Средба на премиерот Заев со амбасадорката на БиХ, Бабиќ: Заеднички заложби за заеднички напредок на државите од регионот во евроинтеграциите

 

Претседателот на Владата на Република Македонија, Зоран Заев, денеска се сретна со Лепа Бабиќ, амбасадорка на Босна и Херцеговина во Република Македонија.

Потврдени се заложбите на Република Македонија и на Босна и Херцеговина за унапредување на меѓусебната соработка и за заеднички напредок во евроинтегративните процеси, што беше разговарано и при скорешната посета на владина делегација од Македонија, предводена од премиерот Заев, на Сараево.

Заеднички е констатирано дека е од голема важност, земјите од целиот регион, да добијат позитивни препораки во настојувањата кон евроинтеграциите.

„Владата на Република Македонија работи на реформскиот процес, на добрососедски односи и се заложува за европски перспективи на целиот регион“, рече премиерот Заев.

На средбата се разговараше за конкретни исчекори во интензивирањето на соработката меѓу Република Македонија и Босна и Херцеговина, како што е организирање заедничка владина седница и унапредување на односите во областа на економијата, образованието, туризмот.

Констатирано е дека спогодбата за признавање на возачките дозволи меѓу двете земји, како и претстојното овозможување на граѓаните на двете држави да патуваат со лични карти, значително ќе ја олесни комуникацијата меѓу граѓаните и меѓу-ресорската соработка, што се очекува да дава побрзи и повидливи резултати од интерес на потребите на граѓаните и на двете држави.

 

Категорија: