Премиерот Заев на средба со ЕБОР: Работиме заедно на проекти за јакнење на економијата и за откочување и забрзување на економскиот раст

Претседателот на Владата на Република Македонија, Зоран Заев во придружба на министерот за финансии, Драган Тевдовски, заменик претседателот на Владата задолжен за економски прашања, Кочо Анѓушев и советникот за економија и финансии, Фатмир Бесими, денеска оствари средба со висока делегација на ЕБОР - Европската банка за обнова и развој предводена од потпретседателот на ЕБОР, Ален Пију, во состав Шарлот Рухе, директорка на ЕБОР за Централна и Југоисточна Европа, Жужана Харгитаи, регионална директорка за Западен Балкан и Анка Јоана Јоанеску, директорка за Македонија и Косово.

Потпретседателот на ЕБОР, Пију ги пренесе поздравите и поддршката на раководството на Европската банка за обнова и развој на Владата на Република Македонија во однос на позитивниот исчекор што двете соседни земји го направија со постигнување на Договор за решавање на спорот за името и за стратегиско партнерство за што даде оценка дека претставува одлична можност за откочување на многу процеси, регионални проекти и инвестициски можности во земјата и регионот.

На средбата со високите претставници на ЕБОР се зборуваше за отворените можности и полиња на кои може да се интензивира соработката во иднина. Беше оценето дека постојат огромни потенцијали на соработка во областа на енергетиката, производството на електрична енергија од обновливи извори и процесот на гасификацијата, за развој, изградба и рехабилитација на патната и железничка инфраструктурата, за локален економски развој, но и за поддршка на приватниот сектор, на нови инвестиции и за зајакнување на економијата. Се зборуваше и за можностите со кои ЕБОР може да помогне во процесот за надминување на финансиските проблеми на општините, за нивна финансиска стабилизација и подобрување на менаџментот со јавните финансии на локално ниво со цел подобро и поквалитетно опслужување на граѓаните и бизнисот. На состанокот се разгледаа и можностите за забрзување на реализацијата на одредени проекти и начините на кои преку заедничка соработка може да се откочи економскиот раст на земјата и да се зајакне економијата.

Потпретседателот на ЕБОР, Ален Пију рече дека Европската банка за обнова и развој е подготвена да го интензивира својот ангажман во процеси и проекти коишто ќе значат откочување и забрзување на инвестициите и на економскиот раст на земјата, а посебно ја нагласи поддршката на приватниот сектор и домашните компании.

Премиерот Заев изрази уверување дека тоа се цели и на Владата на Република Македонија кои ќе се постигнат низ взаемната соработка со ЕБРД и други меѓународни финансиски институции и изрази огромна благодарност за поддршката и помошта што Европската банка за обнова и развој во континуитет и ја пружи на Република Македонија.