Министерот за надворешни работи, Никола Димитров, на 13 и 14 јуни 2018 година, престојуваше во работна посета на Сојузна Република Германија.

Mинистерот Димитров оствари средба со неговиот домаќин, министерот за надворешни работи на СР Германија, Хајко Мас, на која се разговараше за последните случувања во врска со Договорот со Грција за надминување на разликата околу името, како и за интензивирање на процесот на европската и евро-атлантската перспектива на Република Македонија.

За време на посетата МНР Димитров се сретна и со државниот министер за Европа, Михаел Рот, советникот за надворешна политика на германската канцеларка, Јан Хекер и пратеникот и претседател на пратеничката група за ЈИЕ, Јосип Јуратовиќ.


Интегрално го пренесуваме говорот од прес-конференцијата на МНР, Никола Димитров:

Почитувани граѓани, почитувани медиуми, драг Хајко,

Ми претставува голема чест и привилегија што имам прилика лично да те запознаам, ние разговаравме по телефон претходно, меѓутоа (н.з. ова е) прва лична средба.

Многу сме ѝ благодарни на Германија за поддршката, за нас Германија е исклучително важна земја, нашиот прв трговски партнер. Земја во којашто гледаме еден столб на Европа, базирана на принципи, на свет  каде што владее меѓународното право и меѓународните правила, исто така базирани принципи.

Македонија живее историски денови, недели и месеци. На добар пат сме да затвориме еден спор, којшто беше како камен и ни’ го отежнуваше прогресот, и нѐ заклучи во чекалната каде што поминавме доста многу години. Македонија е земја кандидат за членство во ЕУ од 2005 год. Оваа година добивме 9-та препорака од Европската комисија дека сме спремни да започнеме (н.з. со преговорите). Ова чекање создаде и кризи, меѓутоа, како што велат „никогаш немој да пропушташ добра криза“, научивме и добри лекции.

Македонија денес се бори за истата Европа којашто вие во Германија ја живеете. Сакаме да немаме спорови со соседите, сакаме да имаме независни судии, сакаме да имаме слободни медиуми, сакаме да имаме одговорни политичари.

Ние сме генерација што мора да ја заврши работата, што мора да го затвори - не други сили, туку самите ние (н.з. да го затвориме) македонското прашање, да нема веќе прашалници кои сме, да нема прашалници дека зборуваме македонски јазик и да ја отвориме перспективата и иднината за следната генерација. Ќе ја завршиме нашата задача и ова го правиме без никакви домашни политички калкулации. Ова го правиме мислејќи каква Македонија сакаме за 5, за 10 или за 15 години од денес.

Преземено од DW на македонски јазик

Имаме историска шанса да затвориме прашање во време кога нема многу шанси за успех, не само во Европа, туку и во светот; и мислам дека за сите ќе биде добро: и за Македонија и за Грција и за Балканот и за Европа и за светот - ова прашање да се затвори. Многу е важно, бидејќи нашите главни мотиви, покрај пријателството со Грција, се да ги започнеме преговорите со Европската унија и да се зачлениме во НАТО Алијансата. Многу е важно, и благодарен сум за поддршката на Хајко, на Германија воопшто, Македонија да добие политичка одлука од Европскиот совет кон крајот на овој месец, во јуни, за почеток на преговори и да добие покана за членство во НАТО, бидејќи само така компромисот што го постигнавме ќе биде win win за двете страни.

Ние сме денес во свет којшто има многу проблеми и мислам дека немаме лукуз да не ги користиме шансите кога се создадени, за решавање на проблеми. После решавањето на овој спор, Македонија веќе нема да има ниту едно отворено прашање со ниту еден сосед. Ние немаме гранични спорови. Постигнавме Договор за пријателство минатата година со нашиот источен сосед, со Република Бугарија. Кон крајот на оваа година, доколку се’ оди според планот, а ќе направиме се’ да оди според планот - ние ќе бидеме без билатерални спорови и ќе бидеме земја која ќе шири таков дух, такво пријателство и ќе бидеме од помош на сите оние коишто сѐ уште имаат спорови во нашиот регион, на Балканот.

