Премиерот Димитриев и вицепремиерот Пешевски остварија средба со претставници на „Југохром“

Претседателот на Владата, г-дин Емил Димитриев, и заменикот на претседателот на Владата, г-дин Владимир Пешевски, денеска (понеделник, 16.01.2017 година), остварија средба со претставници на синдикатот и на менаџерскиот тим на компанијата Југохром.

На средбата која двете страни ја оценија како конструктивна, беа разменети мислења и податоци во врска со актуелната состојба со која се соочува компанијата Југохром.

Владата цени дека во решавањето на овој предизвик треба да се земаат во предвид интересите на вработените, интересите за почитување на еколошките стандарди и интересите на компанијата.

Владата смета дека постои можност, простор и зона на прифатливост за усогласување на овие три интереси, без ниту еден интерес да наштети на другите интереси.

Деталите и опциите за усогласување на трите интереси квалитетно би можеле да се разработат од страна на политичката Влада.

Постоечката Влада во рамките на своите ингеренции ќе продолжи да има полно внимание на оваа тема, и останува отворена за дискусија со сите заинтересирани страни.