Заменик претседателот на Владата задолжен за економски прашања д-р Кочо Анѓушев учествуваше на бизнис форум помеѓу Стопанската комора на Македонија и Иранската комора за трговија, индустрија, рударство и земјоделство на која беа презентирани можности за зголемување на меѓусебната економска соработка помеѓу Република Македонија и Иран.

Вицепремиерот Анѓушев истакна моменталната економска соработка помеѓу двете земји не е на задоволително ниво, но и дека тоа не го гледа како проблем, туку како можност, бидејќи има голем потенцијал за унапредување на соработката. Моменталниот извоз на стоки од Република Македонија кон Иран изнесува околу 400 илјади долари, што претставува мал дел од вкупниот ирански увоз, кој е на ниво од околу 40 милијарди долари.

„Иран е голем пазар од 80 милиони потенцијални потрошувачи и за Република Македонија е голем предизвик да се зголеми економската соработка со оваа земја во двете насоки. Владата го овозможува тоа Преку имплементација на мерките од Планот за економски раст, односно преку Законот за финансиска поддршка на инвестициите, кој е во собраниска процедура и очекуваме да биде донесен до средината на месец мај. Иранските компании имаат можност да реализираат инвестиции во нашата земја, а преку мерките ќе може да очекуваат поврат од 10% од висината на инвестицијта. Од друга страна ги стимулираме и домашните компании технолошки да се развиваат и да станат поконкурентни со што ќе освојуваат нови пазари, односно ќе воспоставуваат соработка со компании од други земји“, посочи вицепремиерот Анѓушев.

Делегацијата на Иранската комора за трговија, индустрија, рударство и земјоделство ја предводи претседателот на комората г-дин Голам Хосеин Шофеи, а во текот на денот ќе се реализират и меѓусебни средби помеѓу ирански и македонски компании, на кои ќе се разговара за можности за воспоставување на меѓусебна соработка.

Во текот на вчерашниот ден, министерот во Владата на Република Македонија задолжен за дијаспора, Едмонд Адеми, се сретна со висок претставник во Стејт Департментот, Пол Фајфер, во Бирото за Европа и Евроазија.

Министерот Адеми ја истакна силната заложба на Владата на Република Македонија за воспоставување на институционална соработка со дијаспората и ги запозна домаќините со работата на Владата во однос на актуелните политички прашања, при што ја потврди посветеноста на Република Македонија за влез во НАТО и Европската Унија.

Високиот претставник на Стејт Департментот, Пол Фајфер, и честиташе на Владата на Република Македонија за добиената чиста препорака од Европската Комисија за почеток на преговорите за членство во Европската Унија и изрази силна поддршка од САД за реформските процеси во Македонија дефинирајќи ја Македонија како една од ретките земји која за краток период под раководство на новата Влада направи целосен пресврт на внатрешен план, регионалната соработка и во меѓународната политика во целина.

Воедно, во попладневните часови, во просториите на Амбасадата на Република Македонија во Вашингтон, министерот Адеми се сретна со претставници од Форумот за Демократска Македонија.

 

Царинската управа преку Проектот за користење на средства од Програмата ИПА за прекугранична соработка помеѓу Република Македонија и Република Грција 2014-2020 година, ќе го модернизира граничниот премин Богородица.

Имено, со договорот за започнување на Проектот што беше потпишан на 2 Април 2018 година, финансиран од Европска Унија и кофинансиран од Владата на Република Македонија во износ од 442.500,00 евра, предвидено е до крајот на 2023 година да се извршат повеќе инфраструктурни зафати на ГП Богородица и ГП Дојран. Инфраструктурните зафати ќе овозможат создавање на современи услови за давање на поквалитетни услуги на премините, што за економските оператори, превозниците и патниците ќе значи олеснување и забрзување на движењето на стоките, како и создавање на дополнителни услови за контрола и заштита на граѓаните.

Поддршката на Европската унија, како и на Владата на Република Македонија, преку реализацијата на овој проект ќе даде голем придонес во олеснувањето и забрзувањето на царинските и граничните постапки и подобрување на прекуграничната соработка. Надградбата на објектите ќе ја зголеми пропусната моќ на преминот за стокови пратки, ќе го намали времето потребно за вршење на граничните формалности и ќе ја подобри инфраструктурата за примена на современи средства за инспекција.

Министерот Роберт Поповски задолжен за комуникации, отчетност и транспарентност во Лондон имаше официјална средба со Фиона Мекилван, раководител за Западен Балкан во МНР на Велика Британија. На средбата е утврдена чистата и недвосмислена поддршка на британската влада кон реформските процеси во Република Македонија.

Реформскиот процес кој го започна Македонија е оценет како исклучителен, а утврдено е дека истиот ќе продолжи и во наредниот период. На состанокот беше дискутирано за тоа дека реформите се долг процес кој мора да се спроведе соодветно со цел да не се повторат грешките од минатото.

Министерот Поповски на средбата ги издвои реформските процеси спроведени од Планот 3-6-9, со најава на Планот 18, а посебно ги посочи концептот за отворена влада, транспарентност и отчетност како принципи кои ги практикува владата. Како што рече Поповски, Владата на Република Македонија поставува стандарди како за постојната администрација, така и за сите следни влади.

