Министерството за труд и социјална политика ја засилува поддршката за работниците да добијат повисока минимална плата, но истовремено ги штити и нивните работнички права. Со предложените измени и дополнувања на Законот за минимална плата што вчера ги изгласаа пратениците, фирмите коишто на вработените ќе им ја покачат минималната плата ќе добиваат државна помош. 

Финансиската поддршка по работник изнесува 30 отсто од разликата помеѓу бруто платата на работникот во тековниот месец и просечната бруто плата на работникот исплатена во месеците октомври, ноември и декември лани. Оваа поддршка може да изнесува, најмногу до 1.200 денари месечно по работник.

Истовремено, мерката е одговор на барањето на работодавците за адресираниот проблем со т.н. уравниловка, а тоа е потребата да растат преостанатите плати блиски со минималната плата, за да не ги изгубат или демотивираат попродуктивните работници. Преку финансиската поддршка ќе се поттикне спиралата за покачување на платите во трудоинтензивните сектори што  позитивно ќе влијае на растот на продуктивноста на компаниите и на растот на животниот стандард на работниците. Средствата за исплата на финансиската поддршка се обезбедуваат од Буџетот на Република Македонија. Финансиската поддршка ќе се исплаќа за периодот од јули годинава, до декември 2019 година.

На денешната седница по предлог на Дирекцијата за ТИР зоните денеска министрите ќе одлучуваат во однос на предлог одлука за давање на согласност за склучување на договор за доделување на државна помош на Друштвото за производство, трговија и услуги БАУМЕР Скопје, а исто така ќе се одлучува и за нацрт договорот за долготраен закуп на градежно земјиште во индустриската зона Струга на Трговското друштво за производство, трговија и услуги РЕЧИ Ентерприсес Струга.

На предлог на Јавното претпријатие Македонски железници -инфраструктура ќе се разгледа информација за процесот на  експропријација на земјиште кое е потребно за реализација на проектите за реконструкција и изградба на железничката пруга од источната делница на коридор 8 ( Куманово – Бељаковце – Крива Паланка – Р. Бугарија).

Пред министрите ќе се најде и информацијата за потпишување на Договор помеѓу Агенцијата за храна и ветеринарство на Република Македонија и Министерството за земјоделство, шумарство и водостопанство на Република Србија од областа на безбедност на храната и ветеринарство и Договор помеѓу Агенцијата за храна и ветеринарство на Република Македонија и Министерството за здравство на Република Србија од областа на безбедност на храната.

Министрите ќе разгледаат предлог одлука за утврдување на вишокот средства од акумулираната добивка на ЈП Службен весник и уплата на тие средства во Буџетот на Република Македонија, а исто така ќе се одлучува и за обезбедување на средства за финансиска поддршка и развој на вршење дејност на ЈП „АГРО-БЕРЗА“.

На денешната седница министрите ќе ги разгледаат извештајот за работата на Дирекцијата за технолошки индустриски развојни зони за првите шест месеци од оваа година, извештајот за финансиското работење на АД за приредување игри на среќа, Државна лотарија на Република Македонија.

 

Претседателот на Владата на Република Македонија, Зоран Заев присуствуваше на традиционалната манифестација во Мостар, Mostar Peace Connection, на којашто имаше свое обраќање како минатогодишен добитник на наградата „Мостарска повелба за мир“, за промоција на соработката, градењето мостови и поврзување меѓу луѓето во својата земја, Македонија, регионот и светот.

Премиерот Заев им честиташе на овогодинешните добитници на наградата, премиерот на Грција, Алексис Ципрас и на Црна Гора, Душко Марковиќ, посочи дека успесите на Македонија се должат на неговото храбро лидерство, но и на пријателската соработка во регионот и принципиелната поставеност на меѓународната заедница што резултираше со покана за пристапни преговори на нашата држава во НАТО и најава за датум за преговори со ЕУ во јуни 2019 година.Претседателот на Владата на Република Македонија, Зоран Заев присуствуваше на традиционалната манифестација во Мостар, Mostar Peace Connection, на којашто имаше свое обраќање како минатогодишен добитник на наградата „Мостарска повелба за мир“, за промоција на соработката, градењето мостови и поврзување меѓу луѓето во својата земја, Македонија, регионот и светот.

