Претседателот на Владата на Република Македонија, Зоран Заев, денеска, во клубот на пратениците во Скопје, заедно со Заменик претседателот на Владата на Република Македонија, Бујар Османи, претседателот на ДУИ, Али Ахмети, пратеничката на ВМРО-ДПМЕ, Дафина Јовановска-Стојановска, Евелин Фаркаш, член на атлантскиот совет и генерал Сер Барни Вајт-Спунер, поранешен командант британските сили и на НАТО силите во Република Македонија, имаше обраќање по повод одбележувањето на 17 годишнината од потпишувањето на Охридскиот рамковен договор.

Премиерот Зоран Заев во своето обраќање пред присутните, се осврна на историското значење на Рамковниот договор и изрази почит кон граѓаните и политичарите кои пред 17 години собрале сили и по долгите исцрпувачки преговори успеале да постигнат договор и да стават крај на конфликтот во 2001 година.

 „Со Охридскиот договор се заштитија суверенитетот и територијалниот интегритет на Македонија. Договорот гарантира целосно почитување на принципот на недискриминација и рамноправен, правичен третман на сите лица пред законот. 

Но сметам дека најголемата придобивка од Охридскиот договор се темелите на соживот кои ги постави истиот. Договорот воспостави доверба помеѓу различните етнички заедници во Македонија“, рече премиерот Заев во своето обраќање.

Премиерот Заев се осврна и на Договорот за пријателство и  добрососедство кој пред една година беше потпишан со Бугарија, но и историскиот договор за решавање на спорот со Грција со кој повтори дека е загарантиран македонскиот идентитет, што е прифатен и признат од сите.

„Договорот е одраз на новиот дух на водење политики, политики коишто градат мостови, а не ги рушат, политики коишто ги сплотуваат граѓаните и не ги делат. Зарем не ни е на сите доста од поделби? Со години нѐ убедуваа дека Република Грција е најголемиот непријател на Република Македонија. Им покажавме дека грешат. 

Пред речиси 2 месеци го решивме и најгорливото прашање коешто Македонија и сите нејзини граѓани ги мачеше повеќе од 25 години.

И како што Охридскиот рамковен договор е историски, сега 17 години подоцна создадовме уште еден историски документ, пред нас е уште една историска можност. 

Едно поглавје затвораме, отвораме ново, Македонија интегрирана во НАТО и ЕУ!“, рече премиерот Заев

„Силно верувам дека договорот со Грција е договор за нашата заедничка иднина. Со него ја отстранивме последната пречка на патот на нашата мултиетничка земја за влез во НАТО и за почеток на преговори за ЕУ“ додаде премиерот Заев.

Вицепремиерот Османи, кој ја имаше улогата на модератор на јубилејот, во своето обраќање рече дека овие настани имаат пресудно влијание во создавањето на контекстот во кој се одвиваат процесите во Република Македонија, со изразен позитивен европски имиџ во целиот регион.

„Оттаму, оваа година решивме одбележувањето на овој јубилеј да го организираме тематски, преку овој панел, преку кој ќе се обидеме да создадеме врска меѓу Охрид, како симбол на внатрешната интеграција, и Брисел, кој ја симболизира нашата надворешна интеграција, т.е. нашата аспирација за полноправно членство во НАТО И Европската Унија“, рече Османи. 

Лидерот на ДУИ, Али Ахмети, во својот говор ја нагласи потребата од голема свесност кај граѓаните дека успешниот референдум е всушност нивни успех. 

Тој уште додаде и оти решавањето на спорот со Грција и претстојниот референдум е точка која треба да не обединува во настојувањето на земјата да стане членка во ЕУ и НАТО.

Лидерот на ДУИ апелираше до сите да се вложат максимално за успешноста на овој процес.

Пратеничката од ВМРО-ДПМНЕ, Дафина Јовановска Стојановска истакна дека Охридскиот рамковен договор одиграл важна улога за спречување на крвопролевањата во минатото, и дека со него за секогаш се отстранети национализмот и шовинистичките тенденции кај политичките елити.

