Претседателот на Владата на Република Македонија, Зоран Заев, заедно со министерот за надворешни работи Никола Димитров и своите соработници, денеска оствари средба со помошник државниот секретар за европски и евроазиски прашања на САД, Арон Вес Мичел, кој беше придружуван од амбасадорот на САД во Земјава, Џес Бејли.

 

На средбата Премиерот Заев уште еднаш се заблагодари за континуираната поддршка којашто Република Македонија низ годините ја добива од Соединетите Американски Држави. Премиерот Заев истакна дека денешната посета на помошник државниот секретар за европски и евроазиски прашања на САД, Арон Вес Мичел е силно охрабрување за Владата, но и за граѓаните на оваа земја пред историскиот предизвик со којшто сме соочени, а тоа е спроведување на успешен референдум.

 

„Секоја голема одлука е резултат на компромис. Но, во нашиот случај, компромисот е исчекор напред. Исчекор кој ќе ни овозможи членство во ЕУ и НАТО со сите придобивки кои доаѓаат со тоа. Референдумот е шанса за остварување на нашите стратешки цели. Тоа се цели на сите претходни генерации, донесени како наша суверена одлука, со сеопшт политички и меѓуетнички консензус. И затоа и натаму ќе продолжиме да ги охрабруваме граѓаните да гласаат на референдумот“, посочи Премиерот Заев на средбата.

 

Помошник државниот секретар за европски и евроазиски прашања на САД, Арон Вес Мичел на средбата истакна дека Соединетите Американски Држави се импресионирани од резултатите коишто ги постигна земјава во изминатава година ипол и најде решение за проблем стар 27 години.

 

Помошник државниот секретар за европски и евроазиски прашања на САД, Мичел исто така потенцираше дека Република Македонија и натаму ќе добива силна поддршка од Америка бидејќи, како што рече, очигледно е дека граѓаните посакуваат иднина во Евро-атлантското семејство на народи.   

Во изјавата за медиумите, Премиерот Заев повторно ја повика опозицијата јасно да го каже својот став. Бидејќи како што рече, неодговорноста и непрепознавањето на историската шанса не се патриотски постапки. Не се постапки на лидери.

Повик до граѓаните да излезат и да гласаат на претстојниот референдум на 30-ти септември, преку медиумите, испрати и помошник државниот секретар за европски и евроазиски прашања на САД, Арон Вес Мичел.

Во посета на нашата земја престојува Високата претставничка за безбедност и надворешна политика на ЕУ, Федерика Могерини која допатува заедно со Претседателот на Владата на Република Македонија Зоран Заев, кој, пак, денеска имаше свое обраќање во Европскиот Парламент, како прв македонски премиер.

 

Веднаш по  слетувањето на скопскиот аеродром, премиерот Заев и Високата претставничка за безбедност и надворешна политика на ЕУ, Федерика Могерини, во придружба на заменик претседателот на Владата на РМ за европски прашања, Бујар Османи, министерот за надворешни работи на РМ, Никола Димитров и амбасадорот на ЕУ во Скопје, Самуел Жбогар, ја посетија старата скопска чаршија.

 

По обиколката и разговорите со граѓаните, двете делегации се задржаа на куса средба во една од чајџилниците на чаршијата.

 

Во изјавата за медиумите што следуваше потоа, премиерот Заев уште еднаш и посака топло добредојде на Високата претставничка за безбедност и надворешна политика на ЕУ, Федерика Могерини, и истакна дека таа, со оваа посета, уште еднаш ја сподели нејзината силна лична поддршка на нашиот пат кон Европската Унија, и со тоа ги потврди сите наши напори да го оствариме тоа.

 

„Нивната одлука да ги остават отворени портите на европското семејство за нашата земја беше од пресудно значење за нас, силна мотивација да ја завршиме нашата домашна работа, и пред сè, и над сè – да го решиме спорот со Грција. Сега ние, граѓаните на Република Македонија, треба да покажеме заедништво и одлучност на претстојниот референдум на 30 септември, да донесеме одлука за Договорот, да донесеме одлука за нашата иднина“, рече премиерот Заев во изјавата медиумите.

 

Претседателот на Владата на РМ Заев нагласи дека оваа посета на Високата претставничка за безбедност и надворешна политика на ЕУ, Федерика Могерини не потсетува дека европската идеја е силна инспирација да ги решаваме горливите отворени прашања во регионот, и дека Република Македонија е јасен пример како силната верба во нашата европска иднина може да биде клучниот мотив за постигнување на историскиот договор со Грција, и на тој со Бугарија.

 

„Ние сме успешна европска приказна и автентичен модел на функционална мулти-етничка демократија. Ние сме сплотени и секојдневно го живееме Европското мото “Обединети во различностите“. Затоа оваа средба ја организиравме овде, во старата чаршија на Скопје, за да ја потврдиме оваа наша европска вредност, со која се гордееме“, потенцираше премиерот Заев во изјавата за медиумите.

