Доделени се 4.600 решенија за легализација на дивоградби од стапувањето во сила на Законот за третман на бесправно изградени објекти, а вкупно се поднесени 90 илјади барања. Ова го објави денеска министерот за транспорт и врски Миле Јанакиески по доделувањето решенија за легализација во општината Шуто Оризари.

Во целата држава се регистрирани околу 350 илјади дивоградби или делови од дивоградби. Јанакиески повторно апелира до граѓаните и правните субјекти кои имаат дивоградби да достават барања за легализација и да не чекаат на последниот ден од истекот на рокот на 3 септември.

Општинската администрација, пак, според Јанакиески, треба да излезе во пресрет на зголемениот број барања што се очекуваат во следниот период и да воспостави двосменско работење, како и работа во саботите.

Општините, апелира Јанакиески, треба да формираат мобилни екипи кои на терен ќе ги информираат граѓаните за деталите околу легализацијата. Најголем број барања за легализација има во скопските општини, како и во Битола, Прилеп и во Штип, а зголемување на бројот на пријавите во следниот период се очекува и во останатите општини, информира министерот за транспорт.  

Тој повтори дека не се размислува за продолжување на рокот за доставување барања, туку за казнување за тие што нема да го направат тоа. Посочи дека почетокот на процесот за легализација е краткотрајна процедура од три минути. Граѓаните за почеток треба да достават само барање и тоа да им биде архивирано во општините, укажа Јанакиески и појасни дека геодетскиот елаборат, единствениот документ за кој е потребно повеќе време, може да го достават и подоцна.

Во Општина Шуто Оризари Јанакиески додели седум решенија за легализација и изврши увид во начинот на кој се спроведува Законот за третман на бесправно изградени објекти, по информациите во јавноста  дека таму постапките се бавни.

Во таа општина, според градоначалникот Елвис Бајрам, досега се поднесени 1.150 барања за легализација, а 30 предмети веќе се решени. Очекува удвојување на бројот на пријавите во наредниот период. Во оваа општина се евидентирани околу три илјади дивоградби, а според градоначалникот општинските власти ќе излезат во пресрет на граѓаните и администрацијата ќе работи и во саботите. Воедно ќе се оди на терен за да се апелира да се испочитува рокот за доставување барања и граѓаните да добијат детални информации за целиот процес.

Воведување нови политики и напредни техники за учење и развој на вработените во јавниот сектор со цел поттикнување на мобилноста во јавната службa и подобрување на организацијата на работата, е една од трите приоритени области на кои ќе работи во наредните две години Министерството за информатичко општество и администрација со поддршка на Британската влада.

Тоа го најави денеска министерот за информатичко општество и администрација Иво Ивановски кој со британскиот амбасадор Кристофер Ивон потпиша Меморандум за соработка со Владата на Велика Британија на проектот „Поддршка за реформите во јавната администрација“.

Со проектот, што ќе почне на 1 септември годинава и ќе се спроведува до март 2013 година, е обезбедена помош во износ од 400 илјади фунти од британскиот фонд  DIV, Reuniting Europe.   

Според Ивановски, прв пат ќе бидат креирани програми за обука и стручно усовршување со кои ќе бидат опфатени голем број функционери, особено во делот на управување и водење на институциите.

Амбасадорот Ивон истакна дека Велика Британија е голем поддржувач на аспирациите на Македонија за членство во ЕУ и оти има што да понуди во реформите на македонската јавна администрација.

- Еден дел од меморандумот што го потпишавме денеска се однесува на воведување унифициран систем  за развој на човечки  ресурси, преку тренинзи и обуки. Тоа е еден дел кој  британската јавна администрација смета дека е многу корисен, односно воведувањето систем на оценување според поседување работни квалитети е нешто што ќе ја унапреди  јавната администрација, рече Ивон, изразувајќи надеж дека и Македонија ќе ја увиди користа од воведувањето на системот.  