Заеднички е констатирано дека заробената држава е состојба од минатото која интензивно се менува, за што е неопходно реформите да продолжат со ист силен интензитет.

Според Мекилван, Македонија е добар пример за Западен Балкан и покажува дека со храброст и политичка посветеност промените се реалност.

Раководителката за Западен Балкан Мекилван, министерот Поповски, советникот на премиерот Марјан Забрчанец и портпаролот Миле Бошњаковски, на средбата изразија задоволство од поддршката која Сервисот за комуникации на Велика Британија ја обезбедува за Комуникацискиот сервис на Владата на Република Македонија и заеднички заклучија дека владините односите со јавност во Македонија се во функција на транспарентноста, градење на сервисни комуникациски алатки, како и социјалните промени кои се неопходни за општеството.

Советот за следење на имплементацијата на Стратегијата за реформи на правосудниот сектор (2017-2022 година) на Владата на Република Македонија ја одржа својата трета седница.

По усвојувањето на записникот од претходната, втора седница, Советот за следење на имплементацијата на Стратегијата за реформи на правосудниот сектор, денеска, продолжи со разгледување на предложените измени на Законот за судови, Законот за Судскиот совет на Република Македонија и Законот за Академијата за судии и јавни обвинители.

Заменик министерот за правда, Оливер Ристовски, ги информираше членовите на Советот дека одредени решенија, понудени од Министерството за правда, не се прифатливи за опозицијата и додаде дека на седница на Собранието на РМ, закажана за втори мај, очекува измените на Законот за судови и Законот за судски совет да се најдат на дневен ред.

Советот за следење на имплементација на Стратегијата за реформи на правосудниот сектор ги разгледаа предложените измени на Законот за судови, а пред сѐ понудените решенија на основите на дисциплинска одговорност и дисциплински мерки за судиите.

На седницата беа разгледувани и одредени предлози и решенија за Законот за судски совет и Законот за Академијата за судии и јавни обвинители.

 

Претседателот на Владата на Република Македонија, Зоран Заев заедно со заменик претседателот на Владата задолжен за економски прашања и координација со економските ресори, Кочо Анѓушев и Зорица Апостолска, министеркa без ресор задолжена за странски инвестиции денеска учествуваа и имаа свои обраќања наФорумот „Инвестиции за долгорочен економски развој“.

Форумот, на кој покрај претставниците на Владата присуствуваа и амбасадори, домашни и странски експерти и истакнати стопанственици е организиран од Сојузот на стопански комори на Македонија (ССК) во рамки на Проектот на УСАИД – „Партнерство за подобра бизнис регулатива“ спроведуван од ЕПИ Центар Интернационал, во кој ССК е партнер, заедно со Стопанските комори на Македонија и северозападна Македонија, како и МАСИТ, Стопанската комора за информатички и комуникациски технологии.

Претседателката на Сојузот на стопанските комори на Македонија, Данела Арсовска во уводот позитивно го оцени владиниот ангажман во насока на овозможување на соработка на домашните компании со странските инвеститори во земјава, како и посветувањето на важните фактори, оддржување на правната сигурност за подобрување на инвестициската клима и заштита на инвеститорите.

 

 

„Ја стабилизиравме финансиски државата, ја поставивме на пат на одржлив развој и нашите амбиции се токму како што е темата на Форумот – обезбедување инвестиции за долгорочен економски развој на Македонија“, истакна премиерот Заев заблагодарувајќи се на помошта од УСАИД и партнерите од меѓународната заедница кои и помагаат на Владата во остварување на нејзините заложби.

Премиерот Заев се осврна на важноста на обезбедувањето на законската регулатива, преку демократско носење на законите, како и определбата на Владата за финансиска помош на претпријатијата од буџетски средства. Тој подвлече дека ова конкретно се обезбедува преку Предлог-законот за финансиска поддршка, кој што веќе е во парламентарна процедура, а со кој се предвидува државата да ги поддржи претпријатијата кои ќе исплаќаат повисока плата од 18 илјади, како и оние кои ќе вложуваат во изградба на нови производни капацитетеи и ќе отворат нови работни места за граѓаните.

„Од исклучителна важност е регионалната економска соработка, која што отвора перспективи за нови фирми, нови претпријатија, нови работни места,“ оцени премиерот Заев, додавајќи дека во оваа насока за постоечките и идните бизнисмени во оваа насока се отвораат сериозни шанси за инвестиции во планираните меѓудржавна инфраструктура, гасификацијата, дигитализацијата.

Тој посебно ја истакна заложбата на Македонија за влез во ЕУ и НАТО, кои преку демократијата, владеењето на правото и почитувањето на човековите права и слободи, се посебен гарант на стабилноста и обезбедувањето на просперитетот кои обезбедуваат добра инвестициска клима и развој на економијата.

„За 10 месеци, ние со нашите реформски политики, политики на пријателства имаме над 10 потпишани договори за инвестиции, во дваесетина сме во завршна фаза, а разговараме со 200 компании“, подвлече премиерот Заев.