Одговор на МНР Никола Ддимитров: Нашата одговорност беше да создадеме шанса и да понудиме можност на нашите граѓани да се изјаснат каква иднина сакаат. Договорот предвидува референдумско изјаснување што би требало да се случи некаде оваа есен, можеби до крајот на септември или почетокот на октомври оваа година. Мислам дека најодговорно и за Владата, којашто е спремна да се соочи со својата политичка одговорност, создавајќи ја шансата граѓаните да се изјаснат, и Парламентот и Претседателот не смеат да застанат на патот и да ја заменат волјата на граѓаните. Историските победи и историските успеси никогаш не се лесни. Наше е да правиме сѐ што можеме секој ден. Јас веднаш по посетата на Берлин се враќам во Скопје, имаме владина седница на којашто ќе се разгледува текстот на Договорот. Се разбира дека ќе има и различни мислења, меѓутоа политички одговорно е да го оставиме изборот на граѓаните и притоа да им кажеме зошто мислиме дека ова е добра работа за нашата земја. Убеден сум дека граѓаните ќе го направат правилниот избор.

Делегација на Владата на Република Македонија предводена од заменик на претседателот на Владата задолжен за економски прашања, Кочо Анѓушев, денеска оствари работен ручек со претставници на големи германски компании, бизнисмени и стопански комори. На работниот ручек присуствуваа и министрите за финансии, за економија и за здравство, Драган Тевдовски, Крешник Бектеши и д-р Венко Филипче, како и Александар Младеновски, директор на ДТИРЗ.

Министрите од Владата на Република Македонија на компаниите им ги презентираа можностите коишто ги нуди Македонија за потенцијалните инвеститори од Германија како и Планот за економски раст - новата транспарентна програма која силно ги поддржува компаниите кои сакаат да инвестираат во земјава.

Дел од компаниите веќе инвестираат во Македонија, а дел, како што рекоа министрите, размислуваат и се пред одлука да стартуваат свој бизнис во земјата.

„Инвеститорите покажаа интерес за 3 сегменти: државната помош, којашто оваа Влада ја направи транспарентна и за која Собранието го донесе Закон за финансиска поддршка на инвестициите . Во исто време ги интересираше и стабилноста на државата и владеењето на правото и како ќе најдат млади, паметни и интелегентни луѓе коишто ќе работат во нивните компании“, истакна вицепремиерот Кочо Анѓушев.

Министрите ги уверија компаниите дека во сите сегменти постигнуваме резултати и дека Македонија е посакувана земја за странските инвеститори.

„Ги поканивме компаниите да дојдат и да вложуваат во Македонија. Им ги претставивме нашите можности за инвестирање и многу сме задоволни од средбите со нив. Вакви работни посети планираме и во други држави“, потенцираше министерот за економија, Крешник Бектеши.

Потенцирајќи дека посетата на економските министри овде во Франкфурт е поради големиот интерес на германските компании својот капитал да го насочат кон Македонија, министерот за финансии Драган Тевдовски, рече дека тоа е така бидејќи Република Македонија се движи во вистинска, позитивна насока и има одлична фискална позиција.

„Разговаравме на различни теми, од макроекономската стабилност, фискалната позиција и можности за водење бизнис, транспарентноста којашто ја правиме и којашто е препознаена од ЕУ, ММФ и Светска Банка. Инвеститорите особено се интересираа за понудата на работна сила којашто ја има во Македонија. Истакнавме дека има можност компаниите да влезат во нашата земја што ќе придонесе од една страна, за развој на економијата и ќе се обезбедат пристојни плати“, додаде министерот за финансии Тевдовски.

Економските министри на компаниите од Германија, исто така им укажаа дека Македонија со чекорите коишто ги презема се етаблираше како стабилна земја, отворена кон соседите и кон светот, земја којашто се гледа во ЕУ и во НАТО.

Во текот на денешниот ден, министрите остварија и кратка средба со претставници на Дојче Банк.

Инаку, во моментов околу 200 компании со германски капитал работат во Македонија и во нив има над 20 илјади вработени. Во периодот од јануари до март оваа година, извозот од Македонија во Германија изнесува 643.2 милиони евра и претставува зголемување за 16% во споредба со истиот период минатата година.

