Претседателот на Владата на Република Македонија Зоран Заев денеска ја прими делегацијата на НАТО предводена од Џејмс Мекеј, Директор на Евро-атлантско и глобално партнерство во одделот за политички и безбедносни прашања во штабот на НАТО во Брисел.

Премиерот Заев, ја прими делегацијата на НАТО заедно со Работниот комитет за интеграцијата на Република Македонија во НАТО со кој претседава Претседателот на Владата на РМ, во чиј состав се и министерката за одбрана Радмила Шекеринска, министерот на надворешни работи Никола Димитров (на оваа средба претставуван од државниот секретар во МНР, Виктор Димовски), министерот за внатрешни работи Оливер Спасовски, министерот за финансии Драган Тевдовски, министерката за правда Рената Дескоска, министерот за јавна администрација и информатичко општество Дамјан Манчевски, националниот координатор на Република Македонија за НАТО Стево Пендаровски, и советникот за национална безбедност во кабинетот на премиерот Зоран Верушевски.

Работниот комитет за интеграција на Република Македонија во НАТО не беше во функција од 2008 година, а сега е активиран со полн капацитет. 

Премиерот Заев се осврна на актуелната политичка ситуација во земјата и ја презентираше подготвеноста на земјата со целосна посветеност и подготвеност да го започне пристапниот процес за членство во НАТО откако на НАТО самитот во Брисел земјата ја доби поканата.

Директорот на Евро-атлантско и глобално партнерство во одделот за политички и безбедносни прашања во штабот на НАТО Мекеј истакна дека неговата посета на нашата земја има за цел да испрати јасна и силна порака дека алијансата го означува стартот на пристапните разговори и дека во наредниот период на секои две до три недели, работни групи на НАТО во различен состав ќе ја посетуваат земјата и со националните тимови ќе ги усогласуваат неопходните политики и стандарди до конечното официјализирање на членството на земјата во НАТО.

Шеф на тимот на НАТО за пристапните разговори со нашата земја ќе биде Помошникот Генерален Секретар на НАТО, амбасадорот Алехандро Алваргонзалес, а една од главните причини за разговорите на ова високо ниво е желбата да биде организиран брз и ефикасен пристапен процес, соодветно на утврдената временска рамка.

Претседателот на Владата на РМ Зоран Заев истакна дека целиот овој процес после добивањето на поканата во Брисел е дополнителна мотивација за институциите, за сите во јавната администрација и за граѓаните на земјата, за придонес во оваа фаза која не води поблиску до гарантираната безбедност и сигурност во друштвото на земјите членки и сојузници во НАТО, што отвора и перспективи за дополнителен економски развој на нашата земја.

Видео од заедничката прес-конференција на Националниот координатор на Република Македонија за НАТО, Стево Пендаровски и Директорот за Европски и глобални партнерства на НАТО, Џејмс Мекеј. 

Справување со проблемот сиромаштија, деинституционализацијата и растот на платите во Македонија, беа само дел од темите на кои министерката за труд и социјална политика Мила Царовска, зборуваше на вчерашното интервју за „Макфакс“.

Зборувајќи за немилите настани во домот „25 Мај“ и за загинатите дечиња во Велес, Царовска рече дека ова се драстични примери што излегуваат во јавност,  но и дека секојдневно има многу случаи, зашто системот не реагира навреме, бидејќи нема превенција, а центрите беа оставени да се распаѓаат. 

„Системот за социјална заштита многу години беше употребуван за да ги злоупотребува граѓаните што се во ризик. Нашата намера не е да носиме популистички мерки и да речеме дека сите граѓани се згрижени. Тоа е невозможно“, рече Царовска.

Според министерката, државата може да го подобри живот на овие граѓани  само со достоинствен приход, квалитетни услуги и нивно активирање на пазарот на трудот. 

Одговарајќи на прашање за Тимјаник министерката Царовска рече дека главна заложба на Владата е да ги трансформира нехуманите големи институции и на тоа забрзано работи цела година. Стратегијата за деинституционализација, вели Царовска, ќе се вика Тимјаник, затоа што Тимјаник е секаде околу нас. 

Во интервјуто министерката посочи дека се подготвува нов закон за работни односи. Работодавачите, синдикатите, министерството и здруженијата на граѓани веќе ја направија првата верзија од законот и тој сè уште се усогласува зашто тоа е трипартитен дијалог кој мора да го има.

Министерката во интервјуто за „Макфакс“ зборуваше и за измените на Законот за заштита и спречување на дискриминација, како и за редефинирањето на центрите за социјална заштита и минималниот адекватен приход. 