 

Високата претставничка за безбедност и надворешна политика на ЕУ, Федерика Могерини, во своето обраќање пред медиумите во скопската чаршија истакна дека е многу среќна што токму денес има прилика да биде во главниот град на Република Македонија, кога во Европскиот Парламент премиерот Заев доживеа стоечки овации кога зборуваше за заедничките вредности што ги делат ЕУ и Република Македонија.

 

Таа додаде дека хоризонтот  сега е многу јасен, и за ЕУ и за Република Македонија зашто делиме иста, заедничка иднина. Таа потсетти дека цела Европа го одобрува решението на спорот со Грција и дека тоа решение е инвестиција и за ЕУ и за Република Македонија, а начинот на кој беше постигнат е инспирација за силата на дипломатијата и дијалогот.

 

Високата претставничка за безбедност и надворешна политика на ЕУ, Федерика Могерини нагласи дека очекува дека на референдумот на 30 септември, граѓаните на нашата земја, заедно со сите лидери ќе ја искористат историската шанса која не смее да се пропушти. Таа потенцираше дека тоа е шанса која не смее да се одмолчи и да не се преземе одговорност.

 

Своето обраќање Високата претставничка за безбедност и надворешна политика на ЕУ, Федерика Могерини го заврши со пораката дека клучот за иднината на земјата е кај граѓаните, и дека тие, на 30 септември, треба да донесат одлука на која ќе се гордеат наредниот ден и сите наредни години.


Премиерот Заев на средбата со Могерини: За нас перспективата за членство во ЕУ е движечки фактор за успешни реформи и за справување со предизвиците

 

Претседателот на Владата на Република Македонија Зоран Заев денеска имаше средба со Високата претставничка за безбедност и надворешна политика на ЕУ, Федерика Могерини, која допатува заедно со него, по неговото денешно обраќање во Европскиот Парламент

 

По кусата прошетка и средба во старата скопска чаршија, премиерот Заев и Високата претставничка за безбедност и надворешна политика на ЕУ, Федерика Могерини им се обратија на присутните новинари.

 

Изјавата на Претседателот на Владата на Република Македонија Зоран Заев ви ја пренесуваме во целост:

 

Почитувана Висока Високата претставничка за безбедност и надворешна политика на ЕУ, Федерика Могерини,

 

Дозволете ми во оваа прилика да ја изразам мојата лична благодарност, како и благодарноста на Владата и на граѓаните на нашата земја, што мадам Могерини, изрази желба и подготвеност и денеска да биде тука со нас. Тука е за да ја сподели уште еднаш нејзината силна лична поддршка на нашиот пат кон Европската Унија, и со тоа да ги потврди сите наши напори да го оствариме тоа.

 

Силна е поддршката и на другите нејзини колеги од Европската Комисија, Претседателот Јункер, еврокомесарот Хан, и сите останати еврокомесари, кои за цело време беа со нас и до нас.

 

Нивната одлука да ги остават отворени портите на европското семејство за нашата земја беше од пресудно значење за нас, силна мотивација да ја завршиме нашата домашна работа, и пред сè, и над сè – да го решиме спорот со Грција.

 

Сега ние, граѓаните на Република Македонија, треба да покажеме заедништво и одлучност на претстојниот референдум на 30 септември, да донесеме одлука за Договорот, да донесеме одлука за нашата иднина.

 

За нас перспективата за членство во ЕУ е движечки фактор кој ги обединува сите општествени чинители и сила за успешно спроведување на реформите и справување со предизвиците со кои се соочуваме на тој пат.

 

Денес имав голема чест да се обратам во Европскиот Парламент во Стразбур. Тоа е прв пат македонски премиер да се обрати и е ште еден силен знак за поддршка на ЕУ за нашата држава и за нашиот народ.

 

Разлики постоеле, ќе постојат и ќе ги почитуваме, но нема простор за неодговорност кога треба сите заедно да одлучиме за иднината на нашата земја и нашите идни генерации.

И оваа посета на мадам Могерини не потсетува дека европската идеја е силна инспирација да ги решаваме горливите отворени прашања во регионот. Република Македонија е јасен пример: силната верба во нашата европска иднина беше клучниот мотив за постигнување на историскиот договор со Грција, и на тој со Бугарија.

 

Ние сме успешна европска приказна и автентичен модел на функционална мулти-етничка демократија. Ние сме сплотени и секојдневно го живееме Европското мото “Обединети во различностите“. Затоа оваа средба ја организиравме овде, во старата чаршија на Скопје, за да ја потврдиме оваа наша европска вредност.

Министерството за информатичко општество и админситрација, од денеска на својата веб страна овозможува алатка каде може да се пријави притисок на работно место. Министерството се обврзува сите пристигнати пријави да ги проследи до надлежните органи, за понатамошно постапување.

Пријавувањето е анонимно, но доколку лицето кое пријавува сака да ги сподели личните податоци, тие ќе бидат заштитетни согласно Законот за заштита на личните податоци, за што веќе се превземени соодветни технички и организациски мерки.

