Пет германски компании компании од областа на прехранбената индустрија и рударството  од покраината Западна Саксонија се во посета на Македонија за на лице место да се запознаат со можностите што ги нуди земјава за водење бизнис. 

Денешниот македонско-германски бизнис форум во Стопанската комора на Македонија е резултат на неодамнешното претставување на можностите за инвестирање во земјава во Германија, рече министерот за странски инвестиции Бил Павлески на паузата на форумот. 

- Пред неколку месеци имавме успешен бизнис форум во Германија и врз основа на тоа денеска имаме делегација на германски компании  кои ги разгледуваат можностите за бизинис во Македонија. Заинтересирани се за производи кои се поврзани со изградба на пумпи, за рударството, прехранбената индустрија, за вложување во една од слободните индустриски зони, а има и компании заинтересирање за инвестирање и тргување со разни производи, изјави Павлески.

Компаниите, нагласи, воглавно се запознати со предностите што ги нуди Македонија, а деновиве ќе имаат и дополнителни средби со македонските институции. - Се надевам дека некои од нив ќе се одлучат да започнат бизнис кај нас, рече Павлески.

Николајчо Николов, претседателот на Македонската асоцијација за рударство, прецизира дека на денешниот состанок ќе им биде презентирано на германските компании што се Македонија нуди во рударството.

- Сметам дека има отворени можности за конкретно инвестирање во повеќе рудници, особено во рудниците за метали. Во некои од нив веќе се завршени геолошките истражувања и се очекуваат контретни инвеститори, така што имаме што конкретно да им понудиме на германските компании, рече Николов.

Нагласи дека очекува конкретни резултати од денешната средба.

Михаел Шмит, директорот на Претставништвото на германското стопанство во Македонија, прецизира дека денешната посета е резултат на серијата активности преземни во минатото.

- Мината недела имавме посета на германски компании кои работат во областа на малите хидроелектрани, а денеска од прехранбената индустрија и рударството. За германската индустрија суровините имаат централно значење во 2012 година и е од огромно значење тие добро и безбедно да се обезбедат. Заедно со Стопанската комора од Кемниц изработивме студија за да го одредиме потенцијалот на Македонија во оваа област и сигурни сме дека тоа  ќе биде интересно за цела Германија, а не само за Западна Саксонија, рече Шмит.

Се надевам, додаде, дека во иднина тоа ќе доведе до значајни резултати.

Хорст Рихтер од Стопанската комора Кемниц истакна дека целта на денешната посета е да видат колку Македонија е конкурентна во однос на другите земји. 

- Како покраина сме мали и немаме големи концерни, но имаме средни претпријатија кои имаат интерес да инвестираат во Македонија, рече Рихтер. 

Проценките добиени од геолошките испитувања покажуваат дека ресурсите и резервите во делот на метали суровини во Македонија изнесуваат 471 милиони тони и 106 милиони тони во неметални суровини.