Владата на Република Македонија денеска ја одржа својата редовна 81 седница со повеќе точки на дневен ред кои се од интерес на Република Македонија и граѓаните.

Како приоритетни мерки, Владата на Република Македонија на денешната седница донесе одлука да испрати финансиска помош во висина од шест милиони денари до Владата на Република Грција за справување со катастрофалните пожари што овие денови ја зафатија пошироката околина на главниот град Атина. Дополнително, Владата донесе одлука да формира координативно тело кое на дневно ниво ќе ја следи состојбата и ќе координира соодветна хуманитарна помош, што ќе се договори како потреба со надлежните институции во Грција и со градот Атина.

Владата денеска донесе одлука за финансиска помош во иста висина, од шест милиони денари, да биде испратена и до Владата на Јапонија за поддршка во справувањето со последиците од поплавите што неодамна ја погоди оваа земја.

На денешната седница Владата на РМ ги задолжи Министерството за образование и наука, Министерството за труд и социјална политика, Министерството за земјоделство, шумарство и водостопанство, Кабинетот на Заменикот на претседателот на ВРМ задолжен за економски прашања и Министерство за економија, да ги достават до Секретаријатот за европски прашања првите верзии на акциските документи за спроведување на ИПА 2019 Програмата, најдоцна до крајот на септември 2018 година.

Владата на својата седница денеска ја разгледа и информацијата за листата на државни проекти за претстојните повици за Техничка помош и инфраструктурни грантови преку инструментот Инвестициска рамка за Западен Балкан која обединува финансиски средства од повеќе фондови. 

Владата денеска ја разгледа и ја усвои и измената на Предлог-програмата за финансиска поддршка во земјоделството за 2018, заедно со Предлог-уредбата за поблиските критериуми за директни плаќања. Со оваа програма и со новата уредба, кои се предложени заради воведување на нова подмерка - Директни плаќања за откупена пченица од род 2018 од домашно производство, се очекува остварување на договорениот откуп на произведената пченица од род 2018 година и ќе се подобри конкурентноста на домашната мелничка индустрија. 

Владата на Република Македонија ја усвои Информацијата во врска со можните решенија за транспонирање на Регулативата 347/2013 за трансевропска енергетска инфраструктура, и го задолжи  Министерството за транспорт и врски веднаш по усвојувањето на оваа информација да формира работна група со претставници од Кабинетот на заменик претседателот на Владата на Република Македонија, Министерството за транспорт и врски, Министерството за економија, Министерството за финансии и Министерството за животна средина и просторно планирање, која треба да изготви предлог текст на Законот за енергетски инвестициски проекти од стратешки интерес на Република Македонија.

Владата на Република Македонија ја разгледа и усвои Информацијата за вториот Извештај на ГРЕКО за усогласеност на Република Македонија - четврт круг на евалуација - на тема: Превенција на корупцијата кај членовите на Собранието, судиите и јавните обвинители за периодот 2013-2015 година, и го задолжи Шефот на Делегацијата на Република Македонија во ГРЕКО да подготви Акционен план за имплементација на преостанатите препораки од четвртиот круг на евалуација и истиот да го достави до Министерството за правда во рок од 10 дена од усвојувањето на оваа Информација.

Истовремено, Владата на РМ го задолжи Генералниот секретаријат на Владата на Република Македонија да формира Работна група предводена од Шефот на Делегацијата на Република Македонија во ГРЕКО која ќе подготви  Насоки за имплементација на одредбите од „Етичкиот кодекс на членовите на Владата на Република и носителите на јавни функции именувани од Владата на Република Македонија“ согласно барањата од петтиот круг на евалуација на ГРЕКО до 20 септември 2018 година. Владата ги задолжи и Министерството за внатрешни работи и Министерството за информатичко општество и администрација да подготват Насоки за имплементација на одредбите од етичките кодекси кои се во надлежност на овие институции (Кодекс на полициска етика, Кодекс за административни службеници) до 20 септември 2018 година.

На денешната седница е разгледана и усвоена „Информацијата за Национален план за управување со квалитет во јавниот сектор во Република Македонија за периодот 2018-2020 година“. 

Имплементацијата на Националниот план за управување со квалитет во јавниот сектор во Република Македонија за периодот 2018-2020 година ќе изврши големо позитивно влијание врз целокупниот систем на јавна управа и ќе придонесе кон постигнувањето на модерна, ефикасна и професионална администрација и подобри услуги за граѓаните. 