Согласно Законот за заштита од возменирување на работно место:

„Вработениот или лицето ангажирано со договор кое учествува во работата кај работодавачот, а кое смета дека е изложено на вознемирување на работното место, треба писмено да се обрати до лицето за кое смета дека го вознемирува и да му укаже дека неговото однесување е несоодветно, неприфатливо и несакано, а со цел за решавање на спорната состојба, односно случај без поведување на постапка за заштита од вознемирување на работно место и да го предупреди дека ќе побара законска заштита ако таквото однесување веднаш не престане. Барањето за заштита од вознемирување се поднесува до одговорното лице кај работодавачот или друго овластено лице кај работодавачот.Барање може да поднесе и претставник на синдикатот, лице надлежно за работите за безбедност и здравје при работа или за управување на човечки ресурси и претставник на вработените, по писмена согласност на вработениот кој смета дека е изложен на вознемирување на работно место.“

Министерството за информатичко општество и администрација и министерот Дамјан Манчевски, ги повикуваат сите вработени во јавниот сектор, да ги пријават сите евентуални притисоци со кои се соочиле на своето работно место.

Пријави притисок на работно место! http://mioaportal.mioa.gov.mk/?q=mk/eform/submit/prijava

Непосредно пред своето обраќање на парламентарната сесија на Европскиот Парламент во Стразбур, Претседателот на Владата на Република Македонија Зоран Заев имаше средба со Претседателот на ЕП, Антониот Тајани, кој истакна дека европските пратеници ја препознаваат Република Македонија како партнер од доверба во справувањето на предизвиците на Европската Унија.

Премиерот Заев на средбата со Тајани се заблагодари за поканата и за честа што му е укажана да им се обрати на европските пратеници и да информира пред ЕП за постигнатите реформи и одлучувачкиот договор со Република Грција, со што се откочија процесите за забрзување членството на Република Македонија вон ЕУ.

Претседателот на Владата на РМ Заев истакна дека нашата земја затвори долгогодишни прашања со соседите, а внатре во земјата го негува концептот „Едно општество за сите“, како докажана европска вредност.

На средбата двајцата соговорници разменија мислења и за претстојниот референдум во нашата земја, од кој се очекува одобрување за договорот со Грција и за чекорите што следуваат за финализирање на евро-атлантските интеграции.

Претседателот на Владата на Република Македонија, во рамките на својата посета на Стразбур, каде што на покана на Европскиот Парламент им се обрати на европратениците, се сретна и со делегација на пратеничката група на социјалдемократските партии во Парламентот.

Шефот на пратеничката група Удо Булман, и европските пратеници Кнут Флекенштајн и Тонино Пицула, му посакаа топло добредојде на премиерот Заев, и изразија силна поддршка за историските одлуки на Владата на Република Македонија за договорот со Грција, како и за успешното спроведување на реформите. 

Европските пратеници, социјалдемократи, нагласија дека има неподелено признание во Европскиот Парламент за стратешки решенија за иднината на Република Македонија. Тие решенија се уште позначајни бидејќи се остварени во духот на најдобрите на европски вредности.

Премиерот Заев на средбата со европските пратеници изрази благодарност за силната поддршка на европските лидери кои со својот ангажман во одделни фази од процесот и со охрабрувањето, создадоа оптимистичка атмосфера за поттик и за успешно спроведување на чекорите што ги прави Република Македонија во нејзините аспирации за членство во ЕУ.

Претседателот на Владата на Република Македонија на средбата информираше и за тековните активности за референдумот, како најдемократски начин граѓаните да одлучат за договорот со Грција и за иднината на земјата како членка на ЕУ и НАТО.

Премиерот Заев додаде дека поканата да им се обрати на европските пратеници во Европскиот Парламент е јасна поддршка за насоката во која се  движи Република Македонија и дополнителен импулс да се зајакнат и забрзаат реформите дома до датумот за преговори идната година.


Претседателот на Владата на Република Македонија Зоран Заев денеска, на покана на Европскиот Парламент имаше свое обраќање пред европратениците на парламентарната сесија на парламентот во Стразбур.

 

Обраќањето на премиерот Заев, кој пред европратениците го најави Претседателот на ЕП Антонио Тајани, ви го пренесуваме во целост:

 

Почитуван претседателе на Европскиот Парламент Антонио Тајани,

Почитувани членови на Европскиот Парламент,

Почитувани членови на Европската комисија,

 

Почестен сум и повеќе од среќен за вашата покана и сакам да ја изразам мојата благодарност за вашето срдечно добредојде. За нашиот македонски народ ова е историски момент. Ова е прв пат, еден премиер на нашата земја да одржи говор пред Европскиот Парламент, на својот, мајчин јазик.

 

Но сепак, имам чувство како да сум дома. Се чувствувам толку пријатно и толку ми е природно да бидам тука. Во домот на кој му припаѓаме – во домот на нашето, европско семејство.

 

Да, се чувствуваме поканети, се чувствуваме добредојдени. Како што секако знаете, народот во нашата земја е исправен на уште еден историски крстопат.

