Претседателот на Владата на Република Македонија Зоран Заев присуствуваше на одбележувањето на почетокот на австриското претседателство, вчера вечер во Скопје, заедно со владини претставници, при што имаше и поздравно обраќање.
 
Пред присутните, амбасадорката на Република Австрија во Република Македонија, Ренате Коблер, амбасадорот на ЕУ во Македонија, Самуел Жбогар, амбасадорот на Република Бугарија во Република Македонија, Иван Петков, претставници од дипломатскиот кор во земјава, од Владата, од Парламентот, претставници од други институции и организации, граѓани, премиерот Заев упати честитки за почетокот на претседавањето на Република Австрија со Европската унија, се заблагодари за големата поддршка од Австрија за почеток на пристапните преговори на Македонија со ЕУ и ги соопшти очекувањата на граѓаните на нашата држава и на Владата на Република Македонија.
 
-Европската унија, со Австрија, по Бугарија, доби уште еден, голем, силен, одговорен поддржувач на интегрирана и обединета Европа. Тоа е надежта на граѓаните на Македонија, надежта на граѓаните на целиот регион на Западен Балкан, надежта на младите луѓе во нашата земја и во соседството, чии соништа се поврзани со светла европска иднина, во своите држави и во Европа. Европа не е само континент, не е само политички и економски сојуз, Европа е вредности во коишто верувале и веруваат бројни минати, сегашни, и уверен сум, и идни генерации. Европа е потреба, за Европската унија, за нашиот регион што цели кон неа, за светот, затоа што Европа е доказ дека различностите се предност, заедништвото е можно - до стабилен свет, до спокоен свет, до економски развиен свет, до свет за сите, рече премиерот Заев.
 
Претседателот на Владата, Заев, ја поздрави најавата на австрискиот канцелар Себастијан Курц, кој вчера при преземањето на претседателството рече дека Австрија има намера да изгради ефикасна, обединета и фокусирана Европа, Европа којашто заштитува, Европа којашто гради мостови во Унијата.
 
-Јас се согласувам со канцеларот Курц дека успехот на Европа е можен само ако сите земји во Унијата соработуваат меѓу себе, а среќен сум дека интеграцијата на Западен Балкан во Унијата останува фокус и на австриското претседателство. Ваквиот фокус нам ни дава шанса да се бориме за нашата европска перспектива, да ги забрзаме реформите, да ги довршиме започнатите мостови со соседите, додаде премиерот Заев.
 
Претседателот на Владата, Заев рече дека „сме свесни за грижите со коишто се соочува Унијата со Брегзит и мигрантската криза“ и изрази благодарност „за покажаната сила со вреднувањето на напорите на Македонија на реформскиот и добрососедски пат“, со што и е дадена поддршка на Македонија за отворање пристапни преговори со ЕУ.
 
-Ова верувајте е силна мотивација за Република Македонија во којашто добивте уште попосветен партнер и пријател, за надминување на сите постоечки предизвици во Европа и светот, а тоа верувам дека е чувство на сите земји од регионот со европски цели. Нека успее мисијата што си ја постави нашиот пријател, Република Австрија, за изградба на обединета Европа, Европа којашто штити. Република Македонија е со вас на тој пат. Среќно да ни е пријатели, рече во обраќањето во чест на преземањето на австриското претседателство, премиерот Зоран Заев.
 
На свеченоста се обрати и вицепремиерот за европски прашања, Бујар Османи, кој го поздрави преземањето на австриското претседателство со благодарност за поддршката од Австрија за Македонија и регионот и најави завршување на домашните обврски на земјава на евроинтеграцискиот пат.
 
Вицепремиерот Османи ја нагласи важноста на ставот на Република Австрија дека „европските интеграции остануваат клучен приоритет“, дека е значајна "„поддршката на интеграциите на регионот“, како и дека Република Македонија „на ваквата доверба  ќе врати со почитување на европските стандарди и вредности, за стабилна Европа и Европа којашто штити, за сите нас“.

Денеска Агенцијата за финансиска поддршка во земјоделството и руралниот развој го објави јавниот оглас за мерките од Програмата за рурален развој наменети за општините. Министерот за земјоделство, шумарство и водостопанство, Љупчо Николовски, ги повика градоначалниците на сите општини да подготват квалитетни проекти и максимално да ги искористат понудените средства.