Ваквите иницијативи и модерни практики во примената на меѓународните стандарди за квалитет во управувањето се очекува во иднина да бидат интегрирани во сите владини политики и да станат императив во сите јавни институции.  

Владата ja разгледа и усвои Информацијата за склучување Анекс за изменување и дополнување на  Поединечниот колективен договор за плата, други права по основ на плата и надоместоци на плата, заради зголемување на коефициентите за додаток на плата за работа ноќе и дежурства на  вработените во Јавната установа од областа на здравството за потребите на јавните здравствени установи, универзитетски клиники, Завод и ургентен центар – Скопје.

Предложениот Анекс е во смисла дека примената на Колективниот договор ќе започне од наредниот месец од денот на потпишувањето на Анексот), а Јавната установа средствата ќе ги обезбеди во рамки на сопствениот буџет.

На денешната седница е разгледана и усвоена Предлог-одлуката за прераспределба на средства помеѓу буџетските корисници на централната власт и помеѓу фондовите. Целта на оваа Предлог-одлука е прераспределба на средства помеѓу буџетски корисници за да се обезбедат средства за спроведување на референдум на државно ниво во 2018 година, откако одлуката за референдум ќе биде донесена.

Владата на Република Македонија денеска на својата редовна 81 седница ja усвои Информацијата на Работната група задолжена за испитување на можноста за воведување на алтернативни горива во индустриските капацитети (постројки) во Република Македонија со посебен акцент на РДФ горива, односно горива што се добиваат од отпадот. На седницата е усвоен заклучок Работната група да подготви текст на Меморандум за соработка помеѓу Владата на Република Македонија, компаниите кои се дел од индустрискиот сектор и институции кои позитивно одговориле на барањето за соработка во областа на воведување на РДФ/СРФ гориво во термоенергетските објекти во Република Македонија, и да го достави предлог-текстот на Меморандумот до 15.09.2018 година.
 

Директорот на Фондот за иновации и технолошки развој, Јован Деспотовски, денеска одржа прес-конференција во Владата на Република Македонија, по реакциите во јавноста за неколку компании-апликанти, добитници на средства од првиот повик од Планот за економски раст - трет столб. 

Во интерес на транспарентноста и кредибилитетот на институцијата со која раководи и целиот процес, кој е новина во работењето на Владата, ги повика сите компании што беа објавени на 13.07.2018 година, во рок од 15 дена да достават изјава во која ќе се произнесат дали во сопственичката структура имаат лица носители на јавни функции или пак членови на нивните потесни семејства.

„Ги повикувам сите 79 компании од првиот инвестициски бран, во рок од 15 дена да достават изјава во којашто ќе се изјаснат дали имаат во својата сопственичка структура лице коешто е носител на јавна функција, или член на негово потесно семејство. Фондот за иновации не е истражна агенција, сопственичката структура не е критериум за одлучувањето, меѓутоа во интерес на транспарентноста и кредибилитетот на целиот процес, ги повикувам сите компании самите да се декларираат дали имаат некој кој е носител на јавна функција. За оние компании коишто ќе го декларираат тоа, како директор на Фондот, согласно насоките што ги добивме од премиерот, ќе побарам од Комитетот за одобрување инвестиции, кој е независно тела  повторно да ги разгледа апликациите и да проверат дали апликантот ги исполнува критериумите“, изјави Деспотовски на денешната прес конференција Јован. 

Инаку Деспотовски како директор на Фондот најави и промена во критериумите за аплицирање во иднина.

„Влеговме во постапка за измена на условите за подобност за аплицирање за следниот повик за финансирање на проекти што ќе се случи на есен. Компаниите што во својата сопственичка структура имаат носител на јавна функција или член на негово потесно семејство, ќе треба при аплицирањето тоа јасно да го декларираат“, Деспотовски додаде.

Во однос на заштитните механизми, тој истакна дека договорите за проектните апликации со објавените добитници на финансиска помош сѐ уште не се потпишани и дека не е исплатен ниту денар од државниот буџет. Притоа, откако ќе се потпишат договорите има дополнителен контролен механизам - парите не се доделуваат однапред сите туку се доделуваат квартално, откако мониторинг тимовите ќе се уверат дека самата компанија ја исполнила својата обврска и ги обезбедила своите пари на наменска сметка.

