Претседателот на Владата на Република Македонија, Зоран Заев денеска се сретна со Ален Данкан, британскиот државен министер за Европа и Америка.

На средбата е изразена поддршка за успешен референдум, како демократски начин на израз на граѓанската волја. Британскиот министер Данкан го поддржа процесот на интеграции на Македонија и охрабри земјава да ги оствари стратешките цели, што е важно за Mакедонија, но и за целиот регион. Секоја поединечна одлука за бојкот на референдумот е бојкот на иднината на државата и на демократијата, констатирано е заеднички на средбата.

-Огромно мнозинство граѓани се за членство на Република Македонија во ЕУ и во НАТО, затоа што тоа ќе донесе стабилност и безбедност во државата и европски животен стандард. Јас сум уверен дека тоа ќе се преслика на претстојното гласање за референдумот. Очекувам сите политички субјекти во државата и поединци да најдат сила и дека ќе се издигнат над политичките интереси и ќе одговорат на обврската да се изјаснат на референдумот, во овој историски момент за иднината на државата, рече премиерот Заев.

На состанокот се разговараше и за други актуелни политички и безбедносни прашања на домашен и регионален план. Заедничка оценка е дека евро-атлантските интеграции на Македонија се придонес во регионалната стабилност и безбедност и економските перспективи за сите граѓани.

Министерот задолжен за комуникации, отчетност и транспарентност во Владата на Република Македонија Роберт Поповски, денеска оствари средба со претставникот на ОБСЕ за слобода на медиумите Харлем Дезир, во придружба на новоименуваниот шеф на мисијата на ОБСЕ во нашата земја, амбасадорот Клеменс Која.

 

Претставниците на ОБСЕ на состанокот покажаа интерес за неколку прашања поврзани со медиумите, со посебен акцент на постапката за донесување на новиот Закон за аудио и аудиовизуелни медиумски услуги, за прашањето на статусот на онлајн медиумите во медиумската регулатива и за мерките за заштита од лажните вести, како и за безбедноста на медиумските работници во професионалното извршување на нивната работа.

 

Министерот Поповски потенцираше дека Владата на Република Македонија во предвидениот рок, согласно итните реформски приоритети од Планот 3-6-9, ги донесе измените на Закон за аудио и аудиовизуелни медиумски услуги уште пред една година и ги пушти во Собранието на Република Македонија.

 

За жал, како што истакна Поповски, пратениците на опозицијата во собранието упорно ја одлагаат расправата за донесување на новиот закон и со тоа го усложнуваат и проблематизираат целиот процес за темелни медиумски реформи, особено оние најзначајните кои се однесуваат на МРТ и на Агенцијата за аудио аудиовизуелни медиумски услуги.

 

Во однос на регулативата на онлајн медиумскиот простор Поповски нагласи дека Владата на РМ ги следи најдобрите европски практики во оваа сфера и, дека, дополнително, овој став е заземен по широките и темелни консултации со организациите на медиумската заедница во земјата, како насока дека интернет просторот треба да остане слободен.

 

Министерот Поповски додаде дека во таа насока ја смета саморегулацијата како извор за најдобри практики во овој дел, и дека токму принципите на саморегулација се најдобрата алатка за борба против лажните вести.

 

Во однос на безбедноста на извршувањето на професионалната работа на медиумските работници, министерот Поповски потенцираше дека Владата на РМ останува на ставот нула толеранција за секој обид за загрозување на безбедноста на новинарите и останатите професионалци во медиумската заедница.

 

Претставникот на ОБСЕ за слобода на медиумите Харлем Дезир на средбата изрази задоволство што му се укажа прилика за медиумските реформи да разговара со министерот Поповски и ја нагласи заложбата на ОБСЕ да остане во тесна соработка со Владата на РМ во спроведувањето на овие реформи.

Премиерот Зоран Заев, денеска, придружуван од заменик претседателката на Владата на Република Македонија, Радмила Шекеринска и повеќе свои соработници, се сретна со министерката за одбрана на Република Италија Елизабета Трента, која со повеќечлена делегација е во официјална посета на нашата земја.

Премиерот Заев, посакувајќи и топло добредојде, со министерката Трента разговараше за претстојниот референдум, како историски момент, кој означува почеток на остварување на евроатлантските аспирации на Македонија, кои се долгогодишни стратешки приоритети на земјата.