Во обраќањето пред бројните присутни, сегашни и поранешни добитници на оваа значајна награда што се доделува симболично пред обновениот Стар мост во Мостар, лауреати, политичари, значајни личности кои дале придонес во промоцијата на мирот од БИХ, регионот и пошироко, пред бројните присутни премиерот Заев рече:

„Честитки мои драги пријатели Алексис и Душко! Честитки и за другите лауреати и добитници!

Во градот на победата на мирот над немирите, соживотот над поделбите, градот - мост на бројни, цврсти, светски пријателства, во убавиот Мостар, да се добие награда за придонес кон мирот, поврзувањето и меѓусебното почитување, „Мостарската повелба за мирот“ – тоа е огромна заслужена чест. Ќе додадам, и огромна одговорност, да се остане достоинствен претставник на овие вредности.

И да се биде дел од оваа значајна манифестација, драг Денис Звиздиќ, претседавач со Советот на министри на БИХ, почитувани организатори од Центарот за мир и мултиетничка соработка и почитувани граѓани на Мостар и на Босна и Херцеговина, е исто така огромна чест и огромна одговорност за сите нас кои сме присутни вечерва овде.

Заслужена чест е, затоа што промовираме како еден лидер може, треба и мора да се издигне над предрасудите, и самиот да стане мост, поврзувајќи се со други лидери кои им мислат добро на своите граѓани.

Никој сам не опстојал и сам не успеал. Човек на човек му е потребен, сосед на сосед, држава на држава. Тоа е светот, мотивирачки, охрабрувачки различности во едно, коишто се надополнуваат и на тој начин се развиваат и придонесуваат за развојот на другиот.

Ние, лидерите од регионот го направивме ова за што зборувам. Се поврзавме меѓусебно, покажавме достоинствена почит едни за други, завртевме грб на она што нè дели и го дофативме она што нè поврзува.

Тоа што нè поврзува е заедничката иднина на нашите граѓани, на регионот и на светот. Тоа што нè поврзува е потребата за стабилност, сигурност и безбедност, а со тоа и економски придобивки, за нашите граѓани и нашите држави.

Нашиот регион, ако е стабилен, безбеден и развиен, и Европа ќе биде стабилна, безбедна и развиена. Европа ако е стабилна, безбедна и развиена, ќе придонесува кон стабилен, безбеден и развиен свет.

Свет на мирот, свет на насмеани деца, на енергични млади луѓе кои живеат и работат во својата родна земја, свет на достоинствени граѓани - тоа е она што нè поврзува.

Драги пријатели,

Треба да се опстои на одлучноста да се бранат вредностите коишто ги споделуваме.

Откако ја добив наградата за мир лани, не сум поголем борец за мирот од тоа што бев. Но во себе, на посебен начин ја чувствувам одговорноста што ми ја доверивте, што покажавте верба во мене, токму во овој Мостар: да продолжам, со уште поголем ентузијазам, и уште поголема верба дека вреди да градам мостови, да развивам и поттикнувам пријателства и низ тие мостови и тие пријателства, да создавам иднина.

Низ овие мои заложби, со огромната поддршка од моите граѓани, со моите соработници во Владата на Република Македонија, со поддршката од пријателите од регионот, со вас кои сте тука и со оние кои не се овде, со пријателите од Европа и светот - мојата држава успеа да добие покана за почеток на пристапни преговори со НАТО и датум за почеток на преговори за членство во ЕУ во јуни 2019 година.

Ете пример како се може, само заедно и зошто се неопходни мостовите.

По мирната разврска на политичката криза, ние сме посветени кон должноста Владата да биде сервис на граѓаните и да ги реализира промените што ги избраа граѓаните.

Резултатот на тие промени се повисок животен стандард, економски просперитет, членство во Европската унија и на НАТО.

Затоа верувам дека нашите граѓани, заедно и сплотено ќе ја реализираат до крај својата визија, низ успешен референдум што пресвртно ќе влијае на подобрување на квалитетот на сечиј живот. 

Во постигнатото, благодарам што нè поддржавте пријатели!

Внесовме заедно нова енергија во регионот. Сплотуваме луѓе и држави. Регионот од бунар на конфликти, низ покажаното чесно и храбро лидерство го претворивме во извор на стабилност, безбедност и перспективи и за нас и за Европа на којашто сите припаѓаме.

И нашето присуство овде, пред овој обновен, Стар мост во Мостар, е завет. Ако пред овој мост одлучивме да оддадеме чест на мирот, пријателството, соработката, поврзувањето, тогаш да се потсетиме што гледаме во овој Стар мост. Не ги гледаме рушевините од болното минато, гледаме темели на здрава иднина.