Одговарајќи на новинарско прашање за ефикасноста на јавната администрација, Ивон посочи дека  според неговото искуство во Велика Британија, колку и да е добра администрацијата, секогаш може да работи подобро. Затоа треба постојано да се работи на нејзиниот развој и тоа е процес кој не треба да запре, укажа Ивон.

Во однос на бројноста на администрацијата британскиот амбасадор смета дека секоја држава треба да утврди колкав број и е потребен, но тоа да не се прави според глава на жител.  

Според министерот Ивановски, конкретните реформи во македонската јавна администрација почнале пред седум месеци, а ефикасноста на администрацијата ќе биде се повеќе забалежана од граѓаните со воведувањето на новите информатички техниологии.

-  Со сите мерки и проекти кои ги преземаме и тие што ќе следат од денешниот меморандум за соработка најголемо очекување имаме кон крајот на годинава бидејќи дел од почнатите проекти ќе бидат реализирани, законите се веќе во сила, ќе има поголема мобилност во администрацијата и ќе можеме за наредната година со полна пареа да реализираме уште повеќе проекти кои цениме дека се значајни за граѓаните на Македонија, рече Ивановски.

Поддршката од Велика Британија, согласно Меморанудмот, ќе се реализира и во зајакнување на капацитетите на МИОА за поефикасно управување и следење на реформата на јавната администрација и воведување модел за управување со човечки ресурси заснован на компетиции. Сите области од Меморандумот, според министерот Ивановски, се во насока на остварување на Стратегијата за реформа на јавната администрација, која ја усвои неодамна Владата.



Ќе се менува моделот за оценување на работата на вработените во државната администрација, најави денеска министерот за информатичко општество и администрација Иво Ивановски.

Работна група на Министерството за информатичко општество и администрација разгледува повеќе модели што се применуваат во Европската унија, меѓу кои и т.н модел на 360 степени оценување. Тоа значи дека покрај од претпоставениот вработените оценка ќе добијат и по хоризонтална и вертикална линија од своите колеги.

- Раководител на сектор ќе биде оценуван покрај од државен секретар и од другите раководители на сектори, но и од тие кои се под него. Целта е да се стимулираат вработените да бидат поколегијални меѓусебе и поефикасни, изјави Ивановски при денешната посета на Канцеларијата на Управата за јавни приходи во Градскиот трговски центар.

Работата на таа Канцеларија е оценувана со истражување од 20 јуни до 22 јули, во кое 89 проценти од анкетираните 2005 граѓани рекле дека се задоволни од нејзиното работење.

Според резултатите од извештајот на државните службеници за 2010 година, потсети Ивановски, 69 проценти од вработените во државната администрација добиле оценка со која се истакнуваат во својата работа, 28 дека задоволуваат, два процентa делумно задоволуваат и еден процент не задоволуваат.

- Гледајќи ги овие оценки Владата го задолжи Министерството за информатичко општетсво да достави нов концеп на модели за оценување на администрацијата од самото раководство, појасни Ивановски.

Според него, со системот што моментно се применува доколку вработениот два циклус последователно добие оценка дека се истакнува тогаш автоматски неговата плата треба да се зголеми за пет проценти. Но, истакна, од реалната слика што ја кажуваат граѓаните не се задоволни од работата на администрацијата и затоа сакаме да ја реформираме.

За идниот променет модел за оценување се разгледува и можноста наместо постоечкиот образец за оценување кој е унифициран за сите, да се воведат повеќе, како во други држави затоа што, според Ивановски, секоја институција не може да ги оценува своите вработени со ист образец.

- Воедно за унапредување на моделот за оценување се разгледува можноста да се постават мерливи индикатори на почетокот од секое тримесечие, при што секој вработен ќе знае на што ќе биде оценуван, се разбира според систематизацијата. Но, и покрај тоа потребно е на почетокот на годината раководителите да постават мерливи индикатори со цел неговото оценување да биде објективно, најави министерот Ивановски.



Преку новини во тестирањето на кандидатите при вработување во државните институции  ќе се зголемува  транспарнетноста во овој процес. Ќе се применува и нов систем на мобилност од една во друга институција со што ќе се балансира суфицитот и дефицитот на кадрите.
Тоа го најави министерот за информатичко општество и администрација Иво Ивановски при денешната посета на Агенцијата за администрација.