Евелин Фаркаш како член на Атлантскиот совет на панел-дискусијата по повод Рамковниот договор истакна дека доколку пропадне референдумот во Македонија, тоа ќе биде на штета на демократијата и владеењето на правото.

Поранешниот командант на НАТО, Сер Барни Вајт-Спунер, заблагодарувајќи се за поканата, се осврна на тешкиот период за Република Македонија и Балканот од периодот на Рамковниот договор, кој како што рече тој, бил позитивно изненадување за многу поединци и влади, кои стравувале од раширување на конфликтот. 

„Тоа беше сведоштво за одлучноста на луѓето тука“, рече тој, потенцирајќи дека посебно внимание треба да му се посвети на претседателот Трајковски кој, како што рече тој, стоеше зад потпишувањето на договорот.

Генералот Вајт-Спунер, рече во своето обраќање, дека стабилна и интегрирана Македонија е од витално значење за регионот и за Европа и даде силна поддршка на процесите коишто водат до целосна интеграција во НАТО и ЕУ.

 


Обраќање на премиерот Зоран Заев на тематскиот панел „Патот до Брисел преку Охрид“. 

 

„На почетокот сакам да оддадам почит на политичарите кои пред 17 години смогнаа сили и по исцрпувачките преговори успеаја да постигнат договор. Некои од нив за жал повеќе не се меѓу нас.  

Охридскиот рамковен договор претставува значаен документ за Македонија по многу нешта. Тој стави крај на конфликтот во 2001-вата година и до ден денес тој гарантира дека насилството нема да биде механизам за остварување на какви било политички цели и интереси. 

Со Охридскиот договор се заштитија суверенитетот и територијалниот интегритет на Македонија. Договорот гарантира целосно почитување на принципот на недискриминација и рамноправен, правичен третман на сите лица пред законот. 

Но, сметам дека најголемата придобивка од Охридскиот договор се темелите на соживот кои ги постави истиот. Договорот воспостави доверба помеѓу различните етнички заедници во Македонија. 

Имавме моменти кога соживотот и меѓуетничката толеранција беа ставени на тест. Во тие моменти на искушение, покажавме дека заедно сме посилни, дека сакаме да живееме сложно и обединетo да напредуваме сите заедно. 

Денес ја градиме Македонија како едно општество, како едно семејство за сите. Тоа е промена за трајна придобивка којашто од Македонија ќе направи земја со која сите ќе се гордееме. Тоа е нашата стратешка цел. 

Почитувани,  

Само за една година од изолирана земја, искарана внатре, но и надвор, со своите соседи, создадовме пријателска Македонија. 
Создадовме наша земја, Република Македонија, која подеднакво ја сакаме сите, од сите етнички заедници, но и заедно работиме сите за заедничката благосостојба на нашата Македонија.  

Ги возобновивме и ги унапредивме и меѓусоседските односи. 

Веќе помина една година откако го потпишавме договорот за пријателство, добрососедство и соработка меѓу Република Македонија и Република Бугарија. 

Со договорот го зацврстивме нашето пријателството и добрососедството со Бугарија, но и ги заштитивме националните интереси на двете страни. Заедно ја поттикнуваме и ја олеснуваме заедничката, европска иднина на младите од двете држави, како и меѓусебната економска соработка. Резултат на тоа е економски развој на државите и секако поголема благосостојба на граѓаните. 

Договорот е одраз на новиот дух на водење политики, политики коишто градат мостови, а не ги рушат, политики коишто ги сплотуваат граѓаните и не ги делат. 

Зарем не ни е на сите доста од поделби? 

Со години нѐ убедуваа дека Република Грција е најголемиот непријател на Република Македонија. Им покажавме на сите дека грешат. 

Пред речиси 2 месеци го решивме и најгорливото прашање коешто Македонија и сите нејзини граѓани ги мачеше повеќе од 25 години.  

И како што Охридскиот рамковен договор е историски, сега 17 години подоцна создадовме уште еден историски документ, пред нас е уште една историска можност. 
Едно поглавје затвораме, отвораме ново, Македонија интегрирана во НАТО и во ЕУ!