За здрава иднина на нашите граѓани, за успешен евро-атлантски регион, за уште многу награди во придонесот кон светскиот мир – да продолжиме заедно!“, рече премиерот Заев во обраќањето на свечената манифестација Mostar Peace Connection што се одржа пред обновениот Стар мост во Мостар.

Претходно, премиерот Заев, заедно со организаторите од Центарот за мир и мултиетничка соработка, претседавачот со Советот на министри на БИХ, Денис Звиздиќ, како и со добитниците на наградата што ја доби премиерот Заев лани, „Мостарска повелба на мирот“, а годинава ја добија грчкиот премиер Ципрас и црногорскиот премиер Марковиќ, спушти цвеќе од Стариот мост, во Неретва, во знак на мир. 

Настанот што се реализираше во повеќе делови од Мостар, Стариот мост, Чаршијата, Џамијата, го одбележа богатство од различни етно елементи низ носии, храна, песни, меѓу коишто можеше да се слушнат и македонски песни.

Претседателот на Владата на Република Македонија, Зоран Заев, пристигна во Мостар на традиционалната манифестација Mostar Peace Connection. Пред почетокот на настанот, премиерот Заев имаше можност неформално да поразговара со домаќините, претставници од Центарот за мир и мултиетничка соработка, претседавачот со Советот на министри на БИХ, Денис Звиздиќ, грчкиот премиер Алексис Ципрас, црногорскиот премиер Душко Марковиќ.

Премиерот Заев, заедно со неговите колеги, Звиздиќ, Ципрас, Марковиќ, положи цвеќе во реката Неретва, во знак на мир и со пиетет кон жртвите од сите војни.

Премиерот Заев даде изјава за медиумите во којашто го истакна храброто лидерство на сите премиери од регионот кои на темелите од минатото градат иднина:

"Честитки прво до моите драги пријатели Алексис и Душко и до другите лауреати и добитници за огромната чест што им е доверена со добиената награда „Мостарска повелба на мирот“.

Ја добив наградата лани и знам колку е таа вредна и што значи, значи чест, но и одговорност за доверената верба од организаторот, Центарот за мир и мултиетничка соработка и граѓаните и лидерите од БИХ, регионот и пошироко.

Пораката што ја испраќаме со присуството на оваа величествена манифестација што го слави мирот е силна.

Промовираме како еден лидер може, треба и мора да се издигне над предрасудите, и самиот да стане мост, поврзувајќи се со други лидери кои им мислат добро на своите граѓани.

Никој сам не успеал. Ние, лидерите од регионот се поврзавме меѓусебно, покажавме достоинствена почит едни за други, завртевме грб на она што нè дели и го дофативме она што нè поврзува.

Тоа што нè поврзува е заедничката иднина на нашите граѓани, на регионот и на светот.

Тоа што нè поврзува е потребата за стабилност, сигурност и безбедност, а со тоа и економски придобивки, за нашите граѓани и нашите држави.

Напредокот на Република Македонија, којашто денес има покана за почеток на пристапни преговори со НАТО и датум за почеток на преговори за членство во ЕУ во јуни 2019 година е значаен пример, како низ соработка, меѓусебно поврзување и почитување, за само една година, може да се постигне пресвртен успех.

Регионот има лидери кои внесоа нова енергија и подготвени се да сплотуваат луѓе и држави. Тоа треба да се искористи бидејќи тоа нè носи заеднички напред.

Нашето присуство овде, пред овој обновен Стар мост ја испраќа пораката дека сме подготвени да ја примениме во пракса симболиката на Мостот и на минатото да градиме иднина.

Тоа и го правиме. Да продолжиме заедно напред, како лидери, држави, регион, како Европа и како свет, за доброто на сите граѓани!".

На манифестацијата Mostar Peace Connection, присуствуваат бројни гости, политичари и истакнати личности, заслужни за промоција на мирот, од БИХ, регионот и пошироко

На манифестацијата обраќање ќе има и премиерот Зоран Заев, кој е минатогодишен добитник на наградата „Мостарска повелба на мирот“, за придонес во соработката и поврзувањето на луѓето во својата земја, регионот и светот.

Министерот за надворешни работи на Република Македонија, Никола Димитров денеска оствари средба со државниот министер надлежен за Европа во германското Министерство за надворешни работи, Михаел Рот.