„Со ефикасно искористување на овие мерки ќе се решат проблемите со комуналната и патната инфраструктура во руралните средини. Наша цел е да обезбедиме достинствен живот за граѓаните од сите општини, да им овозможиме на младите да останат и да работат во своето родно место“, изјави Николовски.

Со цел поголема искористеност на средствата рокот за аплицирање е продолжен на два месеци и трае до 31 август годинава.

Трите мерки од оваа Програма, „Подобрување на квалитетот на живот во рурални средини“, „Обнова и развој на селата“ и „Зачувување и унапредување на традиционалните вредности во руралните подрачја“, нудат можност за низа капитални инвестиции во руралните средини.

Директорот на Агенцијата за финансиска поддршка во земјоделството и руралниот развој, Николче Бабовски посочи дека на јавниот повик можат да се пријават Единиците на локаланите самоуправи, Центрите за развој на планските региони, а за мерката 323 „ Зачувување и унапредување на традиционалните вредности во руралните подрачја“ можат да се пријават и Агенцијата за промоција и поддршка на туризмот како и Јавното претпријатие „Македонски шуми“.

„Барањата за пооделна мерка се доставуваат во оригинален примерок. Еден корисник може да поднесе најмногу 3 поединечни барања по различни мерки земајќи ги во предвид сите мерки од Програмата за финансиска поддршка на руралниот развој за 2018 година. Барателите кои ги исполниле условите за користење на средства за мерките трите мерки (321, 322 и 323) се рангираат со бодување утврдено во Правилникот за поблиски критериуми за избор на корисници по мерките за рурален развој. Барањата со ист број на бодови ќе се рангираат според датумот и времето на поднесување на барањето.Барателите не смеат да започнат со реализација на инвестицијата пред потпишување на Договор за ко-финансирање со Агенцијата“, изјави Бабовски.

Општините имаат можност да подготват проекти за инвестиции во локална патна инфраструктура, мостови, канализациони системи, добиточни пазари, домови за култура во руруалните средини, реконструкција на селски улици, уредување на излетнички места и инфаструктурен пристап до нив и други инвестиции.

Заменик претседателот на Владата задолжен за економски прашања д-р Кочо Анѓушев, на денешната собраниската седница посветена на пратенички прашања, рече дека Југохром ќе проработи откако и само кога ќе се постави филтер. Со тоа вицепремиерот Анѓушев, вклучително и Владата на Република Македонија, на прво место го ставаат здравјето на граѓаните и зачувувањето на животната средина.

Во преговорите со сопственикот на металуршкиот комбинат и синдикатот на Југохром Алшар потпишан е Меморандум за соработка помеѓу Владата, раководството и синдикатот на компанијата, со кој се утврдени меѓусебни права и обврски и дефинирано е дека Југохром ќе се рестартира во оној момент кога ќе добие А-интегрирана еколошка дозвола за работа.

„Владата покажа добра волја и подготвеност да се помогне на компанијата во процесот на изградба на системот за отпрашување, односно да асистира во процесот на подигнување на заем на Југохром од Македонската банка за поддршка на развојот, процес во кој сепак и самото раководство на компанијата треба да покаже подготвеност, да вложи дополнителни 1 милион евра, за да се реши целата ситуација. Доколку таксативно се направат сите услови и околности според коишто треба да проработи Југохром, но тие да не се на штета на граѓаните, Југохром ќе работи и ќе придонесува за регионот и за економијата, а ние како држава и како влада ќе му помогнеме да ја исполни обврска и да постави филтер. Да, економијата е важна, полошкиот регион е со понизок степен на вработеност, но здравјето на граѓаните нема цена и тоа е најважно, а после тоа доаѓа економијата. Ние како влада ќе се грижиме и за едното и за другото. Очекувам Југохром да биде во функција до крајот на годината, но со сите соодветни промени и исполнување на сите еколошки стандарди. Затоа, нема потреба од загриженост за граѓаните или на еколошките здруженија“, рече вицепремиерот Анѓушев.

Во интерес на вработените во компанијата и на регионот е металуршкиот комбинат да започне со работа, но дека тоа мора да се одвива согласно позитивните законски прописи за заштита на здравјето на граѓаните и заштита на животната средина, заклучи вицепремиерот.