 

 

Владата на Република Македонија со жалење констатира дека Претседателот на Република Македонија, Ѓорге Иванов, во своето обраќање до јавноста не успеа да се издигне над сопствената немоќ и да ја види перспективата што се отвора пред нашата држава со договорот што овие денови го финализираа и го договорија владите на Република Македонија и на Република Грција.

Претседателот Иванов нема чувство на одговорност и презема дејства на недозволива манипулација, со што им штети на државата, на граѓаните и директно дејствува против јакнењето на македонскиот идентитет.

Иванов не се залага за решенија и не работи за интеграција на Македонија во НАТО и ЕУ, а тоа за граѓаните се приоритети од највисок национален интерес.

Наместо да ја кочи македонската иднина и да ја турка нашата земја во изолација, најдобро е Иванов сам себеси да се изолира од политичката сцена.

Свои сме на своето и тоа конечно e признаено од сите наши соседи, од Република Грција и од меѓународната заедница. Со овој договор се потврдува и зајакнува македонскиот етнички и културен идентитет, еднаш засекогаш.

Со изградбата на колекторите на левиот и десниот брег на реката Вардар, Градот Скопје успешно ќе ги собира урбаните отпадни води со што санитарно-хигиенските услови во централното градско подрачје ќе бидат значително подобрени. Изградбата на овој колекторски систем е предуслов за изградба на главната пречистителна станица за отпадни води за градот Скопје, чија градба ќе започне во 2020 година – изјави министерот за животна средина и просторно планирање Садула Дураки на настанот по повод офцијалното одбележување на почетокот на градежните работи на ИПА 2 проектот „Подобрување на инфраструктурата за собирање на отпадните води во градот Скопје“.

Проектниот договор предвидува изградба на колектор на десниот брег на реката Вардар во должина од 3,4 км и тоа од булевар „Србија“ до Железничкиот мост при што во него ќе се слеваат отпадните води од постојната пумпна станица „Горно Лисиче“, потоа изградба на колектор на левиот брег на реката Вардар во должина од 4,5 км од точката на моменталното празнење на постојната канализациска мрежа до железничката пруга и изградба на колектор од пумпната станица „Макошпед“ до поврзувањето со новиот главен колектор на левиот брег на реката Вардар.

Успешното имплементирање на овој инфраструктурен ИПА 2 проект ќе безбеди зголемување на обемот на собраните отпадни води кои ќе бидат префрлени на идната планирана пречистителна станица за отпадни води и следствено, ќе ја зголемат ефикасноста на функционирањето на истата.

Инвестицијата е финансирана со средства на Европската Унија во износ од над 9 милиони евра и ко-финансирана од Буџетот на Р. Македонија во висина од 15%, а предвидено е да заврши во февруари 2020 година.

На настанот присуствуваа и евроамбасадорот Жбогар и градоначалникот на Скопје Шилегов.

Прес-конференција на портпаролите на Владата на Република Македонија, Миле Бошњаковски и Муамет Хоџа по завршувањето на 72-рата редовна седница на Влада.

Премиерот Зоран Заев на средбата со Христијан Мицкоски му го достави договорот за решение за спорот којшто Република Грција го имаше со Република Македонија.

Премиерот Заев на кусата средба потенцираше дека како одговорни политичари, во дадениот момент имаме обврска да им овозможиме на граѓаните на Република Македонија да го остварат  деморкатското право и да добијат шанса да го дадат своето мислење во однос на договорот. 

Повеќе од 25 години, колку што е активен овој спор, граѓаните немаа прилика да видат ниту решение, ниту да се изјаснат.  

Овој договор ја гарантира иднината на Македонија како членка на НАТО и ЕУ, истакна премиерот Заев, јасно посочувајќи му на Мицковски дека и тие како опозиција треба да  овозможат фер шанса последниот збор да го кажат граѓаните на референдум. 

Референдумот е консензус меѓу ВМРО-ДМПНЕ и СДСМ како најголеми политички субјекти во Македонија со години наназад, рече Заев, и сите заедно треба да се заложиме граѓаните сами да одлучат за својата иднина и никој нема право да ги спречува  во тоа. 

