борец".

На свеченото одбележување на празникот во Прилеп, вицепремиерот Анѓушев истакна дека македонскиот народ секогаш бил на вистинската страна на историјата и дека верува дека повторно ќе го избере вистинскиот пат, а тоа е членството во ЕУ и НАТО, вистинскиот правец за просперитет и развој на Република Македонија.

„Ако 11-ти октомври 1941 година беше ден на кој се покажа непокорот на македонскиот народ и симбол на борбата против фашизмот, денес сме исправени пред нов предизвик, а тоа е членството во ЕУ и НАТО, што значи просперитет и стабилност на македонската држава", нагласи вицепремиерот Анѓушев.


Шекеринска на чествувањето на 11 Октомври: Како и пред 77 години, кога бевме сојузници со прогресивните сили во светот и денес Македонија се приклучи кон прогресивниот свет бидејќи тоа е единствениот пат кон успехот

Во рамки на одбележувањето на Денот на македонското востание, 11 Октомври, на централниот настан во дворот на Владата на Република Македонија, свое обраќање пред присутните имаше Заменик на Претседателот на Владата и министерка за одбрана, Радмила Шекеринска.

Честитајќи им го денешниот празник на колегите министри, на пратениците, на претставниците од дипломатскиот кор, од локалните заедници, но и на борците од Народноослободителната војна, министерката Шекеринска истакна дека 11 Октомври ја симболизира нашата исконска желба за слобода и правда, за држава која ќе стои зад тие вредности и за иднина која ќе ни ги гарантира. Во својот говор министерката за одбрана, Радмила Шекеринска рече:

„На денешен ден пред 77 години, таквите амбиции, таквите елементарни желби, изгледале сосем невозможни. Нашите градови и села, нашиот регион, нашата Европа во тие моменти ги доживувале своите најтешки денови, осудени на насилство, окупација, жртви и безнадежност.

Но, токму во најтешкото Македонија го направила најважното, најдоброто. Токму во најтешкото беа искалени македонските национални интереси и нашата стратешка ориентација како нација. Кога пукнале првите пушки во Прилеп и Куманово, пукнале во име на слободата, еднаквоста и желбата за победа над тиранијата. Живите сведоци од Сојузот на борци таа борба ја живеат, ја носат со себе и за тоа како народ сме им вечно благодарни и на нив и на борците кои не се веќе меѓу нас.

Сите тие биле херои - кои ја разбрале и прифатиле одговорноста која ја носи слободата. Кои разбрале и прифатиле дека сме одговорни и виновни и за доброто кое не сме го направиле.

Тие херои и денес не потсетуваат: слободата не е подарок туку привилегија. Бремето на секој вистински лидер на оваа земја и на сите други земји е да ја чува и негува, да не бега од проблемите, туку да ги решава, да не мисли за себе, туку за својата земја и да ја однесе барем чекор понапред од таму каде што ја наследил. Во тој поглед секоја ера носи свој предизвик и одговор.

Нашиот одговор на современите предизвици е јасен и илустриран во стратешка определба која ни е јасна и консензуална од почетокот на нашата независност - Македонија членка на НАТО и ЕУ, изградена врз темелите на демократијата, слободата и еднаквоста. Тоа ќе го спроведеме, како долг кон нашите предци, како обврска кон идните генерации.

Во таа далечна 1941, светот кој го познавале нашите предци се рушел пред нивни очи. Раскарана Европа заврши разурната, сиромашна, поделена. Сите ја платија цената на една идеологија базирана на омраза, непријателство и нетолеранција. Сите страдаа и сите знаеја дека тоа не смее да се повтори. Но, беа потребни неколкумина големи Европејци, нови лидери кои понудија визија за Европа обединета во мир, пријателство и напредок. Сигурно не им било лесно да зборуваат за заедничка иднина, за споделени вредности и планови додека сеуште биле свежи раните од војната, додека сеуште недовербата и омразата тлееле, додека сеуште се броеле жртвите и болеле страдањата. Не им било лесно, но знаеле дека мора така. Дека мора да се научи лекцијата. Дека мора да се сврти старата страница која ништо добро не донела.

Таквата визија ни е неопходна и денес тука во Македонија, и тука на Балканот. Неопходна ни е денес и сега. Таквата визија ја градиме и дома и со нашите соседи.

Одлуката на Владата да го иницира процесот на уставни промени е дел од таа визија. Предлогот кој влезе во собраниска процедура јасно ги демантираше сите лаги, манипулации и заплашувања во изминатиов период.