Договорот со Република Грција е ВО ИНТЕРЕС на таква, светла иднина на Република Македонија и на сите граѓани на оваа земја. Впрочем за што се залагаше и Рамковниот договор.   

Договорот ни го гарантира правото да се определуваме како МАКЕДОНЦИ. Македонскиот идентитет, според членот 7 од договорот, ги отсликува нашата територија, нашиот јазик и нашиот народ со своја историја, своја култура и со свое наследство. 

Нашето државјанство е и ќе остане македонско. Официјалниот јазик на нашата држава е и ќе остане „македонски јазик“ и ќе се преведува „Macedonian language“
Стиховите на нашата химна, грбот и знамето остануваат исти засекогаш. 

Овде да напоменам дека идентитетот на помалку бројните етничките заедници никогаш другите соседи не го спореле. Туку само македонскиот идентитет беше спорен, односно беше негиран од страна на одредени наши соседи. Сега веќе и македонскиот идентитет е признаен и прифатен од сите. 

Почитувани, 

Силно веруваме дека договорот со Грција е договор за нашата заедничка иднина. Со него ја отстранивме последната пречка на патот на нашата мултиетничка земја за влез во НАТО и за почеток на преговори со ЕУ. 

Тоа е децениски стремеж на многу генерации кој не обединува. Македонци, Албанци, Срби, Бошњаци, Турци, Роми, Власи... сите граѓани на нашата заедничка земја.

Земјите членки на ЕУ и сојузниците во НАТО ја препознаа нашата одважност и нашата посветеност на заедничките демократски вредности, на напредокот. Добивме датум за почеток на преговори со ЕУ и покана за членство во НАТО.

Стануваме член на семејствата на НАТО и на ЕУ, а таму ни се гарантираат сигурност, стабилност, безбедност и економски развој.
И како што пред 17 години храброста на граѓаните, но и на нашите политичари ја извлекоа Македонија од криза, сега нам ни се дава можност да бидеме храбри и конечно да донесеме вистинска одлука за да ја обезбедиме нашата иднина, иднината на нашите деца еднаш - засекогаш.

Знам дека на 30 септември, обединети ќе зачекориме со дигната глава и ќе бидеме творци на светлата иднина на Македонија. Ќе создадеме подобро утре за нас и за нашите поколенија. 

Сигурен сум и цврсто верувам дека ќе избереме Европска Македонија. 

Поговорката „Договор куќа гради“, се потврди со Рамковниот договор. Ја обезбедивме, ја осигуравме, нашата, домашна заедничка куќа - Македонија. 

Договорот со Грција и со Бугарија ја обезбедува, ја овозможува Европската и Евроатлантската наша, заедничка куќа“.
 

Меѓународниот ден на младите најдобро се одбележува преку постојан ангажман и посветеност на младинските прашања во текот на сите 365 денови во годината.

Младите се изборија да седнат на владина маса за да ги кројат политиките кои се за нив најважни, а институциите дадоа поддршка и ги отворија ширум вратите за да продре младинскиот глас за младинската иднина и за иднината на Македонија. Денес младите се моќни, а не запоставени. 

Ние возрасните треба да внимаваме и да се спротивставуваме со сите сили на говорот на омраза и да дејствуваме контра политиките на поделби и конфликти кои им ја рушат иднината на младите. Тоа ни кажува за важноста на добриот збор, како и за нашата обврска да овозможиме безбеден простор и безбедна држава за младите да се развиваат и да ја градат иднината тука, во нашата земја. 

Од деинституционализацијата и обезбедувањето безбедни домови за најранливите, до обезбедувањето на стабилноста преку членство во НАТО - сето ова е влог кон создавањето безбеден простор за младите. На тоа сме посветени и секојдневно работиме. 