Претседателот на Владата на Република Македонија, Зоран Заев, денеска во својот кабинет го прими амбасадорот на Обединетото Кралство на Велика Британија и Северна Ирска во Република Македонија Чарлс Гарет, по повод завршувањето на неговиот мандат во земјата.

Изразувајќи благодарност за заложбите и континуираната поддршка на британскиот амбасадор Гарет, премиерот Заев го истакна активниот ангажман на амбасадорот за време на неговиот мандат, истакнувајќи го неговиот значителен придонес за унапредување на односите меѓу двете земји.

Премиерот Заев ја истакна улогата и поддршката на Велика Британија која Македонија ја доби во клучните моменти на остварување на демократските процеси, на патот кон евроатлантските интеграциски процеси. Тој додаде дека остварувањето на главните цели, членството на Македонија во ЕУ и НАТО  создаваат  можности за интензивен економски раст, нови инвестиции и отворање нови работни места, како перспектива која ја очекуваат македонските граѓани.

На срдечната и пријателска средба, двајцата соговорници разговараа за внатрешно-политичките настани во земјата со посебен акцент на неодамна постигнатиот договор меѓу Република Македонија и Република Грција за стратегиско партнерство и решавање на долгогодишниот спор за името, при што амбасадорот Гарет ја поздрави храброста и лидерството на премиерот Заев.

Беше истакнато дека Македонија и Обединетото Кралство се посветени на продлабочување на билатералната соработка во сите сфери и беше искажано уверување дека соработката  и поддршката за Македонија и стабилен и просперитетен Западен Балкан ќе продолжи и во иднина.

Министерката за правда Рената Дескоска денеска се обрати на третата сесија на Охридската школа на природното право на тема: Добро управување и правни реформи, организирана од Центарот за стратегиски истражувања при Македонската академија на науката и уметностите. 

Според министерката Дескоска, еден од клучните елементи на концептот на владењее на правото се човековите права.
- Ние поминавме еден тежок период во Република Македонија којшто во меѓународните извештаи е запишан како систематско газење на човековите права. Ги видовме релевантните извештаи во кои се наведени примерите на масовоно прислушување, слободата на изразување беше сериозно загрозена и беа кршени човековите права и беше повредено човековото достоинство. Ние сега треба да ги обновиме механизмите коишто ќе овозможат ефикасна заштита на човековите права во нашето секојдневно живеење – рече Дескоска. 

- Другиот битен елемент кој го сочинува мозаикот на владеење на правото е супрематијата на Уставот. Видовме дека Уставот досега беше лист хартија кошта се газеше и не се почитуваше – заложбата на новата Влада е Уставот да биде свето писмо кое треба да го имплементираме во секојдневното живеење. Како правник и како министер сега, слушам различни прашања деновиве за тоа дали можеме со Законот за референдум да го менуваме цензусот за референдумот? Не може, затоа што цензусот е уставна категорија. Ако се залагаме за владеење на право и почитување на Уставот не можеме да менуваме нешто што е изрично уставно загарантирано – потенцираше Дескоска, која додаде дека Уставот е донесен со поширок консензус и како таков тој треба да и ги врзе рацете на секоја власт којашто во момент ќе посака да излезе од неговите рамки. 

Дескоска потоа се осврна на нарушувањето на поделбата на власта. Сега во овој момент имаме нарушување на системот поделбата на власта од страна на претседателот на државата. Кога тој со своите активности агресивно се меша во законодавната власт непочитувајќи го Уставот кога ќе биде отфрлено ветото, тогаш има нарушување на принципот – рече Дескоска, дадавајќи дека никој не смее да биде над Уставот. 

Уставниот суд, според Дескоска е многу важен орган во остварувањето на супрематијата на Уставот, но според министерката за правда, истиот е ставен на маргините затоа што граѓаните не наоѓаат поддршка во неговото секојдневно работење како инстутиција која ги штити човековите права – истакна Дескоска.