Остануваме Македонки и Македонци, кои својот македонски јазик ќе успеат да го направат официјален јазик на Европската унија. Нашите граѓани заслужуваат признаен, потврден идентитет и посилна меѓународна позиција. Како што заслужуваат и европска, правна, праведна држава пред која секој граѓанин ќе биде еднаков, држава која ќе создава можности за своите деца и млади.

Токму затоа, сега е моментот сите пратеници да го потврдат патот на Македонија во НАТО и ЕУ. Сега сите членови на Собранието на РМ, сите пратеници, без разлика на која партија ѝ припаѓаат, имаат историска должност и обврска да ги преведат своите зборови во дела и да го обезбедат патот на Македонија кон стабилност, безбедност и економски просперитет.

Почитувани,

Јас ја гледам Европа како еден модел и идеја која ќе функционира овде и ќе им понуди иднина и можности на нашите деца. Европската унија не ја сакаме поради Брисел, туку ја сакаме поради нас самите. Реформите не ги исполнуваме поради Европската комисија туку поради нашите граѓани. Европа значи реформи во сите оние домени кои највеќе значат. Пристапните процеси значат трансформација на нашата држава кон подобро, а не тест за другите.

Нашиот народ е европски народ и заслужува да живее европски. Во нашата химна се овековечени зборовите дека „се бориме за своите правдини“.

Но, на 11 октомври 1941 –та година се боревме за своите правдини и како сојузници со прогресивните сили во светот. Затоа бевме успешни. Денеска Македонија повторно прави избор да се приклучи кон прогресивниот свет бидејќи тоа е нашиот вистински пат кон успехот.

Покажете ми херој и ќе ви напишам трагедија - напишал еден голем уметник.

Овој споменик, овој празник покажуваат многу херои, со многу лични трагедии, но и еден заеднички триумф: создадоа држава.

Таа држава почива на нивните бројни жртви, на крвта на многумина, но и на нивниот заеднички сон: идејата за слободна, прогресивна и праведна Македонија.

Тој заеднички сон го споделува и нашата генерација. Никој нека нема дилема дека овој завет, овој сон ќе го исполниме“.

Претседателот на Владата на Република Македонија, Зоран Заев присуствуваше на заедничката прослава во организација на општините Прилеп и Куманово на големиот државен празник 11 Октомври, Денот на народното востание којашто се одржа во централното градско подрачје во Прилеп. Во рамки на оваа прослава премиерот Заев имаше свое обраќање во кое истакна:

Пред 77 години, нашите сограѓани во Прилеп и Куманово, се одважија и презедоа акции со кои го означија почетокот на востанието на македонскиот народ, и на сите други граѓани во Македонија, против фашистичкиот окупатор.

Со овој голем историски чин започна и впишувањето македонската држава на мапата на народите на светот.

Храбрите, слободољубиви државотворци, тогаш направија избор. Се кренаа на крилјата на идејата, на мислата, на стремежот. Го кренаа гласот -  Македонија да ја направат дом на слободата, победник над фашистичкото зло.

Тоа е избор што ги стави на вистинската страна на историјата. Нашите борци, нашата Република Македонија која се роди во виорот на војната, станаа дел од светскиот победнички сојуз.

Презедоа одговорност.

Избраа да изградат држава - светилиште на слободата, дури и по цена на нивните животи. Слободата ја ставија на пиедесталот на новата држава, како подарок и како завет за сите идни генерации – таа слобода никогаш да не ја изгубат и да не ја доведат во прашање.

Во сите изминати 77 години тоа беше завет за секоја следна генерација. Тој завет не смееме да го прекршиме.

Почитувани сограѓани, борци и соборци, вљубеници во слободата,

Нашата држава се роди во бурни, преломни времиња на светската историска сцена, како резултат на народната ослободителна борба и антифашистичко востание.

Раѓањето на македонската држава е резултат и на личната одлука на секој маж и секоја жена, на сите учесници во Народно ослободителната војна. Секој од нив одделно препозна дека е време за избор. Време да се биде дел од историјата што ќе се памети, што ќе биде инспирација и ќе се слави.

Таа генерација наши претходници ја грабна таа историска шанса за да го остварат вековниот сон – своја држава, држава на македонскиот народ и на сите нејзини граѓани – Република Македонија.

Ние денеска им оддаваме должна почит на тие храбри, државотворни луѓе, кои им дарија држава на идните генерации да ја чуваат, да ја негуваат и да ја развиваат, а на светот, во светската културна ризница, му ги подарија безвременските скапоцености на нашата културна историја и традиција.

Почитувани граѓани на Република Македонија,

Празнувањето на значајните датуми и празници од нашата историја, не треба да бидат само формалност и протокол.