Во разговор за идното членство на Република Македонија во НАТО и Европската унија, министерката Трента го поздрави ентузијазмот на премиерот Заев и подвлече дека доаѓа во Македонија да ја искаже поддршката на Италија за евроатлантските аспирации на Македонија и да понуди помош, доколку е потребно, за да се развива и понатаму пријателството меѓу двете земји и останатите земји во регионот на Западен Балкан.

Министерката Трента, на премиерот Заев му рече дека референдумот е важен за македонските граѓани, но и за сите други пријатели кои ја поддржуваат земјата и нејзините заложби за влез во Европската унија и НАТО.

Двајцата соговорници се согласија дека членството на Македонија во НАТО обезбедува сигурност, стабилност и безбедна иднина за сите граѓани во земјата, особено за младите, кои заслужуваат да ги почувствуваат придобивките кои ги нуди европската заедница.

Беше оценето, дека Македонија заслужува да стане 30-та членка на Северноатлантската алијанса и како дел од Сојузот, да остане фактор на стабилност во регионот, како земја чија стратешка определба е да одржува пријателство и соработка со сите соседни земји.

Премиерот Заев на министерката Трента и ја повтори заложбата и политичката волја на актуелната Влада да продолжи со клучните реформи за зајакнување на владеењето на правото, борбата против корупцијата, реформата на безбедноста и разузнавањето и реформата на јавната администрација, со цел интеграција во НАТО и ЕУ.  

Тој потенцираше дека претстојниот референдум е момент за одлука за европската иднина за Македонија и дека одговорноста е на сите релевантни политички субјекти во земјата, вклучувајќи ја и опозицијата, со која и досега заедно учествуваа во потребните реформи. 

Премиерот Заев и министерката Трента искажаа уверување дека двете земји и понатаму економски ќе соработуваат и ќе се трудат да ја зголемат туристичката и културната размена меѓу Република Македонија и Република Италија.

Претседателот на Владата на Република Македонија, Зоран Заев, се сретна со Мануел Сарацин, пратеник во германскиот Бундестаг. 

 

На средбата е изразена поддршка за успешен референдум. Германскиот пратеник, Сарацин, оцени дека ова е најдобрата година што можеше да и се случи на Македонија, кога се отворени шансите за членство на Република Македонија во Европската унија и во НАТО. Заеднички е констатирано дека сите политички субјекти и граѓани во државата  треба да покажат одговорност, за остварување на овие стратешки државни цели. 

 

Премиерот Заев изрази очекување дека референдумот ќе биде успешен. 

 

-ЕУ и НАТО се мнозинска волја на граѓаните на Република Македонија, кои очекуваат европски живот и интеграција во најголемите сојузи во светот. Очекувам таа мнозинска волја да се одрази и на референдумското гласање. Македонија нема друга алтернатива освен интеграциите во НАТО и ЕУ.  Повикуваме и ќе повикуваме сите да покажат одговорност и да се изјаснат на референдумот, затоа што во прашање е иднината на државата, рече премиерот Заев.

 

Претседателот на Владата, Заев и германскиот пратеник Сарацин, кој доаѓа од партијата на Зелените, зборуваа и за отворените можности за интензивна економска соработка со Германија, како и за развојот на “зелената агенда“,  во полза на здрава и чиста животна средина во Македонија, според европски стандарди. 

 

Пречекан со највисоки државнички почести, Секретарот за одбрана на Соединетите американски држави Џејмс Норман Матис, во рамките на својата официјална посета на нашата земја, денеска оствари средба Претседателот на Владата на Република Македонија Зоран Заев.

 

Претседателот на Владата на Република Македонија Зоран Заев, придружуван од членовите на владината делегација заедно со Заменичката претседателка во Владата на РМ и министерка за одбрана Радмила Шекеринска, потоа одржаа пленарна сесија на која Секретарот за одбрана на Соединетите американски држави Џејмс Матис, беше придружуван од амбасадорот на САД Џејмс Бејли, како и членови на Секретаријатот на одбрана на САД и претставници на американскиот Пентагон.

 

 Претседателот на Владата на Република Македонија Зоран Заев, Заменичката претседателка во Владата на РМ и министерка за одбрана Радмила Шекеринска и Секретарот за одбрана на Соединетите американски држави Џејмс Матис одржаа и заедничка прес конференција на која говореа за најважните теми разговарани на средбата.

