Македонија и САД се две пријателски земји со исклучително развиена соработка на полето на одбраната. Оваа соработка претставува несомнен бенефит за развојот на двете земји, но и за зацврстувањето на мирот, слободата и безбедноста во регионот и светот, е заклучокот од денешната средба на министерот за одбрана Зоран Јолевски и амбасадорот на Соединетите Американски Држави во нашата земја, Џес Бејли.

Како што денеска соопшти МО, министерот Јолевски се заблагодарил за поддршката за членство во Алијансата и посочил дека Македонија е подготвена и „де јуре“ да стане полноправен член на НАТО, имајќи го предвид нивото на реформи и интероперабилност, како и фактот дека припадниците на АРМ во континуитет повеќе од една декада даваат придонес во мировните мисии во Авганистан односно мисијата ИСАФ и новата мисија „Одлучна поддршка“. Во тој контекст, Јолевски додал дека за членството во Алијансата постои политички консензус и поддршка од граѓаните на Република Македонија.

Владата на Република Македонија, посочил министерот Јолевски, е определена да продолжи со реформските зафати бидејќи граѓаните на Република Македонија имаат корист од нив, а тие позитивно влијаат и врз процесите за интеграција во НАТО и Европската Унија, кои се наши стратешки цели.

Јолевски се осврнал на реформите во одбраната, унапредувањето на стандардот на припадниците на Армијата, развојот на Воената академија и вниманието кое се посветува на развојот на капацитетите и вештините на секој припадник на АРМ.

Амбасадорот Бејли високо го оценил нивото на одбранбена соработка меѓу двете земји и истакнал дека САД високо го ценат долгогодишниот придонес и поддршка од Република Македонија на активностите и заложбите на НАТО за воспоставување мир и безбедност во Авганистан.

- Репутацијата на македонските мировници како вистински професионалци со развиени вештини и способности, е добро позната во Вашингтон и кај земјите-членки на Алијансата. Нивните заложби се високо ценети во НАТО, истакнал амбасадорот Бејли, стои во сооптението.

На оваа средба, прва откако амбасадорот Бејли ја презема функцијата, министерот Јолевски му посакал многу успех и исклучителни резултати како амбасадор на САД во Република Македонија.