Се планира да се унапреди софтверот за полагање на службениците, со побројни прашања во општиот или во практичниот дел. Секој кандидат ќе добие  посебни прашања од тој што ќе седи до него, но со иста тежина. Во Тест центарот, според Ивановски, ќе нема човек кој ќе набљудува. Ќе биде во соседната канцеларија,  а доколку  е потребна помош на некој од кандидатите ќе дојде да одговори на некои  прашања за да не дојде до недоразбирања и пореметувања во тестирањето.

Станува збор за транспарентен систем кој, според Ивановски се користи во повеќе држави и универзитети.

- Со оваа мерка се обидуваме да ги стимулираме сите кои ќе се кандидираат за работни позиции во администрацијата навистина да се подготват. Покрај двата теста за полагање, потребен е и висок просек на образование. Најдобрите што системот на транспарентен начин ќе ги испрати како кандидати  до институцијата која го објавила огласот за вработување, ќе имаат можност да  бидат интервјуирани од надлежни вработени во таа институција и еден да биде избран. Потоа тоа лице треба да помине и психолошки тест и тест за интегритет кој ќе стапи во сила од октомври годинава, изјави министерот Ивановски.

Според него, мобилноста од една во друга институција е една од мерките која се предвидува со цел да се балансира вработеноста затоа што имало сознанија дека  во некои институции на пример има суфицит на правници, а  некаде дефицит. - Со воведување на овој систем ќе може да се балансира тоа. На крај треба да се стигне до ниво кога потребата за вработување ќе биде по пензионирање на некој од вработените или барање од самата институција, изјави Ивановски.
Со новите регулативи кои ги наметнува Европската комисија за поефикасна админстрација постојат институции каде се бара поголема стручност и  компетентност. Но, истакна министерот, тоа  не значи дека бројот на вработени во администрацијата мора постојано да расте.

- Според природниот одлив на  вработени во администрацијата од три до четири проценти годишно од нив се пензионираат, со што постои отвореност тие да се пополнат, но не значи дека ќе мора да се направи. Може да се донесе одлука и на самата институција  или само како стратегија на Владата дека ќе пополнуваме само процент, посочи министерот, негирајќи дека  Европската комисија во своите извештаи укажува оти  македонската администрација е гломазна и  дека има потреба од нејзино намалување.

Министерот Ивановски повтори дека во јавната и државната админситрација се вработени околу 120 илјади лица, заедно со полицијата и армијата. Тврди дека вработувањата во администрацијата и годинава се ограничени како дел од антикризните мерки, а исклучок се тие според Рамковниот договор или кои се неопходни во институциите доколку некој замине во пензија или има некој несакан случај.



Лабораторија со најсовремена опрема за скрининг на психоактивни супстанци беше отворена денеска на Институтот за судска медицина, криминалистика и медицинска деонтологија во Скопје. На отворањето присуствуваа претседателот на Владата на Република Македонија Никола Груевски и министрите за образование и наука и за здравство, Панче Кралев и Никола Тодоров.

Министерот Кралев во изјава за медиумите рече дека вкупната вредност на лабораторијата е над осум милиони денари и оти со нејзиното отворање продолжува понатаму проектот за опремување лаборатории во Македонија.

- Вкупната вредност за сите лаборатории за потребите на медицинските науки е околу 11 милиони евра. Ваква лабораторија во регионот нема, а најблиску колку што сум информиран има во Белград. Од аспект на ефикасност, стручност и на прецизност на Институтот ќе придонесе да добиваме попрецизни и поефикасни резултати што ќе се одрази и на работата на Институтот, истакна Кралев.

Во медицинските науки, посочи Кралев, се предвидени 56 лаборатории, досега се инсталирани одреден број, а преостануваат уште 29. Тој додаде дека планираат во наредниот период да работат на инсталирање нови лаборатории.

