Претседателот на Владата на Република Македонија, Зоран Заев се сретна со претставници на дијаспората од Македонија во Италија, Швајцарија, Луксембург, Германија, Словенија, Хрватска, САД.

На средбата е изразена поддршка на владините политики за членство на Македонија во НАТО и во Европската Унија.

На состанокот се разговараше за повеќе актуелни прашања, меѓу кои и за важноста на претстојниот референдум и за потребата од проактивна улога на сите граѓани, вклучително и на дијаспората со цел успешен референдум, што ги отвора перспективите на Македонија и можностите за квалитетен живот на сите граѓани.

Претседателот на Владата, Заев рече дека НАТО и ЕУ за Република Македонија значат економија, стабилност и безбедност и изрази очекување за успешен референдум.

- Мнозинството граѓани на Македонија веќе се изјаснија за промени, за перспективи наместо изолација, за благосостојба наместо сиромаштија, за реформи и демократија што водат кон квалитетен живот и безбедна иднина на државата и на сегашните и идните генерации. И убеден сум дека на референдумот ќе биде потврдена одлуката за евро-атлантска иднина на Македонија, што ќе донесе и европски живот во Македонија и стабилност и безбедност, рече премиерот Заев.

- Ве повикувам, како што си ја сакате државата, да излезете на претстојниот референдум и со тоа и вие како дијаспора, да дадете значаен придонес во овој историски момент за напредок на Македонија, додаде премиерот Заев.

Претседателот на Владата Заев и претставниците на дијаспората зборуваа за придобивките од реформските процеси во државата, од воспоставувањето добри односи со соседите и од евро-атлантските интеграции.

- Вистински патриот е оној кој ќе ја обезбеди иднината на државата. Тоа е придобивка за нашите деца, за сегашните генерации и остварување на вековниот стремеж на нашите предци за потврда на идентитетот на граѓаните Македонци, на македонскиот јазик и поставување на Македонија како држава, еднаш засекогаш, во светското семејство на држави, рече премерот Заев.

Претседателот на Владата, Заев, им се заблагодари на претставниците на дијаспората за желбата да го помогнат остварувањето на стратешките цели на државава, членство во НАТО и ЕУ, а со тоа и за економски просперитет на Македонија.

На средбата се поздравени искрените политики на Владата кон дијаспората, што овозможуваат услови за инвестирање во родната земја. Претставниците од дијаспората се интересираа за можностите за инвестирање и за областите во коишто се потребни инвестиции.

Средбата помина во пријателска атмосфера и со договор за поинтензивни контакти помеѓу Владaта, општесвотo и дијаспората од Република Македонија.

Министерството за здравство денес ја почна постапката за јавна набавка на инсулин, глукагон, инсулински игли и ленти за мерење шеќер и инсулински пумпи со потрошен материјал, за периодот септември 2018 - септември 2020 година. Постапката и процедурите се соодветно испланирани, согласно бројот и потребите на пациентите и населението во Република Македонија, кое директно или индиректно ги користат именуваните медицински препрати, уреди и потрошни материјали.

За таа цел, пред да биде распишана предметната јавна набавка, од Министерството ги контактиравме граѓанските здруженија, кои дадоа свои мислења за воведување новитети. Согласно побарувањата во тендерската документација, првпат по шест години во Република Македонија се очекуваат нови лекови за дијабетес, како што се инсулини и ампуларна терапија. Во целиот процес беше вклучена и Националната комисија за дијабетес.

Заинтересираните економски оператори потребно е да внимаваат во подготовка на тендерската документација, посебно во делот на поднесување сертификати за квалитет на готов лек и одобрение за ставање лек во промет, наведени во техничките спецификации од тендерската документација.

На ваков начин, Министерство за здравство прави напори и води грижа пациентите во континуитет да бидат снабдени со инсулин, во соодветни рокови и со подобар квалитет.

Потенцираме дека до завршување на постапката за јавна набавка, инсулин има во доволни количини во сите инсулински аптеки.  

Ги повикуваме сите заинтересирани економски оператори кои имаат интерес за учество да ја погледнат целокупната документација во електронскиот систем за јавни набавки.

По потпишувањето на Конечниот договор за решавање на македонско-грчкиот спор за името и за стратешко партнерство помеѓу министрите за надворешни работи на Република Македонија и Република Грција, Никола Димитров и Никос Коѕијас, како и после поканата на Македонија за започнување на пристапните преговори за членство во НАТО, и после определениот датум за почеток на преговорите за членство во ЕУ, распишан е референдум во Република Македонија, со цел граѓаните да одлучат дали се за членство во ЕУ и НАТО со прифаќање на Договорот меѓу Република Македонија и Република Грција. 

Имајќи предвид дека членството на Република Македонија во Европската Унија и во НАТО е стратешка определба на државата, а со решавање на долгогодишниот спор со соседна Република Грција пречките за натамошна интеграција се отстранети, Владата на Република Македонија носи одлука да спроведе процес на планирана јавна комуникација од јавен интерес - кампања за референдумот. 

Кампањата за референдумот ќе се спроведе со цел споделување информации од јавен интерес за граѓаните/гласачите во Република Македонија, околу содржината на Договорот со Грција, придобивките од интеграцијата на Република Македонија во  НАТО и ЕУ и планот по кој земјата ќе се движи кон Алијансата и кон Унијата.