 

Премиерот Заев во своето обраќање на прес конференцијата истакна дека посетата на Секретарот за одбрана на Соединетите американски држави Џејмс Матис доаѓа во еден исклучителен период, кога граѓаните на Република Македонија се подготвуваат на најдемократскиот начин, на референдум, да го дадат својот глас за прифаќање на договорот со Грција од Преспа, а со тоа и за нашето членство во ЕУ и НАТО.

 

„Вашата посета е уште една потврда за афирмирање и охрабрување на нашето стратегиско партнерство, и претставува силен сигнал за исправноста на политиките на Република Македонија што ги презема на планот на промовирање на дијалог, толеранција и регионална соработка. Во таа насока, поддршката на Соединетите американски држава е секогаш тука и претставува силно охрабрување“, нагласи премиерот Заев.

 

Претседателот на Владата на РМ потенцираше дека поканата за членство во НАТО што ја добивме во Брисел  на 12 јули оваа година, не охрабри да продолжиме уште поинтензивно со реформите и со подготовките кои што ќе не направат 30-та членка на Алијансата.

 

„За Република Македонија интеграцијата во НАТО и ЕУ нема алтернатива. Тоа го потврдува и огромното мнозинство на нашите граѓани. За граѓаните на Република Македонија консензусот по прашањето на нашето членство во НАТО е резултат за прифатените вредности што ги дели алијансата. Тоа го докажуваме и со нашето активно учество во мисиите на НАТО. Армијата на Република Македонија е посветен партнер на американските и на војниците на другите земји членки на НАТО во мировните мисии“, рече премиерот Заев.

 

Заменичката претседателка во Владата на РМ и министерка за одбрана Радмила Шекеринска потсети дека за прв пат во нашата историја како независна држава ни се случува во една година, за помалку од 6 месеци, секретар за одбрана на САД и македонски министер за одбрана да имаат 2 средби, во Вашингтон и во Скопје, и дека тоа говори и за личната заложба на Секретарот за одбрана на Соединетите американски држави, Џејмс Матис за Македонија и нејзиното членство во НАТО.

 

„Се наоѓате во една Македонија која е поинаква од државата која ја гледавме до пред нешто повеќе од една година... Денес, Македонија е земја со НАТО покана, без отворени прашања со своите соседи, преставува пример за соработка во регионот, и земја подготвена од докажан партнер да стане сојузник и член во најуспешниот безбедносен и политички сојуз. Немаме дилема дека нашата иднина е во НАТО – Алијансата, на иста маса со Соединетите Американски Држави и со другите сојузници“, рече министерката Шекеринска.

 

Шекеринска изрази уверување дека македонските граѓани на претстојниот референдум на 30 септември ќе ја препознаат шансата и ќе се изјаснат за Македонија, безбедна и просперитетна, членка на НАТО – Алијансата и Европската Унија.

 

„Се сеќавам на Вашите зборови во Пентагон, дека не сакате да ја видите Македонија запрена пред вратите на НАТО. Во меѓувреме помогнавте Македонија да ја добие НАТО поканата, а денеска сте тука во Македонија. Убедена сум  дека на 30 септември граѓаните ќе се изјаснат дека се ЗА Македонија која ќе биде безбедна, сигурна, просперитетна, економски развиена, ЗА Македонија која рамо до рамо со САД и со другите сојузници помага во градењето на заеднички мир и просперитет “, заклучи министерката.

 

Секретарот за одбрана на Соединетите американски држави Џејмс Матис во своето обраќање пред новинарите и македонската јавност се заблагодари за срдечниот пречек и за продуктивните разговори на средбите. Тој истакна дека оваа посета и пријателските разговори се потврда на силна взаемна поддршка на двете земји како стратешки партнери што споделуваат заеднички вредности.

 

Тој изрази надеж и им оддаде поддршка на сите што се залагаат за успешен исход на референдумот на 30 септември со што граѓаните на Република Македонија ќе направат уште еден голем историски чекор и што со одобрувањето на договорот од Преспа ќе обезбедат местото на земјата во НАТО, како партнер рамен со сите други земји членки.