Инаку јавниот повик од Планот за економски раст - трет столб  беше објавен на 27 април и траеше 45 дена. До крајниот рок на 11 јуни, 235 компании поднесоа апликации, а одобрени се вкупно 160, а уште 30 се со условено одобрување. Во првиот инвестициски бран поддржани се 79 компании, со што се предвидува инвестиции од 20 милиони евра, од кои 10,5 милиони евра се средства од Буџетот на Р. Македонија, а 9,5 милиони евра се сопствени средства на компаниите апликанти. Во компаниите ќе бидат ангажирани 460 лица, од кои 85 се нови работни места, а просечната плата изнесува 48 000, 00 денари.
 

Владата на денешната седница на која присуствуваше и претседателот на Владата Зоран Заев, разговараше за зголемените царини за извоз на земјоделски производи во Косово.

Министерот за земјоделство Љупчо Николовски, на денешната прес-конференција информираше дека на новонастанатата ситуација со Косово, деноноќно работат сите министри при Владата на Република Македонија. Николовски истакна дека Владата, заедно со сите министри, се вложува да гради добрососедски односи со сите земји од регионот. Од Владата информираат дека Македонија тргна по евроинтеграцискиот пат од кои бенефит треба да имаат сите граѓани. Косово за Македонија е сериозен трговски партнер, со голем суфицит во нашата трговска размена, токму затоа мора сериозно длабински, темелно да се пристапи на решавање на состојбата.

Министерот за земјоделство Љупчо Николовски, на денешната прес-конференција информираше и дека: Преку низа на средби во Косово за надминување на овој проблем, беше вклучен министерот за надворешни работи Никола Димитров. Вклучен е вицепремиерот за економски прашања Кочо Анѓушев, советниците на претседателот на Владата, и се разговара со сите. Денеска се разговарало и со потпретседателката на Владата задолжена за ЕУ на Косово.

„Јас сум постојано во контакт со мојот колега во Косово, а министерот за економија Крешник Бектеши со министерот за економија на Косово. Мора да имаме трпение. Она што очекуваме, а јас очекувам и денеска во најкраток можен рок, Косово да ја преиспита одлуката. Во моментов се закажува седница на Владата на Косово. Постојано сме во комуникација и сметам дека сите разговори одат во таа насока, а тоа е Одлуката да биде повлечена. Сите нови моменти ги очекуваме во следните неколку часа. Веќе утре, има регионална министерска средба во Белград, Србија од каде едногласно се испраќа пораката за прекршување на ЦЕФТА спогодбата и за потребата оваа одлука веднаш да биде повлечена. Ние како Влада, разговаравме и за мерките кои треба да ги преземеме за заштита на нашето производство“, истакна министерот Љупчо Николовски.

Во моментов имаме активни мерки за доматите, за која земјоделците бараат продолжување на истата. Ги разгледуваме сите опции и можности во делот на штетите кои ги имаат претрпено земјоделците, дали ќе има интервентни мерки во зголемување на нивните износи или во зголемување на субвенциите за површина ќе се знае откако ќе ги добиеме сите податоци и параметри кои производи се загрозени.

Министерот за локална самоуправа Сухејл Фазлиу, заедно со градоначалниците на Охрид и на Поградец, Јован Стојаноски и Едварт Капри, заменикот министер за туризам на Република Албанија Хајрула Чеку и претставникот на Делегацијата на Европската Унија, Никола Бертолини, денеска во Охрид го промовираа проектот Охридско Езеро-Безбедна дестинација за авантуристички туризам.

Проектот во вредност од 415 евра е финансиран преку ИПА Програмата на Европската Унија за прекугранична соработка во висина од 85 насто, а 15 насто се обезбедени од страна на Министерството за локална самоуправа што ја координира Програмата.

- Во рамките на овој, првиот повик за проекти за прекугранична соработка со Албанија, во вториот програмски период, на потенцијалните корисници на располагање им беа ставени скоро 3 милиони или конкретно 2 милиони и 890 илјади евра од Европската Унија и 15 насто национално кофинансирање што од македонска страна го покрива Министерството за локална самоуправа. На овој начин  им помагаме на апликантите и ги мотивираме да поднесуваат повеќе и поквалитетни проекти како начин да реализираме што повеќе средства од ИПА Програмата на Европската Унија. Ова е еден од деветте проекти одобрени во рамките на првиот јавен повик, со кои што се реализирани 99 насто од расположливите средства. Аргументите говорат за исклучително успешна реализација и се доказ за заинтересираноста и подготвеноста на апликантите, рече министерот за локална самоуправа Сухејл Фазлиу, кој што ја поздрави иницијативноста и иновативноста на носителите на проектот, општините Охрид и Поградец.