Премиерот Заев ја упати пораката дека  политичките субјекти треба да се обединат околу идејата за референдум и заради националните приоритети на Република Македонија за членство во НАТО и ЕУ. 

Денеска во Владата на на Република на Македонија се одржа втората седница на Комитетот за земјоделство и безбедност на храна, со кој што претседаваше заменик претседателот на Комитетот, односно министерот за земјоделство,шумарство и водостопанство, Љупчо Николовски. На седницата присуствуваа советничката за земјоделство на ПВРМ, Ленче Николовска, директорот на Агенцијата за храна и ветеринарство, Зоран Атанасов, директорот на Агенцијата за финансиска поддршка во земјоделството и руралниот развој Николче Бабовски, како и останатите директори на институциите од областа на земјоделство и претстваници од МЗШВ.

На дневен ред на денешната седница се дискутираше за неколку  актуелни точки од областа на земјоделството: Состојбите во житопроизводството и мерки за надминување на проблемите, Состојбите со производството на праски и превземени  активности имерки за надминување на можни проблеми со пласман на праските, и Зголемување на капацитетите на Агенцијата за финансиска поддршка во земјоделството и руралниот развој  и динамика на реализацијана програмите.

Во однос на првата точка за состојбите во житопроизводството и мерките за надминување на проблемите, беше констатирано дека оваа година очекува поголемо производство од минатата година или околу 300.000 тони пченица, со просечени приноси од 3.000 до 4.000 тони по хектар. Претстваниците од МЗШВ, посочија дека изминатиов период се одржани повеќе состаноци со земјоделците производители на пченица и со мленичарите откупувачи, се со цел да се постигне договор од заеднички интерес. Комитетот донесе заклучок, Агенцијата за стокови од следната недела да ја започне постапката за објавување на јавен оглас за откуп на домашна пченица за потребите на резервите, во количина од 12.000 домашна пченица. На овој начин ќе се мотивираат мелничарите да откупуваат домашна пченица која што потоа ќе ја продадат на Агенцијата за стокови резерви, а воедно ќе се влијае и да се постигне солидна откупна цена на домашното жито. Воедно, за прв пат ќе се пуштат и помали лотови на кои што ќже можат да конкурираат и земјоделците.Овој предлог минатата недела беше прифатен од земјоделците и од мелничарите.

Комитетот го отвори и прашањето за моменталниот откуп на праски. Беше истакнато дека во најголемиот производтсвен регион за праски, Росоман, годинава насади со праски има на околу 5.000 хектари, од кои се очекува производство од 12.000 до 13.000 тони праски. Моменталната откупна цена на квалитететните праски е 20-23 денари за килограм, а праските  за преработувачката индустрија и чиј род се проценува на 500 тони, цената е 2 денари за килограм. Министерот Николовски, потенцираше дека субвенциите за предадено овошје во преработувачки капацитетите оваа година се зголемени од 2 на 3 денари за килограм предадено овошје која што им стои на располагање на земјоделците кои имаат праски за предавање во преработувачки капацитетите. Исто така, министерот Николовски потенцираше дека Владата преку МЗШВ интензивно работи на проширување на листата на нови пазар за пласман не само на праските туку и на останатите земјоделски производи.

Во таа насока, беше потенцирано дека се продолжуваат активностите за зголемување на извозот на земјоделски производи, вклучително и праските во Руската федерација, како наш традиционален пазар. Тимови од МШЗВ и од Македонско-руската комора, веќе имаат одржано неколку состаноци со одговорните на руската служба „Росејхоснадзор“, со цел отсранување на сите потенцијални бариери и зголемување на извозот од Македонија. При тоа се работи на проект преку кој што македонските стопанственици ќе можат да имаат директна продажба на производите пред руските ланци на маркети што би се спроведувало преку Македонскиот дом во Русија, а со цел избегнување на посредници кои во моментов ја диригираат и условуваат цената и количините на производите, на штета на производителите. Се констатираше дека најголем проблем во моментов е што нема соодветна база на податоци за количини, цени и динамика во сезона на берба на производите, за да може да се понудат на странските пазари.