Премиерот Заев на заедничкиот прес со Секретарот за одбрана на САД Матис и Шекеринска: Оваа посета е охрабрување за нашето стратегиско партнерство, и силен сигнал за исправноста на нашите политиките

 

Претседателот на Владата на Република Македонија Зоран Заев, Заменичката претседателка во Владата на РМ и министерка за одбрана Радмила Шекеринска и Секретарот за одбрана на Соединетите американски држави Џејмс Матис одржаа и заедничка прес конференција на која говореа за најважните теми разговарани на средбата

Изјавата на премиерот Заев за средбата со Секретарот за одбрана на Соединетите американски држави Џејмс Матис, ви ја пренесуваме во целост:

Почитуван Секретар за одбрана на Соединетите американски држави, господине Матис,

 

Денеска е уште еден свечен ден во нашата земја, заради посетата на највисокиот претставник на администрацијата на Соединетите американски држави кој ја посетува Република Македонија, Секретарот за одбрана на САД, почитуваниот господин Џејмс Норман Матис.

 

Почитуван господине Матис, дозволете ми, во мое име, во име на Владата на Република Македонија и во име на граѓаните на нашата земја, да ја изразам нашата голема благодарност за вашата посета.

 

Тоа е голема чест зашто доаѓа во еден исклучителен период, кога граѓаните на Република Македонија се подготвуваат на најдемократскиот начин, на референдум, да го дадат својот глас за прифаќање на договорот со Грција од Преспа, а со тоа и за нашето членство во ЕУ и НАТО.

 

Вашата посета е уште една потврда за афирмирање и охрабрување на нашето стратегиско партнерство, и претставува силен сигнал за исправноста на политиките на Република Македонија што ги презема на планот на промовирање на дијалог, толеранција и регионална соработка. 

 

Во таа насока, поддршката на Соединетите американски држава е секогаш тука и претставува силно охрабрување.

 

Посетите од нашите искрени пријатели даваат силна мотивација, како што беа посетите на Генералниот секретар на НАТО, господинот Столтенберг, како и посетата на командантот на Командата на американските сили во Европа и на Врховната команда на НАТО за Европа, генерал Куртис Скапароти.

За нас, исто така е значаен и интересот што господинот Матис го искажа и за нашите актуелни, домашни прашања кои се однесуваат на нашето членство во НАТО.

 

Му го пренесов нашиот интерес да организираме и да спроведеме успешен референдум како клучен момент за иднината на нашата земја.

 

Во духот на остварувањето на таа иднина, водиме политики за обединување на политичките фактори за ова прашање.

Повикуваме на единство кога станува збор за остварување на стратешките цели на граѓаните на нашата земја – членството во ЕУ и НАТО.

 

За Република Македонија интеграцијата во НАТО и ЕУ нема алтернатива. Тоа го потврдува и огромното мнозинство на нашите граѓани.

 

За граѓаните на Република Македонија консензусот по прашањето на нашето членство во НАТО е резултат за прифатените вредности што ги дели алијансата.

 

Тоа го докажуваме и со нашето активно учество во мисиите на НАТО. Армијата на Република Македонија е посветен партнер на американските и на војниците на другите земји членки на НАТО во мировните мисии.

 

Поканата за членство во НАТО што ја добивме во Брисел  на 12 јули оваа година, не охрабри да продолжиме уште поинтензивно со реформите и со подготовките кои што ќе не направат 30-та членка на Алијансата.

 

Нашите аспирации за членство во ЕУ и во НАТО подразбираат и добри соседски односи и регионална соработка.

 

Земјите од Западен Балкан, интегрирани во евро-атлантското семејство, се гаранција и за стабилна превенција од инволвирање на трети страни во регионот.

 

Постојано ги охрабруваме лидерите во регионот да се обединат за остварување на заедничките цели: одржлив мир, економски развој, регионална соработка и интеграција во Евро-атлантското семејство на народи.

 

Така се создава нова балканска иднина, и не радува што нашите стратешки партнери тоа го препознаваат, охрабруваат и го прифаќаат.

 

Благодарам.

Претседателот на Владата на Република Македонија, Зоран Заев заедно со Комесарот за проширување и соседска политика на Европската Унија, Јоханес Хан и претставникот на ОБСЕ за слобода на медиумите, Харлем Дезир со свои воведни обраќања денеска ја отворија конференцијата за земјите од Западен Балкан Денови на Медиумите којашто се одржува во Скопје, Република Македонија, а е во организација на Европската Комисија.

 

Комесарот Хан и претставникот на ОБСЕ Дезир во своите обраќања ги поздравија напорите на Владата на Република Македонија за  спроведување на медиумските реформи посочија на важноста од заедничко делување против лажните вести и зборуваа за состојбите и можностите на унапредување на слободата на медиумите во земјите од Западен Балкан.