Министерот Димитров го информираше гостинот за актуелните политички случувања во земјата, поврзани со претстојните чекори за целосна имплементација на постигнатиот Договор за решавање на билатералниот спор со соседна Грција, како и активностите за реализација на надворешно политичките приоритети на Република Македонија. МНР Димитров го потенцираше и задоволството од препознаениот напредок на нашата земја, кој беше јасно валоризиран преку одлуките донесени на последните Самити на Европската Унија и НАТО. Во таа смисла изрази благодарност за силната и недвосмислена поддршка од Берлин во овој процес, нагласувајќи дека “Германија е наш голем пријател и партнер во политичка и економска смисла, со кој споделуваме слични интереси и визија за иднината на нашиот Регион.“

Државниот министер Рот укажа дека Република Македонија направила многу во изминатава година и честитајќи за посветеноста и лидерството демонстрирани во изнаоѓањето решение за повеќедеценискиот спор со Грција, истакна дека овие напори овозможиле дофатлива и јасна европска и евроатлантска перспектива за земјата и нејзините граѓани и можност што треба да биде препознаена. 

Заменик претседателот на Владата задолжен за економски прашања, Кочо Анѓушев на денешната прес-конференција во Владата се осврна на сите прашања во врска со начинот и постапката на доделување на државна поддршка на македонски компании преку мерките од Планот за економски раст, во насока на транспарентно и целосно информирање на јавноста за процедурите.

Вицепремиерот нагласи дека за првпат во историјата на Република Македонија, со мерките од Планот за економски раст, се овозможува поддршка на македонските компании, поставена на транспарентни основи, со фер и исти критериуми за сите фирми. Тој истакна дека овој процес заслужува шанса и дека во таа насока почитувајќи ја сензитивноста на јавноста, ќе влијае компаниите во коишто тој е мнозински акционер да не ги користат мерките за поддршка од Планот за економски раст.

„За развојот на економијата основа се владеење на правото и политичката стабилност на земјата. Владеењето на правото е нешто што лично го поддржувам и сметам дека сите проекти коишто ги реализира Владата треба да се под будното око на јавноста и медиумите. Првпат во државата се креирани транспарентни мерки, со јасни и исти критериуми и процедури за сите компании во земјата, без да никој мора да се договара за државна помош во министерските кабинети во четири очи“, посочи Анѓушев и ги повика медиумите да се консултираат со стопанствениците дали се задоволни од донесените мерки.

Анѓушев посочи дека од првиот ден на позицијата вицепремиер транспарентно на јавноста и го презентирал анкетниот лист и сѐ што поседува и додаде дека во согласност со Законот за конфликт на интереси се повлече од сите управувачки функции во компаниите во кои има удел, а воедно ја продаде компанијата ЕДС. Потенцираше дека поради сензитивноста на јавноста, која се создаде во изминатите 10 години, за време на претходната Влада, ќе влијае компаниите во кои има мнозински удел да не ги користат мерките за финансиска поддршка на државата.   

„Моите партнери во компанијата Каст Инвест, каде што поседувам 16% од капиталот, пројавија разбирање и се согласија, и покрај тоа што нема законски пречки, да се откажат од грантот кој фирмата го доби од Фондот за иновации и технолошки развој, за реализација на нов инвестициски проект. Воедно и партнерите од компанијата Брако, се согласни дека нема да аплицираат за исплата на финансиска поддршка согласно Законот, иако фирмата ги задоволува критериумите“, појасни Анѓушев и додаде дека на некој начин компаниите во кои тој има удел иако ги исполнуваат сите законски критериуми, поради неговата функција во Владата ќе бидат дискриминирани во однос на останатите компании.

Вицепремиерот Анѓушев потенцираше дека ниту помислил, ниту влијаел на одлуката некоја од компаниите да добие државна поддршка и ја поздрави најавата на Основното јавно обвинителство да покрене постапка по допрен глас.

Претседателот на Владата на Република Македонија Зоран Заев, веднаш после лидерската средба пред претставниците на медиумите и за јавноста на Република Македонија ја даде следната изјава која ви ја пренесуваме во целост:

Почитувани граѓани,

Македонија е одлучна за својата иднина во НАТО и ЕУ и никој не може да ѝ застане на патот.

Јас знам дека сте уморни од политички кризи, од препукување меѓу партиите, знам дека ви е доста од поделби и омрази. Знам дека искрено сакате барем еднаш да нѐ видите сите заедно да работиме за подобро утре за сегашните и идни генерации.

