Ние сме целосно подготвени за понатамошните чекори во предпристапниот дијалог на високо ниво со ЕУ. Овој процес го имаме сфатено многу сериозно, особено затоа што гледаме дека и Европската комисија сериозно гледа на процесот и даваме се што е во наша моќ за што побрзо да се испорачаат резултатите кои се очекуваат од Република Македонија.

Ова е одговорот од премиерот Никола Груевски на новинарското прашање како го оценува предпристапниот дијалог со ЕУ, во пресрет на доаѓањето на еврокомесарот за проширување Штефан Фуле на почетокот на мај.

- Реформскиот процес не запира, напротив дополнително се забрзува, истакна Груевски денеска по отпочнувањето на градежните работи за проширување и реконструкција на булеварот „Свети Климент Охридски“ во Скопје.

Во Владата на Република Македонија, посочи, работат околу 35 тима, а посебно се активни околу 10 - тина, кои имаат конкретни задачи и рокови околу двете поглавја 23 и 24.

- Еверокомесарот Фуле доаѓа во мај, а тоа ќе биде продолжување на дијалогот започнат пред извесен период. Во меѓувреме се трудиме, иако е краток периодот од само околу месец и половина, да испорачаме колку што е можно повеќе резултати. Се разбира тие немаат преголеми очекувања за овој месец и половина, но сепак и во тој период се трудиме да направиме колку што е можно повеќе работи за да се препознае одреден напредок, изјави Груевски

Тој потенцира дека сепак, најважно е пред се тие резултати да бидат од корист за граѓаните на Република Македонија.