Со проектот ќе се формираат и опремат два спасувачки центри за ефикасни интервенции во вонредни ситуации: Центар за спасување на планина во Охрид и Центар за спасување на вода во Поградец и ќе бидат обучени околу 80 спасувачи.
    
Новоформираните центри за спасување и воспоставените процедури и стандарди за управување со ризици, ќе бидат активно промовирани кај туристички агенции, туристички оператори и туристички провајдери, со цел да се искористат за подобрување на конкурентноста на регионот „Охридско Езеро“ како атрактивна дестинација за авантуристички туризам.
 

Информираме дека заклучно со 15:00 часот, македонски државјани не се обратиле за помош во нашата Канцеларија за врски во Атина. Во моментов немаме официјални информации од грчките институции за жртвите и повредените во катастрофалните пожари.

Препорачуваме државјаните на Република Македонија да избегнуваат патувања во регионите зафатени од пожарите. Воедно, информираме дека контакт телефонот на нашата Канцеларија за врски во Атина е 0030 694 474 3071.

Претседателот на Владата на Република Македонија Зоран Заев денеска прими делегација на Министерството за надворешни работи на СР Германија што ја предводеше државниот министер надлежен за Европа Михаел Рот.

Премиерот Заев на средбата се осврна на актуелната политичка ситуација во земјата со посебен акцент на процесот на постигнување политичка согласност околу основните принципи и прашања поврзани со реализацијата на референдумот за договорот со Република Грција кој ги донесе пред успешна завршница евроатлантските аспирации на Република Македонија.

Претседателот на Владата на РМ Заев ја нагласи исклучителната поддршка што во изминатиот период дојде од СР Германија и од Канцеларката Меркел во трансформацијата на политичката криза во која беше западната Република Македонија, во период на сеопфатни реформски зафати кои кулминираа со признание за напредокот на земјата со датумот за преговори со ЕУ и со поканата за членство во НАТО.

„Многу сме блиску до реализацијата на стратешките цели на Република Македонија – членството во ЕУ и НАТО, и нема да дозволиме процесот да го нарушат или да го доведат во ризик неодговорни ултиматуми. Остануваме посветени до крај да стигнеме до решенија кои ќе овозможат услови за фер референдум во интерес на граѓаните на нашата земја. Законот е еднаков за сите, амнестијата за политичкиот криминал е невозможна и особено нема да попуштиме пред притисокот да отстапиме од владеењето на правото“, рече на средбата премиерот Заев.

На средбата државниот министер надлежен за Европа во Министерството за надворешни работи на СР Германија Михаел Рот, истакна дека Република Македонија со датумот за преговори со ЕУ и со поканата за НАТО отвори ново поглавје во својата историја и, истовремено, отвори ново значајно поглавје и во историјата на Европа во период кога за ЕУ е од огромна важност единството на сите европски земји.

Државниот министер надлежен за Европа Рот, нагласи дека Република Македонија и понатаму може да смета на целосна и силна поддршка од СР Германија. Тој потенцираше дека претстојниот референдум е момент за одлука за европската иднина за Македонија и дека одговорноста сега треба да ја преземат сите релевантни политички субјекти во земјата, вклучувајќи ја и опозицијата. 

Министерството за труд и социјална политика ја засилува поддршката за работниците да добијат повисока минимална плата, но истовремено ги штити и нивните работнички права. Со предложените измени и дополнувања на Законот за минимална плата што вчера ги изгласаа пратениците, фирмите коишто на вработените ќе им ја покачат минималната плата ќе добиваат државна помош. 

Финансиската поддршка по работник изнесува 30 отсто од разликата помеѓу бруто платата на работникот во тековниот месец и просечната бруто плата на работникот исплатена во месеците октомври, ноември и декември лани. Оваа поддршка може да изнесува, најмногу до 1.200 денари месечно по работник.

Истовремено, мерката е одговор на барањето на работодавците за адресираниот проблем со т.н. уравниловка, а тоа е потребата да растат преостанатите плати блиски со минималната плата, за да не ги изгубат или демотивираат попродуктивните работници. Преку финансиската поддршка ќе се поттикне спиралата за покачување на платите во трудоинтензивните сектори што  позитивно ќе влијае на растот на продуктивноста на компаниите и на растот на животниот стандард на работниците. Средствата за исплата на финансиската поддршка се обезбедуваат од Буџетот на Република Македонија. Финансиската поддршка ќе се исплаќа за периодот од јули годинава, до декември 2019 година.