 

Премиерот Заев во своето воведно обраќање истакна:

 

Ако во основата на оваа конференција, е темелната цивилизациска вредност - слободата на медиумите, прво на што треба да се стави акецентот е дека таа не може да се постигне, ниту да функционира сама по себе.

 

Слободата на медиумите е недозволиво да остане само декларација запишана во законите и резолуциите. За да биде жива, автентична и секојдневна пракса, таа мора да произлегува и да биде дел од еден економски одржлив, независен и плуралистички медиумски сектор, кој опстојува во функционални држава во која владее правото како гаранција за автентична медиумска слобода.

 

Уште еден феномен е многу важен и треба да се има предвид, кога зборуваме за условите во кои треба да се остварува слободата на медиумите. Тој феномен се однесува на драматичните промени во кои се најдоа традиционалните медиуми наспроти дигиталната еволуција, која ги зафати медиумите и го промени начинот на продукција и дитрибуција на вестите, како и навиките на медиумската публика.

 

Трендот на ширење дезинформации е најголем поткопувач на демократските и реформскитеп процеси, како и на европеизацијата на регионот.

 

Таквите пара-информации учествуваат во поткопувањето на владеењето на правото и на политичката стабилност која, меѓу другото, не помалку влијае и на работата на новинарите.

Лажните вести најчесто се наменети за да дискредитираат личности, да шират дезинформации, да предизвикуваат конфликт, омраза, параноја, заговор.

 

Во регионален контекст, лажните вести кои се насочени кон етничка, политичка и верска нетрпливост, се заеднички непријател на трендот на помирување на земјите од Западен Балкан и нивната конечна европеизација.

 

Кога зборуваме за состојбите на медиумите во Западен Балкан, неминовно е да се осврнеме и на ситуацијата на големото непознавање на медиумите на состојбите во соседните земји. Соработката на медиумите од регионот, со одредени ретки исклучоци, скоро и да не постои.

 

Тоа е исклучително плодно тло за регресивните сили и пропагаторите на евроскептицизам, национализам, и секакви форми на радикализам, од политички до верски и идеолошки.

 

Како на некој да не му одговара да излеземе од бурето барут.

 

Почитувани претставници на медиумите од регионот и од Европа,

 

Објективното и слободно известување е од клучно значење во градењето на демократијата, за воспоставување на добро владеење и за соодветна комуникација за реформите што се преземаат.

 

Оттаму доаѓа и одговорноста на политичките лидери, особено во земјите на Западен Балкан, како земји аспиранти за членство во ЕУ,  да ја гарантираат слободата на медиумите, вклучувајќи ја и безбедноста на медиумските работници и обезбедувањето пристојни услови нивната работа.

 

Суштината на медиумскиот бизнис лежи во информациите, т.е. во испорачување на вистина преку објективно и целосно информирање на јавноста и сето тоа сторено со почитување на етичките правила.

 

Тука сакам да нагласам дека јас сум застапник на концептот на саморегулација. Медиумските професионалци се тие што треба да ги постават стандардите за самите себе си. Така најдобро и најенергично ќе ги бранат, бидејќи токму тие сте најзасегнати.

 

Одговорите на овие прашања ќе дојдат токму од Вас, и од вашата креативност и ентузијазам да одговорите на предизвиците како најдобро да се заштитат слободата на изразување и право на информирање, и слободните и професионални медиуми.

 

Слободата на говор е загарантирано човеково право, но злоупотребата на тоа право, во форма на дезинформирање, наведување или пропагирање, што во случајот на Западен Балкан многу лесно се рефлектира врз целокупната безбедност и стабилност, не е ни одблиску слобода на говор.

 

Видовме и тука, во Република Македонија, но и во земјите на регионот, па и во некои земји во Европа, колку штетна може да биде пропагандата, дека тие лажни зборови честопати поттикнуваат вистинско и брутално насилство и агресивно однесување.

 

Затоа, како Влада, повеќе пати повикавме на конструктивна атмосфера и отворена дебата со граѓаните, без страв, заплашување и притисоци да градат сопствени ставови за секое отворено прашање.

 

Активната транспарентност е најлош непријател на лажните вести и дезинформациите. Затоа ми е особено драго што на ова издание на „Деновите на медиумите“, посебно место има темата медумска писменост.