Гласот на младите е гласот на иднината. Тоа го знаеме сите. Гласот на младите треба и мора да биде одлучувачки за иднината на младите. Свесни сме за најголемата болка на нашето општество - одливот на младите. Затоа активно работиме да ја донесеме Европа дома, да обезбедиме стабилност преку НАТО, за да ја гледаат младите иднината тука и да се изградат себеси тука. Од таму е најважно, младите да не дозволат одлуките за нивната иднина да ги носат само возрасните, оти помина времето во кое старите знаеја што е најдобро за младите. Денес младите знаат што е најдобро за нив самите, а јас го слушам нивниот глас и знам дека за нив најважна е иднината, својата и таа на државата.

Честит ден на млади - мои млади! Да сте гласни критичари, будна авангарда и први предводници на убавата македонска иднина! 

 

 

Над 4.380 хектари државно земјоделско земјиште ќе бидат доделени на земјоделците преку четири активни јавни огласи за давање на државно земјоделско земјиште под закуп. Овој месец и на почетокот на следниот месец завршуваат роковите за поднесување на понуди за овие 4 јавни огласи. 

Следниот петок завршува рокот за поднесување понуди за јавниот оглас за давање на државно земјодлско земјиште под закуп за површини до 3 хектари. Овој оглас е наменет за одгледување на земјоделски култури за производство на сточна храна односно за житни, фуражни и индустриски култури за период до 15 години. Предмет на огласот се поврпини во Берово, Валандово, Велес, Гостивар, Гевгелија, Дебар, Делчево, Кавадарци, Куманово, Кратово, Пробиштип, Свети Николе, Струмица, Штип. Вкупната понудена површина е на 996 хектари. 

За истата намена во тек оглас за закуп на земјоделско земјиште за површини над 3 хектари по пат на електронско јавно наддавање. Со овој оглас е опфатени површини во Берово, Велес, Гостивар, Дебар, Куманово, Кавадарци, Неготино, Свети Николе, Струмица, Штип, Крива Паланка. Ќе бидат доделни над 517 хектари. Рокот за доставување понуди е до 21-ви овој месец.

Околу 1.780 хектари е предвидено да се распределат со огласот за давање во закуп на земјоделско земјиште во државна сопственост за површини до 3 хектари, кој што е отворен за доставување понуди до 24-ти овој месец. Овој јавен оглас е со намена за:

• подигање на долгогодишни насади (лозја, овоштарници, хмељ) и оранжерии за период до 30 години,

• подигање на долгогодишни насади со лешник за период до 70 години,

• подигање на маслинарници за период до 50 години,

• одгледување на други земјоделски култури за период до 15 години,

• ливади за период до 15 години,

• за одгледување на брзо растечки дрвја на земјоделско земјиште кое се наоѓа на надморска висина над 700 метри, за периодот до 30 години,

• рибници до 20 години и

• спортско-рекреативни активности и рурален туризам до 30 години

 

Површините кои се предмет на огласот се наоѓаат во Свети Николе, Карпош, Кисела Вода, Чаир, Гази Баба. 

За истата намена во тек е јавен оглас за давање во закуп на земјоделско земјиште во државна сопственост за површини над 3 хектари по пат на електронско јавно наддавање. Понудите за овој оглас треба да се достават до 11-ти септември. Со овој оглас се доделуваат над 1.090 хектари во Гази Баба, Делчево,  Карпош, Кисела Вода, Кочани, Охрид, Прилеп, Струга и Струмица.

Она што е важно за сите заинтресирани, да внимаваат критериумите и комплетноста на документацијата, и да ги запазат роковите за да може на време да се склучат договорите.

Во контекст на мерките што МЗШВ ги презема, за секоја педа обработливо земјиште да биде во рацете на вистинските земјоделци, во тек е постапка на изготвување на Предлог на Закон за изменување и дополнување на Законот за земјоделското земјиште. Со Предлог законот ќе подобрат веќе постоечките законски решенија, но и ќе се воведат нови решенија кои ќе бидат во функција на рационално користење на земјоделското земјиште, негова заштита и правна сигурност на сопствениците и корисниците на земјоделското земјиште. Паралелно се работи и на спороведување на проектот кои заеднички го спроведуваме со ФАО за консолидација на земјоделското земјиште, затоа што со окрупнувањето на парцелите, ќе создадеме поевтино и поконкурентно производство. Зголемувањето на обработливите земјоделски површини преку неселективна распределба на државното земјодрелско земјиште под закуп, е една од стратешките цели на Министрстсвото за земјоделство,шумарство и воводостопанство. Крајната цел е вистинска и неселективна распределба на државното земјоделското земјиште, што ќе значи зголемени обработливи површини и зголемено производство на квалитетни, конкурентни и безбедни земјоделски производи.