 

 

Вицепремиерот Анѓушев во својот говор се осврна на заложбите на Владата за обезбедување на подобра регулатива, преку остварување на двете фундаментални вредности, а тоа, истакна Анѓушев, е владеењето на правото и обезбедувањето на стабилна политичка ситуација во земјата.

Тој, рече дека Владата конкретно делува на заштитата на капиталот на инвеститорите и прави клима во кои тие се чувствуваат безбедно, разграничувајќи ги политичките интереси.

„Ве поканувам, да ги препознаете мерките, кои ние како Влада ги преземаме, а со кои, за разлика од минатото, Владата не се меша во бизнисите туку ги креира условите преку носење на вистинската законска регулатива“, рече Анѓушев.

Во врска со прогресивниот данок, а на прашање на претседателката на Сојузот на стопанските комори на Македонија, Данела Арсовска, вицепремиерот Анѓушев рече:

„Верувам во правно општество и прогресивниот данок, не е само со цел на полнење на Буџетот, туку е механизам за обезбедување на праведно општество и социјална правда“.

Тој додаде, дека Владата е отворена транспарентно да расправа на оваа тема и објасни дека прогресивниот данок предвидува поголем данок, само за сумата над прагот кој евентуално по широка дебата би се утврдил.

 

 

Според Зорица Апостолска, министеркaта без ресор задолжена за странски инвестиции, глобалните трендови покажуваат дека бизнисот својот просперитет го препознава во иновациите, во автоматизацјата, во воведувањето на ИТ технологии во својата дејност, и тоа е патот кој ги води до поголема додадена вредност во производите и услугите и кон поголема конкурентност.

Следствено на тоа, рече министерката Апостолска и самиот План за економски раст е концепиран кон стимулирање на овие трендови и во македонското стопанство преку предвидена финансиска поддршка за мотивирање на компаниите да инвестираат во технолошки развој и истражувања и преку процес на реформи на образованието, кои се во насока на воспоставување на посилна релација помеѓу бизнисот и образовниот процес, со цел создавање на квалификувана работна сила која со своите вештини и квалификации успешно ќе ги задоволи побарувањата на бизнис заедницата.

 

 

 

Министерот задолжен за комуникации, транспарентност и отчетност Роберт Поповски имаше работен состанок во Лондон со министерката за устав на Велика Британија, Клое Смит, во чија надлежност се и комуникациите и транспарентноста.

Министерот Поповски го презентираше концептот Отворена влада којшто го спроведуваат институциите во Република Македонија, а се темели на демократизација на медиумскиот амбиент, на активна транспарентност и на зголемена пристапност.

Министерката Смит искажа поддршка за напорите за обезбедување стандарди за отчетност кои Владата ги презема во Република Македонија и посочи дека транспарентноста подразбира политичка храброст и фокусираност кон реформи.

Заеднички беше констатирано дека комуникациите се основа на управувањето и поради тоа тие треба да бидат модерни и демократски, а демократска Влада значи и отворена и услужна Влада.

На средбата се разговараше и за медиумските реформи во Македонија, а министерот Поповски истакна дека слободата за медумско известување е императив за владата, дека не смее да се повтори атмосферата на притисок врз новинарите и дека на агендата се и реформите на јавниот радиодифузен сервис кој треба да ги отсликува и промовира демократските вредности и различностите во општеството.

Министрите Поповски и Смит разговараа и за можностите за интензивирање на соработката меѓу Сервисот за комуникации при Владата на Република Македонија и Комуникацискиот сервис на Владата на Република Македонија во делот на односите со јавноста, отворената комуникација со граѓаните, транспарентноста и услугите кои институциите ги обезбедуваат за граѓаните.

Состанокот е во рамки на тековната програма за поддршка на владините комуникации со јавноста обезбедена од Владата на Велика Британија за граѓаните на Република Македонија.

„Денеска ми е посебна чест овде, во Долнени, да ја претставам инвестицијата на македонско-турската компанија ‘Волостоне’ - Скопје, која по спроведен Јавен повик за детални геолошки истражувања на електронска аукција понуди највисок износ на средства, и тоа 448.570.000 денари или 7,3 милиони евра, после што Владата на Република Македонија донесе Одлука за доделување на концесија на оваа македонско-турска компанија“, истакна министерот Бектеши на церемонијата на потпишување на договорот со претставникот на ‘Волостоне’ – Скопје, Абдулмуталип Буши.

Договорот за концесија за детални геолошки истражувања на минерална суровина мермер, кој беше потпишан денеска, е за локалитетот Самарница, кој се протега на териториите на двете општини – Долнени и Прилеп.

„Оваа нова инвестиција ќе овозможи посебен бенефит за двете општини, кои ќе имаат можност за реализација на нови проекти и економски развој. Процедурата за доделувањето на концесии се врши исклучиво преку електронскиот систем Е-концесии, а распределбата на концесискиот надоместок е во полза на општините, односно дури 78% одат на сметка на општинскиот буџет, а 22% во државната каса“, рече Бектеши, додавајќи дека на сметката на општината Долнени се веќе префрлени 227.424.990 денари или 3,7 милиони евра од концесискиот надоместок, додека во буџетот на општината Прилеп, согласно површината што ја опфаќа концесијата, како концесиски надоместок веќе се уплатени 122.459.610 денари, односно околу 2 милиони евра.