Во планирањето и спроведувањето на информативната кампања за референдумот, Владата на Република Македонија ќе работи транспарентно и отчетно, согласно следните стандарди за јавни комуникации од интерес на јавноста:

● Релевантност - согласно владините надлежности, приоритетни политики и одговорности: Конкретните информации кои се споделуваат треба да бидат од директна и суштинска надлежност на Владата и согласно Стратешките приоритети на Владата. Соодветно и неопходно е Владата да има можност да ги објаснува и образложува сопствените политики и одлуки и кога е неопходно, да ја информира, да и укажува, сугерира или предупредува јавноста.

● Објективно и информативно комуницирање: Комуникацијата треба да биде објективна и објаснувачка, и да не биде пристрасна или полемична. Комуникацијата во никој случај не смее да содржи неточни информации, говор на омраза или лични дискредитации. Владините информации или активности поврзани со публицитет треба секогаш да бидат насочени кон информирање на јавноста, дури и кога тоа исто така има задача да влијае на однесувањето на поединци или на одредени групи (на пример: пораки поврзани со стратешките интереси на Република Македонија или пораки поврзани со здравјето и безбедноста на граѓаните).

● Непартиски комуникации: Несоодветно е да се оправдуваат или бранат политики со користење пораки кои се типични за политичките партии, да се користат партиски слогани, да се промовираат партиски активности, или директно да се напаѓаат политики и мислења на опозициски партии и групации (иако можеби некогаш ќе биде неопходно да се одговори на истите на конкретен и коректен начин). Имајќи го предвид политичкиот повеќепартиски систем во Република Македонија, можно е определена добро воспоставена јавна кампања да создаде политички кредит или штета за партиите од власта или од опозицијата, но ова не смее да биде ниту директна ниту индиректна цел на владините информации или јавни активности кои се платени со јавни пари.

● Пропорционалност и рационалност - Соодветно искористување на ресурси кое ќе гарантира дека трошокот на јавните ресурси (финансиски, материјални, човечки) е ефективен за информирање или влијаење врз однесувањето на граѓаните, кое е од јавен интерес: Каналите низ кои се споделуваат информациите со јавноста треба да бидат организирани на економичен и соодветен начин, а за трошењетo на јавните пари треба да се известува. Владата е отчетна кон граѓаните и  Парламентот за тоа на кој начин ги користи државните службеници или други јавни ресурси или расходи. Информативните кампањи од јавен интерес на Владата треба да се натпреваруваат за внимание од јавноста со други активности на публицитет односно со другите кампањи во општеството. За да бидат ефективни, тие треба да бидат презентирани на професионален начин т.е. на начин со кој јавноста добива јасна порака. Притоа, недозволива е лоша презентација што може да предизвика  неефикасно трошење на јавни средства, без да се постигнат очекуваните резултати. Би било контрапродуктивно ако степенот на трошење на средствата за јавна кампања го попречи комуницирањето на пораките кои што треба да се пренесе. Неопходно е и ќе биде реализирано прецизно планирање на целите, мерките и системот за евалуација - на секоја комуникација која вклучува трошоци на ресурси со цел да се осигура ефективност и резултати во реализација.

Во процесот на спроведување на информативната кампања за референдумот, владините службеници за комуникации и односи со јавност, како и за секоја друга официјална владина комуникација, ќе работат согласно стандардите и кодексот на однесување во рамки на Закон за административни службеници и Етички кодекс на административните службеници, како и согласно универзалните принципи на: интегритет, чесност, објективност и непристрасност. 
 

На денешната седница Владата на Република Македонија го разгледа извештајот за текот на имплементација на Планот за гаранција за млади - пилот фаза за 2018 година.

Во досегашниот период на имплементација на младинската гаранција во 3 општини, почнувајќи од Март, 2018, остварени се следните резултати: Вкупен број на вклучени млади: 1.770, од нив 855 женски и 915 машки.

Од нив веќе се вработени 518, а останатите се вклучени во други мерки како практиканство, обука на работно место, обуки за побарувани занимања на пазарот на труд, обуки за напредни ИТ вештини.

Република Македонија е единствената земја во регионот, која не е членка на Европската Унија, а започна со имплементирање на програмата „Гаранција за млади“, како мерка за зголемување на вработливоста на младите луѓе; Во земјите членки на ЕУ оваа програма успешно се имплементира од 2012 година. Партнер во имплементацијата е Националниот младински совет.

Министрите на седницата ги прифатија предлог-измените на Програмата за финансиска поддршка во земјоделство за 2018-та година. Со овие измени, по 2 денари субвенција за килограм, ќе добијат регистрираните откупувачи и трговците кои до 15 септември годинава ќе откупат индустриски сливи за најмалку пет денари или свежи сливи по минимум осум денари.
 
Владата исто така, ги разгледа и ги прифати извештајот за преземени мерки и активности за 2017-та година, како и оперативниот план за 2018-та година за спроведување на Националната стратегија за стари лица 2010-2020 година.
 
Владата го задолжи Национално Координативно тело за следење и евалуација на имплементацијата на Националната стратегија за стари лица 2010-2020 година, да обезбедува механизми за координација на регулирањето и практикувањето на политиките кои што директно или индиректно ги засегаат старите лица, со цел поедноставување на акциите и мерките во одделни сектори и на одделни нивоа.
 