 

Владата на Република Македонија ги следи и анализира наодите на сите релевантни меѓународни тела и врз основа на тие наоди презема соодветни чекори. Во однос на препораките од ГРЕКО, Владата е целосно посветена на нивно спроведување, што е видливо преку спроведување на три препораки кои се однесуваат на Владата во период од само една година, за разлика од однесувањето на претходната власт  која е причинител на коруптивните состојби и која за период од цели четири години (2013-2016) спровела  само три препораки на ниво на сите институции во државата.

Како заложба во борбата против корупцијата, Владата на РМ спроведува концепт на отвореност, отчетност и транспарентност, вложувајќи ги сите напори за целосно спроведување на препораките на меѓународните институции, а кои се однесуваат на корупцијата која во општеството ја распространи претходната власт. Наследната состојба во 2016, токму според извештајот на ГРЕКО наведува дека од вкупно 19 дадени препораки, Република Македонија задоволително имплементирала само три препораки, 10 останале делумно имплементирани, а шест неимплементирани. Со овој извештај, ГРЕКО даде рок до 31 јануари 2018 година да се исполнат преостанатите препораки, а Владата тоа ќе го почитува и ќе го спроведе во целост. 

Во врска со последниот Извештај на ГРЕКО (групата на држави против корупцијата, тело на Советот на Европа), во Стразбур, за усогласеност за Република Македонија - Четврт круг, усвоен на пленарната седница која се одржа годинава, (2018) во периодот од 18 до 22 јуни, констатирано е дека од 19-те првично дадени препораки, во целост имплементирани се шест препораки, делумно имплементирано осум препораки, а пет не биле имплементирани.

Во делот на препораките кои се однесуваат на Владата на Република Македонија, за една година, имплементирани се три нови препораки, пред сè со направените измени во Законот за Судскиот совет и Законот за судовите. Подготвен е Акциски план за реализација на преостанатите препораки на ГРЕКО од четвртиот круг на евалуација на Република Македонија коишто се однесуваат на сите наведени институции. Од преостанатите 13 препораки кои треба да се имплементираат, само две се за Министерството за правда.

Еден дел од преостанатите препораки ќе се имплементираат со усвојувањето на новиот Закон за спречување на корупцијата, чија подготовка е во тек, а текстот ќе биде доставен од работната група до Министерство за правда, до крајот на август 2018 година. Со новиот Закон за јавното обвинителство, ќе се исполни уште една препорака што се однесува на дисциплинскиот режим на обвинителите. Текстот за Законот за обвинителство се подготвува од страна на експертска работна група и треба да биде готов до декември 2018.

Останатите препораки треба да бидат реализирани од Собранието на РМ како и од независните тела за борба против корупција.

Враќањето на правото и правната држава и неселективната борба против криминалот и корупцијата е императив за оваа Влада.

Почитувани сонародници во дијаспората,

Собранието на Република Македонија, на 30 јули 2018 година, врз основа на постигнатиот Договор меѓу Република Македонија и Република Грција, донесе Одлука за распишување референдум кој ќе се одржи на 30 септември 2018 година, на кој граѓаните ќе одговорат на прашањето „Дали сте за членство во ЕУ и НАТО со прифаќање на Договорот помеѓу Република Македонија и Република Грција?“. 