Директорот на Институтот за судска медицина, криминалистика и медицинска деонтологија, Алексеј Дума рече дека ова е почеток на опремување на лабораториите на Институтот и апаратурата има електронска поддршка анализите да ги врши на чипови. Станува збор за многу моќен апарат кој може да се користи во различни сфери во медицината.

- Кај нас ќе се користи во сферата на токсикологијата од сите аспекти - форензичната, клиничката и евентуално еколошката. Апаратурата која допрва треба да доаѓа е многу прецизна и скапа и ќе овозможи овој Институт повторно да си го врати приматот и во сферата на токсикологијата во регионот, рече Дума.

Одговарајќи на новинарско прашање Дума посочи дека интересот на Владата е позитивен за одржување и зачувување на овој Институт и изрази надеж дека ќе успеат да се вратат на првото место во регионот. Тој додаде дека тендерот е завршен, набавени се чипови и очекува до крајот на оваа и идната недела да бидат испорачани.

Министерот Тодоров истакна дека овој современ апарат во лабораторијата е дел од проектот на Владата за опремување лаборатории за високо образовните институции кој е во вредност од 60 милиони евра.

- Станува збор за исклучително битна апаратура која ќе помогне за поуспешно функционирање на Институтот за судска медицина кој е еден од најбитните чинители и во кривично-правната сфера во Македонија и од тој аспект мора да ја негуваме и унапредуваме неговата работа, рече Тодоров.

Одговарајќи на новинарско прашање истакна дека тој влегува во суштината на функционирањето на овој битен сектор и се обидува да ги согледува нелогичностите и слабостите, кои се работите кои можат да добијат на ефикасност итн.

- Пристапувам на овој сектор од една друга позиција и со друг начин на функционирање. Не сум доктор и од мене нема да може да очекувате да давам изјави кои се поврзани со какви било дијагнози или со нешто што е причина за лош или добар болнички третман. Она што во прв момент го поставувам како приоритет ќе биде квалитетот на услугите особено мислам на задоволството на пациентите. Нешто што мора да направиме да функционира одлично, потенцира Тодоров.

Тој нагласи дека втора работа треба да биде опремата која е огромен зафат и подобрување на целата здравствена инфраструктура и нејзино користење што треба да придонесе за подобро и поквалитетно здравство во Македонија, а трета приоритетна работа е рекострукцијата на сите здравствени установи.

- Тоа е голем проект кој е започнат и речиси е завршен во првата фаза, а има три фази. Сакам тој проект да се заврши целосно. Овие три компоненти на кои ќе се фокусирам во првите шест-седум месеци ќе овозможат да се почувствува подобрување на квалитетот на услугите и на здравството во Македонија. Има и многу други проекти, како што е оној за интегриран здравствен информатички систем, за здравствената картичка, протоколите и медицинската мапа на Македонија, додаде Тодоров



Во близина на спортската сала „Јане Сандански“ во општина Аеродром денеска беше пуштено во употреба ново фудбалско игралиште од проектот „Изградба на 50 помошни фудбалски игралишта низ целата држава“ што го спроведува Владата на Република Македонија заедно со Агенцијата за млади и спорт (АМС).

Игралиштето е со стандардни димензии за домашни и меѓународни натпревари, трибини за 500 гледачи, соблекувални, дренажен систем и систем со рефлектори за натпревари во вечерните часови.

На пуштањето во употреба на спортскиот објект присуствуваше премиерот Никола Груевски кој рече дека Владата во секој сегмент се обидува да го оствари она што го зацртала, планирала и ветила пред граѓаните.

- Ова е огромна инвестиција во спортот и во здравјето на младите луѓе да не се насочат кон пороците, но, исто така, и во помагање на талентите. Имајќи предвид дека фудбалот е од големо значење, во последно време станува бизнис и бесплатна реклама за земјата, ова е можност да им се даде шанса на младите својата енергија да ја насочат во спортот и здравиот живот, рече Груевски.

Премиерот истакна дека за време на парламентарните избори настапиле под слоган во кој длабоко верувале и веруваат денеска, односно слоганот „Заедно можеме повеќе“.