На денешната 83-та седница Владата донесе одлука за започнување на постапка за избор на универзален снабдувач со електрична енергија. Канцеларијата на Претседателот на Владата, Кабинетот на Заменик Претседателот на Владата задолжен за економски прашања и за координација со економските ресори и Министерството за економија се задолжени да номинираат по еден член и заменик член во Комисијата за спроведување на постапката за избор на универзален снабдувач. 

Исто така, Владата им укажа на Регулаторната комисија за енергетика и на МАНУ, да номинираат по еден член и заменик член во Комисијата за спроведување на постапката во рок од 3 дена од денот на донесување на одлуката.

Согласно денешната одлука, Комисијата е должна во рок од 14 дена, до Владата на Република Македонија на усвојување да го достави јавниот повик и тендерската документација.

Заради остварувањето на правото на сите домаќинства и мали потрошувачи да се снабдуваат со електрична енергија со утврден квалитет по разумни, јасно споредливи, транспарентни и недискриминаторни цени, Владата на Република Македонија избира универзален снабдувач кој истовремено ќе ја врши и дејноста снабдување во краен случај. Целта на оваа постапка е остварувањето на правото на домаќинствата и малите потрошувачи на универзална услуга во снабдувањето со електрична енергија, односно да бидат снабдувани од универзалниот снабдувач во согласност со обврските утврдени со Законот за енергетика и правилата за снабдување.
 
На предлог на Министерот за внатрешни работи, Оливер Спасовски, Владата на седницата донесе одлука да го разреши Лазо Велковски од позицијата директор на Бирото за јавна безбедност.

Како материјал за информирање, министрите го разгледаа извештајот на независниот ревизор за извршена ревизија на работењето на Ревизорското тело за ревизија на инструментот за претпристапна помош за периодот од 1 јануари до 31 декември 2017-та година. Според извештајот на независниот ревизор, финансиските извештаи, во сите материјални аспекти, реално и објективно ја прикажуваат финансиската состојба на ревизорско тело за ревизија на инструментот за претпристапна помош.
 
На редовната 83-та седница Владата на Република Македонија донесе и одлука да спроведе кампања од јавен интерес за референдумот

Исто така, Владата ги задолжи сите министерства и другите органи на државната управа, во рок од 3 дена до Министерството за финансии да достават информација за средствата коишто ги имаат на располагање, а кои би можеле да се пренаменат за кампањата за референдумот.

 

 

Министерството за труд и социјална политика соопштува дека согласно со Законот за празниците на РМ  („Службен весник  на  РМ„ бр.21/98 и 18/07), 21 август 2018 година (вторник), Курбан Бајрам, првиот ден на Курбан Бајрам е неработен ден за граѓаните од муслиманската вероисповед во Република Македонија.

Истовремено, Министерството за труд и социјална политика на граѓаните од муслиманската вероисповед во Република Македонија им го честита празникот Курбан Бајрам. 

„Според последните податоци што вчера ги објави Државниот завод за статистика, зголемувањето на бројот на туристи продолжува во континуитет, па наместо до 2020, како што прогнозиравме, ние сме на прагот предвреме да ја оствариме зацртаната цел - годинава да оствариме 1 милион туристи, со 3 милиони ноќевања“, рече министерот за економија Крешник Бектеши.

Имено, според последните статистички податоци само во јуни 2018 година, во однос на јуни 2017 година, забележано е зголемување за 20.7%, а кај бројот на ноќевања за 23.4%. Притоа, бројот на домашните туристи во јуни годинава, во однос на јуни лани, е зголемен за 15.9%, а на странските туристи е зголемен за 22.4%. 

„Изразено во апсолутни бројки, само во јуни 2018 година во земјава престојувале 102.327 туристи, кои оствариле 243.175 ноќевања, а заклучно со јуни влегле вкупно 433.361 турист, односно имаме вкупно 923.855 остварени ноќевања“, истакна Бектеши.

Во периодот јануари - јуни 2018 година, во однос на истиот период од претходната година, бројот на туристите е зголемен за 16.4%, и тоа: кај домашните туристи има зголемување за 9.3%, а кај странските зголемување за 19.8%. 
Според министерот за економија, учеството на туризмот во БДП се очекува да биде околу 3%, со оглед на тоа што проекцијата до 2020 е тоа да биде 4%, а овој континуиран раст на бројот на туристи автоматски ќе значи и поголем девизен прилив. 

„Ова е знак дека се движиме во вистинска насока, а политиките се одлично поставени. Влезот на Република Македонија во НАТО ќе значи и отстранување на последната бариера што често пати е споменувана од странските туристи кои ја заобиколувале нашата земја, а тоа е прашањето околу поголема сигурност и безбедност. Но, тоа ќе значи и засилени инвестиции во туристичката инфраструктура, што секако ќе придонесе за развој на туристичкиот сектор“, потенцираше Бектеши, додавајќи дека земјите од регионот кои се дел од НАТО или ЕУ семејствата веќе го почувствуваа значењето од членството во насока на засилен економски развој, вклучувајќи и развој на туристичкиот сектор.  

На денешната владина седница меѓу другите точки, на дневен ред се предлог-измените на Програмата за финансиска поддршка во земјоделство за 2018-та година.