- Кога ги гледаме сите инстутиции во рамките на нивната улога во системот на владеење на правото доаѓаме до еден клучен елемент – интегритетот на луѓето. Вие со личниот пример кажувате дали сте ориентирани кон владеење на правото и почитување на законите, кон чесно работење. Секогаш личниот интегритет е оној кој што е клучен и овозможува системот да функционира како што треба или обратно 

Охридската школа на природното право овозможува развој и соработка на студенти на државните и приватните факултети но и обука за важни и клучни институти и невладини организации за правилна примена на законските решенија што претставуваат новина и напредок во реформирањето на правото преку предавања и размена на искуства и вештини. Целта на оваа сесија на Охридската школа е научно оспособување и усовршување на 20 студенти на последипломски студии и 5 студенти на докторски студии од правните факултети во рамките на државните и приватните универзитети во државата.

Пилот програмата „Младинска гаранција“ дава одлични резултати во првите три месеци од нејзината реализација. Податоците покажуваат дека за овој период во Скопје, Струмица и Гостивар се вработиле 419 лица, 196 почнале да посетуваат обука, а 160 почнале пракса во некоја компанија. 

Интересот за младинската гаранција е голем, досега вкупно 1532 лица се вклучиле во програмите. Овие резултатие ги надминуваат очекувањата и повеќе од сигурно е дека по завршување на пилот фазата програмата ќе влезе во целосна имплементација.

Младинска гаранција е програма на Владата на Република Македонија со кој се зголемува опфатот и вклучување на младите невработени лица на пазарот на трудот. Целта на оваа мерка, за која до крајот на годината се предвидени 8,8 милиони евра, е младите да останат во државата и да работат тука.

Гаранцијата за млади е отворена за сите млади лица на возраст до 29 години кои се невработени, веќе го завршиле своето образование и не се пријавени во АВРМ. Пријавените добиваат квалитетната понуда за вработување, натамошно образование, стажирање или практикантство. Сите овие се клучни за успешното интегрирање на младите во пазарот на трудот и намалување на одливот на образован кадар од земјата.

Гаранција за млади е активна мерка за вработување на млади лица која  се спроведува во државите од Европската Унија од 2012 година. Република Македонија е единствената земја во регионот, која не е членка на Европската Унија, а започнува со воведување на „Гаранција за млади“, како мерка за зголемување на вработливоста на младите луѓе.

Со оваа програма Владата ги следи европските младински политики и ги отвора можностите за младите во Македонија.

Во соработка со јавните претпријатија на Град Скопје, Комунална Хигиена, Паркови и Зеленило и Улици и Патишта, денеска спроведовме голема акција за чистење и разубавување на Клиничкиот Центар. 

Дополнително, во викенд-акцијата се приклучија со свои работници и општина Карпош и општина Гази Баба. 

Целосно беа искосени тревниците, уредени зелените површини и поткастрени дрвјата од страна на Паркови и Зеленило. 

Од страна на работниците во Комунална Хигиена Скопје, општина Карпош и општина Гази Баба, комплетно во целиот комплекс на Клинички Центар се исчистија улиците и се собра ѓубрето. 

Улици и патишта асфалтираа цели кракови и ги пополнија најкритичните дупки на улиците.

Викенд-акциите ќе продолжат и во следниот период до целосно системско решавање на проблемот со хигиената во Клинички центар „Мајка Тереза“.
 

Република Македонија направи голем напредок во имплементација на „меките мерки“ во енергетскиот сектор изминатава година, заклучи Енергетската заедница во „Мониторинг извештајот за електрична енергија во земјите во Западен Балкан“.

Како за споредба, во јуни 2017 година спроведувањето на меките мерки (мерки кои се однесуваат на развивање на пазарот на електрична енергија, мерки за прекугранично балансирање, мерки поврзани со регионална распределба на капацитети и вкрстени мерки) било на ниво од 38%, додека во јуни 2018 година достигна ниво од над 50%. Напредокот започна по одржување на Самитот за Западен Балкан во Трст, а во најголема мера се должи на донесувањето на новиот Закон за енергетика, во кој се имплементирани европските директиви и регулативи од Третиот енергетски пакет.

 

Јули 2017 година


 

Јуни 2018 година


 

Најголемо поместување напред има во спроведување на мерките за развојот на пазарот на електрична енергија, кои пред Самитот во Трст беа на ниво од околу 18%, за да по донесувањето на новиот Закон за енергетика достигне ниво од 44%. Преку новиот Закон за енергетика се овозможува воспоставување на пазарниот механизам „ден однапред“ во Република Македонија и во моментов, само Босна и Херцеговина, од земјите во регионот нема воспоставено ваков пазарен механизам, заклучуваат од Енергетската заедница.