 

Во пресрет на тој нов, историски предизвик, во текот на последните неколку недели, добивме големо охрабрување од вас. Многу членови на Европскиот Парламент, лидери на земјите-членки на ЕУ, лидерите на Европскиот Совет и на Европската Комисија, ја посетија нашата земја за да ја покажат својата поддршка за претстојниот референдум на 30 септември, кога македонскиот народ ќе одлучи за Договорот со Грција од Преспа.

 

Граѓаните знаат каква одлука треба да донесат. Тоа не е лесна одлука. Ќе бидеме Северна Македонија, но со признаен јазик и признаена националност. Но, исто така знаеме какви се придобивките од таа одлука, и знаеме дека ова е најдобрата шанса што нашата земја ја добила досега.

 

И знаеме дека тоа е шанса еднаш засекогаш. И нема да ја пропуштиме. Ќе ја зграпчиме таа шанса зашто тоа е нашиот билет за Европската Унија и за НАТО.

 

Почитувани членови на Европскиот Парламент!

 

Пред само неколку дена го прославивме Денот на независноста.

На 8 септември 1991 година, огромно мнозинство од нашите граѓани гласаа за слободна, независна и суверена држава. Овој импресивен резултат беше заснован на широк консензус. Луѓето ја ставија судбината на земјата во прв план, се издигнаа над нивните политички определби. Сите етнички и општествени групи, кои што сонуваа подобар живот во своја, независна држава.

Имав 17 години во таа историска 1991. Бев уште еден од многуте млади луѓе што сонуваа за живот во слободно општество, што ја сонуваа својата иднина во отворено општество, насочено кон прогрес.

 

Не сакавме повеќе останеме во она што се претвораше во режим од поранешната Југославија. Не сакавме да бидеме изолирани од останатиот дел од светот.

 

Сакавме да создадеме демократска земја на можности, на фер општество, заедница на просперитет, каде што правилата на законот гарантираат правда и каде што ќе бидеме безбедни и сигурни.

 

Нашата генерација беше полна со надеж. Ние длабоко верувавме во шансата што ја имаме. Верувавме во крајот на политичките репресии, во крајот на сиромаштијата. Верувавме во подобар живот во независна, слободна Република Македонија. Ние бевме сигурни дека следната генерација ќе има многу подобра иднина отколку што некогаш сме сонувале.

 

Сонувавме да бидеме дел од европското семејство.

 

Земјите од Балканот припаѓаат на европското семејство - географски, историски, културно, вредносно, и својата иднина ја гледаат како дел од Европската Унија. Перспективата за членство во ЕУ е мобилизирачки фактор кој ги обединува сите општествени чинители и движечка сила за успешно спроведување на реформите и справување со предизвиците со кои се соочуваме на тој пат.

 

Нашите луѓе работеа многу напорно за да ги остварат своите сонови, за да ги постигнат своите цели.

 

Да, направивме напредок, но сè уште не е доволно. 27 години подоцна, некои од нашите соништа сè уште не се оствариле и не сум задоволен - затоа што знам дека можеме да направиме подобро. Ние се бориме со внатрешни политички конфликти, се бориме да не бидеме изолирани од остатокот од светот и имавме конфликти со нашите соседи.

 

И сè уште се соочуваме со големи предизвици за мала, млада земја.

 

Но, ние никогаш не ги изгубивме нашите визии и никогаш не престанавме да се бориме за нашата подобра иднина.

 

Нема да се откажеме сега.

 

Веруваме дека сме свои на своето, и силно веруваме во подобра иднина. Во иднина како земја почитувана членка на меѓународната заедница и на ова гордо европско семејство.

Приклучувањето кон ова семејство ќе значи поголема стабилност за сите нас и поголем просперитет дома.

 

Како Претседател на Владата на Република Македонија, ве уверувам дека правиме сé за да ги постигнеме стандардите на Европската Унија. Ги знаеме препораките, тие се нашите приоритети: Независни и демократски институции, владеење на правото и борбата против корупцијата и професионална јавна администрација како сервис за граѓаните.

 

Знаеме, ни претстои уште долг пат. Но, вашето топло добредојде и поттик, ни дава силна мотивација и сила да продолжиме со нашата реформска агенда.

 

Европската идеја е водечката сила и инспирација да ги решаваме горливите отворени прашања во регионот. Република Македонија е еклатантен пример: силната верба во нашата европска иднина беше клучниот мотив за постигнување на историскиот договор со Грција, и на тој со Бугарија.

 

Горди сме на двата договори. Им благодарам на моите пријатели Ципрас и Борисов.

 

Ние сме успешна европска приказна, како автентичен модел на функционална мулти-етничка демократија. Еден вид Европа во мало - ние секојдневно го живееме Европското мото „Обединети во различностите“, со сите предности и предизвици.

 

И политичката криза низ којашто поминавме беше всушност борба за вредности каква што се одвива и во европски рамки - борба за либералните вредности на владеење на правото, човековите права и слободи, демократското  владеење, отворената економија, наспроти авторитарниот национализам.