Дополнително, министерот Николовски потенцираше дека уште пред неколку месеци е испратен допис до сите конзуларни канцеларии и до амбасадорите, да помогнат во делот на отворањето на странските пазари за македонските земјоделски производи. Од друга страна, информираше дека МЗШВ има изготвено листа од околу 50 заинтересирани фирми за инвестиции, од кои дел се заинтересирани за изградба откупно-дистрибутивни центри, за што Работните групи во МЗШВ веќе имаат направено мапирање на региони каде би се граделе истите.

Во однос на точката за зголемување на капацитетите на Агенцијата за финансиска поддршка во земјоделството и руралниот развој  и динамика на реализацијана програмите, директорот на АФПЗР посочи дека со новите вработувања се работи на зајанување на капацитетите. Истоа така потенцираше дека досега од привот јавен повик за ИПАРД 2 се склучени 138 договори за мерката 1 и 3, односно Инвестиции во материјални средства на земјоделските стопанства и Инвестиции во материјалните средства за преработка и маркетинг на земјоделските и рибните производи. Оаа бројка се очекува да се зголеми во следниот период. Во делот на исплата на субвенциите, се нагласи дека истата се одвива континуирано, со висока реализација Програмата за директни плаќања од околу 95 отсто.

Во 14:30 часот ќе се оствари средба помеѓу Претседателот на Владата на Република Македонија, Зоран Заев и претседателот на ВМРО-ДПМНЕ, Христијан Мицкоски. По завршувањето на средбата ќе биде испорачано соопштение до јавноста.

Делегација на Владата на Република Македонија составена од министрите за здравство, за финансии и за економија, д-р Венко Филипче, Драган Тевдовски и Крешник Бектеши, а предводена од Заменик претседателот на Владата, д-р Кочо Анѓушев, денеска оствари средба со тим од доктори и професори од Универзитетската клиника Јохан Волфганг Гете, во Франкфурт, Германија. 

На средбата, министрите и професорите од клиниката разговараа за можностите за продлабочување на соработката која и сега се остварува, особено во областа на кардиохирургијата и кардиологијата. 

Потенцирајќи дека голем дел од пациентите од Република Македонија за посложени интервенции сѐ уште се препраќаат на лекување во странство, министерот за здравство д-р Венко Филипче, истакна дека на тој начин и пациентите непотребно се измачуваат, а од друга страна докторите не учат нови и модерни кардиохируршки техники. 

 

 

„Со официјализирање на соработката со Универзитетската клиника Јохан Волфганг Гете, за пациентите ќе овозможиме неопходните кардиохируршки интервенции да ги добиваат на клиниката за кардиохирургија во Скопје. Процедурите ќе ги изведуваат нашите доктори заедно со кардиохирурзите од Универзитетската клиника во Франкфурт. На тој начин, специјалистите - кардиохирурзи ќе се дообучуваат и во Македонија ќе добиеме врвни експерти од оваа област“, истакна министерот за здравство, Филипче. 

Исто така, на денешната средба, се разгледуваше и можноста доктори од здравствените установи во Македонија повремено да доаѓаат на краткорочни и долгорочни доедукации на клиниката во Франкфурт, Германија. 

Професорот Томас Валтер, кој 25 години работи како кардиохирург и е директор на одделот за кардиохирургија во болницата во Франкфурт, истакна дека особено е значајна соработката меѓу докторите од различни земји. Тоа, како што рече, е одлична можност да се разменат искуства и идеи во одредена област. Придобивката, истакна тој, секако е најголема за пациентите. 

„Мора да работиме заедно, а не самостојно. Секоја интервенција бара тим од лекари. А тимот може да биде составен од лекари од нашата клиника и вашата клиника за кардиохирургија во Скопје“, додаде професорот Валтер.

На средбата, докторите на министрите во Владата на Република Македонија им презентираа и дел од современите интервенции кои се изведуваат на Универзитетската клиника во Франкфурт. 

Инаку, првата кардиохируршка интервенција воопшто е направена токму на Универзитетската клиника Јохан Волфганг Гете, во Франкфурт. Ја извел д-р Лудвиг Рен во 1896-тата година.