Ако се сведат само на тоа, таквото одбележување би било неправда и навреда за творците на нашата државност. Празниците се добри моменти кога секоја генерација што ги слави и прославува треба да се запраша:

Како да го зачуваме она што го наследивме и како од Македонија да направиме подобра држава, поубаво место за живеење? Како да направиме чекор повеќе во освојувањето на слободата за сите наши граѓани?

Секоја генерација е должна да ги проширува видиците. Секој граѓанин на нашата држава. И да реагира тогаш кога некој го блокира, го оневозможува развојот.

Оваа должност и одговорност најмногу им припаѓа на политичките лидери, на народните избраници.

Нашите претходни генерации, оние што ја извојуваа и што ни ја подарија државноста и слободата да живееме во неа, не ни ја дадоа за да ги делиме луѓето.

Македонија беше создадена како дом на слободата за сите нејзини граѓани. Македонија на сите и за сите.

Должни сме на сите наши деца, на нашите идни генерации да им дадеме доволно причини да си го видат своето, сопствено место во домот - Република Македонија.

Должни сме да преземеме одговорност за Република Македонија да биде дом на слободата на сите нејзини граѓани, како нова ѕвезда во европското соѕвездие.

И затоа и денеска можеме да кажеме дека сме повторно пред историски избор. Оваа генерација треба одлучно и храбро, и да го направи исчекорот за остварување на нашата стратешка цел во оваа фаза од нашата историја: Егзистенција за секого. Европски животен стандард. Осигурани граници. Безбедност. Стабилност. Признаен идентитет. Сето ова преку членството во НАТО, а потоа и членството во Европската Унија.

Празнувањето на големите датуми, оддавањето чест на сите наши претходници вградени во државноста и во слободата на Република Македонија, е само еден дел од нашата должност кон нашето достојно минато.

Но, патриотизмот не завршува тука.

Нашиот патриотизам, идните генерации ќе го почитуваат само ако им дадеме повеќе причини за тоа.

Патриотизам е да ја осигураме иднината на нашата земја и нашите деца. Tука да создадеме можности за нашите синови и ќерки - во Македонија. Тоа e патриотизам.

Патриотски е да се осигураме дека нашата следната генерација има иднина тука, дома!

Само така ќе имаме причина да веруваме дека на нашите идни генерации ќе им дадеме причини да слават, како што нам, причини за славје ни даде генерацијата на партизаните и партизанките од антифашистичката и народноослободителната борба.

Нека ни е честит и вековит 11 Октомври, Денот на народното востание.

Претседателот на Владата на Република Македонија, Зоран Заев придружуван од градоначалниците на општините Прилеп и Куманово, Илија Јовановски и Максим Димтриевски, министерот за транспорт и врски, Горан Сугарески, пратеници во Собранието на Република Македонија заедно со граѓаните на Прилеп на заедничка прослава организирана од градовите Прилеп и Куманово го одбележаа големиот државен празник 11 Октомври, Денот на народното востание.

Во рамки на прославата се одржа виртуелна графичка презентација на востаничката епопеја на градот Прилеп, и импровизиран напад на три локации во градот Прилеп.

„Празнувањето на големите датуми, оддавањето чест на сите наши претходници вградени во државноста и во слободата на Република Македонија, е само еден дел од нашата должност кон нашето достојно минато. Но, патриотизмот не завршува тука. Нашиот патриотизам, идните генерации ќе го почитуваат само ако им дадеме повеќе причини за тоа. Патриотизам е да ја осигураме иднината на нашата земја и нашите деца. Tука да создадеме можности за нашите синови и ќерки - во Македонија. Тоа e патриотизам. И затоа и денеска можеме да кажеме дека сме повторно пред историски избор. Оваа генерација треба одлучно и храбро, и да го направи исчекорот за остварување на нашата стратешка цел во оваа фаза од нашата историја: Егзистенција за секого. Европски животен стандард. Осигурани граници. Безбедност. Стабилност. Признаен идентитет. Сето ова преку членството во НАТО, а потоа и членството во Европската Унија, истакна премиерот Заев во своето обраќање.

Пред присутните граѓани се обратија и градоначалниците на општините Прилеп и Куманово, Илија Јовановски и Максим Димитриевски кои ја пренесоа пораката дека за прв пат се случува ваков тип на заедничко прославување и дека треба да продолжиме и во иднина во европски дух да го славиме овој голем државен празник.

„11-ти Октомври е денот кога нашите храбри борци од Прилеп и Куманово го означија почетокот на НОБ во Македонија. Во Прилеп токму во оваа зграда, Участакот, полициска станица во тоа време во која нашите борци оттука ја испукаа првата пушка. Втората група во Затворот во Прилеп, а третата група ги пресече телефонските жици во тој дел од градот“, потсети градоначалникот на општина Прилеп, Илија Јовановски кој додаде дека треба да продолжиме по стапките на борците од НОБ да ја изградиме Република Македонија како независна и просперитетна држава интегрирана во ЕУ и НАТО.