За жал, Христијан Мицкоски не успеа да го препознaе моментот. Наместо да се качи на возот кој брза кон ЕУ и НАТО, тој избра да остане на мрачната страна на историјата.

Денес ги извадивме работите на виделина. После третата лидерска средба сѐ стана јасно. Треба на сите да им е јасно, Христијан Мицкоски срамно лаже кога тврди дека на ова раководство на ВМРО ДПМНЕ му биле важни изборот на ДИК со 2/3 мнозинство, техничката влада за следните избори или законот за финансирање на политичките партии.

Христијан Мицкоски лаже дека сака Македонија да стане дел од ЕУ и НАТО, лаже дека сака правна држава, лаже дека се бори за чесен референдум.

Почитувани граѓани,

Мицкоски денес се обиде да ги прикрие своите вистински намери. Откако виде дека не постои ниту минимум шанса да се согласиме воопшто да разговараме за директна или индиректна амнестија, денес беше принуден декларативно да се откаже од неговата срамна цел по секоја цена да издејствува спас за неговите ментори и колеги.

Меѓутоа, Христијан Мицкоски денес разговараше без намера да се договори. Неговата единствена цел денес беше ако веќе нема амнестија тогаш нема да има ниту договор.

Јавноста мора да знае. Христијан Мицкоски денес доби избор на ДИК по услови кои тој ги бараше. Доби Закон за финансирање на политички партии со неговите предлози вклучени во текстот, доби и техничка влада по пржинскиот модел пред секои избори.

Сето ова го добиваше во пакет, со единствениот услов кој требаше јавно да го исполни. Да ги повика гласачите и поддржувачите на ВМРО ДПМНЕ да излезат на претстојниот референдум и да гласаат по сопствено убедување.

Христијан Мицкоски одби да се откаже од својата намера со бојкот да ги уништи ЕУ и НАТО перспективите на граѓаните. Што и да зборува понатаму на сите им е јасно која е неговата вистинска цел, а тоа е Македонија да не успее!

Нам совеста ни е чиста! Пруживме рака и до крај се обидовме да го убедиме раководството на ВМРО ДПМНЕ дека во овие историски моменти треба бидеме заедно! Обединети во остварувањето на стратешките определби на нашите граѓани. 

Партијата која една деценија се крсти во референдум како нивна програмска определба, денес неодговорно избега!

Значи, Мицкоски вели граѓаните се со него, а не сака чесно да им даде избор. Мицкоски вели сака во ЕУ и НАТО, а не сака да поддржи ниту еден чекор кон таа цел.

Јас да ви кажам: Мицковски не знае што сака.

Ја користам приликата да им се обратам и на сите чесни членови на ВМРО ДПМНЕ. Вам вратата ви е отворена, исто како што е отворена вратата за успех на цела Македонија и за успех на сите граѓани. Направете го вистинскиот избор. Татковината ќе ја биде. Македонија ќе стане членка на ЕУ и НАТО, а македонскиот народ вечно ќе биде македонски народ и вечно ќе зборува македонски јазик.

Сакам јасно и прецизно да порачам! Јас, Зоран Заев и сите ние кои сме рамо до рамо заедно на овој пат, нема да дозволиме актуелното раководство на опозицијата да ја држи и понатаму Македонија во заложништво!

Ние сме за напредна, просперитетна и Европска Македонија. Ние, огромното мнозинство за ЕУ и НАТО сме овде, а оние другите избраа да останат осамени и заглавени во своето црно минато.

Ова беше уште една можност за Мицкоски и за ова раководство на ВМРО ДПМНЕ да застане зад македонските национални интереси. Од сега па натаму нека им суди историјата за нивните срамни дејствија.

Јавноста нека биде спокојна. Тргнуваме силно и никој не може да нѐ сопре. Како никогаш порано, одлучни и решителни, Македонија да успее! И ќе успее!

Ќе има и Државна изборна комисија, ќе има и референдум и ќе победи волјата на граѓаните. Бидете сигурни во тоа.

Коалицијата која е за иднината на Македонија во ЕУ и НАТО ве уверува во тоа!

Претседателот на Владата на Република Македонија Зоран Заев, во име на лидерите на четирите политички партии што денеска учествуваат на лидерската средба, за претставниците на медиумите и за јавноста, ја даде следната изјава за досегашниот тек на разговорите, која ви ја пренесуваме во целост:

За овие три лидерски средби требаше нерви, трпение и многу мудрост. Јавноста треба да знае. Пруживме рака и покажавме разбирање за многу прашања, но почитувајќи го нашиот неприкосновен принцип.

