Министерот за здравство Никола Тодоров заедно со студентите од Факултетот за Медицински науки при универзитетот „Гоце Делчев“, лекарите од штипската Клиничка болница и од источниот регион денеска преку видео-конференциска врска присуствуваа на операцијата на пациент со катаракта, која беше изведена на Очното одделение во Штип.

- Ова е еден историски ден за здравството во Штип, затоа што првпат се направи операција, интервенција на отворено око, која беше пренесувана и следена од огромен број на студенти и доктори од штипскиот универзитет и од поширокиот регион. Станува збор за интервенција која што досега во Штип се работеа со класична метода, која е интервенција за катаракта, која што медотода имаше подолги болнички денови и подолг период на повраток на видот, рече Тодоров.

Тој забележа дека со набавката на скапата медицинска опрема и со ангажирањето на познатиот офтамотолог од Србија, Иван Стефановиќ се случува модернизација на Очните одделенија и на лекарите, а офталмологија во Македонија брзо напредува. 

Стефановиќ заедно со началникот на Очното одделение при Клиничка болница-Штип, Страфил Газепов по извршената операција со фако метода на 48 годишен пациент, рече дека веќе тртети ден врши обука на лекарите од оваа одделение и е задоволен што веќе и можат самостојно да ги извршуваат интервенциите.

- Деновиве она што го видов во операционата сала, опремата и условите во Штип можам да кажам дека ретко се гледаат толку добри услови за работа, вели Стефановиќ.

Началникот на Очното одделение, Газепов рече дека извршувањето на вакви современи операции е овзоможено со добивањето на опремата, која е вредна околу 600.000 евра, но и со обуките од еден врвен офтматолог.

Операциите на катаракта во штипската Клиничка болница од денеска и официјално почнуваат за сите пациенти од Штип и источниот регион.