- Вистина се може повеќе кога луѓе од ист тим ќе се распоредат на различни позиции на кои е неопходна добра соработка. Го потенцирам ова бидејќи често во спротивниот политички табор нема желба за соработка, иако тоа е за добро на граѓаните. За жал, кај некои од градоначалниците од спротивниот табор не само што нема желба за соработка, туку има желба за кочење на проектите што е лошо и штетата ја трпат сите граѓани, додаде Груевски, посочувајќи дека преку овие проекти ќе се продуцира нов развој и просперитет за општината Аеродром.

Наидовме на жестоки критики зошто толку инвестираме во спортот, рече Груевски, додавајќи дека тоа беше мотивирано од политички побуди. Поддршката за овие проекти, посочи, ни даде сила да ги реализираме.

Според директорот на АМС Диме Спасов, со овој спортски објект ќе се овозможи голем број млади да ја почнат својата фудбалска кариера во Аеродром, во фудбалските школи кои сега имаат вистински услови да функционираат и да се развиваат.

- Со инвестирање во спортските објекти им ги овозможуваме на граѓаните и сите млади неопходните услови за професионално и рекреативно спортување, рече Спасов.

Потенцираше дека во завршна фаза е и фудбалското игралиште во Реонски центар, а во фаза на градба се четирите игралишта за фудбал од проектот „Куќата на фудбалот“ во Ново Лисиче кои треба да бидат завршени до крајот на годината.

Овој дел од реката Вардар, истакна градоначалникот на општина Аеродром Ивица Коневски, од запуштено место сега прераснува во урбан и модерен спортски центар.

- Општината посветено работеше да овозможи услови за изградба не само на овој, туку и на голем број други спортски објекти. Да се надеваме дека токму тука ќе се роди нова фудбалска ѕвезда, додаде Коневски.
Денеска беше пуштено во употреба 31-то фудбалско игралиште, а при крај со изградбата се уште осум кои се очекува да почнат месецов со работа.

Министерството за информатичко општество и администрација почна процес за воведување ИСО 9001 стандардот преку кој најавува зголемување на задоволството на корисниците на услугите и на вработените.

- Сертифицирањето е дел од постојаните напори за реформа на јавната администрација и подобрување на нејзината ефикасност и  ефективност. МИОА како главен носител на реформата ги поттикнува и сите државни и јавни институции да воведат такви стандарди, истакна денеска на прес-конференција министерот за информатичка технологија и јавна администрација Иво Ивановски.

Министерството моментно е во напредна фаза за воведување на стандардите. Според планираните активности, таа треба да заврши најдоцна до крајот на септември, кога ќе почнат да ги користат стандардизираните процедури, како подготвителна фаза пред процесот на самата сертификација.

Според Ивановски, предноста од  воведувањето на ИСО стандардот е што ќе се примени принцип на работа со којшто периодично се прави реевалуација на институцијата со цел да го зачува. За да се случи тоа прописите кои ќе бидат  наведени мора да се почитуваат. Со тоа, истакнува министерот Ивановски, веднаш се зголемува квалитетот на самата институција во услугите кои ги нуди кон граѓаните.

Како  очекувани придобивки од воведувањето на стандардот, покрај зголемување на нивото на задоволство на корисниците на услугите и на вработените, се подобрена изведба на услугите со стекнување на деловната доверба кај постоечките или потенцијалните корисници, намалување на жалбите, како и на трошоците на работењето, подобрена комуникација,...

Министерството за информатичко општество  е одговорно и за следење на состојбата на воведување ИСО 9001 во сите државни и јавни институции и за редовно известување на Владата.

- Програмата на Владата предвидува сите државни институции веднаш да почнат процес  за воведување ИСО 9001 стандардот за квалитет. Тоа значи дека  за брзо време поголем дел од  институциите во Македонија ќе се изјаснат дека го воведуваат овој стандард, најави Ивановски.

Од државните институции ИСО 9001 стандардот веќе го имаат воведено Генералниот владин  секретаријат, Јавното претпријатие за стопанисување со станбен и деловен простор, Секретаријатот за европски прашања и Министерството за образование и наука.