Кога станува збор за останатите категории кои се споредуваат, во спроведување на мерките за прекугранично балансирање има исто така значително подобрување, а од Енергетската заедница очекуваат со донесувањето на новите правила согласно Законот за енергетика дополнително подобрување во оваа област. 

Подобрувања има и во имплементација на мерките за распределба на регионалните капацитети на електрична енергија, кои зависат од меѓусебната поврзаност на електро-енергетските системи во сите земји во регионот, како и во вкрстените мерки, со кои се влијае на дерегулација на цените и раздвојување на операторите со електрична енергија. 

Податоците изнесени во извештајот се уште една потврда дека Република Македонија сериозно пристапи кон спроведување на реформите во енергетскиот сектор, откако во јуни, по донесување на Законот за енергетика, Секретаријатот на енергетската заедница ги повлече и споровите покренати кон Република Македонија поради не спроведување на преземените обврски од Договорот за Енергетска заедница.
 

Претседателот на Владата на Република Македонија Зоран Заев и владината делегација во чиј состав се Радмила Шекеринска, заменик претседател на Владата на Република Македонија и министерка за одбрана, Бујар Османи, заменик претседател на Владата на Република Македонија задолжен за европски прашања и Никола Димитров, министер за надворешни работи, денеска во Брисел оствари средба со Генералниот секретар на НАТО Јенс Столтенберг.

По средбата во новиот штаб на НАТО, премиерот Заев и генералниот секретар Столтенберг одржаа заедничка прес конференција, на која Претседателот на Владата на РМ Заев се заблагодари за пречекот со кој се потврдува заложбата на северно - атлантската алијанса на следниот нејзин самит на 11 јули да ја активира отворената покана за Република Македонија за членство во овој воено - безбедносен сојуз.

„Ја очекуваме и официјално поканата да станеме новата, 30-та членка на НАТО. Очекуваме, заедно со нашите пријатели, во периодот кој следува, да учествуваме на церемонија на која знамето на Република Македонија ќе го добие своето место меѓу останатите земји членки на Алијансата. Тој настан интензивно го чекаме уште од 2008 година, кога беше констатирано дека нашата земја ги исполни сите критериуми, дека ги постигна стандардите на Алијансата, за да биде еднаква меѓу еднаквите“, рече премиерот Заев на прес конференцијата во НАТО.

Во својата изјава пред медиумите, премиерот Заев укажа на фактот дека Република Македонија и дотогаш, до Букурешт 2008, и од тогаш натаму активно учествува во мисиите на северно - атлантскиот сојуз. Заедно со Алијансата, нашата земја, активно придонесува во мисиите за сузбивање на глобалните закани, терористичките закани, како и заканите што доаѓаат од насилен екстремизам, а припадниците на АРМ добиваа доверба да бидат дел или да бидат главни актери во сериозни безбедносни предизвици.

Премиерот Заев укажа и на значајно место што во безбедносните  политики на Република Македонија, има и регионалната соработка.

„Договорот за решавање на македонско - грчкиот спор за името и за стратегиско партнерство со Грција, го откочи нашиот прием во Алијансата, и нашата земја го добива местото што го заслужува. Она што е еднакво значајно е што со Грција изградивме пријателство. Тоа е скапоцениот камен во нашите односи. Тоа е факторот заради кој сега нашите граѓани од двете земји можат да бидат сигурни и безбедни“, нагласи премиерот Заев и додаде дека со Република Бугарија се воспоставени односи кои долго непотребно се одлагаа, а добрата волја, политиките базирани на взаемно разбирање и почитување, се во темелите и на односите со сите останати пријатели – Албанија, Србија и Косово.

Во завршницата на своето обраќање пред медиумите, премиерот Заев им се обрати и на граѓаните на Република Македонија.