Во име на инвеститорот ‘Волостоне’, г-дин Буши упати благодарност до Владата и до министерот Бектеши и укажа дека според планот на компанијата, во првиот период ќе бидат отворени 100 работни места, а штом стартува работењето на локацијата се планира дополнителна инвестиција од 22 милиони евра за изградба на фабрика и придружни бјекти, со што ќе се зголеми и бројот на вработувања на 500, а пласманот е веќе обезбеден во Кина, Индонезија, Малезија и Кореја, додека следна цел на фирмата е амертиканскиот пазар.

Градоначалникот на Прилеп, Илија Јованоски, подвлече дека станува збор за значајна инвестиција, од која општина Прилеп ќе има придобивки и ќе овозможи непречена реализација на планираните проекти, додека според градоначалникот на општина Долнени, Џемил Ќамили, инвестицијата доаѓа во вистинско време, бидејќи општината се соочува со огромни долгови од претходната власт, па првенствено ќе овозможи покривање на долговите и реализација на развојни проекти, како што се спроведување на водовод и канализација во населените места кои се соочуваат со овој проблем.

Министерот Бектеши истакна дека со оваа инвестиција и општина Долнени и општина Прилеп ќе добијат одлична можност да го унапредат локалниот развој, да инвестираат во нови и за нивните жители значајни проекти, а со тоа да овозможат унапредување на квалитетот на животот на своите граѓани, што е и главна определба на Владата и на Министерството за економија.

 

Почитувани претставници на Сојузот на стопански комори на Република Македонија, организатори на овој значаен Форум посветен на инвестициите за долгорочен економски развој, почитувана претседателке на Комората Даниела Арсовска,

Почитуван претставник на УСАИД за Македонија, Дејвид Атебери,
почитуван Љубомир Димовски, проектен координатор на проектот „Партнерство за подобра бизнис регулатива“, во чиишто рамки се одржува Форумот, и други претставници на УСАИД,

Почитувани претставници на Стопанската комора на северозападна Македонија и МАСИТ, вклучени во овој проект,
Почитувани присутни од ЕБОР, амбасадори, претставници од Владата, од институциите, од бизнис секторот, стопанственици, странски експерти, професори,

Почитувани претставници на медиумите, драги граѓани,

Ја стабилизиравме финансиски државата, ја поставивме на пат на одржлив развој, а нашите амбиции се токму тоа што е тема на овој Форум – обезбедување инвестиции за долгорочен економски развој на Република Македонија.

 

 

Благодариме на УСАИД и на нашите партнери од меѓународната заедница што ни помагаат во овие наши заложби како Влада, што се неопходност, за да обезбедиме вистински квалитетен живот за граѓаните на Република Македонија.

Ги оставивме во минатото практиките на често менување на законите, без консултација со бизнис заедницата и со јавноста, што создаваше непредвидливост.

Денес законите се менуваат во транспарентна постапка, низ јавни расправи, како што се случи тоа, на пример, со измените на Законот за јавни набавки, при што за јавните дебати сериозна поддршка обезбеди токму УСАИД.

И граѓаните, и домашната бизнис заедница и нашите партнери од меѓународната заедница гледаат сериозни демократски промени во постапката на носење на законите. Со тоа, обезбедуваме предвидливост за инвеститорите и градиме, како држава, партнерски однос на доверба со нив.

Затоа што ние знаеме, дека, ако работат бизнисите, ќе има и нови, и подобро платени работни места.
И затоа се определивме финансиски да ги помогнеме претпријатијата, со сериозна државна буџетска поддршка, којашто речиси и да не постоеше досега. Предлог законот за финансиска поддршка на инвестиции, со којшто за прв пат државата поддржува домашни фирми веќе е во парламентарна процедура.

Државата, со овој закон се обврзува на поддршка на претпријатијата што ќе исплаќаат плата повисока од 18.000 денари, ќе вложуваат во изградба на нови производни капацитети и ќе отворат нови работни места.

Многу скоро очекувам да стартува и повикот за поддршка на малите и средни претпријатија, од страна на Фондот за инвестиции и технолошки развој.

Го изедначивме третманот кон домашните и кон странските инвеститори. И на исто таков транспарентен начин државата ги поддржува и странските инвестиции.

Во постојани консултации сме со вас како стопански комори и со нашите европски партнери и експертите од САД затоа што сме ориентирани и кон соодветна регулатива и кон соодветна клима, во функција на инвестициите.

За да ги мотивираме бизнисите, нашите политики се насочени и кон поддршка на обезбедување што поквалификувана работна сила и надоместување на трошоците за промени во начинот на функционирање на домашните фирми, со цел да можат да се прилагодат и да соработуваат со странските инвеститори во Македонија, а поддржуваме и извозна конкурентност.