 
ИСО 9000 групата стандарди претставува меѓународен консензус на добри практики за правилно управување со квалитет. Тој се содржи од стандарди и прирачници во врска со системите за управување со квалитет и соодветните стандарди за поддршка. Определбата за сертификација на систем за управување со квалитет согласно ИСО 9001 од страна на акредитирано сертифицирано тело ја покажува посветеноста на секоја организација кон квалитетот, корисниците и клиентите.

Македонски народе ние не сме дрво без корен, нашата борба за слобода и напредок е заснована на историски континуитет на преплетување на идејните вредности на двата Илиндена, на избликот на националниот креативен потенцијал, на пркосот на духот желен за слобода, на храброста запечатена со победа. Тоа го порача премиерот Никола Груевски денеска на прославата во Меморијалниот центар „Пелинце“, по повод државниот празник Илинден и 67-годишнината од одржувањето на заседанието на АСНОМ.

Собирот на  Пелинце, според Груевски,  го одбележува големиот македонски празник, на кој се поставени темелите на современата македонска држава.

- Илинден е датум кога Македонија слави за успехот, за храброста и за херојството и се искажува почитта кон жртвите кои ги положија животите за слободна Македонија, рече тој, упатувајќи благодарност до сите кои своите животи и дела ги вградиле во државноста и за подобра иднина на Македонија.

Според Груевски, вториот Илинден ги внесе во себе цивилизациските придобивки на првиот, ги надгради и ги оствари.

Резултатите од НОБ, истакна премиерот, се пример за заслужена победа со сопствени сили, залагања, самооткажувања, со многу предизвици, со многу енергија, љубов и патриотизам за на крај да се стави печат на триумфот, за да се вброи македонската нација во редот на нациите великани кои му ставија крај на хитлеровото злодело...

Македонски модерни илиндени, укажа Груевски, се грижата, градбата, реформите, модернизацијата, евроинтеграциите, подобрата економија и инвестициите, а достоинството е заслужено.

Македонската свест, истакна, е реалност и е дел од објективната стварност исто како и македонските песни, ора, традиција, фолклор, исто како и српските, бугарските, грчките, албанските, словенечките културни компоненти кои ја прават и ја обликуваат една нација.

- Ние ништо туѓо не сакаме ниту посакуваме, го браниме само нашето. Ние сме народ, мирен и работлив. Ние го сакаме соседот како ближен свој, неговиот напредок и благосостојба се и наши.Сакаме искрен соживот и почит со секого, соработка која ќе придонесува за добробитта на нашите граѓани. Сме за надминување на предизвиците кои стојат пред нас, со рационален однос, со уважување на фактите и чувствата, со почитување на правото и нормите на цивилизацијата, рече Груевски.

Сакаме решенија на предизвиците, додаде тој, кои нема да ги нарушат нашите највисоки правни акти, Уставот и законите и кои ќе ја верификуваат историската реалност која ја стекнавме уште со атлантската повелба за самоопределување, а тоа е дека сме биле, сме и ќе останеме Македонци.

Претседателот на македонската Влада испрати порака дека демократијата и слободата ги извојувавме низ премрежја и на нив треба, како што рече, да им обрнеме посебно внимание, да инвестираме во нивниот развој, почитувањето, практицирањето и обезбедувањето на човековите права и слободи.

- Да работиме, да не се навредуваме, да не се клеветиме и омаловажуваме. Ние на исто место живееме и со поделби нема да одиме напред. Со внесување раздори нема да постигнеме резултати. Законите мора да се почитуваат. Тоа е одлика на цивилизацијата. Беззаконието не води никаде. Законот обезбедува услови за развој и натпревар на идеи и постигнувања во опкружување кое е еднакво за сите, нагласи Груевски.

Вистината, укажа, да ни биде ориентир и да не ја погазуваме никогаш и никаде како етика да ја промовираме соработката, да ја развиваме, да примаме и да даваме прошка, да останеме луѓе и при најголемите искушенија Македонија е нашата земја.