 

Идеално би било граѓаните да развијат практика на следење на вести од различни извори и да бидат критични кон информациите кои ги консумираат. Но, не може да очекуваме секој граѓанин, што се информира од медиуми достапни на својот мобилен уред, да ја проверува информацијата пред да ја прифати како таква. Тоа е работа на регулаторните тела, и не помалку на медиумите, чијшто простор е директно узурпиран од таквата не само нелојална, туку и не етичка конкуренција.

 

Тоа е работа и одговорност и на јавните радиодифузни компании кои мора да бидат тврдина на објективното и незаисно новинарство. Извор на информаци на кои граѓаните секогаш ќе се повикуваат како на најрелевантни и од доверба.

 

Сакам да ве уверам дека вашите грижи, се и наши грижи.

 

Решенијата што ќе дојдат од вас, ќе бидат и наши решенија.

 

Клучот е во новинарската фела, не само на национално ниво, туку и на регионално. Да се саморегулира и се држи до етичките и морални стандарди. Владите и сите политички субјекти мораат да ги поддржат овие стандарди.

 

Оваа конференција на медиумите во регионот е убвана прилика за поголема и поинтензивна соработка.

 

Таа соработка треба да оди во насока пред сè на запознавање на состојбите во соседните држави, затоа што обединувањето во борбата против лажните вести е една од најдобрите одбрани од нив.

Претседателот на Владата на Република Македонија, Зоран Заев придружуван од министрите за транспорт и врски, животна средина и образование, Горан Сугарески, Садула Дураки, Арбер Адеми, заменичката министерка за финансии, Ширете Елези  и градночаланикот на општина Липково, Еркан Арифи денеска во општина Липково ја посетија локацијата кадешто се започнати градежни работи за изградба на прочистителна станица за вода за пиење.

 

„Денеска сме овде да означиме почеток на изградба на филтер станицата и доводниот цевковод за водоснабдување на Липково, проект вреден 84 милиони денари од кои 75 милиони денари се обезбедени од Владата на Република Македонија преку кредитната линија на Европската инвестициона банка, а 9 милиони денари се обезбедени од општина Липково. Ова е само почеток на водоснабдувањето на Липково. Се работи за вода пиење. Во 21 век не смееме да оставиме ниту едно село, ниту едно детенце во Македонија да остане без вода за пиење,“ потенцираше премиерот Заев во изјавата што ја даде за медиумите.

 

Премиерот Заев додаде дека се обезбедени околу 100 милиони евра за изградба и реконструкција на комунална инфраструктура и рече дека дел од овие средства се од ТАВ, околу 35 милиони евра, 20-тина се заштеди на јавните претпријатија, 50 милиони евра се нова кредитна линија од ЕИБ и 12 милиони евра се неискористени од постоечката кредитна линија на ЕИБ.

 

„Апелирам до општините коишто сеуште немаат искористено од тие пари да ги искористат до крај овие 12 милиони евра. Овде се направени такви алокации на средства кон општина Липково за овие 75 милиони денари. Верувам дека со многу брзо темпо, со ефикасни постапки ќе се пуштат цевките насекаде во Липково“, истакна Премиерот Заев и рече дека Владата останува посветена и сериозно ќе пристапува во реализацијата на вакви проекти кои значат решавање на елементарните потребни на граѓаните.

 

Министерот за транспорт и врски, Горан Сугарески во својата изјава информираше дека со реализацијата на овој проект се создаваат услови за развој на водоводна мрежа во 22 населени места од општина Липково и како што рече паралелно на тоа ќе се гради и цевковод во должина од 570 метри до Липково. Тој како и премиерот ги повика општините да изработуваат и доставуваат квалитетни проекти.

 

„Само да информирам дека од мај месец се склучени 20 договори за изградба на водоводи и канализација, дополнително имаме активни тендери за седум општини и до крај на годината очекуваме тој број значително да се зголеми“, рече министерот Сугарески и порача дека очекува оваа и наредната година огромен број на комунални проблеми да бидат решени преку изградба на комунална инфраструктура.

 

Министерот за животна средина и просторно планирање, Садула Дураки порача дека со реализацијата на овој проект се исправа голема неправда на граѓаните на Липково кои сега ќе можат да ја користат водата од природата и упати уверување дека граѓаните ќе дадат поддршка за членство на земјата во ЕУ и НАТО.

 

Градоначалникот на општина Липково, Еркан Арифи изјави дека денешниот ден е значаен за Липково бидејќи започнува изградба на голем капитален објект со кој се започнува процес на решавање на елементарна потреба на граѓаните за снабдување со вода за пиење.