Клиниката при Универзитетот Јохан Волфганг Гете во Франкфурт, Германија се состои од 32 специјализирани клиники од неколку области: анестезиологија и интензивна нега, кардиохирургија и кардиологија, офталмологија, итн. Научно истражувачката дејност ја спроведуваат 20 институти. Универзитетската клиника во Франкфурт брои околу 4 илјади вработени.

 

 

Министерот за информатичко општество и администрација, Дамјан Манчевски, министерката за одбрана, Радмила Шекеринска и министерот за внатрешни работи, Оливер Спасовски, денеска ја презентираа работна верзија на Националната стратегија за сајбер безбедност на Република Македонија. 

На документот се работеше изминатите неколку месеци, во рамки на Работната група за изработка на стратешки документи од областа на сајбер безбедноста, а стратегијата во моментот е објавена и достапна за коментари и предлози од сите засегнати страни.

Како што истакна министерот Манчевски, “сајбер-безбедноста не смееме да ја гледаме само како нужно зло – таа во исто време е и поволна прилика, шанса за развој и напредување. Интернетот и понатаму останува богато поле за иновации, а глобалниот пазар за сајбер безбедност расте – и тоа со огромна брзина. Ова се индустриите на иднината, кои на Македонија ќе и помогнат да држи чекор со глобалните трендови и да постигне стабилен пораст на економијата. Генерално, сакаме да ја развиеме Македонија како следна хит ИКТ дестинација. На таков начин ќе се отворат нови компании, со нови работни места, кои ќе нудат достоинствена плата.”

Министерката Шекеринска се осврна на Стратегијата од аспект на одбраната и колку е неопходно да се има мултидисциплинарен пристап кој е во корелација со прописите на Европската Унија и НАТО. Таа истакна дека овој документ, Национална стратегија за сајбер безбедност, е од исклучителна важност за граѓаните и институциите на оваа држава кои што треба да ја гарантираат нивната безбедност.

 - Република Македонија е решена да стане членка на НАТО алијансата час поскоро. Убедени сме дека на Самитот овој јули, Македонија ќе ја добие долго очекуваната, долго заслужената покана за членство во НАТО. Тоа значи дека нашите обврски од јули месец, ќе станат само поголеми и ќе станат навистина обврзувачки. Токму овој период, периодот од покана до членство е можеби најризичниот во поглед на сајбер заканите. И во овој период Македонија ќе треба да ја покаже силата и компетенцијата на своите институции. Во тој контекст во рамките на стратегијата за којашто денеска дискутираме, предвидено е да се обезбеди развој на сајбер одбраната како неделив дел од сајбер безбедноста. Предвиден е развој на единици со сајбер капацитети во различни делови во Владата и Армијата и основна рамка за координација и комуникација при одговор на сајбер напади на воените системи, но исто така и на критичната инфраструктура – рече Шекеринска.

Министерството за внатрешни работи во рамките на своите надлежности активно превзема мерки за превенција, заштита и сузбивање на компјутерскиот криминал и злоупотребите во информатичката сферата, иако не секогаш и доволно, бидејќи за ефикасна првенција и заштита во сајбер просторот ни е потребен холистичен и мултидисциплинарен пристап.

„Работна верзија на Стратегијата за сајбер безбедност, претставува чекор понатаму во реално воспоставување на еден таков посакуван холистичен и мултидисциплинарен пристап. Практично овој документ по својата содржина, насоки и цели е од суштинско значење за Република Македонија во делот на сето она што значи сајбер безбедност. Читајќи ја визијата на Стратегијата за сајбер безбедност точно ќе го видиме концептот на сајбер безбедност кој го подржуваме посакуваме. Визијата е Република Македонија да има сигурно, безбедно, доверливо и отпорно дигитално опкружување, поддржано од квалитетно изградени капацитети, високо квалификувани експерти, изградено ниво на доверба и интензивна национална и меѓународна соработка во областа на сајбер безбедноста“, истакна министерот Спасовски.

На јавната расправа беа презентирани главните цели на Стратегијата, по што се отвори дискусија со присутната експертска јавност. Присутните изразија поддршка за оваа иницијатива, земајќи активно учество во јавната расправа.