- Македонците, Албанците Турците, Власите, Ромите, Србите, Бошњаците и останатите, христијаните, муслиманите и атеистите имаат еден интерес - подобар живот. Нашиот соживот овде во Македонија е божја волја. Повремените инциденти настануваат од оние каде што бог сеуште не допрел и илинденскиот и асномскиот манифест повикуваат на обединување и вложување на целиот заеднички потенцијал кон достигнување на единствената цел и визија, наведе премиерот оценувајќи дека  Македонија е земја на напредок,  во која живеат среќни луѓе и се надополнуваат вредностите кои произлегуваат од спецификите и ни даваат компаративна предност пред светот.

Македонија,  истакна, е земја на слободата и правдата. - Само сплотени ќе бидеме посилни, а посилните се и поуспешни и почитувани. Тие се победниците, посочи Груевски.

Според него,  во годината кога се одбележуваат 70 години од почетокот на НОБ  и 20 години од стекнувањето на независноста и самостојноста треба да се обединиме сите без разлика на вера, партија, пол, имотен или социјален статус.

- Да се обединиме сите под знамето на успехот и на новите достигнувања. За Илинден и илинденци кои ќе донесат нови резултати корисни за сите граѓани. За илинденци кои ќе ги бранат нашите традиционални вредности и достигнувања од минатото, а кои истовремено ќе грабат кон иднината и европските стандарди, е пораката што меѓу другото ја упати премиерот Груевски.

Претходно, делегација на Владата предводена од премиерот Груевски положи цвеќе на Меморијалниот центар АСНОМ со што почна народниот собир во кумановско Пелинце.

Цвеќе положија и делегации на Собранието на  Република Македонија, на кабинетот на Претседателот на Република Македонија, на Сојузот на борците од НОВ, на дипломатскиот кор, на Генералштабот на АРМ и претставници на повеќе политички партии.
 
Меѓу високите државни претставници присутни на одбележувањето се сопругата на поранешниот претседател Борис Трајковски, Вилма Трајковска, министрите за одбрана Фатмир Бесими, за образование Панче Кралев и за земјоделство Љупчо Димов, како и директорот на Бирото за јавна безбедност при МВР Ључо Тодоровски.

Автоматизирана катна гаража  „Мал ринг“, која треба да обезбеди 280 паркинг места, почна да се гради денеска до објектот на АД МЕПСО  во центарот на Скопје,  со вкупна површина од 8.222 метри квадратни и висина од 29 метри.

Во изградбата на гражата, чиј камен темелник го постави денеска премиерот Никола Груевски, Јавното претпријатие за стопанисување со станбен и деловен простор ќе инвестира 5,8 милиони евра.

- Во  изминатиот период почнавме многу проекти. Голем дел се во изградба, веќе ја добиваат и својата конктура, а паралелно со тоа и градот добива нов имиџ во новата слика на тоа што се создава. Новиот  објект  ќе биде дел од новата слика на македонската метропола, рече во обраќањето на свеченоста Груевски.

Тој истакна дека „Мал ринг“ е четврта по ред катна гаража која ја градат државни претпријатија или општини, од предвидените седум, покрај тие кои треба или веќе ги гради приватниот сектор.  


- Од општина Центар има најава за изградба на една гаража повеќе од планираното, што значи дека крајниот исход на изградба на катни гаражи од Градот Скопје, Општина Центар и Јавното претпријатие ќе биде осум, посочи Груевски.

Според него, новата автоматизирана гаража ќе биде изградена за две години, а со 280. паркинг места  во огромна мерка ќе помогне во надминување на проблемот со наоѓање слободен простор  во центарот на Скопје.

- Фасадниот дел  на гаражата ќе биде во стилот на околните згради што се градат во овој дел на градот за да биде во склад со тоа што се создава тука. Ова е регион каде има многу административни згради, како на приватни, така и на државни институции. Во непосредна близина е на голем број  други објекти,  културни обележја, споменици, што само по себе говори за нужната потреба од ваков објект, особено ако се има предвид дека токму поради новите содржини во Градот доаѓаат голем број туристи и е зголемена фрекфенцијата на луѓе, рече Груевски.