Градоначалникот на општина Куманово, Максим Димитриевски го честиташе големиот празник 11 Октомври, Денот на Народното Востание за независна Република Македонија и порача дека прилепчани и кумановчани се вградени во современата историја на Република Македонија.

„Благодарејќи на тие генерации денеска живееме на ова парче земја коешто сите ние ја сакаме и веруваме во нејзината иднина. И затоа тие не обврзуваат таму кадешто тие застанаа да продолжиме сите ние заедно. Да го продолжиме процесот на европеизација на Македонија, земја вредна за достоинствен живот на сите граѓани.“ рече градоначалникот Димитриевски.

По завршувањето на официјалниот дел од настанот, премиерот Заев и градоначалниците Јовановски и Димитриевски ја посетија зградата Участакот во којашто пукнала првата пушка која го означила почетокот на Народно ослободителната борба на македонскиот народ и граѓаните на Република Македонија од фашистичката окупација.

Претседателот на Владата на Република Македонија повика одлуката за уставни измени за прифаќање на Договорот од Преспа, со што се обезбедува евро-атлантската иднина на Македонија, да биде донесена заеднички, со поддршка и од власта и од опозицијата. 

Ова премиерот Заев го порача на седницата на Комисијата за уставни прашања во Парламентот, каде тече расправа по Предлогот за пристапување кон измени на Уставот на Република Македонија. 

Во репликата кон пратеник од ВМРО-ДПМНЕ кој побара ВМРО-ДПМНЕ да не се става на другата страна од заложбите за членство на Македонија во ЕУ и НАТО и повика на заедништво, единство и консензус во процесот, премиерот Заев порача:

- Ако и ВМРО-ДПМНЕ е За, ајде да ги донесеме одлуките. Добивме држава признаена од сите. Имаме признаен идентитет, рече премиерот Заев.

Премиерот Заев нагласи дека успешен референдум значи и мнозинство и консензус, и дека во овој случај мора да се земе предвид изразената волја на излезените 600.000 граѓани. 

- Мораме да донесеме одлуки. Шансата е неповторлива. И Мицкоски и Иванов знаат дека за секој телефонски разговор во процесот на постигнувањето на договорот, информирав. Некој мораше да донесе одлука и го направив тоа. Преземете и вие одговорност и да ја обезбедиме државата, повика премиерот Заев, во врска вклученоста на опозицијата во процесот.

Претседателот на Владата, Заев објасни дека компромис е можен само со отстапки од двете страни и дека тоа го направил и нашиот јужен сосед, како и нашата држава.

Премиерот Заев изрази верба за можен успешен процес во Собранието за уставни измени и членство на Македонија во ЕУ и НАТО.

- Верувам блиску сме, единство, заедништво, консензус, но немојте назад. Видовме што се случи. Ни заминаа млади, светот напредува, а ние одиме назад. Што ако ја пропуштиме оваа шанса? Да, решението е заедно, верувам дека исти ни се целите за Македонија во ЕУ и НАТО, порача премиерот Зоран Заев.

На седницата на Комисијата за уставни прашања, премиерот Зоран Заев се заблагодари за зрелоста покажана од албанскиот политички блок и од другите етнички заедници, за изградба на Македонија во едно, напредно општество.  
 

Заменик претседателот на Владата задолжен за економски прашања, д-р Кочо Анѓушев и министерката задолжена за странски инвестиции, Зорица Апостолска, придружувани од градоначалникот на Свети Николе, Сашо Велковски, реализираа работна посета на општината при што ги посетија производствените капацитети на компаниите БИМ и МИК, едни од поголемите индустриски погони кои успешно функционираат во овој крај.

Компанијата БИМ е една од стотината компании кои согласно Законот за финансиска поддршка на инвестициите имаат потпишано договор за државна помош, кој се однесува на реализирана инвестиција во технолошки развој и бизнис планот за развој на компанијата.

„Законот за финансиска поддршка на инвестиции е создаден да го поттикне технолошкиот развој на македонските компании, преку воведување на нови производствени процеси, односно набавка на нови машини и опрема. Лично се уверив во инвестицијата која ја реализирала компанијата БИМ, која е инвестиција во нова технологија со што се зголемува продуктивноста во производството, а продуктивноста ја зголемува конкурентноста, што е пак неопходна на македонската економија за да биде конкурентна на меѓународните пазари и да се зголеми извозот“, подвлече Анѓушев.