Сведоци сте дека ја ослободивме и деловната бизнис клима. Нема повеќе притисоци и закани врз фирмите, напротив тие можат во еден слободен амбиент да ги развиваат своите бизниси и тоа ќе остане наш императив во работењето.

Се справивме успешно и со огромните напластени долгови во минатото и ја стабилизиравме деловната клима. Еден од значајните показатели е брзото и неселективно враќање на повратот на ДДВ на фирмите, коишто бележат зголемена ликвидност.

 

 

Министерството за финансии, токму поради таа постигната стабилизација и подобрувањето на угледот на Македонија од страна на кредитната агенција Фич, на почетокот на годината ги намали каматните стапки на издадените државни хартии од вредност. Минатиот месец и Народната банка ја намали референтната каматна стапка. И вие знаете, намалувањето на каматните стапки е добро за фирмите, бидејќи им овозможува повеќе да инвестираат, а со тоа ќе отвораат и нови работни места.
Ние како влада веќе донесовме одлука, Македонската банка за поддршка и развој да пласира 100 милиони евра кредит од Европската инвестициска банка за домашните мали и средни претпријатија. А сакам да знаете и дека креираме рамка, каматните стапки на овие кредити да бидат поповолни од кога било до сега.

За Република Македонија е многу важно глобалната економија да закрепнува, затоа што речиси 80 проценти од извозот од Македонија оди кон нашиот најважен трговски партнер ЕУ, а речиси половина од тој извоз оди кон нашиот голем пријател, Република Германија. И добро е што има подигнување на проекциите на глобален економски раст, од страна на реномираните меѓународни институции.

Но почитувани граѓани и почитувани бизнисмени,
Сакам со најголема сериозност сите да прифатиме уште две важни работи коишто ги кажувам на крајот за да останат запаметени, па и во таа насока понатаму да ја водиме дискусијата.

Прво – од исклучителна важност е регионалната економска соработка, којашто отвора и тоа какви перспективи за нови фирми, нови претпријатија, нови работни места. Допрва ќе се вложува во меѓудржавната инфраструктура, гасификација, дигитализација што ќе ја олесни соработката меѓу фирмите, протокот на луѓе и стоки. Тоа се сериозни шанси за вашите постоечки бизниси и за новите бизниси. И затоа на ова не гледајте како на обврска кон ЕУ, туку како на отворени можности за економски развој и бенефит и за фирмите, и за вработените, и за државата, и
Второ – почитувани граѓани и присутни,
ЕУ и НАТО за Република Македонија се демократија, владеење на правото, човекови права и слободи, но ЕУ И НАТО ЗА МАКЕДОНИЈА СЕ ПРЕД СЕ ЕКОНОМИЈА И ПОДОБАР ЖИВОТ ЗА СИТЕ, ДОМА.

За инвеститорите, ЕУ и НАТО интеграциите се најважните показатели дека земјата се движи во вистинската насока, дека е стабилна и дека ќе има добра иднина.

НАТО е најсилниот гарант за безбедноста на една држава, а за инвеститорите е поважна безбедноста од сите услови и процедури за отворање фирма.

Искуството во земјите од регионот, како на пример во Бугарија и Романија, дури и искуството на најмладата земја членка на НАТО, Црна Гора, покажува дека за многу кус период, од неколку месеци, до неколку години по интеграцијата, странските инвестиции многукратно се зголемуваат.
Па погледнете само што постигнавме за 10 месеци ние со нашите реформски политики и политиките на пријателства што ги отворија евро-атлантските перспективи. Имаме над 10 потпишани договори за инвестиции, со 20-тина сме во завршна фаза, а разговараме со дури двесте (200) компании.
Драги граѓани, домашни и странски стопанственици, пријатели од меѓународната заедница:

Македонија заедно ја поставивме на евро-атлантскиот пат. Македонија се развива. Создаваме услови и ќе обезбедиме долгорочен економски развој во нашата убава Република Македонија.

 

 

 

Претседателот на Владата на Република Македонија Зоран Заев денеска имаше свое обраќање на свечениот настан на кој Министерството за труд и социјална политика, Агенцијата за вработување и долгогодишниот партнер на Република Македонија УНДП (Програмата за развој на ОН), ја потпишаа Годишната програма за вработување.

Премиерот Заев истакна дека Владата на Република Македонија и Министерството за труд и социјална политика веќе го спроведуваат новиот Оперативен план за 2018, со комбинирање на мерки и услуги, чија основна цел е да се поврзат капацитетите на невработените, со профилите кои се бараат од страна на бизнисот.

„Поддршката и помошта што ни доаѓаат од УНДП се многу значајни за Македонија и нашите граѓани. Оваа година УНДП ќе го поддржи спроведувањето на три мерки од Оперативниот план на активни мерки за вработување кои ќе имат за цел да го помогнат претприемништвото, воспоставувањето на локални партнерства и новиот модел на обуки за занимања и вештини кои ја зголемуваат вработливоста и создавањето на квалитетни работни места.