 

Нашите граѓани го направија изборот, се определија за европските вредности, за Европска Македонија. Ние сакаме да послужиме како пример и инспирација за решавање на сите билатерални прашања на Западен Балкан и даваме силна поддршка на изнаоѓање одржливи решенија, засновани на европските вредности и меѓународното право кои трајно ќе го стабилизираат регионот и ќе го подготват за интеграција во ЕУ.

 

Едно од најважните прашања што требаше да се решат беше нашиот спор за името со Грција - бидејќи тоа е услов да се започнат преговорите за пристапување во ЕУ и НАТО.

 

Силна мотивација и модел за трагање по решение на ова наше прашање со Грција беше токму Европската Унија, како најуспешен мировен проект во светот. Модел кој реши големи историски конфликтни ситуации и ги претвори во одржлива заедница на пријателство и доверба.

 

Ние ја споделуваме оваа европска вредност! Нашето политичко недоразбирање со Република Грција, со помош на нашите европски пријатели, го претвораме во заедница на добри и пријателски соседи.

 

И навистина сакам да му се заблагодарам на мојот пријател Алексис Ципрас, знаејќи дека и за него не е лесно. Тоа е она што треба да направат одговорните лидери – имавме деликатни, чувствителни преговори. Обајцата се откажавме од по нешто, но и обајцата добиваме толку многу во интереси на нашите народи. Во име на иднината.

 

Прекинавме спор, кој беше пречка и за нашите земји цели 25 години. Ја поставивме основата за нови, пријателски односи, за партнерство, кое ќе ја подобри стабилноста, безбедноста и економијата во нашиот регион. Се договоривме за спецификите на нашите идентитетски посебности отсега за вечноста.

 

И веруваме дека ќе го направиме вистинскиот избор. Веруваме дека имаме добар, достоинствен договор што го потврдува нашиот идентитет и ја гарантира нашата држава иднина.

 

Договорот од Преспа е модел за решавање на вакви прашања и за други слични ситуации во светот.

 

Почитувани европратеници,

 

Договорот од Преспа е компромис за да се поместиме од статус кво ситуацијата и да тргнеме напред, кон иднината.

 

Сега сме на местото од кое имаме можност да го напуштиме минатото, да го оставиме зад себе, и да зачекориме во иднината.

 

На граѓаните во нашите две земји е да одлучат дали ќе го премостат прагот на иднината.

 

За Република Македонија, тоа е можност која толку долго ја чекавме. Во 1991 година гласавме за независност. На референдум. Сега, повторно на референдум треба да го направиме следниот чекор: Да создадеме реална можност да станеме 30-та земја членка на НАТО, и да го започнеме да затвораме поглавје по поглавје до членство во Европската Унија, во европското семејство.

Референдумот на 30 септември, е многу повеќе одколку само референдум за Договорот од Преспа. Тоа е референдум за иднината. Тоа е референдум за нашата втора независност.

Референдум со историски димензии како оние од 1991 година.

 

Бидејќи знаеме дека нашата слобода и независност како мала земја е загарантирана само како членка на меѓународната заедница, како членка на ЕУ и НАТО. Знаеме дека не само Република Македонија, туку и сите наши соседни земји ќе имаат подобра иднина кога ќе дејствуваме како сојуз, како семејство.

 

Интеграцијата на балканските држави во ЕУ ќе донесе уште поголема стабилност во цела Европа.

 

Нема силна Европа без успешен Балкан. Успешен Балкан е Балкан интегриран во ЕУ. Оваа визија не мотивираше да го направиме историскиот чекор и со тоа да ги поттикнеме процесите на помирување, градење заедништво и сојузништво во регионот.

Консолидацијата на Европската унија може и треба да се одвива паралелно со европската консолидација на Балканот.

 

Придобивките се повеќекратни за самата Унија:  јакнење на стабилноста во Европа, придонес во негувањето на европските вредности, поуспешно справување со безбедносните предизвици, миграциите, борбата против тероризмот, спречување на влијанието на трети страни, зајакнување на улогата на ЕУ на меѓународната сцена.

 

Впрочем и справувањето со безбедносните ризици за време на миграциската криза покажа дека сме упатени едни на други и дека можеме да бидеме веродостојни партнери и сојузници.

 

Европската интеграција на Балканот е геостратегиска инвестиција за стабилна, силна и обединета Европа базирана на заеднички вредности и стандарди.

 

Почитувани членови на Европскиот Парламент,

 

Членството во ЕУ ќе донесе многу придобивки и нови шанси за народот во Република Македонија. ЕУ и НАТО ќе ни овозможат да ја зајакнеме економијата. Уште сега можеме да го видиме тоа: Економијата е во нагорна линија, стапките на раст се зголемуваат секој месец. Странските инвестиции се наша реалност, а знаеме дека ќе ги има и сè повеќе

 

ЕУ и НАТО се шанса за подобар животен стандард за генерациите што доаѓаат: Членството во ЕУ и НАТО е гаранција за нашата независност, слобода и демократија. Подобро образование, подобра здравствена заштита, подобра инфраструктура. Ова се шансите што ги добиваме, тоа се одговорноста што треба да ја преземеме.

