Ковачевски - Гир: За поздравување е новата енергија за соработка со Бугарија, Северна Македонија продолжува со реформските процеси со помош на Европските институции

Претседателот на Владата на Република Северна Македонија Димитар Ковачевски денеска во својот кабинет го прими Шефот на Делегацијата на Европската Унија (ДЕУ) во Скопје, амбасадорот Дејвид Гир, кому му изрази благодарност за поддршката и можноста да ги запознае претставниците на институциите на ЕУ со реформскиот процес во нашата земја, особено потенцирајќи го обновувањето на дијалогот со соседот Бугарија. 

Премиерот Ковачевски акцентираше дека приоритети на новата Влада остануваат евроинтеграциите, како и преземање соодветни мерки за совладување на здравствената и енергетската криза, кои се глобален проблем.

Евроамбасадорот Гир му упати честитки на премиерот Ковачевски по повод новата функција, изразувајќи позитивни оценки за актуелните чекори преземени од Северна Македонија и Бугарија. 

На средбата беше речено дека продолжуваат реформите и нивното динамизирање особено во областа на правосудството, борбата против корупцијата и криминалот и создавањето модерна и ефикасна администрација, како и политиките од Зелената агенда за Западен Балкан, како дел од Европскиот зелен договор.