Во рамките на тридневната посета на Република Италија, министерот  Едмонд Адеми задолжен за дијаспора во Владата на Република Македонија денеска оствари  работни средби со претседателот на регионалниот парламент на Трст, г-дин Пјеуро Мауро Занин и со потпретседателот Франческо Роко.

 

На оваа средба се разговараше за одличните односи на регионот Трст, еден од најразвиените делови на северна Италија, со балканските земји во рамките на економската соработка, културата и традицијата.

 

Претседателот Занин го пренесе интересот за продлабочување на односите со Република Македонија во областа на човековите ресурси, проектни програми, во областа на земјоделството, образованието и културата. Воедно министерот Адеми и претседателот Занин разменија повеќе информации за актуелните политички состојби во двете земји.

Г-дин Занин искажа беспрекорна поддршка за Република Македонија за референдумското прашање. Според него Италија претставува традиционален партнер во поддршката  во сите развојни етапи на интеграциските процеси на Република Македонија. Соговорникот изрази надеж дека референдумот ќе заврши со успех и потсети дека ниту една земја порано во изградбата на партнерските односи со ЕУ, немала ваква поддршка.

 

Министерот Адеми се заблагодари на оваа пријателска средба, го покани претседателот Занин да ја посети Република Македонија и да се запознае со состојбите во нашата земја, а воедно да се изгради меѓусебна соработка со овој регион на Италија и Република Македонија.

 

Министерот Адеми, посочи дека регионот Трст и Република Македонија имаат потреба да ја зајакнуваат и развиваат соработката во насока на инвестициите и пренесување на искуствата во повеќе области на взаемни интереси пред се во областа на економијата, трговијата, земјоделската соработка и во областа на културата и образованието.

 

Стана збор и за дијаспората од Република Македонија, која е распространета во Америка, Европа, а со посебен нагласок на Италија која е целосно интегрирана во Трст и регионот околу него.

 

Во разговорите двајцата соговорници се сложија дека нашата дијаспора е целосно интегрирана во италијанското општество и служи како мост за развивање на пријателски односи меѓу двете земји. Двајцата соговорници се согласија со тоа дека институциите во Трст треба да преземат чекори за целосна поддршка и промоција на македонската култура, јазик и историја.

 

Воедно, министерот Адеми оствари средба и со ректорот на Универзитетот на Трст  проф. Маурицио Фермеглиа. Оваа највисока  академска и образовна институција апсорбира студенти не само од Италија туку и од други европски држави, а воедно и од Северна Африка. Универзитетот во Трст е институција за изучување на  природните и општествените науки, со посебен осврт на фармацијата и медицината, математиката и биолошките науки. За време на разговорот, соговорникот покажа големо познавање за Република Македонија во целина, но и за актуелните политички состојби во земјата.   

 

Целта на оваа посета беше запознавање на двете страни и  воспоставување на основа за идна соработка помеѓу Универзитетот на  Република Македонија и Универзитетот од Трст. Министерот Адеми го посети и центарот на поранешната Воена болница која е адаптирана во Академска институција  за тренинг, менторирање, практична настава  и усовршување.

 

Центарот има улога на одржување на иновативни студии, професионалното издигнување, помагање на иновативни решенија во производството во различни нивоа на академската кариера и зголемување на менаџерските капацитети во практиката.

 

За посетата на министерот  Адеми во Италија имаше голема заинтересираност од страна на државните и регионалните телевизии, како и од печатените медиуми и на крајот на средбите министерот Адеми имаше интервју за државната телевизија Раи Уно, но  и за регионалните телевизиски станици од Трст.