На предлог на Министерството за труд и социјална политика, министрите на седницата ќе дебатираат за предлог-програмата за изменување на програмата за изградба, опремување и одржување на објекти за детска заштита за 2018-та година, како и за извештајот за преземени мерки и активности за 2017-та година и оперативниот план за 2018-та  година за спроведување на Националната стратегија за стари лица 2010-2020 година.

Како материјал за информирање, министрите ќе разгледаат неколку извештаи. Меѓу нив се извештајот на независниот ревизор за извршена ревизија на работењето на Ревизорското тело за ревизија на инструментот за претпристапна помош за периодот од 1 јануари до 31 декември 2017-та година, како и извештајот за текот на имплементација на Планот за гаранција за млади (пилот фаза 2018 година).

На дневен ред на 83-тата Владина седница е и информацијата за имплементација на ИПА II Акциската програма 2014-та, „Поддршка на Секторот Правда”.

Вчера во градскиот парк во Скопје, Агенцијата за млади и спорт (АМС) го одбележа Меѓународниот ден на младите.

На панел дискусијата, по овој повод, свое обраќање имаа директорот на АМС, Дарко Каевски, Заменик претседателот на Владата на Република Македонија и министерка за одбрана Радмила Шеќеринска, Сефер Селеми, основач на здружението за унапредување на демократијата „Демокраси лаб“, Нина Ангелковска, ко-основач и извршен директор на Групер и Нарин Сахакјан, заменик претставник на програмата за развој на Обединетите Нации.

Директорот Каевски, честитајќи го Меѓународниот ден на младите, во своето излагање рече дека младите луѓе во земјава се наоѓаат во ситуација во која треба да бираат дали ќе продолжат напред кон перспективи и предизвици, кои ќе треба да ги искористат, или, како што рече тој,  враќање неколку чекори назад во бесперспективност, безидејност, затвореност, нешто што ќе не изолира од младите ширум цела Европа.

 

 

„Само интергирана Македонија, Македонија, рамо до рамо со европските држави, може да ни донесе вистински просперитет. Затоа што ние со младите од Европа делиме еднакви интереси но сепак можностите не ни се идентични. Да ги донесеме тие можности тука, за ни еден наш комшија, пријател, роднина, не си ја гледа иднината надвор од својата земја, туку напротив, тука во интегрирана Македонија во НАТО, и членка на Европската Унија“, рече Каевски.

Министерката Радмила Шеќеринска, во своето обраќање се осврна на прашањата за предизвиците и обврските на Владата на Република Македонија во отворањето подобри шанси за младите.

 

 

„И во Владата разговараме како да им отвориме повеќе шанси на младите, и тука се гледа можноста која ни ја дава ЕУ и НАТО. Тоа е вратата која ќе им се отвори и на помладите од мене, а од нас зависи дали ќе останеме на приземје или ќе се искачиме на стотиот спрат.“, „НАТО ќе ни ја даде сигурноста и стабилноста, и ресурсите за да можеме да се подобруваме дома, но и за да обезбедиме иднина за младите тука“ рече вицепремиерката Шеќеринска, и додаде дека отворањето на шанси е дел од описот на работата на Владата на Република Македонија.

Нина Ангелковска, извршната директорка на Групер, во своето обраќање пред присутите порача дека никој нема да не однесе таму каде што сакаме да одиме, освен ние самите.

„Да останете дома, да работите дома, да придонесувате дома, а сепак да сте препознаени од светот е стварно многу голема гордост “, рече Ангелковска.

Заменик претставникот на програмата на Обединетите Нации, Нарин Сахакјан, во своето обраќање на вчерашнот настан рече дека Обединетите Нации го слават овој ден на младите ширум светот, со цел да ги сослуша младите и заедно со нив да гради подобра иднина, за како што рече таа, со тоа да им се помогне на младите да ги надминат многубројните предизвици со кои се соочени.

„Во остварувањето на оваа глобална задача на Обединетите Нации, ние тесно соработуваме со Владата во насока на решавање на најитните потреби на младите луѓе во земјава. Меѓу другите проблеми беше истакната и невработеноста на младите која остава последици врз општеството во целина. Ова е една од причините зошто вложивме многу стручни ресурси заедно со Владата, во осмислувањето и реализацијата на национална програма за самовработување, преку финансиска помош и обуки за старт-ап бизниси, со цел невработените да отворат свој бизнис“, рече претставничката на ОН, Сахакјан.

Основачот на здружението за унапредување на демократијата „Демокраси лаб, Сефер Селеми, во своето излагање се осврна на перспективите и можностите на Младите во Македонија, за што рече дека тесно се поврзува со интергациите на Македонија во Европската Унија.

„Што значи европската перспектива за младите? Тоа е надеж, цел патоказ. Тоа е местото каде треба да одиме, и затоа е исклучително важно, таа перспектива не само да ја имаме, но сите активно и безусловно да се ангажираме да ја обезбедиме таа европска Македонија. Европа е Македонија на мојата генерација, но и на генерациите кои ќе идат после нас“, рече Селеми.

Во склоп на панел дискусијата, по повод Меѓународниот ден на младите, присутните граѓани имаа можност да поставуваат прашања до панелистите, и преку отворена дебата да добијат одговори за конкретните чекори и мерки кои Владата, бизнис секторот и граѓанските организации ги превземаат за запирање на одливот на млади луѓе од Македонија и нивно ангажирање и реализација во Република Македонија.