 

Знаеме дека од нас зависи.

 

Ние, исто така, знаеме со што можеме да му возвратиме на нашето европско семејство: Можеме да ја дадеме нашата лојалност, како што веќе докажавме во многу случаи.

 

Можеме да возвратиме со вистинска страст за европската идеја.

За нас, Европа значи многу повеќе отколку само унија, отколку само раст и економска сигурност. За нас, Европа значи да живееме во модерно, рамноправно и отворено општество, со јасни демократски стандарди, во кое владее правото, во кое живее солидарноста, во кое функционираат подобри судови и во кое правата се еднакви за сите.

 

Како мултиетничка земја, знаеме и ги почитуваме придобивките од заедништвото. Го негуваме концептот „Едно општество за сите“ и знаеме дека силата на општеството доаѓа од единството. И затоа во нашата земја имаме широк консензус за влез во ЕУ и во НАТО.

 

Во тој консензус се обединети Македонците, Албанците, Турците, Ромите Србите, Бошњаците, Власите, Египќани, Бугари и сите останати.

 

Кога се работи за стратешките интереси на нашата земја, посакувам, тоа да биде така и во политиката.

 

Во сите анкети, повеќе од три четвртини од народот во Република Македонија го поддржува членството во ЕУ и ги поддржува европските вредности.

 

Да, нашите луѓе сакаат да бидат дел од ова семејство. Се чувствуваме европски и припаѓаме на Европа. Во 1991 година, кога имав 17 години, ова е сè за што сум сонувал: да бидеме  дел од европското семејство. Да имаме европска иднина. Нашите млади луѓе сонуваат за ова и денес.

 

Сега, 27 години подоцна, како премиер, во име на граѓаните на мојата земја, зборувам во Европскиот Парламент на својот македонски јазик.

 

Сега ние, одлучуваме за нашата иднина и сме благодарни за овој историски момент. Горди сме што нашата сакана земја конечно има шанса да го заокружи членството во ЕУ и НАТО.

 

Можам да го почувствувам тоа во овој момент. Можам да почувствуваме колку сме блиску до остварувањето на сонот за европска Македонија.

Затоа верувам дека референдумот ќе биде успешен и дека нашите граѓани ќе гласаат за Европа!

 

Референдумот кој го организираме на 30 септември е наш влог, наш придонес за посилна Европа, за единство и поголема стабилност во регионот.

 

Денешниот настан и оваа покана за денешното мое обраќање ја гледаме како силна поддршка на Европскиот Парламент за нашиот европски пат, за да го фатиме вистинскиот правец.

 

Благодарам

Во пресрет на утрешната, официјална посета на Република Македонија, Претседателот на Владата на Република Македонија Зоран Заев денеска го прими министерот за Европа и надворешни работи на Република Албанија, Дитмир Бушати.

 

На средбата, на која присуствуваше и министерот за надорешни работи Никола Димитров, се разговараше за билатералните односи меѓу двете земји, како и за перспективите на натамошната соработка во области од заеднички интерес, вклучително економијата, трговската размена и интерконективноста.

 

Премиерот Заев го информираше министерот Бушати и за актуелните активности поврзани со спроведувањето на референдумот за договорот од Преспа, како важен чекор за нашата земја и за нашите евро-атлантски интеграции.

 

Тој ја истакна поддршката што за нашата земја во таа насока доаѓа од актуелната Влада на Република Албанија, и посебно од премиерот Рама.

 

„За нас нема алтернатива кога станува збор за исполнување на нашите стратешки цели, членството во ЕУ и НАТО, и за граѓаните на Република Македонија учеството и гласот на референдумот е глас за иднината на нашата земја“, рече премиерот Заев на средбата со министерот за Европа и надворешни работи на Република Албанија Дитмир Бушати, и додаде дека охрабува и непосредната поддршката на европските лидери, како и на лидерите на НАТО и ЕУ, кои во овој период ја посетуваат Република Македонија, исто како политичките лидери од регионот.

 

Двајцата соговорници, Претседателот на Владата на Република Македонија Заев и министерот за надворешни работи на Република Албанија Бушати, разменија и мислења околу состојбите во регионот и перспективите за негово интегрирање во европските и евро-атлантските структури.

Претседателот на Владата на Република Македонија Зоран Заев, придружуван од министерот за надворешни работи Никола Димитров и своите соработници, денеска, се сретна со делегација на Кралството Холандија, предводена од министерот за надворешни работи, Стеф Блок, со кој разговараше за важноста на големата историска одлука, пред којашто се исправени граѓаните на Република Македонија, претстојниот Референдум на 30-ти септември, како и реформските процеси во земјата за исполнување на евроатлантските интеграции.

Премиерот Заев, посакувајќи му добредојде на холандскиот министер потенцираше дека неговата посета се случува во историски период за Македонија, за време на кампањата за Референдум, со кој е заокружен неколку деценискиот спор со Грција и кога граѓаните на Република Македонија ќе имаат можност слободно и демократски да го изразат својот став.