Според директорот на станбеното претпријатие Цветко Грозданов, гаражата  е мала по габарит, но со голема искористеност на просторот.

- Влезот во неа е решен со новопроектирана улица  со влез и излез од првото подрумско ниво. Влезот во лифтовите кои ги  дистрибуираат возилата се наоѓа во самиот подрум каде се остава возилото, а потоа  автоматски се преземаат преку лифтовите кои се решени со влез и излез, објасни Грозданов.

Тој додаде дека архитектурата на објектот  е решена во класичен стил со апликации од портал и колонади од лакови  во приземјето и на катот, разбиени со стакелни екрани низ кои ќе може да се гледаат паркираните возила.

Проектант на автоматизираната гаража е ГМС проект Скопје, а изведувач на градежните работи АД Гранит од Скопје.



Во ОУ „Кочо Рацин“ во село Петровец попладнево почна изградба на училишна спортска сала во која по девет месеци ќе спортуваат  800-те ученици и ќе се рекреираат жителите од општината Петровец. Камен-темелникот го постави премиерот Никола Груевски, заедно со министерот за образование и наука Панче Кралев и градоначалникот на општина Петровец Борче Митевски.

Премиерот истакна дека салата ќе биде современа и модерно опремена за различни видови спортови, на површина од 1.300 метри квадратни.

- Салата ќе биде изградена според сите европски стандарди. Ќе има најмодерна спортска опрема и оспособена  да се користи за кошарка, за ракомет, за одбојка, гимнастика, пинг-понг и за многу други спортови, а што е најважно - во целост ќе ги задоволи потребите на учениците. Попладне, кога нема ученици, таа ќе може да биде давана на користење на сите заинтересирани граѓани и спортски клубови. Салата ќе биде и дополнителен приход за училиштето во часовите кога ќе се издава на користење, рече Груевски.

Салата е дел од проектот на МОН за изградба на 145 спортски сали. Заедно со 35-те преку Агенцијата за млади и спорт треба да бидат изградени 180 училишни сали. Груевски посочи дека планот пред 5 години да се изградат 35 училишни сали се проширил и ги опфатил сите училишта без сала, а со над 300 ученици. Тоа се должи на големиот интерес на општините и на истражувањето според кое  две третини од завршените основци имале проблеми со ’рбетот зашто немало каде да спортуваат.

- Овде реализиравме голем број проекти, за разлика, за жал, од некои други општини каде што со години ни одбиваат соработка да се изгради нешто за граѓаните, рече премиерот, набројувајќи ги инфраструктурните проекти во општина Петровец, меѓу кои е и изграденото големо фудбалско игралиште.

Во завршна фаза е, како што рече, патот Ражаничино - Свети Николе. Издвоени се 310.000 евра за изградба на нов пат Ражаничино - Таор, изградена е амбуланта во Катланово, доизграден и пуштен во употреба регионалниот водовод кој обезбедува чиста вода за пиење за општините Петровец, Илинден и Гази Баба, завршена е првата фаза од канализациската мрежа во Катланово...
 

- Следуваат и други проекти, како санација на ова училиште зашто е дојдено времето за негова реконструција и санација. Изградба на два тениски терена во дворот на училиштето. Ќе се асфалтира и дел од патот Петровец - Огњанци, ќе се изгради мултифункционално спортско игралиште за мал фудбал, ракомет и кошарка, како и голем број други проекти што ќе ги реализираме во соработка со градоначалникот на Петровец, истакна Груевски.

Министерот Кралев рече дека целта на проектот е спортот и рекреацијата да станат дел од образованието на секој ученик и на секој жител во општините.

 
- Планираме во иднина да продолжиме со динамиката за реализација на овој проект. Веруваме дека со изградбата на сите 145 сали ќе успееме да го доближиме спортот и рекреацијата до сите граѓани во државата, додаде Кралев. Најави дека наскоро ќе биде отворена завршената спортска сала во Трубарево.