Сопственикот на БИМ, го поздрави донесувањето на Законот за финансиска поддршка на инвестициите, каде што домашните и странските инвеститори се изедначени и имаат исти можности за добивање на државна поддршка.

„По донесување на Законот за финансиска поддршка на инвестициите, многу компании почнаа да размислуваат за зголемување на инвестициите. Со новата инвестиција ја подобруваме продуктивноста, ја олеснуваме работата на вработените и ја зголемуваме конкурентноста на компанијата на пазарот“, истакна сопственикот на БИМ Свети Николе, Стојанче Стојанов.

Вицепремиерот Анѓушев, по посетата на компанијата МИК Свети Николе истакна дека времената мерка за ослободување на царинската давачка за увоз на смрзнато свинско месо, воведена од Владата, дава позитивни резултати за развојот на домашната месна индустрија. Тој додаде дека со воведување на оваа мерка во изминатиот период, производството на ниво на месна индустрија бележи зголемување за 30%, додека извозот има раст од дури 60%. 

„Долги  години месната индустрија се соочуваше со проблемот на неконкурентноста на производствени капацитети и на домашниот, но и на странските пазари. Со воведување на мерката за ослободување на дел од царинските давачки за суровини за оваа индустрија, Владата директно придонесе за раст и развој на индустријата. Добар дел од капацитетите беа пред затворање или беа затворени, во вистински момент ја воведовме мерката, а денес во МИК Свети Николе и лично се уверив дека мерката има позитивен импакт во нивното работење“, нагласи вицепремиерот.

Гоце Трајчев, управител на МИК Свети Николе и претседател на Групацијата на месопреработувачите, истакна дека функционирањето на компанијата пред донесувањето на времената мерка било доведено во прашање и нагласи дека мерката е од особена корист и за оваа компанија, но и за други компании од истата индустрија.

„Благодарност до Владата што се зафати со решавање на реалните проблеми на месопреработувачката индустрија, кои се влечат со години. За спроведување на оваа мерка, месопроизводителите преземаа одредени обврски и  тоа придонесе и до поголема застапеност на домашни производи во македонските маркети, зголемување на вработеноста, повисоки плати во индустријата, како и извоз на готови производи“, изјави Трајчев, и дополни дека оваа индустрија ќе побара продолжување на времената мерка во насока на развој на месната индустрија.

 Градоначалникот на Свети Николе, Сашо Велковски оцени дека Владините политики даваат резултати на локално ниво, за развој на компаниите во регионот и додаде дека очекува спроведувањето на политиките да продолжи во иста насока, со цел да се отворат и нови индустриски капацитети, што дополнително ќе влијае на намалување на невработеноста и зголемување на стандардот на македонските граѓани.

Вицепремиерот Анѓушев и министерката Апостолска посетата на Свети Николе ја заокружија со средба со бизнис секторот од општината, на која ги слушнаа предлозите за подобрување на економските политики, како и предизвиците со кои се соочуваат.
 

По повод државниот празник 11-ти Октомври, Денот на Народното востание, предвидени се серија на владини активности. 

Претседателот на Владата на Република Македонија, Зоран Заев денеска (10.10.2018) ќе има свое обраќање во рамки на заедничкото чествување на државниот празник на градовите Прилеп и Куманово, на манифестацијата којашто ќе започне во 19:00 часот пред Участакот во Прилеп. 

Покрај премиерот Заев, свои обраќања ќе имаат и градоначалникот на општина Прилеп, Илија Јовановски и градоначалникот на општина Куманово, Максим Димитриевски.

Во текот на утрешниот ден (11.10.2018), Владина делегација предводена од Заменик претседателот на Владата задолжен за економски прашања и координација со економските ресори, Кочо Анѓушев во 08:30 часот во Прилеп ќе оддаде почит и ќе положи свежо цвеќе на Споменикот на Методија Андонов - Ченто, Споменикот на Кузман Јосифовски Питу и на Могилата на непобедените.

Централната владина прослава ќе се одржи во дворот на Владата на РМ каде Владина делегација предводена од заменик претседателката на Владата на Република Македонија и министерка за одбрана Радмила Шекеринска со почеток во 09:00 часот ќе оддадат почит и ќе положат свежо цвеќе на Споменикот на ослободителите на Скопје во дворот на Владата на Република Македонија во рамки на церемонијалното одбележување на кое ќе се обратат претставници на борците од НОБ и ЗПВРМ, Радмила Шекеринска.    

Претседателот на Владата на Република Македонија, Зоран Заев ќе ја предводи владината делегација којашто во 11:00 часот ќе оддаде почит и ќе положи свежо цвеќе на Спомен Костурницата во Куманово. Во рамки на овој настан Претседателот на Владата на Република Македонија, ќе има свое обраќање.
 