Овие мерки се исклучително важни. Социјалната и економската инклузија мора да се одвива паралелно со реализација на приоритетите на Владата за економнски раст и развој, со креирање на нови работни места и со зголемување на конкурентноста на пазарот на труд“, порача премиерот Заев во своето обраќање.

Постојаната претставничка на УНДП во Република Македонија, Луиза Винтон на промоцијата на оваа програма за вработувања потврди дека продолжува поддршката партнерскиот однос на УНДП и на Владата на РМ во креирање на работни места во приватниот сектор преку промоција на претприемништвото и развој на вештини според потребите на пазарот на трудот.

„Нашите напори во овој сегмент изминатата декада резултираа со отворање на околу 10.000 нови работни места. Благодарение на подготвеноста на актуелната Влада да адресира повеќе ресурси во борбата против невработеноста и да го отвори пазарот на трудот, за оваа 2018 година поставивме уште по амбициозни цели“, истакна Постојаната претставничка на УНДП, Луиза Винтон.

Министерката за труд и социјална политика, Мила Царовска во своето обраќање зборуваше подетално за мерките и новитетите што Оперативниот план на активни мерки за вработување ги обезбедува.

„Тоа што е различно од претходните оперативни планови и што дава подобар ефект е тоа што мерките се прилагодени на потребите на работодавачите, на потребите и квалификациите на младите и ранливите групи и има можност за поврзување на мерките, што досега не беше случај. Значи имате можност да поминете обука, преквалификација или доквалификација и веднаш потоа да користите друга мерка што значи директно вработување. Дадовме можност мерките да ги користат и социјални претпријатија, но и граѓанските организации, бидејќи знаеме дека голем број млади луѓе се неформално вработени во овие организации и сега имаме можност за нивна формализација. И ниту една од овие мерки не значи ослободување од придонеси за здравствено и социјално осигурување, затоа што ние сме одговорна Влада, која што се грижи за иднината на фондовите и за идните генерации“ потенцираше министерката за труд и социјална политика, Мила Царовска.

Директорката на Агенцијата за вработување, Билјана Јовановска инфомираше за степенот на реализација на мерките од Оперативниот План за вработување и информираше дека забележителен е голем интерес за мерките и додаде дека во соработка со Владата на Република Македонија, доколку има потреба, ќе се обезбедат и дополнителни средства за да се зголеми опфатот на невработени лица.

„Најголем интерес е пројавен за мерката за субвенционирање на плати, каде веќе се поднесени апликации од 900 работодавачи за вработување на 1158 лица, а од страна на невработените лица се поднесени 965 апликации за учество“, соопшти директорката Јовановска.

По обраќањата, министерката за труд и социјална политика, Мила Царовска, Постојаната претставничка на УНДП, Лиуза Винтон и директорката на Агенцијата за вработување ја потпишаа годишната програма за вработување и изразија силни уверувања за нејзина успешна реализација.

Обраќање на премиерот Заев: Креирањето на квалитетни работни места носи сериозен потенцијал за раст на економијата

Денеска по повод потпишување на годишна програма за вработување помеѓу Министерството за труд и социјална политика, УНДП ( Програмата за развој на ОН) и Агенцијата за вработување, Претседателот на Владата на Република Македонија имаше свое обраќање во кое истакна:

Огромно задоволство имам денеска да го најавам потпишувањето на годишната Програма за вработување 2018 помеѓу нашите партнери од УНДП (Програмата за развој на Обединетите нации), Министерството за труд и социјална политика и Агенцијата за вработување. Програмата претставува проектен документ со кој се уредуваат правата и обврските помеѓу Министерството за труд и социјална политика, Агенцијата за вработување и Програмата за развој на Обединетите нации, во имплементацијата на планот за вработување.

Владата на Република Македонија и Министерството за труд и социјална политика веќе го спроведува новиот Оперативен план за 2018, со комбинирање на мерки и услуги, чија основна цел е да се поврзат капацитетите на невработените, со профилите кои се бараат од страна на бизнисот.

Поддршката и помошта што ни доаѓаат од УНДП се многу значајни за Македонија и нашите граѓани.
Оваа година УНДП ќе го поддржи спроведувањето на три мерки од Оперативниот план на активни мерки за вработување кои ќе имат за цел да го помогнат претприемништвото, воспоставувањето на локални партнерства и новиот модел на обуки за занимања и вештини кои ја зголемуваат вработливоста и создавањето на квалитетни работни места.

Овие мерки се исклучително важни. Социјалната и економската инклузија на најранливите мора да се одвива паралелно со реализација на приоритетите на Владата за економнски раст и развој, креирање на нови вработувања и зголемување на конкурентноста на пазарот на труд.​

Подетално за процесот на имплементација на мерките ќе ве информираат постојаната амбасадорка на ООН во Македонија, Луиза Витон, министерката за труд и социјална политика, Мила Царовска и директорката на Агенцијата за вработување, Билјана Јовановска.

Борбата со невработеноста останува наш заеднички предизвик.
Креирањето на квалитетни работни места и на подобар пристап до работа носи сериозен потенцијал за раст економијата и значителен поттик да создаваме кохезивно и еднакво општество за сите граѓани.