Одбележувањето на Меѓународниот ден на младите беше проследен со музички перформанс.

Претседателот на Владата на Република Македонија, Зоран Заев синоќа оствари средба со Фатмир Зимбери, сопственик на лиценцата на еден од најголемите ланци на ресторани, американскиот бренд КФЦ (KFC), на која беше најавено отворање на првите два ресторани, во Тетово и Скопје на 14 септември.

На средбата присуствуваа и генералниот директор на КФЦ за регионот Еремал Бајрами и маркетинг директорот за Македонија Никола Илиевски.

Инвестицијата е вредна повеќе од 10 милиони евра и согласно подготвениот бизнис план планирано е да се отворат повеќе ресторани во земјава со околу 400 нови работени места.

Премиерот Заев, поздравувајќи ги намерите на компанијата, изрази особено задоволство заради доаѓањето на светски познатиот бренд и порача дека секоја нова инвестиција во Македонија освен што отвора нови работни места и придонесува за економскиот развој, испраќа и силна порака до новите инвеститори дека државата е безбедна и солидна на пазарот.

Сопственикот на лиценцата, господинот Зимбери, информираше дека до крајот на годината се планира отворање на вкупно три ресторани во Македонија, со подготвен 4 годишен бизнис план за отворање 15 до 20 ресторани со вкупно 400 вработени.

„Особено сум среќен дека со инвестицијата вредна над 10 милиони евра, ние освен нашите вработени, обезбедуваме партнерство исклучиво со домашни компании од кои се снабдуваме со потребните суровини и намирници“, истакна сопственикот на лиценцата.

Зимбери додаде дека КФЦ како лидер во подготовка и послужување на пилешко месо, веќе има направено анализа на позициите на регионите во Македонија, каде може да се стимулира одгледувањето на кокошки.

„КФЦ ги помести границите не само во маркетингот, туку и во сите сегменти на пазарот“, истакна маркетинг-директорот Илиевски додавајќи дека главната цел на компанијата е да ги унапредува односите со сите фирми со кои соработува како долгорочни партнери.

„Отворањето на КФЦ е голем чекор во демонстрирањето на инвестициска клима во Македонија и особено сум среќен поради доаѓањето на овој бренд и поради фактот што се испраќа порака за останатите нови инвеститори, со што ќе се зголеми вработувањето и ќе се отворат нови економски можности“, рече премиерот Заев.

Тој ги истакна  заложбите и политичката волја на Владата да гради партнерски однос со бизнис заедницата, преку редовна и интензивна комуникација за потребите на бизнисот и за унапредување на економијата.

Компанијата КФЦ, со седиште во Кентаки, САД е основана во  1991 година и со повеќе од 23.000  ресторани во над 120 држави е на второ место во светскиот глобален ранг и е лидер во подготовка и послужување на пилешко месо подготвено на специфични начини.

Претседателот на Владата на Република Македонија, Зоран Заев денеска по завршување на тематскиот панел „Патот до Брисел преку Охрид“, даде и изјава за медиумите. Тој истакна: 

 

 

„13 август е значен датум во поновата историја на Македонија. 

Денес одбележуваме 17 годишнина од потпишувањето на Охридскиот рамковен договор кој стави крај на конфликтот, ги постави темелите на соживот во Република Македонија и го осигура интегритетот на нашата заедничка држава.  

Иако имаше обиди тие темели да бидат поткопани, успеавме заеднички да ги возобновиме. 

Денес градиме едно општество за сите. Општество каде сите се еднакви и имаат еднакви шанси. Општество каде законот важи подеднакво за сите.

Во исто време се помиривме со нашите соседи и го зацврстивме пријателството. 

Со Република Бугарија потпишавме договор за пријателство добрососедство и соработка, и ги заштитивме националните интереси на двете страни. Истовремено ја поттикнуваме и ја олеснуваме заедничката европска иднина на младите од двете држави, како и меѓусебната економска соработка.

Договорот со Бугарија, како и договорот со Грција, се документи кои градат мостови меѓу граѓаните и кои создаваат сојузништво.  

Договорот со Република Грција, го потпишавме во интерес на иднината на Република Македонија и на сите граѓани на оваа земја, без разлика на етничка, верска или политичка припадност. 

Договорот го заштитува македонскиот идентитет. Македонскиот идентитет, според членот 7 од договорот, ги отсликува нашата територија, нашиот јазик и нашиот народ со своја историја, своја култура и со свое наследство. 

Со договорот, нашето државјанство е потврдено како македонско. Официјалниот јазик на нашата држава е заштитен како „македонски јазик“, без фусноти или додавки.
Македонската иднина е загарантирана. 

Со потпишување на договорот во Преспа ја отстранивме и последната пречка на патот на нашата земја за влез во НАТО и за почеток на преговори за влез во Европската Унија. 

Стануваме член на семејствата на НАТО и на ЕУ каде што вредносно и цивилизациски припаѓаме. Обезбедуваме стабилност, безбедност, економски развој, раст и подобар животен стандард.

Она што ни преостанува е да бидеме храбри. Храброста значи обединети, гордо и достоинствено да кажеме ДА за заедничка светла иднина.

На 30 септември секој од нас има можност да биде еден од творците на Европска Македонија.

Историската шанса за нашата иднина е пред нас, имаме одговорност да ја искористиме. 

Да кажеме ДА за македонската иднина.