„Чекор по чекор, за само една година нашата земја го постигна она што никој не можеше да го предвиди. Нашиот пристап кој обедини силна политичка волја, искрен дијалог и подготвеност за решенија, овие денови ни донесе повеќе радосни вести и одлуки. Остануваат нашите домашни задачи. Но, сега имаме навистина околу што да се обединиме на широкиот автопат и заедно да кажеме: Да, за нашата иднина! Да, за македонската иднина. Да бидеме силни заради нас, заради нашата држава, и заради иднината на нашите следни генерации. Да кажеме „Да“ за нашиот сојуз со земјите членки на НАТО. Тоа ќе ни овозможи безбедна иднина, сигурни општества. Општества во кои ова членство ќе обезбеди амбиент за економски раст, за благосостојба на сите наши граѓани“, истакна премиерот Заев, и потенцираше дека искуствата и стратегиските документи велат дека земјите членки на НАТО се силни промотори и на економскиот раст на партнерите во сојузот.

Во делот на одговори на новинарски прашања, премиерот Заев уште еднаш упати благодарност за срдечниот и пријателски пречек од страна на Генералниот секретар на НАТО Столтенберг кој на нашата делегација им го покажа местото каде што наскоро ќе се крене македонското знаме и местото на мапата на влезот на новото седиште на алијансата со знамињата на земјите членки и со датумот на нивното зачленување, каде што е обезбедено место и за симболите на нашата земја.

Генералниот секретар на НАТО Јенс Столтенберг во својот дел од обраќањето пред јавноста истакна дека тој очекува на претстојниот Самит на шефови на држави и на влади на НАТО, ќе биде испорачана покана за преговори за членство, и дека веднаш штом ќе бидат исполнети одредбите од договорот со Грција, земјите членки на НАТО ќе почнат со ратификации на Спогодбата за членство на Македонија во Алијансата.

Генералниот секретар Столтенберг на прашање на новинарите дополни дека со исполнувањето на одредбите предвидени со договорот од Преспа, Република Македонија веднаш добива столче во Советот на НАТО и се стекнува со право да учествува во сите сесии и состаноци.

Министерот без ресор, задолжен за комуникации, отчетност и транспарентност, Роберт Поповски, денеска се обрати на РОС-РОТ семинарот, во Собранието на Република Македонија.

Министерот Поповски, во своето обраќање се осврна на медиумскиот пејзаж во Западен Балкан и влијанието на дезинформациите во креирањето на јавното мислење.

Тој, во својот говор истакна дека состојбата на медиумите во Западен Балкан, за жал, и покрај сите укажувања, според индексот на Репортери без граници, може да се опише накратко како „загрижувачка или сериозно загрижувачка“, дека трендот на ширење „шокантни“ вести – дезинформации, како на национално така и на регионално ниво, е најголем поткопувач на демократските, реформските и на евро-атлантските аспирации на регионот.

Исто така потенцираше и дека активната соработка на медиумите од регионот во насока на запознавање со состојбите во соседните држави е најголем непријател на лажните вести.

Понатаму во своето обраќање министерот Поповски додаде:

„Пред сè, поради целта на таквите квази - информации, а тоа е поткопувањето на владеењето на правото и политичката стабилност која, меѓу другото, не помалку влијае и на работата на новинарите.

Лажните вести не се само фраза, туку сурова реалност.

Тоа е ефект кој го гледаме секојдневно по медиумскиот простор, со екстремен пик на дигиталниот простор.

Таму информациите се пласираат, се појавуваат и исчезнуваат фреквентно, најчесто без трага, без можност за проверка на фактите, и без исклучок со наслови специфично осмислени да бидат мамка за кликови.

Најчесто наменети за да дискредитираат личности, заедници, општества.

Лажните вест и дезинформациите не се нешто ново.

Како пример само ќе го спомнам случајот со новинарката Џенет Кук од прочуениот Вашингтон Пост, која во раните 80-ти толку успешно ја пласираше нејзината сторија за 9 годишно дете зависник од хероин кое живее под мост со родители исто така зависници, за што доби дури и Пулицерова награда за нејзиниот труд. Но, детето никогаш не беше најдено, наградата беше повлечена, дамката на весникот остана.

Денес, користејќи ја развиената технологија, дезинформациите, сакале да признаеме или не, ги менуваат нашите општества, предизвикуваат конфликт, омраза, параноја, заговор.