Претседателот на Владата на Република Македонија, Зоран Заев се обрати на седницата на Комисијата за уставни прашања во Собранието на Република Македонија, каде денеска е отворен Предлогот за пристапување кон измени на Уставот на Република Македонија. 

Во обраќањето пред пратениците од власта и опозицијата, претставниците на Комисијата за уставни прашања, гостите на седницата на Комисијата за уставни прашања, премиерот Заев рече:

"Почитуван претседател на Собранието на Република Македонија и претседател на Комисијата за уставни прашања во Собранието, господине Џафери,
Почитувани пратеници и членови на Комисијата за уставни прашања,
Почитувани гости, новинари,
Почитувани граѓани на Република Македонија,

Ми претставува посебна чест што ми e дадена можност пред составот на Комисијата за уставни прашања на Собранието на Република Македонија, накусо да ја образложам и аргументирам иницијативата на Владата на Република Македонија за измени во Уставот на Република Македонија.

Како што ви е познато, Врз основа на член 130 од Уставот на Република Македонија, Владата на Република Македонија, на седницата, одржана на 08.10.2018 година одлучи на Собранието на Република Македонија да му поднесе - ПРЕДЛОГ ЗА ПРИСТАПУВАЊЕ КОН ИЗМЕНА НА УСТАВОТ НА РЕПУБЛИКА МАКЕДОНИЈА СО НАСОКИ ЗА ИЗМЕНУВАЊЕ И ДОПОЛНУВАЊЕ НА УСТАВОТ.

Во оваа насока, согласно Договорот од Преспа, Владата на Република Македонија посочува дека Собранието на Република Македонија, согласно позитивните законски прописи кои ја регулираат постапката за уставни измени, треба да усвои амандмани кои ќе овозможат:

  • Додавање на придавката „Северна“ во името на Република Македонија;
  • Измени во Преамбулата на Уставот на Република Македонија со кои при наведувањето на државно-правните традиции, ќе се именуваат конкретни документи на АСНОМ, односно ќе се внесе повикување на Прогласот од Првото заседание на АСНОМ до македонскиот народ за одржаното заседание на АСНОМ, со неговите конститутивни одлуки.
  • Уставен амандман со кој ќе се декларира почитување на суверенитетот, територијалниот интегритет и политичката независност на соседните држави и со тоа ќе се прецизира поцврста гаранција за трајноста на границите и дека Република Македонија нема територијални претензии. Тоа ќе значи заштита на територијалниот интегритет на Република Македонија и на соседните земји; и
  • Предлог за промена на Членот 49 од Уставот со кој ќе се декларира грижа за културните, економските и социјалните права на припадниците на македонскиот народ и сите наши граѓани во странство, без тоа да значи мешање во суверените права на други држави и во нивните внатрешни работи, во било каква форма и заради било каква причина. 

Почитувани пратеници, членови на Комисијата за уставни прашања во Собранието на Република Македонија,

Во духот на работата на Владата на Република Македонија – максимално транспарентно и одговорно, веднаш после одлуката на владата за оваа иницијатива, предлозите за уставните измени беа достапни за целата јавност во Република Македонија.

Дозволете ми да пренесам дека општиот одзив од увидот и реакциите на јавноста се дека во иницијативата за измени на Уставот на Република Македонија, согласно Договорот од Преспа нема ништо спорно. Стручната, академската јавност, оцени дека предложените насоки се во согласност со меѓународно право, и со меѓународните стандарди за човековите слободи и права и особено со интересите на Република Македонија и нејзините перспективи низ евроатлантските интеграции.

Она што го зборувавме во референдумската кампања сега е пред очите на целата македонска јавност. Таму јасно се гледа дека тие измени заслужуваат поддршка од сите пратеници, во име на интеграцијата на Македонија во НАТО и ЕУ и во име на клучниот интерес на сите граѓани, а тоа е подобар живот тука во Македонија.

Се разбира, оваа иницијатива се покренува на начин кој е во согласност со предвидените законски и институционални рамки за уставни измени. Оттаму Собранието на Република Македонија, како законодавен дом, е институцијата, а пратениците се народните избраници кои ќе ја донесат одлуката слободно, СЛЕДЕЈЌИ ГО ИНТЕРЕСОТ НА ГРАЃАНИТЕ.

Пратениците се тие кои преку поддршката на оваа иницијатива, всушност, ќе покажат дека ја поддржуваат иднината на Македонија. Својата одлука треба да ја донесат согласно волјата на граѓаните и по сопствено убедување, да не подлегнуваат на никаков притисок. 