Ви Благодарам“. 
 


 

Претседателот на Владата на Република Македонија, по своето излагање на панелот на тема „Патот до Брисел преку Охрид“, по повод одбележувањето на 17 години од потпишувањето на Охридскиот рамковен договор, одговараше и на новинарски прашања. Во продолжение Ви испраќаме интегрален текст од нив. 

 

Новинарско прашање: Премиере, само три проценти од граѓаните го прочитале Договорот со Грција. Како мислите да ги убедите до 30 септември, уште месец и пол има, со оглед дека кампањата е почната само на Фејсбук засега. Второто прашање, ова што се случи со Бугарија дали тоа го оценувате како уцена од страна на Бугарија, пораката на Борисов за Европскиот совет и дали прашањето со Бугарија не е затворено и дали е тоа предизвик за Договорот со Грција?

Премиерот Заев: Договорот е техниката, алатката со која што ги затворивме отворените прашања. Ние мораме да продолжиме во духот на Договорот, да внимаваме на градењето на нашето пријателство заради тоа што заедничка ни е иднината. Рековме, на темелите на минатото и на историјата ја градиме нашата заедничка иднина која што треба да обезбеди иднина на нашите потомци, на генерациите што доаѓаат, но и на сегашните генерации. И од тој аспект, секако треба и ние политичарите и историчарите и експертите и сите граѓани на двете земји да внимаваме и да придонесуваме кон тоа заедничко пријателство. Затоа што, само заедно, сплотени, Балканот со сите свои соработки ќе биде уште повеќе почитуван од Западот, од Европа, каде што се стремиме да бидеме и Македонија и целиот Западен Балкан. 
Во делот на првото прашање кое што го поставивте, дополнително, кампањата ќе се отвори. Знаете дека согласно Законот за референдум, кампањата почнува со одлуката во Собранието. Во секој случај, секако, државата ќе донесе свои одлуки, политичките партии веројатно ќе си донесат свои одлуки и преку кампања ние ќе се обидеме да Договорот со Грција го доближиме максимално до сите граѓани. Јас апелирам и во оваа можност, да ги повикам граѓаните да го погледнат Договорот, да видат дека сето она што е потврдено, што беше проблематично со нашиот идентитет е целосно потврдено. Загарантиран е македонскиот идентитет, а којшто беше спорен, загарантиран е македонскиот јазик. Ова е, преведливо на сите јазици. Никогаш повеќе, никој, не го спори нашиот идентитет, нашиот македонски јазик и нашата македонска посебност. Секако, напоменувам, не беше никогаш спорен идентитетот на помалку бројните етнички заедници во државата. Ова е историско прашање, ова е вековната борба на нашите предци, ние сега имавме чест да ја заокружиме. Од тоа, верувам дека државата и Владата има целосно право, да ја информираат јавноста и граѓаните, пред да ја донесат оваа историска одлука. И во тој дел, Владата утре, на седница, ќе дебатира и ќе донесе одлука како да помогне во информативниот дел на кампањата, за да може овие три проценти од граѓаните, кои што само го прочитале Договорот, да станат 100 проценти. Секако, тоа е должност на Владата и обврска согласно Законот, да го направи поблиску до граѓаните овој Договор, да ја знаат комплетната вистина, суштината и она што го обезбедува овој Договор. А тоа се,  вековните аспирации на нашите граѓани, прво за слобода и демократија, а понатаму низ институциите и интеграциите и во НАТО и во Европската унија. Да ги достигнеме овие европски вредности за кои што се залагаме сите ние. 

 

Новинарско прашање: Има споменици на нацисти, во Симница (Гостиварско) на Џемаил Хасани. Дали тој споменик ќе биде симнат? Не личи во државата да има споменици од нацисти.

Премиерот Заев: Секако. Сето она, коешто е потврдено за нацистичко минато, потврдено преку спомените или слично, треба да го утврдат институциите и согласно правно-формалните аспекти, согласно на законите во Република Македонија ќе постапат и институциите. Владата, ќе постапува согласно Уставот и законите и секако она што е поставено како споменик, правно-формално треба да се види како е регулирано. Второ, треба да се докаже низ институциите за одредени тврдења.

 

Новинарско прашање: Кој ќе биде наследник на Лазе Велковски, на директорската позиција во Бирото за јавна безбедност  и што се крие зад неговата оставка, односно неговото барање за разрешување? Има обвинувања дека станува збор за внатре партиска пресметка. 

Премиерот Заев: Апсолутно, не. Се работи за поднесување на одговорност, она што граѓаните го очекуваат од политичарите, од носителите на јавните функции и слично. Затоа што, уште еднаш ќе потврдам господинот Велковски е еден од моите први соработници, соработници на министерот Оливер Спасовски, но грешката е направена и одговорноста мора да се понесе. Секако, јас верувам дека тој ќе остане и понатаму значаен фактор во Министерството за внатрешни работи, заради тоа што е важен со неговото искуство и од помош на државата и таа треба да продолжи да го користи неговото искуство во работата. Исправен пред заканата и одредени закани, коишто од минатото се насочени кон него и семејството, секако ја направил грешката и за таа грешка треба да понесе одговорност. Министерот за внатрешни работи преку Министерството за внатрешни работи веќе објави јавно, даде предлог за разрешување, Владата на утрешната седница ќе го разгледа Предлогот, а секако после тоа ќе разгледуваме и можни решенија доколку Владата одлучи да постапи по предлогот на овластениот предлагач, министерот за внатрешни работи. Значи, апсолутно господинот Велковски е професионалец, да, точно, тој е припадник на Социјалдемократскиот сојуз (СДСМ) и верува во политиките на СДСМ, но секогаш важел за еден сплотувачки фактор. Социјалдемократскиот сојуз е единствен и е сплотен, посебно пред вакви важни моменти и апсолутно, овде се работи само за чин на понесување на одговорност за една грешка.