Во таа смисла, Владата на Република Македонија, Министерството за труд и социјална политика и Агенцијата за вработување ја продолжуваат плодоносната сорботка со нашиот долгогодишен партнер УНДП за промоција и креирање на одржливи нови работни места во земјата, за помош на невработените лица во надминување на бариерите на пазарот на труд и за креирање на соодветни работни места за одредени таргет групи на наши граѓани.

На самиот крај дозволете ми од мое лично име и од името на граѓаните да изразам огромна благодарност до г-ѓа Луиза Винтон и канцеларијата на Обединтетите нации за коинтиуниранта поддршка што и ја даваат на Република Македонија!


Претседателот на Владата на Република Македонија Зоран Заев на денешната прес конференција по повод на промоцијата на Програмата за вработување 2018, на барање на новинарите одговори на повеќе прашања од интерес на медиумската јавност.

Прашањата и одговорите на премиерот Заев ви ги пренесуваме во целост:

Медиуми: Кога може да се очекува информација за тоа дали има евентуално правни прекршувања на процедурата за Иловица во делот на доделување на дозвола за експлоатација?

Премиерот Заев: Не подоцна од крајот на мај. Поради тоа што имаме надворешна експертиза во делот на правните консултации, од кои што треба да дојде независно видување, поради тоа што државата мора да биде покриена ако донесе одлука за раскинување. Може да бидеме тужени за 350 или за 500 милиони евра ако направиме некоја грешка.

Намерата не ни е, уште еднаш потенцирам, да направиме грешка или да нанесеме некоја лоша работа врз било кој.

Намерата ние да го почитуваме законот и да постапуваме согласно законот.

Медиуми: За кратко време се навршува годишнина од немилите случувања на 27-ми април. Би ве прашала и за правниот дел, во делот на обвиненијата, верувате ли дека, во ситуација кога земјата има сериозни проблеми за да функционира правната држава, дека ќе има правен завршеток и дефинирање на тоа кој е виновен за тоа што се случи на 27-ми април? Посебно прашањето е околу нарачателот на целото тоа лошо сценарио, и од оваа дистанца, како гледате на тој немил настан кога земјата се наоѓаше на раб на безбедносна криза?

Премиерот Заев: Поуката која што ја извлековме од тој немил, грозоморен настан, од кој што верувам дека сите граѓани на Македонија се срамеа, е да не се повтори никогаш повеќе. Ниту во Македонија – ниту било каде.

Јас сум убеден дека ќе има правна разрешница, и дека лицата кои што се огрешиле пред законот ќе бидат извадени пред системот на правдата, и ќе одговараат за тоа. Секако согласно доказите што постојат.

И јас и јавноста, преку обвинителниот акт, и материјалните докази кои што се даваат во прилог, а впрочем јавност беше и сведок на сето тоа што се случи, убеден сум дека правниот систем нема да затаи и ќе донесе правични и правилни одлуки со конечна цел, санкционирањето да ја постигне целта, а тоа е, никогаш повеќе да не се повтори, и никој повеќе ни да помисли за ваква работа.

Мене ми е драго што еве нашата Македонија, после неполна година, задутре се навршува година од овој немил настан, сите излегуваме поучени, повеќе присебни, потрезвени и посериозни како држава, како граѓани, како општество, верувајќи пред сè во блескавата иднина на нашите граѓани, на нашата земја, а секако преку вакви настани кои што не оставија засрамени како земја во тој момент, да се покажеме дека во суштина ние тоа не сме.

Ние сме пријателска земја која што сака да ги унапреди условите за живот и квалитет на граѓаните овде, која што сака рамо-до-рамо со сите развиени европски земји, да се бори во една компетитивна смисла, каде што нашите граѓани пред сè ќе имаат шанса дома. Преку ваквите реформи, преку ваквите позитивни препораки кои што ги добивме, преку сето она што претставува развој, вклучително и денешната прес-конференција и потпишување на програмата, Македонија останува посветена на унапредувањето ан севкупниот квалитет на живот на граѓаните.

Треба да дадеме изјави за 27-ми, треба некако да го одбележиме, за да пуштиме пораки кон помладите генерации дека навистина никој не посакува да се повторат никогаш вакви настани како што беше тој на 27-ми април 2017 година.

Медиуми: Рековте дека до крајот на април ќе има нешто конкретно за реконструкција на владата. Што се случува со преговорите?

Премиерот Заев: Преговорите и разговорите течат. За оваа работа повеќе ги користам викендите, затоа што имам многу работа. Јас се надевам дека овој викенд веќе, како што привршува и месец април, ќе привршуваме, и после првомајските празници планирам да излезам со информирање на јавноста и пред парламентот за сите промени во владиниот состав, а после тоа и за промени во директорските места во одредени институции.

Медиуми: Дали веќе се знае кои партии се вклучени во реконструкцијата?

Премиерот Заев: Не, сè уште не се знае, затоа што најверојатно постои постапка на почетокот на мај, кога органите и телата на сите партии ќе треба да донесат одлуки во зависност од обемот на промените кои што би се случиле.