Почитувани пратеници,

Со решението на спорот меѓу Република Грција и Република Македонија, изградивме пријателство меѓу двете земји и двата народи. Пријателство кое никогаш не било поголемо. 

Во нашите раце е клучот за отворање на европска перспектива за економски развој и подобар живот за граѓаните. Перспектива и место во заедницата на европските народи за најдобра заштита на достоинството, идентитетот и иднината на сите граѓани на Република Македонија.

Решаваме две-и-пол-децениски спор за да ја извлечеме нашата земја од стегите на изолацијата. 

Решаваме 25-годишен спор којшто земјата ја влечеше надолу. Кога сите мислеа дека нема излез, ние се одваживме и ТРГНАВМЕ НАПРЕД.

Вашата одлука, почитувани пратеници, ќе ја испрати во историјата времената референца  - ФИРОМ. 

Придобивката е бесценета - зајакнат идентитет и гаранција за безбедност, стабилност, гарантиран економски развој и просперитетна иднина на нашите граѓани.

Македонскиот идентитет е заштитен за век и векови. Договорот предвидува потврда на македонскиот јазик во Обединетите Нации, Macedonian, без фусноти, признаен о прифатен и од нашиот јужен сосед Грција. 

Нашиот влог во компромисот е дефинирање на прецизирано, македонско име за нашата држава. Име кое е достоинствено и географски прецизно - Република Северна Македонија.

 

Почитувани пратеници,

Првите чекори се веќе направени.

После ратификацијата на договорот во Собранието на Република Македонија, Република Грција испрати писмо до претседателот на Европскиот совет, со кое го извести дека веќе нема пречки и дека препорачуваат да добиеме датум за почеток на преговорите за членство во ЕУ.

И датумот го добивме, во јуни 2019 година очекуваме да ги отвориме првите поглавја, а скрининг процесот и работата на заедничките тела на Европската Комисија и на Владата на Република Македонија, веќе започнаа со заедничка работа.

На Самитот на НАТО на 12 јули во Брисел, Македонија ја доби поканата за полноправно членство, како 30-та членка на Алијансата. Во јануари не очекува столчето во Советот на НАТО, веднаш откако ќе го потпишеме Пристапниот Протокол.

За да го потпишеме, ни треба спроведување на иницијативата за уставни измени во Собранието. Со тоа ќе ја оствариме една од највисоките стратешки цели на Македонија од независноста до денес - членство во насилниот сојуз на светот, НАТО, што неминовно води и кон наше членство во ЕУ.

Ќе застанеме рамо-до-рамо со нашите западни партнери. 

Стабилна Македонија, членка на НАТО значи гаранција за безбедноста и стабилноста на земјата. Безбедноста гарантирана со членство во НАТО е гаранција за инвестиции и економски развој.

Членството на Македонија во ЕУ гарантира силни институции, правна држава, зголемена мобилност и еднакви шанси за нашите млади. Младите од Македонија ќе бидат еднакви со своите врсници од ЕУ, нема да има потреба да вадат пасоши од други држави.

 

Почитувани пратеници,

Не е лесно ова прашање, но на овие прашања се препознава лидерството. 

Интеграцијата на Македонија во НАТО и ЕУ не може да биде попречена од каква била закана или обид за заплашување или за поткуп или што било друго. Сега е време сите што се за НАТО и ЕУ да ги поддржат измените и заедно да ја однесеме Македонија напред.

Сега е време да ја потврдиме заедно одлуката од 1993 година според која членството во ЕУ и НАТО се наши заеднички и врвни стратешки приоритети. Сега е време да се ефектуира декларацијата за членство во НАТО, што овој собраниски состав ја донесе во јули оваа година. Пред само три месеци Собранието на РМ, вие пратениците, покажавте дека членството во НАТО е врвен натпартиски интерес и дека за тоа прашање постои највисок граѓански, меѓуетнички и политички консензус.

Сега сите пратеници, без разлика на која партија ѝ припаѓаат, имаат историска должност и обврска пред граѓаните, да го обезбедат патот на Македонија кон стабилност, безбедност и економски просперитет, а тоа е патот кон НАТО и ЕУ кој води преку македонско-грчкиот договор.

Од пратениците во Собранието на Република Македонија се очекува одлука во таа насока и како израз на почитување на волјата на граѓаните коишто гласаа на референдумот, како и на волјата на околу 80% од граѓаните кои континуирано се изјаснуваат дека го одобруваат членството на нашата земја во ЕУ и НАТО.

Почитувани пратеници,

Изминаа 25 години во калкулации и празни зборови. 

Македонија нема веќе генерации за губење.