 

Новинарско прашање: Во Рамковниот договорот се предвидуваше и анализа за начинот на имплементација, но сега немаме резултати и информации до каде е спроведувањето на овој Договор? Вие како Влада дали ќе ја земете в предвид таа анализа?

Премиерот Заев: Анализата за спроведувањето на Рамковниот договор, е онлајн и буквално се прави постојано, континуирано, знаете дека и правно-формалниот аспект на Рамковниот договор преку Законот за употреба на јазиците јавно го коментиравме како последен правно-формален аспект. Анализата на рамноправната застапеност на јавните институции и насекаде по институциите во Македонија е анализа којашто редовно Владата и преку Секретаријатот за спроведување на Рамковниот договор, но и како Влада ја соопштуваме. Досега, од она што го знаеме, е дека вкупно 19 проценти е застапеноста на граѓаните Албанци во јавните институции, што значи е помалку од вкупниот број. Треба да продолжиме понатаму да работиме, но и на помалку бројните заедници не е соодветна застапеноста во јавните институции. На последната седница на Владата, реферираше Управата за приходи како една од поголемите институции, за бројките. На секоја седница на Влада, ќе имаме по една институција, се со цел да мобилизираме од аспект на рамноправната застапеност на сите граѓани, да учествуваат во работата на државата, а преку тоа да го градиме едното општество за сите, меѓу другото покрај сите други аспекти, да придонесеме сите да ја чувствуваат земјата вистински за своја, со сите свои права и со сите свои одговорности. 

 

Новинарско прашање: Имате ли нови имиња кои би можеле да го заменат Лазе Велковски?

Премиерот Заев: Не, апсолутно немаме ни размислувано. Ние не се надевавме дека ќе дојде до таква грешка која што е направена и секако Лазе Велковски е еден од првите директори којшто е поставен од страна на оваа Влада пред една година и месец отприлика е поставен за директор затоа и немаме воопшто размислувано. Но јас верувам дека ќе ни треба време, да најдеме вистинско решение со добра анализа за ова место, доколку секако Владата одлучи да постапи по предлогот на министерот Спасовски. 

 

Новинарско прашање: А како го коментирате тоа што за Лазе Велковски има веќе предлог за разрешување, а Вие не ја прифативте оставката на Вице премиерот Кочо Анѓушев за доделувањето на грантови?

Премиерот Заев: Заради тоа што овде имаме констатирано грешка.

 

Новинарско прашање: Дали има двојни аршини?

Премиерот Заев: Не, апсолутно нема. Заради тоа што овде има констатирана и потврдена грешка. Во делот на Фондот за иновации и апликациите, секој по закон во Република Македонија има право да, напоменувам секој. Дали ние тоа ги извитоперуваме вредностите или не, тоа е прашање за дебата. Но, при ваквите аплицирања за самите грантови или поддршка од страна на Владата на домашните компании, етичкиот аспект беше доволно како причина да отвори дебата. При ваквата дебата имаме и повлекувања. Значи немаме грешка согласно законот. Немаме грешка којашто е од ваков карактер како што е овде и потврдено. Се повлече компанијата во којашто Кочо Анѓушев има 16% или, не знам, Хари Локвенец има 30% и коишто се носители на функции во власта, еден е во парламентарната власт, другиот е во извршната власт и апсолутно се работи за два различни случаеви. Законот важи еднакво за сите и одговорноста мора да ја поднесува секој. Ние имаме еклатантни примери каде што тоа веќе сме го докажале. Ако направите анализа, Владата, иако е година и два месеци во функција, повеќе од 20 луѓе се разрешени, коишто истата Влада ги именувала, по различни основи. И јас верувам дека пораката која што ја испраќаме до сите е константна и нема дилеми околу неа. Ако било кој се огреши пред законот, треба да одговара, ако некој направи грешка, тогаш треба да ја поднесе одговорноста и од етички аспект во делот на отстапување од функцијата.

 

Новинарско прашање:  Што ќе биде со предлог законот за финансии во кои се предложува УЈП  да имаат слободен пристап до информациите на граѓаните од банкарските аспекти, бидејќи пред се банкарската заедница, но и останатите аспекти сметаат дека тоа е премногу. И уште едно прашање поврзано со рамковниот договор, каде беа двајцата потписници, зошто не дојдоа двајцата потписници на рамковниот договор Бранко Црвенковски, Љупчо Георгиевски, што беше причината за нивно недоаѓање?