Уште пред потпишувањето на договорот со Грција му ги прифативме сите услови на Христијан Мицкоски за изборот на ДИК. Уште пред лидерските средби работните групи на СДСМ и ВМРО-ДПМНЕ го усогласија текстот на новиот предлог закон за финансирање на политичките партии со вклучени предлози на опозицијата.

Денес, го прифативме и барањето на ВМРО-ДПМНЕ да се направат законски измени кои ќе овозможат техничка влада да ги спроведува секои парламентарни избори, со формат идентичен на пржинскиот.

Согласно тоа, се договоривме денеска да заврши лидерската средба, да нема одложување. Како ќе се договориме зависи од сите нас внатре. Но, овде завршивме една фаза, ја споделуваме со граѓаните, и се враќаме на прашањето за референдумот.

Ќе разговараме за референдумското прашање, за карактерот на референдумот и за датумот на одржување. Ова го правиме како владеачко мнозинство да покажеме доблест, државтворност, заради важноста на целиот овој процес и продолжуваме понатаму.

Македонија ќе биде членка на НАТО и на ЕУ.

Продолжуваат процесите, штом ќе завршиме веднаш ќе дадеме изјави и одговори на сите ваши прашања.

На покана на првиот заменик премиер и министер за надворешни работи на Република Косово, Беџет Пацоли, министерот за надворешни работи на Република Македонија, Никола Димитров, денес и утре, престојува во официјална посета на Република Косово.

За време на престојот во Приштина, министерот Димитров беше примен и од претседателот на Собранието на Република Косово, Кадри Весели, од претседателот на Владата на Република Косово, Рамуш Харадинај, а оствари средба и со заменикот премиер, Енвер Хоџај.

Во разговорите, министрите Димитров и Пацоли изразија задоволство од развојот на односите и соработката меѓу Република Македонија и Република Косово, кои ги врзува и заедничка перспектива во рамки на европските интеграции. Беше потврдена посветеноста кон градењето добрососедски односи, како заеднички придонес кон стабилноста и просперитетот на регионот и неговата европска и евро-атлантска перспектива.

Посетата беше искористена и за размена на мислења и разгледување на можностите за унапредување на билатералната соработка, вклучително инфраструктурното поврзување во делот на енергијата и транспортот, трговската размена, културата, како и во останатите области од заеднички интерест.

На сите средби, МНР Димитров го покрена прашањето околу воведувањето на даночна стапка за увоз на земјоделски производи од страна на Република Косово нагласувајќи дека оваа мерка ќе има негативно влијание врз македонскиот извоз. Министерот Димитров побара од косовската страна повторно да ја разгледа оваа одлука, во однос на Република Македонија.

Исто така, беше разгледана можноста за одржување на првата Заедничка седница на Влади до крајот на оваа година, на која се очекува да бидат потпишани повеќе билатерални договори.

Заменик Претседателот на Владата задолжен за европски прашања, Бујар Османи денеска заедно со Министерот за животна средина и просторно планирање, Садула Дураки ја посетија општина Дебар.

Во рамки на денешната посета на општина Дебар тие остварија средба со градоначалникот на општината Ружди Љата, во рамките на која тие разговараа за тековните проекти кои се реализираат во општина Дебар, за идните активности кои се планираат во истата, а беа разменети мислења и во врска со започнувањето на нови проекти кои би се финасирале од страна на ИПА спрема потребите на општината.

Вицепремиерот Османи изјави дека како главен преговарач за скрининг процесот со ЕУ токму денеска од Дебар го почнал карванот за европеизација на државата и општеството.

„Ова е моја прва теренска активност по назначувањето од страна на Владата за главен политички преговарач и карванот за европеизација на државата и општеството, го почнувам токму од Дебар. Тука видов дека има капацитет, капацитет има и во Владата и подготвени сме енергијата која се ослободи по добивањето покана за членство во НАТО целосно да ја насочиме кон остварувањето на обврските. Сметам дека нема да остави индиферентен никого и ќе бидеме дел од таа консензуална желба на граѓаните да бидеме дел од ЕУ и НАТО, рече Османи.

По средбата во просторите на општината, владините претставници и градоначалникот извршија увид на новоизградените инфраструктурни проекти во Дебар.