Да покажеме дека сме подготвени да ги преземеме лидерството и одговорноста. Повикувам на вашата одважност и на должноста на да се следи интересот на граѓаните и да се прифати историската можност. 

Повикувам на обединување околу врвните државни и национални приоритети. Да дадеме максимална поддршка за прогрес на нашата земја и да донесеме силна одлука.

Бидете оние што ќе ја поведат Македонија напред, кон светот и кон подобар живот за сите граѓани. 

Тоа е нашата одговорност, за тоа им служиме на граѓаните", рече премиерот Заев во обраќањето пред пратениците и присутните на седницата на Комисијата за уставни прашања, каде тече расправа по Предлогот за пристапување кон измени на Уставот на Република Македонија.
 

Со пригодна церемонија министерот за економија Крешник Бектеши ги потпиша договорите со општините Чаир, Центар, Битола и Охрид за имплементација на проектот „Ревитализација на излозите на старата чаршија“. 

„Целта на проектот за уредување на излозите во старите чаршии низ државата е враќање на автентичниот изглед на чаршиите, а воедно и нејзино разубавување и привлекување на што поголем број на посетители и туристи. Ние во рамки на Програмата за развој на туризмот за 2018 предвидовме, после скопската, да ја прошириме оваа активност и на останатите чаршии, и тоа во соработка со општините на чија територија се наоѓаат тие. За реализација на овој проект годинава обезбедивме буџет од 16,5 милиони денари, а преку јавен повик беа поканети општините Чаир, Центар, Битола, Охрид и Струга да аплицираат, притоа запазувајќи ги условите од самата техничка документација и предмер-пресметките, кои ги дистрибуиравме до нив. На повикот пристигнаа вкупно 182 апликации, а од услови согласно повикот исполнија 160 дуќани, од кои 115 од скопската, 38 од битолската и 7 од охридската чаршија. За жал, од струшката чаршија не добивме апликации“, рече министерот Бектеши, додавајќи дека општините ќе имаат рок од 1 година за имплементација на споменатите активности, а дуќанџиите немаат никаква обврска да партиципираат нивни средства, односно сите средства се обезбедени од страна на Министерството за економија, како и дозволите од надлежните институции одговорни за чаршиите, како што се Министерство за култура и конзерваторските центри.

Министерството за економија го започна овој проект во 2015 година, како пилот проект најпрво во Старата скопска чаршија, во која беа уредени 11 излози во блок 3.2 од Старата скопска чаршија. Имајќи го предвид големиот интерес, а и резултатите од проектот, во 2016 година проектот беше продолжен со уредување на комплетниот блок 3.2., односно пластичните и алуминските излози беа заменети со дрвени, притоа да не изгубат на автентичноста; натписите на дуќаните беа уредени унифицирано - на дрвена платформа; беа поставени слични тенди со различна боја, за да се издвојуваат дуќаните еден од друг, а во некои дуќани беа предвидени и дрвени кепенци, повторно во контекст на автентичноста на нивниот првичен изглед. 

„Со сите овие активности успеавме да го вратиме сјајот на овој дел од Скопската чаршија, а сега целта ни е тоа да го направиме и со споменативе општини. Лично сметам дека ваквите проекти се доста корисни, имајќи ги предвид анализите според кои после туристичките центри, старите чаршии се меѓу најпосетените места од страна на туристите, како за прошетка, така и за купување сувенири, дегустација на нашите традиционални јадења и запознавање со старите занаети или набавка на занаетчиски производи“, потенцираше Бектеши.

Градоначалникот на општина Чаир, Висар Ганиу ги пренесе искуствата од досегашната реализација на проектот во Старата скопска чаршија.

„Изразуваме благодарност за посветеноста на министерот Бектеши и неговиот тим, кои придонесуваат за зачувување на нашето културно богатство, посакувајќи ваквите соработки да продолжат во иднина. Со конкретниот проект објект на третирање се излозите на 97 дуќани во Старата скопска чаршија, чија вредност изнесува 11 милиони денари, кои се доделуваат од страна на Министерството за економија на Општина Чаир, како реализатор на проектот. Овој проект е одговор на потребата за постојана поддршка на занаетчиите со цел развој на нивната дејност, а со него ќе се создадат поповолни услови за економски развој на Општина Чаир и за развој на туризмот во Скопје“, изјави Ганиу.

Согласно анализите на Министерството за економија предвидено е за секој дуќан да се издвојат по 100.000 денари, а општините имаат обврска да ја спроведат реализацијата на проектите и тоа Чаир за 97 дуќани, општина Центар за 18, општина Битола за 38 и општина Охрид за 7 дуќани.