Премиерот Заев: Значи, јас сум канет гостин денеска, јас се одзвав на поканата и дојдов, сум присутен. Ќе треба да ги прашате двајцата потписници, тоа се поранешните претседатели на СДСМ и на ВМРО-ДПМНЕ, тие ќе ви дадат одговори. Треба да присуствуваат, ако моето мислење го прашувате за оваа работа затоа што придобивките од договорите треба да ги крепиме и понатаму, еднаш за секогаш ни се дадени.  Тие имаат свој дух и треба да го негуваме таквиот дух. Јас денеска изразив почит кон сите потписници на рамковниот договор, вклучително и кон некои коишто не се живи, господинот Арбен Џафери, на пример и многу други. Луѓе коишто биле таму и денеска се живи, а дале свој потпис во делот на рамковниот договор и го отстранија конфликтот и градеа, почнаа да градат едно општество за сите во оваа наша мултиетничка заедница. 

 

Новинарско прашање: А законот? За УЈП.

Премиерот Заев: Законот прво е процес којшто е финансиран од Европската Унија и од фондовите. Се работи за правото на државата да ги наплати приходите односно даноците од приходи од граѓаните. При тоа, нема аспирации државата да навлегува во детали на трошењето на парите на граѓаните во делот на нивните расходи, но во делот на приходите, многу земји во светот, многу демократски земји, Европската унија и те како има увид во приходот којшто го остваруваат даночните обврзници. Затоа што даночната евазија во Република Македонија е голема. И тоа најчесто таму е присутна каде што има и најмногу приход, кај побогатиот слој на населението во Република Македонија. Конечно, создадовме систем, ја подготвивме државата и управата за јавни приходи преку поврзувањето со банкарскиот сектор, да има увид во приходите коишто се цел на оданочување од страна на државата. Апсолутно тука нема ништо недемократски, апсолутно тоа е овозможено и постои и до сега, знаете дека државата преку нови институции, ако сака да направи увид во одредени сметки, може тоа и да го направи и тоа е дозволиво, постои и во скоро сите европски земји и апсолутно апелирам до граѓаните да нема никакви стравови. Се работи за подготовка на државата во извршувањето на својата, со устав дадена задача или со закон пренесена преку управа за јавни приходи да ги наплаќа даноците од страна на даночните обврзници.

 

Новинарско прашање: Кога законот за јазици ќе се најде во Службен весник?

Премиерот Заев: Јас верувам дека во соодветно време ќе се најде во Службен весник. Треба да бидеме трпеливи. Законот за јазици е два пати гласан во Парламентот и верувам дека во соодветно време тој и ќе биде објавен во службен весник. Секако, до тој период, уште еднаш апелирам да Претседателот на државата навистина ги стави двата потписи на двата важни закони, а тоа е законот за употребата на јазиците и законот за ратификација на договорот со Грција заради тоа што ако така се однесуваме сите, навистина ја доведуваме во прашање најважната функција во државата, а тоа е Парламентот. Дали има смисла неговото постоење во една парламентарна демократија? Оти теоретски може Претседателот да одлучи и на наредните 170 закони, кои и да се, во државата, да не го стави својот потпис. Така да, апелирам да се стави потписот од страна на Претседателот. 

 

Новинарско прашање: Дали ќе се оданочуваат приливите од дијаспората? Дали ќе се оданочуваат приливите кои што ги пуштаат иселениците во Македонија?

Премиерот Заев: Значи, уште еднаш за граѓаните да биде чисто, јасно, кристално: се оданочува тоа што е приход како заработка. Тоа што е помош кон семејствата од своите, од семејствата од надвор е помош и тоа не е цел на оданочување согласно законите во Република Македонија. Ако некој има приход од странство заради тоа што работел во странство, заработил во странство или направил интелектуална услуга некоја во странство и заради тоа добил приход, тоа е приход којшто се оданочува. Дотациите, донациите кои што нашинците ги испраќаат на нашите сограѓани овде, апсолутно ниту по закон ниту некој може да ги оданочува и овде таа дилема треба да ја отстраниме. 

 

Новинарско прашање: Претседател на Бугарија, Румен Радев, вчера рече дека не го видел Вашето извинување на Фејсбук во однос на изјавата за Илинденското востание, ќе му се извините ли повторно?

Премиерот Заев: Јас сум внимателен човек и правам се да градам пријателство. Гледате дека моите совети ги ставам на страна и сакам искрено да градам пријателство. Република Бугарија е партнер на Република Македонија и тоа го покажа неколкукратно. Го организираше Самитот за Западен Балкан на Европската Унија и НАТО и даде афирмации на сите земји и на Република Македонија. Се бореа министрите за надворешни работи на Бугарија и на Грција како за своја земја, за Македонија да добие датум и тоа го потврдувам заради тоа што не е во ред ние да го заборавиме. Тој што ни помага, треба тоа да го почитуваме. Република Македонија е исто така од помош на Република Бугарија и ќе биде за се што треба. Јас на крајот апелирам сите заедно да ги тргнеме политичките интереси и голиот популизам или она што навистина не предизвикува да бидеме недоволно внимателни затоа што договорот за пријателство, соработка и добро-соседство го потврди тоа преку нашите потписи таму, но треба тоа да го негуваме, да го доградуваме и постојано да тежнееме кон градење на тоа пријателство кое што е од обостран интерес на двете земји и на двата народи, а пред се им треба многу на генерациите кои што доаѓаат, односно на младите. 

 

Новинарско прашање: Ќе се договорите ли чиво е Илинденското востание?

Премиерот Заев: Значи ние веќе одбележуваме дел од заедничката наша историја и тоа е дел од нашата заедничка историја.