Медиуми: Денеска има уште една средба во Виена во однос на преговорите. Кои се вашите очекувања од ваквата средба, и вчера имавте краток одговор, но ако може и денеска, како гледате на изјавата на Хан дека за 2 недели е можно решение за името?

Премиерот Заев: Јас од секоја средба гледам можност за исчекор, и навистина имаме многу досега успеано, и тоа го потврдуваат и нашите партнери од другата страна на преговарачкиот процес, претставниците на Република Грција. Тоа го потврдуваме и ние. И тоа ни дава причина да веруваме дека може да се направи исчекор и сега во Виена, односно да го искористиме секој мегдан да се приближуваме кон конечно решение.

Изјавата на господинот Хан ја гледам ако пријателска. Секој сака час поскоро, една недела порано, да се реши овој горлив проблем. Затоа што е многу важен за Македонија, важен е за Грција, важен е за целиот регион, па би рекол и за Европа, поради тоа што европскиот однос преку дијалог да се изнаоѓаат решенија дури за вака горливи прашања, суштествени и чувствителни, кои што повеќе од 23-4 години не можеле да се решат, ја испраќа пораката на добра иднина, на градење на пријателство, и низ дијалог решавање на проблеми кои што се постојани и присутни, а и евентуално и на проблеми кои што во иднина ќе се појавуваат овде на Балканот а и соодветно на тоа и во рамките на европскиот континент, а се надевам и во рамките на европската унија каде што е нашето место.

Така што, продолжуваме со оптимизмот. Верувам дека креативноста на двајцата министри, томовите кои што се позади нив, а верувам и јас во моментот, а и премиерот Ципрас, даваме поддршка за да се изнајдат конструктивни и креативни решенија кои што ќе ги задоволат двете страни во нивните очекувања, а притоа како што рековме достоинствено ќе се однесуваат за двете земји и за граѓаните на двете земји.

Медиуми: Премиере, Владата ја презема одговорноста за Чебрен и Галиште. Како ќе оди таа постапка? Имате ли доволно финансиски средства? Како ќе се гради, како ќе оди постапката?

Премиерот Заев: Знаете дека целиот овој период користевме една формулација дека ја стабилизираме Македонија финансиски. Македонија е финансиски стабилна. Ликвидноста е зголемена, солвентноста е зголемена, има ликвидни средства и по домашните банки, и сите тие причини ни даваат за право на вака донесената одлука, Република Македонија сама да влезе во една ваква инвестиција.

Одлучено е Чебрен и Галиште да биде инвестиција од помал обем, а не како досегашните мегаломански зафати кои, како што гледате, од десетици тендери не успеја ниту еден.

Тргнавме од еден реалистички основ, проценката на инвестицијата е околу 220 милиони евра, убедени сме дека ЕЛЕМ како главен столб на производството на електрична енергија во Република Македонија може да го понесе вој капацитет, заедно со владата и сите институции во Република Македонија . Треба да се отвори еден преговарачки процес со сите банки каде што очекуваме да формираат конзорциум и сите да пласираат средства, се надевам конкурентни, затоа што не ни е обврска да земеме пари од дома. Ако не дадат доволно евтини камати, ние ќе земеме пари од надвор.

Но, верувам дека ќе бидат конкурентни, за веднаш штом го обезбедиме финансирањето, да ги повикаме буквално сите градежни компании во Република Македонија, кои што имаат капацитет да работат вакви специфични проекти, а преку тоа да дадеме работа на градежната оператива во Република Македонија. Проектот е предвиден да трае во период од 5-8 години, се работи за сериозен проект, и во делот на производството на електрична енергија, но и во делот на водоснабдувањето на целиот овој регион. Една таква, нова акумулација би можела да биде од важност за развојни можности и за земјоделието, и за други развојни можности во централна Македонија.

Медиуми: Во владиното соопштение стои дека се направени измени во законот за работни односи и дека се подобрени условите за работа на работниците. Може ли да ни објасните за какви измени станува збор, како ќе го почувствуваат работниците тоа подобрување во работењето?

Премиерот Заев: На ова гледаме како можност за соработка со медиумите, и ве замолувам во име на таа соработка,
да дадете фокус и внимание на промоција на денешните мерки за вработување. Таргетирани се 16269 невработени луѓе во Македонија. Сите тие преку ваквите програми имаат можност да најдат работа. Со средно школо во јавна администрација платата е најмалку 15000 денари, овде зборуваме за 1800 денари. Да се зафатат со работа, со претприемништво, да отворат свои бизниси.

Верувам дека многу млади луѓе, многу жени и лица со посебни потреби, ќе најдат свое решение за добро планирање на својот живот и за животот на своето семејство преку ваквите програми. 17 милиони евра, пари на граѓаните се наменети во многу сериозен фокус. Работни места за трајно вработување на младите.

Апелирам младите луѓе да ги искористат сите овие програми, јас сум убеден дека многу млади луѓе можат да ја решат својата перспектива и иднина овде во нашата Македонија токму преку ваквите мерки, а замолницата до вас медиумите е да информирате за да може оваа вест да допре колку може повеќе до граѓаните на Република Македнија.