Граѓаните на Република Македонија кои живеат и работат во дијаспората ќе можат да го остварат своето гласачко право во сите дипломатско-конзуларни претставништа на Република Македонија во светот. Увидот може да се изврши и преку интернет страницата на Државната изборна комисија izbirackispisok.gov.mk/dijaspora

За таа цел,  ве повикувам сите,  од 9 август до 23 август 2018 година да се пријавите за остварување на вашето гласачко право на веб страницата на Државната изборна комисија dijaspora.sec.mk

Ова е време за одлука, а твојот глас одлучува за иднината на нашата земја! 

Имаме граѓанска одговорност да донесеме правилна одлука, да излеземе и со нашиот глас да придонесеме кон заедничка, подобра иднина. Сплотени, со здружени сили, заедно можеме да ја обезбедиме иднината на нашите деца. Одлуката зависи исклучиво од нас самите, наша е одговорноста.

Вие одлучувате, дали Република Македонија ќе биде членка на Европската Унија (ЕУ) и НАТО, со прифаќање на договорот со Република Грција. 

Владина делегација предводена од Националниот координатор во Владата на Република Македонија за здруженијата на бранители, Стојанче Ангелов и надворешниот соработник за одбрана, Драган Василевски, со положување свежо цвеќе пред спомен-плочата во месноста Карпалак и во комплексот „Карпалак“ во Прилеп оддаде почит и учествуваше на одбележувањето на 17 години од загинувањето на припадниците на резервниот состав на АРМ во 2001 година.

Кај месноста Карпалак и пред комплексот во центарот на Прилеп венци свежо цвеќе положи заедничка делегација од Министерството за одбрана и Армијата на Република Македонија предводена од државниот секретар, Драган Николиќ и директорот на ГШ на АРМ, генерал-мајор Зоран Милески.

 

ФАКТИ ЗА ДОГОВОРОТ

Целиот текст на конечната спогодба на македонски: vlada.mk/mkgrdogovor

[ Преземи ]

 

1. ДОГОВОР ЗА МАКЕДОНСКАТА ИДНИНА
Македонско-грчкиот договор е историски најдобра и фер шанса за граѓаните на Македонија. Договорот е влог во македонската иднина, со кој го расчистуваме патот на нашата земја за влез во НАТО и за почеток на преговори за ЕУ.
Стануваме член на семејствата на НАТО и ЕУ нациите кои уживаат силен економски развој.
Со Договорот носиме подобар живот за сите граѓани и го чуваме богатото историско и културно наследство кое ја има направено нашата македонска нација славна.
 
2. МАКЕДОНСКИОТ ИДЕНТИТЕТ Е ЗАШТИТЕН
Договорот гo гарантира правото да се определуваме како МАКЕДОНЦИ. Нема повеќе оспорувања.
Според членот 7 од Договорот, македонскиот идентитет ги отсликува нашата територија, јазик, народ, со сите атрибути, со своја историја, култура и наследство.
 
3. МАКЕДОНСКИОТ ЈАЗИК Е ЗАШТИТЕН
Според членот 1 (3) од Договорот, официјален јазик на нашата држава е „македонски јазик“ кој е преведлив на сите јазици (на пример, на англиски јазик „Macedonian language“). Без никаква фуснота со дообјаснување. Македонскиот јазик е потврден - идентитетот е зачуван.
 
4. ДРЖАВЈАНСТВОТО Е МАКЕДОНСКО, СЕГА И ВО ИДНИНА
Според членот 1 (3) од Договорот, нашето државјанство ќе биде: македонско / граѓани на Северна Македонија.
 
5. ХИМНАТА, ГРБОТ И ЗНАМЕТО НЕ СЕ МЕНУВААТ
Државните симболи не беа дел од преговарачкиот процес.
 
6. МК - МКД ОСТАНУВААТ МЕЃУНАРОДНО ПРИФАТЕНИ И ПРЕПОЗНАТЛИВИ КОДОВИ
Kодот на земјата останува да биде МК и МКД, како што е официјално определено од Меѓународната организација на стандардизација (ИСО). 
 