Претседателот на Владата на Република Македонија, Зоран Заев, придружуван од своите соработници, денеска, се сретна со делегација на Меѓународната финансиска групација (ИФЦ), дел од Светска банка, предводена од Вебке Шлумер, регионална директорка за Европа и Централна Азија, која беше придружувана од регионалниот директор за Централна и Југоисточна Европа, Томас Лубек. Премиерот Заев на директорката Шлумер, која за прв пат ја посетува Македонија, и посака добредојде. Тој искажа големо задоволство поради нивното присуство пред историскиот момент за одржувањето на референдумот на 30 септември, кога македонскиот народ ќе покаже единство и ќе ја донесе одлуката за напредок на земјата, со исполнување на евроатлантските интеграции. Истовремено, со Шлумер се согласија дека иднината на Македонија, како идна членка на НАТО и ЕУ, на граѓаните и домашните компании им отвора можност да се претстават на пазарот каде има повеќе од 500 милиони потрошувачи. Директорката Шлумер, со премиерот Заев разговараше за потенцијалите на Република Македонија и искажа отворена поддршка на групацијата ИФЦ за интензивирање на финансирањето проекти во приватниот сектор и во подобрувањето на снабдувањето со електрична енергија, особено во полето на обновливите енергетски ресурси. Претставничката на ИФЦ, посебно се осврна на важноста на поддршката на приватниот сектор преку поврзување на странските директни инвестиции со домашните компании, на што премиерот Заев додаде дека Владата преку проекти е посветена на охрабрување на локалните компании, на младите луѓе, за имплементирање на нивните бизнис идеи со следење на модерните и иноваторските технологии. Премиерот Заев информираше дека Владата презема конкретни мерки за мотивирање во приватниот сектор, подобрување на конкурентноста со цел да бидат отворени нови, добро платени работни места, кои ќе ги задржат младите да работат во нивната татковина. Директорката Шлумер додаде дека ИФЦ ги разгледува можностите и за поттикнување на развојот на микро, мали и средни претпријатија преку олеснет пристап до финансии, потенцирајќи дека поддршката е во насока на трендот на подобрување на економијата во земјата и преку создавањето услови за нови пазари да се отворат перспективите не само на граѓаните на Македонија, туку и на регионот. „Вашата поддршка ја цениме, ние создаваме услови за искористување на нашите потенцијали, ги поддржуваме домашните претпријатија и одржувајќи добрососедски односи сакаме заедно, со земјите од регионот да освојуваме нови пазари“, подвлече премиерот Заев на средбата, охрабрувајќи ги претставниците на Меѓународната финансиска групација, ИФЦ, активно да ја следат се поинтензивната регионална соработка помеѓу државите на Западен Балкан, при што нивната поддршка би била од огромно значење во помагање на заедничкото настапување на регионот на европските и светските пазари.

Претседателот на Владата на Република Македонија, Зоран Заев, заедно со министерот за надворешни работи Никола Димитров и своите соработници, денеска оствари средба со помошник државниот секретар за европски и евроазиски прашања на САД, Арон Вес Мичел, кој беше придружуван од амбасадорот на САД во Земјава, Џес Бејли.

 

На средбата Премиерот Заев уште еднаш се заблагодари за континуираната поддршка којашто Република Македонија низ годините ја добива од Соединетите Американски Држави. Премиерот Заев истакна дека денешната посета на помошник државниот секретар за европски и евроазиски прашања на САД, Арон Вес Мичел е силно охрабрување за Владата, но и за граѓаните на оваа земја пред историскиот предизвик со којшто сме соочени, а тоа е спроведување на успешен референдум.

 

„Секоја голема одлука е резултат на компромис. Но, во нашиот случај, компромисот е исчекор напред. Исчекор кој ќе ни овозможи членство во ЕУ и НАТО со сите придобивки кои доаѓаат со тоа. Референдумот е шанса за остварување на нашите стратешки цели. Тоа се цели на сите претходни генерации, донесени како наша суверена одлука, со сеопшт политички и меѓуетнички консензус. И затоа и натаму ќе продолжиме да ги охрабруваме граѓаните да гласаат на референдумот“, посочи Премиерот Заев на средбата.

 

Помошник државниот секретар за европски и евроазиски прашања на САД, Арон Вес Мичел на средбата истакна дека Соединетите Американски Држави се импресионирани од резултатите коишто ги постигна земјава во изминатава година ипол и најде решение за проблем стар 27 години.

 

Помошник државниот секретар за европски и евроазиски прашања на САД, Мичел исто така потенцираше дека Република Македонија и натаму ќе добива силна поддршка од Америка бидејќи, како што рече, очигледно е дека граѓаните посакуваат иднина во Евро-атлантското семејство на народи.   

Во изјавата за медиумите, Премиерот Заев повторно ја повика опозицијата јасно да го каже својот став. Бидејќи како што рече, неодговорноста и непрепознавањето на историската шанса не се патриотски постапки. Не се постапки на лидери.

Повик до граѓаните да излезат и да гласаат на претстојниот референдум на 30-ти септември, преку медиумите, испрати и помошник државниот секретар за европски и евроазиски прашања на САД, Арон Вес Мичел.