Претседателот на Владата на Република Македонија Заев искажа благодарност за континуираната поддршка во градењето на нашата земја како европска и демократска и изрази уверување дека Владата останува фокусирана на обезбедување на конкретни и одржливи резултати во правец на реформите во областа на судството, безбедносните служби, јавната администрација, слободата на говорот и обезбедување на подобрување на условите на медиумите,  за функционирање на независни медиуми, како и продолжување на напорите за интензивирање на борбата против корупцијата.

Истакнувајќи, дека Македонија има направено огромни чекори на патот кон стабилноста на државата, шефот на холандската дипломатија Блок на премиерот Заев му честиташе за постигнатиот Договор со Грција, оценувајќи дека со него е отстранета последната формална пречка за почеток на пристапните разговори за членство на Македонија во НАТО, со што двете земји го зацврстија патот на пријателството и за зголемена соработка за доброто на граѓаните.

Истовремено, министерот Блок ја пренесе поддршката која континуирано ја дава пријателска Холандија, акцентирајќи дека  таа е базирана исполнувањето на условите и имплементацијата на реформите, кои, како што подвлече, се клучни кон отворањето на патот на Македонија кон ЕУ и НАТО.

Двајцата соговорници се согласија дека почитувањето и практицирањето на политиката на добрососедски односи и соработка ја подобрува и сликата на целиот регион и отвора можност за просперитет на сите земји од западниот Балкан. 

На состанокот се разговараше и за подобрување на билатералната соработка помеѓу Холандија и Македонија која веќе се одвива во рамките на неколку проекти.

Беше заклучено дека исполнувањето на условите на Македонија за влез во НАТО  и пристапувањето во европската заедница ќе даде дополнителен импулс за стопанскиот развој и ќе испрати порака до инвеститорите дека е земја интересна за бизнис перспектива.

Министерот во Владата на Република Македонија задолжен за дијаспора, Едмонд  Адеми во придружба на директорот на Агенцијата за иселеништво на Република Македонија, Никола Шалваринов, денеска имаа средба со Претседателот на Република Словенија, Борут Пахор и со Претседателот на националното собрание (Државни збор) на  Словенија,  Дејан  Жидан. На  овие  средби  се разговараше за билатералните односи меѓу двете земји, натамошниот развој на односите  во повеќето области  од взаемен интерес, интеграциските процеси  на Република Македонија во ЕУ и НАТО како и актуелните политички состојби во Република Македонија, со посебен нагласок за договорот меѓу  Република Македонија и Република Грција и одржувањето на референдумот.

 
Двајцата соговорници дадоа силна поддршка на Република Македонија во процесот на евро-атлантските процеси, констатирајќи дека Република  Словенија  на сите средби со претставниците на Европската унија, ја поддржува Република Македонија во патот кон ЕУ и НАТО.

Министерот Адеми, до двајцата соговорници изрази благодарност за пријателскиот однос на сите институции на Република Словенија, дадени на сите средби на претседателско на премиерско  и ресорно ниво во однос на  содржински прашања коишто Република  Македонија треба да ги оствари до крајот на оваа година. 
Претседателот Пахор и  претседателот Жидан, укажаа на одредени предизвици со кои што  Република Македонија ќе се соочи на патот кон интегративните процеси, со кои претходно и Република Словенија беше соочена. 
Соговорниците се сложија со тоа дека идното  членството на РМ во ЕУ и НАТО, претставува историска придобива, но и голема обврска во наредниот период.
За време на разговорите се отворија повеќе прашања  со коишто РМ ќе се соочи во иднина, но единствено средство за нивна реализација треба да биде широкиот општествен дијалог со сите страни во Република Македонија. 
Воедно, двајцата соговорници побараа и конкретно нивно вклучување, заедно со државните институции од Република Словенија за да помогнат преку пренесувањето на нивното искуство, се со цел да се олесни патот кон ЕУ и НАТО. 

На средбите стана збор и за улогата на дијаспората од Република Македонија во словенечкото општество и нивното позитивно интегрирање како и  можните форми на  вклучување во меѓусебната соработка. 

Разговорот на министерот Адеми со двајцата највисоки претставници  од Република Словнија,  претседателот Пахор  претседателот  Жидан, заврши со еден заеднички заклучок, дека референдумот е од клучно историски значење за РМ во патот кон ЕУ и НАТО и друго повторување нема да има и истиот треба да се поддржи и од опозицијата и позицијата и граѓаните на РМ. 

Претседателот на Република Косово Хашим Тачи денеска престојуваше во работна посета на Република Македонија и во рамките на агендата на посетата имаше средба со Претседателот на Владата на Република Македонија Зоран Заев.

Премиерот Заев и косовскиот претседател Тачи имаа тет-а-тет средба по што следуваше билатерална сесија на која делегациите на двете земји ја потврдија досегашната одлична соработка и разговараа за идните проекти што ќе ги зацврстат и унапредат политичките, и особено економските врски меѓу Република Македонија и Република Косово.