7. ДОБИВМЕ ПОКАНА ЗА ЧЛЕНСТВО ВО НАТО. НИЕ ЌЕ БИДЕМЕ 30-ТА ЧЛЕНКА НА СОЈУЗОТ
Поканата беше заглавена од 2008. Со Договорот ја отстранивме последната пречка за нашето членство во НАТО. Ни се гарантираат сигурноста, безбедноста и економскиот развој.

8. ЌЕ ЗАПОЧНЕМЕ ПРЕГОВОРИ ЗА ЧЛЕНСТВО ВО ЕУ, ПОДГОТОВКИТЕ СЕ ВО ТЕК
Имаме кандидатски статус од 2005 и од 2009 добиваме препораки од Европската комисија. За прв пат добиваме датум за почеток на преговорите за членство, како резултат на Договорот со Грција.

9. ДОГОВОРОТ ГАРАНТИРА МАКЕДОНСКО-ГРЧКО ПРИЈАТЕЛСТВО И СОРАБОТКА
Ја зголемува културната соработка помеѓу Македонија и Грција во делот на уметностите, танцот, киното, музиката, театрите и спортот. Го олеснува патувањето преку модернизирање и изградба на нови гранични премини. Ја зголемува соработката помеѓу двете држави во борбата против организираниот и прекуграничниот криминал, како и тероризмот и економскиот криминал.
 
10. НЕМА ВЕЌЕ ФИРОМ (ПЈРМ)
Со исполнувањето на Договорот ќе престане да важи референцата ФИРОМ (ПЈРМ) и нашата земја ќе биде заведена во Обединетите Нации под името Република Северна Македонија, преведено на сите јазици.

 


Целиот текст на конечната спогодба на македонски: vlada.mk/mkgrdogovor

 [ Преземи ]


Уште 11 дена  трае Јавниот повик за доставување на понуди за интерес за купување на земјоделско земјише во државна сопственост под оранжерии и помошни објекти во функција на оранжеријата, како и стопанскиот двор во функција на оранжеријата.

Со овој јавен повик сопствениците на оранжерии ќе имаат можност да го купат земјиштето на кое што се наоѓа оранжеријата, а кое што во моментов е во државна сопстевонст. Со повикот се овозможува купување и стекнување на сопственост врз земјиштето, а со самото тоа и вложување во инвестиции, кредитирање, користење на ИПАРД програмата. Со оглед на тоа дека оранжериското производство е извозно ориентирана гранка, инвестирањето во модернизирање и зголемување на производството, е клучно за конкурентноста на оваа гранка.

Затоа до крајниот рок, кој истекува на 18 август, а тоа е следната сабота, Министерството за земјоделство,шумарство и водостопанство ги потсетува сите сопственици на оранжерии кои се заинтересирани да го откупат земјиштетте, да го запазат рокот и да достават комплетна документација. Потенцираме, дека особено во документацијата е важно,  проценките за вредноста на земјиштето да бидат напревени од Бирото за судски вештачења

Ова е важно за Комисијата да постапи навреме и да има што поголем број на прифатени понуди. Цената на земјиштето се утврдува според Методологијата за процена на пазарната вредност на земјоделско земјиште во државна сопствеост под оранжерии и објекти кои се во функција на земјоделското производство, која што беше донесена  крајот на јануари оваа година.

На јавниот повик може да аплицираат сите што имаат легализиран објект во функција на земјоделско производство. Ова е прв ваков јавен повик, до крајот на годината планирано е да се објават уште два јавни повици. На овој прв јавен повик, според проценката на МЗШВ се очекува да се достават околу 40 тина понуди, а договорите би се склучиле на почетокот на следниот месец.

Ова е првиот чекор за продажба на државно земјоделско земјиште, а во следниот период политиката на МЗШВ ќе биде насочена кон спроведување на постапки за продажба на државно земјоделско земјиште под долгогодишни култури, особено на лозовите насади.