Во регионален контекст, лажните вести кои се насочени кон етничка, политичка и верска нетрпеливост се заеднички непријател на трендот на помирување на земјите од Западен Балкан и нивната конечна европеизација.

Кога зборуваме за состојбите на медиумите во Западен Балкан, неминовно е да се осврнеме и на ситуацијата на големото непознавање и незаинтересираност на медиумите на состојбите во соседните земји.

Медиумите во регионот се интровертни.

Соработката на медиумите од регионот е на многу ниско ниво.

Тоа е исклучително плодно тло за регресивните сили и пропагаторите на евроскептицизам, национализам, и секакви форми на радикализам, од политички до верски и идеолошки.

Како на некој да не му одговара да излеземе од бурето барут.

Јавното мислење се појавува како концепт од постоењето на човечкото општество и се развива со еволуцијата на институциите на тоа општество.

Тоа е тоа што прави или уништува репутација, на личност, група, институции, влади.

Секој индивидуалец е засегнат од влијанието на јавното мислење затоа што влијае на неговиот секојдневен живот, а агресивното и структурирано дезинформирање, има за цел драматично да влијае на јавното мислење креирајќи ПОЛОВИЧНА слика, која на одредени поединци, групи или организации ќе им помогне да  остварат својата цел.

Владините политики во една земја се креираат со претходно испитување на јавното мислење. Тоа е лајт-мотивот за секоја Влада. Лиферувачите на лажните вести се оние кои сакаат преку константно провоцирање со полу-вистини и лаги да испровоцираат било каква форма на криза, затоа што во криза тие најмногу можат да профитираат.

Намерно го потенцирав зборот ПОЛОВИЧНА. Затоа што дезинформациите и лажните вести не би биле толку успешни доколку се тотални лаги. Нивната успешност е во тоа што се перфидни полувистини.

Немаат дефинирана форма, и креирани се да предизвикаат заплашување, несигурност, недоверба, фрустрација, а пред сè, да привлечат големо внимание.

Суштината на медиумскиот бизнис лежи во информациите, т.е. во испорачување на вистина преку објективно и целосно информирање на јавноста, со почитување на етичките правила.

На тој начин, со само регулацијата се штитат и универзалните човекови права - слобода на изразување и право на информирање, и слободните и професионални медиуми

Слободата на говор е загарантирано човеково право, но злоупотребата на тоа право, во форма на дезинформирање, наведување или пропагирање, што во случајот на Западен Балкан многу лесно се рефлектира врз целокупната безбедност и стабилност, сериозно ја загрозува слободата на говорот.

Видовме, не само деновиве туку и низ годините наназад, колку штетна може да биде пропагандата, дека тие лажни зборови честопати поттикнуваат вистинско и брутално насилство и агресивно однесување.

Затоа, како Влада, повеќе пати повикавме на конструктивна атмосфера и отворена дебата со граѓаните, без страв, заплашување и притисоци да градат сопствени ставови за секое отворено прашање.

Во една земја, активната транспарентност е најголем непријател на лажните вести и дезинформациите.

Во едно соседство, како Западен Балкан, активната соработка на медиумите е клучна како никогаш до сега за сузбивањето на трендовите на агресивно дезинформирање.

За весниците на лагата, граѓаните не се цел на вистинско информирање, туку цел за манипулација и при ескалација на страстите – топовско месо.

Идеално би било граѓаните да развијат практика на следење на вести од различни извори и да бидат критични кон информациите кои ги консумираат.

Но, не може да очекуваме секој граѓанин, што се информира од медиуми достапни на својот мобилен уред, на патот од дома до работа, или на пауза за ручек, да ја проверува информацијата пред да ја прифати како таква.

Тоа е работа на регулаторните тела, и не помалку на медиумите, чијшто простор е директно узурпиран од таквата не само нелојална, туку и не етичка конкуренција.

Клучот е во новинарската професија, не само на национално ниво, туку и на регионално. Да се само регулира и да се држи до етичките и морални стандарди.

Владите и сите политички субјекти мораат да ги поддржат овие стандарди.

Ќе ја искористам оваа прилика да ги повикам медиумите во регионот, на поголема и поинтензивна соработка во насока пред сè на запознавање на состојбите во соседните држави, затоа што обединувањето во борбата против лажните вести е една од најдобрите одбрани од нив“.