Претседателот на Владата на Република Македонија и Претседателот на Косово одржаа и заедничка прес конференција на која се обратија пред претставниците на медиумите кои покажаа особен интерес за оваа посета.

Премиерот Заев во своето обраќање истакна дека двајцата лидери оствариле средба како лидери на две држави што немаат отворени прашања, и дека двете земји ги одржуваат и постојано ги унапредуваат позитивните и конструктивни билатерални односи, и соработката на сите нивоа остварени досега

„Разговаравме да отвориме нови можности за натамошно унапредување и продлабочување на нашите меѓусебни односи.

Такви можности се отвораат со заедничката поддршка за отворање на граничниот премин Белановце-Станчиќ, како и со неопходноста инфраструктурно поврзување какво што ќе се оствари со изградбата на делницата на автопатот Блаце-Скопје.

Убеден сум дека тоа ќе ја интензивира економската соработка и ќе го зголеми обемот на трговијата меѓу двете земји, а добар чекор ќе биде воспоставување на Мешовит комитети за соработка и за идентификување на дополнителни заеднички проекти, како и за градење заеднички стратегии за подобра интеракција помеѓу деловните заедници на двете земји“, рече премиерот Заев.

Тој додаде дека енергетското поврзување и енергетска соработка е секако еден од заеднички приоритети, и нагласи дека Република Македонија ќе иницира изградба на гасовод за Косово, како остварлив проект во рамките на Берлинскиот процес.

„Важна и заедничка точка во нашето поврзување е и регионалната соработка и интеграцијата во ЕУ и НАТО. Тоа е нашата стратешка определба за која веќе имаме потврдени позитивни искуства. Тоа е резултат на нашиот пристап во овој процес. Тој е многу отворен, конструктивен и искрен. Без никакви скриени агенди“, потенцираше Претседателот на Владата на РМ, Зоран Заев.

Премиерот Заев истакна дека Република Македонија го поздравува дијалогот меѓу Приштина и Белград, и оцени дека напредокот во таа насока го сметаме како клучен за одржливата регионална стабилност и развој го зајакнува мирот, безбедноста и просперитетот на Косово, Србија и целиот регион.

„Многу е важно лидерите во регионот да бидат обединети во истите цели: одржлив мир, економски развој, регионална соработка и членство во ЕУ“, рече премиерот Заев.

Во таа насока, Претседателот на Република Косово, во своето обраќање рече дека неговата земја останува посветена на решавањето на отворените прашања со Србија, и дека таа посветеност е втемелена на наоѓање решение соодветно на европските вредности за излезни решенија за вакви спорови, и дека конечното решение нема да ги повреди интересите на сите останати соседи на Република Косово во однос на нивниот територијален интегритет.

Претседателот на Косово Хашим Тачи пренесе дека му посакал на премиерот Заев успешна завршница на референдумскиот процес на кој граѓаните на Република Македонија ќе ја донесат нивната одлука за договорот од Преспа и за исполнување на завршните процеси од членството на земјата во ЕУ и НАТО.

Видео од редовната владина прес-конференција на портпаролот на Владата на Република Македонија, Миле Бошњаковски и министерот за информатичко општество и администрација, Дамјан Манчевски.

Независност и слобода. Тоа се стремежите за кои нашиот народ се бореше низ славното минато. 8 септември деведесет-и-првата (91-та), беше остварување на тој идеал, историски ден кога граѓаните, на референдум, избраа иднина во своја, самостојна и независна држава.

 

Тогаш имав 17 години и знаев дека местото на Македонија е со западниот, со демократскиот свет, во Европа. Од тогаш поминавме низ многу тешки моменти, а некои од нашите најголеми соништа, до ден денес, останаа неисполнети.

 

Народе мој, време е!

 

Време е да бидеме храбри и да гледаме кон иднината!

 

Денес, кога сите заедно стоиме пред најголемиот предизвик во историјата на нашата земја, имаме единствена можност да ја зграпчиме оваа историска шанса, овој втор референдум кој ќе ја зацврсти нашата независност и да кажеме да, за стабилна и сигурна иднина, за иднина во Европа.

 

На 30 септември, на референдумот, НИЕ одлучуваме. Нашиот пат не е лесен, но добро знаеме што добиваме. Знаеме дека сме свои на своето, Македонци кои зборуваат признаен македонски јазик, граѓани кои се определуваат за подобар живот, со повисоки приходи, за добри работни места. Сето тоа во нашата убава Македонија, безбедна, сигурна, мирна, пријателска и стабилна. Европска.

 

Во преговорите и со договорот ние ги зачувавме нашиот јазик и националност, нашата култура, ја зачувавме и нашата историја. Но, со успешен референдум ние како држава ќе ја осигуриме засекогаш и нашата иднина.

 

Почитувани граѓани,

 

Овој историски момент е поголем од нас, од нашите партии, кавги или лични интереси.

 

За иднината на нашите деца се работи.

 

Да излеземе сите на референдумот, за европска Македонија!