Министерството за труд и социјална политика и Агенцијата за вработување, во партнерство со УНИЦЕФ и УНДП, денес започнаа со интензивни обуки за интегрирано управување со случаеви. Ова е една од клучните алки во реформата на социјалната заштита, со што се воспоставува систем на социјални услуги во заедницата кои нудат услуги и поддршка по мерка на поединецот. Ова значи дека едно стручно лице ќе управува со случајот и ќе има обврска да го следи семејството. На овој начин, социјалниот работник многу подобро ќе ги знае состојбите во семејството, ќе го следи нивниот напредок но и проблемите во секојдневнието. Ова дирекно ќе влијае на превенција од многу потенцијални ризици, но и ќе придонесе кон побрзо извлекување на семејствата од ризик со нивна активација на пазарот на труд.

„Системот за социјална заштита и социјалните услуги постојат за граѓаните и треба да се дизајнирани согласно нивните потреби. Токму затоа работиме на јакнење на капацитетите на стручните работници во системот, но и нови вработувања. Во тек се огласи за вработување на нови 138 лица“,  – изјавија од Министерството.

„Интегрираното водење на случаеви отвара можност за поголема поддршка на корисниците, а со тоа и подобри резултати во работењето”, изјави Арбен Зибери, заменик директор на агенцијата за вработување.

„Водењето предмети може да има огромен позитивен потенцијал во сите аспекти на социјалната работа и во посредувањето при вработување. Ја подржуваме оваа клучна промена во начинот на кој корисниците се поврзуваат со најсоодветната услуга, со цел семејствата и децата да имаат квалитетен и исполнет живот”, потенцираше Бенџамин Перкс, претставник на УНИЦЕФ.

„За Програмата за развој на Обединетите нации хоризонталната координација помеѓу Центрите за социјална работа и Центрите за вработување е круцијален фактор за успешноста на проектот. Од огромно значење е јасното дефинирање на улогите на институциите во секој чекор на новиот пристап на интегрирано менаџирање на случаевите, и тоа почнувајќи од самиот старт на советување и проценка, па се до успешно вклучување на пазарот на трудот”, рече Нарин Сахакиан, заменик претставничка на УНДП.

Во наредните месеци сите стручни работници од центрите за социјална работа и 30 отсто од вработените во агенцијата за вработување ќе поминат обуки за интегрирано управување со случаеви, како дел од подготовките за имплементација на новиот закон за социјална заштита.

За една година бројот на деца сместени во социјалните установи е намален за 33,9%, покажуваат податоците од процесот на деинституционализација за периодот август 2017 - август 2018. 

Во овој период, Министерството за труд и социјална политика, обезбеди вонинституционално згрижување за вкупно 95 деца. Во пракса тоа значи подобри услови за раст и развој, индивидуална грижа и поддршка, тие да станат активни и рамноправни граѓани вклучени во општеството. 

Во истиот период, во вкупно шест социјални установи беа згрижени вкупно 45 деца. Дел од нив се деца без родители и родителска грижа, дел се со воспитно-социјални проблеми, или со попреченост. Додека во истиот период, 11 деца, сместени во  овие институции станаа полнолетни. 

Иако е амбициозно, сепак е остварливо. Министерството за труд и социјална политика посветено работи ниту едно дете под 18 години до 2020 година повеќе да не престојува во социјалните установи во Македонија.

Деинституционализацијата е промена на начинот на кој државата се грижи за децата и возрасните лица, кои имаат потреба од долгорочна социјална грижа. Наместо досегашните безлични и гломазни установи за колективна грижа, со овој процес се воспоставува систем на социјални услуги во заедницата кои нудат услуги и поддршка по мерка на поединецот. Целта на процесот е да го зајакнат корисникот и да го поттикнуваат неговото активно учество во средината каде што живее. 

Бидејќи семејното опкружување го поттикнува правилниот раст и развој, дел од децата се згрижуваат во семејства, други се посвојуваат,  илисе дава поддршка на биолошкото семејство да обезбеди подобра грижа за своето дете. За дел од децата, пак се создава средина налик на семејната, како што се малите групни домови. 

Приказ 1: Број на деца под 18-годишна возраст сместени во социјални установи за долгорочно згрижување

 

Приказ 2: Форми на згрижување во заедницата на децата - поранешни корисници на институциите